你出嗰份糧, 唔見你問我???!!!

個同事今日去左威爾斯check, 攪到成下午兩點幾先走得, 佢走嗰時打比我, 話比我聽個dr又點, 遲d又要去唔知咩醫院又去驗d 咩, 又話好多假要請, 又話攪到而家先走, 都未食飯!

 

我叫佢食左飯先番, 佢又話唔知係邊到食, 一係買麵包番嚟公司食, 我同佢講, 你食麵面不如番公司煮個公仔麵啦! 跟住佢即刻同我講, 佢唔食得公仔麵喎! 我問佢點解, 佢話佢個fd(我都識)話佢而家有左唔食得公仔麵喎!

 

真係天方夜譚!!! 佢呢個fd同佢講, 佢可以食辣椒油, 但係就唔可以食公仔麵!!!  所以佢咁同我講, 我都第一時間串佢: "咁我就真係唔明喇, 可以食辣椒油, 但係唔食得公仔麵! 所以你都係唔好問我喇!"

 

跟住佢番左嚟, 我一句都冇問過佢點, 但係就過左一陣,

佢就問我: 死啦! 我同唔同老闆講呀?!

我都好快答左佢: 我點知你呀!

同事: 我唔知點講好呀, 我可以點講呀!

我:     點講! 咪就咁講囉, 你想點講就點講啦!

同事: 不如你倍我入去吖?

我:    你估而家去見家長咩, 使唔使倍你入去呀!

同事: 我好驚呀, 都唔知點講!

我:    都話你想點講就點講囉!

同事: 我真係好驚呀, 我驚我唔識講呀!

我:    唔見你出糧嗰時問下我點用!

同事: 哈哈! 你玩嘢咩!

我:    你自己去啦, 而家番學見家長咩!

 

對答完之後, 我就冇理佢! 跟住同事就番左埋去佢自己個位到, 係到沈思, 諗下點同老闆講佢!

 

有事搵我嗰時就問我點! 你行去廁所洗橙嗰時, 唔見你問下我洗唔洗嘅?!

 

幾叻喎!

今日第一日下午tea比滕滕食字母粉, 個工人話佢好鐘意食, 仲食晒成碗, 唔錯喎, 都幾叻仔呀!

因為尋日比左麥皮+保衝爾牛肉汁佢試, 但係佢食每一啖都反胃, 所以我諗要過多幾日先可以比麥皮佢食, 不過今次要係麥皮+牛奶喇!

點解加保衛爾佢試先呢, 因為我食開牛奶麥皮, 就唔鐘意食咸, 所以我想佢接受左咸嘅先! 因為如果第日去街街, 帶保衛爾一定方便過帶牛奶啦, 而且牛奶會變, 保衛爾就唔會嘛!

不過, 而家已經confirm左, 保衛爾係失敗嘅!!!

你覺得點呀?!

今日放工去左super market買字母粉比滕滕食tea, 開始新嘅一頁!

買完粉, 突然好想食雪糕或者雪條, 所以就買左盒dreyer's石板街番屋企喇!

今次食，都係好樣衰，不過食完第一啖就已經 her住要第二啖喇!

唔知, 今次又有咩感覺呢? 係唔係發覺, 雪糕原來係好好味嘅呢!

你係唔係係到氹緊我呀???

尋日個同事去左我嗰個婦產科醫生到做檢查, 因為佢屋企有遺傳"威廉士症", 係其中有截染色體冇左, 所以尋日佢同dr fan講左之後, dr fan 好幫忙咁幫佢搵左佢同學係威爾斯即刻排期, 可以係今個星期五幫佢做個詳細檢查!

佢今日一番嚟就係咁講佢見dr fan 嗰時點點點, 仲係咁話我介紹比佢嘅dr fan 真係好好, 仲好熱心咁, 幫佢搵資料!  講真, 我介紹比朋友嘅, 一定唔會係衰嘢先啦! 同埋, 如果dr fan 唔好, 我都唔會咁鬼鐘意佢啦! 所以佢一講話dr fan 真係好好人嗰時, 我就同佢講: 更係啦, 我識嘅人, 都有番咁上下架!

