發呆得一天~

滕滕都算係比面喇, 陪我瞓到成12點先起身!  食左藥, 真係成日都好想瞓........

星期六已經買定飛喇, 怕即時買唔到冇得睇~

唔知係唔係D人出晒九龍呢, 因為都唔爆場!

呢套破壞王真係深左小小, 因為滕滕唔多明白, 就算解釋都幾難, 因為佢太多部份喇~

睇完戲, 藥力開始發作, 我已經進入一個夢遊嘅世界裏面, 發住夢咁就趕去表姐個birthday party!

滕滕就玩到好開心! 而我呢, 食完嘢就瀨晒皮咁坐左係到發呆~

好彩老公未番工住, 可以幫下手睇下滕滕咋, 如果唔係, 我諗我係遊戲室都瞓左都似!

唔抵囉~

呢兩日都好鬼凍, 老公又番中班, 尋日都冇出街, 居然係屋企冷襯!

尋晚六點幾開始覺得唔妥, 食左兩粒感冒丸都唔掂, 結果今朝要去睇醫生, 仲打埋支針~



點解我冇出過街都會冷襯架??? 出左街冷襯都話冇咁唔抵吖!

個醫生都幾鬼慳囉, 明明係7種藥, 佢就只係入左4個袋到, 其實, 橫掂都係啦, 不如張5種藥入晒落一個袋到啦苯!

食完藥好眼瞓~ 好妥瞓~ 今日約左個FRD食lunch, 點不知佢唔記得約左我就去左工展會喎~ 早d講, 我睇完醫生唔番工, 番屋企瞓好過啦!

LAST DAY COUPON

張coupon last day 我先得閑同滕滕去玩!  鬼咩, 佢只限星期六去咋, 下個月嗰張都唔知去唔去到呀!



呢條友仔, 玩左成3個鐘都唔想走~ 我提前半個鐘話玩多陣先走, 佢就即刻由波波池轉去再玩多次車喇!

好彩嗰到有wifi咋, 如果唔係都唔知點過囉~ 越住就越凍, 又餓又口渴, 頂唔順買左D小食, 條友仔就走埋嚟話食喇! 叫走又唔走, 如果係到瞓埋好唔好?!

一個迷~

一路都好期待今日, 因為係11月中左右, 就已經約定好晒今晚成班舊同事出嚟食飯~

咁早約咁遲先食, 係因為要就呢個要就嗰個, 盡量都想就到晒! 所以就個半月後出嚟食飯! 而家有WHATSAPP就方便好多, 可以整個GROUP CHAT, 唔使我續個電話打去問!

約日期係一個問題, 約地點都係一個問題, 因為其中有個人次次都話係香港嗰邊食, 最好係灣仔OR銅鑼灣, 因為, 佢住西環!  新界唔使講佢一定咋型, 而九龍就好日都唔會去食一次!

而今次就係好耐嘅一次, 我地去左紅磡! D男人一直都唔介意去九龍, 只係有兩個, 而次次話係銅鑼灣食嗰個係其中一個, 而另外嗰一個係上環開檔, 所以又係唔多想收檔之後過去九龍!

我唔明, 點解淨係D女人咁麻煩嘅????

今次去紅磡食, 尋日都前日都冇人講話唔得, 尋日, 直至尋日, 有三個先講話唔得, 而呢兩個麻煩女人都係放左飛機!

我住咁遠, 我都冇咋過型成日係香港食, 次次番屋企我都要成個半鐘, 咁點解過九龍食就唔去呢???

唔想去九龍, 就更係唔會出聲啦, 因為怕人地覺得佢地煩嘛~ 但係, 你估你唔出聲我就唔知咩?! 我識左你地就嚟廿年, 唔好當我懵嘅先得架!

趕下場~

雖然好早起身好辛苦, 但係滕滕玩完POLICMAN開心到震, 就真係抵番晒啦! 玩完POLICMAN我地就趕下場喇!

約左契媽1點左右係太子地鐵, 結果成點半先到, 真係等到佢發晒毛~  嘢都未食, 一落車就食左嘢先!



雖然兩年前見過契媽而家話唔認得, 不過都OK喎, 溝通得幾好, 又唔怕生補!

食完就開始另一個嘅crazy party!!!

其實好多時我都係痴痴地線, 買個咁樣嘅假髮玩, 真係笑爆咀囉! 原本有人話唔肯戴架, 不過買左先算啦, 而家, 咪又係戴嚟玩! 但係, 就比人命令我唔准post出嚟, 所以唯有係個blog到post 啦!

滕滕戴左個假髮之後, 原來咁樣衰架!!! 好彩佢唔係女咋, 如果係就大獲喇!!!

做教書嘅, 真係有d橋囉~ 我地玩完交換禮物之後, 大人就打雀~

細路呢, 就~

咁都比我個同學諗到, 用橙嚟轆link!

