懶惰的媽媽~

因為比滕滕去上暑假班, 咁就又lai左嘢喇! 係咳!

好唔明, 點解d家長明知小朋友咁容易互相傳染, 咁只係一個mask啫, 叫個小朋友戴下都得卦!!!  呢個世界, 真係好多人冇公德心, 所以呢個世界d人真係越嚟越衰!

因為臨瞓前都要食多次藥水, 有時半夜滕滕會咳醒, 所以少不免我都預左佢夜晚會瀨尿!  

尋晚比滕滕叫醒左之後, 我就開始瞓唔番, 因為佢叫醒我話比我知佢想痾v! 不過, 因為我尋晚個頭真係好痛, 係痛住嚟瞓著, 所以當滕滕叫我話要去痾v時, 我極度唔想起身咁同佢講, 叫佢痾係片片到!  就係叫佢痾係片片到呢句說話, 講完之後, 我就開始內疚!  因為有乜理由個亞媽衰得咁交關, 個仔識得叫醒亞媽去洗手間, 但係亞媽居然懶到叫個仔痾係條片到!

因為有內疚感, 所以之後我就瞓唔番, 係咁同自己講, 下次唔好咁喇, 個仔都叻啦, 識半夜起身叫我同佢去toilet喎, 望都望佢識啦, 而家, 我居然因為自己唔想起身而叫個仔唔去toilet 痾v!, 你話我呢個亞媽真係唔鬧唔得囉!

不過好彩, 過左一陣, 滕滕又同我講佢又想痾v喇, 咁呢次, 我真係幾想瞓都要同佢去喇!

 

大功告成!

一拖再拖, 仲話今日再拖??? 唔好喇卦!  之前同熙熙去呢間studio 買左d團購coupon, 上次就同熙熙影左喇, 不過就唔係好滿意, 因為滕滕三十幾四十張, 得兩三張係可以, 其他一概都唔掂!

上一次嘅3号風球係係6月尾, 因為打風, 改左今日, 而今朝間studio打嚟, 話我要求個攝影師叔叔唔舒服冇番, 又叫我改期! 真係一萬個唔想改, 因為要就老公d時間, 就係比死更難受, 所以算, 唯有迫住用上次唔好嘅攝影師!

今次一家六口去影, 出嚟嘅result都唔錯, 因為可能今次我地多人, 滕滕開心, 大部份都有笑!

恕我直言~

今日係個cam到見到奶奶入左嚟, 我就照我計劃行事, 打番屋企比滕滕, 同佢講奶奶嚟到要醒定d, 如果唔係嫲嫲走左, 我一定泡制佢(因為滕滕用hand free, 所以奶奶一定會聽到)!  其實主要目的, 我係想比奶奶知, 佢以為佢個孫做乜都係乖!

放工番到屋企, 我問滕滕有冇曵, 佢自己都答我有! 而奶奶, 又同我講佢好乖, 冇曵! 今次, 我唔會唔出聲, 因為我都忍夠佢, 所以我好客氣咁答奶奶: 你次次都話佢乖架喇, 佢做咩你都覺得佢乖架, 佢有幾曵你都唔會覺得佢曵架啦, 所以你唔使答我喇, 你次次個答案都一樣, 所以我係問佢呀! 最吹脹, 就係奶奶答我, 佢真係覺得佢一d都唔曵喎! (真係好想til佢~)

一開飯, 我又再同滕滕講, 叫佢醒定d食飯, 唔好食食下飯, 又係到整哩整路, 又祈禱, 又放隻腳上枱(因為奶奶次次嚟個衰仔都係咁)! 但係點不知未講完一陣, 又嚟喇!  間尺~ 次次奶奶嚟, 食食下飯都一定要放把尺出嚟先安落, 今次, 又要把尺出碼! 食餐飯, 起初都讚, 食食下就又開始話, 話多幾次就開始怒啤, 怒啤之後就開始鬧, 鬧多幾次就開始用尺打! 奶奶嚟, 冇一次唔係咁!

