甲油膠

朋友仔借左部UV燈比我玩甲油膠, 咁我就試下同埋做左幾個測試!

搽甲油膠都有面油, 甲油, 同埋底油, 聽落去照燈都係2-4分鐘, 覺得應該會好快, 不過原來整一對手/腳, 都要半個鐘!

整左都有D似GEL甲, 感覺上唔錯~

不過, 星期六朝早整, 到左星期二, 個甲頭開始花喇!

朋友話佢兩三日就甩, 可以係個邊位到搣出嚟, 而我就5-6日到先可以開始係個邊位到開口!

因為我屋企有成幾十支甲油, 如果轉晒用甲油膠, 咁我D甲油就做晒孤兒仔女, 所以襯住朋友借左部機比我, 我就試下MIX & MATCH喇!

1)我用自己本身嘅底油+甲油搽, 搽完冇等佢乾就即刻搽左甲油膠嘅面油, 跟住即手去照燈! 我諗住更硬去照乾左甲面就以為OK, 點不知原來係唔work嘅, 因為番到屋企, 腳甲d甲油成塊甲油膠"煎"起左, 而裏面d甲油係仲未乾嘅!

2)我淨係用自己d底油, 其餘嘅甲油同面油都係用甲油膠搽完去照燈! 結果係ok嘅, 不過就兩日已經開始有脫離嘅跡象, 即係用自己嘅底油會容易甩出嚟!

3)第三次測試, 底油甲油同面油都係用晒自己本身嗰d, 不過乾晒之後, 就用甲油膠加上面再照燈! 上星期五上午搽, 到今日個指頭就開始有小小花, 但係就冇甩嘅跡象!

睇嚟, 第三次嘅方法係最好, 因為唔會嘥左而家d甲油之餘, 仲可以有光令令嘅效果! 都唔錯!

 

原來我都唔差~

契妹攪結婚足足攪左一年多, 今日終於結左喇!  晨咁早我就出左去契妹到幫手, 原本6:30起身, 但係未夠六點個肚已經唔多妥, 坐左係個廁所到半個幾鐘都唔得, BILL晒冷汗, 真係辛苦到極, 已經覺得今日狀態不佳!

都好彩後嚟刷牙洗面時又開始肚痛, 而呢次終於得左!  成朝都唔敢食太多嘢, 契妹嫲嫲預備左好多點心我都唔敢食, 因為我感覺上好似又想腸胃炎! 去到下午兩點, 個人已經冇晒心機, 因為唔知究竟肚餓定係個胃抽筋, 不過又好好彩, 跟住食左嘢之後個胃都冇再有事喇!

今次做姊妹都算唔錯, 因為契妹同佢D朋友講左, 因為個仔到左之後我可能未必咁幫到手, 所以其他姊妹都好好咁, 成DAY D嘢都只係係咁E叫下我! 咁當然, 上半場我都自願地瞓晒身咁, 因為收得利是, 唔通真係比晒人做咩!

滕滕同老公都成七點先到, 所以係佢地未嚟之前, 我可以攞住個相機四圍影下! 雖然我唔係好Pro, 而我只係想幫下契妹, 佢有d咩情況下個攝影師係影唔到嘅, 就我影下囉, 有d人唔識玩相機嘅, 就以為我好勁攞住部單鏡機影, 但係如果d人係識嘅, 就知我咩料喇!

我成日都話可能係我個樣嘅問題, 我次次幫d朋友係婚宴到做下業餘混吉攝影師嗰時, 更係有d人係唔九理我, 就算我個樣笑晒口好有禮貌咁話同佢地影張相都好, 總係有d人咁撚仆街當我隱形!  我見到其中有個兄弟, 佢老婆帶左個仔嚟, 而個小朋友就呆住望住我個傻樣, 我覺得好得意就同佢傾下計笑下! 如果換轉係我, 有人覺得我個仔好得意而同滕滕講嘢, 我會好有禮貌咁同番對方閑談兩句報以微笑囉! 但係呢個兄弟個老婆, 原來又係一個不折不扣嘅無家教嘅女人! 我同個女人講話佢個仔好得意, 佢係咁望住我, 個女人望都冇望過我, 甚至乎佢連一個表情回應番我都冇!

