呷醋呀你?

嗰日同熙媽熙熙一斉去PLAY TOWN 玩, 玩到兩點半就一斉走, 去食嘢喇, D麵都未到熙熙就頂唔順瞓著左喇, 可能熙熙嗰時已經有小小唔舒服喇, 如果唔係, 以熙熙正常嘅狀態, 佢應該唔會叫眼瞓嘅!

熙媽得我同滕滕食完麵, 就比熙熙我同佢抱住佢先食, 我一抱住熙熙, 滕滕就即刻第手話要我抱佢喇! 熙熙已經過左我手, 仲係瞓緊攪, 熙媽又要食嘢, 媽me點可以抱你呢, 豬仔! 所以當時我就立即比d紅豆佢食, 分散佢注意唔好要我抱啦, 吖, 點不知呢個豬仔, 真係有得食就唔要我抱喇!

使唔使呀~

聖誕節嗰日出去見到有間鋪頭係賣車模型, 滕滕見到有巴士, 就即刻話要去, 所以就買左架金巴比佢!

呢幾朝起身, 第一時間就去玩呢架巴士! 咁都算啦, 不過今朝我起身係到化妝嗰時, 滕滕居然發開口夢係到叫車車~

西寶城play town

今日約左熙媽一斉去西寶城都玩, 好辛苦, 因為單拖帶滕滕出去, 細機又壞鬼左, 帶部大機去, 攞到我成隻狗咁, 又要成日捉住隻滕滕, 所以影相唔多!

d人真係衰, 自己d仔女唔舒服就唔去帶佢地去呢d地方玩啦, 係到散播細菌!

熙熙玩完之後lai左嘢, 番到去發燒, 真係慘, 希望熙熙快d好番啦!

第3年的聖誕節!

由滕滕已經係我個肚到出現左之後, 已經係第三年聖誕! 第一年就係一嚿飯咁係我個肚到, 第二年就已經出左嚟見呢個世界, 不過係一嚿蕃薯, 今年係第三年, 已經開始有FEELING, 知道原來係好好玩!

聖誕節出去真係人都癲, 不過冇辦法, 因為要帶滕滕出去感受下聖誕氣氛都要啦!

呢個豬仔好似甩繩馬騮咁, 開心到痴左線, 叫極都唔停!

想好好地影一張相, 都要等冇咁多人行過先得, 呢張就已經等左好耐!

人人都話滕滕似老豆, 我想講唔係都唔得! 因為兩個都係傻!

呢張, 覺得滕滕真係好鬼得意!

真攪笑~

同老闆傾開計, 問下馮小姐出糧嗰到有冇扣到錢, 老闆話個會計冇同佢講過, 咁即係個會計冇計佢五分四啦!

我係到同個fd講電話, 好大聲係到講放產假出糧係出五分四, 專登比個會計聽到, 果然不出我所料, 個會計第二日就同老闆講, 佢冇計馮小姐五分四, 係以為老闆會一視同人, 以為馮小姐會同我一樣出full paid 喎!

一聽到, 我覺得好攪笑, 因為個會計話"以為"! 乜有得"以為"嘅咩??? 就算諗住覺得老闆會, 係唔係循例都要問一問老闆呀, 而家係出多左糧, 唔係出normal嘅五分四喎!

原本我都想同老闆講叫佢照出full paid 比馮小姐, 但係出左糧咁耐, 同馮小姐講過電話咁多次, 佢都冇同我講過出多左糧呢樣嘢! 如果馮小姐有同我講過, 我可能會算, 不過同佢冇同我講, 我就唔會幫口! 佢份糧究竟出五分四定full paid, 全因都係我嘅決定!

家姐話我唔係一個好上司, 因為出幾多錢糧都係街外錢, 多與少都唔關我事, 不過, 我覺得, 如果佢唔係咁對我, 街外錢我唔會同佢計, 因為佢而家嘅 salary 都係我同佢講番嚟, 如果唔係, 佢都唔會有咁多! 就係因為佢咁對我, 所以我先同佢計得清清楚楚!

垃圾!!!

