獨立!

我本身個人好獨立, 盡量都唔唔需要幫(但係我就好welcome去幫人), 所以我都希望滕滕可以好似我咁, 比較獨立d!

我買左呢個鐘比滕滕, 我同佢講話個鬧鐘一嚮佢就自己起身(番學), 唔好等姐姐叫佢!

已經一個星期喇, 佢連個鐘嚮都聽唔到, 所以我而家等緊, 等緊佢幾時自己可以識起身唔洗人叫~

睇下幾時再爛~

由滕滕開始識行時, 屋企d嘢就已經不停咁壞啦, 爛啦! 到到今時今日都成四歲, 叫極都唔可以好好咁愛惜d嘢! 究竟係唔識點樣去愛惜吖, 定係個人本身粗魯呢???

係十幾年前, 我買左個cam番嚟, 係可以當電腦嗰d眼, 又可以當相機用, 因為嗰時先開始有digital camera, 但係都仲係好貴, 所以買個平平地番嚟玩下! 而係今年嘅某一日開始, 滕滕就嗰住呢個假嘅digital cam係屋企扮影相, 而且成日出街都話要帶出去(扮影), 所以我就係公司搵左部舊canon比佢用喇!

佢就更係開心啦, 有部真相機比佢玩喎, 所以佢成日都話要帶出街!

不過, 好境不常, 玩左兩個月就壞左喇! 而我, 今日就常試係公司拆開部相機嚟睇, 點不知原來一部相機係好複雜架!!!

我拆開一層, 就發現原來每一層都有鏍絲, 所以我拆拆下, 我投降喇~~~

又好彩, 朋友搵到部sony比我, 個鏡頭不能申縮嘅, 所以希望可以玩耐d啦!

新玩具~

有個媽媽介紹左個帳篷係去沙灘用嘅, 結果一呼百應, 一次過淘左12個落嚟!



冇咁住咁大個, 因為裏面應該可以坐4個大人係到打麻雀都得!  計埋嚟香港嗰程運費, 大約100港紙到, 真係唔貴囉! 仲要今日收左貨之後, 係yahoo團購到見到賣 $188! 真係so左~

好期待~

 

下個星期六就去上游水堂喇, 直至尋晚, 我先同滕滕講我地今日約左姨媽個朋友, 佢帶我地去一次游水嘅地方, 咁下個星期就我地自己去, 所以叫滕滕佢幫下我手認下路!

去完視察左地方之後, 就見到有個室內遊樂場, 滕滕就叫住話想玩喎, 結果比佢玩左差唔多成個鐘! 點不知一走就開始有微雨喇, 出左屋苑過左對面馬路, 就開始越落越大, 直頭倒水咁~



好彩有D亭係到比人坐咋, 如果唔係就一定濕晒! 結果要等左差唔多半個鐘先可以走.........

帽s~

滕滕下個星期開始去游水班喇, 所以我已經預備好晒所有游水用品比佢之餘, 仲要為自己預備下!

因為泳池旁係冇瓦遮頂, 只係得把太陽傘, 而我係即黑嗰D人, 所以我買左D帽standby!

堂家姐個仔都係就嚟去學游水, 所以就孖埋佢一齊買喇!

最頂嗰頂就更係滕滕架啦, 幾鬼靚呀!  我唔鐘意有窿, 同埋要有咁大得咁大, 所以下右嗰頂係我嘅, 而下左嗰頂就係堂家姐嘅!  滕滕起初戴堂家姐嗰頂先, 佢一戴上去就即刻話: "媽咪, 點解呢頂咁似倒垃圾嗰d婆婆嗰d帽嘅?!" 真係當堂笑到我爆囉     !!!

另外, 我仲買多左頂, 係可以卷埋嘅, 因為方便我放係手袋日日袋住, 因為開始夏天喇, 搭巴士如果冇得揀要坐係右手邊, 咁番工嗰個幾鐘就會曬足全程! 所以我唔想咁快就出咁多雀斑囉~

再加上呢頂帽都只係RMB12, 其他顏色就只係RMB10, 所以我一次過買左3頂落嚟比亞媽同比奶奶!  因為真係抵到爛!!!

