發覺自己有小小變態, 因為今日放工番到屋企, 見到滕滕瞓左係佢張床仔到, 同姐姐係到玩緊, 所以跟住我就快速咁行埋去睇下呢個有成12個鐘頭冇見嘅曵豬豬!
同佢SAY左聲HI之後, 就同佢講: 媽咪去沖涼先, 之後先同你玩! 講完呢句說話, 我就行左去TOILET喇, 一路行, 滕滕就已經一路叫, 跟住仲要喊潻! 本身行開左一陣, 滕滕都係呀呀幾聲, 但係之後就開始咋型!
係嗰個moment, 我都幾開心, 因為佢見到我, 認得我, 所以扭我計, 咋我型, 要我同佢玩!
因為我miss左佢成day, 佢都miss左我成day, 咁即係佢卦住我啦
呢兩個星期, 滕滕已經冇再講"un估估" 喇, 而係係到叫、呀、"blu"同笑, 發出唔同聲音, 睇見佢呢, 都不知幾好笑, 因為都唔知佢講乜, 只係係到呀呀呀!
不過, 佢有樣嘢真係好叻, 就係發皮4, 今晚佢又發皮4喇, 發左成半個鐘, 叫叫下攰又停下, 跟住又發現冇人理佢, 又再發過, 如事者幾次, 之後食完奶, 就已經瞓到天昏地暗, 因為已經發到好鬼攰!
今日終於都約左個師傅下個星期六幫滕滕剪頭髮, 剪完頭髮, D頭髮就要嚟整毛筆,真係好期待, 期待滕滕嘅第一次!
點解我朋友講過想搵、想買嘅嘢, 我會咁上心, 去到邊到會幫佢地睇下有冇?
但係, 點解我講過想買嘅嘢(只係一d好平嘅嘢嚟啫), 我d朋友一d都冇擺係心, 成日見到、經過都冇幫我買嘅? 我都講明, 係幫我買, 唔係送比我啦!
點解我送比我朋友嘅一點心意, 佢地會當係寶? 因為我心事細如塵, 知道佢地所需!
但係, 點解我嘅心意, 講左出嚟, 都冇人氹下我開心?!
點解我搵到d 平嘢, 就送晒比d好朋友!
但係, 點解我d朋友冇人益下我呢?!
點解我d朋友成日同我講, 去邊去邊食飯唔就腳!
但係, 點解我d朋友又唔諗下就到你, 就就唔到我, 咁唔係淨係你唔就腳啦!
究竟係我d朋友冇當我係朋友, 定係平時我過份容忍佢地呢?!
佢地又唔係唔當我係朋友, 只不過可能係因為我自己過份付出啫! 我都知做朋友唔好太計較, 但係有時, 我都想, 我朋友行過街, 見到嗰樣嘢我係搵緊嘅, 幫我買左佢, 咁我就已經好開心, 因為我知道我呢個朋友有將我放係心到囉! 我對人好, 就自然想人地對我好, 但係只係得自己有心, 人地冇心, 我就會卻步, 因為唔可以只求收獲, 不求付出! 如果既然你係咁, 就ok囉, 我知點做架喇!
今日, 真係可以真真正正咁放下假, 因為而家嘅星期六真係好似冇放過假一樣, 因為有時就去聽講坐, 有時又有朋友嚟, 有時又要番工, 有時又要應酬我老闆!
所以今日係幾舒服嘅情況下, 可以輕鬆咁湊下滕滕, 姐姐有時又幫下手!
就係今日, 我終於聽到滕滕係到喊, 係喊: 亞媽....哇....哇....哇....亞媽.....哇....哇....哇....., 唔係一次, 係幾次! 唔知係佢真係叫我, 定係佢呢期鐘意咁叫, 因為佢呢期已經冇再 un估估喇, 而係鐘意咁叫!
中午, 約左梓祐同嫲嫲飲茶, 因為特登就梓祐一陣番學, 所以就去近佢學校附近嗰間到飲! 梓祐著左套校服出嚟, 一見到佢, 就覺得, 佢真係大個仔喇, 唔再係以前嗰個黃 lay lay, 睇見佢,就覺得自己老左, 因為佢已經讀中一喇! 企埋嚟我到, 以前我會揇住佢, 鍚佢一啖, 而家呢, 佢高過我, 我拖住佢, 佢隻手就已經好似大過我嗰隻喇...........
