唔通真係用BB話溝通過........????

尋日冇咩做, 所以等亞dee番嚟, 想去家姐到睇豆豉表弟!  等下等下, 亞dee成五點幾先番到嚟, 去到家姐到都成六點幾, 所以要即刻預備滕滕個set dinner!

食完粥仔之後, 輪到豆豉表弟喊醒, 要食奶! 原本冇咩嘢嘅滕滕, 見到豆豉表弟喊之後, 佢就..............

無啦啦滕滕又喊埋一份, 同豆豉表弟一斉係到奏樂!  不過佢地好似明白大家講咩咁講, 一唱一和, 仲要滕滕好似好明白豆豉仔肚餓咁喎! 唔通佢地用bb話溝通???

到豆豉仔飲奶嗰時, 滕滕都一斉收聲喇, 飲完奶仲好乖咁潻, 可能佢地牙牙牙, 真係講到嘢架!

可憐的滕滕, 哈哈哈哈........

滕滕係我個肚嗰時, 未出世就已經比佢老豆推我個肚, 話佢好撐住我, 撐到我行一行!

係嗰時, 我已經話亞 dee變態, 因為亞囝未出世就已經比佢推, 喂! 佢都係一個bb嚟架咋, 佢點知咁樣會另到我唔舒服喎, 最多初下個肚, 等佢縮番入去咪得囉, 都唔使咁大力嘛!

跟住滕滕出左世之後, 終於都有人接我班, 因為我終於唔使比人攪喇, 而呢個責任, 就交左比我地個寶貝到..............

post左以上嘅相片上左fb之後, 就即係比人話, 話亞dee變態, 攪到個囝個樣咁醜

雖然我都覺得亞dee變態, 但係睇親呢幾張相, 我都仲係覺得好好笑

尋日去家姐到探bb, 滕滕個老豆係西鐵到唔知係唔係冇嘢做, 所以又開始痴線! 佢話整左張被係個頭到, 似唔似女仔喎?! 跟住我個心諗, 似女仔就大獲啦, 對眼咁似你, 都唔方靚得去邊啦!!!

滕滕終於開始頂佢老豆唔順, 因為睇佢個就已經知............

我嘅可憐軒豬! 你咁細個已經受到咁嘅折磨, 幾時比你老豆攪到大呀!!!

祝你永遠幸福快樂!

今日餐夜奶, 又餵唔到滕滕喇, 好夜先番到嚟, 因為我識左廿幾年嘅小學同學結婚!!!

睇見佢可以同而家呢個女朋友拉埋, 真係十分之開心, 因為當佢冇固定女朋友嗰時, 真係好想佢搵番個認真嘅, 而家呢個都拍左咁多年, 終於都肯結婚, 你話幾好呢!

不過散席送客嗰時, 佢居然揇住我老公講多謝喎, 咁我就更係第一時間小佢啦: "有冇攪錯, 識左你咁多年, 有乜理由揇我老公先架, 係到揇我先啦!" 跟住佢就話: "係喇, 係喇, 而家揇你喇!!!"

相識廿幾年嘅友誼得來不易, 而且仲可以維持到而家, 所以我衷心祝福佢白頭到老, 永遠開開心心, 快快樂樂!!!

嘩! 好危險呀~

頭先食食下飯, 軒豬突然..........

真係比佢嚇親, 因為工人姐姐話佢都未見過軒豬咁樣爬起身!!!

突然佢做出呢一連串嘅動作, 我地三個都O晒咀!

睇嚟, 椅背條帶都要攞出嚟 cool住佢喇!

你好瞓多d喇喎!

呢幾日暖番, 軒豬由一隻肥糉變番一隻瘦糭!  當係一隻肥糭嗰時, 佢連轉身扒轉到唔係好得, 見到佢係反同反唔到之間, 真係好好笑! 係張high chair到, 肥到跟本連食腳都唔得, 真係好鬼得意!

