重生~

係FB到, 見到有人FREE個NOKIA叉電器, 而且仲話有兩三個可以FREE出嚟, 咁我又試下問下有冇囉~

因為同老豆轉左個上網PLAN, 可以無限上網, 咁我就同佢換左個智能電話, 咁佢就又可以同亞媽一樣, 可以睇到我屋企個CAM, 得閑望下隻豬仔喇!

咁舊嗰個, 叫佢搵番個叉機出嚟, 多數可能掉左, 所以一問之下, 嗰個谷友真係搵左個比我, 仲寄左嚟潻, 幾鬼好人呀!

而家個電話可以重生喇!!!

兩個星期前, 同姨甥仔個嫲嫲飲茶, 佢問我送比佢嗰個電話可唔可以較大聲D個聆聲, 因為佢有時聽唔到電話嚮喎! 我一望個電話, 電話層皮已經甩得好緊要, 個MON比起我地D智能電話真係差好遠好難睇囉, 所以我打算張老豆個電話比佢用! 雖然係舊嘅, 不過一D都唔殘, 起碼個MON都清楚D吖! 希望佢LIKE啦!

BINGO

呢隻保溫杯上次出話已經好快冇晒, 所以可能見咁好反應, 過左一兩個星期又再嚟過!

佢話10:00開始發售, 咁我未夠10:00就已經開始standby, 一到10:00就click入去, 點不知traffic busy! 頭幾版我都click左好多次先去到下一頁, click左好多次先可以去到最後一版confirm, 淨係等佢confirm都等左幾分鐘! 正當我以為冇機會嗰時, 佢就話我確認左!

等等等, 等個e-mail都等左成日, 去到夜晚先有! 其實我都仲未相信我bingo左, 因為我呢世人都未試過中嘢架!

點不知今個星期一有人打電話嚟話叫我星期四可以去攞時, 咁先覺得真係成功左!

今日, 去攞左隻杯喇! 都幾靚吖!

新嘢~

見滕滕架板車好似好舊咁, 所以買左架新嘢比佢玩!

真係有時D嘢太靚都唔係咁好! 因為個工人今日打比我, 佢話好多小朋友"HOU"住滕滕架板車嚟玩, 嗰D仲成8/9歲, 姐姐驚嗰D o靚仔踩下踩下踩走左滕滕架板車, 所以打嚟同我匯報當時嘅情況!

我同滕滕, 唔識嗰d小朋友就唔好借比佢喇, 因為嗰d哥哥可能踩下踩下唔見左人, 跟住就冇左架板車架喇~! 點不知條友仔同我講, 佢識佢地架喎! 我問佢幾時識, 佢答我嗰時就識左喇!

條友仔真係唔知世途險惡囉, 踩走左佢都仲未知咩事呀, 到時冇左先嚟喊就遲啦!!!

 

失敗~

滕滕病左好耐, 又食左好耐藥, 見佢差唔多好番, 我地就去左花鼠到玩!  諗住去到成5:30應該唔會咁多人, 點不知呢, 多人多到痴左線囉~

專登唔約人食晚飯, 就係想襯住食晚飯時間, 諗住小d人架嘛, 但係都要去到成7:00 D人先開始走~

呢架所嘅電單車, 滕滕足足坐左成個鍾冇起過身! 其他有小朋友想坐, 佢都話叫人排隊! 排咩隊吖, 我知道佢跟本唔會起身, 因為佢話坐住嚟巡邏喎! 我見佢咁鐘意坐呢架車, 我都冇叫佢讓比人玩, 因為呢個場有成十幾架車大大細細可以揀, 所以我都自私左D, 冇出聲叫滕滕讓出嚟!

去襯呢D playtown, 我而家一定帶晒成套衫褲, 玩完同佢換過晒, 仲要抺晒d手手腳腳, 全身噴晒消毒火酒先去食嘢, 因為其實我都幾驚架~

玩完我地去左麥當當食嘢, 朋友話個飯卷幾好味, 咁我咪試下囉, 比左一啖滕滕食佢話好辣喎, 到我食時, 其係唔好食囉~! 點不知條友仔就話喇: 我都話架啦~ 你又唔信我!  我真係R晒頭囉, 我話: 你只係講好辣, 你又冇講過話唔好食, 咁你想我點信你呢?! 如果你話唔好食, 咁我就信你啫~! 



