今晚老公番到嚟, 我偷睇佢個証件包, 發現佢有一張卡片，係時鐘酒店嘅卡片，我好驚，我唔知點算，我喊左出嚟！
我問老公點解有張咁嘅卡片，佢話係人地比佢，我唔信，因為冇可能，我問極佢，佢叫我唔好亂諗嘢，我好驚，我一直懷疑嘅嘢，係今晚發現左！
我一直喊，老公不停咁安慰我，話唔係，係冇嘢，佢冇做過Ｄ咩！我心中，係有Ｄ安慰，因為佢仲係想要呢個家，如果唔係佢唔使同我講唔係，叫我唔好亂諗嘢！
我同老公講我好驚，我唔知點做，我唔知我做錯左Ｄ咩事點解會咁，點解佢會係出面咁做，不過老公答我唔係我所諗咁樣，跟本係冇嘢！
我而家唔知點算，因為我覺得老公係到講緊大話，但係老公就死口唔認！
我唔想離婚，我唔想冇左個老公，我唔想冇左個屋企，我好希望唔想再發生，我唔想老公再係咁，我唔想老公做對唔住我嘅嘢，我唔知可以點做。。。。。。
老公，你仲愛唔愛我？
上個星期初已經同表姐約定左搵一日去angel's face到 join個course 減肥, 因為雙麒麟臂、肚腩 & 條腰實在太難減喇!
自從星期四開始放假唔得閑, 尋日今日都係番晏就, 但係直至今日都冇停過, 係尋晚同今晚先有小小時間上下網!
不過, 老闆今日見到我, 佢問我仲咩冇見幾日, 就好似瘦左好多嘅!
你話死唔死吖, 老闆只係尋日同今日見左幾次面, 佢就話我瘦左好多喇, 唔通真係唔使搵angel's face? 如果係就好喇, 因為可能真係瘦左都唔定, 不過一定唔係手臂、肚腩 & 條腰到囉, 而且呢幾日可能好多嘢煩, 唔夠瞓又黑眼圈, 塊面又bill 左三粒瘡, 連老公都嚇左一跳問我仲咩爆咁多粒瘡出嚟呀!
馮小姐尋日問我, 佢下個月擺滿月酒, 問我同老公去唔去得!
我記得, 我地結婚嗰時, 佢仲未同佢老公相會番, 佢地兩嚟都冇嚟飲; 我記得, 滕滕擺滿月酒, 佢地已經見番面, 而且嗰日佢地去影結婚相, 影完都冇嚟飲!
我同老公講馮小姐話請我地飲滿月, 老公第一時間就話: 我地結婚, 佢地冇嚟, 滕滕擺滿月, 佢地都冇嚟!
有D嘢, 我真係好小氣, 真係! 你敬我一尺, 我敬你一丈, 呢句嘢, 係我做人嘅中旨!
我結左婚 9 年, 我當佢地兩個當時冇相認番, 而且我同馮小姐交情冇咁深, 唔嚟, 我明白!
但係, 滕滕擺滿月酒, 馮小姐因為我, 佢先可以同佢而家個老公相認番, 而且當時我地已經一斉做左嘢, 日日對住左3年咁耐, 係我自己認為係一個大日子, 佢地兩個都唔嚟, 我係唔可以原諒!
我今日打番比馮小姐, 話老公嗰日要番工, 所以我唔嚟, 佢地似有D失望! 滕滕擺滿月, 佢地都唔嚟, 唔好車望我地都會去飲佢餐滿月酒! 因為我同老公好記仇!
原本今日真係諗住唔番工架喇, 因為怕個工人攪唔掂, 而且尋晚又失眠, 直到今朝成四點先瞓著!
不過今朝滕滕起身飲完奶又嘔番晒出嚟, 所以晨咁早就同佢去卦号, 不過都要成十點半先有得睇, 真係人都癲! 睇完dr 番嚟問個工人需唔需要我留多一日係屋企, 佢就同我講佢都想試下, 咁我見佢都有信心, 所以我都想比佢試下!
今晚番到屋企, 滕滕變左喇, 見到佢同個工人close 左, 冇之前咁怕, 同埋我番到去一開門, 佢同之前一樣咁係到大叫嚟歡迎我, 一睇到, 真開心!
小朋友適應力都幾強, 比左半日時間佢就已經唔同左喇! 唔通滕滕呢樣嘢似我???
不過唯一幾大獲, 就係呢個新工人唱歌走音架! 滕滕聽到之餘, 我係公司都聽到! 最慘就係佢周不時成日都係到唱佢d走音歌, 好惡頂呀~!!! 我好怕滕滕第日學埋佢咁走音或者以為佢咁走音法先係啱咁就大獲喇!!!