嗱~ 咁囉! 原來我老豆老母教得我都唔錯囉, 我屋企真係幾有家教架! 同埋, 原來我份人都好nice, 起碼如果有人同我個滕滕講嘢話佢好得意, 我係唔會唔九彩人地囉!

K2 學生照~

滕滕唔舒服, 已經兩日冇番學, 老師打嚟搵人問下滕滕咩事之餘仲同我講要交學生相!  因為星期日要去做姊妹, 所以今晚放工番到去就要做好多嘢, 就係剪髮再加做型照!

舊年嘅問題今年都仲係到, 因為我冇買閃光燈, 所以仍然都仲係有影!

亞媽話滕滕病就唔好影住, 因為好似冇咩神咁, 但係我比老師追喇, 唔影點交相??? 點交相???

睇落去都算OK吖, 我覺得唔差喎, 只係個影執唔到啫, D色彩都OK呀, 咁又唔係申請passport, 要求唔使咁高啦!

呢D人冇撚用!

我表妹, 係十幾年前因為識左條o靚仔, 就成頭家, 連仔老公都唔要就跟人走左, 所有爭銀行嘅錢一概唔理, 一走了之, 等銀行財仔上門追債, 差d就連層樓都比銀行放埋, 都係好彩得姨甥仔個亞嫲攞左成百萬出嚟攪掂先冇事!

表妹做左人口失踪幾年之後就蒲留頭, 初初好低調唔多出聲, 以為佢變左啦, 因為又話學人信佛又學人戒晒煙咁! 但係人生成咁就係咁, 真係唔好諗住人會變囉!

係呀, 以前低晒胸專登走光比d男人昅, 成日專搵人地d老公係到拋眉弄眼嘅表妹, 蒲番頭以為佢做左良家婦女呀??? 點不知都係同左人地個老公生左個仔囉!  我唔肯定係人地老公嚟, 不過, 逢係過時過節, 佢所謂嘅老公一定唔會到囉, 藉口就係話要出差搵食喎!  我真係好想問佢所謂嘅老公個老闆究竟係唐人定西人囉, 如果係唐人, 咁點解過農曆年冇假放??? 咁如果老闆係西人, 借問聲點解新曆新年又係冇假放嘅??? 而且, 就算忙極, 一年都會出現一兩次卦, 咁又點解幾年都只係見過一次, 而嗰一次就係表妹個亞媽死嗰次嘅!!!

表妹蒲番頭, 唔知以為佢好景, 因為帶住個名牌袋, 又戴住隻大粒石介子! 我自問都唔係好識睇, 但係個A貨, 我都仲有能力一睇就知係咩料, 而隻介子, 唔該比多小小錢去買粒堅D架啦! 成兩卡咁大粒, 想睇唔到係假嘅都唔得啦!!!

最初蒲番頭就好低調唔多出聲, 而家大家都接受番你, 就唔該唔好又嚟玩火, 係到煽風點火, 仲要張個責任推左係人地身上而且仲扮可憐唔關你事! "拮起個屎忽我就知你想點"呢句嘢係FB一出, 就即刻封鎖左我! 其實我唔介意囉, 因為如果唔係因為身有屎, 又點會咁憎我啫~ 我係WHATSAPP又出, 都係WHATSAPP BLK埋我! 其實我真係唔介意佢唔LIKE我, 因為呢D人死性不改, 跟本都唔洗恨!

教個仔話我老豆嗅(話我老豆食煙嗅), 我又想問下佢, 以前佢都係食煙, 唔通會唔嗅??? 佢逢係男人都有一手, 唔通佢又好香??? 落仔都落唔少, 我又唔知佢又有幾香呢???