見佢話個飯卷好辣, 咁我就比左個包佢食! 可能玩左好耐, 消耗左好多體力, 所以成個包食晒喎, 幾鬼叻仔! 見佢咁叻, 食完就比杯暖左嘅朱古力佢飲喇......點不知幾秒唔夠, 就成杯朱古力倒瀉晒落個身到囉~

結果要除左件衫, 齋著件風褸去搭車番屋企, 條友仔仲話, 咁咪唔開始拉開拉鏈囉, 如果唔係就比人見到個身體喎

幾唔想面對都要面對..........

老豆上個星期六腸胃炎, 星期日同我講就叫佢星期一好去睇, 點不知星期二先去! 食左兩日藥老豆話要去再睇, 因為覺得仲未好番, 點不知今日睇完, 醫生話佢身體含氧量唔夠, 可能要租機番屋企吸氧氣..........!

我再諗深一層都似, 因為亞媽早前已經成日講老豆成日都好似好攰, 下午又要去瞓覺, 應該都似係含氧量唔夠! 所以我就打左去醫生比嗰個電話到問!  個sale話, 如果醫生話要吸氧氣, 應該最初期都會係每日吸一個小時到(聽到要吸一個小時, 真係覺得好耐........,  不過呢個已經係最初期), 而吸開左就唔會有好轉, 即係吸開要吸, 唔可以唔吸, 所以身體即係開始..........個sale話最好查詢下醫生有關呢方面嘅嘢, 因為唔係話吸就可以去租機吸, 因為係要以醫生指示去吸嘅!

因為想得多個醫生嘅意見, 所以我尋日同老豆去BOOK左明愛今日就去睇左, 而個醫生就同老豆去驗血, 做心電圖, 照肺........而呢D步驟亦都係我預期, 同埋唔想面對, 因為我知道老豆食左咁多年煙飲左咁多年酒, 跟本知道個report一定唔會係好, 而且可能仲會證實到一d我一直唔想知嘅事實........

CONFIRMEDDDDDD!

4月已經開始講, 講究竟6月尾老公放假去邊到旅行!  講講講, 講到上個星期日先去旅行社睇!

我因為真係怕冇位喇, 所以今日星期四見老公放早, 所以一定要今日去攪掂!

老豆上個星期腸胃炎, 亞媽打嚟話佢6月都唔知去唔去得旅行喎, 因為老豆身體開始越嚟越差, 個人又成日都好攰, 行得多又唔得, 又氣喘, 就係因為咁, 我先真係要快D去報團, 因為我真係好想一齊去旅行........

所以今晚終於攪掂晒報晒團, 再比埋PASSPORT旅行社去做簽證就OK喇!

老豆身痕~

今日天氣好熱, 老公失驚無神話同滕滕去游水喎~ 

我就冇落水囉, 因為我怕我游唔得幾耐, 就飄到浸襯呀, 成個人都冇力, 點游先~

條友仔, 我見佢係岸邊攪左好耐先肯落水, 而落水之後就死都唔肯上嚟, 老公係咁話d水開始凍喇要上岸喇, 佢死都唔肯!

其實我起初都驚驚地架, 因為滕滕都仲有咳, 萬一如果又冷襯d氣管又打回原形咁我就心痛死喇! 不過好彩, 冇事!

唔識表弟!

堂家姐個仔, 即係滕滕表弟, 一年都見唔到三次, 因為堂家姐個老公好麻叉煩, 只係限於佢地男人自成一角, 女家d親戚就唔係親戚, 只係識得自己男家d親戚, 所以我問左幾次話去佢屋企探佢地, 堂家姐個老公話唔好阻住佢地family day之後我都唔再問!

不過, 因為之前堂家姐同我報嗰個職業小先鋒會同佢個仔一斉玩, 又話仲有另外一d戶外活動選擇潻, 不過我話滕滕都未去過嗰個地方, 仲要跟陌生出外, 我怕佢會唔肯囉! 堂家姐聽到我咁講覺得好奇, 仲話點解滕滕會唔肯架, 而且又有表弟係到! 哈哈~ 佢講完話有表弟係到, 我即時就回應佢, 表弟係邊個都未知啦, 你估真係同你個仔好熟咩, 一年都見唔到兩三次!