個工人對車頭燈好大, 我已經同過佢講, 佢之前比個男雇主想攪佢, 係因為佢成日都著埋d緊身衫, 叫佢自己檢討下自己d衣著, 而agent 都有同佢講過叫佢唔好著埋d咁嘅衫, 要著就出街先著!

不過, 呢個咁嘅工人, 真係講唔聽, 今日我見到佢著住條超級低腰牛仔褲, 只係彎一彎身, 就已經露左條股"喇"出嚟! 都唔使講咁啦, 我一見到就打番去, 講都冇講咩原因, 鬧都冇鬧, 好直接咁叫佢換過條褲, 如果要著, 就放假先著, 唔好再係屋企著! d咁嘅人, 我唔想再鬧多句, 講嚟都嘥我d口水!

到左4點幾, 因為要預備去奶奶都做節, 所以我見老公去左買餸之際, 我打番去叫個工人預備好出街d嘢, 包括尿片, 水, 水杯 & 濕/乾紙巾! 只係叫佢攞個水樽出嚟, 佢就"嘅..............", 我都唔知佢"嘅"乜九嘢, 日日都對住個盒, 個盒係透明蓋, 裏面就放左左個水樽啦, 都要"嘅" 唔知係邊!!! 一聽到, 我又忍唔住, 既然咁小嘅事你都做唔到, 咁你叫先生番嚟打比我, 唔使你喇!!! 

我都唔知你有乜用!!!

今日放工番緊屋企, 老公打比我, 佢話個工人攞左佢年風褸去燙, 燙爛左!

番緊去途中, 把火越嚟越興, 因為我都唔知個工人做乜撚嘢, 樣樣嘢冇一樣係可以做得好! 番到去問佢, 你究竟知唔知呢件風褸係 polyester 嚟架, 你究竟知唔知道唔燙得架!!!

唔識, 都用手feel到係膠膠地啦, 你有冇用個腦去諗架! 個冇腦工人居然答我, 我覺得可以燙喎!

件衫, 我會記抵佢, 到同佢埋單嗰時, 我一定會扣起佢三百蚊!!!

屋企有老鼠!

今日下午滕滕瞓完覺, 唔知仲乜好似痴左咁係咁係到扭計! 我買左芝士包比滕滕做 TEA, 見佢起左身, 就比芝士包佢食囉, 不過佢食左一啖就唔肯再食喇! 一次, 兩次, 三次, 都係發住皮4咁推開我手上嘅包, 我諗佢覺得唔好食, 所以唔想再食!

見佢係咁扭計, 就比餅餅佢, 不過係食餅途中, 我都再比包佢, 因為我覺得佢咁鐘意食包, 冇奶油唔鐘意食, 不過呢次再遞比佢, 佢又拒絕我喇! 所以我話: 唔食算! 咁好味, 我食左佢! 跟住就張D包放左係枱面, 就入左房執衫!

執執下, 我聽到D膠袋聲, 跟手就申個頭出去望, 一望, 我發現滕滕好似隻老鼠咁, 係到靜雞雞偷面包食, 一發覺我睇到佢, 佢就震左一震, 跟住好無奈咁比我發現左咁係到笑!  我一睇到, 我就話: 哦! 我仲以為你話唔好食潻! 比過幾次你都推開我, 而家就去偷食! 賊仔!!!

 

咁你都得!

心情仲係唔多好, 所以都仲係唔想寫BLOG, 除左個死人工人除外啦!

睇到你個BLOG, 唔知你係唔係同我講緊, 我三番四次睇完再睇, 都係係到諗緊唔知你係唔係同我講, 睇到第三第四次, D眼淚唔知點解流左出嚟, 想話你唔係同我講, 都好似冇乜理由話唔係............

好多嘢我都可以HANDLE得到, 就除左係呢樣嘢, 我承認我係一個失敗者, 永遠唔知點解一定係處於弱勢, 朋友同我講, 叫我堅強D, 就係係佢叫我堅強D嗰一刻, 我先知道原來自己係咁懦弱. 我成日叫自己比D勇氣出嚟, 但係可惜去到嗰個位, 我做唔到.

呢兩個幾星期, 我唔係咁想講嘢, 連電話都唔想講, 如果可以嘅話, 我真係想去一個冇人識我, 冇人搵到我嘅地方到靜下, 因為我真係好需要冷靜, 不過可惜唔可以!

