好難想像~

今晚差唔多要預備刷牙時, 滕滕成身玩到出晒汗痴笠笠, 我就打算同佢快速咁沖身等瞓覺都舒服D吖, 點不知隻豬仔同我講: 沖身之嘛, 我自己都得啦!

"我自己都得啦!" - 我知, 我知你而家可以! 但係, 可唔可以留番小小嘢係比我去幫你嘅呢?

滕滕而家4歲半, 當佢10歲時就應該已經唔需要我去照顧佢的話, 即係我仲有5年半可以去痴住佢OR 佢去痴住我!

我有時諗, 如果滕滕開始大唔太需要我時, 我到時就會學嘢, 學呢樣學嗰樣, 聽落好似好開心咁~ BUT, 其實我係覺得, 你唔多需要我啦, 咁我咪自己去搵嘢攪下囉, 唔通成日去煩住你咩, 煩得你多, 一陣你嚴我煩我就大獲喇!

之前滕滕都會唔想我約朋友食飯, 但係我同佢解釋, 因為有朋友生日所以出去同佢慶祝, 如果比著係你生日, 你想唔想你朋友過左好耐先同你慶祝先! 呢番話說完, 以後滕滕再冇叫我唔好去街喇! 佢只係問我, 你係唔係係我瞓著左先番嚟呀? 會唔會唔番嚟呀?

傻豬仔~ 我恨不得帶埋你出去啦! 但係因為我次次出去都係星期五嚟, 所以先唔帶你出去啫! 既然我希望咁想同你一齊出去, 我又點會捨得夜晚唔番嚟見你喎!

自食其果!

我呢, 有時真係幾鬼堅, 不過如果唔係咁堅, 真係對付唔到呢條友仔!  我成日都以自己嘅一套去教仔, 堂家姐唔認同, 佢覺得我對個仔嚴厲同惡死, 成日仲覺得佢教仔嗰一套冇問題, 但係冇問題個仔又點解一d都唔怕佢, 仲要成日玩嘢呢?

今晚番到屋企, 飯都未食個工人就同我講滕滕張D糖紙, 餅乾掉左入浴缸下面個窿到!

呢D嘢就更係刻不容緩, 即刻叫姐姐攞個吸塵機出嚟, 更係比滕滕同我吸番乾淨晒佢先可以步出廁所啦!

 

 

我而家, 已經可以做到不需要大喝大駡, 我只係同工人講一句: 攞個吸塵機出嚟比佢要佢吸番乾淨晒d垃圾出嚟! 滕滕就已經開始驚到流馬尿喇!

滕滕喊住咁叫我原諒佢佢下次唔敢! 好~ 我原諒你都可以, 不過係你吸番晒所有垃圾出嚟之後, 並唔係而家!

可能個窿又黑又睇唔到, 每吸到大樣嘢都好大聲"馮"一聲, 我知道滕滕聽到d"馮馮"聲好驚, 所以我比個favour佢, 就係可以姐姐係廁所陪佢!

結果~

唔怪得屋企咁多曱甴仔啦! 原來滕滕收埋咁多嘢比佢地食!

我相信呢次之後, 滕滕唔會再覺得好好玩, 收埋d垃圾係個浴缸底囉!

好靚吖~

呢排買左好多嘢, 買到收唔到手, 今個月到今日為止, 總共淘左HKD4200! 有1/3唔係我嘅, 而其餘大部份就係滕滕D冬天衫褲&小部份係我嘅冷衫! 我覺得自己好似痴左線咁囉~ 我係唔係已經有購物狂呢個病呢???

今個月最開心就係淘左條鏈番嚟!

可能有上次嘅經驗, 所以今次訂做嘅size 細過上一次, 而且整左玫瑰金色~

我都好like~!

新偉論~

星期四放工番嚟, 滕滕無啦啦同我講: 媽咪, 你以後唔好買車比我喇, 我唔想嘥晒你d錢呀!

咁益我, 當真唔當真呀??? 滕滕無啦啦有日咁突然同我講, 我就知道嗰日係學校老師應該咁樣教過佢!

其實我都好縱滕滕, 成日不停咁買嘢比佢, 攪到佢有時我一入屋, 佢見到無啦啦我帶多左個袋番嚟時, 佢好似知道一定有禮物係佢嘅咁!

我聽到滕滕話唔要車, 我就即刻同佢講: 咁我啱啱又買左車比你喎, 不過未到公司, 咁即係如果到左可以唔洗送比你啦!

