痴交線的客人!!!

呢個客, 係老闆做模個fd介紹! 嘩~!!! 煩撚到吖!

 

自從上個星期開始有單來往之後, 佢好似當左我係佢staff 咁, 隔晚就打電話嚟! 係隔晚, 唔係隔日!!!

 

容許我叫呢個客做撚樣! 呢個撚樣, 見到我地其中一個產品咁平, 先同我地落單! 落左單, 就開始彈我地呢個產品喇! 都講明係平, 所以要求唔好咁高先得架! 但係呢個撚樣, 又要平又要靚又要快!

 

一開初已經話左比佢知, 如果佢唔接受我地existing 嘅stock, 我地要重申做過比佢, 就要調慢d部機去啤過, 已經話左比佢知要10日!

 

講左10日比佢知, 惡夢就開始!!! 佢隔晚就打嚟, 係咁講講講, 講嚟講去都話我地個產品質量唔夠好(真係好撚想問佢, 唔夠好就咪7落單啦!), 講完質量又話要我地快d(真係又好想講, 快過你條命好唔好?!)! 答10次都係答, 如果啤快d, 就唔會係你個要求!

 

呢條撚樣, 尋晚又打電話嚟(尋日係8号風球), 不過我沖緊涼, 滕滕接左電話! 隔左半個鐘, 佢又打嚟, 又問我"夜晚打比你OK架呵~"! 真係想話佢痴交線都唔得, 唔通我答你唔得咩, 都忽忽地!!! 一講, 又講左成15分鐘!

 

今朝又打嚟, 由呢一刻開始, 我真真正正覺得佢真係好撚煩! 因為打嚟, 又係問, 幾時交貨, 次次打嚟都有問幾時交貨! 亞哥, 你冇撚嘢吓嘛! 日日都一路咁啤住, 都話左比你知每日啤幾多數量架啦, 你成日問住都係咁計, 唔通數量會DOUBLE左咩?????????

 

上個星期已經去睇左廠一次, 今日下午, 佢又SEND MAIL過嚟, 又話去睇多一次生產!

 

我好驚囉! 我真係好驚佢痴撚線到有單比我地就晚晚打嚟比我囉!!! 亞哥, 你都知我要湊仔架啦, 你係辦公時間打嚟唔得嘅咩, 仲乜叉嘢要夜晚打嚟呀??????????? 你有病, 但我唔係囉!!!

嘩!!!!!

你話係唔係痴左線吖!!!

個工人望住滕滕, 尤得佢擒喎!!!

不過, 我都明, 如果個工人捉番滕滕落嚟, 滕滕又會再一次擒過, 因為滕滕跟本就唔怕個工人!

一見到咁, 我就即刻打番去鬧滕滕喇, 條友仔比我鬧完, 佢就推左個電話比姐姐話: "好驚媽me呀! 好驚媽me呀!" 跟住我就叫佢再聽電話佢都唔肯再聽喇!

你話呢條友仔呢~ 真係五行欠打!!!

進步!

豬仔番左學之後, 第二件事有進步嘅就係自己食飯喇!

之前, 豬仔只係限於對住我同老公先會自己食, 而對住個工人就會比姐姐餵, 原因係因為姐姐覺得佢食的慢, 所以就直接餵佢, 唔等佢自己食!

呢個問題, 我已經話過個工人, 話完之後, 比滕滕食左幾次之後, 又再餵佢, 真係激到你反眼囉!

不過, 可能番左學, 滕滕覺得要自己做, 所以開始漸漸就要求自己食, 唔比姐姐餵!

希望呢個境況會keep 住啦, 因為我跟本就唔想因為個工人想快d而直接去餵滕滕!!!

老了~!

星期六突然醒起, 原來已經9月尾, 係時候幫屋企兩老去睇旅行團喇!

亞媽幾勁, 一聽到我話同佢去睇旅行團, 就話嗰晚可以唔去佛堂都得喎!

上次同佢地去完泰國番嚟都未夠一個星期, 我老豆就已經plan 定下次去台灣喎! 見老豆咁串, 話下次去旅行去台灣, 咁我當然唔輸蝕問佢: 一定請你架?! 老馮請你架?!

把口雖然係咁講, 但係我都會請佢地嘅, 因為老左嘅退休生活都係咁上下啦, 舒舒服服, 鐘意去下呢到, 鐘意去下嗰到, 如果仔女有能力可能請佢地去, 咪盡下力囉, 雖然老豆後生時有幾衰都好!

老豆好快就決定左選咩團喇, 仲即刻confirm ! 當老豆簽文件時, 我發現老豆簽個名, 完全唔同晒, 成個名冇晒力水, 一d勁都冇! 睇到老豆個名簽到咁, 個心就即刻沈一沈, 跟住就問佢: 嘩~ 你個名, 點解簽到咁嘅樣? 完全唔同晒嘅?!

個心有d酸, 因為發現老豆原來已經好老..............

有事就中無艷!!!

我真係好興, 我已經忍左好耐!!!

表姐有時真係好黑人憎, 有事就搵我, 幫佢湊女, 借錢, 我冇一次係唔答應!

老公之前已經話我, 成日比表姐搵我苯, 點解都仲成日要幫佢!

我唔係想數我表姐, 但係我真係好嬲囉!

我表姐知我好錫佢兩個女, 所以你估我唔知佢專登借D二嚟同我講, 佢兩個女升小一, 想係DR KONG買書包比佢兩個女, 不過就好貴, 唔捨得! 兩個書包五百幾, 唔係平, 我個心諗, 升小一喎, 咁比表E買囉, 送比佢兩個開學架!

放假去飲茶, 未生時就得我一個, 佢一家4口, 兩個細嘅就直頭係兩個大人份量, 咁我都算, 唔通表E要計埋兩個細嘅咩, 所以唔緊要, 除3囉!

表姐話放假冇人睇佢兩個女, 想上嚟我到, 咁好啦咪上囉, 兩個表姐買晒麥記上嚟我屋企食早餐, 一D都冇預到滕滕! 喂~ 你冇嘢嘛, 你當我個仔唔係到呀, 係唔係都買多小小嘢比佢食啦, 明知我個仔咁鬼餵食, 你兩個女又一D唔肯同人SHARE, 咁我個仔見到你兩個女又食粉又飲汽水, 唔嘈就有鬼啦!!!