食緊飯, 又再同滕滕講: 你再係咁曵, 嫲嫲走左你就死! 你睇下我打唔打你!  老公聽到我咁話滕滕, 就又同滕滕講: 你唔好再咁曵, 你係唔係要嫲嫲怕左你, 以後都唔嚟呀?!  跟住我又再對住滕滕回應老公:  嫲嫲唔使唔嚟! 如果嫲嫲嚟, 我就趕佢出門口, 等佢成日都咁曵吖!

老公食完離左枱, 奶奶食完唔離枱, 不停咁係到同滕滕講嘢! 我頂唔順囉, 我出口同奶奶講, 叫佢食完就離枱, 唔好不停咁同滕滕講嘢, 再係咁佢天光都未食完! 同奶奶講完, 我就同滕滕講, 我完食都離枱喇, 等佢自己一個仲係張枱到, 食到天光都唔緊要, 最緊要就係食完先可以走!

次次去到呢d位, 又係另到我扯火嘅時候, 因為我趕開奶奶之後, 佢會用眼神去比滕滕知, 嫲嫲係永遠support你, 我一定會嚟救你架!  而且, although 奶奶單左係sofa到, 但係佢對眼, 係唔會離開滕滕架! 大佬~ 我鬧緊個仔, 你可唔可以唔好望佢架, 仲有, 呢d眼神可唔可以轉一轉, 話比個衰仔知佢係曵呀???

所以, 今晚, 我真係忍唔住對住奶奶開口左兩句, 因為再係咁落去, 我唔出聲, 奶奶唔知佢自己咁樣有問題! 而我估, 奶奶知我唔老嚟佢成日都咁縱滕滕, 所以佢今晚冇係到瞓!





 

風水輪流轉!

之前買左幾包紫菜!  原來呢隻味係好辣架!!!

無理由買左唔食架嘛! 所以早兩日已經開左嚟食左幾塊!  滕滕試過, 即刻走去飲水, 都唔敢再食!  尋晚, 我又再食, 一路食, 就辣到我shu shu聲都仲繼續食, 一路食, 一路叫辣!

我估唔到滕滕見到我咁, 會出口囉, 佢話: 你仲食?! 你唔好食啦! 下次你唔好再食喇! 辣死你呀!

我答佢我唔食喇, 因為真係好辣呀! 跟住佢就再話: 你快d去飲水啦!

今時今日, 我居然比個仔話番我轉頭  ! 點解忽然之間, 滕滕變左咁大個???

幾鬼細心~

小朋友, 你真係唔好當佢傻, 以為佢咩都唔識!

我個電話個版面, 有幾頁, 但係唔係頁頁都有screen lock!

今朝忽然間, 發現多左個係page.3! 係滕滕見我呢頁冇, 幫我加上去架!

豬腳~

我真係好鐘意滕滕對腳, 因為真係好肥又好厚! 

真係肥腫難分~

祝你開開心心!

今日約熙媽食lunch, 因為熙媽今日birthday!

今次見熙熙, 佢講嘢叻左好多, 尤其係say no嘅時候, 因為佢地兩個次次見面, 就一定搶車!

無論係咩車, 你冇我有, 或者你有我都有, 正如熙媽話齋, 都一樣會搶!

我地去左和民到食lunch, 都唔知原來和民都有pizza叫, 早知我就帶定d 蠟燭去吹pizza啦!

食完lunch諗住係商場上面個公園玩, 點不知幾掃興, 一上到去就落雨, 仲越落越大! 結果就係商場裏面影左d相!

希望下次見面時唔好落雨啦! 因為我想搵次同熙熙一斉去沙灘玩下沙呀!

完滿結束!

終於今晚完成左成個飲宴!  睇下滕滕今晚幾smart!!!

因為表弟同枱, 而滕滕好似好鐘意呢個表舅父咁, 不停咁搵佢地玩, 仲同我講: 兩個舅父好鐘意玩我呀!(我好鐘意同兩個舅父玩)

好彩老公轉左team, 咁佢先可以同我地去同我地走, 因為我地番到屋企已經差唔多一點喇!