一個迷!!!

我都唔明滕滕而家呢間咩學校嚟!!!

因為今個星期日係父親節, 所以係學校整左隻咁樣嘅錶番嚟!



真係撞鬼囉~~~

已經都唔係第一次, 上次已經整左呢兩樣嘢, 我都已經想即刻掉左佢!

撞晒期!!!!!!

上個月已經開始PLAN 6/7/8月D星期日同滕滕去邊到玩! 買左兩張coupon係整macaron嘅, 一張家姐約左我7.14去, 一張就打算約滔滔媽8月去, 而啱啱呢個星期二, 小b媽就攪左個整pizza 班, 原本就7.7嘅, 不過, 因為有個媽媽7.7唔得, 所以就順延左一個星期就變左7.14号嘢!

我答左小b媽話14号ok之後, 我先發現原來嗰晚答應左家姐夜晚去整macaron! 時間其實唔會撞嘅, 因為pizza 係下午, macaron就六點半先開始!

但係, 今日就比我發現BB 醫生嗰邊, 又係7.14有function!!!  BB醫生嗰邊星期日好少, 因為好多時都要就D院捨, 所以有星期日就真係好難得囉..........

其實BB醫生我真係好想好想去, 因為5/6月都冇探訪過, 但係7月呢次我真係唔可以去, 因為PIZZA嗰邊我真係好想去, 同埋我今次有個好朋友話想帶埋個女去玩整PIZZA, 所以今次真係有人同我頂都不能甩底!!! 

點解成日都撞晒期架  !!!

西餐的端午節

真係唔明白, 點解可以約人都可以約約下冇影嘅? 呢樣嘢係老公嘅特質, 亦都係同佢大家姐嘅性格一樣! 

端午節早一個星期, 老公已經同奶奶講話約佢D家姐食飯, 以為咁早講定咁有planning啦, 結果, 到左端午節正日我再問, 原來係不了了之左~  可能老公見我聽到, 諗住等我約呀?! 唔係啦~ 我唔多老嚟你二家姐, 我又點會主動去攪食飯呀!

臨時臨急咁就出左去奶奶到, 結果搵左間西餐廳食飯!

呢間嘢d嘢食算不過不失, 最好味就係個菇pizza, 同埋個半熟三文魚! 而個牛就真係唔得, 仲要係幾唔得! 見到塊牛咁靚, 原來係唔得, 真係好失望囉!

係fb到淨係post左最上嗰張相, d朋友就話滕滕唔like同我影相喎~ 其實, 佢都不知幾鐘意我就真!

我屋企有老鼠!

呢條友仔病左成個幾月, 終於都食完藥停左幾日, 應該今次都真係好番晒喇!  之前見佢尾聲咁濟, 我都會希望佢乖d就比小小糖氹下佢, 可能佢忍左好耐, 又聽話左咁耐(唔食糖), 就開始有小小忍唔住喇~

今日奶奶入嚟, 因為食飯唔夠位所以要拉開張枱, 一拉開真係嚇襯我囉~



一見到我就問: 係唔係屋企有老鼠??? 點解地下會有d朱古力糖紙架??? 一定係老鼠嚟啦, 如果唔係點會偷食完都唔識掉垃圾!!!

我一路講, 滕滕就一路縮後, 我就一路望住佢!

我都唔明, 點解呢隻豬仔咁蠢架, 偷食都唔識抺咀嘅 !

BLING~ BLING~

自從買左部UV機番嚟照甲油之後, 真係愛不釋手囉!

我而家用我自己D甲油, 第二日先用甲油膠去搽係面, 就有呢種GEL GEL 地嘅效果, 真係唔錯! 唔錯!

好彩~

終於都等到今日! 因為今日同老豆約左去睇report, 所以尋晚成晚都瞓唔著, 又攪到成三點幾四點先瞓到~

個report 話照肺嗰到冇咩大問題, 心電圖出左都冇咩問題, 但係咩全血指數出話唔知咩血球大粒小小, 好大可能會同飲酒有關, 而驗盰功能出個report就話某種蛋白質有小小變異. 