話說完之後, 可能堂家姐覺得唔好意思, 同埋我又講得啱, 所以佢今日無啦啦就話嚟我地玩喇!

小朋友真係好快熟囉, 話咁快個表弟就開始投訴滕滕呢個表哥好嘈喎!

滕滕都好唔客氣啦, 一見frd d, 就好似對熙熙咁好鐘意人地咁攬實! 熙熙就好無奈咁笑住嚟比佢攬, 但係表弟都唔熟, 而且性格又慢熱, 比佢攬一次之後就開始話嬲滕滕表哥喇  !

佢地走左之後, 再講開表弟, 滕滕居然話: 我都唔識佢!

死唔死吖! 所謂嘅表弟, 係滕滕心目中跟本就唔識佢! 我同堂家姐講, 叫佢反醒下囉, 我個仔話唔識邊個係表弟, 跟本就唔識佢  !

病到亂晒龍~

滕滕已經病左成3個星期, 呢次係佢出世以嚟病得最耐! 雖然唔係嚴重嗰隻, 但係D鼻水同咳差唔多好時又再起番, 而且仲有微燒!  條友仔成日專登向住我嚟咳, 我想唔食晒都難, 結果攪到我又病喇, 條氣又扯番又咳起!

又係唔想去睇醫生囉, 又走左去藥房配藥, 表叔話深水埗有間藥房D藥幾好喎,咁襯住同亞媽食母親節飯咪去執埋藥囉, 結果食左4日藥, 係好左少少, 不過條氣都仲扯, 咁即係唔得, 真係要去睇醫生囉~

無論藥房D藥or 醫生D藥, 食完個人都好眼瞓, 而醫生嗰D仲飄下飄下, 真係勁到呢!

成個人都集中唔到精神, 係意亂情迷當中, 就應該真係唔好決定任何嘢囉, 因為我重覆幫滕滕係同一日到報左嘢玩!  其實就真係好難取捨, 因為第一個又係玩消防員, 雖然之前係玩過, 不過今次亞媽都可以入埋去, 而且呢次去玩, 滕滕有個好朋友都會一齊! 我好想滕滕同呢個好朋友一齊去玩架, 不過佢亞媽就一個迷D, 上次自己走左去報名唔等埋我呢單嘢攪到我好興佢亞媽都未知道原來已經得罪左人, 你話幾咁一個迷!  而第二個活動, 就係同表弟去玩"職業小先鋒"! 呢個活動似係多元化d, 唔只只係玩一個職業, 不過地點就係天水圍! 

唉呀~ 真係要等個人清醒d先去再諗清楚!!!

飄~飄~~飄~~~飄~~~~

今年究竟我發生d咩事, 過年病左成兩個月, 稍為好晒, 而家又病過! 真係好唔想睇醫生, 所以又去左藥房配藥!

食左四日藥都好似冇好過, 結果頂唔順, 都要去搵下醫生!  睇醫生, 打左支針, 好快就見效~ 飄下飄下咁番屋企!

滕滕未病完就已經過左比我, 我地咳d病徵一樣, 大家都係氣管咳! 滕滕比我話佢啦, 成日貪得意專登向我面前打乞嚔又咳, 攪到我食晒佢d菌, 真係想唔病就難啦!

睇嚟要去買番本蘇民峄睇下, 去計一計d位! 

母親節

我記得舊年嘅母親節係同滕滕第一次去廸廸尼玩, 嗰日熱到我仲差D中暑!

原本都打算今日去, 不過, 今個星期我同滕滕都病, 而且滕滕星期五都仲有發燒, 無理由星期六退燒, 星期日就即去架嘛, 同埋, 我都病到死死下~

去唔到玩, 就同亞婆食母親節飯囉~

今個母親節, 滕滕係學校整左個手袋比我, 我問佢咁細個手袋, 可以放D咩落去, 因為我話出街攞手袋, 係要帶呢D嘢架: 銀包, 鎖匙, 乾紙巾, 濕紙巾(消毒加不消毒), 水, 尿樽, 電話, 同埋背巾! 