點解???

奶奶, 我都唔明點解佢次次入親嚟, 我都好火滾!!!

首先係我放工番屋企一入屋, 滕滕係我摷手袋, 攪到個電話跌左出嚟, 電同殼都分開晒, 奶奶見到就係到笑!!! 笑!!! 我都唔知有咩咁好笑??? 笑乜先???

滕滕見到嫲嫲係到笑, 佢就好得意咁彈下彈下咁跳去sofa 到對住嫲嫲笑! 我見到滕滕好似好得意個樣, 我就啤行咁行埋去, 好惡咁滕滕, 點解冇問過我就摷我手袋, 跌到我個電話散晒, 仲係到笑, 究竟有咩咁好笑???  滕滕當時見到唔對路, 就當堂即刻好驚咁係到喊! 而奶奶, 佢知道lai晒嘢啦, 唔係佢係到笑, 滕滕又點會跟住笑, 就係滕滕係到笑, 先比我鬧!

到左滕滕攞佢今日上畫畫堂嘅傑作比我睇, 我問滕滕"係咩嚟架?", 奶奶就即刻搶答係鴨鴨!  我之後問滕滕幅畫係唔係佢自己畫? 定係老師有幫佢手? 奶奶又即刻搶答話係佢自己畫, 老師冇幫佢手!  跟住, 我問滕滕今日上堂有冇曵, 奶奶又再搶答話佢今日好乖(次次都係呢個答案!!!)

我唔明, 我已經都唔睬佢, 當聽唔到佢答左我架喇, 但係都仲不停咁答我! 妖~ 究竟明唔明, 我唔係問緊佢架!!!

上次去澳門兩日一夜旅行, 我同老公同亞爸落左去賭場玩左一陣, 番嚟奶奶就同我講, 滕滕吐口水係佢d頭髮到, 跟住就摷亂晒佢d頭髮! 由嗰晚開始, 到左第二日, 已經不停咁講左幾次, 番到嚟hk嘅一個月, 次次入襯嚟都講一次, 而次次講, 滕滕聽到, 又吐口水係佢個頭到玩!

我真係頂佢唔順囉!!! 我問佢係唔係好鐘意滕滕吐口水係佢個頭到玩囉??? 次次都講, 明明佢已經可能唔記得, 但係入襯嚟都講, 下下都提住, 唔記得都變得記得啦, 仲有, 次次都笑住講, 係唔係覺得好好玩先???

我都唔明, 我同滕滕其實冇衝撞, 但係佢次次唔知點解都會另到我咁火滾囉!!!

畫班!

滕滕第一堂畫班嘅傑作!

都幾似吖! 滕滕話老師冇幫過佢手架!

睇嚟, 我都可以幫佢搵下多D手作班玩下喇!

又一次真高興!!!

今朝去交註冊費, 書記女士聽到滕滕個名, 就已經知道我地係識得佢同事, 我一講"我想問.....", 書記女士就即刻答我"OK! 你等等我, 唔使問住!", 跟住用口形嚟同我講"我安排上午班比你!"

真係又一開心事囉, 唔使再等多兩日就已經真真正正OK晒喇! 等到星期六, 我就會帶滕滕去學校度下個SIZE, 睇下訂咩SIZE 校服比滕滕喇!

真高興呀!!!

今朝收到屋企樓下間幼稚園打嚟, 等左成個幾兩個月嘅電話, 終於等到喇!!!

學校話因為上午班未有位, 所以而家只可以安排下午班比我! 

得! 得! 得! 更係得啦! 只要入到, 上午下午都唔緊要喇!

我咁鐘意呢間學校, 原因係因為佢有十幾個外籍老師, 因為我鐘意西人!  第二, 呢間學校攪得好似都唔錯, 因為好似都幾多活動! 第三, 聽聞呢間學校個校長人面廣, 派d小學都唔錯! 第四, 就係因為係正屋企樓下, 校巴都唔使答, 滕滕又可以晏好多起身, 咁車費真係慳番唔小!

呢次真係安落晒! 計計埋埋, 我真係擔心左成幾個月架!