係中午開飯嗰時, 佢第一次問我, 同我講, 唔知點同老闆講! 因為佢將要成日請假!

我個心諗, 點講, 咪就咁講囉, 你鐘意點講就點講啦, 你想試探我, 睇下我有冇同老闆講過, 定係你想我教你點講呀! 我覺得兩樣都係囉!

所以我同佢講, 咁你自己諗清楚囉! 一句, 咁就算喇, 我唔想又上當呀! 因為我唔想幫你諗!

到左5點幾, 我要包板, 所以係佢後面個work station 到包, 包包下, 佢又問我, 話唔知點講! (............亞姐, 你鐘意點講就點講啦!!!) 我同佢講, 你想點講就點講囉, 咁你有大假架嘛, 就算你攞大假, 都冇問題啫, 又唔係advance leave!!!

你可唔可以用下個惱架, 你個惱生草架, 乜嘢都問我! 自己諗下得唔得! 屋企上網續約又問我! 男朋友個女d嘢又問我! 見dr fan 又問我! 平時攞假點同老闆講又問我! 問問問, 問咩啫! 我老公又問, 我亞媽又問, 我細佬又問, 佢地係我屋企人就更係冇問題啦, 但係你連朋友都不如呀, 問咩啫!!!!!!!!!!!!!!!!!!!!!!!

 

 

滕滕咁樣, 唔代表似我!

老公而家對住滕滕, 有時都會係到大叫, 因為滕滕見到佢隻腳損左, 結左d焦, 就會專登行埋去, 係咁 liu 同 mei 佢d焦!

行開左一陣, 又行番埋去mei過! 每次老公都會大叫咁講: "軒軒呀! 點解你好似你媽me咁, 一見到人地d焦就係到mei架!!! 你知唔知好痛架!!!"

其實所有小朋友都會係咁架啦, 無啦啦隻腳有d黑色嘢係到, 唔mei你就奇啦  !

咁樣, 並唔代表似我架, 只不過代表, 我好似小朋友一樣, 都係咁得意囉    !

每日金句

< 4月26日 >

我買左條大肚褲著呀, 不過洗左之後, 吊腳呀!

......

....................

......

...

真係有d問題, 得嗰個幾月就去學人著大肚褲, 又話八十幾蚊好鬼貴, 兜一大個圈嚟問我攞大肚衫褲!

你男朋友做廚架嘛, 佢煮飯比你帶飯嗰時, 叫佢煎隻蛋比你駁長番條褲囉!

< 4月28>

佢之前叫我同佢bkg我睇嗰個婦產科醫生, 尋日睇完番嚟, 今朝早就一早行入嚟同我講佢睇醫生嗰d嘢, 一路行入嚟, 一路就摸住個肚!

dr話你而家有兩個月, 實質你就得嗰個半月, 你學人摸住個肚把鬼咩, 你而家有幾大個肚呀, 你嗰個本身就係肚腩嚟架啦, 冇嗰樣, 整嗰樣!

 

 

拉爆!

老公攞住部單鏡問我知唔知咩係拉爆, 問我有冇聽過!

拉爆? 唔知喎! 原來係咁.............!

呢兩張都係我嘅傑作, 唔知拉得好唔好呢?!

笑爆咀的一輯相!!!

尋日終於都同左滕滕去公園玩喇! 天氣都ok啦, 冇太陽, 但係又唔凍, 所以都好啱時候!

 

一定要帶個相機落去影下相, 因為又係我地同滕滕嘅第一次!

 

 

 

 

 

 

 

我揸機d 相, 都算係幾正常, 但係老公揸機, 我就真係唔知佢影乜, 一睇, 我就笑到眼水都出左嚟!

 

喂, 請問呢張影咩呢?

 

 

呢張, 我叫佢影我拖住滕滕, 但係佢就影到..............

 

我問: 請問滕滕去左邊樹呀?

