一d都唔得嚟醒目~

公司每個月courier order有一定quota, 我有落order 做私人嘢, 我知道馮小姐都有! 不過我見今個月個quota仲有一個就滿, 我叫馮小姐今日個私人order 唔好落住, 留番聽日計落6月份!

我問佢份件急唔急, 我咁問得佢, 就擺明知佢份件係私人嘢, 因為我識得order上面個收件人! 佢聽到我咁問, 就唔使問我係叫佢delay啦, 不過佢答我"急架!"  我聽到佢咁講, 我就話個quota仲有一個剩啫, 問佢sure唔sure個會計或者佢自己下午嗰轉冇件做? 因為我唔想爆quote要比extra 錢!  結果, 我叫佢份私人件留番聽日先安排出件!

我冇權唔比佢咁樣出私人件, 因為我自己都有咁做, 但係, 利用公司嘢去做私人嘢, 係唔係唔該都要醒小小呢?! 我笑住咁串佢點解仲咁大膽可以答我份私人件急, 如果老闆問佢係唔係仲咁大膽咁樣答?!

之前已經係咁架啦, 用晒printer d 墨水去print佢d 食譜, d墨水用完又去買, 用完又去買, 結果要我開到口話公司冇錢所以唔買佢個機d墨水喇先安落冇得用! 而家又嚟咁樣, 真係要諗諗有咩計仔去攪攪佢! 

肉赤~

 睇番屋企見到滕滕咁, 個心其實都幾赤!

我估唔到佢卦得我咁緊要, 定係冇嘢做去睇下d人出出入入囉! 不過, 呢兩日番到屋企, 一入屋滕滕就問我: 點解你頭先唔番嚟嘅?(佢意思係問點解頭先係個閉路電視到見唔到我?!)

我答佢: 皇帝呀, 咁我都要搭車先可以番到嚟架, 咁我搭車你又點可以見到我呢?!

講真, 睇見你咁樣開住個閉路電視, 你估我唔想第一時間放工可以即刻入屋咩, 如果有叮噹嘅時光門, 咁我就可以唔使嘥左搭車嗰來回時間, 要嚟同你玩啦!

舒服晒~

因為老闆reject左我番遲及收晏半個鐘, 所以今日番工心情唔多like, 朝早攪個頭好似攪極都攪唔得好, 再加上出去食lunch時覺得好熱, 覺得d頭髮好煩!

所以三點幾見到奶奶入左嚟, 我就決定去整下d頭髮, 把心一橫去拉番直晒佢!

我同奶奶講叫佢食飯唔使等我, 因為我去整番, 但係奶奶死都話唔怕, 佢食d嘢先等埋我, 再叫佢唔好等佢死都話唔怕! 唔怕? 整到起碼九點都仲等, 唔hea呀化! 結果, 我話番到嚟起碼九點幾, 叫佢食先唔好等, 跟住佢聽到話九點幾先至話唔等咋! 有時, 真係好怕奶奶咁客氣(不過, 佢對住自己d仔女都係咁), 比著係我亞媽, 佢一定話, 咁好啦, 食先就食先啦!

d頭髮拉番直晒, 真係舒服到暈, 唔使下下都要整一大輪先可以出門口, 尤其係星期日, 想去市中心就一定要整一整, 煩到嘔呀! 而家, R兩R就可以行人, 真係方便到呢~

散晒~!

 

今朝1516, 唔知去唔去廸廸尼好, 因為見到成個天都係雲, 就已經即刻問"點解尋晚個天咁藍咁黑, 今日唔通真係唔好天咩???"

見到落下雨又停下雨, 又見唔係好大雨, 咁就決定出門口喇!

一去到廸廸尼就剛好開始有巡遊喇, 幾好呀! 同埋好彩去到廸廸尼只係出左一陣勁太陽, 跟住成DAY都係小陰天! 可能個天今次唔想我好似上次咁水皮又暈又嘔啦!

好開心今次係廸廸尼真係撞到滔滔呀, 滔滔一D都唔怕羞, 好可愛, 不過可惜因為我地啱啱玩完出嚟, 而佢地就啱啱要入去, 如果唔係, 我一定會影番張相留念下啫!

下午三點幾開始到, 一路玩, 滕滕都冇話攰, 又冇叫我抱, 只係有時扭下計, 話比我知佢大肶嗰兩粒大蚊癱好痕好痕, 其餘時間都同我一樣並臂作戰, 真係幾鬼勁吓!

