而家晚晚瞓覺都係要三催四請! 仲咩呀, 你唔想番你自己張私家床到瞓咩?
2010年8月31日 星期二
2010年8月30日 星期一
我學你咋~
上個星期六輪到我 on duty, 不過我一番到公司, 發現個水機著左紅燈? ..............著紅燈???? 唔練係呀化!!! 星期五朝早我睇過個水樽, 仲有半支水係到, 一日已經冇晒水?!
唔使問, 又係嗰個仆街會計啦!!! 唔係煲乜, 就煲7, 洗米都要用蒸餾水, 成公司都只係佢一個咁樣用水, 用晒d水就等人換!!! 都已經唔係第一次架啦, 所以我唔換, 我寧願張雪柜d 冰水叮番熱佢嚟飲, 我都唔換!!! 而且我仲打側左小小支水, 等感應唔到冇水而唔著燈!
到左尋日朝, 個會計以為換左水, 一番到公司佢就預備好晒想煲嘢, 不過當佢jump第一杯水嗰時, 佢見到紅燈著左, 但係佢jump完就行番埋位, 扮睇唔到!
唔緊要, 雖然著左燈, 但係仲有水架嘛, 我jump左水之後就打側左個樽, 等下一家用埋樽底嗰d先換囉! 而下一家, 咪就係佢囉!!! 因為星期一唔會係公司食, 會出去食! 除非個會計都唔係公司煮啦!
個仆街會計平時連洗菜、蒸包都係攞蒸餾水架, 第一因為佢驚死, 第二因為唔使佢比錢嘛! 但係尋日呢, 佢寧願用水喉水煮飯都唔換水喎, 擺明就玩嘢!
哈哈, 唔緊要, 我地都jump晒水, 而且lunch 仲出去食嘛, 老闆番嚟冇水, 咪又係知道係你用晒囉, 因為你係到食飯嘛!!!
個仆街八婆會計真係事事算盡囉, 你擺明唔換水, 我都擺明唔換架, 橫掂大家都知道唔啱傾啦! 3/4 支水係你用晒, 仲要折墮到用蒸餾水嚟洗菜, 唔通仲同你換呀?
2010年8月29日 星期日
..........卻步!
自從菲律賓單新聞之後, 我同老公打算九月去泰國還神呢個planning 就有D卻步, 因為如果我有D咩事, 咁滕滕咁細個點算呀?
同老公商量, 佢就叫我諗下潻! 唉~ 我都唔知點好!
2010年8月27日 星期五
早知如此, 何必當初!
今個星期真係一d都唔好過, 菲律賓事件之後, 就有個6歲小妹妹由三十幾樓跌左落街死左, 原因係因為個媽媽襯個囡瞓左就去左買餸, 咁個女仔醒左見唔到媽咪就擒左出窗望媽咪, 咁就跌左落去喇!
呢D新聞都唔明點解耐唔耐就發生, 都唔係第一次架啦, 仲咩d父母咁疏忽架, 小朋友瞓幾耐跟本唔會有人可以預料到! 跌左落街先嚟喊到劏豬咁, 早知如此, 何必當初呢!
睇完新聞, 我就望一望滕滕, 其實小朋友真係好脆弱架, 如果唔係又點會需要我地去照顧呢, 如果佢地識得嘢, 就唔使我地嘅教導啦!
唉! 又一個小朋友失去左生命, 個心真係好痛呀!
Happy Birthday, 肥嘟嘟老公!
今日老公生日, 放左工撇甩滕滕, 我地兩個自己去撐枱腳!
食完飯, 我地就好快咁番嚟同滕滕一斉吹蠟燭! 好開心老公cancel左個OT, 今晚可以係屋企, 唔使食完好趕咁又要走!
睇見呢張相, 我即刻叫老公出嚟就話: 點解軒軒咁大個咁大個咁嘅?! 咁點軒軒唔係一個BB嚟架???
2010年8月26日 星期四
真係HIGH過頭喇~
而家都仲未瞓得著, 原因應該係今晚食飯杯茶!
又失眠喇, 聽日點番工呀!!! 今日放左日假已經瞓到成10點半, 瞓到頭都痛埋, 但係而家就失眠, 咁即係玩嘢啫!
老公就瞓到"喝喝聲", 滕滕就瞓到反轉再反轉, 咁我點呀???
有好朋友自遠方回來!
今晚興奮都唔係好瞓得著, 所以就嚟成點鐘都開住個腦UP-LOAD D相!
好同學係加拿大番嚟, 更係要見一見啦!
一個星期前已經諗左好耐, 究竟買D咩送比佢好, 仲要係一家四口都啱用架喎! 諗左好耐, 都係買左個電子相架比佢!
我之前冇講過比佢聽係咩嚟, 佢一拆開就話佢之前已經好想買, 不過佢老公話等出D新款先喎! 出新款? 咁即係唔使買啦, D電子嘢出極都仲有更新!
所以我好開心撰左嗰樣嘢係佢都好鐘意架!
真係意猶未盡, 只係短短嗰幾個鐘頭, 傾都傾唔係好多, 因為都成四年冇見喇!
尤其係我地呢D已經有左小朋友, 平時想傾都冇時間可以傾咁耐啦!
2010年8月25日 星期三
希望JASON可以振作, 快D好番!
呢幾日日日睇新聞, 都忍唔住喊左出嚟, 因為睇到班失去親人嘅HK人, 感覺自己好似識得佢地咁!
今晚, 死者嘅遺體運番嚟HK喇, 佢地終於都番到屋企, 你地唔使再驚喇! 唯獨係梁太同佢個仔JASON仲係菲律賓嗰邊, 因為JASON仲未瞓番!
真係越睇個心就越痛, 滕滕見到我係咁喊, 佢走埋嚟問我仲咩, 仲欖住左我, 好似叫我唔好喊咁! 一個咁細個小朋友都識得呢D嘢, 所以JASON你要振作, 如果唔係, 你媽咪點算呀! 努力, 加油呀JASON!!!
乜原來有d咁嘅service 架???
等張中國銀行信用卡已經等左好耐就攞到手, 所以尋日即刻去買左張 car seat, 因為我想快d可以攞到把風扇! 因為怕又唔知又要等幾耐可以有!
尋日碌完卡, 就打上去CS, 搵番之前同我跟卡嗰個男仔, 問佢大約又要等幾耐! 吖, 出奇地, 個男仔同我講, 如果我想快D攞到個禮品, 佢又可以urgent 咁同我攪喎! 可以唔使收到信, 直接帶ID去佢地個換領中心到攞就可以喎!