呢D人死性不改真係啱, BLK左我仲可以笑住咁同我講嘢, 仲要當住我面話睇過我FB D嘢(OPEN左嗰D), 乜佛祖教D門徒對人咁撚假架??? 我老母都係信佛, 佢真係有好心腸, 唔厄人, 睇下只會覺得人地未必係咁諗, 但係我表妹, 專係諗埋D嘢去搵人D錢, 幾百蚊都屈得就屈! 幾十蚊都唔想幫佢自己細佬比! 就連百幾蚊都搵個家姐著數! 我想問, 佢唔係以為厄到自己就可以厄到人嘛, 同自己講以為改左做良家婦女, 就當人地都以為佢係良家婦女呀???!!!

次次佢做攪手約食飯, 到最尾都係嗌交收場, 唔好以為我唔知, 佢係咁同佢老豆講呢個又唔想嗰個又唔想, 攪到表叔以為個個麻撚煩就下都唔得, 其實個事實跟本都就唔係我表妹所講咁! 到我攪時, 我表妹就扮雞仔唔出聲, 我食飯叫餸時, 我表妹就扮到好冇所謂!  我FEEL到某程度上表妹忌我, 因為我話咩時佢永遠表面上都話冇問題, 我用嘅手機又話好, 我講乜春都話我啱! 但係, 你唔好以為我唔撚知你BLK左我先得架!  定係佢以為我真係咁戇九呢??? 如果我真係咁戇九九, 就唔會知你拮起個屎忽啦!

表妹, 你D扮嘢能力真係永遠比唔上, 因為我唔LIKE就即吊啦, 唔通仲好似你咁番屋企搵紙MARK抵呀! 




 

講數!

我已經開始覺得滕滕有自己意思, 因為而家好多時佢都同我講"不過我想XXX喎!"

所以好多時我而家都會問左佢好唔好先要佢做! 雖然我知, 不過D工人就一定唔會知, 亦都FEEL唔到!

好似有一日, 我聽到滕滕係TOILET到鬧個工人, 咁我放工番到屋企問滕滕究竟仲咩事又鬧人, 點不知滕滕居然同我講: "乜你聽到架?!" 

滕滕同我講, 原來係工人唔比佢自己沖涼, 而工人就話佢唔肯關水係到玩水喎! 就係因為滕滕要自己沖涼, 而工人唔比, 所以滕滕就鬧佢喇!

而我, 就我同個工人講, 滕滕可以自己沖涼, 你唔好攪佢, 不過佢沖完你就要同佢檢查, 而滕滕就自己沖涼, 沖完就姐姐CHECK好晒OK喇, 就要關水, 唔准玩水! 講完就問下各方面有冇問題, 冇問題就散會!

我諗未來嘅日子都會有好多呢D咁樣嘅情況, 因為個工人而家仲當滕滕係BB, 乜嘢都聽晒佢講, 唔可以SAY NO! 而滕滕就成日打嚟話姐姐唔比佢咁又唔比佢咁, 但係佢又想咁喎~  所以, 都要諗諗點樣去同個工人講佢應該點做喇.........

摷皮~

我一向對任何人都採取自願制, 因為我知道迫係冇用!

今日我同滕滕差唔多十一點先起身, 早餐我地都係一樣食左塊面包, 滕滕就搽榛子醬, 而我就煎左蛋去夾! 正路應該唔會好飽, 係可以食LUNCH架, 所以去老人院探訪前, 工人整左通粉比我同滕滕食!

不過, 我呢隻豬仔, 越嚟越有主見, 佢同我講佢真係唔肚餓, 我問左佢三次, 佢答我真係唔餓佢唔想食! 咁好~ 我講明, 唔食係可以, 不過如果肚餓就只可以飲水, 因為唔會咁快有嘢食, 要等佢老豆嚟接我地成四點幾先可以去食嘢!

到三點左右, 我已經耐唔耐問滕滕佢餓唔餓, 而佢就寧頭, 但同我講佢口渴! .........口渴, 我心知佢已經開始肚餓, 不過條友仔知道我之前講過唔食嘢就只可以有水飲, 所以佢心口有數, 就算同我講佢餓, 我都唔會比嘢佢食!