今次我醒啦, 因為今次我識玩喇, 玩一個冇冷氣嘅, 跟住就玩一個有冷氣嘅, 輪住有冷氣冇冷氣有冷氣冇冷氣, 咁就唔使好似上次咁啦! 同埋, 今日過左中午最熱嘅時候先去, 咁就唔怕晒到暈啦!

起初我個心都諗, 都唔知頂唔頂到八點鐘睇埋煙花就走, 因為自己都有d攰, 但係點不知問隻豬仔攰唔攰, 佢居然答我唔攰喎! 既然係咁, 我地就去食個micky泡夫, 行下小鎮大街, 咁就好快到八點鐘喇!

煙花, 滕滕都係第一次睇, 但係我估唔到佢睇左兩分鐘到, 佢就同我講: "媽me, ok喇, 睇完喇, 可以走喇!" 因為佢同我講, 佢想去買車多d喎!

攪錯! 等左咁耐, 仲要揹你隻重豬係我駁頭上面, 都係想你睇煙花睇得開心d, 你居然同我講ok喇, 睇完喇, 可以走喇! 真係比你吹脹囉!

走時, 其實都feel到滕滕開始都攰啦, 點不知佢番屋企途中都冇瞓覺, 真係唔比個勁佢都唔得! 到番到去, 又再玩多陣, 十點幾一上床, 都唔使一分鐘就已經瞓著左喇~!

開工大吉?

今日放完假第一日番工, 心情其實都幾矛盾, 因為對住滕滕咁多日, 要番工真係好唔捨得, 但係如果你叫我以後係屋企湊仔好唔好? 咁我又唔係好願喎!

今朝滕滕一起身開眼, 就見到個工人比奶佢飲, 當時, 佢飲左幾啖就話唔飲喇! 跟住瞓左係個地到, 唔肯去刷牙! 其實, 我知佢點諗, 佢見到姐姐番左嚟, 即係知我要番工唔可以再係屋企陪佢, 所以佢扭計咩都唔去, 要我去氹佢!

ok, 咁我見佢咁, 就氹佢去刷牙換衫, 跟住放埋佢去搭van van我先番工, 所以今日第一日番工, 我就遲左半個鐘!

到滕滕放學, 未見人就已經見聲, 因為佢喊住咁番嚟係到講: "我要卦住媽me呀, 我唔卦住你(姐姐), 我唔要你呀! 我要卦住媽me呀!"

食完飯瞓覺到醒左起身, 佢成日行去個窗到望出去係到講: "媽me, 我要卦住你呀~ 你番嚟未啫?!" 一路為持到成五點幾佢都不停咁叫住!

其實, 我知啦, 你估我唔卦住你咩?! 我都好想打電話番嚟同你傾計架, 不過我又怕打左電話番嚟你就更加卦住我, 所以我就唯有忍忍忍啦!

因為平時放工我唔係準時走, 所以我今日同老闆講, 我想番遲半個鐘, 遲走半個鐘, 因為我想湊埋滕滕番學我先番工! 不過, 問左老闆, 佢reject左我! 佢同我解釋, 每間公司都有規矩, 佢唔想比人覺得我寧捨唔同, 所以佢唔想我番放"吞"半個鐘!

老闆reject左我之後, 我係架巴士到喊, 因為我咁盡心盡力去做我嘅工作, 點解小小要求都唔可以答應我?  老闆成日都講, 我應該知道自己位置係邊, 應該知道自己工作係咩, 所以放工都要keep住check mail!

係! 我當然知啦! 如果我唔第一時間覆客, 個客就可以同另外d supplier 落order; 如果我做嘢好lai lai閑, d mail第日開工我先覆, 係可以架, 但係如果我keep住呢種態度, 間公司好快就執啦, 因為我知道我公司性質係咩!

咁既然我咁諗得開去為公司, 點解我唔係可以係特別d? 乜sales 唔係大晒架?

我真係好憎我自己點解個心咁有責任心囉! 就算我而家嬲, 只係可以keep到一兩晚唔睇mail, 因為我一諗起老闆平時尤得我好自由咁出去做自己嘢, 尤得我有事就遲到早走時, 個心就諗算把啦! 但係去到個位, 就係我咁盡力為公司都唔肯比我遲半個鐘番時, 我就真係好upsad 囉!