嘩~ 乜原來又有D咁嘅service 架?! 原來中國銀行 d procedure 咁彈性架, 你急就可以同你即刻攪, 你唔急, 就等你慢慢等! 哦, 原來可以係咁嘅, 咁我第日就知道點樣做喇!
2010年8月24日 星期二
希望第日老左唔係好似佢咁黑人憎!
尋日馮小姐同我講話佢比個"女"激到反眼, 因為買左個電話, 開左張儲值卡比佢用, 個女就不停咁send SMS!
佢一開口就話個女好成日send SMS, 都唔知有咩好send, 又話daddy 咁辛苦搵錢, 一d都唔識得體諒 daddy! 個女自從上個星期搬左番去同佢地開始新生活之後, 佢第一件事就好勞氣咁同我講個女成日send SMS, 之前已經同我同我講話佢唔識得珍惜, 又話比佢老豆同亞媽縱慣晒, 出親街都要買嘢, 想買嗰樣嘢就講大話厄佢地話學校要用, 用錢就好似開水喉咁, 比幾多就用幾多, 找左D錢番嚟又唔出聲用埋!
我之前已經同馮小姐講過個女搬番嚟住一定有磨擦, 更何況個女話大唔大, 話細唔細, 而家青春期, 佢有佢自己一套, 如果係呢個moment關係打得唔好, 咁以後就唔使講嘢, 仲會憎到佢死! (有時真係唔想同佢講, 唉, 不過我又做唔出!)
馮小姐尋日仲懶醒咁, 同我講, 話個女好send SMS, 仲要好串咁話個女喎! 我當時, 其實都冇咁好氣, 我第一句就同佢講: 如果我係個女, 我諗我第日或者以後都唔想同你傾計囉, 每樣嘢都比你話, 仲要一開口就已經講嘢咁黑人憎! 馮小姐一聽到我咁講, 佢就即刻話, 咁唔係點啫!
咩點啫, 咁講嘢唔使講到咁吓嘛, 下下都咁串咁話落嚟, 你話個女成日send 埋d 無聊+無謂SMS, 我係個女都一樣答你我唔覺得無聊+無謂喎(因為個女係咁答佢, 仲要係冇尾音)! 同小朋友講嘢唔係咁講架嘛, 明知佢地而家開始有自己嘅一套, 佢做D乜你都下下band左佢, 你話佢幾冇引啦! 仲有喎, 以前未係一斉住都好客氣咁教佢, 而家搬左番嚟就唔客氣咁下下都話佢! 真係想同你講多句都幾難呀!
我同馮小姐講, 你睇住嚟啦, 佢遲d就唔想同你講嘢架喇, 你下下都係咁! 馮小姐一聽我咁講, 佢就即刻問我, 如果係我會點處理! 我個心諗, 你問下你d好朋友啦, 你咁多好朋友!!!
為菲律賓被挾持本港康泰旅行團死難者默哀, 仍生環的祈禱!
今日好 UP-SAD, 成個 HK 都好 UP-SAD!
開開心心去旅行, 點不知著左一半人番唔到嚟HK! 因為個槍手覺得比人屈, 攪到比人隔職, 所以尋日持住一班去菲律賓馬尼拉玩嘅旅行團落手!
攪左大半日, 菲律賓政府一D都做唔到嘢, 係唔知做乜撚嘢! 直到我7點幾8黠番到屋企睇到直播, 先知原來已經好大獲!
我見到電視直播, 我都驚到喊左出嚟, 話就話唔識, 但係始終都係HK人, 個心越睇就越"UP"!
睇到咁上下, 見到有個人打橫咁瞓左係隻門到, 嗰時都未知係邊個嚟, 我都已經又喊左出嚟, 因為好唔想, 好唔想係HK人! 不過, 好彩後尾原來知道係個槍手嚟, 佢已經打死左!
睇到班冇撚用嘅菲律賓警察真係睇到火都嚟, 仲要冇槍係手就扮有槍, 冇撚嘢吓嘛, 真係唔爆粗都唔得!
都未知裏面D人生死未卜, 就用個斧頭"作"爆D 玻璃, 又開槍去"TIL 引"個槍手, 之前仲搵個槍手個細佬去同個槍手談判, 但係點不知佢個細佬都揸住支槍去! 你話幾荒謬!!!
最討厭就係個菲總, 特首搵左佢成晚, 佢到第二朝先覆電話, 跟住就係電視笑笑口咁話對件事好抱歉, 去到開槍現場, 都繼續笑笑口係到講嘢! 仲有, d菲人去到開槍現場影相留念! 嘩!!! 真係睇到火到嚟!!! 好彩我而家個工人唔係賓, 如果唔係就真係憎到佢死, 成個國家都係廢柴!!!
係網上面都已經好多人話抵制菲律賓所有嘢, 不過李兆光就係電視出嚟話唔好對而家係hk嘅賓太大反應喎! 唔大就假啦, 雖然HK有d人係衰, 但係睇見自己國家嘅人比人地咁樣對待, 想唔大反應就奇喇! 做得唔啱都仲要懶人, 話自己冇錯! 唔通你地自己國家嘅人先係人? 我已經同自己講, 我呢一生人都唔會去菲律賓旅行, 因為我極到憎恨呢個國家同埋佢地D人!!!
低能中x銀行信用卡
大陸銀行d信用卡真係攪笑, 佢打嚟話我因為有戶口係佢銀行, 所以免批核 , 咁ok啦, 橫掂我想買風扇, 而家申請, 簽左脹就有風扇送, 咁就啱晒我啦!
因為咁啱有嘢買, 咪打電話去check 囉, 但係申請左成個都佢都話處理當中, 所以我就問個真人問下究竟咩事! 一唔問就尤自可, 一問佢話同我加urgent, 過兩日佢就打番比我話得左喇!
上兩個星期因為有單新聞係bb比個媽咪抱住, 唔知點樣彈左出去, 跟住個bb就冇左喇, 所以我真係好想快d快d買部car seat 呀! 不過, 大陸銀行真係大陸銀行, 慢乸到爆, 橫掂都ok左啦, 落去分行攞都要等一星期! hk bank 就唔同喇, 我上次換卡叫佢快d比我, 佢就即刻用DHL寄比我, 驚死我唔用佢張卡咁, 所以今次真係等到頸都長埋!
叫銀行搵DHL寄張卡比我, 佢話唔得(可能我唔係大客), 我話搵DHL 去攞, 佢又話唔得, 一定要我本人攞張ID去分行攞! 好囉, 等到尋日下午, 收到電話話可以攞喇, 咁今朝咪去囉!
不過, 攪笑嘅, 就係我本人攞住張ID去攞, 攞左之後, 銀行仲要我打電話去確認喎! 唔使呀化!!! 有冇咁Q煩呀! 既然如果係要有雙重保障, 咁唔該上網check a/c 就唔好咁簡單啦!!!