唉~ 又瞓唔著喇!
今晚我同個工人講, 我聽日番工喇, 佢就好似好突然咁話佢未有心理準備, 問我聽日幾時番工! 我話我番下午, 朝早都仲係到, 跟住佢就話冇計啦, 你都要搵食嘅, 唔緊要啦!
就係因為今日下午同個新工人傾開計, 話佢以前唔使做家務, 只係湊BB, 所以今晚瞓嚟瞓去都瞓唔著, 怕佢handle 唔到! 如果要比準備佢, 咁幾多日都唔夠架喎, 遲早都要番架啦! 但係我真係怕佢 handle 唔到喎! 不過我今晚已經叮囑左佢, 如果煮唔到夜晚餐飯, 就等我番左嚟先, 做唔切嘅嘢就唔好做住, 慢慢嚟啦!
滕滕睇嚟都ok嘅, 因為好似今朝佢起身飲完早奶, 佢寧願唔去瞓係廳玩, 都唔跟我入房, 成個朝早, 我都冇聽到佢係到喊, 又冇拍我門, 但係我之後起身出房, 佢就係咁黐住我, 所以我諗如果佢見唔到我, 佢都可以, 不過一見到就要黐住, 咁, 我諗我番工出門口嗰時都係喊一陣, 跟住之後應該冇事嘅!
咁究竟聽日番定唔番好呢???? 公司又有嘢要做, 雖然係屋企都做到, 但係始終番一番去就好d囉, 因為放左咁多日假, 老闆冇炸我型, 但係我都唔係好好意思啦, 老闆咩人我點會唔知吖, 佢雖然話唔緊要, 叫我做好晒屋企嘢先番, 我自己安排通知佢一聲就ok喇, 但係講真, 邊有老闆想個員工放咁耐假呀, 而且而家公司又只係得我同個八婆會計, 如果我唔番, 就淨得老闆同埋個會計咋!
仲有, 老爺已經入左老人院喇, 屋企d單我聽日又要 fax 去轉戶! 唉!!! 仲有仲有!而且仲要去電話停打去間死人財仔到問佢攞fax no., 通知佢個舊工人走左!
簡直係痴孖筋!!!!!!!!!!!!!!!!! 九十幾樣嘢等住我去做, 我都唔知做得邊樣! 唔知我前世係唔係一個有錢人乜都唔使做, 而今世就乜Q都要我做番晒呀???????????????
就嚟要番工, 所以我今日由頭一次講過比個工人聽, 要做D乜, 要點做, 叫個每個STEP寫抵!
尋日就反眼, 因為好多佢都好似唔係好記得, 而且好多常識佢係唔識, 所以費事有D咩嘢發生, 唯有清清楚楚講一次!
講開又講, 佢話佢之前係新加坡同係HK都係湊BB, 唔使做家務, 所以佢一聽到咁多嘢做好頭暈; 我問佢係新加坡做辛唔辛苦, 佢都話唔辛苦, 因為都只係湊BB, 一聽到我就真係頭暈喇, 因為原本諗住佢係新加坡做過先嚟HK做, 就最好啦, 因為新加坡出名係做到隻狗又冇假放, 但係呢個新工人同我講佢只係湊BB, 唔使做家務, 咁即係可能佢會覺得係我呢到做會好辛苦! 再加上佢之前嗰個雇主只係做左6個月就自己話唔做, 因為有太多工人唔想嗌交, 所以我覺得佢都係撰人嚟做!
我唔想佢做幾個月就話唔做呀, 大佬! 一陣我又要辭工唔做我就唔得你死喇!
今日滕滕成day 都扭計, 雖然佢冇講, 而且都唔識講, 我feel到佢扭計要舊工人!
成day, 滕滕都要黐住我, 雖然肯同個新工人玩, 比佢餵食飯, 但係都要我係側邊! 好彩五點幾老公番左嚟, 如果唔係夜晚我去沖涼都唔走得開喇!
個心唔係好開心滕滕扭計, 因為我覺得佢知道個舊工人已經冇左, 知道係廚房煮飯唔係以前個姐姐, 知道此情已不再! 滕滕唔開心, 我都唔係好開心, 所以就算有新工人到左, 個心都唔係好開心!
呢幾日, 等個新工人同滕滕玩多d, 希望滕滕可以快d唔記得個舊工人...........