梓祐, 你已經大個仔, 好多嘢你已經識得去辨別咩係啱, 咩係錯, 如果有時你覺得受到委屈, 唔公平, 你應該要出聲, 唔可以好似以前咁死忍, 因為我唔想睇到你唔開心, 成日比個乞e"恰"你!
今日番到嚟, 工人姐姐同我講話滕滕唔肯食粥仔, 食兩啖就唔肯食, 明天唔煮喇喎......
唔係嘛, 佢唔食, 你就唔煮, 唔煮, 咁滕滕食咩呀???!!! 剩係飲奶, 唔係呀化, 唔通呢世佢都飲奶咩!!!
跟住, 我都冇理佢, 照浸左D米, 一樣都要佢照煲!!!
...............我諗, 我真係要上去堂, 學下整嚟比滕滕食喇..................
而家開始慢慢著番我最鐘意嗰D高跟鞋喇, 不過有D都係未得住, 因為雙腳大左, 仲咩著得落, 所以, 我之前買左個嘢番嚟, 撐大D鞋!
上次著過一次已經好辛苦, 因為迫爆, 但係撐大左成個幾月, 雖然係大左, 但係腳爭嗰個位, 真係好挖腳! 結果頭先番嚟, 左右都起左水泡............
生完之後, 腳就大左, 手指又粗左, 但係又唔見個胸大嘅???
今朝, 無啦啦心血來潮, 攞左未有左嗰時嗰條牛仔褲著, 一著, 嘩居然得呀, 只係緊左dd咋, 比起之前, 就連拉上嚟都唔得, 所以我又成功左一步喇!
咁即係, 而家只係仲有上身, 隻手臂......仲係有小麒麟, 唔知會唔會回復到呢?!
軒軒, 就係因為你, 可以比媽咪試過有成 150磅嘅滋味, 成個肥妹咁, 但係就係因為你, 我又可以比自己知道係幾唔想成為一個肥婆......因為你爸b話媽咪肥得嚟好得意, 好似揇住左第二個人咁喎..........唔係嘛, 揇住左第二個女人???!!!! 唔得!!!!!!!!!!!!!!
包中碼片都就嚟用完喇, 朋友送嗰d 都冇晒喇, 所以係時候開始買尿片喇! 不過, 睇下睇下, 滕滕可能要換大碼size, 因為我發現佢嗰兩隻肥肶有印, 可以條片"cool" 得緊, 所以今日拆左包大碼試試!
果然不出我所料, 大碼真係幾好, 雖然可能有小小小鬆, 但係應該都係時候用大碼喇........大碼, 話咁快就換大碼...........個半月就換左細碼, 3個月就換中碼, 而家5個幾月, 就換大碼......唔係嘛, 會唔會快過頭呢, dr話佢唔係大size 嚟架喎, 定係我錯呢..............?
人地話女仔鐘意咋嬌, 不過原來男仔都會, 每逢星期日, 我都全職湊呢個滕滕豬, 而呢個滕滕豬就逢星期日都曵d, 個樣成日都好似好可憐咁.......我想抱抱! 不過, 算啦, 每逢夜晚我地食完飯, 沖完涼, 佢就開始扭計, 要由9點幾同佢玩到成10點幾, 跟住就食奶, 每日都係咁, 唔爭在星期日都係咁.........佢跟本就擺明睇我住我地嚟咋!
但係, 有樣嘢就真係好攪笑嘅係, 佢飲完奶, 我抱住佢, 每錫佢一啖, 佢就好似電視情節咁, 每次都合埋眼, 比你鍚, 錫完佢就打開眼睛, 對住你笑.......真係頂佢唔順, 你估拍戲(女主角)咩!
軒軒, 你估下你會比媽咪鍚到你幾多歲, 9歲? 10歲? 11歲? 一路都鍚? 定係有左女朋友唔比錫先??? 你個梓祐表哥都比我錫到成10歲, 咁你呢? 你估你大個左, 有左老婆, 會唔會都好似爸b咁樣, 係咁錫嫲嫲呢?!
今日終於同我老闆講左, 話我以後嘅星期六可唔可以請大假, 唔番工, 因為真係好眼瞓, 星期一至五, 要番工就冇得好講, 星期日姐姐放假, 要起身喂奶, 咁即係得星六先至可以瞓晏d, 如果星期六都要番埋工, 咁即係成個星期都冇得瞓晏d!