P.S. 好喇, 碌左卡之後, 唔知等封信去攞風扇又要等幾耐呢, 唔知使唔使等半年呢~???!!!
你唔知啫~
尋日同家姐講我同滕滕用耳挖撩耳仔, 撩左好多出嚟, 佢一聽到就好唔鐘意咁話: "嘩! 你唔好敢啦!"
咩事先???!!! 咩唔好敢呀?! 梓祐由細到大, 都係我同佢撩耳仔架啦, 好細個都已經撩, 有乜問題先?!
我知, 滕滕咁細個就同佢撩, 怕佢郁吖嘛! 咁我都唔會因為我想搵人撩耳仔嚟搵滕滕攪飛啦! 你估我唔怕整到佢咩! 你估我傻嘅咩! 我唔想佢隻耳仔D耳C多到撩唔出, 要去搵醫生解決!
撩耳仔係我嘅專長, 我嘅專長唔使下下都要同人講架嘛! 個囝係我, 我更係係一個最安全嘅情況下佢同撩架啦, 唔通我明知個囝猛郁, 都要同佢撩咩!
更何況滕滕比我撩緊嗰時都冇郁, 咁即係證明佢OK我OK啦, 如果佢起勢郁, 我又點會撩到咁多出嚟喎!
2010年8月23日 星期一
我嘅專橫得到左認同!
滕滕星期六係亞sir 屋企仆抵, hum到左邊塊面瘀左, 所以亞sir 尋日就打嚟問下開心下滕滕嘅情況!
係對話當中, 亞sir 同我講佢同佢太太好配服我教滕滕嘅方法, 佢話滕滕好聽我講, 只要我講 "NO", 滕滕就會stop! 佢話滕滕第日會好乖, 會好聽我話!
其實我並唔係用d咩特別方法, 只係當我講"NO", 咁滕滕就唔可以有機會係"YES", 而呢D, 家姐之前就係用專橫嚟形容我!
而家連個工人都同我講, 滕滕只係怕我一個, 每當滕滕曵, 個工人就會打電話嚟同我講, 等我話滕滕!
我嘅堅持, 係要滕滕一定要跟從我, 如果佢想試我嘅底線, 佢就會好大獲! 而且唔好諗住會有例外, 因為我講左唔可以就唔可以! 所以去到呢個 moment, 滕滕都已經知道我嘅皮性, 因此滕滕基本上亦都係我control 範圍之內!
2010年8月22日 星期日
我真係覺得你好cheap!
尋日去見個朋友最後一面, 而呢個人馮小姐係識, 去年年中, 呢個朋友通知我佢年尾結婚, 馮小姐就主動叫人地請埋佢飲, 順便同人講佢都會係12月(原本)擺酒! 好似同人地好fd咁, 主動話要去人地wedding party, 其實就想人地去佢到飲就真! 不過我唔篤爆佢!
到左呢個朋友尋日攪葬禮, 佢一句都冇問過, 冇提過! 可能佢問過人佢應該唔應該去, 但係佢知我去, 佢都冇同我講叫我幫佢比帛金! ............咁又係, 帛金係心意, 只要有心啫, 不過佢連有心都冇, 咁你話佢幾有cheap 呢, 為左想人地去佢到飲, 就主動叫人請佢, 而家人都唔係到, 就當冇事發生!
我都唔明, 點解佢d朋友唔知佢咁自私& cheap 嘅咩? 咁都做得朋友落?!
2010年8月21日 星期六
鐵膽同學!
今日去左小學亞SIR 屋企玩, 約左2:30係地鐵等埋成班同學一斉上去, 所以12:30同滕滕食完飯就急住出門口! 因為地點係調景嶺, 其實都攪到我都幾頭痕, 因為淨係諗搭咩車都要計數!
好開心幾有個鐵膽同學都會出席, 因為大家都認定左大家嘅約會係重視嘅, 但係其中有一個同學就有玩嘢成份, 因為佢係外國番左嚟之後, 出親嚟食飯都話我地攪D地點唔方便! 唔方便? 唔係嘛, 旺角、青衣城、德福、佐敦、尖沙咀, 都唔方便?????????? 今次講明係亞SIR新居入伙, 你唔係叫亞SIR 就你吓嘛? 呢個同學之前住係香港線尾嗰邊, 之後就搬左去中上環, 咁請問之後有咩咁唔方便呢? 最嬲就係今次我係第一個問佢幾時係HK想就佢時間, 但係到confirm 晒時間之後, 佢知道去亞SIR 屋企, 佢就話唔得閑! 算啦, 都心淡喇! 唔出就算啦, 唔可能下下叫我地就晒佢(我地全部都係住九龍新界)!
今日好彩老公冇去, 因為佢去實悶死佢, 因為我地係到吹水, 佢一定會唔出聲!
滕滕今日都算OK, 不過就因為八卦所以就跌瘀左塊面!
2010年8月20日 星期五
我嘅堅持, 終於都有成果喇!
尋晚出左去, 番到嚟已經11點半有多, 滕滕都已經成隻豬咁, 所以唯有只係摸下佢塊面珠仔!
攪好晒D嘢, 再CHECK下MAIL都成點鐘有多先去瞓, 不過瞓左一陣, 大既兩點幾到, 滕滕無啦啦企左起身叫我! 當時我就第一時間彈起身問佢仲咩, 而佢就即刻第手叫我抱佢! 抱左幾分鐘佢就已經瞓番喇!
不過, 今朝番到公司都已經九點幾, 但係都仲未見滕滕起身! 到左差唔多十點, 都仲未見人! 於是乎我打個工人打提, 問佢仲咩滕滕咁晏都未起身, 係唔係唔舒服, 無奶油差唔多十點都仲未起身架嘛!
個工人同我講, 尋晚九點幾就同佢瞓, 不過瞓到十點幾就喊, 仲要喊得好緊要, 喊左好耐就至瞓番! 所以今朝就成十點都未醒!
夜晚基本上99%都係我同滕滕瞓, 尋晚夠鐘瞓我都未番嚟, 所以佢瞓左一陣, 十點幾要搵我呀! 唔怪得凌晨兩點幾佢無啦啦企起身叫我啦!
而家滕滕飲夜奶, 我都叫滕滕bye bye姐姐先入房, 而滕滕bye bye完都跟住我入房! 因為佢知道每晚都係我, 都係我呢個媽me同佢瞓!!!
所以聽到個工人講話佢十點幾喊得好緊要, 雖然好心痛, 但係好窩心囉, 因為佢知道係我要同佢瞓!