滕滕一聽到要攞咁多嘢, 當堂O左咀, 然後就答我, 咁我呢個袋只可以袋銀包咋喎!

 

上腦!

我舊公司係賣寫字樓傢俬, 係8、9年前我在職嗰時買左張高背椅比我老豆坐, 跟住係2005年轉左而家呢間公司做都有8年, 買比老豆張椅都差唔多要退休! 又咁橋而家公司對面, 又係一間賣寫字樓傢俬公司嘅倉嚟!

我知道有時想散下D舊款貨, 都會做下減價清貨, 所以我就問對面倉嘅其中一個師傅, 如果有筍嘢就話聲比我知!

個師傅就同左個二打六講, 個二打六就早輪過嚟搵我, 話有D高背椅睇下我要唔要! 我過去一睇, 個心就即刻出現左三個字, 就係"吊那星"! 個二打六比我睇嗰D高背椅, 係皮嘅, 不過D櫈腳生晒锈, D皮就光晒面, 而D邊位就係晒塵! 以我經驗, 張櫈冇廿年都最少有十幾年! 我相信連我死左成廿年咁耐嘅亞婆都唔會要囉! 佢話二百蚊賣比我, 但係如果佢話送比我, 我都唔會要!

個師傅知道我係邊間公司做過, 而個二打六就應該唔知囉, 如果唔係, 我估點都唔會推張垃圾比我, 仲話二百蚊賣比我! 就算一個未做過傢俬公司嘅人, 都唔會要張老過佢老豆老母嘅櫈下化~

真係好想問下個二打六係唔係有撚病囉!

真係好慘咩???

好難得先等到學校有觀課日, 上個星期二就請左半日假去睇滕滕上堂, 再之前個星期只係番左一日學, 因為又發燒, 燒完又有D咳, 到上個星期二有得觀課就要比佢番, 因為我都好想去睇下佢上堂!



不過, 可以仲食緊藥, 所以成朝滕滕都好似冇嚟神氣咁! 又可能係帶住個口罩嘅關係, 佢有講嘢同冇講嘢我都唔係好知, 而佢最大聲嗰一次, 就係同老師講佢隔離個同學仔唔拖住佢!

因為聽到滕滕條氣開始扯, 所以第二日5.1假期都要同佢去睇醫生, 而好好彩今次個醫生冇放假, 不過就又係鬼死咁多人, 開門前半個鐘去排隊攞籌都仲要排第七個! 

醫生見佢條條無啦啦扯, 就開左D勁D嘅藥比佢, 醫生仲講明食左D藥有可能眼瞓或者心跳! 眼瞓, 就真係唔覺囉, 心跳, 就頭4、5日就係真係痴左線, 不過跟住之後嗰5、6日就開始情緒低落囉~

滕滕自出世到而家都唔會有咩"發猛爭"嘅時候, 但係今次D藥, 真係令佢成日喊.......

飯都未開始食就叫我餵, 我話叫佢食左一半先我就餵佢, 話說完佢就開始喊, 仲要喊得好淒涼咁同我講佢真係冇謂口, 佢真係好想我餵佢! 但係, 我話我餵佢, 我已經係最大讓步, 因為咁大個係唔需要人餵! 食左半個鐘, 五份一都未食到又再叫我餵, 我就話冇眼睇佢(因為佢望我一眼又喊, 望下我又喊)!  跟住佢就放大喉嚨喊住嚟同我講對唔住, 媽咪你原諒我一次啦!

真係唔想笑都笑左出嚟, 仲咩事食飯要食到咁淒涼呀! 醫生究竟開D抑鬱藥比你定係開氣管藥比你呀, 點解九唔搭八無啦啦都覺得咁慘呢~

今日老公同滕滕去左覆診, 又係比番嗰D藥! 唔比佢食又怕唔得, 條氣管可大可少架嘛, 比佢食又慘成咁~ 仲有6日藥要食, 真係難頂!

 

 

相聚一刻

今日約左熙媽食LUNCH, 熙媽老槤咁大個肚都出嚟, 真係唔好意思喇!

所以一見到佢地, 我就去排住隊先, 叫熙媽坐住係石櫈到等我電話先好行過去!