係老人院同D公公婆婆吹左陣水之後, 就開始大圍節目, 介紹每個小朋友之後就會表演下唱下歌仔跳下舞, 而滕滕係第二個, 而我地唱完歌之後, 滕滕開始扭計! 除左佢一歲時隻腳咬到豬頭痕到不得了嗰次係佢人生第一次扭計, 而今次就係第二次! 佢開始唔肯企, 要我抱, 呢樣話唔好嗰樣又話唔好, 所以我拉左佢係後面問佢究竟想點, 仲係扮執手袋之餘就唔覺意攞個CAKE比佢望到, 係呢個moment, 佢知道我係專登, 跟住就開始喊喇!

我問佢仲咩事無啦啦喊! 仲咩事喊先??? 佢唔答我喎~ 我再問佢: 係唔係好肚餓? 係唔係餓到冇晒力吖? 係唔係肚到不得了呀? 今次真係摷皮喇, 佢即刻答我係, 而且仲好慚愧咁點頭!

見佢餓到咁, 唔通我真係唔比佢食咩, 所以比左嚿cake佢食之餘, 仲係佢一路食就一路問佢下次仲敢唔敢死都話唔食嘢吖嗱! D 婆婆見到佢喊, 都幫口叫佢下次唔好唔食嘢喇!

今次, 真係肚到摷晒皮喇~! 所以去完探訪, 我都帶左佢去麥當當食番餐勁嘅!

 

好卦住~

呢個肥滕滕真係可能太耐冇比我罰過甘嘅, 所以又馬騮上身喇!

今日三老又一齊入嚟, 所以一番屋企, 當然都係第一時間聽到我個仔今日有幾咁乖啦!

食飯時我已經再三警告叫佢好快D食晒碗飯, 如果唔係三老走晒之後, 佢就會好大獲!

飯! 已經比我估中左係食唔晒, 不過唔緊要, 到左限定時間我都係一樣照收走冇得食之餘, 仲連杯燈汁都比我飲埋! 對住三老喊都冇用!

食飯唔好好地食晒都不特止, 仲搵玩具掟亞公叫亞公走喎! 呢個行為, 都唔需要講任何嘢就已經可以罰! 所以三老走左之後, 唔好諗住有故事書可以講OR可以睇電視喎, 即刻要去刷牙瞓覺, 仲要係自己瞓, 我唔陪佢瞓!

我一句聲都冇出, 滕滕已經知道lai嘢, 一見我熄燈出房, 佢就即刻就喊晒! 喊左幾個字, 佢落床開左門, 慕求想間房冇咁黑(因為佢一路喊話好黑好驚, 但係我都冇理佢), 但係我知佢開左度門之後, 我又走去關門! 以為佢喊得攰會瞓, 點不知喊左成個鐘都仲喊緊, 喊到我都好眼瞓要番入房瞓!

但係一入去見到佢.........

佢攬住左老公條沙灘褲同埋件衫係到一路抺眼淚! 一見到佢攬住老公d衫褲時, 我已經忍唔住係到笑, 我問佢仲咩你攬住爸B d衫呀, 佢一路喊住咁答我: 我好~ 我好~ 卦住爸B呀~嘩嘩嘩嘩~~~

自作自受

呢個友仔, 一入屋, 就見到幅牆比佢畫花左! 細時都唔會走去畫牆, 都唔知仲咩事無啦啦咁大個先嚟畫! 我唔鬧佢~ 我只係攞左嚿膠擦比佢, 叫佢擦番甩佢!

條友仔用水筆畫落牆到, 我當然知道膠擦係擦唔甩, 不過我都要佢擦左15分鐘!

擦完15分鐘之後, 佢就喊住同我講擦唔甩! 得~ 膠擦唔甩, 就用布囉! 因為之前原來張sofa都有, 只係比姐姐抺甩左! 所以我又要佢用布去抺左15分鐘!