2010年8月19日 星期四
你又想學我呀?
又係今朝一早, 馮小姐一番到嚟冇耐, 佢就走嚟同我講佢有個software 係可以係屋企搖控番嚟公司做嘢, 問我想唔想裝個software!
一聽到, 我就抓晒頭, 佢問我係唔係唔知咩嚟喎?! (唔知? 唔係嘛, 你都知嘅嘢, 我點會唔知呀!) 我抓頭, 係因為仲咩佢無啦啦有個呢d software, 而且仲問埋我裝唔裝? 所以我答佢唔使喇, 因為我啱啱先買左隻手指可以copy 公司d data番屋企做嘢! 但係佢好似好想我裝咁, 又再同我講多一次, 裝左就唔使copy 啦! 不過我都係堅持唔使!
佢見我拒絕左佢, 佢就成機同我講喇, 佢話裝左, 佢到時放產假就可以係屋企做嘢喎! 我自己係過來人, 我就同佢講佢到時唔會得閑架喇, 不過佢就話佢到時好多人幫佢, 所以佢會好得閑喎!
我個心諗, 我嗰時放產假, 就算你有幾得閑, 我都冇打算叫你做, 我d嘢你又唔識做, 更加唔知點做, 咁我放假先至要係屋企都要做, 但係你而家係每日係公司要做嘅嘢加加埋埋都唔使兩個就可以做晒, 唔通你放假我就叫你係屋企幫我做咩? 我都唔想打攪你啦! 不過, 佢知, 我知, 大家都知道公司冇乜嘢做, 既然佢講到出口話放假可以你屋企做嘢, 咁我就覺得佢想好似我係屋企做公司嘢, 咁就可以出full paid 囉!
唔係你話想係屋企做嘢就可以架喇, 公司唔多嘢做, 唔通你放假我都唔幫你咩? 同埋再加上你而家放假係有正經嘢做, 唔通我都仲阻住你叫你係屋企做公司嘢咩? 正路嚟講, 邊個放大假都交抵嘢比人做, 唔想理架啦, 所以我唯一只係諗到點解你咁想係屋企做嘢, 就係你想攞full paid 囉! 嘢又唔係好多要做, 只不過都係落個bkg & 補下料比船公司, 而呢d嘢一個月都係只做十0次, 為起一日都做唔到一次! 你唔好同我講你咁上心公司d 嘢呀? 好擔心我做唔得切呀?
2010年8月18日 星期三
我以前可能會嘅, 不過而家就唔好妄想喇!
今朝馮小姐番到嚟公司之後就即刻入左去廁所整佢d菜, 一整就整左20分鐘就埋番位! 一番埋位, 就即刻msn 我! 佢同我講話個會計番到嚟, 係廁所開左把傘, 整到成個地下濕晒又唔抺番乾佢!
全公司都係地磚, 每次抺完地都要好小心行因為好sin, 如果地下係水就更加危險, 所以馮小姐第一時間番埋位就同我投訴!
我問馮小姐講仲咩唔話佢, 咪直接同佢講叫佢下次收/開傘嗰時小心d, 唔好整到成地都係水囉, 好簡單之嘛! 不過馮小姐就話如果佢咁話佢, 佢實唔認喎! 跟住我又同馮小姐講, 唔係叫佢問個會計係唔係, 而係直接同佢講叫佢小心d, 如果整到濕左叫佢抺番呀!!! 馮小姐又再講話今次唔話佢, 因為佢又會有下次, 等佢下次又係咁先同佢講喎! 我一聽到, 就問馮小姐, 仲等下次呀? 係唔係下次跌抵左先嚟同佢講呀??? 馮小姐又再同我講, 費事佢話係我地整, 唔係佢喎! 白痴!!! 都話唔係叫你問佢係唔係, 係叫你通知佢呀, 死蠢!(呢句我冇講出嚟, 只係個心諗啫!)
同馮小姐講極佢都話等下次, 所以我就答佢: "咁你等下次囉!" 去到呢一刻, 我唔想答佢喇, 其實連呢句都唔想答佢! 不過跟住馮小姐又再同我講話佢可能死都唔肯認! 呢一次, 我個心諗, 你唔好同我講, 因為我唔想理你! 我叫左佢出聲佢又唔出聲, 所以馮小姐又繼續同我講, 我唔想串佢, 佢都迫我出口, 咁我就答埋佢最後一次: " 咁你繼續等啦!"
我已經唔想答馮小姐, 不過佢就繼續同我講講講, 我已經講到唔想講, 既然佢咁鐘意話等下次, 就叫佢等囉, 佢又再不停咁話佢會死口唔認, 佢會話乜乜77! 咩乜乜77啫, 你講咁多, 係唔係想我同你出口呀??? 你想借我把口嚟幫你講出嚟話個會計呀??? 你又想搵我嚟過橋呀???
不過我話過你知, 我而家寧願好似之前咁, 係街到幫個唔識嘅女人嚟鬧個死人麻甩佬, 都唔會幫你囉! 就算我份人睇到幾唔過眼, 我都唔會幫你出頭囉!!! 你唔好妄想喇! 因為呢d叫精人出口, 苯人出手! 我講左出嚟, 我咪做左衰人?! 你當我傻架! 更何況個會計番左嚟之後我都冇再入過廁所啦, 我又點知廁所個地下濕晒呀?! 你係跟住佢後尾由廁所出嚟, 就更係你出聲啦!!!
2010年8月17日 星期二
點解你對住我冇嘅?
今晚滕滕又比我罰企同扭耳仔, 因為佢又咬地下塊膠墊喇!
我罰左佢10分鐘到, 老公就忍唔住同佢講叫佢下次唔好, 跟住就走埋去呵佢、抱佢! 不過, 滕滕對眼都係望住我, 因為係我罰佢, 咁所以佢自然係想我呵番佢啦! 不過當個工人係廚房出嚟, 滕滕就第一時間要個工人抱, 唉~ 幾心酸呀!
我一路罰滕滕, 老公就已經不停係到講: "真係慘, 咁細個就要比媽me罰企, 又扭耳仔!" 雖然老公咁講, 但係我都冇理佢, 因為我有我個rule!
之後, 我同老公講番, 我預左罰佢10分鐘, 因為如果係咁隨意罰下佢, 跟住就當冇事, 佢可能覺得好小兒科下次又再嚟過咪死, 咁就真係唔奀皮都變左奀皮啦! 我唔想一次一次咁加上去! 一係唔罰, 一罰就要有味道嘅, 咁當然唔係太過火啦!
老公聽到我講完之後, 佢都話明白我嘅做法, 不過佢話佢見到佢罰緊嗰時喊到咁淒涼就已經好心痛, 個心當堂軟晒, 佢所有唔啱嘅事都已經原諒晒佢, 唔係好似我咁忍得尤得佢喊!
