今日終於同我老闆講左, 話我以後嘅星期六可唔可以請大假, 唔番工, 因為真係好眼瞓, 星期一至五, 要番工就冇得好講, 星期日姐姐放假, 要起身喂奶, 咁即係得星六先至可以瞓晏d, 如果星期六都要番埋工, 咁即係成個星期都冇得瞓晏d!
未講之前, 我基本上覺得多數都唔得, 因為如果星期六都放埋假, 咁就冇咩機會比佢同我去食lunch, 冇機會比佢去發洩, 同埋講佢嗰d 股票經, 所以佢個answer, 我一d都唔出奇, 都係話星期六有個人係公司都係好d, 佢話都係放兩個星期六, 先番一個啫, 如果眼瞓咪番晏d囉, 但係我話唔得, 因為個清潔 9:00就到嘛, 跟住佢又話, 番到去先再瞓囉, 其他嗰兩個同事都唔係到, 咁瞓到成12點幾都得!
你話, 邊有老闆叫個員工番公司瞓覺先, 仲叫我係佢間房張椅到瞓, 因為佢張椅舒服d喎!
之前, 有個朋友個朋友介紹左個神婆比我, 因為我老闆邊排好黑(仲黑過我), 所以約左今晚去睇呢個神婆, 個神婆講我老闆, 雖然佢呢排唔係咁好, 但係如果佢想繼續做, 都可以做, 做到佢頭髮白晒都有得做! 嘩, 聽到呢個, 我都放心晒, 因為佢有得做, 即係我都有得做, 仲有排做! 但係個神婆就話我, 出年我份工就有d危喇, 如果呢兩年, 我冇轉過工或者調過職, 份工就好可能有轉變! 我一聽到佢咁講, 我第一個即時反應就係想問我老闆: "唔通你抄我?!"
另外一樣我開始驚驚地嘅就係, 佢話我中年婚姻會有d問題!!! 有問題..... 之前另外一個又係咁講喎......死啦, 唔通真係??!! 上次我已經同我老公講, 嗰個神婆話有個女人攪我家庭, 同我老公睇, 個神婆又係話第日佢有個女人嚟搵佢!!!! 今次, 又係咁講.......
番到屋企, 我sent個sms比佢, 話比佢聽死啦, 唔通真係有個女人出現............
雖然,我老公叫我唔好咁大疑心, 佢話佢唔會比任何人介入, 唔會比其他人破壞我地屋企, 但係我真係開始有d驚驚地.......
軒軒, 點算好呢, 媽咪好驚呀~
我都好神婆架, 不過唔好嘅嘢我好快唔記得, 最緊要係呢刻 ....
回覆刪除比啲信心自己同老公, 可能嗰個神婆睇錯咗呢, 我之前夠有個 FD 分別睇過三個神婆, 三個神都話佢第一個一定係仔, 最後出到嚟係囡囡, 所以呢, 呢啲嘢有時都唔駛盡信架
[版主回覆08/23/2009 19:08:00]原本我去都係去玩下性質架咋, 第一個神婆講完之後, 我都玩住嚟問我老公, 係咪有女人送埋嚟都要, 你知啦, 有d女人痴線架嘛, 最鐘意d男人有家室架....! 到今次, 呢個又係咁講.........
不過, 我同我老公都相信, 只要我地有同一嘅信念, 冇人可以攪我地嘅!
首先唔好自己嚇自己先，又唔好成日疑神疑鬼，如果唔係遲啲家嘈屋閉，無都變咗有啦，係咪?
回覆刪除另外，迷信呢家嘢唔好盡信，做事做足一百分，邊個會炒你吖，或者你咁諗會開心啲，係你發咗達唔洗做呢~~~
[版主回覆08/23/2009 19:14:00]希望過一陣會好d啦, 因為始終兩個都係講呢樣嘢, 不過今次呢個就話唔一定係, 因為佢話有女人攪, 唔代表係第三者, 可能係因為與女性朋友嘈交都唔定(唔知係唔係佢安慰我呢)!
抄我? 我老闆一定唔會抄我架, 因為佢當我好似女咁, 好都不得了; 我冇得做? 除非佢唔做啦, 我就冇得做喇! 如果我真係發左達, 我都會幫佢做囉, 因為我呢世人諗都冇諗過會遇到我呢個咁好嘅老闆囉!