老公同我講, 原來係我番嚟之前, 滕滕叫佢老豆唔好話比我知佢畫花左幅牆, 不過老公就答佢: "若要人不知, 除非己莫為!" 聽完老公講, 真係笑到我死, 因為我話洗唔洗咁深呀! 我同滕滕講, 叫佢做每一樣嘢之前都要諗下啱唔啱先好做, 呢個行為我覺得以一個4歲嘅小朋友嚟講已經好難, 老公仲要話若要人不知除非己莫為喎, 大佬~ 點明呀

老公問我見到個仔喊成咁會唔會心痛喎, oh sorry, 我一d都冇, 因為我要佢知道做每一樣嘢都要承受個後果, 唔係話你想咁做就去做, 都要理下人地感受, 會唔會影響到人地!  我唔會因為佢開心而樣樣嘢尤得佢去做囉~

 

豐富的午餐!

遇著d好客, 其實就真係好好! 今次嚟HK呢個客, 大家都係第一次見面, 約左係會展大門等, 等緊嗰時都有D緊張, 可能太耐冇見客, 又太耐冇talk english喇!  一路以嚟, 都覺得呢個客年紀應該唔細, 因為佢好攪笑, 成日半夜send e-mail比我, 反而日抖就好少見人! 同埋, 以為佢年紀唔細, 應該係自己公司嚟, 因為只有d工作狂先會半夜仲做緊公司嘢, 同埋係老闆之一, 如果唔係, 跟本就唔會咁上心, 更何況佢上手個同事, 都唔會好似佢咁, 半夜三更都仲做公司嘢!

點不知一見面, 原來完全係另一回事!

睇佢d衣著(女), 都唔似係一個年輕人, 不過見到真人, 其實都好後生, 個人又好nice, 只不過係老討d! 一路食飯一路傾計, 我都問佢點解成日半夜都唔瞓仲係到check mail, 跟住個俄佬就答我, 佢唔使瞓, 一日瞓4個鐘就ok, 佢唔係一個正常人嚟!  原來係咁!

因為請客食飯, 老闆落左order一定要食呢幾樣嘢: 鮑魚, 蟹皇魚翅, 花竹大蝦碌, 同埋燕窩!

嘩~ 真係開心啦, 樣樣都冇得頂嘅! 見客有好有唔好, 好就係會有好嘢食囉! 不過, d西人真係唔識貨, 隻鮑魚, 個俄女只係食左6份1!!! 碗蟹翅只係食左一半!!! 睇住個waiter就咁就收走左唔要, 我對眼當堂跟住隻鮑魚走囉!!! 靚女, 你真係唔知只係隻鮑魚幾多錢囉!!!

而家, 仲有一個客可能會嚟hk, 而呢個客就仆街喇, 人又串又以為自己好勁係大客! 每年聖誕我寄禮物比佢, 多謝一聲都冇回, 正一家產嚟! 所以佢次次話嚟我都極之唔想見佢, 不過唔見唔得呢! 唯一好處, 就係又會有餐食囉.....

講道理~

平時我一向都會同滕滕講道理, 講完道理之後仲一定要佢解釋番我講嘅嘢一次, 冒求係要佢真係明白! 而且仲要係不厭其煩咁講完之後臨瞓前再同佢傾下究竟佢當日做嘅錯事明唔明自己錯D乜!

久而久之, 滕滕應該係張我呢套嘢入晒腦, 而且仲用番係我身上~

話說今朝去拜完亞婆去等緊位飲茶之際, 因為太多人等, 咁我地就去左許留山到食下甜品先! 一坐抵滕滕就即時攞左本menu嚟睇, 而我, 就係滕滕手上攞左!  每個做亞媽嘅, 都係第一時間諗住叫d好嘢比d仔女食, 我, 都一樣, 都係睇下滕滕有d咩啱食!

我一路睇緊本menu, 滕滕就開始講嘢: "老師話唔可以咁架喎，如果想睇係要排隊架(已經開始斜啤我), 一個睇完跟住另一個， 唔可以搶人地D嘢架，如果你下次再係咁，信唔信我真係唔彩你吖嗱!" 佢講完左呢段說話之後, 我就已經忍唔住笑, 寧左轉面笑左成10秘, 跟手即刻比番本menu佢, 仲同佢講(好溫柔但好串咁講): "好呀~ 我比番你吖! 咁你睇下有d咩食係你鐘意食架! 你睇啦! 睇啦!"