你整屋, 又帶左兩個女上嚟我屋企, 咁好唔緊要, 都係整正經嘢啫, 送佢兩個嚟嗰時叫我叫個工人去接你個女唔緊要, 你攪到夜晚九點幾又話叫我叫個工人帶你兩個女落樓?! 仲要係因為你跟住約左人去BBQ, 唔想上嚟湊番對女, 就又叫我叫個工人帶你個女走! 係只係落樓下啫, 其實冇乜嘢, 但係唔該唔好老馮咁嘅語氣吖! 九點幾, 我個仔就嚟瞓, 個工人都仲要幫我整埋小小嘢架, 你趕住去BBQ, 咁唔該你上嚟接番對女先!

你話你整屋整到冇晒錢, 咁我唔明點解你有小小錢就唔知用晒去邊, 以前未生就爭落周身卡數, 都唔會有人理你, 而家對女都咁大, 可唔可以用錢用得好D架! 你問我借, 我幾時有SAY NO, 如果唔係睇在你有對女份上!

因為奶奶唔同你湊對女, 所以你迫住要請個工人睇女, 咁個工人到左, 明知得我同個仔係屋企冇飯開, 一句都唔問下我去唔去你到食!!! 你嚟我到, 叫我個工人幫你睇女就得, 你問下我一聲去唔去你到都好吖, 問下都冇心!

又係係主動問我要唔要校服, 我話好, 你鐘意就幫我問, 問左又唔幫我約幾時去攞, 就嚟開學都唔幫我再約! 好彩我可以用公司個COURIER 啫, 咁我唔求你, 自己搵COURIER 去買囉! 到左要訂冬天校 服, 見到咁貴, 算啦, 再問多次睇下你個FD有冇啦! 你心情好就"話"幫我去問, 心情唔好, 就唔覆我, 問你又鬼死咁"悔"氣! 喂~ 你唔想幫我問就講啦, 你估我欠左你架!!!

叫我搵我公司個COURIER 去幫你整個煲蓋嗰時, 又唔見你D語氣咁撚串! 整完煲蓋, 而家又叫我搵COURIER 去幫你攞COUPON, 仲要電話都唔打一個嚟, 就咁SEND E-MAIL比我, 你冇嘢吓化!

我屋企個水龍頭壞左, 係淘寶買左個水龍頭落嚟, 又係你自己主動同我講你叔仔識換, 叫我唔使係出面比錢人整! 好啦, 又係咁, 等等等, 等左個幾月又冇消息! 我問你, 又係聽埋D黑人憎嘅語氣, 話: 我唔知幾時得架, 你等得就等啦! 真係好想小九你囉, 又係你話幫我, 而家問你, 就咁撚串! 你早講嘛, 你咁高態度, 我唔使你幫啦!!!

我真係好興囉!~ 叫我做嘢時就乜7都得, 我問校服, 都係叫你爻句問句啫, 你又冇蝕到! 既然咁撚巴閉, 下次唔好再叫我幫你啦! 我老公已經好撚憎你, 話我成日比你搵苯, 我都仲要幫, 但係你依然都係咁賤囉!

我都唔明, 係唔係我前世真係欠左你!!!!!!!

抵死!!!

今日約左個IT人番公司整電腦, 因為本身公司D SETTING好煩, 每朝都要開個主腦, 咁其他機先可以上網, 咁如果部主機慢D(因為已經好舊), 咁就死喇, 有時成個鐘都未可以on-line到!

所以個IT人今日係個SWITCH BOX到加左個ROUTER , 先再派DATA出去, 咁D機就可以各自各幾時開都可以直接上到網喇!

不過, 加左個ROUTER真係好多嘢要SET 過, 因為個公家影印機都要SET番D嘢先可以用! 所以知道要SET個PRINTER D嘢, 我就即刻打比個八婆會計, 同佢講& 問佢攞PW喇(我估應該有)!

我都唔明, 而家手提咁方便, 點解D人個電話打10次著左9次9都唔聽電話, 次次都係CALL BACK 番番嚟, 咁我想問, 點解唔出CALL 機呢, 要個電話嚟把鬼咩! 所以今次打比佢, 都係一樣唔聽電話! 而且SEND埋SMS比佢, 佢都唔好!

好! 真係好! 你唔覆, 唔係我唔想幫你整, 而係你自己選擇放棄! 唔關我事!

所以好開心咁, 我就冇理佢個電腦, 整完自己同馮小姐嗰個, 就走人喇!!!

我好似有病咁~

啱啱幫滕滕個柜筒換季, 我發現原來佢好多好多衫, 只係著過一兩次就已經唔啱著嘅都好多, 而未著過嘅亦都有好多好多!

而早兩日, 我又同滕滕買左D新衫番嚟, 洗左都未乾都已經放唔入佢個寶庫到, 真係人都癲, 唔知點解而家好似有購物狂咁, 不停咁買, 不停咁買, 不停咁買.............

唔啱著嗰D, 只係想比表弟, 但係家姐講過佢姑奶比左好多衫佢個仔, 所以我比左可能表弟都著唔晒, 而其他, 就例如馮小姐, 佢休想我比佢個仔, 因為佢唔係好值得! 而且自己又想再生, 所以D唔啱著嘅, 就只有收埋佢!

死啦, 我發現自己好似真係有病咁, 總之見到靚就買, 總之係平過係HK買就一定唔會手軟! 唉~ 真係好大獲, 因為比呢個淘寶害死! 因為唔使出街就可以買到衫嗰下先死得人多嘛!!! 

成長!

成日都好期待, 因為逢星期五有手冊睇, 睇老師平分& comment!

今個星期, 滕滕多左兩個good, 就係"注意個人衛生" & "參加集體活動"喇!

同埋, 老師comment 滕滕: 茶點後能夠自行收拾自己餐具和餐墊, 值得讚賞!

好開心唔係因為老師比左兩個good同埋讚佢, 而且我feel到滕滕已經適應學校生活喇!

而且, 同滕滕講"搭van van"時, 佢開始同我講"E E"(校車個保母), 所以我覺得佢已經唔多抗拒搭van van喇!

我今朝因為要去睇牙, 所以可以送滕滕去搭van van, 但係去到等van van 嗰時, 滕滕就開始扁咀, 仲有d想喊潻! 我見佢咁, 就同佢傾下計啦, 又同佢講"軒軒, I love u!" 不過, 佢聽到我同佢講 I love u 之後, 就好似仲淒涼, 有小小眼濕濕咁同我講番 "媽me, I love u" 喇!

唔知係唔係知道因為就嚟要離開我上校車, 好似好唔捨得咁, 所以就開始想喊! 不過, 為左唔想佢真係喊出嚟, 我就叫佢笑啦! 佢聽到我咁叫佢, 就比一個好免強嘅笑容我喇!

