有趣~

同亞爸亞媽增值左個電話PLAN做無限上網, 因為想有時可以SEND D相同片比佢地睇, 亞媽知道我同佢改左做無限之後, 就好似好開心咁, 因為佢之前話成日想上網我都冇幫佢整, 因為教佢用WIFI又一定唔記得, 教佢"因"住嚟用就一定仲難, 原因係佢一定唔會識"因"同識睇(因為SMS都唔識睇)!

而家D無限PLAN咁平, 佢又冇約在手, 所以就同佢轉左佢囉(查實我自己都唔係無限)!

點不知今日放工搭緊車番屋企之際, 佢無啦啦whatspp我: 你好! 你好!

哈哈, 一見到我就知佢身痕啦! 咁咪回應下佢囉!

同亞媽whatspp左一陣, 感覺幾好, 唔錯唔錯! 不過遲d whatsapp要收費, 就要搵過另外一個apps去教佢地用!  因為我一比, 就要比4部錢嘅費用, 話就話4個電話加埋都係32蚊一年, 但係有d唔使錢嘅, 點解唔用嗰d唔使錢而要去比錢咁戇交呢!

等!

等了又等! 真係等到火撚滾!!! 其實, 有冇人知道, 我平時唔想成日都咁燥, 但耐何點解D人個撚個都咁撚樣嘅???

11月, 我搵番滕滕出世時訂傢俬嗰間公司, 因為我想整過間房, 整過D柜同埋床! 搵番呢間嘢嘅原因, 係因為佢地跟得好, 同埋個老闆有諗頭, 我想要D diu轉嘅位, 佢都明白我講乜, 所以就搵番佢!

老闆當時拍晒心口同我講12月尾一定交到貨, 所以我就信佢, 12月就追佢比圖紙我! 點不知追下追下, 追到12月中12月尾都未比到我!

到1月頭, 我開始火嚟! 係1月頭! 講真, 我知自己已經好忍得下, 因為我冇打去小佢! 但係已經一月, 我真係忍無可忍!

我知道就嚟過年, 會好忙, 所以我已經迫佢要佢1月中交貨, 結果, 一個星期推一個星期! 之前16号, 跟住23号, 今日, 就同我講要3号!

我想! 我想小佢老味囉!!! 呢d人, 真係好聲好氣同佢講唔得嘅, 係鐘意我下下打去問佢"大哥, 究竟你想點"先安落!

厄人真係叻~

 

上個星期五, 滕滕一放學就打電話比我, 佢話老師送左隻"德德豬"比佢!



係個CAM到, 我以為係隻公仔, 番到屋企先知, 原來係一個錢罌!

滕滕比我睇時已經急不及待咁問我攞錢要放入錢罌到, 咁好啦, 每日比一個COIN佢(佢"嚴"少囉~)!

點不知今日放工, 老師打電話嚟話我忘記左簽張回條比佢! 更係啦, 尋日我地去左賽車, 邊記得要睇回條袋啫!  所以一番到屋企, 就即刻攪掂張回條先食飯喇!

我一睇, 原來係有目的架! 你估真係咁好, 想教D小朋友儲錢? 哼~! 講笑! 原來, 個錢罌係比佢地帶番嚟比我地入D錢落去做捐款架!

已經過左半個學期啦, 要捐款都唔係未試過, 使唔使用埋咁樣嘅招數呀!!! 教D小朋友番屋企問爸爸媽媽攞錢入錢罌唔係儲錢而係捐款, 好dirty囉呢個手法! 滕滕已經3日問左我攞錢入錢罌架喇, 不過睇完張回條我就同佢講, 原來係要比番老師架!

張回條好含糊, 佢話要攞番學校, 但係又冇寫係張d錢倒番出嚟攞番學校定係成個錢罌攞番學校!  我唔知究竟想點囉! 而滕滕就好無奈咁問我, 點解要攞番學校嘅?! 

我答滕滕一個迷, 真係一個迷囉!  

正~

我d皮膚, 一入秋就已經即刻feel到, 因為一乾燥我沖完涼就會身癢!

以前年年用開dove粉紅色特潤, 今年唔出時, 我都唔知點算!

有人介紹我用左呢支沐浴露, 用完真係唔介紹比人真係唔得!

原裝日本入口, 好香奶味, 沖完真係唔會身癢喎, 仲好過支dove! 