嘩~ 當堂叮左一聲咁, 雙眼已經放光喇! 跟住滕滕就問我係唔係真係買左車比佢喎! 我話買左就邊有假嘅呢, 不過, 條件就係要佢唔再搣到d手指皮爛晒, 咁先可以有禮物囉!

聽到有車嗰, 滕滕番偉論就好似已經唔記得左咁lu~

終於完結!

有一晚我同滕滕夜晚臨瞓前同滕滕傾計, 我feel 到佢老豆好好好投入咁去搭訕, 係呢個moment, 我啖氣突然間下左喇!

諗番起, 其實我都係想佢成日都可以好溫柔咁對個仔好d, 我就心滿意足, 當然, 佢唔鬧個仔唔鬧我, 就更係最好啦!

足足過左兩個星期, 老公好似轉左性咁冇乜鬧人, 其實我個心好歡喜時又唔敢表露, 因為有時d嘢好邪, 一講左出嚟就即刻唔係嗰回事, 所以我只係心藏歡喜!

因為老公轉左新公司, 所以呢個月都冇乜開OT, 唔知係唔係個人夠瞓左所以冇發皮4, 而我係呢個moment就會搵機會入佢, 係平常語氣而又唔串嘅聲線去搵拉入佢, 究竟係個人可唔可以EQ高D, 唔好郁D又鬧人, 一郁手就打個仔呢?!  我, 希望佢真係可以control下自己, 因為我段估佢都會好似佢老豆咁, 越佬越麻撚煩, 越老越黑人憎~ BECAUSE 我真係信有遺傳!

見心情好番d, 又係星期六, 所以就親手整左兩味餸!

 

 

 

好耐冇落廚喇, 姐姐煮左兩個餸, 我就煮多兩個, 3個人食4個餸, 所以已經好豐富喇! 不過, 可惜, 手掌咁大隻嘅花甲居然兩個季生都唔識欣賞喎! 問題唔係係味道到, 而係太大隻喎~ ......真係幾一個迷, 太大隻唔好食!

核突到呢~

我都唔知道滕滕幾時開始識玩鼻屎嘅, 成日見到佢係咁撩! 撩! 撩! 撩! 咩都撩清啦係嘛, 仲有咁多嘢撩咩???

係張sofa到又撩! 係張床到又撩! 攪到張床成日有一粒一粒乾左嘅鼻屎係到! 好彩姐姐幾日就同我換一次床單咋! 呢~ 呢樣應該係遺傳嚟架囉, 因為佢老豆又係好鐘意瞓著左時撩鼻架! 都唔知咩人嚟架!

今晚姐姐同我講, 滕滕無啦啦塞粒嘢係佢個咀到, 姐姐問滕滕係咩嚟, 點解咸咸地嘅, 跟住滕滕居然答佢係鼻屎囉~! 真係唔想鬧佢死仔都唔得呀, 衰得咁交關比鼻屎人地食!

成日已經鬧佢唔玩鼻屎架喇, 究竟幾時先唔玩架???

我好相信亦都感覺到小朋友4-6歲係發展潛能嘅階段, 所以我成日都同滕滕長篇大論咁去解釋每一樣事, 而滕滕亦都好不厭其煩咁不斷延續我地嘅話題! 幸好, 滕滕好有耐性咁去聽晒我嘅解釋, 因為堂家姐個仔都未聽到一半就已經走左去lu~

我冇學過點樣去引導佢地嘅潛能, 所以平時我都係盡我所能去引導滕滕思考, 而我其中一個目標就係佢可以講故事書比我聽!

之前買左一d故事書番嚟只係得圖畫, 而呢d故事書正正係想小朋友看圖表達! 我見到d圖畫一心就諗, 咁簡單應該係好容易啫, 但係事實並唔一樣囉, 我叫滕滕嘗試下去講, 佢一口就答我佢唔識!(唔知係唔係滕滕蠢呢? 可能係都唔定..........定係佢未到嗰個年齡所以佢先唔識呢..........)

如果佢係蠢, 唔緊要! 等我慢慢引導你囉, 所以而家每晚講故事書, 我講完一次, 第二晚我都要滕滕講番一次比我知! 起初滕滕都唔肯架, 一叫佢佢就話唔識, 但係我話囉, 次次都係我講比你聽, 你都要講下比我聽先得架! 唔識唔緊要, 睇住d圖畫見到乜就講乜, 因為媽me唔會話你又唔會笑你架!