未講之前, 我基本上覺得多數都唔得, 因為如果星期六都放埋假, 咁就冇咩機會比佢同我去食lunch, 冇機會比佢去發洩, 同埋講佢嗰d 股票經, 所以佢個answer, 我一d都唔出奇, 都係話星期六有個人係公司都係好d, 佢話都係放兩個星期六, 先番一個啫, 如果眼瞓咪番晏d囉, 但係我話唔得, 因為個清潔 9:00就到嘛, 跟住佢又話, 番到去先再瞓囉, 其他嗰兩個同事都唔係到, 咁瞓到成12點幾都得!
你話, 邊有老闆叫個員工番公司瞓覺先, 仲叫我係佢間房張椅到瞓, 因為佢張椅舒服d喎!
之前, 有個朋友個朋友介紹左個神婆比我, 因為我老闆邊排好黑(仲黑過我), 所以約左今晚去睇呢個神婆, 個神婆講我老闆, 雖然佢呢排唔係咁好, 但係如果佢想繼續做, 都可以做, 做到佢頭髮白晒都有得做! 嘩, 聽到呢個, 我都放心晒, 因為佢有得做, 即係我都有得做, 仲有排做! 但係個神婆就話我, 出年我份工就有d危喇, 如果呢兩年, 我冇轉過工或者調過職, 份工就好可能有轉變! 我一聽到佢咁講, 我第一個即時反應就係想問我老闆: "唔通你抄我?!"
另外一樣我開始驚驚地嘅就係, 佢話我中年婚姻會有d問題!!! 有問題..... 之前另外一個又係咁講喎......死啦, 唔通真係??!! 上次我已經同我老公講, 嗰個神婆話有個女人攪我家庭, 同我老公睇, 個神婆又係話第日佢有個女人嚟搵佢!!!! 今次, 又係咁講.......
番到屋企, 我sent個sms比佢, 話比佢聽死啦, 唔通真係有個女人出現............
雖然,我老公叫我唔好咁大疑心, 佢話佢唔會比任何人介入, 唔會比其他人破壞我地屋企, 但係我真係開始有d驚驚地.......
軒軒, 點算好呢, 媽咪好驚呀~
今日食完飯之後, 工人姐姐打電話嚟, 話滕滕d手手腳腳比虱咬左好多到, 於是, 我就早左一個鐘番屋企, 睇下究竟使唔使同佢去睇醫生, 因為聽工人姐姐講, 好似真係好多到都係!
好啦, 早走左一個鐘頭10分鐘, 係因為我唔想搭5:20嗰班冇冷氣嘅巴士, 因為呢幾日真係熱到嘔, 仲要坐成個鐘嘅冇冷氣巴士番屋企真係好難頂, 所以再早多10分鐘, 希望之前嗰班車有冷氣啦! 係到等緊車之際, 有個女人行近我, 問我點解咁耐仲未有車, 又問嚟緊呢班車有冇冷氣! 嘩, 唔係嘛, 又冇冷氣, 我早走多小小, 係因為唔想坐冇冷氣嘅巴士咋, 如果真係冇就真係大寧樂啦! 話口未完, 架巴士就嚟喇............oh, my god, 真係冇冷氣!!!!! 唔上, 等多成15分鐘都係冇冷氣, 而家上車, 都係冇冷氣, 咁唔通再等多成15分鐘+15分鐘先上車..............嘩, 唔好喇卦, 齋企係到等車都出水, 仲等!!!
上左車之後, 嗰個女人就坐左係我後面, 跟住就開始左我地嘅對話, 一路傾, 一路傾, 就傾到番到屋企落車為止, 仲交換左電話潻! 讀中學開始, 我就已經知道我個樣生出嚟係唔友善嗰隻嚟, 而直接d, 我個樣跟本係黑人憎嗰隻, 所以我從來就未試過有人好似呢個女人咁, 咁主動同我傾計! 所以係呢程車裹面, 我可以比較輕鬆地去過呢一個鐘嘅車程, 因為我個心只係諗住滕滕, 滕滕, 滕滕.............
原本都諗住去睇醫生架, 但係番去途中, 嫲嫲打電話嚟, 佢話唔使下下都要去睇醫生嘅, 不如試下換下d床單, 晒下佢,睇下咩環境啦! 就係嫲嫲講左呢一句話, 我就改變左我嘅行程喇! 一番到屋企樓下, 買左兩罐嗰d 咩滅虱劑, 我地出左去避左兩個鐘之後, 就番去換床單, 滴露抺過晒滕滕會掂到嘅嘢................攪下攪下, 成1點先瞓.................