真懵!!!!!!!!!!!!!!!!!

我呢, 唔知點解成日都記住個工人今晚番嚟, 由7點開始等等等, 等到十一點幾, 明明上網check過佢班機係1856到左HK架啦, 點解咁耐都未番??? 唔知點解去到11點幾, 突然叮一聲, 再睇多一次佢張機票, 先發現張機票係show "24 MAY"!

因為以為個工人今晚番, 所以今日我又再同滕滕講姐姐今晚番嚟喇! 早幾日佢都話卦住姐姐, 但係今日同佢講, 佢就話叫姐姐唔好番嚟, 佢想我湊佢! 

今晚, 都係八點半啫, 佢就係咁話好眼瞓, 死都要我陪佢瞓, 涼又唔比我沖, 碗又唔比我洗, 瞓係張床到又唔瞓, 目的就係唔比我走! 我等左半個鐘佢都唔瞓, 結果我忍唔住話唔理佢, 衝入去沖涼喇! 點不知我沖沖下, 佢就喊住出嚟喇, 同我講, 佢好驚喎!  真係笑到我肚痛囉, 好驚??? 有幾驚呀??? 好啦, 既然咁驚, 我叫佢睇住我沖涼囉! 又沖沖下之際, 我又同佢講, 不如你開電視睇住嚟等我啦, 佢OK喎, 跟住就行左出去喇! 不過, 行左兩三步, 突然又大喊喇! 咁我又問佢咩事啦, 佢行番入廁所同我講, 佢又好驚喎!

其實我都明白, 佢好想好想我以後湊佢囉, 所以佢今晚唔比我沖涼又唔比我洗碗, 我行去沖涼佢又喊, 死都要黐實我, 因為佢真係想成日都可以黐實我囉.......

講真, 我都好想黐實你, 但係, 我要番工搵錢嘛, 所以你乖啦, 我放假就一定會陪你架!

真係咁攰???

尋日因為姨甥仔個嫲嫲過嚟坐, 所以滕滕冇瞓到晏覺, 佢走左之後, 我地就去左沙灘玩喇!

玩到都差不多6點先走! 開心就好開心喇, 不過番到屋企食飯時就真係開始又把幾火呢!

呢條友仔可能因為冇瞓晏覺係到扭計, 氹佢食完碗飯就食雪糕啦, 點不知佢死都唔肯食飯就話要食雪糕喎, 仲連食左嘅飯都嘔番晒出嚟! 好, 咁既然係咁, 雪糕都唔好食喇, 即刻趕佢去瞓!

又可能因為奶奶講電話講得好大聲, 滕滕瞓左一陣就比佢嘈醒, 係到大喊! 唉~!!!

到左今朝四點幾, 滕滕叫醒我同我講佢肚痛, 要去廁所, 一去, 原來佢攪肚痛!

如常7點幾叫醒佢, 睇下佢有冇咩事啦, 點不知佢同我講: "媽me, 我好攰呀!"

見到佢成個人好似冇晒力咁, 咁今日就唔比佢番學喇!

點不知再瞓, 瞓到1255都仲係.......

幾怕佢唔知係唔係唔舒服呀, 所以耐唔耐我就摸下佢睇下佢係唔係發燒, 好彩, 過左一陣佢醒喇, 一醒左第一時間同我講: 媽me, 我冇事喇, 好精神晒喇!

好攰~

好多嘢想寫, 不過又好忙, 忙住照顧滕滕, 又忙住服侍奶奶!

話就話奶奶入嚟幫我睇住滕滕, 但係奶奶係到, 滕滕就曵到不得了, 仲要係下下都要我去勞氣! 因為好似上個星期有一日, 奶奶好心爭住話幫滕滕沖涼, 但係點不知條友仔見嫲嫲同佢沖涼, 就PUT D 水去嫲嫲到, 攪到成地濕晒! 大佬, 攪到成地濕晒一來要抺, 二來如果奶奶冼抵左就大獲喇! 而且, 最尾又係要我入去趕佢, 條友仔先肯起身抺身!