所以, 我而家好期待, 唔知滕滕幾時先可以唔需要我先講一次就可以就咁講故事比我聽呢~?!

差唔多到10月, 學校先派興趣班d資料嚟, 其實如果家長係想比自己仔女去學嘢, 跟本一早已經學緊, 唔需要等到開左學之後嘅個半月先嚟報!

滕滕而家星期一/三/五/六都去上英文班, 星期三去學畫畫, 星期六下午去學手指手算!

 雖然好似好多咁, 其實4日嘅英文班, 我從來都唔理佢學咩, 個心只係諗學到嘢固之然係好, 但係學唔到都唔緊要, 當係同d西人(老師)吹下水去玩下咁! 而畫畫, 就係佢like, like嘅就真係唔同, 佢好開心, 好想學, 每次去學完畫畫番嚟都比我睇佢嗰日嘅傑作! 我唔望佢畫畫有咩成就, 只係希望佢畫得開心! 手指心算佢又係like, 可能玩下手指仔幾得意卦, 暑假學完, 開學再開班佢都話去玩, 所以比佢玩埋囉!

滕滕而家只有二四係得閑, 收到老師興趣班通告, 有跆拳同普通話係fit for 而家嘅空間, 而呢兩樣我都有興趣, 因為滕滕閑時會自己講d唔咸唔淡嘅火星普通話, 所以我知佢都like! 二選其一真係好難, 結果, 我揀左跆拳班!

今日係第二堂, 收到套衫, 滕滕著左上身唔肯除, 咁我就知佢like玩喇! 其實我都怕佢理解錯, 學功夫係要嚟強身健體同保護自己並唔係要嚟打人, 所以我而家開始又要洗佢腦同佢講, 如果遇到壞人時, 可以用功夫嚟對付壞人, 所以學左番嚟一定要教我架!

真霸道~

唔知滕滕幾時學識咁惡!今晚姐姐同我講佢係街行緊時, 一路行就唔避開人, 無論迎面而嚟 or 係佢前面, 佢都直行直過就撞埋去人地到!

我當然問左滕滕點解要咁做先開佢波啦, 佢居然答我: 因為佢地阻住我囉!

一聽到真係火都嚟囉, 我即刻問滕滕, 條路係唔係你架??? 屋企d車d玩具就係你嘅, 請問條街係唔係你嘅先??? 人人都係街到行, 點解你要話你地阻住你??? 你可以行, 人地都可以行, 點解人地行緊要就你先??? 如果條街係你, 你就可以話佢阻住你, 但係而家條路係公眾地方, 人人都可以係到行, 點解你要話人地阻住你而撞開人地吖???

滕滕畫冊

滕滕畫畫畫得越嚟越好, 睇到佢幅畫D details 就知道佢開始有細緻嘅位置, 而且越嚟越有神髓!

比佢學畫畫原意, 係希望佢可以train佢耐性可以坐得比較耐d, 而且畫畫可以train佢小肌肉, 都唔係想佢有咩一技之長, 但係真係冇諗到佢咁有心機去學囉~

呢幅係我覺得近期最靚嘅作品! 一睇真係嘆為觀止! 我冇諗過自己個仔4歲幾就可以畫到幅咁嘅畫! 當然, 佢有心機去學係main point嚟, 但係我更加估唔到個老師係咁勁, 可以一次過教5-7個小朋友去畫一幅咁嘅畫, 而最勁嘅就係個老師只係廿幾歲咋!!!

 

如果冇一個好老師, 跟本就唔可以畫到d咁樣嘅畫, 所以呢間畫室穴係冇得彈!

成熟~

滕滕呢個豬仔, 都唔知點解諗嘢咁成熟, 熟到連我都頂佢唔順囉!

上個星期日, 佢老豆番通宵, 通常我地去lunch, 佢老豆都仲係睡夢中, 所以當然更係顧掂我同滕滕先啦!

滕滕唔想行太遠, 咁我地就去買左盒排骨飯番嚟食, 點不知食食下滕滕同我講~

滕: 點解你唔買多盒比爸B呀?

我: 都唔知佢幾點起身!

滕: 就算唔知佢幾點起身, 都可以買定架啫! 一陣佢起身肚餓, 咪可以即刻有得食囉!

我: 咁佢起身時都凍晒啦, 更何況都唔知佢鐘唔鐘意食!

滕: 佢起身時如果餓, 可以整番熱比佢食架嘛! 下次你記得一定要買埋比佢喇!