 

我再問: 老公, 究竟你影D相, 可唔可以有番D美感架???!!!

 

跟住佢比我睇, 呢張咪有美感囉!

 

 

真係想頂佢!!!

送給滕滕的生日禮物!

今日終於都攪掂埋第一次去影樓嗰d相喇, 不過真係好難係180張到撰25張, 因為有d影得好靚, 跟本唔捨得唔要, 所以我地最後撰左total 70張 solfcopy!

 

我地由4點半到開始撰, 撰到成差唔多6點, 但係點解我地成6:45先走得呢? 就係因為個sales 唔放過我地! 我地本身只係諗住加 solfcopy, 但係唔知係唔係我地撰得耐, 個sales 係咁走埋嚟sale 嘢!

 

第一次, sale我地加多成四千幾蚊(唔記得包d咩), 不過我地冇理佢, 因為我地已經有心理準備佢地好似d婚莎鋪咁, 所以唔理佢, 我地再繼續撰, 過左一陣, 個sales 又嚟, 今次係加多三千幾, 不過我地又唔理佢! 當我地撰晒我地想要嘅相之後, 個sales 見要加多$1700, 跟住打蛇隨棍上, 叫我地加多一千蚊, 就有一本10x10嘅相簿同埋一張8x8嘅相送埋!  因為本相簿加$1000就真係底, 所以我地決定要埋! 不過, 個sales 見我地要埋本相簿, 佢又叫我地加多$300, total 即係加多 $3000, 就可以做VIP! 係呢個時候, 我同我老公都二話不說話唔需要喇, 不過, 個sales 就死纏爛打, 又話做左VIP 之後, 介紹5個朋友嚟影相, 就可以送多一次我地而家影呢個$988 嘅套餐喎! OH, sorry! 我即刻同佢講, 我冇朋友架, 我d朋友已經絕左交喇!

 

糾纏到6點半, 個sales 頂我地唔順, 就放過左我地, 簽埋d單, 睇埋個video(個vidoe 又要加$880), 埋單total $4568 就走人喇!

 

如果唔係, 見d相真係幾靚, 我都唔彩佢! 同埋本相簿真係幾精緻架!

 

 

 

 

 

 

 

 

 

 

 

 

 

 

 

好難食咩?!

今日老公冇OT, 因為我問佢, 我地係幾耐之前見過面, 佢冇答我, 就咁係到笑!

其實一路之前我都冇出聲, 尤得佢OT, 因為既然而家有機會搵多D, 就尤得佢, 不過有時我都想襯住放假, 可以一斉出下街架嘛, 所以佢今晚同明天就冇答應補更喇!

所以黃昏五點幾佢起左身之後, 就同左我一齊去買餸, 食完飯我地就去左黃金海岸到行左一陣喇!

係黃金行左一陣, 去左麥當當到食雪糕, 而滕滕係第一次食雪糕, 而且之前未試過食D咁凍嘅嘢, 所以第一啖嗰時, 佢個樣就好似食左D好苦嘅嘢咁, 乸埋個面口好好笑! 見佢咁嘅樣, 就更係即刻攞個相機出嚟影佢啦! 蝦, 一影住佢, 個樣又冇咁衰喇喎! 影唔到, 就算喇! 但係收埋左個相機, 佢又嚟喇! 簡直係玩嘢!

乜咁樣可以減到肥咩?!

我真係唔明, 仲咩滕滕成日都要做呢個動作?!

無時無刻佢都係咁! 唔通可以減到肥? 

幾耐之前, 我地見過面呢?

因為一早約左朋友食飯, 所以原本今晚番通宵嘅老公, 都冇得見!

我計一下, 我地究竟幾耐冇見過呢...........! 好似唔記得星期一定二夜晚見過一陣, 跟住一直到而家都未見過喇!

老公呢排發錢寒, 成日不停咁OT, 連放假嘅時間佢都OT埋!