係, 雖然奶奶係到佢幫我睇住同滕滕玩, 不過煮飯煮餸就下下都要煮得好D啦, 最少都要3餸卦, 想求其D都唔得, 中午, 夜晚, 日又煮, 夜又煮, 佢唔知, 我最憎煮飯囉, 雖然我識煮, 但係唔代表我鐘意煮! 佢日撚日都問, 餐餐都問, 使唔使幫手, 或者等佢嚟煮! 講真, 我好想囉, 不過我做唔出! 佢成日覺得唔好意思, 咁不如你唔嚟, 唔使我整, 唔使我辛苦, 就唔怕唔好意思啦!!!  煮兩煮, 滕滕又係到曵, 又要行一行出去, 再煮兩煮, 條友仔都唔知攪咩, 煮一餐番, 行幾次出去睇隻豬仔! 唔行出去, 條友仔就行入嚟廚房! 奶奶唔係到, 滕滕就自己一個係到玩車, 跟本就唔會咁辛苦囉!

到左滕滕番學, 我就開始吸塵抺地, 次次佢飲完茶番嚟見到, 又問我使唔使幫手! 都對左咁多日啦, 唔好再問啦, 講真, 好撚煩! 所以我答佢: "唔使喇, 你唔好攪住我潻呀!"  我執自己間屋, 唔通要你老人家幫我咩, 仲有, 我間屋又唔係大, 唔使咁緊要要人幫手吓嘛!

上個星期五老公番通宵, 我係廚房叫佢一陣番工, 車埋佢亞媽番屋企, 因為橫掂佢星期六都約左人, 咁就最好順便啦! 老公問我, 仲咩事唔想對住佢亞媽, 因為佢亞媽都冇咩嘢! 我答佢, 你亞媽係冇嘢呀, 不過你個仔有嘢呢, 你亞媽係到咁多日就曵足咁多日, 比我抖抖都可以卦! 同埋, 我亞媽都一樣冇嘢架, 不如你又試下對佢成個星期吖!

唉~ 有時我知奶奶真係個心想幫下我手, 不過佢係到, 滕滕真係無比十分之曵呢! 

使唔使講咁多次先~!

上個星期某天中午, 因為老公同奶奶都係到, 所以我唔去接滕滕放學(其實都係係樓下等校巴嚟啫)!

點不知, 滕滕問左我幾日: 仲咩你唔嚟接我放學啫~?

我答佢, 因為爸B係到, 嫲嫲又係到, 咁我要煮飯你放學番嚟食, 咁我咪唔去囉!

今日星期一, 朝早如常起身帶滕滕去搭校巴, 出奇地乖喎, 當以為開心之際, 佢又問我: "你同我一斉去搭VAN VAN啦!" 我答佢: "大人唔可以搭校巴VAN VAN架, 你乖, 我而家都湊你去番學啦!" 話說完, 佢就好嗲咁咋喊, 跟住講: "唔好啦~ 你可唔可以同我一斉去搭VAN VAN 啫~! 你仲咩唔嚟接我放學啫~!"

安撫左滕滕之後, 真係要出門口喇, 係到等LIFT時, 佢又同我講: "我再問多你一次, 你同我一斉去搭VAN VAN 啦~!"

我家的小八婆!

奶奶上個星期外, 除左星期六&日唔係到, 其餘時間佢都係到! 聽到滕滕同佢嘅對話真係笑爆咀, 因為佢成日同嫲嫲講: "我又唔採你, 又唔睇你, 哼~(哼呢一聲, 雙手橋埋, 個頭寧歪)!"

"我又唔採係, 又唔睇你"呢句, 係我老豆同滕滕係澳門玩時同佢講, 自此之後, 佢用左呢句嘢嚟同嫲嫲講!

今日, 仲加多一句: "我又唔採你, 又唔睇你, 冇眼睇你, 哼~!"

如果趕得切, 我真係好想拍抵佢, 睇佢第日大個睇番佢自己有幾八婆囉!

RELEX~

今日下午番左公司整小小嘢, 我叫左亞婆&亞嫲入嚟湊滕滕!  隻豬仔對住兩佬真係曵到呢~

亞婆亞嫲想佢瞓, 不過就瞓嚟瞓去都唔肯瞓, 結果攪到4點九先瞓著喎! 真大獲, 4點九先嚟瞓, 咁夜晚仲點瞓呀? 所以我5點打番去, 話比佢瞓一陣就好起身喇, 因為自從今個星期開始朝早番學, 佢日日都唔肯起身呀! 不過奶奶答我, 個工人話如果奶奶唔瞓覺, 會唔舒服喎! oh, my god!