不過, 今日工人姐姐同我講, 呢個軒豬唔係好瞓晏覺喎! ...........唔係嘛, 你咁細個, 唔瞓晏覺, 做咩先?! 而家有得瞓, 你就好瞓下啦, 第時番學, 開始讀書, 你唔好唔願起身呀, 如果你好似你爸b咁, 懶床, 我就打你pat pat 架!

有時我係到諗, 係唔係夜晚10點食完奶就開始瞓會早左d呢? 第二朝6點9起身, 瞓左8個幾鐘鐘先再食早奶, 跟住又再瞓, 對一個bb嚟講, 都應該係咁吖, 咁點解你唔瞓晏覺呢? 就算瞓, 都只係一陣......真係一個迷..........

拆線!

今日番去dr到拆線, 不過拆拆下, 個dr話下面就埋得好好, 不過上面就仲未得! 嘩, 幾驚呀, 我即刻問dr, 唔係要聯番埋佢吓嘛???!!! 好彩, dr話, 唔使咁驚, 上面有兩針未拆, 等星期五再番嚟先拆啦!

又番嚟?! 拆線我都已經驚架啦, 又再拆多次! 老公而家如果係屋企, 佢就幫我洗頭同洗傷口, 不過佢次次都話: "睇你第日仲打唔打!"

你呢個衰人! 如果唔係你, 我點會去打耳骨呀!

堅忙!

今日真係堅忙, 老公番左工先至會咁忙, 因為我早中午開始, 已經安排左我嘅節目喇!

因為想去jusco買羊毛老底比滕滕, 同埋買三文魚煲粥仔, 所以約左表姐去飲茶, 飲完茶, 我地就向住jusco出發喇!

因為呢個幾兩個月都真係好唔得閑, 所以橫掂都去囉, 就幫表姐買左張sofa做分期! 因為做分期, 要去aeon個counter, 而aeon個counter 係對住梓祐老豆做嘢嗰到, 所以如果我地一行過去, 梓祐個老豆一定會見到我地.  不過, 我同表姐講, 唔使理佢, 唔通佢一世都係到, 我地一世都唔行過嚟咩, 理鬼佢啦!  果然不出我所料, 我地一行過去, 佢就望到我地喇! 我地大家好似陌路人咁, 招乎冇打, 乜嘢都冇做, 大家就好似從來冇識過咁.........

梓祐而家12歲, 我可以大膽講, 我表妹係梓祐兩歲幾離開到佢10歲, 我個個星期, 最少2/3日風雨不改, 過去同佢溫習, 做功課, 直至到佢可以自己handle大部份嘢之後, 我先放手比佢嗰個乞e, 佢老豆一句唔該、多謝都冇講過, 而家梓祐識得自己放學番嚟自動自覺做功課, 唔需要佢去卦心, 係邊個教佢, 係邊個解釋比佢知, 一個小朋友嘅責任係乜嘢, 邊個同佢講, 爸爸辛苦搵錢照顧屋企, 佢就要努力讀書呀! 呢d嘢, 全部都係我教佢架!!! 呢個男人, 為左一個咁嘅女人嚟同我反目! ..........不過, 唔緊要, 我信報應!  講起都真係把鬼火, 唔好再講佢!

係jusco行下行下, 買下買下, 都成4點先番番屋企, 好彩我有帶奶出嚟, 如果唔係滕滕就慘喇! 番到屋企, 整下一陣, 又要出去, 因為約左個朋友食飯, 又食放提, 正!

不過今次食得冇咁輕鬆, 因為我老公唔係到, 滕滕又唔肯瞓, 攪到我食下就停下, 食下停下!

食完都成9點幾, 番到嚟,又10點, 滕滕又要食奶喇! 好忙, 好忙!

.....................

星期一晚, 收到嗰個朋友+同事嘅電話, 話佢老豆突然之間就去左, 所以下個星期約左成班兄弟姊妹食飯, 都要cancel!

原本12月有3個個炸蛋, 而家得番兩個! 其實因為6月嗰時, 個朋友+同事已經証實左佢老豆有末期肺cancer, 叫佢不如提前擺酒, 不過佢話道道都要有extra charges, 唔係好想, 再加上佢話佢老豆話唔使提早喎, 好啦, 到而家, 佢老豆突然唔係到, 會唔會有d遺憾呢?!