唔知點解, 今日成day 我個腦好多時都出現滕滕尋日番到嚟見到新工人個表情, 好疑惑...........好無奈................, 滕滕個樣總之就好古怪, 就算平時見到我d朋友, 佢個樣都唔係咁.............!
今日, 原本諗住唔使番工, 但係尋晚個客 send 左個mail 嚟話要改提單, 所以今朝十點幾就番左公司整嘢整到點半就番屋企!
如果有時光門就真係好喇, 好心急想快d番到去, 因為個工人今日下午死期到, 我安排表姐3點幾嚟接走滕滕, 4點個agent 上到嚟, 跟住5點半個新工人到! 不過因為表姐遲到, 成四點三先到, 所以我要個agent 都唔好咁早上嚟, 費事打草驚蛇!
其實我都唔使多講, 一開波我就同佢講你應該知道咩事, 你睇一睇張receipt 有冇問題, 如果冇計錯數就簽番個名! 個工人好快就睇左一次就話ok喇, 我問佢係唔係都預左我抄佢, 佢都話係! 更係啦, 一次又一次咁, 邊個可以忍呀!
佢臨走, 我同佢講如果你真係想走數, 唔好話我唔驚告你, 因為d財仔去到印尼搵你的話, 到時你賣地賣屋都唔掂, 你好好照顧自己喇! 講完個工人話多謝我, 同埋唔好意思, 跟住應該流左兩滴(咁多)眼淚!
係嗰個moment, 我同老公都覺得我地咁做好似好殘忍, 因為佢當時真係好似好慘, 但係佢而家咁, 係佢自己一手做成!
送完個舊工人走, 就落樓接個新嘅上嚟! 呢個成日都好好笑容, 希望佢ok啦! 因為滕滕都肯比佢抱! 不過當滕滕係表姐到玩完番嚟見到個工人唔同左, 佢好似知道咁, 因為佢定左眼望住個新工人幾秘..........!
希望個新工人湊滕滕ok啦!
呢兩日真係忙到甩蹗, 因為跟馮小姐D手尾, 又要去搵, 又要去睇, 又要上網落BKG, 又要做自己嘢, 真係冇乜點停過手!
尋晚同馮小姐講食薑飯一事, 佢話佢尋日宮縮左好多次, 跟住仲好似頂下頂下咁亞B想出嚟, 所以我就講可能差唔多生得! 尋晚先講完差唔多, 今朝就入左院生左喇!
早輪話過佢唔食多D嘢等同虐兒, 明知呢兩個月衝刺, 更係食多D嘢等亞B吸收多D(我又多事喇!), 如果唔係何來最尾兩個月個B大得咁多, 邊樹得嚟夠磅出世呀! 跟住我又話(我又再一次多事!)佢, 更係早一個星期放產假預備好D啦, 起碼都要休息下啦, 如果而家唔休息下, 應該要直至死左之後先有得抖!
今朝九點幾我打比佢老公, 問下睇下幾時生, 跟住馮小姐就接左我個電話, 第一句就話, 因為而家咁突然嘅情況要開刀, 又要比多五千幾蚊喎! 唉~ 咁樣樣樣都計, 我都唔知佢為乜! DR FAN 已經問佢考唔考慮順產, 因為見佢嘅情況順產應該都合適啦, 但係佢都要選擇開刀, 真係一個迷!
佢老公後尾同我講, 因為我叫佢早一個星期放假, 就更係聽我講啦, 因為有經驗嘛, 所以佢最終都聽我講! 不過我都好直接同佢老公講佢都話唔聽, 下下都要人串到佢行佢先接受就冇引啦!
不過, 好彩佢老公知道佢嘅性格係要人地咁樣話佢佢先聽, 而且仲話FD先會咁串, 如果唔係都唔會理你啦, 咪尤得佢囉! 聽完之後, 個心開心左, 因為呢D先係人講嘢嘛!
聽到馮小姐生左, 我都好開心, 因為又一個小生命誕生喇!
馮小姐今日開始放假喇, 真係有小小.....都唔係小小, 係幾唔得閑, 多餘電話都冇講一個呀!
因為好多步驟都唔熟, 所以有小小乸手唔成勢, 但係呢d問題難唔到我, 因為唔夠我一開始入呢間公司做嗰時咁迷網, 因為嗰時真係白過白紙!
好彩馮小姐都算係咁啦, 有時! 佢有on line, 我問佢, 佢答我, 我冇問, 佢都講我知!
聽日, 要上船公司個web-site 到落bkg, 呢間死人嘢好死煩, e-mail又唔會有人覆, 全部都係係個web-site check! 我諗我都ok嘅, 最多慢慢嚟!