 

好好玩呀~!

係我, 唔係滕滕, 期待已久嘅揸車, 終於今日去玩喇!



其實知道個場咁細, 真係有小小失望架! 因為都唔係有d跑道係到比佢地揸, 而係一個吉左嘅office係地毯上面貼d膠紙就當係賽道喎~

Total 個半鐘, 之前成粒鐘就係到介紹埋d無謂嘢, 又坐下車影下相, 其實就得半粒鐘揸車!

我知道滕滕已經好心急, 因為佢係到搣手指, 搣到d手皮爆晒缸!

好喇, 有得玩喇!

而且仲有得比賽!  其實比賽係乜佢都未知! 佢只係知道我地係到猛講"加油"! 其實, 仲咩事加油呢???

好攪笑咁, 就比佢攞左第一名!

呢張相, 係我係到"哈哈哈", 咁佢先交足戲咋  !

玩完, 仲一大班人去食飯! 而滕滕就同小b & 滔滔就玩得好開心!

其實, 講真, 其他嗰d叫咩名, 我都唔係好知囉~

吃不消~~~

 

好開心係團購到見到個化妝袋, 因為係紫色架!!!



一心已經諗住攞左番嚟之後可以點用呢~!

點不知, 個袋, 好很大!!!

我估唔到個袋仲大個罐蕃茄薯片!

放左落手袋, 就好似帶左成筒濕紙巾出街, 好很具!

感覺上, 好難吞, 事實上, 好很具, 放左落手袋, 就已經冇位剩囉...........

暗瘡~

呢期滕滕好鐘意畫人, 有時畫下佢老豆, 有時畫下小朋友, 而今次嘅主角, 就係我!

原本副畫冇咁多嘢, 塊面又唔係黑左一半! 不過, 條友仔畫下畫下, 無啦啦就畫花左塊面, 仲係兩隻眼中間畫多左一大粒黑色嘢!

我問滕滕, 仲咩事對眼中間有粒咁大粒嘅黑色嘢, 係咩嚟嘅!

點不知佢答我: 發炎吖嘛~ 所以咪有囉!

發炎  ??? 我都未試過生咁大粒暗瘡係個額頭到, 仲咩事發炎先  !!!

快!

而家D嘢, 真係其實好貴! 呢杯咁細杯嘅苦茶, 從來都冇諗過, 係要成28蚊杯!  我問亞姐, 係唔係飲完即日就好番架???

星期一晚, 滕滕成晚都塞鼻, 我就已經知佢鼻膜發炎脹晒, 我怕佢連喉嚨都發炎, 所以我就成晚耐唔耐就摸下佢睇下佢有冇發燒!  捱左一晚啫, 就開始牙肉腫, 唔到你唔想話自己開始年紀大都唔得!

唔想去睇醫生, 因為只係牙肉腫啫, 就去買左杯苦過Dee Dee嘅苦茶飲! 亞姐話喎, 呢杯嘢消炎止痛架!

飲左兩day, 唔覺有咩分別, 仲要兩邊膊頭開始攰攰地! 28蚊x2=56蚊, 真係嘥晒我d錢! 亞姐檔嘢冇料到!!!

見唔對路, 今晚放工係屋企下面間藥房配左包藥!

成惠40蚊!!! 食左一次, 就開始feel到d牙肉冇咁腫, 真係同打左支針差唔多, 夠快!

可能樓下亞叔夾我, 所以好多時知道想嚟料, 我就搵亞叔執番劑藥, 兩日唔得, 就食夠3日, 真係仲正過去睇醫生呀~!

目標/方向/希望.............

生左個小朋友出嚟, 做亞媽會想點呢???  好多人更係會話, 想自己嘅仔女身體健康, 聰明伶俐啦!

身體健康, 我估99.9999999%都係做亞媽想, 而嗰0.000000001%嘅女人就另類諗法喇!

馮小姐, 好一個迷, 無啦啦走嚟問我, 如果唔比奶粉, 比鮮奶佢個仔飲得唔得喎!  得~ 實得架! 你唔撚比佢食就話唔得啫, 點解飲鮮奶唔得先??? 原因, 佢話而家D奶粉越嚟越貴, 唔想再買奶粉喎, 所以比D平D嘅鮮奶個仔飲!