一聽到老公話佢個心軟晒, 我就即刻問佢, 點解佢激我嗰時, 我喊到劏豬咁, 佢都可以一d都唔理, 一d都冇心軟嘅?! 佢一聽到, 就即刻回應左我一句: 戇居!
2010年8月15日 星期日
我知你越嚟越明白喇~
無論WEEK-END下午, 定係夜晚, 滕滕一聽到我講: "覺豬喇吓", 佢第一時間就會比呢個表情我................
睇下雙眼"拿"到幾實!
不過, 過左一陣佢就會偷望我!
跟住佢見到我望實佢, 佢又係到扮瞓喇!
p.s. 仲咩"拿"住雙眼, 但係兩個鼻洞要同時擴張呢???
2010年8月14日 星期六
點解你而家咁識做嘅?!
今日個工人放假, 所以明明今朝可以瞓晏D, 但係又唔可以喇!
不過, 滕滕而家唔知仲咩咁醒目, 佢見我未起身, 就算佢起左身, 都自己係張床到玩!
上個星期日, 唔係我約左ANSON同嫲嫲去飲茶, 真係估都估唔到佢8點45分都仲未起身, 要我叫佢!
而今朝呢, 老公番通宵今朝番嚟, 一入房就見到滕滕自己坐左係到玩, 都冇叫我起身呀!
滕滕, 你真係叻仔! 你更係知道媽me 好眼瞓啦, 你又更係知道媽me想瞓多一陣喇! 真係抵錫!
2010年8月13日 星期五
2010年8月12日 星期四
做人亞媽真係好矛盾!
今日同個同學講湊b經, 講開夜晚瞓覺仲使唔使"曖", 究竟曖定唔曖~
過埋聽日, 滕滕已經17個月喇, d時間話咁快就過! 直到而家, 夜晚飲完夜奶, 我都仲有同佢掃風, 跟住就抱一陣等佢瞓左我先放佢落床, 原因係因為如果我曖佢, 佢就快d入睡! 想佢快d入睡, 等佢可以養成早睡早起習慣!
唔知係唔係男仔比較心野, 如果佢未瞓著, 而我就直接放佢落床, 佢就成日都坐番起身, 得閑就望下你, 又望下個冷氣機, 擔天望地! 其實佢咁樣我係可以唔使理佢, 因為佢又冇嘈, 遲早都會瞓著, 不過, 就唔知要等到幾時! 最重要就係我要扮瞓嘛, 又唔可以比佢知道我冇瞓, 又唔出得房!
同同學傾開, 佢話佢兩個囡都冇咁, 尤得佢自己瞓, 因為佢睇過一篇research話, 如果長時間"曖"瞓, 到左佢大個, 入睡時間係會比冇"曖"過嘅耐, 比較難入睡! 其實有冇research 都好, 我都覺得如果要"曖"先可以瞓就真係唔係咁好! 不過, 因為我覺得滕滕而家呢個時候識d唔識d, 知d唔知d, 要同佢講要佢自己一個瞓, 佢可能都唔知你地做乜, 又唔知點解! 所以係我心目中, 都係等佢兩歲左右先話比佢知要佢自己瞓, 可能會好d!
雖然, 話雖如此, 我今晚就真係直接放左滕滕落床想佢自己瞓, 不過佢又係如我所講, 得閑就坐係到, 得閑又望下你, 得閑又抓下張蓆! 我望住佢, 佢就用好cute 嘅眼神&笑容企左係到望住我! 去到呢一刻, 睇見自己個囝咁得意咁望住自己, 真係成個人、成個心都冧晒、暈晒啦~ 想唔抱佢錫佢一啖都唔得喇!
學熙媽話齋, 而家唔抱, 第日遲d大左, 佢唔需要我地嗰時, 就冇得番轉頭架喇! 更何況滕滕而家唔抗拒, 好enjoy吖, 咁我何嘗唔係喎! 有d老人家話, 唔縱得, 要等佢地自己瞓咁先叻, 咁先為之我地湊得好! 咁我就真係想問, 不如叫佢地由一出世開始就自己學攪掂自己啦, 使乜要亞爸亞媽啫! 父母少不免就更係有溺愛架啦!
做人父母就係好艱難, 咁又唔係, 咁又唔係, 又想自己個囝囡獨立, 但係又想佢地成日都係我地懷抱中! 我想問, 點解要咁矛盾呀???!!!
2010年8月11日 星期三
真係要"的"起心肝!!!
今日同個舊同事傾電話, 而呢個舊同事話說馮小姐話同佢以前係金蘭姊妹, 但係就係佢講左一句"無事不登三寶殿", 咁馮小姐就唔再同佢做朋友喇!
點解"無事不登三寶殿"就會絕左交呢, 就係因為馮小姐離開左舊公司之後, 除左早期仲有搵呢個舊同事因為有男仔可以介紹比佢識先有聯絡之後, 之後就冇再搵人喇, 而一搵人就係同人講佢結婚派貼, 所以呢個舊同事就同佢講"無事不登三寶殿"喇!
呢個舊同事當然更係覺得搵佢過橋所以先搵佢啦, 所以佢都唔當佢係朋友, 只係當佢係舊同事啫! 但係當我同呢個舊同事講, 話馮小姐當佢係金蘭姊妹嗰時, 佢都好一個迷, 因為朋友唔係咁囉!
其實我好蠢, 因為我本身個立場都係有分"同事"&"朋友", 同事就係同事, 唔係朋友, 朋友就係朋友, 唔係同事, 係我心目中, 唔係好多人可以能夠係"同事"可以進級成為朋友!
所以從今日起, 我會不斷咁提醒自己, 馮小姐只係"同事"! 因為馮小姐本身都係同事嚟! YOKI 加油! YOKI 加油!
2010年8月10日 星期二
自私得你吖!
自從洗橙事件之後, 我都已經嬲到不得了, 至到而家都係咁話!
兩日前亞媽已經同我又講(之前已經講過), 話馮小姐開大個水喉洗菜, 得嗰6/7條菜, 未計浸, 都洗左成半個鐘, 話睇到佢眼火爆喎! 亞媽話好似條菜有C 咁, 沖到條菜爛咁济!
更係啦, 佢而家洗比自己食, 開大個水喉, 一條菜沖成1分鐘, 死沖爛沖, 驚死自己食左D唔知咩落肚咁! 而且都未計洗第二轉呀!
我頭先去TOLIET, 見到佢又係到同條菜做磨沙, 我就話喇: "嘩~ 唔使沖一條菜沖成分鐘嘛! 你學個會計呀!"