星期一奶奶中午12點已經入到嚟, 因為想接滕滕放學, 未夠鐘就已經不斷咁話要出門口喇! 嫲嫲, 咁早落去車又未, 太陽咁猛想晒瓜咩! 奶奶答我, 因為佢太耐冇接過放學喇, 所以好緊張喎!

今日亞媽同奶奶又係12點左右入到嚟, 接左滕滕放學就去食嘢喇, 因為亞媽食齋好難有茶餐廳嘢啱佢食, 咁我就講笑咁話亞媽咁大食, 食三文冶邊到夠架, 一陣餓到暈抵唔好瀨我冇比飽飯佢食! 奶奶聽到我咁話亞媽, 就好認真咁講話, 佢唔係大食, 係因為佢食齋唔com飽! 我知! 我知! 我更係知啦! 我個心諗我串我亞媽啫, 唔使咁認真解釋比我知!

今晚番到嚟屋企, 亞媽已經煮好飯, 而滕滕對左佢地成day, 我番嚟時已經好曵, 叫極都唔聽講, 所以我心情都唔係咁好, 再者滕滕真係對住佢地真係寧捨嘔血, 去到呢個moment, 奶奶又嚟料, 亞媽叫我食辣椒葉, 我唔食, 因為我唔食辣椒葉嘅, 而奶奶講完又講話只係得佢食, 問我係唔係真係唔食, 而亞媽又再叫我食, 嘩~ 唔該, 煩唔煩d呀! 所以我就同亞媽講笑咁講, 我已經好比面你同你飲左湯喇, 唔好再叫我食喇, 我由細到大都唔食辣椒葉架, 而家我飲左碗湯都算係咁, 唔好再叫我食喇!

奶奶聽到我咁同亞媽講嘢, 佢好似好suprise咁! 不過, sorry, 我一向都係咁同我亞媽溝通, 如果唔慣我都冇辦法, 一係你自己relex d啦!

影相~

我呢個假期真係好忙! 今日約左熙媽去影樓影相, 不過我呢個滕滕完完全全係玩嘢囉!!!

 
引左幾耐都唔肯笑, 個樣仲衰成咁! 我覺得係個影相哥哥個問題囉, 因為上次又係咁, 今次又係咁, 滕滕係街都, 九唔搭八都同係hi & bye, 係樓下問路, 佢都同緊d亞哥bye緊, 但係, 去到影樓到, 真係......唉~

好彩玩下唧咋, 比左小小咁多笑容出嚟!

我識滕滕咁耐, 好少見到佢唔郁咁嘅場面!

呢完幾張大合照之後, 就滕滕就冇嘢, 成個人生猛晒喇! 真係想打爆佢囉!

不過, 唔知係唔係因為呢d係團購coupon, 所以跟本就唔會同d小朋友warm up下就即影喇, 我個滕滕都未ready就要開始影..........

唉~ 滕滕, 係真係嘥晒我d錢囉, 雖然係平, 但係都唔

主婦~

由星期六開始, 就做全職主婦喇! 唔知係唔係平時冇咩時間可以整屋企嘢呢, 星期六去完廸廸尼之後, 就開始不停咁整屋企嘢, 整足2日冇停過!

又因為奶奶係到幫我睇住滕滕, 我先可以整嘢, 但係又因為奶奶係到, 所以我仲要照顧埋佢, 又有又唔好啦, 因為好似今日咁, 如果計可以坐係到嘅時間, 唔計食飯同覆下客d mail, 我估我冇多過一個鐘係坐係到休息! 只係而家滕滕瞓左, 真係可以專心覆mail同上網咋!

原來全職主婦真係唔易做, 又要做家務又要去買餸! 未煮飯就要開機洗衫, 等食完飯就可以即刻long衫爭取時間, d時間真係好一分一秒囉! 唉~ 滕滕d玩具, 自從個工人走左都未抺過, 我都唔知幾時先得閑同佢抺下喇~

超級水皮!!!

今日滕滕去左廸廸尼, 真係好彩, 係好彩奶奶同埋一斉入去, 如果唔係, 可以真係叫左白車喇!