有時, 真係唔知佢點諗嘢!

好攰呀~

尋日老豆生日, 成家出左去食飯, 成11點幾先番! 今日, 因為成班朋友想倍個朋友食飯, 就又出左去打邊爐! 唉, 明晚, 輪到家姐個小軒擺滿月酒, 又要出去食飯!

好鬼忙呀, 就嚟攰死我喇! 下個星期五, 跟住再下個星期五, 跟住再下多個星期五都要去飲!!!!!!  嘩! 可唔可以比我停下呀!!! 仲有, 呢排星期六, 又要上廠!!!!

我就嚟死喇! 仲有, 卦死我喇, 軒豬仔!!!

又出喇!

滕滕兩隻門牙終於都出喇! 仲要係堅大隻架! 好嘢! 佢終於有樣嘢似我喇!!!  yeah!!!

終於攪掂!

嘩! 今日真係堅凍, 因為我地嗰到應該都只係有11/12度左右咋!

好彩尋日換晒d冬天衫出嚟, 如果唔係, 就真係凍0水喇!  不過, 好彩亞媽星期日入左嚟, 如果唔係都唔知幾時先執衫, 因為我嗰日用左3個幾鐘先攪好! 因為3點幾開始執嗰時, 老公未起身, 所以只可以將d夏天衫入袋先, 等佢起身, 先將d冬天衫, 由床下底攞出嚟, 然後就將d夏天衫放入去!

呢個動作, 其實年年都係咁做, 但係年年都比老公話! 話乜? 佢話我成日唔知將佢d衫執左去邊喎! 頂你吖, 幫你執衫都仲要比你話! 就係因為我就慣你, 唔使你做, 所以年年呢個任務都係由我做, 幫你做埋, 都仲比你話我將你d衫唔知放左係邊! 更係啦, 咁多年你都冇執過, 更係唔知d衫放係邊啦!!!

執衫執到都六點, 我就停左係到話: "好攰! 真係好攰! 點解我咁多嘢做, 都冇人幫下我架?! 我條命真係苦!" 講完之後, 老公就已經係到笑, 但係冇行動喎, 所以連亞媽都忍唔住, 叫佢幫下我手, 因為都執左成3個鐘啦!   好啦! 咁我咪叫佢, 睇下佢邊d冬天衫唔啱著, 就搵出嚟, 唔好要喇! 不過, 佢真係搵左出嚟之後, 又行番去上網!!!! 

有冇攪錯!!! 成日就睇住d股票!!! 星期日呀~ 乜有開市咩!!!  跟住見到佢咁, 我又講: "亞媽! 點解我條命苦得咁交關, 成日都有九十幾樣嘢要做, 咁多嘢做, 係唔係會死快d架?!" 講完, 我老公又係到望住個電腦係到笑!  跟住我就話: "你笑咩~ 乜你知我講咩咩~ 咁你有冇慚愧吖?!"

佢好快答左我一句: "冇喎!" 跟住就c左去執埋佢d衫喇! 你話! 你話! d男人係唔係耐左就係咁架喇! 咁到我六七十歲嗰時, 腳甲使唔使我幫佢剪埋呀~

又失眠!

係唔係玩嘢先?!

我今晚又瞓唔著喇~~~~~

因為尋晚個朋友打比我老公, 話我地之前自殺嗰個朋友, 出左院之後, 而家又嚟喇, 開始又擔心佢...........

仲有, 明天番工, 又要提老闆call個agent, 公司個相機, 又要叉電.............

仲有, 明天下午, 又要出一出去, 番去個靚仔dr覆診(雖然佢四十幾, 但係佢真係好靚仔, 溫柔, 又man), 睇下隻耳仔.............

同埋, 明早又要同個工人講, 要幫我老公燙d制服, 又要叫佢幫老公洗件外套, 因為食嘢整污糟左..............