不過, 最慘就係以後食飯都要對住個會計! 睇見佢前面就憎到佢後面!
我唔講, 冇人知, 我講左, 都冇人信, 我係一個天主教徒!
半年前, 心中已經想同滕滕星期日去望彌撒, 問左屋企付近, 只係得一間天主教堂, 而且仲係冇for 比小朋友嘅!
所以跟住就卻步喇, 因為滕滕咁細個, 佢肯坐得定都好難, 更何況望彌撒係咁悶潻!
過左半年, 而家真係好想同佢試下, 睇下望彌撒時, 佢可以坐到幾耐!
但係, 最慘就係之前報嗰間YWCA 係基督教架, 如果我番天主教堂, 我怕佢會亂!
不過, 就算係咁, 我都想試下, 可惜, 好似成日都"的" 唔起個心肝去!
唔想講粗口都唔得, 真係痴97線!!!
冇諗住會發生嘅嘢今日終於發生左!!!!!!!!!!!!!!!!!!!!!!!!!!!!!!!!!!!!!!
有間財仔終於搵上門! 好彩樓下個管理員醒目, 洒左佢走! 我係個閉路電視到睇到, 係佢d同鄉嚟, 走左之後, 我打去管理處問番個管理員-黃生, 黃生話個印同佢講我個工人爭佢八千蚊冇還, 佢都好辛苦係HK搵錢, 但係我個工人就唔還比佢, 所以佢先至嚟搵佢! 個印仲攞住我個工人份contract, 仲搵埋我! 黃生同個印講, 我個單位唔係佢搵嗰個姓, 可能係錯嘅! 個印仲同黃生講, 佢係我工人個朋友嘅朋友嚟!
我聽到第一時間就笑, 邊有人講大話都唔識講架! 我同黃生講, 你會唔會借錢比一個唔識嘅人呀, 朋友個朋友? 就算識都唔會借啦, 更何係唔識! 唔怪得呢個國家d人要做工人喇!!!
收左線, 我問個工人究竟佢又攪d乜呀!!! 真係好撚煩!!!!!!!!!!!!!!!!
我: 究竟你又攪乜嘢呀!!! 頭先嗰個搵你追數架!!! 佢話你爭佢八千蚊呀!!!
工人: 我唔知呀! 點解八千呀, 我都冇爭人八千?!
我: 我點知你呀! 唔好再攪咁多嘢啦, 你係咁同我講大話, 你想點呀!
工人: 我唔知呀!.........嗰八千蚊係我朋友借架!(又話係個朋友借, 济济都唔係話自己)
我: 人地攞住份CONTRACT嚟搵你, 你話係你朋友??? 乜你D朋友借錢比你要你份CONTRACT架咩? 你當我傻架!!!!!!!! 仲有呀, 唔該你聽日好攪掂佢呀!!!
其實叫佢攪掂佢都係廢話嚟, 明知佢都係洒我, 不過我唔想再同佢講, 嘥九晒我D口水!
等到星期四, 個新工人仲未到, 我都諗住抄九左佢, 因為我真係頂佢唔撚順, 好撚煩!!!
尋日個工人已經講滕滕有小小鼻水, 仲打左輪乞嚏, 諗住放工番去同佢睇醫生啦, 點不知我番到去又冇咩事喎!
不過, 都係走唔甩架喇, 尋晚瞓覺滕滕又發皮4喇! 除左鼻塞透唔到氣發皮4之外, 滕滕都冇乜發皮4, 所以我都後悔尋晚冇去睇!
今朝十點半就去左 Dr到卦号, 要等27個, 所以我都醒架喇, 卦完号就去買餸, 跟住去郵局寄左份禮物比朋友, 先至番屋企接滕滕去睇醫生!
都係感冒啦, 有鼻塞鼻水, 喉嚨開始有小小發炎我都預左架喇, 食左藥跟住瞓晏覺滕滕已經冇咁燥喇!
我問個工人係唔係佢傳染比滕滕架, 個工人話佢好番晒啦, 跟住我咪話囉, 你更係好番啦, d菌嘢左比滕滕, 你咪好番囉, d菌都唔係你到囉!
Dr話 d感冒都係啱啱起, 希望唔好有發燒同咳啦!!!
我都唔明, 明明早兩個星期迫左個工人去還左D錢, 點解今日又有封大字信寄嚟架, 仲話有成千五蚊未還!!!
循例都問下個工人啦, 不過都係嗰個答案, 佢話佢唔知! 係佢答我唔知嗰時, 佢就"就"起左個眉頭, 呢一刻, 我又知佢又講大話, 因為佢每次講大話都會"就"起個眉頭答我, 所以我都心中有數!