睇見佢真係唔知好笑定係覺得佢好似好慘咁, 不過佢嘅免強笑容, 真係好好笑囉, 我今日每次諗番起, 都忍唔住笑左出嚟呀 !!!

你整估我呀???

呢隻豬仔滕滕, 而家每晚瞓覺都會周身痕, 一時唔係頭痕, 就一時頸痕, 而今晚就輪到 pat pat 痕!
每次痕, 都要我同佢R, 唔幫佢R就誓死唔擺休! 仲要係不停咁同佢R,
R到佢話OK為止!

 

咁今晚pat 痕就更係要同佢R pat 啦, 不過我一路R, 佢就一路縮, 一下一下咁縮! 起初我都冇為意,
不過佢縮下縮下嘅頻率就同我一下一下R嘅頻率好配合! 因為佢瞓左係到, 塊面就貼實左牆邊個cushion, 我"裝"極都"裝唔到佢個樣,
但係我就覺得越嚟越怪, 所以我就拉開佢問佢仲咩事縮喇!

 

唔拉開佢由自可, 一拉開佢, 原來佢不停咁係到笑緊, 仲要笑到流晒口水! 原來我同佢R個pat pat
唔係同佢止痕, 而係整到佢好痕呀!

 

我見佢笑到流晒口水出嚟, 所以我就問佢: "豬仔! 你係唔係玩緊媽me 呀?!"

私人嘅!

晚晚洗完頭, 滕滕會第一時間話: 媽me吹頭呢~!

呢住見我行入房, 佢就一定跟住嚟, 因為又有得攪攪震喇!

明明個頭5-10分鐘就攪掂, 比佢攪住晒, 15分鐘都仲未得!

不過, 有時又覺得佢好可愛, 因為佢吹下我又吹下自己, 一時又專登吹到我死, 一時又學下我咁幫我揚下d頭髮!

所以其實我隻豬仔乖嗰時, 真係好得意好可愛架!

急c~

老師尋日問我滕滕係唔係好夜瞓, 因為佢好似沒精打彩咁, 但係我同老師講佢而家9點半就飲奶, 飲完奶就刷牙瞓, 頂晒籠十點多d就已經瞓左喇, 咁呢兩日放學番嚟都已經開始回復正常瞓番晏覺, 咁應該就唔會唔夠瞓囉!

呢個老師真係幾唔話得, 研究完夠唔夠瞓, 佢就問我滕滕係唔係日日都有大便喇! 我就答佢滕滕未番學時, 一日都痾成兩三次, 次次都好多下, 而且每朝十點幾到就第一剤架喇! 所以, 我同老師講, 如果佢係學校冇痾, 咁一番到屋企就第一時間痾架喇!

老師尋日同我講, 滕滕係學校玩嗰時, 成個人都唔願郁, 叫佢雖然有反應, 但係唔叫佢就唔多郁, 好次冇嚟神氣咁!

老師話, 想睇下佢究竟咩事仲咩咁樣, 係唔係因為急C所以就唔多有活力喎!

唉! 個老師咁好, 你叫我點捨得K1同滕滕轉學校呢~!

成長!

我又講喇! 自從換左塊廁板之後, 滕滕已經肯係廁所大大!

而家番左個幾星期學, 佢開始要求自己攪掂痾 v v 喇!

起初我要佢係廁所 v v 嗰時, 我都會幫佢除褲(因為等佢快d去完快d走, 唔好係個廁所到攪攪震!), 不過而家, 我一幫佢, 佢就話唔要, 仲要搵手推開我潻!

番左學冇耐, 去廁所就已經唔使人幫, 唔怪得老師個comment 係咁啦:

如果學多左乖嘢又唔錯呀!

真大獲!!!

尋晚, 攞滕滕手冊出嚟簽名, 同埋睇下老師有咩comment!

再睇下, 點不知有一張工作紙, 係要家長同埋小朋友一斉去剪d玩具圖片, 貼上張工作紙到!

咁就死喇, 尋晚睇嗰時已經係十點幾啦, 我去邊到搵d玩具圖片呀???

最後, 比我搵到呢本貼貼書, 係我亞sir 送比滕滕架!

好彩亞sir 救左我同滕滕, 如果唔係, 第一次文功課就欠交喇!

下次得閑, 真係要去TOYS R US 攞定d單張keep起佢!!!

發生咩事???

今日同表姐去完飲茶, 再上去表姐屋企玩, 玩到成四點先番屋企!

我都唔明, 去襯邊個屋企, 滕滕見到有吸塵機, 就會起勢咁吸, 吸完一大輪過一陣又會再吸!

其實我使乜咁煩啫, 去TOYS R US到買個小朋友吸塵機比佢係屋企玩, 咁我就唔使成日擔心佢係屋企攪攪震啦!

唔知仲咩事, 老公尋晚番通宵, 我地番到屋企老公先醒, 平時都係咁架啦, 唔知點解滕滕今日痴左痴唔願比佢老豆番工!

個老豆不停咁錫佢仲冇反抗, ENJOY到爆!

幾叻~!

自從買左塊子母廁板之後, 真係改變晒滕滕去廁所!

因為佢而家每之想痾C C, 都會話比我知, 佢要痾C C!

不過可能因為鐘意得济, 起初每次痾小小就已經話痾完, 明明係一次, 就變左要去幾次先痾晒! 最煩嘅就係初初, 因為佢每次痾完都話要洗PAT PAT!

不過而家就好D喇, 同濕紙巾同佢抺都OK喇!

我諗, 係時候要教佢自己抺喇! 但係而家有時佢都會話自己嚟唔要我, 不過佢一自己嚟我就怕怕地, 因為佢抺到鬧咁攪就仲煩潻~

唉~ 咁即係幾時先教佢自己抺好呢~ 等我諗一諗先!

男朋友~

而家每晚瞓覺, 滕滕都幾鬼"苛個" , 因為佢一定話: "媽me攬住! 媽me攬住!"

佢唔係要我攬住佢, 係佢要欖住我呀! 佢好似一個男朋友嘅角色咁, 用佢細而有力嘅臂彎從我後面, 去攬住我條頸! 而我呢, 就好似一個女朋友仔咁, 依偎住佢個細小駁頭到! 而係呢個moment, 我都會不停係咁索滕滕身上嗰"boom 隨", 仲有時索索下, 我地又會kiss一啖!

滕滕呢個舉動, 係無啦啦由某一日開始, 而係嗰一日開始左之後, 佢好多時唔准許我背住佢瞓, 因為佢覺得我背住佢瞓, 就係代表我唔鐘意佢, 所以而家迫住要面對面, 咁自始之後, 我就唔可以靜雞雞背住佢玩手機喇!!!