咁點呀!!! 自從佢掉左過去新隧道公司到做, 到而家已經幾個月, 係呢幾個月就不停咁OT, 如果仲係未請夠人, 都仲可以繼續有OT! 我問佢, 都過左幾個月啦, 點解都仲未請夠人架! 佢話請都請左好多, 但係都不停咁有人走!

咁死喇, 如果係咁, 咁我地以後咪一個星期加埋都唔夠24小時見面??? 

佢嘅答覆就係, 佢想搵多D錢!

唉............! 咁我可以點應你呢?

如果...........

如果人唔需要經過喜怒哀樂, 咁你話幾好呢!

屋企人有親情, 朋友有友情, 拍拖有愛情, 咁係唔係人間真係有情呢?

我發現, 原來唔係架! 唔係你想要有邊種情, 就有邊種情, 而得到左, 就要知道並唔係必然!

以為得到左又或者覺得係應份嘅時候, 原來先知道只係自己一雙情願, 到嗰時先發現自己都已經好傷! 因為已經去到一個不能自拔嘅地步!

唔知道個傷口幾時先好番, 但係我知道時間可以沖淡一切!  如果要強迫自己唔好再諗, 唔好再想, 咁係唔係可以即刻可以忘記呢?

如果可以, 我都好想, 但係可惜事與願違, 原因就只係得一個, 因為我真係好在乎!

因為我在乎, 我先至會唔開心!

因為我在乎, 我先至會有希望!

因為我在乎, 我先至會緊張!

因為我在乎, 我先至會埋怨!

不過可惜呢個世界好多嘢都唔到我去決定! 因為好多嘢都係勉強冇幸福!

所以我只有同自己講: 算把啦!

玩嘢咩!

今日攞左個 notebook番公司, 因為想入d data, 可以方便我係屋企做嘢, 所以食完早餐就開始整理喇!

 

因為個notebook有wireless, 所以我突然醒起, 我可以係自己部PC到加個Router,  等個notebook可以上網, 咁我就可以係公司個電腦到send番mail比自己, 然後係個notebook 到收, 咁我咪唔使燒D data落DVD到, 然後由DVD copy番落個notebook囉! 嘩, 當堂覺得自己幾醒呀!

 

因為個Router係老闆之前係屋企用過, 所以set左password, 就係因為set左password, 就攪到我頭都暈埋! 呢到都唔係最暈嗰到呀, 最暈係駁線, 要移開張枱, 又要整過d插蘇, 嗰下先攪到我身水身汗呀!

 

攪左個幾兩個鐘, 終於都攪掂! 不過我個同事(而家開始唔再係朋友啦)過左一陣問我點解未見我on-line喎!

真攪笑, 係msn到見到我, 但係又問我點解仲未on-line!

亞姐, 你究竟識唔識架???

因為我地有個file, 係share docs, 要我個腦開左, 佢先可以係我到攞文件整嘢, 但係佢開嚟開去都開唔到, 所以就問我, 點解仲未見我on-line喎!

亞姐, 你應該係話, 嗰個 share docs個file你開唔到, 咁咪得囉, 咩未見我on-line啫! 問都唔知問乜!

 

原來我加左個Router, 嗰個share docs 個file, 佢真係開唔到, 原因係因為個Router 影響左d數據, 所以佢開唔到!  再者, 我開條link睇屋企個IP cam, 開嚟開去都開唔到, check 完一大輪先知道, 都係個Router 影響!

 

頂你咩! 我咁辛苦攪左咁耐, 仲攪到身水身汗, 原來影響左咁多嘢! 結果, 我係自己個PC send 晒d files出去, 係個notebook 到收晒之後, 就要拆番個Router走!!!

此情不再!

尋晚寫原篇blog, 跟住又自己諗下諗下, 我應該放棄佢, 真係要張佢降grade, 唔好做朋友喇, 只係做同事啦!

 

老公今朝同我講, 叫我以後都唔好咁蠢, 中佢計! 其實你估我唔知咩! 我真係蠢得咁緊要咩! 我只不過諗住, 朋友一場, 好多計都唔想同佢計, 但係可惜, 我真係忍無可忍! 

