靚!

過年前出左bonus, 一直身痕左好耐, 真係好想好想買嘢! 不過自從有左on-line shopping 之後, 就好似唔夠過引, 好似買完嘢都唔覺自己買過嘢嗰下慘!

過完年番嚟, 雖然係一直病唔想做嘢, 成個人都好懶, 但係shopping 呢家嘢就真係唔知點解懶唔到囉!

上個星期, 我淘左個袋! 有生以嚟, 我第一次淘d咁貴嘅嘢, 個袋為起港紙要七百蚊!

攞到手, confirm全個都係真皮, 唔錯! 唯一就係, 學 Jessica話齋就係冇底, 所以唔可以裝好多好多嘢, 不過, 我番工要帶嘅幾樣嘢都可以放晒落去, 連埋個飯盒都可以, 所以, 真係唔錯!

用左幾日, 我就開始有d擔心, 就係怕佢d皮唔 "come", 怕皮面會容易甩! 其實而家係HK求其買個袋都要幾舊水啦, 而家呢個仲要係全皮, 仲想點啫~

忙忙忙

放年假放左10日, 第10日先開始嚟病, 已經病左一個星期, 睇左兩次醫生, 打左兩支針, 係藥房配左支藥水食, 都仲未好番!

成個人好唔精神, 冇心機, 嘢唔想做, 夜晚咳到成點幾兩點先瞓到, 又唔可以錫滕滕, 就連近d都唔可以!

今朝番到公司之後, 係公司附近搵個醫生睇, 食左兩次藥, 感覺上好左, 咳又少左, 不過就係眼瞓左d! 個人精神左d, 所以就要開工去做嘢, 係做私人嘢!

滕滕下學期已經開左學, 又係時候同佢上網去借書睇! 話就話唔多至在借書張獎狀, 但係既然自己都想借d書比個仔睇, 咁就當然有張獎狀就更好啦!  不過, 因為張獎狀就限時限刻囉! 算啦, 病左咁多日就懶足咁多日, 都係時候要起身喇!

下個月就係滕滕生日喇, 今年都係搵番嗰幾個朋友仔嚟玩下咁, 唔叫太多人, 因為間屋細, 又冇club house, 我又唔會同表姐一樣咁去搵下其他朋友個屋企club house嚟玩, 費事攪住人之餘又要人幫, 到時又爭人人情, 我就最唔想架喇!  個birthday cake就已經睇緊, 希望而家訂唔太遲啦!

上個星期去買左部卡啦ok之後, 就出左去深水埗睇d 無線咪, 買左set 嘢番嚟第二晚, 即係尋晚就買左d 碟番嚟試唱, 都未玩夠一晚, 其中一個咪就已經開唔到喇! 唉~ 所以今晚又要我出去換!

個人精神d就好似九十幾樣嘢等住我去做! 忙忙忙忙忙忙忙忙忙忙...........

好準時~

滕滕一歲時, 剛好係3月!

滕滕出世以嚟, 從來都未試過有一晚係發晒皮4瞓唔到, 就係除左呢晚, 我相信係痕到辛苦到不得了! 跟住第二朝一早就帶佢去睇DR, DR話係應該係比昆蟲咬架!

第二年, 剛好又係3月!  今次唔係隻腳, 而係做左豬頭!

因為剛剛換左個電視, 仲有個電視盒係屋企,  所以當時我估係因為個電視盒有虱!

到左呢一年嘅年尾, 我見到團購有間清潔公司做滅虱, 所以買左張coupon想係過年前滅下間屋, 因為之前都試過係藥房買d滅虱蛋番嚟炸過間屋唔得, 所以見二百幾蚊咁平就試下喇!

因為清楚公司d單一時間太多, 唔可以過年幫我做, 所以delay到3月! 而呢一年, 就好平安咁渡過左!

而今年, 我已經係過年前留意團購, 睇下又會唔會有special做, 因為我意識到應該每年回南天, d虱又會出嚟!

點不知, 新年都未完, 初十都未過, 滕滕就已經.......

心都痛埋, 因為隻左手針左5 啖, 腫到直頭好似吹脹左咁~

為左唔想佢唔小心整到d眼耳口鼻, 所以包住左嚟瞓, 同埋番學都包住左!

點不知條友仔覺得包住左好得意, 佢仲話番到學校係咁叫同學睇下佢隻手喎  !

好彩間清潔公司個老闆好人, 星期一打比佢, 佢就可以即晚上嚟同我滅虱!  本來都諗住過左年先book, 點不知今年咁早就回南天, 攪到滕滕又變左豬頭喇!

幫滕滕搽藥膏時, 真係一路搽就一路心痛, 因為我知道佢好痕好痕, 但係都要叫佢忍下啦, 最多痕時就搽多d藥膏囉~ 好可憐呀, 我個滕滕!

難逃一劫

點解次次放完假都係咁, 年年過年都係咁, 放完大假都一樣係咁, 都要病!