聽到醫生話佢條氣扯, 最大因數都應該係食煙令到氣管收縮! 同埋, 醫生即時都check到話佢身體含氧量係ok嘅, 算係正常可以接受!

因為醫生仲有嘢要再驗, 係針對性, 咁又要再過多兩三個星期後去再睇report! 希望到時又唔會再有d咩大問題啦~

大發現!!!

尋日同表叔一家食完父親節飯之後, 我地就同表姐&表弟一齊搭巴士番入屯門!

表弟坐左係我隔離, 所以我就開波問佢, 佢二家姐個老公究竟係點!

因為之前表姐擺過我上枱, 話我話覺得佢細家姐好有問題, 個老公點解一年三百六十五日都唔會出現, 乜節日都唔會有影, 就係之所以表姐擺過我上枱問過, 所以我今次一問, 表弟一五一十講晒比我聽!

原來個男人真係比我估中左, 真係有老婆嘅, 但係我就最估唔到, 原來而家嗰個仔, 其唔係佢而家嗰個"老公"嘅!

好嘢好嘢  ! 表妹佢真係冇得彈, 下下仲出乎意料之外! 拋父棄子之後, 出去混左冇耐(三年後), 成日都不甘寂寞咁去搵男人, 跟住又比人攪大左個肚! 最攪笑就係有左又唔落嗰下先得喎, 落仔佢都唔係未試過架啦, 唔通佢又攞有左呢樣嘢嚟迫個男人結婚, 個男人今次唔就犯???

而而家呢個男人, 都算係咁喇, 每個月比小小錢我表妹, 就當左係細老婆, 個仔就以為呢個係老豆, 無啦啦多左個女人又有仔都肯! 不過又咁講, 可能我表妹都係至在有個男人比下錢佢洗就唔介意卦! 但係, 做二奶, 係唔係都搵個有錢D嘅男人呢? 男人又唔係有好多錢比佢, 又肥又唔靚仔, 都唔明佢點解更係鐘意呢D咁嘅男人!!!

忙碌的整天!

今朝, 同番工差唔多時間就要起身喇, 因為奶奶買左飛一齊去一日遊, 而且仲有得睇鴨仔潻!

所以唔洗叫好多次, 滕滕就起身喇! 

老到老人中心, 我預期會有好多唔同年紀嘅人都會一齊去, 因為奶奶話今次買飛好難買, d人晨咁早就去排隊, 所以我估好多老人家嘅屋企人都會一齊去, 每張飛$78, 仲有buffet食, 真係抵到呢~ 不過, 去到時原來我估錯晒, 我只係見到幾個後生, 其餘全部都係耆英嚟, 仲要一個小朋友都冇, 只得滕滕一個!

不過唔怕, 我個滕滕見慣大場面, 去過幾次老人院, 見到咁多公公婆婆都冇咩異樣, 奶奶叫佢叫佢d朋友早晨, 佢都一一咁叫, 只係有一個比較中性d嘅婆婆, 佢就話: 我都唔識佢嘅!

 

   唔識??? 你呢到個個都唔識架啦, 只係呢個婆婆唔係咁好樣之嘛, 你就話唔識人, 乜呢到成百個公公婆婆你識晒呀!!!

由老人中心一起行, 未上車就已經有人問奶奶, 呢個(即係我)你個女呀?! 一路問, 問到去到酒店食lunch都仲有人問緊! 乜個新抱一齊去真係咁奇咩?! 乜奇得過我奶奶之前跟我一齊番我鄉下咩?!


今日都算係咁喇, 雖然係熱, 但係唔係好猛太陽, 所以我好慶幸我只係食左兩粒頭痛藥就已經ok喇!

今日滕滕都真係幾乖, 由出發到4點番到屋企都係under control 之內, 一叫又即聽, 又肯幫我手照顧嫲嫲, 所以真係要比個very good佢!