其實我好怕係BLOG同FB寫出嚟, 因為我怕比人問我仲咩事, 因為我唔知點講, 而且唔想講, 我怕好多人關心我, 關心我唔緊要, 不過唔好要我答, 因為我自己都唔想答自己........

好多謝你用你嗰種形式嚟關心我, 因為好感動!

生日不快樂

我諗過左咁多個生日, 應該呢個生日係我最唔開心嘅一個.

成個幾星期, 心情未好過, 唔係好想講咁多嘢, 但無奈個工人要我小佢佢先安落! 同老公已經個幾星期冇講過嘢, 因為我唔想再同佢講嘢, 而佢應該都係.

我以為佢今日番左工, 所以我冇諗過番到屋企, 打開個雪柜會見到個CAKE, 見到應該好開心先至係, 但係當我知道佢今晚又話要番工之後, 我冇開心過, 而且心情仲差左.

人地切CAKE我切CAKE, 我笑都冇笑過, 而且仲想喊. 想啫, 結果我冇, 因為我喊唔出, 但係係滕滕飲緊奶嗰時, 唔知點解滴眼淚好自然咁流左出嚟.

讀書時嘅我, 又番左嚟, 我收埋得好好, 我唔講, 冇人知我唔開心, 個個都以為我係因為個工人煩, 我想自己活係自己世界, 我唔想人地為我而唔開心, 因為我知道冇人幫到我.

那星~!!!

日日新鮮就日日甘! 真係唔 til 佢那星都唔得!

今朝我番到公司, 滕滕都仲未起身, 我打番屋企, 諗住電話嚮, 滕滕會起身, 但係都冇, 所以我打到番去, 我同個工人講整咩比滕滕 lunch! 再到成十點, 滕滕都仲未起身, 我又再打番去, 問下個工人有冇睇過滕滕, 佢話有, 不過我見唔到囉, 所以我叫個工人去望下滕滕, 睇下有冇唔舒服!

個工人一開門, 滕滕就醒喇, 但係係呢個moment, 我好似見到佢冇帶 mask! 我問佢有冇帶, 佢就話我而家帶! 而家帶??? 咁即係一路整滕滕 d 餸都冇帶啦??? 我把火又嚟喇!!!

尋晚已經講得好清楚要full day 帶 mask, 而家又冇帶, 係唔係玩嘢呀???????????

中午, 我又同個agent 講, 我話我真係頂佢唔撚順, 叫佢同我搵過個工人把啦, 我真係忍無可忍喇! 個agent 同我收左線, 就打比個工人, 跟住又再打番比我, 個agent話個工人知道自己錯, 今次死晒狗喎! 因為佢同個工人講再係咁, 就唔會再有機會比佢!

好喇, agent 叫我比多3、4日時間睇下個工人有冇改善, 因為佢今次真係知衰! 我個心諗, 而家先知衰, 遲唔遲d呀!!!

今晚番到屋企, til佢那星都覺得自己對佢好, 因為真係糟口都想講埋出嚟, 因為我見到滕滕著左4件衫, 除左件底衫之外, 其餘3件都係厚嘢, 而且仲成頭濕晒! 今晚究竟幾多度呀, 今晚都唔凍啦, 起碼都有廿三度, 使唔使著咁多衫呀! 睇到呢個情況, 我真係忍唔住就係咁鬧!!!!!!!!!!!!!!!!!!!!!!!! 因為滕滕成個背脊起晒粒粒! 真係佢老味!!!!!!!!

我一路鬧，就一路嘈，我同個工人講，如果陳小姐知道你ｄ咁嘅 performance, 我怕佢會放上網, 到時任何一個人都睇到你d performance 咁差, 我怕你以後都唔使搵到嘢做!

佢聽到我咁講, 佢定左望住我, 跟住我又再嚇佢, 我唔係同你講笑, 我之前嗰個工人已經比個agent post 左係internet 上面, 任何一個人都可以睇到, 佢已經入左bad list到, 所以我怕你再係咁做嘢, 到時我幫你唔到!