SUPRISE~!!!

今日係公司收到兩封銀行信! 我冇理佢, 因為我估都係每月statement嚟! 到放工先拆嚟睇!

一睇, 就有d嘢唔係好明, 唔係好知係咩類型嚟, 因為似係股票派息, 但係個心諗, 應該冇可以咁多吖, 但係, 又更加冇可能係扣我d咩錢, 因為我近排冇乜用錢, 冇奶油有咁大筆數要扣!

個心好羅羅攣咁走去問老闆究竟封信係咩信嚟!  老闆一睇, 就同我講, 股票派息呀!

派息? 真係派息咩? 再加以証實, 我再問多次熙媽, 佢都話係有息派!

咁大個女, 都未試過無啦啦多左咁多錢, 跟本都唔似係自己辛苦搵番嚟, 真係有d唔實在!

雖然感覺唔實在, 但係今晚一番到嚟屋企, 再睇下個戶口之後, 我就第一時間打比老豆, 話約一日去食buffet, 叫埋細佬佢地, 我請客!!!

50% finished~

今朝, 攪掂左兩年事, 個人心情當堂開心晒!

第一件事, 就係打去samsung, 諗住用亞姑奶嗰幾張廢相, 試下去睇下可唔可以配番個remote control, 點不知我同cs個女仔講, 我舊年都配過一次時, 個cs就即刻同我講幫我check番個record, 應該可以check得番! 結果半個鐘之後打嚟, 係ok晒架! 一個星期訂左貨番嚟會call我上去買!

第二年事, 就係我幫滕滕報左3個courses, 逢星期一三五上堂, 每堂一個鐘, total成惠$1680, 有六個星期上, 所以都ok吖! 以後就唔使日日係屋企唔知做d咩喇!

而家, 仲有7月27日嘅家庭照未影, 同埋仲等緊屋企樓下間學校收唔收之外, 我記得, 我好似冇咩要記實喇!

心情煩躁!

上個星期, 比個仆客攪到我日日都火嚟!  呢個星期, 馮小姐就日日攪到我火嚟! 真係人都癲囉!

亞媽叫我唔好成日鬧馮小姐, 但係我同亞媽講, 佢日日要做嘅嘢, 都可以問我點, 咁你話我點忍到唔小佢呀!!!

星期二打去買電熱水爐間公司到叫個師傅上嚟睇下個爐, 點不知個師傅今日下午上到嚟, 講嘢好似嗌交咁, 下下句句都係到挑戰你咁, 我叫佢冷戰d唔使咁惡咁講嘢, 我怕佢嚇襯我屋企人, 又怕佢嘈醒我老公, 點不知佢居然答我, 佢做開三行, 係咁講嘢架喇! 好~ 算! 我唔同佢計, 佢幫我set番好個爐就算喇!

係個師傅上左嚟冇人又落番樓之際, 奶奶知道個師傅落番樓之後(佢入左嚟同滕滕去左公園玩), 佢居然又再一次落樓, 佢話落去搵個師傅喎! 聽到, 我真係反晒眼囉~ 我問奶奶仲咩事落去搵個師傅呢, 我又冇叫佢咁做, 佢又唔識個師傅, 個師傅又唔識佢, 請問點知邊個係師傅先, 點搵呀?!

差唔多放工, 姨甥仔個嫲嫲打電話嚟同我訴苦, 講左一陣比佢發洩完一輪, 我好大聲咁同佢講: 呢個世界好多人都好嘔血, 如果唔係, 我都唔使就嚟爆血管啦! (呢句話說完, 馮小姐好似聽到我講呢句嘢暗示係話佢咁, 佢走時都冇同我講bye bye就冇人左!)

到左放工, 朋友打嚟, 應該係想同我講佢番份新工好辛苦, 好忙, 好多會要開! 不過, 我冇點同佢吹, 因為佢次次打嚟, 都係一大堆問題想我幫佢去解決同諗辦法!  oh~ sorry! 我真係好攰, 我個腦真係要抖下, 我唔想仲要不停咁去幫人解決呢樣解決嗰樣!