真係估都估唔到, 梓祐居然係今日整左個網站比人上去討論! 佢今年只係12歲, 佢嘅才能, 唔知係今時今日呢個社會應有, 定係佢真係好叻! 係佢6/7歲, 我就買左本速成倉頡書比佢睇, 跟住就教佢上網, 睇E-MAIL, 叻仔, 一教就識!
唔知係天意定係咁橋, 佢媽咪今日係FB到話比人聽, 佢係10号都整左個網站比人討論!
有時, 我真係好想同梓祐講佢媽咪嘅嘢比佢聽, 好想話比佢知, 佢媽咪都係FB上面, 好想話比佢個, 你媽咪啱啱都整左個網站, 同埋, 我又好想話比佢知, 我話左比佢媽咪聽佢個乞E對佢唔好............但係, 結果我都冇講, 因為如果我真係講比梓祐聽, 我覺得佢會唔開心!
有仲感覺, 梓祐好似同佢媽咪好近, 但係又好似好遠..........
呢幾日, 滕滕又開始食佢隻小肥手, 仲要係咬得好肉緊, 一推開佢隻小肥手, 佢就係到衣衣牙牙, 好似好話你好推開佢咁, 唔通.....真係出牙?!
比個牙膠佢咬, 咬咬下, 佢唔要之餘, 又係到嘈, 仲要雛埋雙眉, 好慘咁, 見到佢呢個樣, 我就忍唔住, 唔係心痛, 而係好好笑呀, 哈哈哈哈...............
仲咩好辛苦咩, 仲咩好似掉引咁喎..........真係好痕咩, 比隻手你咬下喇, 佢咬落嚟, 真係出盡力咁咬呀, 咬呀, 咬呀........嘩, 哎完幾下, 舒服晒!!!
滕滕, 睇見你牙痕個樣, 就笑死我地喇, 不過, 痛苦好快過架喇, 你出晒d牙仔, 就靚仔晒, 唔使咁痕架喇!
今日去左聽幼稚園嘅talk show, 其中有一個男講者講有關點樣去教導, 對待, 同埋另到小朋友係細個個時另到佢地可以吸收知識得最快, 原本好沉悶嘅 talk show, d 人就開始醒番, 因為呢個男講者講得好生動, 比起之前嗰個幼稚園校長就真係差得遠喇!
所以佢地有張表格, 話呢個男講者之後都有幾場talk show係免費嘅, 我都諗住一定去參加, 因為只係呢廿幾分鐘, 佢嘅 show 已經好有共鳴同埋應該可以比到一d嘢我地, 如何可以再做好多d, 點去用心對待自己個bb, 可以另到我地更了解佢, 明白佢。咁呢個talk show 唔使錢, 就可能會有d selling point 啦, 但係我諗應該唔多唔少, 都可能有d嘢聽卦.....
啱啱呢個星期日, 亞媽同我老豆入左嚟我到食飯, 食食下飯, 我就同佢講, 嚟緊呢個星期日番屋企食飯, 因為亞dee放假(呢樣嘢, 我冇講, 不過應該諗到諗到, 如果唔係, 我一個人點番去呢), 不過當時, 亞媽個反應就望一望我, 然後講: "吓, 星期日, 唔星期日得唔得呀, 有經學班喎!"
亞媽! 你逢星期三、六, 已經番彿當, 再加埋d初一、十五, 又要番, 而且初一、十五嘅之前嗰一、兩日又要番, 同埋又再加埋呢乜誕乜誕、 乜節乜節、乜誕乜節之前一、兩日你又要番, 咁我想問下, 你幾時會搬去彿堂到住呀???????????????????
我成日係到諗, 唔通你有你嘅信仰, 我都要干涉你咩, 但係, 我地話番嚟食飯, 你居然話唔好, 可唔可以改第二日???? 以前未生, 都話就得到就就, 自己一個番, 唔使就亞dee, 但係, 而家點就你呀, 我帶埋滕滕番嚟, 就唔係可以任何時間都得架嘛! 好似舊年細佬生日, 你又話要番彿堂, 我真係好想問, 你唔番, 彿堂係唔係踢你出會呀????????!!!!!!!
好啦, 最終都係冇答案, 因為我老豆話, 你唔使理佢, 佢都痴線嘅, 番彿堂佢就飽架喇! 所以大家冇一個真正嘅答案, 因為大家都共識左, 星期日係照番!