好彩個新工人下個星期就到喇, 我唔使再對住佢, 而且仲覺得自己冇做錯, 上個月已經行動左!
今朝晨早就收到個 Good News!!! 係入境處打比我, 話新工人個visa 已經批左喇, 可以今日安排去攞!
原本我係expect 星期一/二先有, 而家早左, 真開心!
我就當然好開心啦, 不過, 我諗滕滕就唔開心喇, 如果佢知道呢個姐姐以後唔再係到!
豬仔, sorry 呀, 媽me唔想你唔開心架, 不過真係迫不得己我先咁做, 因為我知道佢都好錫你, 但係佢就因為貪得無厭先攪到自己而家呢個地步!
我希望新工人姐姐對你都好好啦, 不過, 你都要合作喎, 唔好成日都扭計豬呀!!!
滕滕而家瞓覺, 唔知點解D姿勢會咁樣!
呢幾晚都必然做: 雙腳鉗住我條頸, 個姑就壓住係我塊面上面!
豬仔呀, 你因乜事要咁樣呀? 我唔想聞你個姑呀! 我透唔到氣呀! 乜你咁樣瞓會舒服D咩???
個新工人就嚟嚟喇, 所以要諗下今個星期五好唔好同而家個工人找左條大數先!
因為星期五三千幾蚊條數又到期喇, 如果我同個工人找左先, 到時同佢埋單時扣數, 呢個方案我就得係好嘅, 因為起碼佢走左之後, 呢條數唔會有機會比財仔追! 其實就算到時個工人真係想走數, 財仔真係追到嚟, 我只係SEND番我比入境處封信比佢, 話比間財仔知佢已經走左喇, 咁應該都唔會有D咩問題!
但係另一方面, 如果我唔同佢找, 我估個工人到時抄左佢都唔會還呢條數, 多左三千幾蚊著草帶番去印尼, 起碼走得都開心D, 唔使少左三千幾蚊糧! 因為比著係自己, 比人抄左, 都想攞多D錢走啦!
但係如果我真係唔同佢找, 到時D財仔真係去到印尼搵佢, 利疊利佢都幾大獲, 到時真係可能害左佢!
但係到時我抄左個工人, 可能佢會諗明知都就嚟抄佢啦, 就唔好同佢還左條數, 少左成三千番印尼啦, 可能到時佢憎死我都有之!
正路應該係同佢找左佢嘅, 因為就算我FAX D 嘢去財仔到, 可能到時財仔都會打嚟搵佢一段時間, 呢下都好煩!
所以我諗應該係同佢找左好似好D~
馮小姐就嚟生喇, 我問佢買左鹿茸未, 佢居然答我佢冇諗住買, 因為成二三千咁貴!
我真係一臉茫然! 佢寧願係私家開刀生, 洗成4萬蚊都唔寧願唔捨得買補品比自己食!
如果問我係唔係必然食補品, 我都覺得唔係, 因為以前亞媽年代d人咪又係冇錢買補品, 不過如果有4萬蚊去生仔, 咁點解唔預多幾千蚊買補品比自己食落肚!
馮小姐係咁講d鹿茸好貴好貴, 要成2/3千蚊一隻, 所以我就忍唔住問佢, 乜你唔知生仔係好多錢要洗嘅咩?! 就係坐月嗰個, 買雞都唔係一個小數目啦, 如果唔想咁貴, 咪撰細隻d囉, 人人都話坐月要補, 邊有人坐月話唔補架!
既然咁堅持係私家生, 我真係好唔明點解預多二千蚊比自己買補品食落自己到都唔想囉!
我買左部HD1兩年都未夠, 無啦啦兩個星期前開始就上唔到FB, 所以尋日"的" 起心肝打去HTC問! 佢個答案係FB轉左D程式, 以我部機嚟用IE上係唔得, 要用OPERA 個software 上喎! 不過唔知點解用OPERA 都唔得, 所以HTC條友同我講, 叫我hard reset 多一次!
唔係嘛?????!!!!!!
又hard reset????????
唔使咁大獲吓嘛!!!!!!!!!!!!!!!!
上次都已經攪左我好耐, 今次又嚟????????????
唔好喇卦!!!!!!!!!!!!!!!!!!
我部機出左冇幾耐就買, 而家都未用夠兩年就話d software追唔上! 咁就算我換過部機, 跟住再用多年幾, 你又話d software 追唔上, 咁又要我再換喇喎???
部機又冇壞, 又冇咩事, 無啦啦換機, 我覺得好嘥錢同好唔環保囉!!!