而且, 明晚放工, 要去jusco買三文魚比滕滕煲粥仔, 順便食番碗龜寧膏..............

嘩! 點解我成日都有十九幾樣嘢要做架!!!

好嚇人呀~

因為星期五整完隻耳仔, 所以直到今晚先洗頭, 不過, 因為好難就位, 所以叫左老公幫我洗, 我就揸住隻耳仔, 盡量唔好濕到水!

不過, 洗洗下頭, 就真係嚇死我, d頭髮甩到連亞媽都唔認得, 一下都十幾廿條! 咁試想下, 洗頭唔只一下架嘛, 所以一路洗, 老公都一路講: "嘩, 你咁甩法, 使唔使去睇下醫生呀?" 可想然之, 真係幾嚇人呢!

好! 等我明晚又再洗, 睇下係唔係又甩咁多, 如果係, 就真係可能要見一見dr喇! 好驚呀~

好得意呀, 硬c呀!

尋日去割粒"色肉", 亦都去割埋粒墨! 粒墨, 由細倍到我大, 係條腰到, 有時著件短D嘅衫(以前就係, 而家有左條肥腰之後, 就.........), 就會見到, 我都不知覺得幾性感 , 所以割左出嚟嗰一刻, 就真係有小小唔捨得佢!  唯有係姑娘攞走嗰一刻, 同佢講句 bye bye啦 , miss u so much, 永別喇, i love u forever!!!

因為尋晚攪到好夜先番, 所以今日就著重湊滕滕, 不過下晏老公話要去睇西裝, 所以都出左去一陣!  6點幾番到嚟, 工人姐姐話滕滕今日仲未痾cc, 所以同滕滕傾左一輪計之後, 就同佢換片, 一打開條片之際, 原來佢發緊功呀, 只不過我同佢換片, 打擾左佢咋! 所以我一見到, 就二話不說, 捉住佢對腳, 幫佢發功!!! 哎呀, 好得意呀, 滕滕痾硬c呀!

痾左一粒之後, 佢就停左, 跟住我見佢冇反應, 我就開始用聲幫佢!  原來, 用聲真係 work 架, 佢跟住就即刻再用功喇(從佢嘅表情, 亦都可見一斑),不過, 唔知係唔係呢次係佢嘅第一次, 佢痾到一半, 就喊左出嚟, 不過都係喊左一聲), 跟住就暢通無左喇!

佢痾完之後, 老公就行過嚟睇, 佢第一句就即刻話: "嘩! 堅嗅!", 跟住, 我就話: "乜好嗅咩?", 佢又話: "唔係嘛, 咁嗅你都唔覺?!", 跟住我就再話: "你都戇居! 乜冇人同你講過, 自己個囝D屎幾嗅, 個亞媽都話香架啦!  我就真係覺得軒軒D c, 真係唔係好嗅啫!"

如果唔係c嘅話, 我真係可能搵個盒裝起佢, 攞嚟留念呀!  因為第日滕滕d牙係, 我都會一隻一隻咁留番佢, 切番晒比佢第日大個自己睇下!

以上內容, 睇完之後, 如果有任何不安, 請見諒!

真係唔好唔信........第7 年!

就係喺06年, 我地識左7年嗰一年, 我同亞dee嘈左場大交, 亦都係人地所講, 識左7年就會係關建性嘅一年! 就係嘈左埸大交, 我走左去打耳骨(穿耳洞), 因為之前好想, 但係又怕痛, 所以嗰陣時心情實在太唔好, 好想搵嘢發洩下, 係紋身同打耳骨之間, 我就撰左打耳骨先, 諗住打完耳骨先再去紋身!

就係因為打耳骨, 所以先至有今日!!!  因為今一做左個手術, 不過只係個小手術!  打左耳骨之後, 唔知係唔係我隻耳仔唔受得定係太硬, 所以生左粒"色肉", 而呢粒"色肉", 隨住時間嘅過去, 佢一日一日咁大, 大到好似粒"色仔"咁大粒, 係人見到都會嘩一聲, 所以今日就去解決左佢!