我, 當堂冇聲出啦! 我, 唔可以同佢講佢老豆係一個麻煩人, 呢樣又唔鐘意嗰樣又唔鐘意, 更加唔可以講, "我而家仲未睬番你老豆"啦, 所以我唯有唔出聲當知道!

呢個友仔, 佢除左學識左去關心人之外, 仲學識埋去challenge 人!

已經都唔係第一次問我, 無啦啦抽起條筋今晚又問我: 點解你同爸b 結婚嗰時我唔係到架？我嗰時係邊吖？咁點解我未出世架？你嗰時係邊到嚟架呢？點解你好似係天空上面架？

我明白滕滕咁問, 係challenge 緊我點解你兩個結婚我唔係到架??? 結婚咁大件事, 點解唔等埋我出世先結架???  點解你地去影相唔等埋我先一切去???

今次個blog真係要搬喇~

幾唔想都要! 真係幾唔想都一定要! 用左幾年嘅yahoo blog, 已經熟晒d嘢就話要搬!

搬左去呢個新地址: www.yoki0707.blogspot.com

唔知幾耐先攪得掂個新嘅, 煩!

辛苦豬仔!!!

星期一已經有輕微腸胃炎, 戒左幾日口開始好番喇, 不過就又開始有小小鼻水!  尋晚食飯時滕滕已經同我講佢唔餓, 所以只係比左半碗飯佢食!

未夠11點就已經話好攰, 瞓左落去不停咁有胃氣出時我已經心知不秒, 所以我已經整定左隻湯碗係床邊, 但係瞓到12點幾, 真係嘔到一床到係囉!

嘔完一大輪, 整好番晒成張床, 比左幾塊梳打餅同埋止嘔藥比滕滕食,跟住就再瞓番喇, 但係3點幾佢開始又唔妥, 又嘔, 而且仲痾水! 水, 我都唔敢比多佢飲, 因為我知道佢又腸胃炎喇, 我怕佢飲得多水隔一陣又嘔番晒出嚟!

雖然只係飲一啖水, 但係都照嘔囉! 嘔到黃膽水都嘔埋都仲有嘢嘔, 真係陰公!  一路嘔, 就一路痾, 痾左小小水之後個肚就不停咁陰陰痛, 但係又痾唔出喎! 我唯有坐係滕滕前面抱住佢, 希望佢咁攰時我可以旁下佢唔好咁辛苦!

又攪完一大輪之後, 未天光五點幾又嚟過! 今次就齋嘔痾唔出, 不過個肚又係陰陰痛到飛起囉!  因為之前比左藥佢食, 雖然嘔番晒出嚟, 但係又未夠4個鐘, 所以我都唔敢再比佢食喇, 就係之所以今次冇食藥, 就所以先可以真真正正咁瞓到11點幾!

貼左張紙叫個工人同我去dr到排隊, 所以起身冇耐就可以去睇醫生喇!

其實我覺滕滕真係好乖, 尋晚咁辛苦, 佢一d都冇發過皮氣, 佢肚痛痾水, 我想陪佢坐係佢前面, 佢居然怕太嗅會嗅襯我叫我出廁所喎! 真係傻豬仔囉, 媽咪點會怕嗅唔陪你啫!

直到今朝去睇醫生佢都冇"猛爭"過, 而且一起身時可能冇咩事就笑住咁同我講早晨! 所以其實你乖時, 我真係好鐘意好鐘意你架! 你想要咩玩咩, 只要唔過份, 媽咪一定會比你架! 

放假的第一天!

呢個week-end放3 days, 因為星期一係重陽節補假! 滕滕已經識得晒星期幾星期幾, 所以佢知道星期六&日我放假就會問我地今日去邊!

因為今日係第一堂玩手指但係跟住嘅英文班唔洗番, 所以我就特別記得, 但係上英文班嘅其他家長, 除左我就全部唔記得晒, 個個就番晒去! 好彩我記得個助教講過今日唔洗番咋, 如果唔係一定比人complain死, 因為其他唔記得嗰d家長個個都鬼殺咁嘈話上個星期冇人講過喎!

見下午free, 所以我地專登去佢屋企坐, 順手同佢個仔食生日cake!  因為11月2日佢invite我地去佢地個bday party, 但係咁啱撞正上英文班時間, 所以今日去探佢地時就更係慶祝埋啦

唔係滕滕bday, 佢都一樣好開心, 而且仲同我講佢今日玩得好開心喎, 係咁叫我下次再去玩過, 仲有叫佢地搵日嚟我地屋企玩潻!