星期六晚, 打完個乞嚏就開始feel到條氣管有d扯氣, 到瞓時feel到唔對路, 就去飲咳藥水!

今朝起身, 都仲係有小小扯氣, 我就知嚟料喇! 去完睇戲, 再去jusco買晒我想買嘅嘢之後, 就番屋企下面配藥, 食左兩次都唔得, 把聲都開始變埋, 睇嚟聽日第一日要番工前, 點都要去搵下Dr喇~

舉腳艱難的時候~

今日約左契妹去睇big 4 演唱會, 都幾期待今日, 因為覺得睇呢4條友會好多爆笑時候, 唔止係齋唱, 因為係人都知, 張生有幾多首歌唱吖!

雖然好期待今晚, 不過時間越嚟越近出門口時間, 個心就越唔捨得滕滕, 因為過年對足佢咁多日, 其實可以的話我一定會帶埋佢去, 因為真係難捨難離架~

搭緊車出去, 滕滕已經打左三次比我, 問我係唔係搭緊車, 係旺角落車等轉車時, 滕滕又再打嚟, 問我係唔係已經食完飯番嚟喎! 真攪笑喇亞仔, 目的地都未去到就已經食完番嚟?! 唔係亞化~

我唔係成日睇演唱會, 所以坐係山頂時都幾鬼驚, 因為好斜同好高! 我坐左係到唔多敢郁, 而契妹個男友轉左半個身過嚟講嘢我都驚(係佢郁我都驚)!

仲係到影相喎, 我幾鬼驚佢跌左個電話落下面呀!

今次睇呢場演唱會都幾好睇, 成11:40分先完場, 下次再可以值得一睇!

失暈媽媽~

今日已經係年初三, 仲要係初三晚臨瞓前先記得仲未派利是比個仔喎!!!

我呢個亞媽幾大懵吖, 所以渣渣淋即刻比番兩封利是我個肥滕滕先!

放左五日假, 真係忙到亞媽都唔得閑喇! 因為本身滕滕星期五同星期六嘅英文班係ymca, 所以都唔會放假, 我唔使番工, 想唔使送個仔去上堂都幾難囉!  而且買左張coupon去花鼠玩, 星期六係last day, 所以上完堂, 就即刻出去玩番轉喇!

年初一二三, 三日都出去, 只係星期一老公先放早, 其他兩日就只得我同滕滕食自己, 所以唔理咁多照出去拜年喇!

晚晚都十二點幾一點先瞓, 真係辛苦過番工囉! 如果唔係, 都唔會今時今日先記得未比利是個仔!

公司團年飯~

一年一度嘅公司團年飯, 今日下午出左去食喇! 一如以往, 又係去食鮑魚餐, 一人一份唔多唔少!

仲有個飯同魚都冇影相, 因為老闆想快D食完快D走, 話比地做多轉生意喎! 真係趕到呢! 食碗蟹皇翅都已經熱到條"利", 到最尾食個燕窩時又係要快倒入口! 講真, 咁樣食法, 真係唔係好過引囉~

食鮑魚餐都好, 因為唔使食龍蝦! 之前老闆叫龍蝦, 次次叫都幾斤! 大佬, 幾個人叫幾斤仲咩先, 下下都要打包再食多幾日! 食左幾年都係咁, 真係食到想嘔, 而家見到龍蝦都怕怕!

番埋今日就放假啦, 第初九開年又再食多次lu~!

新年禮物~

今年公司送嘅新年禮物, 好遲先到, 真係等到頸都長埋先等到今日!

相對舊年, 今年好似少左, 但係d金莎就大盒左, 如果計番價錢就價值差唔多, 而且應該仲多左, 因為尋日老闆就已經派左每人一支紅酒同一支VSOP!

好彩我去嘅地方拜年唔多, 所以應該都唔使再買禮喇!

家長日!

 

SO SERIOUS, SO NERVOUS TODAY!!!

尋晚同滕滕講, 我今朝約左老師見面! 佢問我仲咩事要見面呢?! 我話係因為老師想同我講下你係學校曵唔曵囉! 咁你話比我知你係學校曵唔曵吖! 而個答案係: 我唔知呀~

老師同我講, 滕滕係學校都唔算好百厭, 只係有時都幾多嘢講啫~ (咁即係口水多過茶啦  )

而老師話, 滕滕攞左個獎, 係畫畫獎, 因為佢畫畫進步左好多, 而且好有想像力, 創作天份好強, 所以有份禮物係送比佢架喎~

其實我唔係好feel到滕滕幾有天份, 而係覺得我比佢學左咁耐畫畫, 唔多唔少都應該懂得畫畫技巧囉!

另外, 老師派左個file, 係老師嘅評價嚟!

另外仲有講關於滕滕係學校嘅日常生活!

總括嚟講, 應該都算ok, 不過不失!