 

不過, 我真係唔想再咁痛苦, 如果佢唔再當佢係朋友嚟看待, 我心情就會好過d, 所以日後, 我都唔會再對佢心軟, 我唔會再體諒佢, 而且唔好再諗我會對佢好!

 

大家關係就好似普通朋友一樣!

國家自掃門前雪!

做朋友, 唔使講咁多, 用個心嚟做就得喇, 我開始發覺我呢個同事+朋友, 原來係好自私!

唔知真係我蠢定係我成日搵藉口去幫佢, 因為佢上個星期開始好似我有左咁, 日日食完飯, 都食個水果! 食水果, 其實係一件好閑嘅事, 但係今個星期初, 老闆同我講, 見到佢攞住個橙入廁所洗, 跟住我就發覺同留意到佢做呢樣嘢!

洗橙! 因為佢覺得d橙皮污糟, mei 原之後雙手就會直接掂到d橙肉, 佢怕食左d污糟嘢落肚!

咁點解我之前陀住滕滕嗰時, 佢唔提醒我嘅? 佢咁做, 咁即係係佢自己身上就會小心d, 而朋友就唔理咁多? 因為唔關佢事, 唔係佢食?!

我真係越諗越嬲, 因為我一直都攞個心出嚟對佢, 而佢, 就好似視而不見!

我有時問, 係唔係我自己小家, 成日怪佢呢樣嘢, 嗰樣嘢, 如果我個心放開, 其實所有嘅事, 都唔係一d咩事! 但係可惜, 日日見到佢做埋d咁嘅嘢, 我真係放唔開囉! 仲越嚟越對佢反感!

老公話, 佢第一次有左, 係咁架嘛, 更係想人人attent 係佢身上啦! 咁我話, 唔見我嗰次有左滕滕, 成日都係到講埋d咁嘅嘢!!!

今日, 我叫佢, 下個星期去我介紹比佢嗰個婦產科醫生到嗰時, 幫我問個姑娘攞個bag, 跟住佢問我係唔係講我個名就得喇! 我個心諗, 更係啦, 你唔同佢講我個名, 人地點比個袋你比我呀, 人地識你亞水咩! 所以我就同佢講, 你講我個中文名啦, 不過你記唔記得我個名呀! 佢話佢記得! 不過, 我跟住就同佢講, 你真係記得? 你連我陀住滕滕食唔到嘢, 你都話唔知, 咁我個中文名咁少講, 你點會記得呀!!!

真係! 唔想串佢都唔得! 因為唔好似為只係你一個陀仔先食唔到嘢, 因為好多人都係!!! 

佢係呢個星期, 我發現佢開始日日遲到, 好似我之前咁, 可能佢唔想拉閘, 佢學我之前咁, 遲d番! 不過我想講: 我坐房, 你唔係; 我可以下午出去買一買嘢, 你唔可以; 我夜晚番到屋企, 都仲做公司嘢, 但你冇; 老闆對我乜都冇問題, 不過你唔係我!

你唔好諗住我做乜, 你又跟住做! 因為你冇特權, 但我有! 你唔好以為你唔出聲, 我就un你做乜, 因為唔係老馮要un你!!!!!!!!!!!!

 

開始嘔血!

今日番到屋企門口, 都未開門, 個工人就話滕滕知道我番嚟, 因為佢聽到對高跟鞋, 咯!咯!咯!咯! 就即刻望向門口喇!

滕滕今晚好開心, 好似痴左線咁, 因為佢不停咁狂叫, 狂嗌, 同埋又不停咁咬張sofa!

因為張sofa 越嚟越爛, 所以我就攞卷膠紙出嚟, 開始想貼係佢成日咬嘢地方, 就係床 & sofa!

我一路痴緊張床, 呢個滕滕就一路係廳到咬張sofa!

我一見到, 就已經喝住佢: NO!!! 唔好再咬張sofa喇!!!

佢條友仔, 以為我同佢玩, 一聽到我話佢, 佢仲即刻 "嘩, 卡卡卡卡" 咁笑住跑開!