個工人聽完我講, 就即刻同我say sorry, 叫我比多次機會佢! 比機會你? 我已經三番四次咁比機會你, 每一樣嘢叫你唔好, 你都要challenge 我, 一樣照做!

我比機會你, 咁你可唔可以比機會我呀???

PS. 今晚番到嚟, 我發現個工人比滕滕玩到連個相機都壞埋, 唔火都嚟就有鬼!!!

Do u want to challenge me?

請左個工人番嚟, 都唔明點解放假都仲係要做到隻狗咁!

個工人星期五開始唔舒服, 尋日比佢瞓左大半日, 煲埋弼比佢食, 連夜晚餐飯都唔使佢煮, 諗住比佢多d休息等佢快d好, 所以預備滕滕今日d餸我都唔使佢, 自己整埋佢, 點不知佢今日放假就晨咁早就出左去! 叫佢瞓多一陣先好出去, 都唔死聽! 早知原來放假係精神d, 咁我唔使同佢做咁多嘢啦!

今日未停過, 吸塵洗衫煮飯執屋, 原來我發現平時滕滕瞓晏覺, 唔知佢做乜Q嘢嘅呢? 個廚房好dirty! 滕滕d床舖被冚, 佢嚟左咁耐就未換過! 執嘢其間, 比我發現左個工人d 污糟衫到有佢d內衣褲係到! 之前我已經覺得好奇怪, 仲咩佢沖完涼冇掠d underware 出嚟, 唔使洗架, 一問原來知道佢掉埋落洗衣機到洗! 我咁大個女, 所有underware 都係自己用手洗, 咁多年都係咁, 我自己都唔會放落洗衣機, 你憑咩可以放落去洗衣機呀!!!

之前我已經同佢講過一次, 所有d underware 唔可以放落洗衣機! 今日又比我發現佢又係咁! 個工人番到嚟, 我就問佢, 記唔記得我咁咁咁同你講過, 佢居然答我記得! 我用講東話問佢, 仲咩記得都仲要放落去洗衣機? 佢唔答我! 跟住我就用英文同佢講, u need to answer my question before u want to go! 真係一個迷, 同中文問, 佢就唔出聲, 只係望住我, 我用英文問, 佢就答我 sorry呀, 太太! 跟住我問佢, 你話你記得我講過, 但係就去做, are u want to challenge me? 今次佢就好快答我no 喇!

我真係唔知可以忍到幾耐!

起初我以為係!

今日係第一次去YWCA 到上PLAYGROUP, 真正FEEL到 PLAYGROUP原來真係幾流!

成個過程都係我估計內, 唱下歌, 比佢地坐下車仔, 行下玩下, 唯一係估唔到就係有TEA 食!

可能冇比滕滕瞓陣覺, 所以係嗰個幾鐘頭裏面, 得佢一個最曵, 另外有3個男人, 都冇佢咁痴線, 而另外3個女仔, 就真係成嚿蕃薯咁, 成個過程得佢一個係到發皮4, 又唔係坐定, 人地唱歌拍手佢就要走去玩玩具車, 唔理MISS, 到左做運動嗰PART, 佢又走去話要坐車, 一見到車就要, 乜嘢都見唔到, 亦到唔理, 最乖就係食TEA 嗰時, 呢個餵食鬼, 見到有嘢食, 就HER住要食, 人地都未開始就已經發出嘈音話佢好唔耐煩, 要快D食, 都唔使講, 佢更係第一個食完啦, 仲要成杯水飲晒, 同係屋企一樣, 渴水渴食症咁, 真係失禮死人!

食完嘢, 就用手指印印印, 人地用手指, 佢就成隻手掌, 話極都唔聽, 又唔理, 都唔知印左D乜!

(一隻一隻手指印, 係我嘅, 只係我自己一雙情願想佢跟我咁做, 不過可惜!)

我起初真係以為滕滕都算OK, 唔算係曵, 不過從今日開始, 我諗我要改觀, 因為今日得佢一個係痴左線!

..........

好耐冇飲酒喇, 醉住嚟瞓, 希望可以好瞓D..........................

頭暈~

今日係個CAM到聽到個工人係到咳, 我打番屋企問佢係唔係唔舒服, 佢答我話有小小!