滕滕呢條友仔, 個人性格率直又真, 唔會諗埋d估惑嘢去做自己想做嘅嘢, 所以某程度上我都幾like佢呢樣嘅性格!

靚仔~

今日有個靚仔嚟搵我食lunch~ 開心到我呢!

我唔可以走到好遠, 但係朋友嚟搵我食飯, 早多一個鐘出去就一定可以囉!

早一個鐘出去食飯唔過份吖! 因為我平時番到屋企都仲會覆客做公司嘢, 所以我有呢方面嘅權利, 只要同老闆講聲就可以喇!

賞罰分明

我知道我其實都幾嚴厲, 因為我一係唔罰, 一罰唔係講笑! 唔好以為可以試探我, 因為我性格錯就係錯, 比過機會係再錯的話就冇情講, 呢樣嘢, 滕滕就最清楚明白!

已經講過, 廁紙唔係要嚟玩, 但係呢條友仔見我可能未嚟真, 所以再常試開心一次! 之前個工人已經幾次同佢講唔好玩廁紙, 但係叫極都唔聽所以頂佢唔順打比我!

我一向態度都唔會即時鬧佢, 因為隔住個電話嚟鬧唔到肉, 亦都唔知痛, 所以我同個工人講唔緊要, 幫我攞個袋袋住晒地下d廁紙唔好掉, 等我番嚟比我, 咁我番嚟就會罰佢架喇!

哈哈~ 一講完, 滕滕就即刻消毀屍滅跡掉晒落廁所!

唔緊要, 你有張良計, 我亦有計仔! 屋企廁紙有大把!

打我就唔會打喇, 因為都唔係咩大事, 咁既然你咁鐘意玩廁紙, 咁我就比你舉起佢!

結果罰左半個鐘, 係唔係好爽呢~?! 我睇下你下次仲玩唔玩!

今朝有酒~

 

今朝有酒今朝醉, 今晚真係好想醉住嚟瞓~  柜面支紅酒開左起碼半年, 今晚突然想醉就攞出嚟飲, 點不知果然不出我所料真係壞左!

好彩老豆有時入嚟食飯, 總有一兩支酒留係到, 因為未生時我番屋企食飯, 我總會倒d嚟飲~



今晚飲左小小威士忌, 個人舒服D, 但係心情冇好左, 希望high high地可以即刻瞓左, 但可惜唔係........

已經一個月有多, 我仍然仲係唔想同老公講嘢, 我就連一眼都唔想望佢! 佢, 耐唔耐會同我講嘢, 但係我, 唔鐘意就唔答, 關於個仔嘅嘢, 就只係答一句, 多一句都唔想!

我同滕滕講叫佢老豆唔好番嚟, 叫佢去嫲嫲到住, 但係滕滕同我講佢唔想, 因為佢話"爸b都好錫我, 我唔想你唔比佢番嚟!" 如果唔係因為有滕滕, 我一早就已經唔想番去見到佢!  因為我唔可以容忍我嘅另一半唔尊重我!

我容忍量好高, 而且耐力都好強! 我可以容忍, 但係唔好挑戰我, 到我真係嬲嗰時, 我真係可以好認真!  朋友叫我, 叫我個腦可唔可以唔好咁清晰, 尤其係做女人應該係要糊塗D! 如果可以, 其實我都好想好似馮小姐咁蠢, 因為我都唔想咁煩! 朋友叫我今次算, 但係我個心仲頂住, 咁頂住又點可以當冇嘢算呢?!

星期五晚我沖緊涼嗰時, 佢打電話番嚟同滕滕講叫我地等佢放工番嚟一齊去食糖水, 聽到我就同滕滕講我好眼瞓, 叫佢同佢老豆自己去! 起衫滕滕都只係講左幾下係咁叫我一齊去, 開始越夜佢就越叫越多次, 越講越激動咁喊出嚟, 仲喊到嘔左D嘢落張床到! 做亞媽睇見自己個仔喊到嘔晒, 係咁要自己一齊去時, 我相信冇亞媽唔會心軟, 所以結果我都去左! 我知道我如果出得去食糖水, 就代表我已經下左啖氣! 因為我啖氣下唔落, 所以我跟本就冇諗過出去!  果然不出我所料, 睇老公個心情、說話就知道佢覺得我已經下左啖氣, 因為佢明顯地開心左! BUT, SORRY! 我同佢講, 我仍然未同你FRD 番!