我做亞媽, 反而想滕滕繼續飲奶粉囉, 奈何滕滕唔肯飲我先冇乎啫! 而佢就因為係貴, 所以先唔想買奶粉! 佢個仔得嗰兩歲, 而家都仲係食緊粥仔, 有D肉碎同菜粒! 就連飯都未食, 都已經話想唔比奶粉個仔飲, 咁請問個小朋友係邊到攞營養呢???

知佢對個大女都係一般, 但估唔到對自己個仔都係咁! 所以就足以証明, 好肯定佢冇偏心!!! 一樣都係咁撚衰!!!

尋日食飯好得戚咁問我, 有冇試過一巴打落去個仔塊面到喎! 我二話不說咁講, 我從來都唔主張一巴巴咁打佢地, 如果係, 咁同係新聞上虐待仔女嘅父母有咩分別呀?

佢答我因為好興, 真係忍唔住, 因為之前嗰晚個仔唔肯瞓覺仲係到玩, 所以星左個仔一巴!

唔肯瞓啫, 使唔使兜巴星呀, 佢唔瞓咪的佢出房囉, 忍心D關埋門15分鍾, 佢喊到拆天都唔好開門比佢入嚟, 過左15分鐘就去問佢瞓唔瞓覺, 我唔信, 佢唔醒囉! 個仔已經兩歲, 佢都明白我地講D乜架啦, 咪同佢講囉, 仲咩要兜巴星先??? 咁做, 同我地以前D冇文化嘅老豆老母有咩分別先???

講完, 馮小姐收左嗲!

唔明白, 唔鐘意小朋友就咪撚生啦, 見朋友生佢又走去生! DIU, 養番隻狗好撚過啦! 生左個仔出嚟都唔撚想比飽飯佢食, 都有撚病架!!!

多謝!

可能 Jessica知道我呢掛煩撚到爆, 所以無啦啦送左份禮物比我!

係一個水晶飾物盒嚟!

個水晶盒咁靚, 真係要諗諗放係邊先~

點解??? 點解????????? 點解???????????????????????????????

其實, 我真係好撚忙架! 我老公, 狗屎垃圾都叫我幫佢做! 自己可以做到嘅都唔去做, 死都要我做! 已經比左張死人上網卡我, 攪左我幾日, 攪到我屎都滾撚埋都仲未攪到個setting, 已經覺得煩九到爆架喇!

睇而家, 睇到呢幾嚿嘢, 真係好想唔做人囉!

Christmas前, 本身只係得兩嚿!  幫老闆set左之後, 佢發現好好用, 就再買兩兩嚿番嚟比我喇! 你話係唔係唔想痴線都唔得吖!

呢幾嚿嘢, 係叫Home Plug, 要嚟係屋企發放wifi! 簡單d講, 係通過電嚟互相輸送從而發射wifi出嚟, 即係set左之後, 呢嚿嘢可以插係屋內任何一個地方, 都可以收到wifi, 而唔會因有牆or房嘅阻隔而另到上網有困難!

當我睇到呢幾嚿嘢之後, 心情就開始唔老嚟! 因為我本身又唔識, 我都唔明點解要比我整??? 仲要上次set左其中兩嚿之後, 話番到屋企唔得喎! 但係奈何攞番嚟公司又得呢???  所以見到多兩嚿, 個心當堂已經係到抄蝦拆蟹喇!

記得年幾兩年前, 老闆就攞左兩個router 比我, 又係同佢set 機! 嗰兩個set到我甩肺, 而家, 就唔用喇, 話用呢幾嚿喎!

你話死唔死吖, 可以再過多兩年, 又出左d新嘢, 就又攞番嚟比我喇! 咁我條命, 應該又會再短多幾年囉!!!

好好玩呢~

 

舊年去星馬旅行買左D藥材番嚟, 話要嚟沖水OR煲湯飲, 會對個腎好, 咁老公就買左一盒番嚟!

真係冇諗過沖水或煲湯都真係苦到出汁囉! 只係一細片去煲, 成煲湯就已經苦得好緊要, 滕滕飲左大半碗之後, 成個星期都不停咁痾V, 次次仲要唔係少! 所以比佢飲過一次之後就唔敢再比佢飲!