所以話, 真係普天同慶囉  !

我家的差人叔!!!

期待已久嘅POLICEMAN終於到喇! 今次已經洗左幾個月腦, 講明如果玩完唔喊就有車送!

今次真係好唔同, 由一入場就已經好開心, 滕滕仲派定心丸比我同我講佢今次一定唔會喊架喇!

玩完一出嚟就即刻同我講: 好好玩呀, 媽咪! 我今次好開心呀!

我問佢有冇捉壞人, 佢話有喎, 而且仲有坐MOTOCYLE潻  !

放假了~

番埋今日, 滕滕就放假喇! 睇下有幾多禮物~

仲有, 仲有, 聖誕卡一張,係送比我地嘅!

好似好開心咁囉有咁多禮物, 不過, 再睇下個書包, 發現左有本假期作業!

真係驚死我地D家長太得閑咁, 咁都有功課"比我地做"!

大豐收!

其實真係唔使出門口都可以買到嘢囉~

好朋友係美國番嚟, 我叫佢幫我買左D嘢!



幾鬼靚呀! 而家著緊嗰對, 都著左11年喇, 都係時候要換對新架啦!

CrabTree original 係美國出, 我叫好朋友只係幫我買香水, 點不知佢幫我買左份gift set!

仲有Victoria's Secret 嘅香水! 睇嚟我d香水真係有排都用唔晒lu~

好朋友仲買左套衫比滕滕!

契媽就真係契媽呀!

真係可以安心???

條友仔前日放左粒珠入鼻哥窿之後, 嗰晚臨瞓前同佢講左一大輪道理叫佢唔好再放, 因為會點點點危險! 尋晚臨瞓前, 我又再講一大輪!

點不知條友仔好認真咁同我講: "得架喇! 我真係知架喇! 我真係唔會再放入去個鼻鼻到架喇! 我真係知架喇! 你放心啦! 我以後真係唔會架!"

佢講緊時, 個老豆冇望佢, 只係聽, 就已經係到陰陰咀咁笑, 我估應該係笑佢講嘢可以老積成咁! 其實, 佢咁講, 我都有頂佢唔順, 點解講到成個大人咁嘅! 不過我忍住, 等佢講完, 就再補多句: 你真係要記住呀! 因為真係好危險架! 真係會瞓左覺永遠都唔起身架!

佢再答我: "我知喇!"

你真係知??? 如果真係知我就可以安落小小喇! 不過, 只係安落小小, 唔係安落多多囉~

d人好得閑呀???

尋日報導一出, 果然不出我所料, 有人打嚟串我囉~

之前我已經同個主持人講過下, 叫佢係FB d相唔好tag我, 因為我費事比人串! 不過後嚟個主持人叫我括出去, 因為唔可以理得人咁多, 做番自己覺得應該要做嘅事!

其實, 我都已經唔會理人點講, 就算d朋友串住咀咁話我唔似係d咁嘅人, 我都已經唔會理佢點講, 自己想去就去!

但係, 我唔明, 仲咩要專登打嚟串我囉? 我個心都想括出去, 但係唔好專登打電話嚟攪我吖! 究竟係我小氣, 定係d人, 真係好撚無聊呢???

講笑同串, 我識分架! 上左報紙乜好威咩??? 我唔覺喎!

嚇死我!!!

珠仔買嚟比滕滕穿下, 等佢可以定D坐係到! 到唔係今時今日買架啦!

今晚放工番到屋企, 個工人同我講條友仔放入粒入去個鼻哥窿到喎! 仲要同姐姐講: 死喇! 死喇! 攞唔番出嚟呀!

結果, 個工人同佢"禁"住另外嗰邊個鼻哥窿, 叫佢好似"fee"鼻涕咁"fee"左出嚟!

呢條友仔, 乜係屋企好悶咩? 樣樣嘢都走去試? 係唔係唔試過唔知有幾危險吖? 真係嚇到人地鼻哥窿都冇肉囉!!! 正一衰仔嚟!

金X - 堅CHEAP!

 

之前係團購買左COUPON同好朋友一斉去食生日飯, 揀呢間, 係因為佢地當初話5歲以下唔使錢我先拍架! 因為滕滕得3歲半多D, 跟本食個飯就飽晒喇, 再加上食放提, 好多生嘢都唔會比佢食, 所以呢間唔使比佢錢我先去咋!

不過, 呢間嘢, 食一次以後都唔會去, 因為把鬼!  而呢間把鬼嘢叫金X, 係油麻地彌敦道530-538號現時購物點商場2樓!

本身我地有4個大人, 佢唔計我個滕滕錢, 所以都預左佢唔會計5份食物! 但係都唔使咁離譜囉!