可唔可以比我個腦抖一個星期! 只係一個星期啫!

無叉用~

我好驚比老公睇到呢篇BLOG囉, 不過機會好微, 因為佢好少睇我D嘢, 不過若然佢真係睇到, 都唔好怪我, 因為我都係講事實!!!

尋日奶奶生日, 佢D家姐話尋晚番去同奶奶食飯, 叫埋我地番去, 但係老公要番工, 所以我地冇去!  老公問我佢要番工, 咁我帶唔帶個仔上去, 咁, 當然唔會啦, 一嚟我番屋企再接個仔再出番去, 都成八點, 二嚟我唔係好想見到佢D家姐, 三嚟如果我叫佢帶個仔番去我亞媽到食飯佢都唔會, 所以我亦都唔會帶個仔番去佢亞媽屋企, 比佢D家姐見!

唔去奶奶到, 咁我尋日朝一早打比奶奶, 叫佢D女番到嚟, 就影下個冷氣機個MODEL, 等我可以幫佢配番餉control! 因為我估奶奶都同過佢d女講過個control唔見左, 不過應該都係冇人理佢!

到左黃昏六點幾, 個二姑奶就whatsapp左三張相比我, 不過, 冇一張相係睇到有model no.架!

我都唔知二姑奶影呢幾張相嚟仲乜, 求能其影左比我就算, 咁, 影嚟把鬼咩!!!

再打比佢話d相一張都睇唔到model, 叫佢再睇下潻, 之後就冇左下聞, 原因係, 奶奶今日同我講, 佢地尋晚出左去食飯, 係食飯嗰到撞到幾個朋友, 跟住就一斉食(咁叫同亞媽慶祝生日喎), 可能撞到朋友一斉食飯開心得济, 之後就乜到唔記得晒喇!

我心當堂叮一聲, 我真係唔應該唔開心奶奶乜叉嘢都叫我幫佢手囉, 因為佢d女個個都係廢嘅! 個武媽間房個冷氣開唔到, 佢地都唔怕亞媽熱過頭瞓唔著, 又唔怕焗襯個亞媽囉! 

點解???

點解一個人不停咁比人話, 做嘢都係咁差???

既然比人話做嘢慢, 點解都可以覺得自己冇問題???

生左仔, 唔知個個女人都做嘢有問題咩??? 唔係囉, 我識咁多朋友, 只係你一個係咁差, 仲要比人話極都係咁!

番工, 可唔可以帶埋個腦架??? 我話唔明可以問, 但係唔代表唔撚用腦, 乜九嘢都走嚟問我架!!!

唔記得, 唔該走去溫下書啦, 如果唔想比人話! 但係又懶過隻蠢豬, 連攞出嚟睇都唔願! 既然係咁, 你比人鬧, 係抵死囉!!!

自己做得唔好, 唔盡力, 只有怪自己唔勤力, 唔好去話人!!!  古語有云, 將勤補拙! 而你呢, 知道自己蠢, 就要努力d, 到頭來比人抄, 唔好怨人!!!

朝朝都問撚埋d廢話!!!

d人, 唔拮九佢都唔安落! 呢幾日, 朝朝都係咁!

尋日朝隻豬兜佢一早book隻柜, 我想要即走! 佢打去船公司問, 同我講要即日下午截補料, 問我趕唔趕得切! 講講下就講左今個星期六14号截倉! 因為即日下午截補料我都怕運輸安排唔到, 所以我就叫佢問有冇截15号嘅! 講完隻豬兜反問我: 吓? 仲要再遲? 你又話趕?

我答佢就更係趕啦, 如果唔係點會話即走啫! 跟住隻豬兜又再講: 咁你話14号唔要, 要15号嘛!

我又答佢, 咁你話14号要即日下午補料, 咁如果運輸趕唔切, 咁15号先裝都要架啦!

我一咁講, 隻蠢撚到冇人有嘅豬兜就話, 如果今日補料, 係截11号, 唔係截14号呀!