十幾廿塊樹皮, 唔係平, 仲要成二千幾蚊, 我唔想就咁就掉埋一邊囉! 真係又諗到我頭都爆埋之後, 就去問左兩間相熟藥材鋪, 問佢地肯唔肯幫我去磨粉! 

不過, 兩間都拒絕左我, 因為我知道佢唔知我嗰D係咩嚟, 一陣整壞佢部機咪大獲, 所以兩間嘅老闆都答我, 佢地部機係要嚟磨D貴藥材, 唔敢整其他嘢架!

就係咁, 我就好失望咁走左喇!

講真, 我真係好唔奮氣, 有乜奶油咁容易整都唔幫我吖! 所以我去左淘寶睇下有冇喇!

嘩~! 堅呀! 一係唔睇, 一睇原來真係咁都有, 都唔係少!  冇人幫我整嘛? 咁我自己整囉! 唔使去求人啦! 所以我就淘左一個番嚟!

呢嚿嘢, 人仔100蚊, 運埋運費百五蚊港紙到!

雖然, 打磨完之後仲好似沙糖咁一粒粒, 但係我已經覺得好好喇!

之前買左D補健產, 我就張D料倒左出嚟沖水比左老公飲, 留番D膠囊係到, 就張D藥材入左落去個膠囊到比老公食喇, 咁樣, 就可以避開苦呢PART啦!

整起左D制成品, 老公笑住嚟話我戇居囉  ! 乜好戇居咩? 戇居得過咁都比我諗到呀! 咁戇居, 咁你又由個心笑出嚟~ 真係頂佢唔順!

又爛~

我從來都冇諗過架三輪車會爛, 因為點爛都唔會爛到架三輛車到, 除非好粗暴咁對待佢!

點不知, 我冇諗過嘅嘢, 終於都發生左! 就係個腳踏甩左出嚟, 整極都甩!

呢下, 真係諗到我頭都爆埋, 因為我唔想就咁掉左架車, 除左個腳踏, 其他嘢係冇事架!

諗諗諗, 諗左我成半個月, 終於比我諗到一個方法! 不過, 一同老公講, 佢就話我戇居! 佢話, 邊有人咁整架!

我戇居??? 咁唔該你又諗下有咩方法吖!!! 結果, 佢係冇同我諗架!

既然佢冇諗到點去整番好, 咁我就點左老公去買D鐵絲番嚟!

哈~ 哈~ 都唔係好困難就比我整好左喇~!

本身我諗過用膠水 or rubber band, 係個凹位到再橋住, 但係又怕啜住d膠活動得唔好, 所以而家用左鐵絲橋住左之餘個result 仲very good 喎!

一個迷~

點解我生命裏面咁多迷團!!!

公司個八婆會計比左張清單我, 係大假清單!

簡單問題複雜化, 明明係一D好簡單嘅扣數, 點解要寫到成版紙咁撚長呢???

我走去問老闆想去了解下, 但係老闆就話我好去睇好去計, 計咩喎! 佢話就算係advance咁又點, 跟本都唔會影響到我, 仲咩事要嘥時間去睇張list, 更何況佢話條八婆唔會計錯我!

點解, 我想去了解下都唔得??? 點解想去知道條八婆有冇計錯都話我好嘥時間吖???

堅嘢!

 

呢排好似身體好虛咁, 而且又怕凍到怕到死, 同班同學出嚟食飯, 冇一個好似我咁著咁多衫, 仲要身上有兩個暖貼(因為當日最低得10度), 攪到我好似一個冇體溫嘅人咁~

自從生完滕滕之後, 自坐月補過, 之後都冇喇! 見D感冒好番晒, 今日放工就去買左隻雞同埋瘦肉, 整左兩碗堅嘢!

煲左D雞湯之後, 再用冬蟲草+夥山參+鹿茸+當歸+瘦肉再燉!

係我整時, 個工人好似想睇下我整d乜, 但係我話唔使佢幫我, 叫佢出去幫我睇住滕滕啦, 不過, 佢坐左係一個地方係望到我架..........