因為今日係星期六, 所以打算早D去就早D走, 唔使下下同人迫, 不過攪得嚟都要成12點先去到! 嘩~ 個太陽, 真係堅! 簡直係堅過頭!

原本好有勢架, 打算玩完一樣到一樣架!

點不知排完呢個飛天船之後, 去食嘢, 食完嘢就開始唔多妥喇!

起初仲怕太熱奶奶頂唔順, 樹不知, 頂唔順嗰個係我囉! 一開始就頭痛, 跟住又開始頭暈, 滿天星斗, 坐抵休息下跟住仲發冷! 當時個心真係諗好彩奶奶係到同我睇住滕滕, 如果唔係真係唔知點算!

到走時雖然都成5點, 但係結果臨出廸廸尼時仲走去嘔埋! 好囉~ 安落晒囉! 仲差未瞓抵就真係乜都斉晒喇!

原本想去東涌轉巴士番屋企, 但係去東涌同去青衣都係13蚊, 就更係去青衣啦, 去到青衣, 我真係頂唔順, 即刻第手call 的士!

番到屋企食左止痛藥眠左15分鐘就起身喇! 你話我條命有幾賤??? 起左身之後就走去煮飯洗衫抺地, 做做下成個人居然冇晒事喎! 頂~

兩天遊~

老公放得嗰4日假, 搵左中間兩日去澳門行, 今日終於玩完番嚟, 真係熱都暈呀!

過到去澳門, 落左船第一時間去搵嘢食, Jessica介紹過我六記有麵食, 一去到點不知原來呢間六記係唔休做, 因為係晚上六點先開門! 於是乎行左一條街到, 搵左另外一間食! 嗰到d蟹粥唔錯, 牛腩唔錯, 好彩d嘢食ok, 如果唔係我又會比人鬧!

因為係groupon到訂左上旅遊塔, 有下午茶食, 所以行左一陣, 又去食過嘢!

食完嘢就去威尼斯人攞房喇! 嘩~ 特價都原來好超值架! 幾鬼靚呀!

上左房休息左個幾鐘, 又出去食晚飯喇! 老豆堅決唔食萄國菜, 咁即係冇得揀, 都係叫餸食飯!

食完飯係官也街行左一陣, 食左個雪糕就番酒店喇! 我同滕滕講左個大話, 就係話我隻腳好痛, 我要同爸b去買膠布,叫佢同婆婆嫲嫲玩住一陣, 我好快番!......其實我地係去賭場囉!

玩左一個鐘頭多d就走喇, 因為冇乜上落, 來來去去都係贏千幾, 輸淨幾百跟住又再贏千幾, 咁既然係咁, 即係應該盡左啦, 所以就去搵老豆喇! 老豆就堅喇, 連贏九口喎, 連隔離個亞叉都唔睇牌比佢睇, 因為亞叉下下都成萬成萬咁買, 見我老豆有運, 都唔介意有冇牌睇喇! 因為我卦住個仔, 見咁上下就叫老豆走喇, 因為有時做人適可而止嘛!

到左第二日, 起身去飲個茶, 我地就同滕滕去游下水啦, 無理由唔去搵下個泳池架!

又係唔捨得走囉, 叫極都唔肯走呀! 不過唔得囉, 已經deley左check-out時間去到1點架喇, 真係唔走唔得喎~

check-out左就去左澳門搵嘢食, 今次, 搵齋鋪! 因為亞媽陪左我地食左咁多餐, 點都要搵番間齋鋪食下嘢囉~ 不過, 原來澳門d人好得意架, 就算係同一個area, 佢地都好似唔知附近有d咩咁, 所以間齋鋪, 搵死人囉!

食完嘢, 就去搵"最香"喇! 呢間"最香", 真係學Jessica話齋, 真係要專登去! 識路原來好易搵, 因為行番出大馬路真係好快, 但係行去時, 就真係行到暈咁济!

兩日行程咁就完左喇, 滕滕今日仲學都冇番, 瞓到成十一點幾先起身, 而我呢, 就番工, 番埋今日, 就開始我嘅湊仔生涯, 直到23号個工人放完假番嚟!

係你迫我!

今朝已經係咁, 個forwarder放左柜紙比我地, 今日開倉, 不過就後日要補料, 馮小姐一d都feel唔到有問題, 我已經好忍佢, 叫佢打去個forwarder到嘈, 不如今日開倉, 今日就截補料啦苯!