吊~ 當堂火都嚟! 我問佢, 你幾時同我講過即日補料係截聽日呀, 你講嚟講去都係講"今日"同"14号"呢兩個日子, 你究竟知唔知你自己講過咩架??? 你使唔使諗下究竟自己講過d乜架???

尋日臨熄電腦前, 我個客send左個mail嚟係urgent改單, 所以我整好晒d嘢, 改埋張生產單(比埋廠), print 左一份比老闆, print 左一份係隻豬兜枱面! 隻豬兜今朝番到公司, 見到佢枱面有份revised 嘅生產單就走嚟問我, 係唔係比佢?! 都痴撚線, 唔係比你, 咁比邊個架, 唔比你咁放係你枱問仲乜7嘢先??? 問嚟都多九魚!

跟住叫佢開張生產單, 個cargo ready date係要即走, 但係個客未決定用邊間forwarder, 呢隻豬兜, 又走嚟問埋d廢話, 問我個closing打幾時! 真係唔想小九佢都唔得囉! 我話: 你都唔係今時今日開單架啦, 呢d急單, 成日都開, 咁都係打待覆, 你唔係呀嘛!!!

話撚完佢, 我知佢唔老嚟, 因為到左lunch, 佢都唔死出去開飯, 去到成1點半講埋個電話先去整, 我好相信佢唔like囉!

其實唔老嚟咪唔好去開飯囉, 大不了同我講以後各自各啦苯, 仲咩死都唔出聲先!!! 我又唔好老嚟你成撚日問埋d廢話啦, 你係要我大大聲咁話你先安落! 咁你都可以講唔想開飯架!!!

日常生活~

暢泳~!

老公呢排開少左OT, 原因係佢話其中有條TEAM D人賤, 所以唔幫嗰條TEAM D 人頂更! 所以呢排佢陪滕滕D時間多左!

上兩個星期天氣都唔係咁好, 見今日中午落完雨之後就鬼死咁好天, 所以我地又去沙灘喇!

其實上一次之後, 滕滕已經冇咩興趣玩沙, 因為上次我已經比佢落左水, 而佢, 好似鐘意玩水多過玩沙喎! 咁今次, 連BUT沙D工具都費事帶去喇!

只係帶左個水泡~!

呢條友仔, 今次叫佢老豆唔好捉住佢, 佢要自己游喎! 雙腳掂唔到地都唔喊, 所以進步左一大步喇!

相識紀念日!

7月7日, 係我同老公相識嘅日子! 話咁快就14個年頭!

今日遇啱老公唔使番工, 又係星期六, 所以都唔使講, 大家已經有共識係一定帶埋隻豬仔去食飯!

今次好勁(講比人知都比人笑), 我地都未試過叫咁多嘢食, 一共叫左六樣嘢!

我地去左黃金海岸食飯, 食完飯出嚟, 就係出面d檔口仔到睇嘢! 滕滕一見到車, 就話要買喇! 而呢個成日話我好買車比個仔嘅老豆, 咪又係買! 有口話人, 冇口話自己!

賤客!!!

點解呢個世界上有d男人可以賤得咁緊要?????  呢個仆街佬, 下下都唔知點解要賤到出晒水佢先安落!

料價高佢要落單(其實唔係高, 只不過係而家跌左少少), 到而家d料價跌左小小就係到話我地d貨有問題! 叫佢個家產send番嚟比我, 佢答我 "send back?"

"send back"好出奇咩!!! 你講到我地d貨咁有問題, 更係叫你send番嚟比我地睇啦, 唔通無啦啦硬食, 跟住比你個仆街屈我地賠錢呀! 叫佢send番3個比我地, 同我公司個ups a/c比佢, 條仆街冚家產就send左12個比我! 佢老味, 嗰箱嘢足足成1700蚊!

send個mail嚟話已經搵ups寄出左! 我唔覆呀, 點吖! 你通知我, 我就要即刻覆你個家產咩! 點不知條仆街打idd過嚟問我有冇收到個mail, 仲要我今日一定要覆佢! 好~ 我覆你, 不過等放工前一分鐘先覆你囉, 仆街!

