上星期有一日, 滕滕打電話嚟要求我買兩把風扇, 一把買比個工人, 而另外一把係買比普通話老師! 原因係因為普通話老師次次上堂都要係另外分社好急速咁行過嚟, 次次都好趕, 而滕滕覺得老師好辛苦, 所以就要求我買把風扇送比個老師, 仲要同話我: Kitty 老師係咁猛嘅太陽下趕嚟, 你估佢唔辛苦架!
我知佢辛苦! 但係你有冇諗過你亞媽搵錢番嚟都一樣好辛苦嘅呢???
放假放埋聽日, 呢個暑假就完喇, 所以就諗住帶隻豬仔去冒險樂園都玩下啦, 一入商場, 就見到有"樂施會"嘅staff 係到做推廣! 了解左一陣, 我就問滕滕佢想唔想捐錢比d窮人, 等佢地有衫有鞋著有乾淨水飲呀, 如果佢想就要負出代價, 就係會每個月少左一份禮物! 當時滕滕好快咁答左我"好!", 但跟住又再問"咁我嗰份係咩禮物嚟架?!"
哈哈~ 你份禮物係咩嚟?! 我都答唔到你喎,問題係你少左份禮物啫! 既然滕滕已經點頭, 我就參加左每個月供款喇!
其實我都幾開心滕滕肯去幫人, 起碼佢明白呢個世界係有人需要幫助, 而佢亦肯去幫助人! 施比受更有福, 因為既然有能力去幫人, 咁每個人只要付出小小, 呢個世界就更美好!
"聖公會青山聖彼得堂幼稚園" <----呢間學校簡直係垃圾, 完全係垃圾! 我當初揀呢間學校, 並不是因為佢係區內"名校", 而係知道佢多外籍老師, 我覺得可以經常會接觸到外國人, 所以間學校係學習上面都幾努力會令到小朋友容易接受英文!
今年滕滕K3, 經過係兩年嘅學習過程, 我完全體會到呢間學校有幾垃圾, 仲有個校長係幾咁廢!
呢間學校, 成日係到講自己有幾勁, 有幾咁新嘅教育理念, 有幾咁好嘅資源提供! 但可憎所有嘢都只係講!
間學校真係"好似"好勁, 就例如佢地有上網借圖書, 強調唔係有好多間學校都有呢種服務, 但借左幾次書之後, 我就發現有好多問題! 1.網頁搵書好麻煩, 一D都唔清晰, 指引唔明確, 分類仲有D九唔搭八! 到入到去某一頁搵書時, 每一頁都有約10本書, 就咁睇個first page, 跟本就唔知本書借左未, 下下都要再click 入去睇下係唔係"已借出", 即係講頭一頁有10本書, 即係本本書都要click入去睇下借左未, 續頁續頁click, 有時真係click 到第10頁先可以借到第1本書! 2. 到比我搵到本書借喇, 又要去第二個網頁到填form, 要填書名, 本書嘅code, 我仔叫咩名, 我嘅聯絡電話! 其實每次入去網頁借書都一定要登入架啦, 到我搵到書要借, 又要再填過d資料一次! 3.到填晒d資料, 要借d咩書之後, 一click 就話已經ok喇, 但都要等3-5日, 要等唯一一個嘅書記小姐搵晒我想要嘅書出嚟, 打電話通知我, 我先可以去攞! 呢個system, 我同學校反應過, 因為咁麻煩嘅程序, 又唔方便搵書, 跟本就係想人唔好借! 但可惜, 呢間學校要話比人知佢有幾勁, 又想提交一份好嘅report 比同教育局申請x款, 就係咁sale 自己, 成日話唔係好多學校有網上借書服務! 我同個廢校長講過, 建議佢地改善個system, 但廢校長就第一時間張個責任推卸, 佢話呢個system 只係係荒間買, 並不是佢地整出嚟! 廢校長呀, 你咪當我傻先得架, 荒間買嘅, 都可以比錢人去執去改吓化, 你學校個個月收我地八百幾蚊學費, 就連小小錢都唔想攞出嚟???
一間學校已經有十幾個外籍老師, 係唔係以為好勁呢! 我初初都以為咁樣, 會令到滕滕容易d接受&鐘意英文, 但原來唔係囉! 早幾個月嘅一次觀課時, 我睇驗到呢間學校, 又一間廢物學校! 係觀課其間嘅一課英文堂, 係就係西人上, 但係當個西人老師發問問題之後, 有D英文比教好嘅小朋友好自己即刻舉手想答, 而好幾次呢D西人老師見呢D咁積極嘅小朋友即時舉手, 結果好順理成章就叫左呢D小朋友答! 我真係好想問, 咁其他冇舉手嗰D小朋友呢? 你地有冇了解過佢地係唔識吖? 唔理解吖? 定係唔想答呢? 如果冇舉手嗰D小朋友原來係唔識, 咁唔識嗰D, 就永遠都唔識囉, 因為個老師冇去揀其他嘅小朋友去問! 咁我真係唔明囉, 收左咁多錢學費, 但請番嚟D西人老師, 跟本都唔識去引導小朋友嘅!