叫左幾次, 隻豬仔都唔敢攞番本menu, 死都話唔洗喇!

結果, 我幫佢叫左個心太軟~

食完喇, 我就問滕滕係唔係好好食呢~ 當然啦, 媽me一定係叫d最好食嘅嘢比你食! 但係如果頭先你攞左本menu, 咁我又點叫呢! 我係你到攞本menu嚟睇, 都係想睇下有冇呢個朱古力啫~!

今次我過左骨, 我諗下次, 滕滕應該會同我講: 如果你想睇, 都可以問下我先架嘛!

呢個肥滕滕, 好明顯呢樣駁咀駁舌嘅性格, 一定係似我囉  !

開心~

呢兩日好多私人嘢做!  因為.........

尋日同今日, 我買左5支消毒藥水要嚟洗衫, 其實本身我都有用開消毒藥水, 但係我用開呢隻牌子好本身好搶手, 而家呢個時候, 就仲難買, 所以我一次過掃左5支!

本身我有小小潔癖, 成日都覺得隻手唔乾淨, 而係屋企或者公司附近買滴露嗰隻細包裝嘅消毒濕紙巾都唔平, 成八九蚊一包, 而且仲缺緊貨, 所以叫亞媽幫我係深水埗d藥房去搵! 結果, 係我意料中事, 因為加左價! 搵到一間$6/包, 又比我掃左30包! 連埋我今朝係車仔檔到買左10包 swashes 嘅消毒濕紙巾, 同埋屋企仲有20包都係消毒, 我估應該都可以用到一段時間!

上個星期五買左個電話比舅父, 星期一打算去開張無限上網嘅電話卡比佢,不過D電話no.核突到跟本都揀唔落手, 結果今日終於揀到個好小小嘅老no., 同埋約左舅父今晚放工時間可以成套嘢送比佢!

好朋友叫我幫佢淘番嚟嘅髮夾終於都今日到斉, 所以今日點左馮小姐去幫我寄, 寄完唔使佢番公司, 擺明so佢可以早d收工, 所以佢開心時我又開心, 因為我唔使自己上去郵局!

其實做完左咁多嘢, 又滿足晒我要買嗰d嘢, 個人真係好開心, 尤其係送左個電話比我舅父! 因為我舅父除左我地一家親人之外, 人生就仲有只得一人個朋友!  真係多都冇! 見佢睇到我同亞媽細佬同我老公係到講緊d智能電話時, 從佢個表情就知佢好想有一個! 細個時問舅父攞錢, 佢從冇托我手踭, 而家佢老喇, 耐唔耐比錢佢買下嘢食, 送下電話比佢我都可以afford得起嘅~

開心的一天~

真係差D唔記得左!!! 可能因為已經約左好耐, 所以如果唔係小B媽提一提, 真係唔記得左今日去玩騎馬仔!

太早起身真係比較有D難度, 因為滕滕而家已經知道聽日洗唔洗番學, 所以佢一知道第二日唔使番學的話, 之前嗰晚想早D瞓都難!

因為我已經知道, 太早跟本都起唔到身, 所以我一早就同小B媽講我地十一點鐘先嚟到! 九點叫隻肥滕滕, 叫左幾次都唔想起, 原本諗住九點九出門口, 結果都要十點先可以!

今次騎馬仔嗰到, 係元朗八鄉, 如果老公放假車我地入去, 我估都唔知會唔會迷路, 因為係錦上路打的入去, 都要成五十蚊!

