改名!

今日約左個師傅見面, 同亞b 改名, 師傅比左4個我地撰:

1)季鎰康(師傅話呢個係最好嘅)

2)季浩鋒

3)季卓鏗

4)季鎮洋

師傅同亞B 批左八字,話佢個人比較被動 D , 唔係主動嘅人, 讀書都唔錯, 做事要求要有成功感, 冇錢收都在所不計, 而個人都幾孝順同聽話!

其實呢四個名, 我地都唔係好鐘意, 所以求神拜彿, 下一個師傅要改得好 D 呀!!!

真係叻仔!!!

今日又番去母嬰健康院睇面黃喇, dr 話亞b 好叻呀, 因為 10個著左9個bb都要去照燈, 而亞b 面黃差唔多退晒喇!

真係舒服晒, 唔使再擔心!

Dr Fan 你好, 又見面喇!

今朝我番去 Dr Fan到覆診, 睇下個傷口, 結果係好好, 因為生完之後第二日, 個傷口已經唔痛喇, 所以 Dr Fan d 手勢真好冇得頂!!! 如果生下一個, 我都要搵番 dr fan 同我接生, 因為 dr fan 真係好好, 個人又好好, 又有醫德, 價錢又唔貴, 總之就冇得彈, 所以以後婦科檢查我都會搵番佢!

 

呢位就係好到冇得彈嘅范德忠醫生喇!!!

要再睇下情況

今朝番母嬰健康院同亞b 睇面黃, dr 射到亞 b 嘅指數有差唔多二百三十幾, 所以就要我亞b去屯門醫院驗血, 好彩, 驗血出嚟嘅結果有200到, 所以今日唔使照燈喇!  不過明天就又要番母嬰健康院檢查喇!

DR 話面黃都偏高!

今日同亞B 番法國醫院見DR, DR 一睇亞B, 就同我地講, 亞B面黃, 問下我地想唔想驗血check 下, 咁我個心諗, 橫掂明天都番母嬰健康院睇面黃, 不如早d check 左佢啦, 所以我地係法國醫院等左差唔多 45分鐘, 個report 就出左嚟! 數字雖然未到 250, 但係都有成 230, 所以 DR 叫我地考慮下!

亞 B, 如果你冇面黃就好喇, 我唔想你去照燈呀, 因為 D 人話去政府醫院照燈, D 姑娘唔會同 D bb 換片架, 到時你個 pat pat 就慘喇!

可能要照燈

尋日終於同亞 b 番左屋企喇, 不過番到嚟之後, 真係反眼, 因為間屋真係得番條路行! 個地板啱啱鋪好, d 傢私就大兜亂, 又大塵, 所以第一時間, 就叫賓賓揍左我間房 d 床單, 鋪埋 bb 張床仔, 我就放底亞 b , 開始執屋喇!

尋日第一日番到嚟, 真係手忙腳亂, 因為亞b 一喊就要食奶, 都唔知究竟同佢換片先定飲奶先! 又要沖涼, 又要洗肚池, 真係忙到不得了!

今日同亞b 去母嬰健康院去登記, 醫生話亞B 有小小面黃, 所以安排BB星期四再番母嬰健康院再 check, 如果度數高的話, 就可能要去照燈喇!

 

 

登! 登! 登! 登! 亞 B 趕住出嚟呀!

星期五先見完 Dr Fan, 都講話今個星期亞 b 都應該未咁快出嚟, 係星期六零晨兩點幾, 瞓瞓下覺, 突然穿左水, 咁就話生得喇!  起初, 都唔知究竟係唔係穿左水架, 不過連下一步都流出嚟, 我諗都冇走雞啦! 但係個心真係好緊張, 都唔知點算, 所以亞 dee 就打電話比 Dr Fan, 問下清楚下佢係唔係生得喇! 搵完 Dr Fan, 就打比柏濤, 因為我地都唔知想點, 個腦都諗唔到嘢, 又唔識搵嗰 d 孕婦衛生巾嚟用, 攪到個人亂晒!

好啦, 攪完一大輪, 終於出門口, 打的去法國醫院, 去到醫院, 攪完一大輪手續, 都成四點幾五點, 姑娘叫亞 dee 番屋企先, 叫佢朝早八點幾再番嚟, 所以我就諗住眠一眠, 但係個人真係好緊張, 就生得喇, 究竟點呢........眠嚟眠去, 終於瞓左一陣, 六點幾開始痛喇, 係痛醒左!

Dr Fan 大約差唔多八點就到左嚟睇我, 佢話我個進度唔錯, 應該可以係中午時生, 同埋佢話會比包嘢我吊下, 縮短我嘅痛苦時間, 不過雖然呢包嘢係可以縮短痛苦時間, 但係就D 痛楚就越嚟越緊要, 同埋越嚟越快!

亞dee 係差唔多成八點幾先到, 而且我仲叫佢買埋早餐比我食, 因為我怕生嗰時冇力嘛, 不過食完早餐之後, 去多次廁所之後, 就冇再落床喇, 因為開始幾痛, 痛到唔想落床, 連回答亞dee都唔想, 甚至乎望都冇望過亞dee 一眼!