係我心目中, 做教育嘅, 就應該好有愛心, 從各方面去幫助小朋友, 但到左K2之後, 我真係深深咁感受到呢間學校, 跟本就只係想去搵錢, 表面做到好好, 好似好完善, 好似做晒各方面嘅需要, 但可惜原來, 只係有頭威冇尾陣, 好似好多嘢提供架, 但我覺得所有嘅嘢, 跟本佢地只係為左想學校更加出名, 完全都唔係幫助小朋友!
仲有一年就讀完, 我真係好想好想快D離開呢間咁垃圾嘅學校! 因為我一聽到校長回答我嘅問題時, 佢只係想推卸責任, 成日只係識講, 有時D嘢要用比較大嘅資金去做! 我真係好想串佢一句, 你收一個學生八百幾/九百幾蚊一個月, 你地都唔夠資金咩???
既然會生番, 我又洗乜怕呢, 所以今朝起身, 頂唔順嗰種感覺, 真係已經去到頂點, 所以真係完全冇考慮就去左攞把鉸剪, 兩下, 我就剪短晒把頭髮!
成世人我樣樣嘢都好長情, 只係對把頭髮就短左小小, 半年唔攪佢我會開始憎佢, 今次我真係憎到佢死, 因為游水游到傷晒, 上次係樓下剪又比個師傅亂剪, 所以剪完之後都覺得自己勇, 最多剪完唔掂咪出去比人剪囉, 怕咩!
自7月14日去完牙科覆診之後, 我就日日嘅下午係到整d dots exercise!
一日連續咁整差唔多4粒鐘, 結果我隻手筋膜炎!
滕滕出世之後, 因為湊佢時用錯力, 嗰時都試過一次筋膜炎架喇, 所以我都費事去睇醫生, 自己搵藥酒up下佢, 等佢慢慢好囉~
老公問我嗰d dots exercise有冇得買, 有就唔洗自己整到手痛啦! 我夠知亞媽係女人啦, 有得買我都買左喇, 日日整幾個鐘, 你估真係唔辛苦架咩!!!
5月嗰時就已經報左名去玩, 等等等等, 等到今日終於可以去, 但真係諗唔到會樂極生悲!
呢個係充氣嘉年華, 所有都係充氣出嚟比小朋友去跳跳跳, 點不知玩第二個遊戲時, 滕滕就比個小朋友衝埋嚟撞甩左隻門牙! 當時我正係龍尾再排多次隊, 諗住比佢地可以玩完再玩, 但點不知堂家姐打電話比我, 叫我即刻去前面, 因為個仔撞到!
一見到滕滕, 佢當然係到大喊啦, 而且仲成口血! 當時D工作人員已經開始一個一個咁埋嚟, 救護員都行埋嚟同滕滕檢查, 睇完之後就問我需唔需要CALL 白車喎! 滕滕一聽到話call 白車入醫院, 佢就仲更大聲d喊話: 我唔入醫院呀~!!! 當時我第一時間安慰佢, "入醫院都係比醫生檢查下你d牙, 我而家打電話比牙醫叔叔, 如果牙醫叔叔有開門, 我地就即刻搭的士去比佢睇, 咁我地就唔洗入醫院架喇!" 好彩, 我個frd 今日有開門, 跟手我就叫嗰到d人即刻同我call 部的士番入屯門睇牙!
呢個遊戲, 家長係唔准入去, 而且亦都係封住左我地睇唔到, 所以當時一見到滕滕咁, 我就問嗰到d工作人員, 裏面嘅位置你地冇人睇住架咩??? 當時某位工作人員即時答我有, 而且仲有幾個係唔同嘅位置! 既然有幾個, 我好想知道你地d同事係唔係係到發緊夢, 點解冇一個睇到件事嘅發生, 亦都冇人睇到有小朋友係裏面衝埋去我個仔到??? 當然, 佢地答唔到我我問呢個問題!
上左的士之後, 滕滕都開始冷靜落嚟, 只係佢唔肯吞口水, 怕仲有血! 今次呢個的士司機, 真係我遇過最最最好人嘅一個, 佢聽到我係咁安慰滕滕, 佢就堅持去油站買左兩條雪條比我地, 但可惜滕滕一樣嘢都唔肯食! 滕滕冷靜左之後就開始攰瞓左, 我見到個仔咁, d眼淚不由自主咁流出嚟, 因為我真係好肉痛, 無啦啦比人撞到甩左牙隻, 另外一隻就鬆晒, 真係好赤呀我! 司機見到我係到喊, 佢都好好咁不停安慰我!