唔舒服, 仲咩唔打比我問我有冇MASK 呀??? 我睇到佢係到咳, 係對住滕滕咳, 真係離撚晒譜!!!

番到屋企, 我見到個工人唔舒服嘅程度, 並唔係小小囉, 我再留意滕滕, 我發現佢有鼻涕! 真係火都嚟! 鬧佢又唔係!

我打比AGENT同個AGENT講我真係好撚頭暈, 有乜理由對住滕滕咳架!!!

個AGENT 聽到, 佢都鄧我慘, 都無言以對, 只好話星期日見到佢, 再同佢講清講楚!

我都明白唔關個AGENT 事, 因為佢地都預計唔到佢會咁, 我同個AGENT講, 如果要我補錢補機票比佢, 我條氣真係唔係好順, 因為佢當初話自己湊BB OK架嘛, 而家學張雪球話齋, 真係貨不對版喎!

真係好撚暈, 好撚煩, 同好撚頭痕! 我唔知自己仲可以忍到幾耐!!!!!!!!!!!!

我好驚~

今晚老公又通宵OT, 11:15打過一次比佢冇人聽, 11:45再打多次, 佢聽電話喇, 不過背境就好靜, 佢話佢係廁所.  不安心情又出現, 唔知佢係唔係真係番左工, 我想打去佢公司, 但係如果佢真係番左工, 我就怕比佢鬧, 如果佢真係冇番, 我唔知真係會點.

教女!

而家日日番到屋企好似教女咁, DAY DAY 都要訓導個工人點樣去同滕滕相處!

前日我嚇佢, 叫佢比心機做啦, 如果佢想再搵過雇主, 睇到佢個VISA 做左幾個月就冇做, 跟本就唔會有人要佢, 如果佢有 improve 我係睇到架嘛, 只要做嘢細心d, 就好多嘢就好做得多喇!

嚇完佢之後, 我今日見到佢同滕滕玩得開心左, 因為起碼滕滕會係個欄到大叫叫佢!

日日都要訓導, 唔知要訓到幾時!

唔明!

我都唔係好明, 點解D工人走, 點都一定偷D嘢走架!

我發現唔見左支香水, 我問個新工人嚟到嗰時, 個廁所係唔係只係得3支香水, 個新工人答我係, 我話應該有4支係到! 個新工人問我使唔使CHECK下佢D嘢, 我話唔需要喇, 只係想知你嚟到時係唔係已經冇左一支, 如果係, 咁即係比之前嗰個偷左!

老公問我會唔會係個新工人, 我話應該唔會係, 如果係偷都再過多一陣啦, 咁搶狂咩, 一番工就偷嘢?! 我段估要落手都唔會咁快囉!

 

反撚晒眼!!!

已經係第5次!!! 滕滕啱啱好番冇耐, 又再病過!!! 上個星期六又要去探DR, 已經係第5次睇醫生!

我都唔知個工人仲乜撚嘢, 真係九把幾火! 一早起身已經FEEL到天氣凍左, 佢居然同滕滕只係著左件薄背心, 一睇到, 我就第一時間問佢仲咩唔同佢著多件衫, 個工人答我話佢覺得唔凍喎!

大佬, 你做緊嘢就更係唔凍啦, 滕滕仲食緊藥架, 佢起身又點會無啦啦熱呀, 比D SENCE 啦!!! 好啦, 到左星期六, 同滕滕去完INTERVIEW 之後, 帶左佢番屋企, 我地就出左去黃金睇下D CAM, 唔記得左鎖左房門, 個心已經諗唔知個工人醒唔醒目, 求其都攞D毛巾同佢冚住瞓晏覺啦, 點不知一番到去問佢, 佢答我冇喎! 真係火都嚟埋!!! 二話不說我就問佢, 咁你今晚瞓覺我唔比被係冚得唔得呀????

真係忍唔住, 我小左佢一大餐, 我話佢, 我真係睇唔到你湊BB有咩EXPERIENCE 囉, D咁SIMPLE 嘅嘢都要我講, 要我提, 你食緊藥瞓覺, 可唔可以唔冚被呀! 成日都係D CARELESS MISTAKE, 究竟你湊BB有幾好, 我真係睇唔到囉!