見佢走開左, 冇咬張sofa, 咁我又繼續用膠紙痴佢張床!

佢條友仔, 行過嚟望一望我, 跟住就又一啖咁咬落張sofa 到!

我一見到, 當然又喝住佢啦: "NO!!!!!!!! 唔好咬 sofa 啦, 你再咬, 我打打你架!"

一喝佢no, 佢又"嘩!!! 卡卡卡卡" 咁大笑, 又跑開左!

如事者幾次, 佢一見我唔望佢, 佢又咬過, 仲要莊一莊我先咬!

鬧完佢, 佢又"嘩! 卡卡卡卡" 痴左線咁跑開左!

終於, 我忍唔住sent左個sms比老公, 同佢講: 我就嚟比你個仔激死我喇!

sofa 爛左唔緊要, 可以買過一張, 不過佢係咁成日食d皮落肚, 喝都喝唔住, 頭先又啱啱咬左牆角d灰出嚟! 死啦, 咁食法, 遲早真係中毒架!

已經越嚟越爛喇！

滕滕咬完不特止，仲搵隻手指 liu 爛左嘅地方, 驚死爛唔夠咁!

我之前先至補番好, 而家又咁, 今次仲嚴重, 石屎都見到埋!

滕滕, 你唔好咁曵得唔得!!!

 

 

好左一陣, 你而家又嚟!!!

尋日星期日, 個工人放假! 不過, 佢無啦啦中午打我手提, 但係我攪左震機, 所以過左一陣先知!

不過, 一見到佢打嚟, 出左去放假都無啦啦打嚟, 我個心就已經覺得唔對路, 因為我地放假, 都唔會無啦啦打比老闆啦!

我過左一陣, 打番比佢, 問佢咩事, 果然不出我所料, 佢問我可唔可以早d出糧比佢喎!

出糧??? 而家幾多号呀, 尋日先18号, 本身月尾出, 而家話要??? 無嘢吓化!

佢同我講, 話佢細佬個老婆生仔, 要開刀喎!

仲咩生仔要咁多錢嘅咩??? 我同佢講, 你而家話想出糧, 就出糧架, 我去邊到搵咁多錢比你呀???

跟住, 佢就話, 冇就尤佢啦, 唔緊要, 跟住就收左線!

收左線, 我打比老公同老公講, 佢又嚟喇! 同老公商量, 如果佢真係有事, 唔比佢, 又好似好衰咁, 但係我唔可能佢話要就比佢架嘛, 所以我地決定左, 比住一半先, 而且而家都係半個月之嘛, 無奶油出一個月比佢!

今晚番到嚟, 我問佢, 仲咩你細佬生仔, 關你咩事呀?

佢笑笑口冇答我!

我又問佢, 冇錢可以係政府醫院生架, 佢要咁多錢仲咩呀?

佢又笑笑口冇答我!

跟住, 我就同佢講 : 由今個月尾開始, 每次出糧比你, 你比500蚊我, 我同你儲起佢, 到你有事, 我先比番你!

個工人跟住話: 唔使啦, 我自己儲得架喇!

跟住, 我又話喇: 唔得! 你下下冇錢都話早出糧, 我去邊到搵比你呀, 如果你有九十幾個兄弟姊妹, 咁我咪唔得你死! 係咁啦, 下個月開始, 每個月同你儲500蚊!

個工人即刻話: 二百蚊夠啦, 唔使咁多呀!

我二話不說: 唔得呀, 500蚊呀, 200蚊, 夠咩呀!

到6月, 佢就做夠一年, 而家一年都未夠, 你就問左我借過4次錢!!!

冇情講!!! 下個月開始, 我就要佢比500蚊我同佢儲住! 等佢下下都入晒d錢番自己個印尼戶口到, 攞都攞唔到, 要錢就問我借糧! 頂佢!!!

每日金句

今日星期一, 冇飯帶, 所以出去食!

 

我問: 食咩呀? 係唔係食常餐呀?