去完大半天遊之後, 我地去左奶奶屋企, 沖晒涼, 而且仲瞓左成個鐘, 因為夜晚我約左表叔一家同我地一家食父親節飯! 呢餐飯冇咩溝通, 因為實在太多人喇, 一共13大3細, buffet 嘅長枱關係, 跟本就唔會講到嘢, 所以成餐放提, 都只係好似我地自己一家人咁食飯, 一路食一路講嘢, 而表叔佢地, 講多過10句都冇!

今次食飯都算好順利, 我pass左個責任比我表姐收佢一家人嘅錢, 所以我表妹今次冇走數, 因為我表姐都係, 一毫子都唔會蝕比佢亞妹架!

Happy dinner

我從來都冇轉過工, 都只係轉過一份咁大把, 所以嚟嚟去去都只係得一班舊同事! 有人生日, 我都會攪攪佢, 出嚟食餐飯! 今個月就有4個人生日喇, 所以食餐好D架囉!

今次搵左間意大利餐廳, 原本一行10人, 但係去到食飯前嗰一日, 其中有個生日嘅, 就話唔嚟喇! 到我地今日去佢鋪頭問佢(因為會經過), 佢先話佢唔食西餐, 又唔想掃我地興(因為我帶左紅酒出嚟), 所以叫我地照去唔洗預佢喎!

我地出嚟食飯, 盡就都就到個個OK, 今次仲要係其中一個壽星話唔得喎, 真係幾鬼掃興! 因為我已經落左DEPOSIT, 所以冇得cancel一定要去喇!



其實我地呢班人算係咁, 次次吹雞都盡出, 仲要大家互就! 雖然以前做嘢都有argue, 但係以前d唔開心嘢, 都已經忘記晒lu~

好鬼死鐘意!!!

一見到, 再睇下個SIZE, 即買!!!

幾鬼難得搵到個紫色皮袋, 仲要隻色咁鬼靚!!!

而且番到屋企一睇, 原來同我有對鞋嘅顏色好襯架喎~~~ 真係開心死!!!

靚鞋~

呢對鞋, 我買左兩年, 兩年都未著過! 

其實我真係幾鐘意呢對鞋, 因為實物係紫色D, 買佢, 都係因為個色好SHARP好靚, 但係買左咁耐冇著到, 亦都係呢個原因, 隻色誇過頭! 

我好少鞋係咁堅嘅顏色, 實在真係好難襯衫! 今日一著, 原來都好舒服架喎, 真係睇佢唔出!

笑死!

尋日, 聽到已經好好笑, 因為滕滕"愔"住個咀, 但係又好大聲咁同個工人講: "姐姐! 你可唔可以唔好同媽咪講我曵呀! 你同佢講話我乖吖! 好唔好啫~~~!" 佢條友仔, 以為"愔"住個咀我就聽唔到, 但係"愔"住又大大聲咁講喎! D小朋友, 真係幾傻呢  !

今日係個CAM到聽到滕滕同個工人嘅對話仲好笑:


滕: 點解你成日都做錯嘢架啫~?!
工: 我冇呀!
滕: 你仲話冇!!! 許老師話呀, 唔可以成日投訴人地架嘛!
工: 我冇~
滕: 我都話啦, 許老師話唔可以成日去投訴人地架, 你就成日同媽咪講我曵! 咁你都仲話冇! 我真係好嬲你架!
工: 咁好啦, 你嬲我啦!
滕: 我唔係鬧你架, 只係好嬲你咋!

我覺得, 最好笑係最尾嗰句! 因為上次黑雨嗰日, 我話個工人時, 滕滕搶住咁話我: "點解你成日鬧姐姐啫! 你唔好成日咁惡鬧佢啦, 佢好唔開心架!"  所以先小人後君子, 佢就話"我唔係鬧你架!"

到左佢瞓醒左之後嘅一陣, 我又聽到滕滕又講: "你而家做錯事, 我好唔開心呀! 如果你下次再係咁, 我真係唔會原諒你架! 我比次機會你, 你唔好再咁喇!"

我聽到, 都忍唔住又笑囉~! 因為"你而家做錯事, 我好唔開心呀! 如果你下次再係咁, 我真係唔會原諒你架! 我比次機會你, 你唔好再咁喇!" <---呢D說話, 係我平時同滕滕講架囉!