究竟係咩人要咁樣成日攪埋d咁嘅嘢架, 係唔係d生產商整架, 攪手腳想我地用一段時間就換機呀?????????
尋日奶奶入嚟我到食飯, 滕滕見到滕滕張證件相就話佢想要一張!
奶奶見到張相, 就話滕滕似我! 似我? 唔係呀化, 我一d都唔覺喎! 工人又加把口, 都話滕滕似我!
奶奶話滕滕笑嗰時係有d似我! 個工人又再講, 滕滕個面形係似我架! 佢話老公個面形係方形, 我個面形就圓圓地!
我再睇真d, 又係喎, 滕滕個面形真係唔似老公, 似我喎!!!!!!!!!!!!!
馮小姐番埋下個星期就開始放假, 我一早都叫佢早一個星期放, 可以抖下, 而家終於都如我所願!
老闆成日叫我比JET SO 佢, 比人情我做, 等馮小姐多謝我喎! 車~ 我話佢都冇反應, 好似我之前係屋企帶埋飯比佢, 佢一D都冇覺得好開心我對佢咁好, 一D反應都冇, 就算我比JET SO 佢, 可能佢都表現出嚟係一般咁!
唉! 不過算啦, 鬼叫自己心軟, 諗住人地同你傾兩句心事就當自己係好朋友, 人地結婚放左我同老公"兩張"(喎)相係個入場VIDEO 到, 就原諒左佢咩! 不過有時真係比佢攪到我把幾九把火, 份人一D都唔識做, 又唔醒目!
我都陀過BB, 我都知有幾辛苦, 又有幾攰, 所以我今日忍唔住終於同左馮小姐講, 叫佢下個星期早走一個鐘, 早D放工番去抖下!
我都唔明, 點解我 control 唔到自己!
個會計, 我真係憎到佢死! 由我入嚟呢間公司, 我已經覺得佢痴交線!
因為我係對客, 有客汇錢嚟公司, 佢一定要通知我, 因為我要同D客對數同埋通知馮小姐出 invoice, 係汇錢過程, 會比bank 扣左d transaction fee, 而 transaction fee 係個客嗰邊嘅bank 同香港呢邊個 bank 到會收! 呢d cost 唔會同個客講, 而且應份係我地公司出, 因為個客同我地做生意, 小不免係我地要負責嘅!
不過, 個會計唔知係唔係諗住我當時乜都唔識, 佢就叫我同d客收呢d transaction fee! 冇錯, 我入呢間公司做嗰時, 我係乜都唔識, 但係我唔係白痴, 唔通我買嘢碌卡買衫買鞋, 銀行向商戶收嘅手續費都同客收番咩??? 更何況公司d單成幾幾萬蚊美金, 唔通駒駒幾蚊美金手續費我都同個客攞番呀???? 真白痴!!!
微波爐一事, 都已經唔想多講, 攪到最慢火嚟叮半個鐘, 唔怕阻住人, 又唔理人, 我都已經覺得佢真係唔知醜! 再加埋佢買d藥水膠布, 用嚟黐佢d關節、手指, 就買d最好嘅, 其他一般膠布, 就買d最平最cheap! 下下都用蒸餾水嚟洗菜洗米, 用到得番小小水係個樽到, 人地一 jump就著紅燈要換水, 你話d人狗唔狗呢! 抺完笪地都未乾, 就踏到一個一個鞋印, 咁即係玩嘢啫, 係唔係知道個清潔亞姐可能係我亞媽, 所以就專登呀! 係老闆面前就仁心, 話廁所笪地d磚升起左小小, 怕跌襯馮小姐喎, 但係點解落雨天番到嚟公司, 係廁所(把傘)整到成地水又唔番乾佢呀!!!
因為馮小姐有左之後, 佢唔知咩事就成日遲到, 我同老闆反應, 叫老闆同佢講唔好遲到, 老闆話好難開口喎! 真係一個迷, 叫個員工盡量準時啫, 有幾難開口呀!!! 我話馮小姐放產假, 如果有急單, 想叫個會計出去交, 老闆話唔好喎, 因為知道佢都唔鐘意我叫佢做嘢, 所以叫我唔好強人所難! 喂, 佢日日係到抓腳趾, 公司有事要搵人出去放單, 唔叫佢, 唔通我呀??? 老闆唔想我同個會計有更多心病, 佢話有急單就搵佢喎!!!
好! 既然係咁, 馮小姐番埋下個星期開始, 之後我就日日遲到, 最少都遲佢半個鐘我先番到公司! 如果有急單, 我就一定唔出去, 如果要出, 我就叫老闆出!