我都唔明, 成日同我講環保, 好心就唔好咁啦, 日日開大個水喉係到洗菜, 咁同個會計有咩分別啫, 一樣都係唔使你比錢就係咁用囉~
2010年8月9日 星期一
仲買完未呀???
今朝睇到單新聞, 就係話個bb冇坐係個car seat到, 跟住發生意外, bb就係咁就冇左喇!
car seat! car seat! 大半年前都已經講過話要買! 睇過, 睇過, 已經睇過! 不過都冇買到! 今朝就整左單咁嘅新聞, 攪到我又驚驚地! 所以我問老公, 究竟幾時先買到?! 幾時先去睇? 幾時先得閑?
我問老公, 係唔係我又自己去睇? 睇左就求其買?! 當然, 我都唔會求買啦, 我唔會搵滕滕嚟較飛嘅, 不過老公買嘢真係好麻Q煩, 一陣又話個款唔夠型, 一陣又話D顏色唔好睇! 好似張sofa 咁, 送到嚟又話好硬, 又話唔值, 又話乜乜, 又話77!
咁點吖, 唔買都買左啦, 你又成日唔得閑! 如果再係咁等你落去, 到我死鬼左到未買到呀! 我唔理喇, 講左話星期四去睇, 佢唔去, 我就自己買番嚟架喇, 到時唔好又話咁咁咁呀!
嘩~ 你唔好咁啦!
識得我嘅人都知道我而家放工唔想同馮小姐一斉走, 所以今日都唔例外!
不過, 見佢今日夠鐘都仲唔行人, 我都已經昅住佢! 原來唔走係有原因, 因為當我係廁所番入嚟嗰時, 佢就行去我面前同我講: "老闆屋企係唔係有D router 唔用架?!"
因為早前, 老闆買左個router 係屋企用, 但就冇password, 而且發射得唔係咁好, 所以叫我同佢買一個勁d比佢, 咁冇用嗰d, 就攞左番嚟公司, 放左係佢自己房到!
馮小姐知道老闆之前叫過我買router, 所以今日就問我老闆係唔係有router 多!
一聽到, 我就抓晒頭, 因為冇諗住佢會咁我老闆d router 架嘛, 再問多佢一次, 原來佢真係想問電腦嗰d router! 嘩~ 唔好咁啦! 平嘅都只係百幾蚊之嘛! 所以我忍唔住就答佢: "自己買啦, 一個router 幾多錢啫! 唔好咁cheap 啦, 點問得出口呀!!!"
我真係唔想咁答佢, 但係真係唔好cheap 成咁囉! 之前已經係公司攞左把cutter 番屋企用, 借d而都冇攞番嚟啦(佢話佢唔想嘥錢買!!!)! 而家仲想要埋個router?! 咁老闆夜晚食剩嗰d餸, 使唔使留番比你, 問下你要唔要呀?!
仆街死八婆!!!
真係唔想咁樣寫上嚟, 不過真係一肚火!
呢個仆街客, 女人之中都冇人有佢咁仆街! 6月中落左張單仲未出貨, 叫佢係落新單攞貨之前, 就先出左未出嗰d貨先, 因為6月中d價貴過而家, 唔通比你出左d平貨, d貴貨等等等到年尾跌晒價先出咩!!! 同埋, 叫佢出貨前, 唔該好去攪掂6月尾出貨報關先啦, 到而家已經8月頭, 比你拖左成個月有多, 都算係咁啦! 我覺得自己一d都唔過份喎!
個八婆問左佢一個星期有多都唔覆, 直至今日佢覆個電話嚟喇! 不過就係係到嘈, 話6月中落嗰張單個價咁貴, 要我地減比佢! 6月中報價, 你覺得貴, 咪唔好死去落囉, 咁你仲乜死都要同我地訂貨先?! 嗰時料價貴就更係貨貴啦, 八婆! 成個電話就聲大大, 一味同我講佢冇理由蝕喎! 而且仲話我地係廠, 要承受蝕嘅風險, 唔關佢事!
一聽到佢講呢句, 我即刻都火嚟! 係, 我地係廠, 係要承受風險, 但係你當時同我落左單, confirm左個價先簽番張單比我, 咁你簽左, 即係接受左我比你嘅offer! 咁唔可能d料一路跌, 你就唔攞貨, 兩個月之後同我嘈, 講番張單你會蝕, 迫人地用而家個價比你架嘛?! 你賣貨比人都要承受風險, 你唔好貪我老闆好相與, 咁你就想打橫嚟同我講! 唔通我地蝕比你就得, 你蝕就唔得! 我呸!
成日就同我講做生意唔係咁做! 我想請問, 係唔係好似你咁比張假票出嚟先叫做生意呀? 係唔係成日出左貨又唔比錢先叫做生意呀? 係唔係好似你咁成日張d事實泥橫折曲嚟講到好似好有道理就叫做生意呀!
好睬, 老闆撐我! 同條八婆講d單簽左都唔算數, 做嚟都冇意思, 而家唔同你做喇, 八婆!!!!
2010年8月8日 星期日
2010年8月7日 星期六
申請破產都唔掂呀~
YEAH~ 今日送埋張sofa 嚟喇! 滕滕幾鬼開心呀, 又上又落! 不過呢張冇之前嗰張咁軟, 所以冇得比佢用個頭係到彈下彈下喇! 不過都好, 因為我都唔想佢成日撞個頭撞到彈下彈下, 費事佢彈到傻左啦~!
我已經再三叮囑滕滕, 叫佢唔好再咬張sofa, (如果佢識聽的話就好啦!) 因為再係咁不停換傢私, 真係申請破產都唔掂喇!
因為尋日電視條天線有問題, 所以跟住過左一陣開番個電視再睇下, 但係都係勁雪花喎! 死啦, 唔係又要換埋電視嘛, 如果係就真係大 0 樂, 真係破產都唔掂啦~ 打落去管理處, 佢又話冇收過投訴, 我睇過d電線又冇鬆, 咁點解呢?! 頂! 原來係個工人熄左部DVD 個插蘇制呀! 因為條天線係經DVD機入架!
無啦啦唔知仲咩熄左佢呀, 我同我老公仲打左去兩次, 小左人地兩次呀! 所以我叫個工人打電話去同人say sorry, 比人鬧番兩次呀! 因為人地真係好無辜架嘛!
2010年8月6日 星期五
咁都得?! wahahahaaaa............
點解屋企而家d電器壞得咁快嘅??? 我以前都係咁用架啦, 雖然可能冇用得咁密, 但係唔使輪住嚟壞嘛!!!
