唔好玩我啦~~~

呢個月番工搭巴士, 發現有個巴勒癱坦男人耐唔耐就望住我, 而且我仲覺得佢有意冇意咁坐係我對面!

原本我覺得應該唔係, 不過, 條巴勒癱坦今日居然走埋嚟同我講嘢, 問我"U work in yau tong?!, i work in xxxxxx! 我唔知佢up 乜囉~ 仲要, 我到公司樓下時, 佢仲問我, 我係唔係就係係呢到番工?!

嘩~ 大佬~ 唔好玩我啦, 我今年38架喇, 仲有桃花???

如果佢係香港人, 我會識handle, 但係佢黑忟忟架, 我真係怕有一日佢等我放工, 跟住拉埋我一邊囉!!!

講故事比賽

12月頭嘅有個星期六已經約左滕滕同學上完英文班係餐廳嘆住tea嚟玩講故事, 今日我地又嚟!

原本有3個小朋友, 我已經預備好左禮物, 但係有個媽媽唔臨到星期五晚都唔出聲話唔嚟到, 原因就係佢話佢個女就嚟考琴, 想佢練習多d喎! 大佬, 咁都可以早d講架啫, 我, 感覺上有d覺得唔係路囉!!!

唔嚟唔緊要, 就算得兩個小朋友, 上次咪又係咁玩! 不過, 人就係好賤格囉, 見到我地講故事嘅相, 就又羨慕我地, 所以就又約我地下個星期喎~ 好, 聽住先囉!

但係咁囉, 知道嚟緊呢個星期六亞sir 請左假唔上堂, 嗰個媽咪又話想去廸廸尼喎! 咁即係, 我地原先嘅約定又唔記得左囉, 咁即係, 又唔嚟一齊玩喎!

吊~ 成Q日都放飛機, 真係好想好想飛甩佢!!!

與表弟的Boxing day

今日好充實囉, 老公車我地去天水圍同堂家姐食lunch之後佢就番工, 我地就去睇戲踩板車, 跟住就上去佢屋企打邊爐!

表弟真係幾孤寒, 講明有車都唔借比表哥玩, 又話只係去睇戲唔請表哥上嚟玩, 結果, 兩條友玩到痴左線!

我地細時少不免會玩到玩埋一舊, 見滕滕同表弟玩到痴左線, 我就同堂家姐講尤得佢地啦, 我地以前細個都係咁, 有呢d經歷先開心架嘛~

 

 

癲左一輪, 就坐係到畫畫畫~

好似好專心咁呢~

番到屋企, 滕滕居然同我講"開心到爆~!" 對左表弟一day, 就已經用左個"爆"字, 再見多幾次, 我諗都幾大獲!

放心!

22号屋企做冬, 因為老公番通宵, 所以我同滕滕就一早出左去搵亞婆亞公食lunch!  就嚟聖誕, 亞公就叫滕滕自己揀份自己鐘意嘅禮物!

結果滕滕揀左~

有車有logo都唔揀, 要揀個BB~ 真係好好笑!

最好少嘅就係, 今日去隔離村食嘢,  佢都話要抱埋BB去, 因為抱埋BB去, BB會開心D!

佢咁講, 即刻滕滕反映緊佢自己內心嘅感受!

食完番屋企, 因為大風我就同滕滕戴起左頂帽, 有個婆婆問我滕滕係男仔定女仔嚟~! 從來都冇人問過滕滕性別, 因為佢個樣, 絕對地係唔似女仔囉, 不過因為滕滕抱住個BB, 呢個行為, 應該只係會係女仔先咁做!

我同婆婆解釋, 因為佢好鐘意BB, 所以就要抱住BB一齊出街喇! 如果我同婆婆講滕滕好鐘意公仔, "公仔"呢兩個字聽起嚟就比較女仔小小, 所以我一用"BB"嚟講, 婆婆就即刻話, 叫媽咪生多個細佬妹啦~

滕滕好好笑, 佢無啦啦下午同我講: 媽咪~ 你放心啦! 我第一大個一定唔會好似爸B咁衰架, 我一定會生好多好多個BB比你, 所以你唔洗擔心架!

哈哈~ 你個傻豬仔, 到你大個左, 生BB就唔係比我, 係比你自己喇!

滕滕呢方面真係好似我, 我由細到大都好鐘意小朋友, 滕滕佢都唔例外!

 

生日

回顧番早一兩年嘅生日, 真係唔太開心, 唔知係唔係早輪嬲左老公成個幾月, 所以而家稍為轉左小小性, 佢居然問我想唔想同同事調更, 係我生日嗰日放假陪我喎! 咁當然可以的話就更係好啦!