熙熙同滕滕好奇怪, 由細到大佢地都唔係見得好密, 次次見襯初時都唔會好生保, 一見面無耐就開始-爭玩具!

你有我又有, 又爭, 你冇我有又爭, 你有我冇又爭, 總之係唔係都爭, 真係反晒眼  !!!

 

好七興呀~~~~~~~~~~

滕滕讀N班時, 同有個同學仔好夾好玩得埋, 咁我當時就問老師攞佢同學仔媽媽個電話, 直到而家K1, 雖然大家已經好少見, 但係好耐唔耐都會出下嚟比兩個小朋友見下面玩下! 而且我仲幫滕滕去報佢個仔間畫室, 等佢地可以一齊畫畫!

我安排滕滕星期一三五去上堂, 係因為我屋企冇老人家一齊住, 平時冇人同滕滕玩, 成日見到個仔自己一個人瞓係地下玩車, 而工人就只係好有時會同佢玩, 所以橫掂都係ON99, 咁倒不如比佢去上下堂, 接觸多D小朋友, 學到嘢固之然係好, 學唔到嘢都可以學下溝通!

就係因為咁, 朋友仔個媽媽早前就問我D courses, 又想幫佢個仔報下! 滕滕上緊嗰d堂都full到爆, 佢留左名, 我又再追下, 點不知我第一次lai左嘢都唔醒目! 因為人地媽媽留左名, 而我同嗰到d staff 熟左小小, 所以我又幫佢問下, 人地有位就第一時間通知我, 我就叫人地媽媽去比錢, 點不知, 人地媽媽報左第二到又唔同我講! 真係, 吊~~~~

收到屋企附近間YMCA暑假班本小冊子, 人地媽媽又再同我講有咩報就預埋佢, 好啦, 以前不計嘅我, 就再去問佢! 我打去YMCA, 佢話因為小冊子只係剛出, 唔需要咁急去報名, 所以人地媽媽話星期六可以去, 問我星期六滕滕上堂幾多點, 過嚟搵我一齊報喎! 但係過一陣又話星期六要去拜山, 問完老爺幾點拜完先覆我! 點不知今晚, 人地媽媽打電話比我, 話佢係YMCA幫佢個仔報左, 問我滕滕報左未, 因為已經冇位喇喎!

真係好想小佢喇叭囉! 我答佢乜唔係聽日話嚟一齊去報咩?! 佢話佢聽日要去拜山, 所以今晚放工嚟報左先喎!

嘩~~~!!! 我當堂興過火屎囉, 又話等撚埋佢聽日一斉去報, 無啦啦自己去左仲報埋, 仲同我講佢個仔報左, 如果滕滕未報就冇位喇喎!

真係吊那星!!! 如果唔係等埋佢, 我洗撚報唔到呀!!!

應該係成功左!

有d嘢, 真係唔好講到咁明, 因為一講左出嚟就可能lai嘢, 跟住又打回原形! 有時d嘢真係又可以好邪~

係4月19日開始, 係第一晚冇著, 我攪左鐘半夜叫滕滕起身, 連續3晚都只係起左一次身就瞓到第二朝都冇事! 不過第四晚就lai左嘢, 因為嗰日去睇醫生, 臨瞓前食左藥, set左3個鐘頭之後, 即係兩點要叫醒滕滕, 不過嚟唔切, 因為佢已經攪掂左, 仲要係佢自己醒都冇醒, 我發現嗰時, 佢仲任由我擺佈, 到左第二朝話番比佢知佢都仲懵醒醒, 可能真係食左藥啦!

係再三叮囑下, 我係咁提醒滕滕記得叫我起身, 而我亦都繼續set鐘半夜起身叫佢, 到左上個星期日夜晚, 我就同滕滕講試唔叫佢, 睇下佢得唔得, 結果呢三日平安渡過!

我嘅心情, 既興奮又緊張, 好想同人講, 但係又怕烏鴉口! 但係諗深一層, 又唔係一件咩大事, 因為好多女仔已經ok啦, 只不過係自己懶懶閑咁唔想半夜起身先攪到而家先攪掂之嘛~

不過又講真, 呢幾晚唔使半夜起身, 真係個人都瞓得好d囉~