不過, 亞媽今晚打嚟, 又問改唔改下個星期日, 因為佢下個星期日燒衣喎! 哎呀..............亞媽, 乜你仲未死心咩!!! 你明唔明呀, 下個星期日, 亞dee要番工呀, 我點樣一個人出嚟呀, 又要攞尿片, 又要攞奶樽, 又要攞凍水、熱水, 又要攞被、衫仔, 又要攞bb車, 我點攞咁多嘢呀!
我真係未聽過d仔女番亞媽到食飯, 個亞媽會話唔好, 可唔可以改第日!
亞媽, 真係比你吹到啤啤聲!!!!!!!!!!!!!!!!!!!!
而家係凌晨1點幾, 好耐都冇試過咁夜都未瞓, 原因係嗰度黑氣, 仲未走, 仍然都係我個頭上面, 因為今晚放左工, 係jusco到買緊睡袋比滕滕之際, 姐姐打嚟話個雪柜唔凍, 一d風都冇出, 仲要d嘢熱晒!!!
唔係嘛, 冇雪柜, 仲慘過冇洗衣機喎, 咁雪柜裹面d嘢點算呀???!!!
番到屋企, 就第一時間去睇下咩環境啦, 唉........如果要搵人嚟整, 只係睇, 都要比300, 如果要換零件, 就唔知幾多錢喇, 如果佢話換零件都要成1000, 咁不如換過一個, 如果個師傅話整嚟都side 氣,咁嗰300都洩埋, 所以把心一橫, 我就去買過一部喇!
不過, 當我決定要嗰個display 之後, 咁就去叫街車啦................天呀, 冇街車呀, 冇人覆呀, 咁點呀, 我老公又未放工!!! 好彩, 最終call左我表姐夫個fd, 佢肯過嚟, 於是乎個雪柜都可以今晚平平安安咁 replace 左舊嗰個!
雖然呢個雪柜係 display, 不過個sales就話佢發誓呢個display係今朝先開箱, 所以千祈唔好壞呀, 我唔想用得幾日又唔得呀!!!
今日去左bb展, 諗住請假瞓醒, 食完飯先去啦, 2:30pm去到,點不知買票入場, 排隊買都要成個半鐘之後先入得到去, 本身諗住"重除"係奶粉同尿片到, 但係走晒全場, 都唔夠我係上網買咁平, 奶粉同尿片都係一樣都買唔到, 另到我好失望!
想去睇下d碗同廁所, 又唔啱心水, 唯獨是買左張換尿片嗰張墊......好過冇啦, 唔通咁辛苦, 排左咁耐隊, 一樣都唔買下咩!
呢個咁嘅曵豬, 我發覺佢真係越嚟越嗅當, 諗住仲有小小奶, 想佢食埋佢啦, 佢居然發皮4喎, 仲一手推開個樽潻, 真係唔得佢死! 又諗住等佢開始入睡, 再比埋剩底嗰d 奶, 唔覺唔覺想佢食埋, 佢居然又好似知道我想"監"佢食埋, 又即刻係到發皮4!
之前啱啱出世嗰時, 就好似一舊蕃薯咁, 唔識反抗, 比佢食, 佢又食, "監"佢食, 佢又照食, 只係係到鬧; 但係而家, 用"仔大18變"嚟形容佢都得, 因為比佢發現左我地有時有d嘢想偷雞, 佢就係到發皮4喇, 唔可以好似以前, 用好湊嚟形容佢!!!
我今日d"風難" 好痕呀, 究竟幾時先好番呀, 我而家真係求生不得, 求死不能, 仲要折磨到我幾時呀~~~~~~~
呢個曵豬豬, 自從嫲嫲嗰日嚟過之後, 就晚晚都曵, 我地番到嚟, 食完飯, 佢就開始嚟料, 成日要抱, 之前都冇咁緊要, 自從嫲嫲嗰日嚟咁耐就抱咁耐之後, 晚晚我地番左嚟就就要抱!!!!!!!!!
原本我都唔想出聲, 但係見到佢亞媽都冇放過手之後, 我就忍唔住同亞dee講! 工人姐姐要做嘢架嘛, 你估成日同你抱住個囝咩, 更何況我都唔想佢成日抱住bb啦, 所以真係唔出聲都唔得!
軒軒豬, 你發皮4都冇用架喇, 因為你d性格似足媽咪, 唔alike 就唔 alike, 所以你咁樣, 我就越係唔會抱你, 而家媽咪d風難都未好番, 晚晚都要浸身, 顧到你, 又浸唔到身, 咁..........你可唔可以乖d 啫...............