呢個家產, 真係好Q憎佢, 又要平又要快! 你話呀! 要平就等下啦! 巴閉就唔好同我地落單啦苯! 你又死去同我地落! 你老母生你出嚟搵賤架!!!

做男人做到咁賤, 呢D人我一定唔會同佢做FRD囉, 如果唔係想fight 抵d competitor, 我真係唔想同佢做生意!

忍! 我而家忍你! 不過我睇你幾時死係我手上! 佢老味!!!

真陰公~

唔知係唔係成左幾日糭, 攪到個胃唔舒服定係尋日食左d魚生, 攪到唔舒服! 總之, 今朝開始就feel到好似腸胃炎!

滕滕今朝又唔知痴左邊條線, 又唔比我番工, 又死都要我同佢瞓, 攪到成八點半先可以比我出門口, 仲要係喊住話叫我早d番!

點不知, 平時去開隔離村個巴士站冇晒人, 原來爆水管, 結果要行番去屋企樓下個巴士站! 個胃已經唔舒服, 仲要行嚟行去, 天氣又熱!

番緊公司之際, 老闆打嚟, 話個banker改期, 想今日下午去廠!

唉~! 真係想請假囉! 不過, 唔得! 就算唔使上廠, 都有嘢要做啦! 更何況話要帶嗰幾個banker上廠, 即係發住燒都可能要去! 老闆仲話, 番到嚟hk要帶佢去去太湖食鮑魚! 唉~~~ 當初諗, 真係慘, 腸胃炎都要迫人地食鮑魚!!!

好彩, 嗰幾個banker都趕住放工, 佢地話下次早d先食喎, 仲有一定要等埋我老闆先去!

咁都好d, 趕住放工喎! 所以第一時間番到嚟hk, 就各自各散喇! 我呢, 就去食左碗粥先番屋企!

彷似好豐富~

一連三日假期, 老公都要番工, 尋日同今日個工人都放假, 所以只我同滕滕兩個相依為命!

尋晚, 番左亞媽到食飯, 老豆突然轉軑話要出去同大伯做生日, 所以我就叫埋我個舅父上嚟食飯!

食完飯, 細佬同滕滕玩左一陣就走喇, 次次如事, 去搭地鐵再轉巴士! 可以滕滕少搭地鐵, 所以佢好似好好奇咁!

今日, 我地去左沙灘玩呀, 成五點半都晒到亞媽都唔認得!

豬仔開始唔多怕水喇, 成個身浸住都可以!

比起舊年真係怕到飛起!

玩左一個鐘就走喇, 因為太陽落山! 番到屋企沖左個靚涼之後, 我地就去食壽司喇!

其實我都唔係太敢比滕滕食壽司架, 話晒都係生冷嘢嚟, 始終都有危機架嘛, 所以今次試住付皮壽司同埋蛋壽司先!

食完番到屋企都九點幾喇, 三日假期就完左lu~!

點解我隻豬仔咁大個???

星期五係番學LAST DAY, 唔知點解我好唔捨得! 其實樓下間學校後備未覆架, 但係就好唔想學期完囉, 因為滕滕係呢個學期, 同隔離位個同學仔真係好frd, 日日放左學都不停咁何倬僑何倬僑! 臨瞓前都不停咁講住個同學仔!

學期尾, 老師派左本學習歷程番嚟, 嗱~就係呢個倬僑同學喇!

老師都話佢地好frd架, 成日兩個係到玩, 兩個係到傾計! 可能因為我知道呢個同學下年唔會係呢間到讀, 所以係我唔捨得囉~

呢本歷程, 真係好歷程下, 因為一路睇, 我就發現滕滕點解而家大個左咁多???

只有我不停咁係自己個腦到回顧番佢係我個肚到一日一日咁大, 跟住籬咁大, 跟住唔覺唔覺就生左出嚟, 由手抱到而家抱唔到, d時間好似唔覺咁流走晒喇!

唔該~ 可唔可以唔好過得咁快呀!