每人兩粒牛肉! 再叫多轉都冇嚟!




呢碟嘢真係過九份囉! 得嗰3粒, 都唔知佢想點???

呢個天婦羅, 就全完冇味!!!

呢碟, 直頭過撚份! 比4條咁撚多!  乜魷魚好貴架咩??? 再叫又係冇再嚟!!!

呢一碟芝士蝦,味就有喇, 不過D蝦梅嘅!

所謂嘅清酒煮蜆,都係垃圾, D蜆肉好似買一大包雪藏嘅, 再加入個殼到! 所以連一D咸未都冇!

而後面嘅焗蠔, 有芝士味呀, 但係D蠔細隻到, 差D搵唔到囉! 不過呢間嘢就醒呀, 加D雜豆粒落去焗, 睇落去就好好睇咁囉!

呢碗嘅就係所謂嘅翅, 我老公食左一啖就即刻吐番出嚟!

最仆街就係呢間嘢厄人!!! 佢個HEADING就寫住"無限追加$19海膽一板", 話要預早兩日打去BOOKING時講埋要幾多板就得喎, 結果, 去到就話冇晒貨, 未番貨!  其實我覺得跟本就係唔會比你囉! 只不過係一個卓頭嚟引D人去!

我地仲有叫嗰D芝士年糕, 一口豆腐, 蟹子壽司, 鮮冬姑, 羊架好多都跟本就冇嚟到!!!

成間嘢都係垃圾嚟!

生日飯~

 

今年除左亞媽亞爸同我食舊曆生日飯之外, 呢餐應該係最後一餐!

呢個好朋友早我4日出世, 所以又係年年一斉慶祝!

我都唔明, 我生日有禮物啫, 點解隻豬仔又有嘅! 所以我生日就=佢生日囉!

我地食飯之前, 佢坤左佢老豆又去流冰喇!

今次為左方便玩完去食飯, 所以唔去圓方, 去左西九龍! 雖然個場係細D, 但係就超級平, $60/個玩全日呀, 比起圓方抵到呢!

因為我隻腳未好番, 所以唯有係出面等等等.........

踩左15分鐘, 老豆就扯晒蝦流晒汗咁行埋嚟話好攰要抖陣先喎!     真係笑到我肚痛咁济, 踩嗰15分鐘就成頭大汗扯晒蝦! 更係啦, 呢到冇鴨仔比佢地揸住行, 更係冇咁疏乾啦, 爸爸!

真係咁勇敢?

 

隻腳其實都仲未好番架! 真係已經好忍住唔行嚟行去架喇! 所以同滕滕去完上英文班之後, 就番屋企喇! 不過屋苑攪左小小FUNCTION, 有個中年亞婆係到唱亞梅D舊歌, 佢又話要聽喎!



同埋D亞婆坐埋一斉都唔怕, 可能就係因為帶佢去老人院探訪過呀!

個中年亞婆唱左幾隻歌, 原來仲有雜耍表現, 而且仲會叫D小朋友上去玩!

滕滕仲要係第一時間舉手囉! 我見佢咁勇, 就問佢你唔驚咩?! 佢好快就答我唔驚喎, 咁希望下個星期玩POLICEMEN時, 你唔好喊住話唔想我離開你啦!

生日飯~

今朝一早收到扎花, 幾鬼開心! 大家正正係到講緊我老公咁浪漫時(我冇講), 一睇, 原來係一個傻婆送比我架!



全紫色, 幾鬼靚呀! 多謝晒你呀, 亞Chris!

今日正日生日, 就更係同我至愛食飯啦!

今時今日嘅至愛, 就真係滕滕囉! 一心想快D番去, 快D番去, 可以見到滕滕!

不過, 事與願遺, 越想快D番到去, 就越塞車! 觀塘塞車! 彩虹塞車! 畢架山塞車! 汀九塞車! 小欖塞車! 真係唔想講粗口都唔得囉!!! 6:15上左車, 要8:00先落車!

滕滕等到頸到長埋, 係咁係到問佢老豆行得未行得未, 問到佢老豆火嚟呀  !

我地去左黃金食泰國菜, 食完就去影左兩張相就要走喇, 因為老公番工!

滕滕而家好識笑, 同佢影相, 就笑到咁嘅樣! 衰衰咁又笑得幾鬼可愛!

的而且確係!

係學校借左本圖書番嚟, 每晚都會講完故事先瞓, 都已經係一個習慣嚟!

今次呢本書係講過新年架, 新年會有咩佈置, 會有咩要做, 又會點慶祝!

講講下, 滕滕無啦啦指住呢個小朋友問:

點解佢個樣咁衰嘅?!

  !!! 點解佢個樣咁衰??? 我點知啫! 咁的而且確, 佢個樣又真係幾衰囉 !!!