其實我唔太擔心撞甩牙會對d牙有咩問題, 因為我有隻門牙都係比細佬用麻雀掟甩, 我唔開心, 就真係只係肉赤, 而如我所料, 我frd 檢查完之後, 甩左嗰隻仲有牙碎係裏面, 撞刑鬆晒嗰隻就都段左所以都要剝埋! 而因為係比人撞甩, 咁有1/3機會長出嚟隻恆齒會歪!
自滕滕上左的士之後, 佢都冇再喊, 我覺得佢真係幾勇敢, 我諗比著有d小朋友, 應該都仲不段咁喊緊! 跟住比我frd 剝牙打針時, 佢都冇驚到喊, 因為我途中不斷咁同佢講嘢, 問佢一陣想買架咩類型嘅車! 所以睇完牙之後就去左買左兩架車, 買完仲去食嘢潻!
我個仔, 我真係覺得佢好勇敢!
呢個世人好多人都好八卦, 尤其係d鐘意走嚟攪亂檔嘅人!
係YMCA上堂, 我就識左個咁樣嘅女人! 佢以為自己好識教女, 但係其實下下都就到個女不得了, 樣樣都縱個女, 個女4歲都要個亞媽陪上堂! 我在旁睇到都覺得好攪笑, 因乜原因4歲都要陪上堂呢, 又唔係第一日上, 都上左成年啦! 不過, 呢D嘢唔關我事, 嗰個又唔係我個女!
偉大嘅FB, 真係幾有用, 有D嘢有時我唔識, 可以係上面問人, 好多人都好樂意去解答! 識嘅咪答我囉, 唔識嘅唔該麻煩唔好插咀! 係YMCA識嘅呢個女人, 佢就係咁多事! 我問人IP CAM APPS D嘢, 佢就插埋咀埋嚟話好多係免費, 仲講到我唔多識去搵! 亞姐, 究竟你知唔撚知我問緊乜架??? 你屋企又冇裝CAM, 你知乜嘢叫互相可以對話咩??? 我真係好想講, 乜你又識搵我想搵嗰樣嘢咩???
又有一次係個group 到講學數學, 滕滕就學緊奧數, 佢唔知唔識又插入嚟講, 亞姐, 究竟你知唔知人地係到討論緊乜架??? 就連人地所討論緊嘅嘢你都唔知, 九唔搭八咁講左另外d嘢, 唔該麻煩你收收你把口啦! 如果我係你老公, 我真係好頂九你唔順囉! 唔識唔緊要, 但唔好扮代表啦!
7.14星期一去見完眼科醫生, 已經係第二次覆診話滕滕冇進步過!
其實我都有小小心裏有數, 因為我耐唔耐會問滕滕係隻左眼而家點, 佢都係答我: 仲有好小好小蒙查查!
"仲有好小蒙查查", 我可以感受得到, 即係小小蒙, 可以睇到, 可以接受, 亦即係可以唔需要再用力用功去用隻左眼, 因為大致上係睇到嘛! 所以果然不出我所料, 我問隻豬仔, 佢真係咁樣諗! 所以醫生話佢冇進步過, 我一D都唔出奇! 而出自醫生把口話冇進步, 就可以再一次確認我講嘅係冇錯, 等滕滕相信我嘅說話!
暑假開始, 唔洗番學都當然都要遮眼, 所以我安排左功課要佢遮眼時做係訓練左眼! 但係見完醫生之後嘅星期二三四呢幾日, 除左星期三之外, 我日日都火嚟, 因為我要求貼簿, 居然個幾鐘都未貼到一頁, 所以星期二就比我罰到佢貼到夜晚九點半, 而且將所有嘅玩具全部收起未來幾日亦都冇得睇電視!
試問一個小朋友完全冇晒娛樂, 佢可以係到做乜? 冇玩具玩冇電視睇唔准落公園, 真係冇嘢可以做囉! 而我咁做, 其實都幾變態, 但係我唔迫佢, 唔通尤得佢咩! 所以星期五就2266同拆掂, 我問佢究竟想點, 如果唔想貼簿, 咁有咩佢可以我幫到佢!
佢答我佢寧願連線佢都唔想貼簿, 所以7.21 開始我上網搵, 搵有關連線嘅exercise 比佢! 因為網上搵番嚟嗰D exercise D字都係好大隻, 所以我要自己改晒佢, 而且仲要增加no., 原本係只有1-30嘅, 我就自己改到1-80 or 1-100.
日日係咁整都唔係講少, 整左兩個幾星期整左四十幾張, 我發覺隻手指公開始痛, 應該就好似同之前筋膜炎一樣咁.......所以我係時候要停一下!
我好希望呢D exercise 可以對滕滕有幫助, 因為係政府睇, 個死人醫生話冇嘢做可以幫到佢隻眼, 但係去私家到就提供左類似嘅exercise 比我!
真係好唔明, 乜做醫生唔係有仁慈救人嘅心嘅咩? 做醫生做到咁仆街, 做嚟把鬼咩!