我唔講到出口, 老闆知道我個心諗點解佢咁幫住個會計, 所以佢就同我解釋佢唔係幫住佢, 而係知道佢冇人冇物, 性格一定係怪d, 好難同人溝通, 如果唔想加深我對佢嘅憎恨, 最好佢就唔出聲話佢!
好! 既然係咁, 到時我做d咩, 就最好唔好話我喇, 因為我d性格都唔係咁好!!!
尋日DR打左比老公, 原來老爺爆左血管! DR話老爺咁大年紀, 好番嘅可能都好低, 再加上又有柏金遜, 情況都好難好, 只可以做下物理治料! 咁即係番左屋企, 奶奶都好難照顧到老爺, 所以入老人院都係遲早嘅事!
因為又未入老人院, 但係又唔可以番屋企, 所以今日DR就轉左佢去看護嗰邊, 而我諗都要係呢邊一段日子!
奶奶係之前講過, 如果第日老爺走左得佢一個人係屋企, 佢會好驚, 係嗰時, 我就答佢唔使怕, 到時就同我地一斉住囉! 因為奶奶得我老公一個仔, 而兩個姑奶, 一個就........第二個呢........, 我都唔知點形容佢地, 總之就未必會同奶奶一斉住, 所以我諗一斉住都係遲早嘅事!
奶奶同我講完呢番說話之後, 我同老公講佢亞媽話怕自己一個人住, 咁我就話不如第日真係發生, 咁就賣左我地而家同奶奶而家間屋, 換過一間大D一斉住囉! 老公聽完冇反對, 不過就話: "你肯我大家姐都唔肯!"
乜我咁諗好唔正路咩??? 如果唔賣樓, 邊有錢換過層大D架???? 換過層大D係唔係唔使供架??? 乜我似想謀住奶奶D錢咩???
唔賣樓, 唔搵過層大D係唔夠住, 咁就唔使一斉住, 咁唔緊要, 到時睇下奶奶出唔出聲囉! 如果奶奶唔出聲話同我地一斉住, 咁我地咪唔使同奶奶住囉! 一係不如咁啦, 睇下大姑奶有冇本事氹奶奶賣左層樓, 換過層大D佢地供養奶奶囉! 如果奶奶係唔想同我地住, 佢唔使同我講佢怕自己一個人住啦, 又唔見奶奶同大姑奶講呢番說話!
我已經講左九萬幾次, 我話比亞媽知, 叫佢 lunch 之後, 唔好打比我講閑謬(真係好無謂嘅嘢), 因為我 D 客, 係係我地lunch之後先番工, 但係講左十九幾萬次都係咁!
尋晚打比細佬, 叫佢今晚最好早d番去, 因為我想佢幫我教下屋企嗰兩老點樣用個相機, 因為佢地星期四就出發去旅行喇! 不過, 細佬話唔得, 佢係唔會幫我, 因為細佬叫我算, 唔好再嬲亞媽!
我講過, 我最少都同佢絕交兩個星期, 因為我今次真係嬲, 係我最需要佢幫我嗰時, 佢居然話我要脅佢喎! 同細佬閑談間, 亞媽話我係公司好得閑, 都唔使做, 咪請假囉!
我真係好想知, 乜原來間公司我開架??? 就算係我開, 咁我係唔係唔使做, d 生意同客會自己走上門嘅呢???
真係有苦自己知!!! 亞媽只係逢星期一、三、五朝上午係我公司, 其餘時間我做d乜, 有冇做嘢忙唔忙, 佢一既都唔知, 滕滕飲完夜奶之後, 我係屋企都仲覆緊客d mail, 佢又知唔知? 我唔做, 請問d單點嚟架?
我公司有幾多人, 邊個同客開單, 佢唔係唔知, 咁如果我真係唔使做, 我食屎食左好耐喇!!! 咁既然我冇嘢做, 咁我邊有家用比佢呀??? 唔通我賣身搵d錢番嚟呀???????????
三個星期前, 我問馮小姐幾時放假, 佢就同我解釋佢想前 0 後 10, 因為佢話佢自己湊, 所以想生左多d時間喎! 我個心諗真係廢話, 個個都想生左多d時間湊b架啦, 除非個亞媽冇人性嘅啫!
佢講完好似想問我意見, 我就話叫佢開刀前早一個星期放下假休息下, 因為生左就冇得抖, 而且再加上佢越嚟越辛苦, 夜晚開始冇乜得好瞓, 所以我就話早一個星期係屋企hea 下都好吖! 不過, 馮小姐當時就即刻答我佢話佢係屋企會好悶喎! 我個心諗: 好! 我就放長雙眼睇下你頂唔頂到!