都係已經講左3次, 所有冷衫、我嘅紫色衫、同埋所有褸, 都唔可以放入洗衣機洗! 今朝, 我發現左件兔毛冷衫居然又比個工人放左入洗衣機裏面! D兔毛衫甩甩地毛架, 洗完, 其他D黑色衫黐晒我件冷衫D毛! 我問佢究竟知唔知咩係冷衫呀? 佢居然答我, 你話係紫色先唔好入洗衣機之嘛!!! 我把火又嚟喇!!!!!!!  所以我再講多一次, 所有冷衫、紫色衫同埋所有褸都唔可以放入洗衣機, 如果下次你都仲唔記住, 咁所有衫都用手洗喇, 我唔想次次都同你REPEAT 完又再REPEAT!

叫我再攞起個鑊剷, 我真係十分之不願意, 不過, 我睇見個工人煮嘅嘢, 未食都已經想嘔! 一係就隔日薯仔雞翼, 一係就食抄菜同菜煎蛋! 真係人都癲! 個人其實已經好肚餓, 但係對住D咁嘅餸就真係好唔開胃, 水no飯之餘, 仲要一路食就一路反! 冇錯, 佢當初已同左我講佢煮餸唔叻, 但係就唔好撚隔日就薯仔雞啦! 點解? 因為唔使諗, 又唔使睇火嘛! 我問佢識唔識蒸排骨, 佢話識, 我問佢識唔識炸菜蒸豬肉, 佢又話識! 咁點解我買左d豬肉同排骨唔整呀??? 原因可能係因為佢唔食豬肉, 所以就唔整, 如果整豬肉, 咁佢就要整多一樣餸比自己! 有冇咁7懶呀??? 唔通我成Q日倍你食薯仔雞咩, 痴乜線架!!!  D豬肉買左番嚟, 成個星期都未食完! 點解? 因為佢每日只係整DD比滕滕食, 咁食法點食完呀??? 咁滕滕除左頭兩日係食新鮮豬肉, 跟住之後就日日食埋D唔新鮮架喇! 你話我有幾撚反眼吖! D豬肉係一斉食架, 一斉頂晒咪最多兩三日, 滕滕就真係陰公啦, 成埋D幾日嘅豬肉, 真係痴九撚7線架!!!!!!!!!!!!!!!!!!!!!!!!!!!!!!!!!!!!! 而家唯有我日日同佢講聽日整咩整咩! 我真係唔想滕滕食埋D唔新鮮嘅嘢喇!!! 而且老公係到, 盡量都我嚟煮喇, 因為老公直頭同我講, 之前嗰個工人煮佢都已經唔想食, 咁何況呢個!!!

唉, 死啦, 點算呀!!! 我真係反撚晒眼呀!!!

真反眼!

個工人真係攞命!!!

我覺得佢好似冇用個心嚟做嘢囉, 買左一星期菜, 我都已經講左, 天氣開始涼, 呢兩三日食嘅菜可以唔使放入雪柜, 之後食嘢, 怕太耐會壞先放入雪柜.  咁樣講都已經好清楚啦, 冇放入雪柜嘅, 就即係呢幾日食晒佢啦, 但係佢都居然冇食, 尤得D菜黃晒, 咁我唯有掉左佢啦! 個節瓜食左一半, 另外一半, 就放左係個雪柜到個幾星期, 我問個工人仲咩唔第日食埋佢, 個工人答唔到我! 見到個耶菜花開始有小小發毛, 咁我就批左有小小毛嗰D, 跟住就烚一烚佢, 諗住叫佢第日整左佢啦, 問個工人知唔知點解我要咁樣整熟左個耶菜花, 佢同我講知道係因為就嚟壞, 不過, 個耶菜花放左係個雪柜三日都唔整嚟食, 我真係百思不得其解! 一既我問佢嘅嘢, 佢一句都答唔到我, 究竟點解佢唔整D菜, 尤得佢變壞!

滕滕, 我已經番左工成個幾兩個星期, 到左今時今日, 我放工番到去, 滕滕都係唔要佢! 我見到佢同滕滕玩, 玩嚟玩去都係玩嗰一味, 就係拋高個波, 冇其他嘢喇!  開CD比滕滕聽歌, 佢就攞本書出嚟自己睇住D歌書嚟唱, 滕滕呢? 已經去到冇雷公咁遠啦!