好痛, 而家隻耳仔好痛, dr話d麻醉藥3/4個鐘就會冇晒, 真係, 真係, 而家真係痛到仆街!

亞dee仲同我講, 睇你以後仲打唔打, 攪到隻耳仔咁!  乜係我攪嘅咩? 如果唔係你攪到我咁唔開心, 我使乜搵嚟嘢攪呀!  點解女人係咁, 咁鐘意搵嘢折磨自己?  有幾痛佢又唔知, 有幾辛苦, 佢又feel 唔到!  不過, 我鐘意!

死喇, 幣加伙!

今日番到嚟屋企, 出奇地滕滕瞓左! 就嚟食完飯, 佢就醒喇, 不過醒左之後, 就開始喊!

佢之前喊, 抱起佢就會收聲, 不過今晚佢唔收聲都不突只, 仲要: 只要姐姐!!!

大獲喇! 大獲喇!  唔知係唔係呢排晏左放工番去, 同埋呢排好多飲宴, 倍少左佢呢?!  佢居然一路喊, 就望住個工人, 要個工人抱佢呀~!  我抱咁耐, 就喊咁耐.......死......死......死!

哎呀! 死啦, 我個滕滕豬, 你唔好唔要我啦!!!

反眼!

尋晚, 已經去過jusco睇過, 係睇個細喼, 因為我地個細喼個輪爆左, 所以一定要今個星期買番個, 比亞媽下個星期去旅行!

不過, 係jusco嗰d, 亞dee一個都唔鐘意!!!  佢話要去番三年前, 我地係老尖睇過嗰到!

三年前???  係! 係三年前!  我一聽到佢話要去番老尖睇, 我就知道係喺三年前睇過嗰到!

真係痴線!  因為佢之前已經試過一済, 話要去番年半前去過到嗰間shop到, 買個背囊, 咁當然就一定買唔到啦, 年半前嗰, 間shop可能已經唔知轉左幾多手啦, 仲等緊你嚟買咩!  所以佢話要出老尖睇, 我第一句就已經問佢, 如果出到去, 好貴, 咁買唔買先?! 如果冇呢, 咁又點呀, 白行呀?!  不過, 我講咁多, 都知係冇咩用, 因為以佢份人, 唔睇過, 一定唔心息!  所以佢今日放左工, 就先出左去睇, 如果真係仲有, 而款得, 價錢又合理, 咁就等埋我放工, 等我決定去買!

果然不出我所料, 佢去到, 睇左之後就第一時間打比我, 同我講: "嘩, d 喼好唔得!", 跟住我就話喇: "唔得?! 唔係喎, 你又話一定好樣過jusco 嗰d嘅? 無奶由唔得架喎?!"  佢知我串佢, 所以佢就話佢而家去永安及及!

佢去到永安, 睇到每一個悄為ok嘅, 都打一次電話比我! 喂, 你玩嘢咩! 打視像嚟, 個背景又嘈到爆, 成公司係人都知佢打嚟(因為一定變左做hand free架嘛), 仲要係咁同我講佢聽唔到我講嘢!  佢把聲, 我成公司都聽到, 唯獨係佢聽唔到囉, 囉到爆!

撰嚟撰去, 佢鐘意嘅, 又冇細喼side可以hand carry 上機, 叫佢唔好要求咁高, 佢又話佢撰唔落手.....................當時, 真係想"中"佢兩嘢囉!

好喇, 結果, 撰左個, 係屋企附近 jusco都有得買嘅!!!! 咁出嚟佐敦把鬼咩 !!!

有陣時同佢買嘢, 真係反九十幾次眼, 呢個款又話唔鐘意, 嗰個款又話唔得!!!  喼咋! 你估做人世咩 !!!

你唔係嘛, 你估你係貓嚟架咩!

星期六去左市中心, 買左張軟墊比滕滕, 等佢可以多d地方扒下扒, 唔使成日就係張soft到, 只係"吉"下"吉"下個pat pat!  買左番去, 滕滕第一時間就望住張未拆開嘅軟墊, 望到眼都唔眨!  更係啦, 因為張嘢係亞POOH嚟, 鮮黃色嘛(表姑媽, 你唔好再講我地屋企只係得藍、白、灰, 而家有黃色喇!)! 

