我知道好多時都話唔埋, 咁既然而家可以做, 咁就盡量滿足下我老豆, 雖然有時佢都係衰人一個, 不過見佢而家化左, 咁就算啦!
第一日番到去, 落雨落狗屎咁, 食完中午飯, 入左村就開始落喇! 唔可以出屋, 好彩有隻雀比滕滕吹下水~
聽到滕滕同隻雀係到講嘢, 就好似我同滕滕講嘢咁, 因為佢係到不停咁話隻雀: "點解你咁樣嘅啫~ 話極你都唔聽! 我同你講緊嘢, 你聽唔聽到呀!" 早知就錄左佢啦, 笑死我囉
!另外一個活動, 就係玩麻雀! 其實麻雀對佢嚟講真係冇咩好玩, 不過我呢個媽me又唔記得帶uno上去, 所以就搵麻雀嚟切屋喇! 一間房係遊戲室, 一間房係飯廳, 一間房係睡房, 而一間房係要嚟泊車嘅!我以前細個, 就係張d麻雀嚟咁玩架喇, 因為屋企細, 成日夢想間屋可以有幾多間房, 邊間房要嚟做咩嘅! 你話如果係真, 就真係幾好呢~!
呢日, 就真係悶到抽筋囉~! 好彩食完飯八點就番酒店喇! 見滕滕瞓到咁, 就知佢有幾攰!
第二朝, 仲叫極都唔起身, 乜張床好舒服咩?!
第二日天氣就好好多喇, 起碼冇落狗屎, 只係間唔中有微雨, 所以都有時間可以係條行到行下~
仲可以去睇雞雞!
以前我細個時, d雞係通村走架, 而家就圍住晒, 因為話有人偷喎!
我都真係幾掂, 第二朝起身, 個喉嚨又腫左, 咁啱酒店隔離有間人民醫院, 冇辦法都要迫住去睇, 仲鬼死咁多藥, 盛惠人仔31蚊!
呢兩日, 我好悶, 滕滕就仲悶, 因為第一日都仲話有個姑姐仔同佢玩下, 第二日又再孤獨一個咁玩車!
好彩有個廣場係有電動車比佢揸下, 玩左大半個鐘, 如果唔係我估下次叫佢番鄉下都未必睬我喇!
但係又奇喎, 我問滕滕悶唔悶, 佢話唔悶, 仲話唔想咁快走! 不過我估佢唔想咁快走, 係因為有三老之餘仲要我地兩個日日夜夜咁陪住佢!
講真, 我都想放耐d, 不過可惜聽日要番工呢!
好彩你唔記得有UNO都記得帶車仔比滕滕玩
回覆刪除[版主回覆04/08/2013 16:22:29]都唔係會定D, 只係冇咁悶架咋! 因為佢玩車都係玩得比較耐小小, 過一陣就要轉下另外一D花臣!
[林林回覆04/05/2013 09:40:44]哦!!!有車仔陪住係咪會定啲架?
[版主回覆04/03/2013 14:03:24]你唔知咋, 車仔係每次出街都必備架!
hahaha 你都係用另一個方式話啊仔, 如果唔係似你架啦hahaaha
回覆刪除[版主回覆04/08/2013 16:21:40]好難去搵第二個方式去教佢喇喎~
你都好大膽, 夠薑在大陸睇醫生。
回覆刪除你老豆咪開心都飛起, 帶個乖孫巡遊成條村?
[版主回覆04/09/2013 10:37:29]我知我老豆咩事, 佢而家身體開始退, 我今次因為肯同佢番去, 都係因為呢個原因! 我亞媽都睇到我老豆係咁!
[村姑 C 9 仔 *.*回覆04/09/2013 09:47:15]咪亂 up 啦你!
[版主回覆04/08/2013 16:20:35]我本身唔想睇, 只係想去藥房執藥, 不過佢睇醫生個過程十分之簡單, 只係用燈望一望我喉嚨就OK喇(真係咁求其!!!) 同埋, 我冇得揀, 一係就繼續喉嚨痛, 一係就駁一駁去買消炎藥食!
我老豆, 未去都已經同我講左幾次佢今次真係好開心! 所以大吉講句, 如果佢真係瓜, 真係死而無憾喇!