上星期, 馮小姐又同我講佢幾晚都瞓得唔係好好, 好辛苦! 我都一早講過啦, 唔係只係呢幾晚囉, 係一路都會係喇, 個肚越大, 瞓覺就越辛苦啦! 不過, 我冇再講叫佢早一個星期放假, 因為我想睇下佢幾時頂唔順主動同我講!
到左今日, 馮小姐又講喇! 佢話佢想早d放, 因為比佢老公話佢好唔休息下喎! 而且佢開始有宮縮喇, 可能真係就嚟生, 所以我今日先再講, 一早叫你早一個星期休息下架啦, 比自己抖下啦, 籮咁大個肚都仲要抺地掃地, 襯住有得休息就唔好對唔住自己啦!
til~ d 人真係麻煩, 死都唔信我講, 我都話越嚟越辛苦架啦, 又話自己頂得順! 我咁拗得, 嗰時臨生都想抖下, 更何況你馮小姐!
講完大假, 馮小姐又再同我講, 話如果有d咩, 可以叫佢係屋企做喎! 不過, sorry 呀, 我即刻講唔需要喇, 如果我比你做, 我會比人(老闆)鬧, 因為無奶油咁小嘢做都要你係屋企做, 所以唔使喇, 我會攪掂!
老爺星期六入左醫院, 奶奶話老爺之前已經跌過下, 但係星期六就跌左3次, 所以頂唔順要同佢入院!
奶奶話唔知係唔係上兩個星期覆診, DR同老爺加重左藥, 所以之後唔係好穩定, 而且仲開始失禁!
老爺有柏金遜病, 時好時壞, 有時就精神到死, 有時就連行一步都行唔到, 而且大小二便就鐘意行到邊就去到邊, 無論係屋企或者係街都唔理, 一樣照去可也!
其實我都好明白奶奶真係好慘, 因為老爺一樣都唔聽佢講, 又唔理佢, 而且最鐘意玩對抗, 奶奶跟本就好辛苦! 之前奶奶、兩個姑姐 & 老公都一致認為如果老爺真係連行都唔得, 就送佢去老人院, 因為奶奶跟本一個人係攪唔掂我老爺!
一話去老人院, 嗰輪老爺就龍精虎猛, 打死幾隻老虎都得! 但係一同社工講呢輪好好冇乜嘢喇, 之後跟住又嚟過! 老爺性格不嬲都好唔開朗, 唔係一個開心老人家, 所以我覺得佢係因為唔想入老人院而撐住, 之後知道個位比番人, 就又冇晒震作!
我之前都同奶奶講過, 如果老爺真係好唔乖, 送佢入老人院就真係避免唔到, 所以我問奶奶到時會唔會唔捨得老爺架, 奶奶好攪笑咁答我: "我唔會唔捨得佢架, 我只係唔捨得D錢咋, 一個月咁貴!"
到左上個星期六, 奶奶真係頂唔順送左老爺入院, 最驚嚇嘅就係個DR同我奶奶講, 話老爺有心臟病! 有心臟病??? 睇左咁多年醫生, 都冇一個DR講過老爺有心臟病, 所以我叫奶奶等醫院個REPORT 出左, 問清楚 DR, 究竟係唔係睇到佢而家食緊D藥先知佢有心臟病, 定係睇到以前入院D record所以先知有心臟病呀, 因為我話怕門診d DR 開錯藥喎!
尋日我再教奶奶同姑娘講, D仔女想約見DR, 但係奶奶話佢唔知我地(即係佢D兩個女 & 我老公)幾時得所以唔知點喎, 咁我就唯有話照約左先啦, 因為DR d 時間好難就, 咁就更係就左DR先啦, 如果到時姑奶同老公都唔得, 就我請假去啦!
一直以嚟, 姑奶s & 老公都冇講過話要見dr, 只係我一個人覺得唔知係唔係開錯藥所以先要求見dr問清楚, 好似只係我一個人係到緊張, 所以我尋日忍唔住問老公, 點解佢d家姐好似不在乎咁嘅!
話兩個姑奶唔緊張又唔係, 但係我又唔係好明點解好似冇人理! 我問老公, 佢話佢家姐唔係唔理, 不過冇我咁勁喎! 冇我咁勁? 你玩嘢咩!!! 我真係覺得好一個迷囉, 仲乜你d家姐s有時間都唔叫佢地去, 反而我要請假去呀???
！