天堂與地獄

尋日朝番工搭巴士, 差D比人博懵!

個亞叔, 都唔知堅瞓定流瞓, 總之就越瞓越過, 我就越"吞"越過, 而且隻死人手仲差D掂到我!

不過, 首先, 既然個亞叔"好似"瞓左, 咁我就擺明影番張相先!

我平時一慣作風, 坐我隔離嗰個如果成個身"i"晒落嚟我到, 我會好大聲咁係巴士到講: 唔該可唔可以瞓好d呀??? 而今次, 我原本都打算係咁, 但係唔知仲咩我一拍個仆街亞叔, 佢就即刻縮開! 咁之後, 我就唔知點解冇講到出嚟喇! 諗番, 真係蝕左, 下次真係要講!!!

今朝搭車, 就又另一番境像喎! 今日坐我隔嚟係一個年青人! 一上車好熱, 我就"拮"高小小去較大個風口啦, 唔知係唔係個年青人驚我唔夠高呢, 我較左大風, 再想整一整個角度, 佢就以為我整唔到, 同我較番細個風速喎! 我話唔係, 我話想較大, 只係想再較下個角度啫, 因為好熱! 吖~ 點不知佢又幫我較喎, 較完仲問我OK唔OK喎~!

Enjoy~~~

曾經表姐極力勸我, 千祈千祈唔好比滕滕同我一齊瞓, 如果唔係就永遠都甩唔到身!  其實, 到而家, 我真係好彩好彩冇聽我表姐講, 而且滕滕而家仲日日咁同我一齊瞓, 瞓瞓下仲會攬實我!

我好鐘意耐唔耐去聞下佢, 睇下佢有冇出汗出到嗅晒, 亦都好鐘意一晚去咀佢幾啖; 有時我未瞓, 聽到滕滕係到發開口夢, 我都會去搭下口問佢邊個曵.  呢D事, 差唔多晚晚都會做.  因為同佢一齊瞓, 無非都係想咁樣啫~!

所以我覺得就係因為咁, 滕滕好黐我, 我一放假就黐到我實一實!

我唔介意冇晒自由, 因為我知道佢唔會黐實我成世, 到佢開始八九歲, 佢就開始唔跟我出街, 亦都開始越嚟越少攬住我........

老公個外甥, 今年15歲, 今年農曆年時去奶奶到拜年, 嗰次見到呢個外甥, 真係令我SURPRISE, 因為佢變晒, 唔like我地同佢講嘢, 唔like我地問佢嘢, 亦都唔like我地幾個大人自己講嘢, 因為佢全程黑面, 覺得我地好煩, 好嘈(其實唔係好嘈, 我地都只係係到閑談), 總之一句, 就係唔老嚟! 以前嘅佢, 好內儉, 好怕醜, 唔出聲, 問佢嘢佢好斯文咁笑笑口答你, 滕滕攪佢佢都係微笑住話佢好曵.  只不過係冇見半年, 佢就已經變左咁.

我見到老公個外甥係咁, 所以係年頭時我問我個姨甥仔, 估下佢一年後都會唔會變成咁吖! 可惜, 唔到一年時間, 半年都冇, 上個月同姨甥仔去飲茶, 大家傾計咁傾, 討論下點解佢d成績退步左咁多時, 姨甥仔居然係我面前變臉!!!

我見到佢變臉, 我就即刻講, 睇嚟原來唔洗一年時間, 兩三個月你已經變左姨丈個外甥咁, 玩變臉!!! 姨甥仔聽到我咁講, 佢就答我, 係唔想我講咁耐(講左15分鐘到), 因為佢明白喎!

當然明白就更係好啦, 但係我怕你以為自己明, 其實原來係唔明咋!

馮小姐個大女差唔多年紀, d態度又係咁! 所以我成日都諗, 究竟以前細個自己係唔係咁嘅呢???

而家, 我係到倒數緊, 因為仲有幾年時間滕滕係會黐實我, 過唔知幾多年, 滕滕開始就唔會要我喇~