 

勞作~

呢個就係滕滕第一份勞作喇!

我問佢係咩嚟, 佢冇答我呀, 我估係波波嚟卦~

角力戰!!!

做亞媽真係一d都唔簡單, 我以為單單只係番學, 應該唔會有d咩問題啦, 點不知就係番學, 所以先攪到我頭都暈埋!

尋日原本係同滕滕打的番學架, 不過落到樓下見架校巴仲未走, 咁咪將滕滕抱左比校車 E E, 之後我就番工喇! 樹不知尋晚放工番到去, 滕滕就不斷係到講"唔搭 van van!", 就連瞓左差唔多成兩個鐘, 滕滕醒左一醒, 又同我講"唔搭van van!"

乜搭van van真係咁驚咩??? 其實我覺得佢真係唔係咁驚囉, 佢只係想我同佢一斉番學啫!  因為番學而家同老師熟左, 佢就唔係好怕喇, 所以我唔同佢番學都ok啦!

唉~ 我估唔到我呢個滕滕咁痴身!!!

因為打襯電話番去佢都唔肯收線, 所以攪到我都唔係好敢打番去! 但係放學之後成個幾鐘裏面, 佢耐唔耐就望住個cam 嚟叫住我 "媽me~ 媽me~", 聽到佢咁叫都不知幾心up~

而家滕滕打醒十二分精神呀, 一見個cam 郁, 佢就即刻望過嚟喇, 仲要即刻張個電話放耳邊, 以為我會打番去呀, 不過佢見等左一陣都冇反應, 就張個電話掟落地喇! 佢而家個勢, 就好似standby係個電話嚮咁!

豬仔, 媽me唔想咁架, 你乖d啦, 番學之嘛, 放左學就番屋企啦, 又唔係唔番嚟, 仲咩事成個痴頭猛咁啫~!

睇嚟我真係要括出去~

今朝真係十分之眼瞓, 所以我不斷咁同滕滕講, 你就嚟要搭van van番學架喇, 你就嚟要搭van van 番學架喇!

我地0815出門口, 出奇地落到樓下, 架校巴係到等緊我地喎! 乜唔係d校巴唔見人就即走嘅咩??? 原本諗住行去的士站架, 見到架校巴係到, 我咪行過去囉, 一行過去就見到個司機擺明反我眼喇!!!

喂! 我唔知我唔搭校車要打比你架喎! 司機叔叔, 我見你之前九秒九咁就走左, 我以為你到左唔見人亦都會九秒九咁就即走, 我點知你會係到等啫!

今日我問老師佢搭校車番到學校點樣, 老師話都 E E 呀呀咁喊, 老師叫佢唔好喊, 佢就係咁同老師講佢要搭的士, 唔搭van van喎, 到左開始食早點先冇再喊! 不過, 之後都仲有耐唔耐就喊兩聲話好卦住我, 要番屋企!

今晚個工人同我講, 佢放學番到屋企就話要打電話比我, 佢話卦住我喎! 所以呢兩day, 滕滕明顯地係好曵, 我知道佢想吸引我注意, 但係我都番左嚟啦, 而且我仲日又講, 夜又講, 我話媽me要番工, 軒軒要番學! 我仲成日都講, 表姐又番學啦, 表哥又番學啦,  barney 又番學啦, 佢d朋友仔講到全部都要番學咁济喇!

我諗我聽日就會比佢搭van van番學喇, 仲要係我唔帶佢, 尤得個工人同佢番學喇! 始終我同佢都要開始接受現實啦!

真係眼淚在心裏流!

唉~~~ 自從滕滕番左學之後, 佢就好鬼黐身, 又好鬼嗲, 而且仲好鬼曵!

黐身、嗲、曵, 我都知道點解, 都係唯一係因為佢唔想一個人番學, 覺得我掉抵左佢!

滕滕而家成日就望住個cam係到喊, 一路喊就一路叫我, 仲手揸電話, 叫我打番去比佢!

我唔係唔想打, 但係而家一打番去, 佢就唔肯收線, 不停咁叫住"媽me、媽me", 冇嘢講都唔肯比我收, 而我一收線, 就又再喊咁叫住我!

有陣時, 真係好忍心咁唔理佢啦, 佢就走去擒柜喇! 咁佢又會知, 佢做d咩我係會鬧, 咁佢一做, 我咪會打番去囉! 咁你話死唔死吖! 你估我真可以成日同你傾電話咩!!!

而家有時係到諗, 我係唔係錯左咁早比佢番學呢~?! 我唔想佢咁唔開心呀!!!

快d就好喇!

今朝同滕滕番學, 都未到學校, 仲有幾步路, 佢就已經喊喇, 死都要我抱!

咁好啦, 入到學校咪放抵佢囉, 佢就死都唔肯, 入到班房, 就喊住嚟問老師係邊! 哈哈, 真係笑死我, 喊住都問老師係邊, 咁即係老師都幾重要吖! 但係, 當我過手比老師嗰時, 滕滕就喊得仲淒慘, 好似唔好要我留係鬼地方呀咁!

我搵次真係要問下亞媽, 我以前番學係唔係咁樣先?!

 

又番學~

滕滕休息左4日之後, 尋日星期一就番學喇!

而家個策略就係我帶滕滕番學, 而放學先搭校車番屋企! 因為滕滕今朝著晒校服之後, 又係第一時間同我講, 佢唔搭van van 呀!

尋日, 一入到學校行左幾步, 就開始喊喇, 班房都未入就已經喊喇! 喊! 我都唔明佢仲咩事喊! 好彩入到班房, 佢見到老師, 都仲肯喊住叫老師, 雖然我走都係大喊大叫, 但係尋晚瞓覺都ok, 都係起身喊左一次就冇再醒喇!

豬仔! 我唔可能下下都打的同你番學架, 校車已經比左八舊水喇, 朝朝打的同你番學, 亞媽我就蝕晒比間校巴公司喇, 而且仲要多成廿幾蚊的士錢呀, 仲有, 我仲要日日遲到呢! 你知唔知嗰件馮小姐, 以為我會好晏番就諗住爻懵唔同我做文件住呀, 通知左佢有咩要做, 佢就成朝係到唔知做乜! 你話d人幾蠢吖, 更係做好晒要做嗰d嘢先做自己嘢吖嘛, 公司又唔係多嘢做!

豬仔! 你記住第日大個唔好好似馮小姐咁又想偷懶, 但係又咁死蠢呀!!!

開心到痴左線!

