嘩! 今日真係堅凍, 因為我地嗰到應該都只係有11/12度左右咋!
好彩尋日換晒d冬天衫出嚟, 如果唔係, 就真係凍0水喇! 不過, 好彩亞媽星期日入左嚟, 如果唔係都唔知幾時先執衫, 因為我嗰日用左3個幾鐘先攪好! 因為3點幾開始執嗰時, 老公未起身, 所以只可以將d夏天衫入袋先, 等佢起身, 先將d冬天衫, 由床下底攞出嚟, 然後就將d夏天衫放入去!
呢個動作, 其實年年都係咁做, 但係年年都比老公話! 話乜? 佢話我成日唔知將佢d衫執左去邊喎! 頂你吖, 幫你執衫都仲要比你話! 就係因為我就慣你, 唔使你做, 所以年年呢個任務都係由我做, 幫你做埋, 都仲比你話我將你d衫唔知放左係邊! 更係啦, 咁多年你都冇執過, 更係唔知d衫放係邊啦!!!
執衫執到都六點, 我就停左係到話: "好攰! 真係好攰! 點解我咁多嘢做, 都冇人幫下我架?! 我條命真係苦!" 講完之後, 老公就已經係到笑, 但係冇行動喎, 所以連亞媽都忍唔住, 叫佢幫下我手, 因為都執左成3個鐘啦! 好啦! 咁我咪叫佢, 睇下佢邊d冬天衫唔啱著, 就搵出嚟, 唔好要喇! 不過, 佢真係搵左出嚟之後, 又行番去上網!!!!
有冇攪錯!!! 成日就睇住d股票!!! 星期日呀~ 乜有開市咩!!! 跟住見到佢咁, 我又講: "亞媽! 點解我條命苦得咁交關, 成日都有九十幾樣嘢要做, 咁多嘢做, 係唔係會死快d架?!" 講完, 我老公又係到望住個電腦係到笑! 跟住我就話: "你笑咩~ 乜你知我講咩咩~ 咁你有冇慚愧吖?!"
佢好快答左我一句: "冇喎!" 跟住就c左去執埋佢d衫喇! 你話! 你話! d男人係唔係耐左就係咁架喇! 咁到我六七十歲嗰時, 腳甲使唔使我幫佢剪埋呀~
d男人認為呢d野係女人做佢地就唔會做嫁啦～
回覆刪除前日之嘛～我先話我老公唔接返自己ｄ衫～點知佢一句得埋來～話呢ｄ野係女人應該做唔係男人做～
當時我好想話佢～男人應該搵錢返來養家～咁你有冇吖？？？？
但係我最後冇講～
[版主回覆11/19/2009 10:21:00]咪就係! 一講起錢, 佢地就冇聲出啦! 咩男女平等喎, 一講起家務, 佢地就唔出聲啦!
唔好幫佢執
回覆刪除[版主回覆11/19/2009 10:24:00]唔好幫佢執?! 我梗係試過啦, 一陣佢又出一招: "耶~仲咩唔幫我執喎~ " 跟住又煩鬼住晒架喇! 你知啦, 你又係女人, 佢地纏鬼住晒嗰時, 就頂佢唔順啦!
所以我成日都同佢講: "正一衰人嚟架, 你!"
你地兩個好寃氣
回覆刪除[版主回覆11/19/2009 11:09:00]都係, 打交都要打到老、打到死為止 !
我第一次上嚟坐, 打攪晒!
回覆刪除你同你老公d對白好頂癮呀!由我有咗bb開始, 我咩都唔幫我老公做喇, 仲要同返佢講, 我唔駛佢做埋我嗰份已經好好喇!
[版主回覆11/20/2009 12:26:00]得閑就上嚟隨便坐下啦 !
我陀嗰陣, 個肚大到唔可以打掃家務嗰時, 佢真係可以兩個星期先執間屋架! 都係我頂唔順, 嘈佢佢先做架咋, 但係佢都仲話: "唔係吖, 間屋幾乾淨吖!"
當時真係想執佢兩済 !
好呀!
回覆刪除我嗰個都係咁上下咋, 兩個禮拜先洗一次廁所/拖地咁, 到我頂唔順, 咪扮琴上去抹窗, 嚇到佢即刻卜入去搶住嚟做呀!
佢唔洗碗我都尤得佢, 咪叫外賣食, 佢俾錢囉, 食多幾餐佢肉赤就會自動自覺去洗架喇, 有時對付呢d軟皮蛇要同佢鬥智鬥力架!
你知唔知我個廚房係一年後變咗咩呀, 係曱甴竇呀, 足足清咗4個月先乾淨晒咋!
[版主回覆11/20/2009 15:55:00]咁大獲!!! 4個月!!!! 咁真係好堅下喎!
因為阿仔係屋企, 唔可以噴殺蟲水, 只係可以換曱甴屋, 用白胡椒呢D溫和方法, 仲要晚晚係度"步"D曱甴, 見一隻打一隻!
回覆刪除有一晚熙熙老豆開夜, 我一行入廚房就見到一家大細係我個洗手盆附近喇, 大中細size全部齊晒呀!
俾佢哋嚇到毛管都洞起晒呀...我淨係打到兩隻細嘅, 其餘俾佢哋走甩晒, 有一次夜晚係洗手盆底想攞D筲箕, 一伸手入去攞, 就見到十幾隻係個細筲箕度喇...真係晚晚都好驚嚇架...
[版主回覆11/23/2009 09:24:00]嘩, 真係堅堅堅喎! 成十幾隻係個筲箕到, 仲要一家大細, 佢地係唔係想同你 fight 過呀~
有個囝係屋企, 真係好多嘢唔好可做! 好似之前熱d咁, 好似有虱, 都要攪到鬼死咁大陣像!
我估佢哋唔係想同我fight過, 係想霸咗我個廚房就真呀!
回覆刪除係喇, 有小朋友係屋企就真係做咩都要諗過度過呀!