一打開, 個工人姐姐就即刻話張墊: 好!  因為佢話滕滕好鐘意爪嘢, 已經爪到張sofa個扶手d皮起左d, 所以張墊爪起嚟有質感, 所以good!

我都知道呢個曵豬有個嗜好, 就係好鐘意爪到d 嘢"cuak cuak"聲, 尤其係食奶或者打橫咁抱佢, 佢後面嗰隻手都同佢老豆一樣, 一定要搵d嘢攪下先安落!  但係我冇諗過, 張sofa好似啱啱換左冇幾耐, 唔好咁快就要我報消啦!

軒豬! 你好學唔學! 你老豆隻手就成日係到打鼓, 瞓覺都要打住個枕頭、床褥, 而你呢, 一路食奶就好似隻貓仔咁係到爪嘢, 日又爪, 夜又爪!

胎毛筆終於都出場喇!

因為尋日冇結論, 所以決定今日同埋滕滕一斉去攞胎毛筆喇! 原本係半個月前可以攞, 攪到而家先去, 唔知老闆娘會唔會以為我地唔要呢?!

攞左支毛筆, 睇落去, 真係好得意, 因為d毛黑蚊蚊, 烏卒卒, 好似好咩咁!

不過, 亞dee就話(只係同我講啫): "車!如果佢話係軒軒d頭髮, 都冇人知啦! 佢話係之嘛!"

嘩! 你唔係嘛, 整左咁耐, 你先質疑人地呢樣嘢?!  而家都攞得啦, 你都仲問呢個問題, 唔係化!

所以, 我同佢講: "不如我地"蚊"一條出嚟, 去驗下DNA, 如果唔係軒軒嘅, 咁我地出律師信去告佢吖!"

講完之後, 佢就冇答我, 亦都好似當聽唔到咁!  頂佢唔順!

叫老公影好d, 因為我想影埋我頭頂上面嗰排筆, 點知............

呢個木盒要加$338!

如果唔係見個木盒有隻牛係上面, 都唔使盒中盒!

呢對筆, 要$1,576!

因為用左滕滕個名去起左對對聯!

d毛咁黑蚊蚊, 斷估都唔會係其他毛啦, 真係好烏卒卒架!

好想, 但係又唔捨得!

尋日同亞dee講今日佢放假, 問佢去邊樹好, 因為發覺自從滕滕出左世之後, 就好似冇過過二人世界!  唉, 真係冇二人世界喇, 因為有時想兩個人出下去, 但係又卦住軒豬, 又覺得好似我地兩個開心, 軒豬就自己一個人係屋企同姐姐悶!

所以, 一同亞dee講, 問佢有邊到想去, 佢就話: "咁得軒軒係屋企呀?" "唔理佢呀?" "軒豬係你命根嚟架喎, 尤得佢自己係屋企呀?"

唔係唔理佢! 不過, 自從佢出左世之後, 我地兩個成日都好似好忙, 連溝通都好似少左, 再加上佢番工要on shift, 所以感情好似冇之前咁sweet啫!

"我嘅命根?!", "咁軒豬係唔係你個命根先?!"  好彩亞dee答我: "你就係我嘅命根, 而軒軒就係你嘅命根囉!"

"不過, 點解我係你嘅命根, 咁你點解唔幫下我手嘅?" 講完之後, 佢就扮瞓著左喇 !

 

又出牙仔喇!

今日, 個工人姐姐同我講, 滕滕又出牙仔喇, 平時我地見唔到, 係因為原來今次係係上咢!

不過, 有樣嘢就真係幾奇, 因為唔係上咢嘅門牙, 而係兩隻犬齒!  乜正常唔係出門牙先嘅咩?! 出犬齒先, 咪好奇怪囉?!  真係一個迷!

唔該~! 可唔可以有人發明D藥係比蠢人食架!!!!