一去到, 滔滔佢地已經睇完介紹, 而我地去到就剛剛係騎馬仔環節! 未上馬, 滕滕已經不停咁話好驚好驚同好驚, 又話要我一齊同佢去! 如果可以兩個人上馬, 你估我唔想咩, 我夠想騎下啦!  結果滕滕上左馬之後, 我就係旁邊陪佢一路行, 一路行就一路同佢傾計, 又講下隻馬馬食左早餐未, 我又問下滕滕點解隻馬馬一路下, 佢(滕滕)個PAT PAT點解又會跟住郁! 氹下氹下又引下佢笑, 之後就開始唔驚喇, 仲同我講佢唔想落馬喎! 亞仔, 呢到我估大部份小朋友都唔想落馬, 唔係得你一個囉! 結果, 拖住隻馬嗰個伯伯, 可能見到我同滕滕嘅對話, 佢搭咀同我講馬馬一日食6餐之餘, 仲細細聲同我地講唔好出聲, 因為佢醒多一個圈比我地行!

騎完馬, 跟住就開始BBQ喇, 係BBQ期間, 滕滕、滔滔、仲有滔滔個同學仔一齊係到玩, 仲玩到痴左線! 見到佢地三個傻左咁, 真係覺得佢地好可愛呢~

B完一陣, 就去餵羊喇! 隻豬仔今次又冇話驚喇喎, 仲好主動潻!

玩到差唔多四點都差唔多走, 好彩一行出去, 就有的士喇! 出到去錦田, 老公都未到, 滕滕就叫我抱佢, 佢話佢好攰呀! 更係啦, 玩咁耐都冇停過! 到老公嚟左接左我地, 上車一分鐘唔洗, 就已經......

回鄉去~

見老豆身體每況愈下, 又撞啱老公係復活節放假, 所以我就同老豆講番鄉下行一轉, 因為老公已經講左好耐, 好想帶滕滕番去比d親戚見下喎~

我知道好多時都話唔埋, 咁既然而家可以做, 咁就盡量滿足下我老豆, 雖然有時佢都係衰人一個, 不過見佢而家化左, 咁就算啦!

第一日番到去, 落雨落狗屎咁, 食完中午飯, 入左村就開始落喇! 唔可以出屋, 好彩有隻雀比滕滕吹下水~ 

聽到滕滕同隻雀係到講嘢, 就好似我同滕滕講嘢咁, 因為佢係到不停咁話隻雀: "點解你咁樣嘅啫~ 話極你都唔聽! 我同你講緊嘢, 你聽唔聽到呀!" 早知就錄左佢啦, 笑死我囉 !

另外一個活動, 就係玩麻雀! 其實麻雀對佢嚟講真係冇咩好玩, 不過我呢個媽me又唔記得帶uno上去, 所以就搵麻雀嚟切屋喇! 一間房係遊戲室, 一間房係飯廳, 一間房係睡房, 而一間房係要嚟泊車嘅!我以前細個, 就係張d麻雀嚟咁玩架喇, 因為屋企細, 成日夢想間屋可以有幾多間房, 邊間房要嚟做咩嘅! 你話如果係真, 就真係幾好呢~!

呢日, 就真係悶到抽筋囉~! 好彩食完飯八點就番酒店喇! 見滕滕瞓到咁, 就知佢有幾攰!

第二朝, 仲叫極都唔起身, 乜張床好舒服咩?!

第二日天氣就好好多喇, 起碼冇落狗屎, 只係間唔中有微雨, 所以都有時間可以係條行到行下~

仲可以去睇雞雞!



以前我細個時, d雞係通村走架, 而家就圍住晒, 因為話有人偷喎!

我都真係幾掂, 第二朝起身, 個喉嚨又腫左, 咁啱酒店隔離有間人民醫院, 冇辦法都要迫住去睇, 仲鬼死咁多藥, 盛惠人仔31蚊!

呢兩日, 我好悶, 滕滕就仲悶, 因為第一日都仲話有個姑姐仔同佢玩下, 第二日又再孤獨一個咁玩車!

好彩有個廣場係有電動車比佢揸下, 玩左大半個鐘, 如果唔係我估下次叫佢番鄉下都未必睬我喇!

但係又奇喎, 我問滕滕悶唔悶, 佢話唔悶, 仲話唔想咁快走! 不過我估佢唔想咁快走, 係因為有三老之餘仲要我地兩個日日夜夜咁陪住佢!

講真, 我都想放耐d, 不過可惜聽日要番工呢!