今日我同滕滕差唔多十一點先起身, 早餐我地都係一樣食左塊面包, 滕滕就搽榛子醬, 而我就煎左蛋去夾! 正路應該唔會好飽, 係可以食LUNCH架, 所以去老人院探訪前, 工人整左通粉比我同滕滕食!
不過, 我呢隻豬仔, 越嚟越有主見, 佢同我講佢真係唔肚餓, 我問左佢三次, 佢答我真係唔餓佢唔想食! 咁好~ 我講明, 唔食係可以, 不過如果肚餓就只可以飲水, 因為唔會咁快有嘢食, 要等佢老豆嚟接我地成四點幾先可以去食嘢!
到三點左右, 我已經耐唔耐問滕滕佢餓唔餓, 而佢就寧頭, 但同我講佢口渴! .........口渴, 我心知佢已經開始肚餓, 不過條友仔知道我之前講過唔食嘢就只可以有水飲, 所以佢心口有數, 就算同我講佢餓, 我都唔會比嘢佢食!
係老人院同D公公婆婆吹左陣水之後, 就開始大圍節目, 介紹每個小朋友之後就會表演下唱下歌仔跳下舞, 而滕滕係第二個, 而我地唱完歌之後, 滕滕開始扭計! 除左佢一歲時隻腳咬到豬頭痕到不得了嗰次係佢人生第一次扭計, 而今次就係第二次! 佢開始唔肯企, 要我抱, 呢樣話唔好嗰樣又話唔好, 所以我拉左佢係後面問佢究竟想點, 仲係扮執手袋之餘就唔覺意攞個CAKE比佢望到, 係呢個moment, 佢知道我係專登, 跟住就開始喊喇!
我問佢仲咩事無啦啦喊! 仲咩事喊先??? 佢唔答我喎~ 我再問佢: 係唔係好肚餓? 係唔係餓到冇晒力吖? 係唔係肚到不得了呀? 今次真係摷皮喇, 佢即刻答我係, 而且仲好慚愧咁點頭!
見佢餓到咁, 唔通我真係唔比佢食咩, 所以比左嚿cake佢食之餘, 仲係佢一路食就一路問佢下次仲敢唔敢死都話唔食嘢吖嗱! D 婆婆見到佢喊, 都幫口叫佢下次唔好唔食嘢喇!
今次, 真係肚到摷晒皮喇~! 所以去完探訪, 我都帶左佢去麥當當食番餐勁嘅!
但係講真...唔肚餓又點食得落嘢呢?
回覆刪除[林林回覆04/29/2013 11:07:07]因為佢太開心同你一齊囉
[版主回覆04/26/2013 16:34:47]就係因為佢星期一至五都係屋企, 所以放假時就想同佢去下街囉, 點不知一出去佢就OUT OF CONTROL啫~
[林林回覆04/26/2013 15:21:11]係屋企好悶喎~~~
[版主回覆04/26/2013 14:19:42]好難.......唔同佢出咁多街就好小小~
[林林回覆04/25/2013 11:28:18]控制下佢情緒
[版主回覆04/24/2013 16:06:02]佢一放完幾日假, 尤其我同佢一齊放嗰D, 佢就好開心, 跟住就越開心就越曵~
[林林回覆04/24/2013 12:29:49]無奶油咁細個就會玩創個心架，點解呢?
會唔會旅行個幾日佢悶得滯呀?
[版主回覆04/24/2013 11:01:12]佢自從復活節番左鄉下旅行幾日之後, 佢就曵左好多, 又打人又鬧人又駁多左咀~
[林林回覆04/24/2013 09:48:52]哦~~~咁就抵罰啦
[版主回覆04/23/2013 16:30:50]胃口唔好.......睇下比粒糖佢, 佢一定唔會話唔食囉~
[林林回覆04/23/2013 16:07:26]咁可能胃口唔好呢...
不過佢應該以後都唔敢喇...
[版主回覆04/23/2013 15:36:21]咁未夠十一點只係食左個包, 又點會飽呢, 而且都成點鐘, 跟本就要食嘢! 你話好飽就話食唔落啫, 咁跟本只係一塊包, 又點會唔餓喎~
咁都得
回覆刪除[版主回覆04/29/2013 16:52:04]佢之前叫我唔好迫佢臨瞓前痾V V嘛, 咁食嘢都唔會迫佢啦!
結果咪自己攞嚟囉~