最離譜, 就係係29号, 我同老公去睇完清明上河圖番到嚟成十一點半, 一入屋, 老公已經係到嘈喇, 老公話個工人房門關埋左, 我地房門關埋左, 萬一滕滕瞓瞓下醒左係到喊, 佢都唔知聽唔聽到呀, 呢樣都唔止, 一入到房, 張BB床個床欄居然冇拉番高佢, 萬一滕滕醒左, 就一定跌左佢出嚟!

個工人樣樣嘢都唔小心, 跟本就冇心去做嘢, 一D安全意識都冇, 佢仲同我講佢之前 D太太話佢湊BB好好喎! 我真係一D都FEEL唔到佢用心去做囉!

我忍唔住打左去比個AGENT, 個AGENT話一定要話佢喎! 唉~ 再睇下點, 唔對路, 我又想換過個喇!

又一新攪作!

自閉左幾日, 冇寫成個星期, 今日終於都想寫喇!

由上個星期開始, 滕滕又有新玩意, 就係佢同我係新聞睇到嘅一樣, 就係張D玩具掉出街!

我都唔知係佢邊樹學番嚟, 佢又冇睇到人地咁樣做, 而且我已經唔會係佢面前申隻手出窗, 因為我知道小朋友一定有樣學樣啦, 但係到左今時今日, 都避免唔到!

好彩個窗口出面有個花糟, 佢所有掉出去嘅玩具就係晒個花糟到, 每晚只有等滕滕瞓左, 我先開個窗花執番晒入嚟!

......

呢幾日唔想講嘢, 唔想聽電話, 因為個腦成日諗住張卡片.

姐姐打嚟, 唔可以唔聽, 因為佢已經第三日打比我, 所以講左一陣就收左線, 起碼唔使比佢問我仲咩搵唔到我!

而家, 一搵唔到老公, 個心就好急, 一聽到佢打番比我, 個心先定D.

好開心WINNIE, BEN & PAUL都好關心我! WINNE, 係我同佢講, 而亞BEN 同亞PAUL, 就係佢睇到我D STATUS 知我好DOWN就問我咩事!

開心就係, WINNIE 好擔心我, 今朝一打嚟問我心情點, 好D未, 叫我唔好諗咁多, 而亞BEN 同亞PAUL 唔使我主動打比佢地, 佢地已經FEEL到我好唔開心! 亞BEN 同亞PAUL 都同我分析, 佢地都叫我唔好諗, 因為男人出去滾都係好正常! 正常? 唔係卦! 我真係好唔想接受喎! 不過, 另一方面, 佢地都安慰同分析比我聽, 老公未必真係有出去滾!  

老公有時對我好正常, 有時我又自己諗係唔係自己太敏感, 不過我知道任何女人見到張咁嘅卡片唔敏感就奇.  三個朋友都講話我諗嘢好灰, 越諗越灰, 都未去到嗰個地步就已經諗咁多嘢, 冇唔開心就假啦, 但係, 我唔知點解我真係諗到咁, 因為真係每一樣嘢都係好負面.

我會唔會有抑鬱呀............?!

愛..........

愛嚟嘅時候, 真係擋到擋唔到, 老公以前好愛我, 無時無刻都好愛護我, 不過呢種感覺, 我而家已經FEEL唔到.

起初以為諗住因為都已經咁耐, 所以已經係一種穩定嘅感情, 但係我覺得老公而家唔緊張我, 唔關心我, 唔再愛護、`呵護我.

老公嗰種愛我, 我覺得好似失去左. 當愛已經走左, 好似好難去搵得番............

唔知係唔係因為我太強, 老公好似唔需要去理我. 我唔想做女強人, 因為好辛苦, 我唔想咁聰明, 因為知道好多嘢好唔開心, 我唔想咁精明, 因為好多嘢唔需要人地同我講我已經知道咩事.

點解我對老公嘅愛到今時今日都冇變, 只不過係鐘意頂撞佢啫, 但係點解老公變左..........