今日去奶奶去做節, 只係大姑奶到, 而二姑奶因為(可能)係大生意, 所以佢話唔嚟喎! 嗱, 我又有樣嘢唔係好明喇, 二姑奶係做飲食, 一個星期我估都有一日假放吓嘛, 咁既然有假放, 我就唔明點解口口聲聲好似好錫佢呀亞媽, 但係成幾個月都冇番過去食飯嘅?
不過, 算啦, 唔使見到都幾好, 起碼唔使同多一個人講嘢!

滕滕, 見到大姑奶個仔, 都唔知點解咁鐘意佢, 一個2歲半, 一個15歲, 滕滕就係咁搵表哥玩, 叫佢錫表哥, 表哥唔想比佢錫, 佢錫唔到都就咁要錫隻手一啖, 慕求錫到就得喇! 開始都冇咁癲, 越玩就越瘋狂, 又係捉又捉唔住, 抱又抱唔住, 成個人不受control咁!

我地年年都秋都會食完飯同奶奶出去搵個地方賞月, 今日, 大姑奶聽到我地話同奶奶去賞月, 佢又就話去喇! 最好笑就係, 佢個仔一聽到話去賞月就即刻話: "唔係嘛!"(仲要加埋一個極不願意嘅表情!) 我個心諗, 成15歲仔, 比我都唔想跟你地班中男中女去公園啦  ! 只可惜, 我呢個13點嘅大姑奶佢就更係唔理佢個仔啦, 而佢個仔去到公園, 就背住坐, 唔知係唔係怕比人見到呢!!!

而滕滕, 有得出街佢就好開心喇, 又再一次四周圍咁走, 又跑又跌, 呢~ 又跌瘀左幾撻喇! 人地唔知, 又以為我地虐兒啦!

 

把鬼花燈會

今多年都冇去過, 咁見滕滕而家開始識嘢, 就帶佢去維園睇下花燈啦, 嘩~ 真係把鬼, d花燈又唔係多, 又唔係特別靚, 又多人(呢個我都預左), 不過最黑人憎就係嗰d只係花燈啫, 又唔係o靚模, d人係咁企晒係到又唔走, 係影完都唔走, 我都唔知d人仲乜叉嘢, 而且仲熱到嘔茄!

嗰個咁嘅滕滕可能好開心, 捉到捉唔住, 成日就走嚟走去, 嗰到咁多人, 好難比佢自己行架嘛, 嘩~ 真係曵到呢~!

呢排一影相, 我就好憎呢隻豬仔, 冇一次可以好好地影架, 小小好好地都得卦, 唔係叫你多啦, 唔係一係就反腰就即頭背住你!

豬仔, 你知唔知好叉熱架, 你老豆已經全身濕晒喇, 我又出去, 唔該你合作下啦! 好冇!(滕滕意思即係話: 好唔好?!)

好邪~

有時d嘢真係好邪, 唔好講笑!

我星期六下午去買左衣紙, 入黑之後7點幾就落樓下對出個三叉路口到燒, 燒完d衣紙, 滕滕尋晚就冇發惡夢夢醒, 只係有兩三次個身扎一扎但係都冇起身, 又冇喊!

不過, 都要耐唔耐起身摸下佢, 因為星期五嗰日發燒, 啱啱今日先冇食退燒藥咋!

今晚, 唔知會點? 希望滕滕都乖乖地啦, 因為聽日番學喇!

第三晚!

尋晚, 已經係第三晚, 係第三晚連續咁不停成晚發惡夢!

好堅! 發完一個又接住一個, 不停咁發, 晚晚由12點左右開始到3/4點先發完!

佢发完一個惡夢之後，就會指住個房門又要出又要入，另外一個就吾知仲乜，要企係到大喊，再另外一個就係咁坐係到喊，另外一個反晒腰係到发癫，再另外一個就指住牆話叫牆比奶奶佢，有次就問個柜攞奶奶，而有次仲係咁推開我叫我走, 總之個個新鮮就個個奇，次次都堅癲喊完一大餐之後就自己話覺豬跟住就即訓番!

我尋晚見到佢咁, 我都有小小驚, 仲咩事會咁呢,?好似對住D空氣係到講嘢發癲?! 而我又唔明滕滕講乜, 仲乜都幫唔到佢!

 

發燒!

尋晚都諗住今日番學, 但係今朝起身, 滕滕個身就滾滾地, 一探之下就有100度喇!

尋日睇嗰個DR唔得, 因為食左藥之後, D鼻涕多到不得了, 好似發晒出嚟咁, 所以今日唯有同佢睇番平時睇開嗰個DR!

諗住如果搵到另外一個DR係夾到滕滕, 咁就可以唔使成日搵本身嗰個啦, 因為本身嗰個成Q日都放假, 而且仲鬼死咁多人! 又唔可以電話攞籌, 下下都要親身去, 攞完籌又要等最少個幾兩個鐘, 煩到死! 唉~ 咁尋日嗰個唔得, 咁即係都要睇番佢!!!

都好彩, 成一日藥, 今晚番嚟滕滕都好似冇咩事咁, 不過個工人講, 佢又好似上次咁, 力大無窮囉, 因為佢又推傢俬喇!!!

老師今日下午又打嚟, 問滕滕咩事, 我就話左比佢知佢發燒, 所以唔番學喇! 同埋, 我叫老師放心, 因為佢應該而家對學校都冇咩事, 因為尋日我問滕滕鐘唔鐘意番學, 佢話鐘意, 又問滕滕鐘唔鐘意老師, 佢又話鐘意, 咁即係兩樣都好似OK啦, 而家, 就要再睇下佢搭校車喇!

老師同我講, 個校車保母話唔係我諗得咁誇張, 因為滕滕上左車之後, 喊左一兩個站就已經收左聲喇! 但係我同老師講, 我唔知佢上左車之後點, 我只係知佢架車到, 停車, 滕滕上車, 車門關, 開車, 都唔使10秒囉!

所以老師同我講, 佢都叫左校車個保母比滕滕望一望佢先接佢上車, 咁樣起碼都等個小朋友知道邊個接佢番學吖!

睇嚟個老師都唔錯, 起碼都會聽下我講嘢, 同埋日日都打嚟問滕滕點!

oh!

唉~ 尋晚滕滕同我講完搭van van 驚驚之後, 由12點開始, 就不斷咁發惡夢! 發完一個又一個, 成晚就瞓->喊->瞓->喊->瞓->喊, 喊又再瞓, 瞓完又再喊, 個個惡夢都好激下, 因為佢醒左嗰一刻喊得係好慘好淒厲架! 直至4點幾喊完之後, 就開始瞓得好, 冇再喊醒喇!