到下午, 4月尾裝左隻柜, 補料時補左76.57cbm, 個forwarder上個星期已經話我地裝到咁多貨好匪夷所思喎,到今日下午個forwarder打電話嚟話船公司話唔能夠接受我地報76.57cbm, 迫我地去改倏76cbm, 再罰我地比三百幾蚊改單費! 馮小姐就同我講咁樣, 問我點喎!

去到呢個moment, 我已經忍唔住好大聲咁鬧佢! 我問佢, 仲咩樣樣嘢都要我出口去做, 樣樣嘢都唔諗就走嚟問我, 請問我點放假呀!!! 人地迫我地要我地去改, 仲要迫我去罰我錢, 佢只係一聲"哦"就算??? 究竟可唔可以用下個腦去反駁番人架???

呢次, 我真係完全不留情面好大聲去鬧佢, 成間公司都聽到晒! sorry, 唔好怪我, 因為係佢迫我發火!

到夜晚我打比馮小姐, 佢唔聽電話, 咁ok啦, 我send whatsapp比佢, 我同佢講, d單有d咩事就直接問老闆! 我冇講得好明話老闆知道佢今日發生咩事, 因為咁大個人, 唔使講到咁明啦!

犯賤~

個工人後日就番印尼放假, 咁我地一家6口就後日出發去澳門兩day!

其實都有d失望去唔到旅行, 只係去澳門, 因為都係自己安排失當, 叫老公放1-11号! 而家, 只係去得澳門, shit!

上星期亞媽同我講, 原本諗住星期二去我細佬屋企, 不過佢話細佬一家三口要去廸士尼, 叫佢唔好上去! 亞媽同我講: "你細佬幾衰呀, 話去廸士尼叫我唔好上去喎!"

聽到亞媽咁講, 我即刻問佢有幾衰呀, 人地兩公婆可能好鞋夾到時間一斉放假, 咁一家三口去玩又有幾衰先, 係唔係叫埋你去就唔衰, 叫你地唔好上去佢到就衰吖???

其實當聽到亞媽咁話細佬我就真係好唔老嚟, 因為我feel到佢好似覺得細佬一家去玩唔理佢! 而我就即刻成機講: 你估人人都好似我咁, 下下都叫埋你地3個耆英去玩架!  你估下下拖住你地三個老人家出街唔辛苦架! 一時一個又行開左, 一時嗰個又行得慢! 仲有, 拖住你地三個之餘, 我仲要照顧埋最細嗰個! 可以嘅, 就叫我老公睇住個仔, 我就睇住你地三個, 下下都要帶隊咁叫住你地, 問住你地係唔係附近! 咁而家細佬想自己一家去玩下, 你就話佢衰, 咁我想問, 使唔使下下都要經你批准先可以一家三口去街呀?!  你個新抱連自己亞媽都唔叫去玩, 唔通叫你呢個奶奶咩!

以上呢段說話, 我尋晚原原本本咁同我奶奶講番, 因為我真係好想比佢地老人家知, 而家時代唔同, 唔係下下都係老馮要一斉出去, 而唔同佢地出去, 就係不孝! 唔係啦, 因為我都唔會次次都係, 唔通自己一家都唔可以有一家人嘅時候咩!

同奶奶講完, 奶奶都明白, 自己仔女都唔叫自己亞媽去玩, 更加唔好渴望自己個仔/女嘅另一半會對自己好好囉!

而我, 都唔知點解咁犯賤, 成日都鐘意拖埋佢地三個出去, 或者可能我feel到佢地開始老, 我唔想第時想同佢地去時, 佢地已經冇能力去時先嚟後悔~ 

迷網~

老師今日打嚟, 問我幾時交學卷, 因為聽日已經係deadline! 因為樓下間學校, 仲未有消息後備生收唔收, 我已經打左去問, 學校話要起碼成7月先有result!

呢步, 我行錯左! 因為既然我朋友係識人係樓下嗰間學校到做, 咁我應該唔好怕煩到人地, 唔應該in完唔得先搵人幫, 而係一定要搵左先, 因為我好後悔而家唔上唔落, 想入又唔知得唔得!!!

而家間學校已經派晒通告, 學費, 校車, 買書, 茶點, 呢d通通都要交, 而而家只可以係confirm左學費 & 校車先, 而其他真係要留待7月先再作決定!