我諗大約十點幾, 我入左產房, 因為聽到姑娘講已經去到 3, 4度喇! 姑娘叫我, 如果痛就吸氧氣啦, 因為我冇吸到, 只係係到講: 好痛呀, 醫生到未呀!!! 跟住個姑娘就係到同我講, 痛就吸啦, 生仔係痛架喇, 叫都冇用!!! 好啦, 吸吸吸, 吸吸下 Dr Fan 終於都到喇, 係三次出盡力之後, 都係差小小, 所以 dr fan 就用個吸盤幫左我一把, 吸左亞 b 出嚟, 係 11:29am!!!

亞B 終於出左嚟啦, 真係好似亞 dee, 尤其係雙眼! 小b, 我嘅小 b, 你出左嚟喇!

黑心死八婆

今日去完 Dr Fan 到做產檢, Dr Fan 話亞 B 而家都有成6磅尾, 預計亞 B 出世有成7磅以上! 嘩, 亞 B 有成 7 磅以上, 加埋 D 水, 個胎盤咪好重, 唔怪得我瞓覺時條腰咁痛咁辛苦啦!

檢查完之後, 係地鐵到遇到個千年難得一遇嘅死八婆, 因為呢個PK真係好PK, 佢話我行得慢, 阻住佢沿住最短嘅路程行落樓梯, 所以我就話番佢問佢條路係唔係佢買起左, 條路咁闊, 我隔離冇人佢都唔行, 係到話我!  點不知個 PK望番轉頭, 見到我大住個肚, 就話我: 鬼唔望你生個K胎! 吓, 呢個女人真係 PK 中嘅 PK! 跟住我都唔弱, 就即係講話佢個口生 cancer, 把口咁仆街! 

扮晒嘢!

個會計同事鐘意係老闆面前扮同我地有計傾我都一早已經知, 呀, 估唔到佢 cheap得咁緊要, 突登等係老闆娘出嚟影印嗰時, 專登問使唔使幫手整理 d box file! 嘩, 人地已經整左幾日啦, 幾日你都唔問, 而家老闆娘係到影印你先嚟問, 有冇 cheap 得咁交關呀!

其實對住 d 咁厚面皮嘅人, 點樣先好呢?! 如果係我, 我就會同佢講, 我自己都已經整左幾日喇, 當然梗係唔使啦, 你而家先問!  可惜, 佢問嘅並唔係我!

 

對腳又嚟喇!

頭先食 lunch, 我望到對腳, 又開始腫喇, d 人話咩三消三腫都唔係好啱嘅, 因為我已經好似係第四定第五次喇!!!

奇!

我以為對腳會腫到生嗰時啦, 點不知今日望一望對腳, 居然消左腫喎! 咁係唔係意味著, 仲咩生得呢?

Dr Fan 例檢

今日去 Dr Fan 到例檢, dr 話亞 b 而家2.7kg左右, 即係有 6 磅, 其實都好肥下。因為 dr 次次睇到亞 b , 都係到笑, 話佢塊面好多肉, dum出嚟, 所以又叫我 keep 住而家咁, 唔好食咁多嘢!  係檢查其間, 我問 dr 係我個肚嘅左手邊嘅上面嗰 part, 究竟係亞 b 邊個部位, 因為佢撐到我行, 又唔郁, 一味撐住, 攪到我條腰要申到好似木板咁直, 點不知話口未完, 亞 b又嚟喇, 撐到頂左出嚟, dr 嗰時就已經話, 佢真係撐到好行喎, 係隻腳嚟架!

仲有, 今日 Dr 同我 check 過, 佢話未來呢個星期, 亞 b都應該唔會出嚟住, 因為佢仲未進入軌道

而家夜晚瞓覺, 真係好惡頂, 因為條腰骨真係好辛苦, 有一刻真係好想快 d 生!

P.S. 肚圍: 42"

熊掌

我隻腳已經腫左成兩個幾星期喇, 由當初嘅7号鞋至到而家嘅9号鞋都已經唔係好頂得住.  日日番到屋企, 望到隻腳, 就諗起周星馳有套唔知乜鬼攪笑片係講比賽煮熊掌, 拿, 我而家隻腳就似嗰隻熊掌喇, 連腳指都肥埋, 虧亞 dee 仲話好得意喎!!!

朋友話, 最尾嗰個幾月係最辛苦嘅, 而家我感受到喇, 平日都算 ok, 最多唔行, 唔企咁多, 嘩, 但係夜晚一瞓覺就好似受罪咁, 辛苦都不得了, 從前都未曾經想過原來瞓覺都可以辛苦得咁緊要架!!!  因為連轉身都有困難, 好重, 條腰骨就係好痛, 瞓幾個鐘去一次廁所, 起身嗰下, 真係要無比嘅力量先可以起到身呀!

亞 dee見我辛苦到咁, 都同我講就得喇, 仲有一個月咋, 但係佢又知唔知我好 enjoy bb係我個肚入面郁嚟郁去嗰種 feeling 呀! 我同佢講左我嘅感受之後, 每次 bb 郁下郁下, 我同亞 dee 都會一斉放雙手係我個肚到, 大家再 feel 下, 因為亞 b 真係好快就出嚟喇!