今日, 我冇同滕滕番學, 因為佢尋晚不斷發惡夢, 跟本應該唔會有覺好瞓, 再加上佢好似有小小鼻塞, 咁我就打去學校同老師請假!

今日下午, 老師打電話比我, 同我傾話不如呢幾日番學, 唔好搭校車住喇, 等佢情緒好番d先同佢再搭校巴, 不過我諗諗下, 晏d打番比老師, 不如我同滕滕一斉搭校巴會好d, 等佢認下個保母, 等佢知道個個小朋友都同佢一樣, 要搭校車番學!

不過老師話我呢個諗法唔係好可行, 因為第一, 校巴公司唔會比家長上車, 第二, 佢怕滕滕會依賴, 以為喊一兩日我就可以跟佢說話去做! 而老師話, 不如聽日唔好搭校車, 我自己湊佢番學, 而到下個星期一, 就直頭唔好送滕滕落樓, 因為可能滕滕見我係到, 先喊到咁, 因為保母E E同老師講, 滕滕都係喊一兩個站之後就冇再喊喇!

唉~ 真係慘, 想送個仔番學都話唔好, 要恨心D喎  !

唔hea呀化~

馮小姐個人其實都幾 funny, 佢次次問埋d問題真係出人意表!

自從我同佢講左佢做嘢有咩問題之後, 果然不出我所料, 佢以為真係fd番, 所以我feel到佢開始又想同我講番佢d嘢! 一時就講下家事, 一時又問下工人d 嘢!

尋日, 佢話發現佢個女好似係拍拖, 係盤問之下, 佢叫佢個女講真話, 如果唔係老豆問佢(佢個女), 咁佢就大寧樂! 佢一路講, 我都冇乜點插口, 因為我唔多想佢又再好似之前咁不斷問我, 咁咁咁之後又應該點點點! 而我, 只係講左一句, 話叫佢老公自己諗下點處理囉, 如果個女真係拍拖! 我講完叫佢叫佢老公自己諗, 咁佢就冇再出聲喇! 因為我冇上當嘛!

今個星期初, 佢問我, 平時我個工人幾多點起身, 幾多點比佢瞓, 我就答係我set比佢個工人嘅, 但係馮小姐居然問我: "勞工法例有冇有指定時間架?!" 我個心諗, 你唔hea呀化, 請左個工人就嚟一年啦, 仲問我個工人起身休息時間係邊個set? 你冇很嘢呀嘛!!!

今日, 馮小姐又問我, 個工人星期日休息, 咁嗰朝嘅早餐, 我會唔會提供埋比佢喎! 你話佢係唔係痴交線吖!!! 星期日, 我起身, 個工人都出左去啦, 佢有冇係屋企食嘢, 我點叉知啫!!! 所以我答佢, 邊有計得咁多架! 佢要食, 我都冇辦法, 佢食唔食我唔理佢架! 跟住馮小姐話, 如果要提供埋早餐比個工人的話, 咁佢星期六就買埋佢星期日早餐嘅面包喎!

講真, 我唔望個工人對我係10足10, 我但求佢對我個仔ok就得, 因為而家工人難求, 不過不失我都算, 如果下下都要計得咁盡, 我亦都唔覺得個工人會對你個仔好得去邊囉!

一個迷!

我唔係好明!

老公&兩個姑奶, 話就話佢地好似好錫佢地亞媽, 話唔錫又唔多似, 但係我又唔係好明一d嘢囉~!

有時真係覺得自己好多事! 事原係老爺未過身之前, 我已經同老公講, 張奶奶張儲值電話卡上台, 我話如果有d咩事要打電話, 但係嗰時先發現張卡已經冇晒錢咁點算呢! 奶奶本身又唔識check balance, 同埋張卡冇錢, 奶奶先同我地講, 叫我地/姑奶幫佢買增值卡去增值! 我個心諗, 下下都打電話比d姑奶, 跟住d姑奶番嚟食飯先同奶奶增值, 佢地唔覺得麻煩嘅咩??? 我之前已經同老公講過一次, 叫老公去轉, 但係老公就冇心肝啦, 時時都話去都唔記得! 直至我早前係公司附近商場, 可以轉上台, 最平都係$20/月, 咁我見到, 就問都冇問就同奶奶上左台喇!

電話儲值卡都唔算係其中一個迷, 因為而家老爺唔係到, 奶奶又自己一個人住, 係唔係裝番個平安鐘呢? 平安鐘都係百幾蚊個月之嘛, 我又唔明, 奶奶都成70啦, 點解佢地好似冇咩人擔心自己亞媽嘅??? 所以我又忍唔住多事同老公講, 點解佢地三姐弟冇人諗到幫佢亞媽屋企裝番個平安鐘, 佢地表面上&實際上都好錫佢亞媽, 平安鐘個廣告, 成日都有架啦, 為何好似冇人諗過呢樣嘅??? 同老公講完, 佢冇出聲, 亦都冇答我, 而我, 係呢樣嘢係唔會主動幫佢亞媽整, 因為我想佢兩個家姐出下力! 因為一個做生意, 唔係百幾蚊都唔想比吓嘛(我亦覺得佢呢個家姐咁勁, 唔會孤寒呢百幾蚊), 而另外一個家姐, 下下都話自己搵單, 都兩三萬一個月, 又係咁勁嘅家姐, 我估應該都唔會孤寒呢百幾蚊囉!

而最近, 又有多另外一個迷! 就係奶奶同我講, 佢想去旅行, 但係, 就係join嗰d專搵老人家苯嗰d公司, 連埋其他老人家一斉去! 我一聽到, 我好坦白咁表明我唔 appreciate佢去呢d公司到參加呢d旅行團囉, 因為本身呢d公司意識不良, 就算有老人家去左話冇事番嚟, 我都唔信呢d公司會唔厄佢地囉!!!

我反對左之後, 奶奶就問老公, 老公聽到都話唔好, 而且個團原來要成九千幾蚊!  所以老公送完奶奶番屋企"之後, 就第一時間打比佢家姐! 哼~ 老公同佢家姐講話個團要九千幾蚊, 佢家姐居然話: 唔出奇呀! 有d豪華團都要九千幾啦! 九千幾未必厄佢地嘅, 只係怕間公司又唔知用咩方法搵佢地苯啫!"