個飯煲都已經10年喇, 奇怪嘅就係煮我地 D 大人飯就冇事, 煮滕滕D魚菜飯就有焦! 個飯煲已經用左有10年, 基本功能上係冇問題, 所以我就打去cs問有冇內膽換, 因為我諗個問題應該個內膽有小小花左!
上個星期打電話去問 , cs個女仔話我用開嗰個model係hk冇得賣喎! 冇得賣? 唔係呀化, 唔通我係外國訂番嚟用? 唔好攪笑啦! 個女仔再double check, 原因係因為個model太耐, 連record 都冇喎! 吓?! 咁個內膽即係有冇得配番呀? 更係冇啦!!!
我問cs個女仔, 咁即係點?! 我個飯煲冇事, 只係個內膽花左, 你唔係要我無啦啦又要用1千蚊去買過個飯煲, 但係舊嗰個係冇事, 不過就唔用得吓嘛?! 之後個女仔好無奈, 又唔知點咁, 話同我check一check喎!
到左第二日, 個女仔打番比我, 佢話幫我check過晒東南亞所有地區, 都已經冇晒我呢個model, 所以內膽都冇得配! 咁我又再問: "你唔係要我無啦啦又要用1千蚊去買過個飯煲, 但係舊嗰個係冇事, 不過就唔用得?!" 個女仔, 又再好無奈地話check一check, 又再覆我!
又到左第二日, 個女仔話, 因為如果配過個內膽要hkd340, 咁佢地可以用hkd340呢個價錢去賣一款電飯煲比我! 咁我星期六去左睇過, 所有嘢都ok喎, 仲要係"智能飯煲"嚟喎!
所以今日一番到公司, 就打比嗰個女仔話我接受佢介紹嗰個model, 跟住放工就用左hkd340買左個1.8公升嘅智能飯煲番嚟喇!
我真係覺得我自己好抵死囉, 咁樣都得嘅!!!
2010年8月5日 星期四
壞習慣~
滕滕而家真係好得意, 唔怪得d人成日係到講, 呢個時候係最好玩~
D 人成日講話父母永遠都覺得自己D仔女係最得意嘅, 自從梓祐出左世之後, 我都已經覺得係, 而家自己生左就仲覺得!
滕滕而家成日都蒙起雙眼係到fing 個頭, 整埋d估怪樣嚟望我地, 有時仲扮反眼! 睇到佢呢個衰樣, 真係忍唔住笑出嚟, 我一笑佢, 佢又再整, 好似專登攪笑咁~
係個cam 睇番屋企, 佢就一日到黑, 除左瞓覺嗰時, 就成day 係到行嚟行去, 好似d公園亞伯散步咁! 打番去屋企, 叫佢同我bye bye, 佢就已經識得望住個cam bye bye喇!
到左夜晚要牙刷, 瞓覺飲奶, 佢就識得同個工人bye bye, 跟住我走~ 你話我有幾開心呢~因為終於唔使扯住個工人唔放手喇!
咬sofa 個壞習慣就已經改左好多喇, 不過就有另外兩個壞習慣囉! 第一個就係成日篤人個鼻哥洞囉, 一篤就唔知點解要兩個一斉篤晒! 你越縮佢就壞要篤, 如果唔縮, 佢就篤得有咁入就得咁入! 咁你話喇, 縮唔縮好先???!!!
第二個壞習慣, 就係叫佢kiss, 佢就會kiss, 仲要追住你個咀嚟kiss! 唔好咁開心住, 因為佢追到個咀之後, 唔係只係kiss咁簡單, 因為佢會順便咬住你個咀唇扯出嚟, 就好似咬住張sofa 扯d皮一樣! 所以其實佢而家只不過係唔咬sofa, 而係改左做咬咀啫!
比佢咬完嗰忽, 都唔使過一陣都已經腫左喇, 鬧佢, 佢又好似知道我鬧佢乜喎, 但係第二日又再嚟!
有時就真係比佢激C, 但係有時又真係比佢笑死喎~!
2010年8月4日 星期三
10之中有10!
有著數就問我攞, 係我到搵唔到著數就唔搵我! 明知我鐘意幫人, 你就利用我呢個優點嚟氹我落搭, 成日就兜一個圈嚟氹我比你! 你識得我唔少日子啦, 我個人鐘意人地直接, 你就次次都洒一大輪去攞我苯!
你估我傻架! 乜你當我係朋友咩? 我真係唔覺囉~ 尤你係嗰時嗰一刻開始, 我就已經覺得你好自私! 國家自掃門前雪呢句嘢嚟形容你好啱, 唔關你事嗰時你就唔出聲, 因為唔會影響到你, 而家會影響到自己就唔出聲咁去做左佢, 你自己顧住自己!
街外有著數咩? 你就唔出聲! 你估你唔出聲我就唔知咩! 唔怪得你d所謂好朋友會咁對你啦! 你點對人, 人就點對你, 呢個世界好公平架! 你以為嗰d真係你好朋友呀? 你咪厄自己啦, 到你有需要, 有冇人盡心盡力去幫你呀, 你心照啦!
我知你份人唔識做, 我可以容忍你呢個缺點, 但係你唔好似住自己係咁就利用朋友去搵我苯 7 囉! 我成日就幫我自己去替你比藉口, 只係你唔識做, 叫自己唔好怪你, 但係你諗住咁樣, 係可以老逢咩! 你估我又唔知咩, 只不過我當你係朋友先唔對你有介心架, 就係咁, 你就利用我!
你唔好再問我嘢喇, 我 10之中有 10唔想答你呀!
仲有一樣!
我今日都不知幾勁呀~ book左10:00去整回鄉証, 9:30就已經出門口, 因為想早d去排, 希望早d番到屋企收枱! 嘩~ 唔使10:30就已經走得喇, 真係堅! 之後買左小小菜比滕滕, 跟住就番屋企, 等左一陣就送枱嚟! 好快, 15分鐘就已經裝好晒, 咁我就第一時間叫街車, 張屋企本身圓玻璃枱送出去亞媽屋企! 嘩~ 今朝做左3樣嘢, 好似好多咁呀!
好啦, 送左張餐枱嚟喇, 不過針冇兩頭利囉~ 因為本身嗰張係圓, 諗住有多d人食飯都ok, 但係就係因為係圓, 唔可以開大佢, 所以只係局限住一定係咁樣! 而且, 因為張玻璃枱嘅玻璃係就咁放上面, 所以我而家日日最擔心滕滕會成日"禁"住塊玻璃係到fing!
好喇, 而家買左張方嘅, 而塊玻璃係走唔到位, 又搬唔開, 所以應該係放心架! 不過就係因為方形, 我而家又怕呢條滕滕豬係到走嚟走去嗰時撞落個角到! 雖然呢張枱d角都唔係好角, 不過d小朋友癲起上嚟係乜都睇唔到, 所以我又有小小擔心!