自己心知呢煲湯唔少嘢, 所以感覺上個工人想昅我咁, 同老公講, 佢話係唔係個工人想學喎~ 我話你話呀, 想學都唔係而家先嚟學嘛! 平時我整嘢唔見佢想學, 而家見我係咁係個雪柜到攞d藥材出嚟就話想學, 冇嘢吓化~

不過, 都唔理得咁多, 唔通佢昅我我就唔飲喇咩!

d冬蟲草total燉左4次, 一共兩大湯碗, 頭先已經飲左碗, 希望聽日唔使凍到滕滕震啦~

千祈唔好講少~

我都唔明, 張sofa有咩咁好玩呢~???  之前小爛已經比我整過, 但係好似唔爛滕滕唔安落囉!



有咩理由要整到咁樣吖??? 咩原因先??? 個sofa底咁樣靚d咩???

我終於都頂唔順囉, 去左買左塊布!

老公聽到話我已經買左塊布番嚟, 今次唔知點解扒晒飯話要整喎!

既然係咁, 更就比佢整啦!

佢見我係到影相, 就問我影嚟仲乜! 我答更係要影啦, 你而家咁勁 !!!

堅呀~!

早兩日, 個頭痛到爆開, 食左藥都止唔到痛, 就連瞓著左都仍然係痛緊足足痛足20小時!

見食左藥都仲痛, 咁就唯有尋求下第D方法, 就係去煲魚頭湯!

叫工人買左個魚頭, 我就去買天麻, 川芎, 白芷, 南棗, 當歸!

點不知一日飲左3碗, 足足放足兩日屁! 如果頭痛係因為個頭有風得話, 我真係希望飲多幾次, 唔使一個月最少痛一次吖!

因為不停咁放屁, 滕滕就問我係唔係想痾屎喎, 因為佢次次想痾屎都係放屁架  !

真係煩到冤~~~

之前滕滕無啦啦唔知幾時開始已經識搵屋企電話call display嗰part出嚟, 跟住"禁"番redial去打比我地, 而且佢仲認得邊個電話no.係邊個!

因為我個電話打出係blk左睇唔到no., 所以次次滕滕打嚟比我都冇來電, 而且因為我幫老豆亞媽佢地裝左小熊來電個apps, 所以冇來電係打唔入, 而滕滕就算"禁"redial比佢地, 好多時都係打唔到!

我見到咁樣, 就係個電話到set左:1.係daddy, 2.係mommy, 3. 係婆婆, 4.係公公, 5.係嫲嫲!

點不知~!

佢一日就打九十幾轉! 唔係打九十幾次! 因為每一轉, 都打斉比我地5個, 車輪住, 每一轉都續個續個打, 一個都唔會漏!

而且有次仲係1個鐘裏面, 不停咁打比亞婆!

今日, 亞公亞婆亞嫲斉斉入晒嚟! 本身, 亞嫲逢星期四都入嚟架, 而亞公亞婆, 就係因為佢前日係咁打比亞公, 同亞公講: 公公, 我好卦住你呀~ 你幾時入嚟我到玩呀?! 你而家入嚟啦! 我真係好想見你呀! (亞公應該答佢今日唔得閑, 第日先入嚟!) 你唔好第日先入啦, 我真係好卦住你架, 你唔入嚟, 我真係會喊架!..........一路一路咁講咁叫, 我聽到都反晒眼笑左出嚟! 因為邊有人死纏爛打架!

結果, 亞公亞婆就今日入左嚟啦!

多寶集運 ~ 黑店一間!!!

都未過年, 就已經好似頭頭碰著黑喇!  滕滕出世之前搵過一間訂做傢俬, 因為之前都OK, 所以而家搵番佢, 點不知11月頭到而家, 拖呀拖呀, 講明12月尾要送貨, 而家, 就連圖子都未比我, 要我日日打去追!!!

呢樣未煩完, 就又多一樣! 之前用開間集運越做越衰, 所以就轉左另外一間, 而呢間因為有得自取平10元, 我可以搵courier去佢HK office取貨, 所以就用左兩次! 呢兩次, 可能係因為聖誕前爆倉, 間間courier都delay晒, 所以唔怪佢都delay, 不過, 今次第三次, 真係真真正正咁叫我唔好再用呢間仆街冚家產"多寶集運"!!!

呢間仆街集運, 成撚日都唔on-line, 一on-line問佢乜, 佢一係就唔覆, 一係就九年先覆! 以為佢係HK有office會穩陣d, 點不知個電話成九日都唔通, 要不停咁redial, redial & redial! 到通左, 又冇人聽! 真係想一駁通就小佢老味囉!