老公番嚟話番比我知佢家姐話唔出奇要九千幾蚊(老公信佢家姐講架), 我就即刻band 佢喇, 日本而家有幅射, 呢排又係淡季, 使乜九千幾呀!!! 仲有, 之前真係有d豪華團唔止九千幾潻, 萬幾都有啦, 如果唔係邊到得嚟豪華呀!!! 仲有, 佢地成班老人家去到食咩呀, 魚生段估佢地食都唔可能食得多啦, 食唔食得都唔知, 而且佢地係老人家, 都係食下菜小量肉啫, 食幾條菜, 有幾豪華, 乜叉得嚟係豪華呀!

姑奶講佢都唔讚成奶奶去參加嗰d團, 但係唔使下下都band 我同老公講嗰d嘢囉(其實姑奶知道佢細佬冇乜見地, 所以我覺得佢係band 我), 既然你好似講到咁撚緊張你老母, 咁唔該你你番下你自己亞媽啦!  我? 我只係新抱嚟架咋!!! 

 

唉~

今日老師打電話嚟話滕滕今日扭計左! 由佢比人脅持住上校車嗰一刻開始喊, 我就開始有D不安, 都估到佢今日唔會好乖!

事原今朝刷完牙之後, 坐左係SOFA到, 滕滕主動同我講話搭VAN VAN媽me一斉, 我就同佢講我唔同佢一斉搭喇, 媽me要番工呀, 跟住佢就開始喊扭計喇, 話要同我一斉搭van van呀!

到左今晚放工番嚟, 我問滕滕今日番學有冇曵, 佢就同我講有, 喊喊, 有曵曵! 再講落去, 佢就話驚驚, 驚驚, 唔搭van van!

我今日同老師反應過, 呢兩朝滕滕上車, 個保母二話不說, 一停左車就即刻"的"左滕滕上車, 跟住唔使一秒,就即刻關車門開車, 全程10秘都唔使! 我同老師講, 而家都係搭左校車三日之嘛, 起碼上車時, 都比個小朋友望下邊個e e 幫佢地上車吖, 連個小朋友都未望到就"的"左人上車即走, 咁同比人脅持上車有咩分別呀~

我同老師講, 我明白可能時間問題, 上車地點又可能唔可以太耐, 但係, 真係比一兩秒嚟望下個保母都得卦, 如果唔係, 第日滕滕上咩事, 上邊架車佢都唔知啦! 因為就係因為佢今朝見到架一模一樣嘢校巴, 滕滕就話上車喇! 好彩我睇個校章唔同咋, 所以架車一嚟到, 我就指住個校章, 話比滕滕知等佢認下咋!

唉~ 死啦! 前兩日就驚個男孩子廁所, 今日就驚搭van van! 正如老師所講, 你好冇安全感喎!

好d喇~

老師今日下午打嚟, 佢話滕滕今日去廁所冇咁抗拒喇, 雖然冇咁抗拒, 但係都係有小小驚!

因為老師話滕滕今日叫左佢幾次話要痾c c ,但係帶左佢去幾次, 冇一次係有架! 老師問我佢會唔會未必有喎! 我個心諗, 你估佢整估你呀, 佢都已經驚去廁所架啦, 同你講你就帶佢去, 咁佢都驚啦, 同你講咁多次, 去咁多次你估過引呀!

老師又話滕滕缺乏安全感, 好多時都要搵佢, 轉地方玩都要老師係身邊, 如果老師行開小小, 佢就即刻好似好驚咁, 又問老師去邊!

今晚番到嚟, 個工人同我講佢係學校可能冇痾c c , 因為滕滕番到屋企就即刻痾左好多!

老師, 我個滕滕好易話為, 佢唔會因為想繼續玩而要佢走就扭計, 只要話比佢知下次再玩過, 叫佢同個玩具講bye bye, 咁佢就好順灘咁走! 佢亦唔會因為想整估你話比你知佢要痾c c, 因為佢份人一d都唔古惑!

希望嚟緊好d啦, 一日唔解決廁所嘅問題, 都係有問題!

好驚!!! 真大獲!!!

今日滕滕唔使叫, 就自己彈起身番學喇! 呢樣嘢真係似我架 , 唔似佢老豆咁, 叫十次都唔起身!!!

一路出門口, 我都有同滕滕講話佢一陣自己搭van van番學, 媽me就番工, 姐姐就去買餸, 有一兩次佢都答我唔好, 要一斉搭van van!

豬仔, 你估我唔想同你一斉搭van van番學咩, 我夠好想啦, 不過唔可以架, 你要開始自立喇!

一上左車, 佢知我唔會上之後, 佢就開始喊, 不過我估只係喊左一兩聲, 因為後嚟老師同我講, 佢番到學校都冇見佢喊喇!

因為滕滕有小小鼻水, 星期六&日食左d鼻水藥有小小肚痾, 所以我十二點幾打去學校, 叫老師call back番我, 我想睇下豬仔有冇lai c c!

老師真攪笑, 佢見滕滕條片片爆晒, 就同佢除左片片, 等一陣姐姐嚟先同佢著番, 點不知滕滕就係呢個時候, 唔出聲靜靜地發功喇! 老師問我, 佢係唔係尋日冇痾過喎, 因為佢冇著片, 一粒一粒咁跌晒落地下, 仲要痾得都幾多下  ! oh sorry, 我同老師講滕滕係咁上下時間就大架喇, 食完茶點, d腸郁嘛, 我跟住個心諗, 你聽日醒目啦, 唔好無啦啦同佢除片喇  !

老師見佢痾左, 就即刻同佢去男孩子個廁所, 不過一入去, 又係話好驚要走, 跟住仲大喊, 足足喊左成粒鐘, 不停咁話要媽me, 要番屋企! 最後老師要比件餅佢食, 佢先肯收聲! 老師同我講, 原來佢都幾餵食架喎, 比左包餅佢食, 就收左聲喇! 唉~ 今日先正式第一日番學, 你隻豬仔就送左咁多金粒比老師, 仲要比老師知道你餵食, 你話你幾鬼唔掂吖  !

老師同我講, 後嚟去小便時, 因為見男孩子個廁所好多學生, 所以佢就帶晒咁多個入女孩子個廁所到, 而呢次, 滕滕反而冇話驚喇! 我問老師: "係唔係女仔廁所個牆上面冇咁多公仔畫左係到呀? 因為豬仔次次一入去男廁, 見到牆上面d公仔就叫住要走, 係咁話驚喇!" 老師答我:係呀! 女仔真係冇咁多公仔架!

死啦, 係唔係滕滕見到d咩呀! 唔可能下下都去女廁架嘛! 我同個fd講左呢個情況, 我個fd話, 如果遲d都係咁, 就轉學校喇!