 

同事+朋友: 係呀! 因為我而家只係食到呢d嘢架咋!

 

我: 個個陀仔都係咁架啦!

 

同事+朋友: 係咩? 你嗰時都係咁嘅咩? XXX(佢個朋友我都識)話佢嗰時好食得架喎!

 

佢講完呢句, 我唔想再答佢, 我陀緊滕滕嗰時, 佢都已經同我一斉做嘢, 佢咁問, 好似冇同過我一斉做嘢咁..........

 

同埋, 我陀仔, 都唔會日日都係到講咁多廢話!

 

係番公司途中~

 

同事+朋友: 我尋日去睇過D大肚褲呀! 好貴呀, 成八十幾蚊一條!

 

我: 你冇嘢吓嘛, 八十幾蚊一條已經好平架喇! D大肚褲有D要幾舊水, 好似D牛仔褲咁, 有D都要成八舊幾水啦!

 

同事+朋友: 嘩, 乜咁貴架! 咁我係唔係要番去買呀?

 

我: 八十幾蚊, 都已經真係好很平喇!  不過, 你使唔使而家買呀(因為佢得嗰個幾月咋!)? 一係等我番屋企, 搵下之前D大肚衫比你啦!

 

 

 

 

其實佢講咁多嘢, 都係想問我睇下我有冇得比佢, 我唔明點解佢要咁間接!  識我嘅人都知我如果有D咩可以比, 或者幫, 我都一定會幫, 所以我覺得佢跟本就係想我自己開口話比佢, 因此.................我中左伏!

戇居居的第二次做型!

我都知道, 今日lai lai地嘢架喇! 因為滕滕好似知道, 每逢我放假, 都會同佢去街街, 所以今朝十點幾食完飯仔, 到十一點鐘抱佢瞓, 佢就鬼打咁精神, 仲係到同我玩, 一d倦意都冇!

 

見佢一d倦意都冇, 我就提早預備同佢換衫, 因為我真係約左我表姐飲茶!

 

呢餐茶, 滕滕好開心, 因為大細表姐兩個都有同佢玩, 但係大表姐就週到d, 因為家姐始終都係家姐, 大表姐成日都好照顧滕滕, 仲不停咁比包包佢食!

 

兩個表姐, 仲突登帶左方包嚟比表弟食, 而且仲送左套餐具比滕滕潻呀!

睇下大表姐, 幾錫表弟呀, 自己都未食, 就比表弟食喇!

kathy, 表e錫晒你!

仲好好招呼架, 食完包, 仲有水水飲!

成餐茶, 滕滕鬼打都冇咁精神, 不過番到屋企就.........3:45番到去, 未到3:50, 佢就已經瞓左喇! 但係只係瞓得一個鐘, 因為我地要出去, 去影第二次嘅做型照!

 

第一個做型照, 係出前一丁, 第二個做型照係消防員, 第三個做型照, 係飛機司!

 

係第一個做型, 滕滕d表情係: 一d都冇!!! 仲要成日戚起條眉......

 

 

真係十張著左八張都係咁, 又唔笑!

 

 

只係戇十十咁............

 

 

第二個做型就好d喇, 因為開始有番d反應.............

 

 

但係個ee一同佢帶帽, 佢就即刻要除落嚟, 一帶上去, 又除落嚟!

個ee同佢帶帽, 應該都有十幾次..........

 

 

 

第三個做型, 就醒咁d喇!

 

 

因為佢d古怪表情, 開始多喇!

 

 

唔好以為佢揮手, 佢只不過係又想攞番頂帽落嚟咋!

 

 

都差唔多尾聲, 佢先至有咁嘅反應同情緒, 我係後面跳左咁耐, 佢先至有咁嘅效果!

 

 

到走嗰時, 佢先至所謂真係warm up 左, 因為佢係嗰時, 開始撩人地玩!

 

但係, 咁就死啦, 走嗰時先至撩人地玩, 你估你之前影左嗰d, 可唔可以當冇唔算吖嗱?!