我唔係想高姿態, 亦都唔係想佢好似當我皇后咁氹番我, 因為我知佢唔係呢類人所以亦都唔會咁做, 我亦明白佢係呢個幾月以嚟不斷咁同我講嘢係想我條氣下, 但係我未得, 因為我仍然仲CHOK 住!

可能真係好辛苦~

今日冇飯帶, 唯有上商場買lunch番公司食! 因為而家可以經過商場先去街市, 所以唔行路面冇冷氣啦, 點不知又比我揰到又有書賣!

今日收獲左呢d~

老師都未正式教晒d數字我就買加減法, 好似好痴線咁囉, 不過, 我唔而家比滕滕做, 而係到老師教到嗰陣時先比佢做, 因為當識左嗰時適當嘅練習係good架!

另外買左4本貼貼貼, 買嚟因為覺得可以training 隻眼, 一買左番嚟比滕滕貼, 一貼就貼左一個小時半個鍾 !

我問滕滕乜貼呢個好辛苦咩, 仲咩事要成個半鐘先可以攪掂架?!  比我感覺佢係唔想貼囉, 有乜理由明明可以15-20分鐘攪掂嘅, 都可以貼咁耐架!

算吧~ 咩類人始終係咩類人~

聽日已經係今個星期第三餐冇飯帶!  我都唔明, 奶奶次次入嚟食飯都唔知點解煮D餸會係剛剛好, 一係D餸係唔得得, 我更加唔明就係亞媽入嚟都一樣係冇飯帶!!!

亞媽買左條魚入嚟蒸, 蕃茄煮蛋, 同埋一碟豆角豆卜抄木耳!  聽落去3碟餸3個人食應該OK架, 但係條女係唔帶得飯嘅, 蕃茄煮蛋係滕滕嘅favour, 而亞媽係食齋, 其實碟蕃茄同抄豆角佢一個人都可以食晒! 咁, 即係我唔洗帶飯囉!

d工人, 好多時都係咁豬, 其實諗到諗到除左條魚, 其餘嗰兩碟餸我媽係可以一齊食, 係唔係都幫我諗番樣餸比我第日帶飯呢?!

唉~ 算! 我冇出聲, 因為都係嗰個, 佢地個腦去到嗰個位就係去到嗰個位, 所以我唔會要求咁高, 而且諗佢應該諗到, 因為佢諗到的話就唔洗成個國人d人出國做呢d低等嘅工人!

我唔會好似馮小姐咁夠薑係咁吊七個工人, 因為我覺得而家d工人好恐怖, 我怕再請到時請3/4個番嚟先搵到個稍為正常d, 嗰時嗰兩皮嘢要比出嚟唔係長期服務金, 而係搵工人嘅錢, 係白蝕嘅!

馮小姐夠薑, 係又吊唔係又吊, 佢要個工人同佢帶仔番學佢都夠薑係咁吊七佢, 我真係配服!

砌死人~

原本打算今日下午去搵亞公亞婆飲茶食lunch, 但係一個電話嚟話送傢俬嚟, 我個plan就打消左喇!

因為之前嗰間死人傢俬鋪爛尾, 所以早前係屋企附近求其搵左間傢俬鋪整番d爛尾嘢, 尋日一個電話嚟話今日下午會到, 所以都好彩嘅係唔洗12點鐘就攪掂晒喇! 整完左我地就去左麥當當食嘢喇, 呢條友仔近排一味麥當當麥當當, 咁既然肯食粟米唔食薯條, 就同你去囉!

我唔想滕滕貼住隻眼係街到, 所以番到屋企又再貼眼做training 喇, 而我咪又執下嘢囉! 我一路執嘢就諗起我朋友同我講, 佢成日話佢老婆一放假就係成日執屋, 而我, 都係咁架喎, 乜, 女人唔係咁嘅咩???  執執下嘢, 比我無意中發現左盒lego, 盒lego我都唔係好記得係邊個送, 好似應該係個客送.......

一話比滕滕知我搵到盒lego, 我想走都走唔甩喇!

一拆開左, 先見到個盒面寫住7-12歲! 我, lai嘢啦! 都要迫住上啦, 如果唔係, 滕滕點會放過我吖!

我咁大個女都冇砌過lego, 雖然跟住本書嚟砌唔係太難, 但係都砌左我一粒鐘!