祝亞媽聰明伶俐!!!

今日同亞媽慶祝birthday, 順便就做埋中秋節食飯啦!

滕滕係芒媽屋企玩完狗, 瞓左一個鐘我地就出去喇, 睇見佢, 就知道小朋友叉一陣電就即刻可以pang pang聲嚟過喇!

食飯途中, 講開老公個亞媽想去旅行, 但係d旅行團就係專搵老人家苯嗰d機構攪架, 一唔講, 老豆就話要講一d忍左兩年嘅嘢, 就係有次佢地去台灣, 原來亞媽就係聽d fd講, 同d fd一斉參加左呢d搵苯旅行團! 老豆話, 去咁多日, 都唔係去旅遊, 而係日日都聽講坐, 嗰d講坐係叫你買佢d保健產品!

唔怪得亞媽去完食嚟唔多出聲啦, 又唔講邊到好玩, 睇到d咩, 原來比人搵左苯!!!

亞媽, 我今年真係要祝你聰明伶俐喇!!!!!!!!!!!!!!!!!!!!!!!!!!!

與mango的第一次!

今日去左芒媽屋企玩狗, 一斉飲完茶我地就上去喇!

滕滕鐘意狗仔, 係我意料中事, 因為佢係街到見到狗仔都會大叫, 不過我冇諗過佢大膽到會錫落去mango到!

錫左一次之後, 好似食過番尋味!

因為跟住又再嚟多次! 嘩~ 你嚇死媽me咩, 仲咩事咁鐘意踢mango呀!

比我想像中, mango仲要細d d ,所以我唔係好怕滕滕去同佢玩!

而芒爸, 比我想像中nice, 唔係好似芒媽講佢咁cool、咁認真! 不過最好笑就係滕滕一見到佢, 就話: 黑忟忟, 好驚呀! 雖然滕滕話芒爸黑忟忟, 好驚, 不過佢耐唔耐就問: UNCLE ANDY 呢?! 芒爸行得快佢又問, 番到屋企睇相, 佢又話張相冇UNCLE ANDY!

請問, 你同UNCLE ANDY 好 friend  咩???

好學唔學!

都唔知係邊到學番嚟架, 滕滕而家食手甲呀!

d手甲, 咬到呢~ 指甲凹凹凸凸, 指甲邊d皮又起晒出嚟! 我已經叫個工人搽左d好苦嘅手指水架喇, 點不知隻豬仔苦都照咬!

唯一搽白花油係可以制止住佢, 因為原來佢好怕白花油d味, 佢覺得好嗅!

我同奶奶講, 滕滕而家都唔知仲乜, 又唔知係邊到學咬手指, 奶奶跟住同我講, 我大姑奶好鐘意咬, 到而家都係! 唔係呀化, 好似過年到而家都冇見過大姑奶, 唔好同我講有DNA喎!!!

進步~

今日又同滕滕去泳池游水, 一落水, 佢同上次一樣都係好驚要攬到實一實, 不過後嚟有個5歲大姐姐係到游呀游, 咁我就叫佢望下姐姐, 睇下姐姐幾叻, 係到踢水!

滕滕見到之後, 就好似開左hill咁, 肯浸個身落水喇  ! 個5歲妹妹聽到我地咁樣讚佢, 佢就好似好鐘意走過嚟我地到, 成日係我地面前游過, 而滕滕亦都好似覺得ok咁, 時不時都浸個身落水!

我都唔明, 上次都大把小朋友都係咁游啦, 上次就死都唔肯, 而今次無啦啦就自己肯去常試!

有時d嘢真係話唔埋, 浸個身落水多幾次, 唔使叫, 佢就又常試瞓個身係到, 但係都唔係太敢! 唔知係唔係個水泡細得济呢?! 但係個水泡係啱佢架, 所以唔知係唔係滕滕重過頭, 個水泡好似承受唔到佢個重量咁, 因為滕滕耐唔耐試下瞓, 但係都好似唔夠安全感咁樣!

沙膽軒!

今日係我陪滕滕番學嘅最後一日, 星期一開始, 我地就要係上校車嗰一刻分手喇, 真係有d唔捨得.........!

番到學校, 都係咁上下啦, 而老滕亦開始大膽左, 老師叫佢, 佢居然當聽唔到喎!

老師已經唔係話"大家同學"或者係"各位小朋友", 而係"靖軒呀! 靖軒呀!", 指明叫佢, 佢都睬你都傻嗰隻! SO 老師個評語就係咁!

你話死唔死吖, 只係個樣識笑有鬼用咩!

今日番學有嘢玩, 做下勞作, 不過滕滕今日好似好眼瞓咁, 有小小扭計叫唔住呀!

到左去廁所時間, 滕滕又係咁, 入到去之後就猛話好驚, 死都要出去, 其實個廁所我都覺得真係有d嚇人, 個廁所唔係dirty, 而係成個廁所灰灰白白咁, d磚上面就畫滿公仔、樹之類嘅嘢, 有d似鬼屋嗰d feel, 所以我入到去個廁所, 都覺得個唔係好舒服, 咁更何況滕滕呢~ 死啦, 我都驚驚地唔知係唔係佢見到嗰d嘢呀!

第二日開學!

今朝滕滕未夠0745, 就自己起左身出嚟搵我! 我真係低估左佢, 因為我仲諗住梳洗完之後先叫佢起身潻!

不過, 今日番學, 就好似冇咁順灘喇! 因為我以為佢會好安靜咁, 點不知同上PLAYGROUP一樣, 又係唔肯坐定定, 叫佢放番好D玩具上堂, 佢居然答話唔好!

一班有6個小朋友, 其餘嗰5個都好似好驚咁冇郁嚟郁去, 唯獨係呢隻豬仔, 好似唔使理你咁, 話行就行, 話走就走!

老師話要去toilet 洗手食茶點, 點不知隻豬仔好似痴頭猛咁, 死都唔肯去, 肯去都要我一斉去! 去第二個課室上唔知咩堂, 佢又唔肯, 又要我去埋! 上上下堂, 佢就話要痾c c, 咁我同佢去toilet啦, 除左褲一坐抵, 佢就話唔痾, 好驚, 要走!

老師話, 陪埋聽日就冇得陪喇, 老公就話星期一唔好理佢, 同佢上左校車就番屋企, 就算去學校睇佢都冇用, 因為都睇唔到(佢嗰個課室冇得望入去)!

睇埋聽日, 唔知會唔會好d呢?! 因為頭先同佢講叫佢早d瞓話聽日要番學, 佢都冇咩抗拒話唔好!  所以希望聽日ok啦!