到打通左, 問佢我d貨幾時發出, 因為睇到網上佢地已經簽收左, 但係條撚樣就成撚日答會盡快會盡快! 一時又話架車比海關hold住檢查, 一時又話check唔到, 拖得就拖! 再問多兩句, 就開始發老難!

幾攪笑, 間集運發老難呀! 個女人仆街到, 話如果既然我咁唔滿意佢地公司, 咁佢可以退番d運費比我, 我d貨就keep係佢地廣州倉, 要我自己親身上去攞, 就算我搵順豐上去攞佢都話唔比! 咁即係分明玩嘢啦! 仲串撚到話唔收我倉租, 我幾時上去攞都得!

係呢個moment, 我覺得佢地跟本就係一間黑店! 我入撚左間黑店到!!! 而家, 我唯有吞聲忍氣忍撚住佢, 叫佢發左d貨去hk先再算!

等等等, 終於等左一星期, 第一批貨send左個取貨no.可以去攞貨啦, 唔好以為咁順灘喎, 因為佢地比貨我嘅條件係我要比好評, 而且要比左好評佢先肯再比第二批貨我!

好! 第一批貨收左喇! 第二批貨, 又再等多4日! 第4日, 條八婆打比我話第二批貨到左, 要我一定要比左好評佢地, 佢先肯放貨比我!!!

比! 我比! 我收埋第二批貨, 我一定會係個好評後面再加評語, 話佢地威脅我要我比好評先比貨我囉!

所以我真係唔可以唔唱佢囉, 原來佢d鑽石, 係威脅番嚟! 咁同黑店有咩分別呀!!!

正一仆街冚家產, 我睇下佢公司幾時死!

可憐的媽咪~

話說上個星期五晚食完個buffet, 第二朝天都未光, 我就已經痾到休克咁济!

係廁所成個鐘頭嘅作戰, 之後上床就瞓到下午成點鐘先起身! 不過一起身冇耐, 又要去廁所喇!

去完一次之後, 冇幾耐又去第二次, 滕滕見到我話肚痾, 佢都一斉走埋入嚟!  因為個肚痛, 所以我成個人都彎埋左, 伏左係自己對腳上面, 而滕滕就一路企左係我隔離!

我人就彎埋左, 滕滕就一路安撫我, 用手掃我個頭同我講: 你好痛呀?! 唔好咁啦~

我見佢咁掃我個頭, 我同佢講: 快D出去啦, 企係到仲咩啫~ 唔嗅咩?!

滕滕可能見我個樣咁痛苦, 佢就同我講唔嗅~ 仲一路咁陪到我痾完為止  !

唔好問我啦苯~!

而家D工人真係100個都唔知有冇一個好!

表姐換左3個工人, 而家第三個先尚算OK; 堂家姐個工人做左年半, 就開始出去借財仔, 仲有信追數記去屋企!

係唔係安安落落咁做嘢好難架???

當家姐一知道個工人借財仔, 我就已經勸佢唔要得, 聽住個工人一日一日咁差落去, 仲要大話連篇咁解釋借財仔一事, 我就已經勸佢, 橫掂佢奶奶日日咁入嚟, 就真係不如即抄, 唔好拖! 因為我都話晒有經驗!

--------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------------

佢同佢老公都係, 唔聽人講嘢, 唯一唔同, 就係堂家姐會問我意見, 而佢老公就唔會問; 不過, 堂家姐問完都唔會理, 照做佢自己諗嗰D嘢! 結果, 佢個工人日日玩嘢, 佢就日日嘔血!  嘔左個幾兩個星期血, 而家先話今個week-end先抄佢喎!

我都唔明, 我呢個堂家姐成Q日就覺得我係細佢係大, 當正自己做嘢係好正確, 咁我又唔係好明, 當初因為我想請一個工人番嚟, 係可以識小小英文(大家討論之下), 咁到個仔開始番學喇, 就可以引導個仔做功課, 目的唔係想個工人幫我睇功課, 而係可以guide住滕滕, 係咩時間做d咩, 每日有個固定模式放學食完飯就做功課, 只係初初時段要睇住滕滕做功課, 之後習慣左個模式, 咁一路一路上小學就可以安排得好d!  就係因為呢樣嘢, 我堂家姐就直接咁吊九我, 話我好想依賴個工人去睇功課, 咁自己就冇咁辛苦喎!