都唔擔心得咁多, 因為之前嗰張冇角,滕滕都成日"hum"埋塊玻璃邊到, "hum"多幾次, 佢都已經識就位避開喇, 所以如果呢張有得比佢"hum", 我諗佢又係"hum"多幾次就又識避啦~
好囉~ 仲有張sofa 未送嚟, 送埋嚟我就安落晒喇, 唔使成日見到而家呢張唔開胃啦, 爛到咁!
2010年8月3日 星期二
美麗的玻璃樽
呢支白酒, 唔係特登買嚟飲, 因為我都唔知好唔好味, 我買嚟, 只係因為佢個樽!
係因為之前有朋友嚟探我地, 買左呢支白酒上嚟, 自從嗰時, 我就已經鐘意左呢個樽!
因為我覺得要嚟裝水放係雪柜好靚 
之前原本個樽都好地地, 個雪柜唔知仲乜, 個sensor 壞左, 攪到不停係到制凍, 連支凍水都都結左冰, 個樽就係因為咁爆左!
今日所以專登去買番支番嚟, 因為我真係好鐘意呢個樽~!
唔知係唔係d工人真係用嘢粗d, 定係佢未嚟之前d電器冇用得咁行! 因為我都唔明, 佢未嚟之前d電器都冇事, 但係佢嚟左一年, 就續樣嘢壞, 洗衣機........雪柜.........電飯煲.........好似樣樣嘢排住隊咁呀!
2010年8月2日 星期一
Angelo, 我會永遠懷念你!
今朝番到公司, 就已經收到消息話個朋友應該就嚟唔得, 所以十點幾就約左一斉去醫院睇佢! 去到見到佢, 都已經係冇咩反應............雙眼都已經唔識眨, 我同佢講嘢, 佢都冇辦法回應...........
11點半係醫院走, 番到公司過左一陣就已經收到電話話佢已經去左!
點解個天要咁對佢! 我呢個朋友以前又玩, 又溫女, 又飲酒, 但係佢呢幾年佢已經改邪歸正, 做番一個好人啦, 好辛苦先搵到個好女人諗住結婚生仔! 好喇, 舊年年尾已經比佢搵到個結婚, 而家都未到一年, 個天就要佢走!
我今日見佢一面, 睇見佢吊住條命, 好似唔想走! 唔想走? 更係啦, 佢啱啱先開始左一陣幸福家庭, 而家都未開心完就要佢離開!
我都唔明, 點解個天要咁對佢?! 改好左, 點解都唔比機會佢?!
我都唔想架!
我之前已經同左老公講過我呢排唔知仲乜, 個心成日都好不安, 好似成日疑神疑鬼! 老公答我佢都覺得係, 我呢排好似痴左線咁, 成日打去check 佢, 攪到佢好大壓力!
其實我都唔想架, 我都唔知點解郁d就唔開心, 郁d就喊, 成個人好灰咁! 喊完一大輪之後, 諗番起都唔知仲咩嗰時喊得咁緊要!
心情唔好, 唔知點同老公講, 因為佢好怕我咁樣痴左線, 所以唯有自己放係個心到! 老公可能都知道我有小小問題, 所以佢呢輪都同我講多左嘢! 雖然佢冇好直接開解我, 只係同我傾多左計, 不過我個心情已經好番好多喇!
仲有, 朋友呢, 有兩三個都知我唔開心, 都有開解我!
多謝晒你地! 因為朋友唔係多就得, 仲要係要有心, 呢d先叫好朋友!
2010年8月1日 星期日
乜都送比你好唔好!
尋日同亞媽吹水講起馮小姐, 話馮小姐而家開始不停咁問我D bb日用品! 其實講真, 如果佢唔係成日話要係私家擇時辰開刀生, 又話而家D人見到佢咁大個肚都唔讓位, 成Q日以為自己好巴閉咁, 我可能都會睬下佢, 成日就講唔停話佢有幾大個肚都冇人讓位比佢, 又話d香港人好衰! 乜d香港人好衰咩????? 我係網上識嗰d blog友, 都好似好過你好多喎!!! 起碼我d blog友冇你馮小姐咁自私先啦!
馮小姐問我D BB 嘢就好閑事, 因為話晒我都生過, 有D咩要買、要用、要注意, 講比佢聽冇所謂, 不過次次講講下, 佢就講到樣樣都話要買最好! 買囉~ 買囉~ 我個心諗你咁有錢就買囉~ 但係一講左比佢聽大約幾多錢, 佢就縮沙! 跟住又話乜D嘢樣樣都咁貴喎! 貴? BB嘢係咁上下啦, 唔使錢送比你好唔好?! 而且, 講多幾句比佢聽, 佢就又嚟, 又用嗰招去氹我(我覺得!)!
其實都唔係我覺得架, 因為好似奶樽咁, 冇得比佢啦, 所以佢一句都冇問過我! 咪就係囉, 奶樽唔比得佢就問都冇問(意見)! 其他D咩揹帶、cushion、衫仔呀, 呢d有得攞佢就問! 問都唔緊要, 直接D啦, 都識左十幾年啦, 使唔使下下都兜一大個圈嚟氹我自投羅網呀!!! 我咁大個女都未試過咁樣對朋友架! 下下都要"因"住佢!
佢而家呢幾日都上淘寶睇嘢呀! 睇啦~ 睇多D啦~ 不過唔好叫我幫你買呀! 我 10之中有10唔想呀!!!
今日幾勁呀~
尋日我又做人頭豬喇~ 都不知做得幾開心!
滕滕一見到開個池, 佢就知道又有嘢玩喇!
原本今日想又再開, 不過諗下諗下, 不如係個浴缸試玩下都好!
次次都係咁, 玩左半個鐘都唔願起身, 強行"的"起佢就喊架喇! 乜玩水真係咁好玩咩?
今朝滕滕都不知幾勁, 成 9 點先叫我起身! 老公同我地食完 lunch 就番左工喇, 所以等到成點半先瞓第二輪覺! 嘩~ 今日就勁喇, 一點半瞓到4點3! 簡直係創舉啦! 今朝就咁晏起身, 今日下午就又變左隻豬!
好彩婆婆好合時, 4點半先到! 老豆呢, 咪又買左我最鐘意食嘅魚(沙鯭)、蝦(大海蝦)、蟹(肉蟹)入嚟囉, 兩個人食4個人嘅餸, 又咪整到我死死下囉~ 不過算啦, 佢有時雖然係衰D, 但係又好錫我嘅!
訂閱：
文章 (Atom)