尋晚, 收到個客個e-mail, 話個packing list又問題!  已經唔係第一次!  之前已經同我嗰個朋友+同事講過, d product 嘅重量可以有得走棧, 例如好似25g, 可以當係24.5/24.6/25.5/25.6 等等, 咁計上去 d gross weight 同 net weight 就會容易計d!  同埋d紙箱重量又係, 唔一定廠比嗰個數字就係嗰個! 教過佢一次, 佢都要死牛一面頸咁同我講, 話1号紙箱同2号紕箱, 明明係相差100g, 點解個客又 challenge佢個packing list!

你露媚! 都同佢講左, d 紙箱重量有得走棧架啦, 乜1号紙箱同2号紙箱差100g啫!!!如果同左你講有得走棧, 咁點會一定係相差100g呀!!!  70g, 80g or 90g 得唔得啫, 仲咩成日食都要話一定係100g啫!!! 紙箱廠都擔保唔到批批紙箱嘅重量都係一樣啦, 仲咩死都要話係100g呀~

仲有, 人地嗰邊個清關公司, 鬼Q知你個箱幾大咩, 人地只係對住你D文件去做嘢, 人地見到兩個 item d 嘢差唔多, 只係個size長短嘅分別, 人地鬼知你個箱重量係幾多呀, 只係太輕會另到人質疑啫!  同佢講, 佢仲要爻咀!  人地講, 你就聽啦, 唔明, 就問啦!  仲要話人地好 challenge你!  唔係人地話你有問題呀, 我都覺得你有問題呀, 究竟你明唔明呀!

天呀~! 點解呢個世界有d咁蠢嘅人架!!!!!!!!!!!!!!!!!!!!!!

哎呀! 呢個肥滕滕吖!

原本今日諗住去攞套胎毛筆, 因為上個星期已經通知可以攞得, 但係因為真係實在太唔得閑, 所以攪到而家! 

不過, 今日個行程, 又打亂左, 因為工人姐姐打電話比我, 同我講佢頭暈, 又嘔, 所以叫我早D番去!

當然番到去, 二話不說叫佢個工人食D感冒藥就好即刻去瞓啦, 所以煮飯、煮餸, 都唔使問"亞季"(因為我老公姓季), 就一定係我喇, 因為老公番左工!

工人姐姐已經拉左張 high chair 入廚房, 等滕滕見到我, 就唔會係到嘈, 不過係我整緊餸之際, 佢就越嚟越唔耐煩, 整整下仲係到喊!   喂! 細路, 平時我係隻眼到見到你都係咁樣倍姐姐整餸架噃, 仲咩我整係就咋型, 姐姐整你就唔咋先, 而家係唔係大細超呀!

雖說我一路整都有同佢講嘢, 不過我一路整, 佢就一路喊, 喊到我整完為止!  到我整好, 可以食得, 抱起佢, 佢先停!  但係, 咁我都要食架嘛, 所以我又放番佢落張high chair 到!  但係, 一放底佢, 佢又喊! 仲要係叫住嚟喊, 好話你放底佢! 

一知道佢係到扭計, 我就又二話不說, 放佢番佢自己張床仔到, 關埋道門, 由得佢喊飽佢囉!

不過, 呢個曵豬真係曵, 佢喊喊下停左, 我就入去睇佢, 佢一見到我入去, 佢又喊過!!!(十足十you-tube 嗰個video 咁!)

曵豬軒!  自從你發完燒+假疹之後, 你係唔係個身好痕?! 係唔係想打pat pat?! 姐姐湊你你就唔嘈, 我湊你就成日都要我抱! 你再係咁呢, 信唔信我泡制你呀!!!

bye bye 啦!

今日好開心, 因為今朝出門口, 滕滕豬同我bye bye呀! 雖然佢仲未識講, 但係隻手仔就郁下郁下, 開合開合!  真係叻豬仔喇!

呢個傻豬仔, 而家朝早8點幾起左身就唔瞓, 攪到我星期日湊佢, 8點幾就要起身, 唉, 真係好眼瞓  !