我都當佢係家姐, 所以我唔會反駁佢, 不過更唔明, 點解佢會覺得我覺得d工人可以叻到去幫我睇個仔d功課囉! 如果d工人咁叻, 咁佢地就唔使去做傭人啦!

到左而家, 滕滕日日已經係放左學食完飯之後, 就自己做功課喇! 咁我放工番去, 就可以同滕滕check下d功課之後, 就可以玩下其他嘢同講下故事書! 不過, 堂家姐就無啦啦問我滕滕而家做功課需唔需要等我放工番去同佢做, 因為佢話佢個仔一定要等佢, 而聽其他媽媽講, 佢地d仔女都已經開始慢慢可以自己做功課唔洗等喇! 聽到佢語氣, 好似開始著急咁~

當初就理直氣壯咁吊九我, 而家, 就著急點解個仔唔可以自己做功課! 更係啦, 你估我凡事做每一樣嘢都流架! 你估我叫個工人去睇功課咩, 我只係要個工人去guide住個仔坐定定去做功課咋! 既然如果你咁勁, 都可以唔需要理人地, 放左工番去同個仔做功課架! 仲咩而家走嚟問我應該點樣做啫~

重出江湖!

 

今朝我未夠九點已經醒左lu, 因為我真係好想同滕滕去玩呀! 滕滕都ok合作, 10點鐘鬆d就出門口喇!

 

11點我地就到, 天氣仲好好, 我仲希望可以玩到四點/五點or六點先走~

今次因為熙熙佢地唔得閑, 所以我地今日轉戰, 去玩d之前未玩過嘅!

可以因為太早(11點幾好早咩???), 呢個轉轉杯滕滕連續玩左3次! 之後, 又玩左pooh, 又玩左小小細界, 又玩左小飛象, 仲睇左3/4嘅歌舞劇! 3/4係因為滕滕同我都覺得悶都嘔囉~

3點都未夠, 隻豬仔已經謝皮喇, 仲話要番屋企抖下!

 
3點咋! 咁快就謝!! 

張年票就仲有3月同5月兩次, 玩埋呢兩次, 睇嚟都未必續喇, 因為好多嘢滕滕都唔啱玩! 老公話不如下次去海洋公園喎! 不過海洋公園對我嚟講好似遠左小小, 但係都可以諗諗嘅, 因為生日嗰個唔使錢, 咁出年老公生日都可以一斉去嘛!

 

開心後的代價~

好朋友就嚟要番美國, 所以成班同學去食BUFFECT FAREWELL佢~

因為太遲book枱, 而且又要就係旺角太子, 所以求其揀左一間就算, 冇蠔食, 連加一三嚿水, 都唔算貴!

d魚生ok, d青口都甜, 長腳蟹都唔錯, 三嚿水真係都係咁喇, 不過可惜我感冒未好番, 再加上之前嗰晚一諗起間死人集運就瞓唔著, 所以作戰狀態唔係咁好!

成晚食得都好開心, 不過開心過後嘅第二朝, 就真係大獲喇! 六點幾開始肚痛, 嗰時我已經知道嚟料, 所以即刻去廁所standby! 係個馬桶上, 唔係即刻有得去, 只係個肚越嚟越痛, 想去又去唔出, 仲要全身bill晒冷汗, 發晒軟蹄, 跟住雙眼開始發光, 呢個moment好彩係坐左係到, 因為我知道想要暈喇!

差d暈抵左兩次之後, 開始去得出, 不過全程都要成45分鐘先舒服左大半! 我知道, 我今日應該唔可以同滕滕去廸廸尼囉!

瞓醒已經一點, 其實都仲好想再瞓, 不過, 我想睇下成個人ok唔ok, 因為我想同個仔出街! 想, 只係想下, 原來係唔可以架! 因為仲有肚痾!

就連上堂, 都要工人姐姐帶去, 因為今日真係唔得囉~ 結果, 醫生就冇睇喇, 只係係樓下藥房配左d藥食!

呢d就係開心之後嘅代價喇~ 不過, 我都好開心, 因為今次有得痾, 唔同平時咁只係痛痾唔出就一定去搵醫生打針!

今日食左一次藥, 到左夜晚就已經好似冇咩事咁喇, 所以睇嚟, 聽日應該可以入廸廸尼喇 ~