因為我生日去海洋公園唔洗入場費, 而呢個moment學生又半價, 所以一家三口入去都只係400蚊啫~

其實係唔係我要求太高呢??? 我搵左一個人, 佢係揸住部單鏡機我先叫佢幫我影呢張全家幅架, 但係我諗都冇諗過佢會影到咁樣囉, "ocean park" 個名, 點解可以唔影晒架??? 我見你係揸住部單鏡機就以為覺得你得, 咁既然原來你係唔得, 就唔好學人揸住部單鏡機架, 咁流!!!!  真係睇見張相就把幾火~~~

入海洋公園, 我最想最想就同個仔去睇劇場, 我已經一早話買嘢邊食邊得開場, 唔好食完先入場, 點不知老公三番四次話要食好d! 我明示暗示已經講左話今晚約左好朋友一齊食生日飯嗰餐係好好, 點不知佢都仲係要話食得好d喎! 好啦, 結果! 真係冇位冇得入!!!

滕滕第一次坐吊車, 我驚嘅心情原來已經影響到佢, 因為架吊車無啦啦停左係到唔郁兩秒, 滕滕就已經即驚到喊左出嚟, 佢話怕番唔到屋企呀~

其實, 我都好驚佢唔郁架, 但係呢個moment, 我同老公都要扮冇嘢去安撫佢啦!

因為冇睇海洋劇場, 所以唯有睇動物補番數! 一路睇動物, 我就發現滕滕真係like睇動物多過去廸廸尼玩, 所以我諗短時間都唔會去廸廸尼lu!

玩完海洋公園就係金鐘同好朋友一齊食生日飯, 因為我地生日只係前後4日, 所以如果年年都可以一齊慶祝, 咁就幾好呢!

工人送比我嘅生日禮物~

我身痕, 無啦啦星期二唔知講開咩, 就問個工人呢個contract 完左續唔續約, 而工人嘅答案係"唔續"!

一個星期前我已經發夢夢見請左個新工人番嚟, 而個新工人玩嘢, 見工時就乜都識, 到嚟左就乜都唔識!  呢個夢, 可能就係一個預兆!

我其實都幾希望佢可以續約, 因為請過一個新嘅, 真係會死好多細胞, 而且最少起碼要大半年先可以磨合到, 而我呢個工人已經完成左就嚟第二份contract 先可以去到而家呢個位, 所以我嘅痛苦又會即將來臨!

我比左兩個好開心嘅favour個工人, 但係佢都心意已決, 所以如果估佢想轉第二個僱主嘅機會應該好微!

又或者可能係我, 佢見到我咁緊張又咁錫滕滕, 所以佢時不時都有同我講佢d仔女, 話好擔心佢地, 而當我叫佢幫多我兩年, 佢都話其實佢都好擔心如果佢走左的話, 因為佢怕唔知個新工人會點對滕滕, 而佢同滕滕嘅關係, 滕滕想點佢都知佢都明白!  咁既然咁擔心滕滕就不如留抵啦, 但係可惜佢更擔心自己嗰d! 我係媽咪嚟, 擔心仔女我都好明白, 所以既然個工人咁想番去見自己d仔女, 咁就番去囉~

.....我早知過左生日先嚟問啦, 攪到我乜mood都冇晒!!!

完成得好辛苦~

一D創作細胞都冇嘅我, 叫我去做份勞作出嚟, 對我嚟講係極辛苦囉!!! 因為唔係強行要交, 所以舊年我已經炸炸弟弟唔去做架喇, 但係今年唔做唔得, 因為滕滕已經識得人有我冇呢樣嘢, 而我唔想覺佢得"點解自己會冇嘅"而唔開心, 所以我就"的"起心肝去做喇!

我最憎猜迷語, 因為我覺得我個腦並唔係要嚟諗埋D咁無謂嘅嘢, 所以呢份親子聖誕勞作, "抄人地" 呢樣嘢一定唔少得!

用左我14個廁紙筒, 專登去買左盒水彩, 用左我兩日時間去整左呢棵聖誕樹! 其實可以再整靚D, 可以係某D位貼番D金粉, 亦都可以係某D位加番小小吊飾, 但係奈何我真係好懶好唔想做囉!

兄弟姐妹情~

呢個post 好好笑, 因為佢令我諗起我同兩個細佬細時, 成日都打交, 激到亞婆哮喘發作走落街冇眼睇我地~

我每朝早落樓, 都會同一對兄弟同lift, 我估年齡大約7-9 歲左右, 佢地朝朝入左lift 都比亞媽話, 叫佢好唔好再攪嚟攪去, 唔好再你整我我整你, 唔好再你話我我話你, 日日如事, 朝朝如事! 睇見佢地, 我又情不自禁咁諗起我同兩個細佬細時成日打交, 你推我一下我又推番你一下, 你打我一下我又打番你一下, 沒完沒了, 只係同呢兩兄弟好似!

今朝又見到呢兩兄弟, 而其中一個就差d撞到我, 當其時亞媽就開口唔好整到姐姐! (wahahaaaa! 仲咩我姐姐!) 我忍唔住開口, 問係唔係孖仔(因為高度差唔多), 其中一個仔就答我: 唔係~ 我單身架! 真係比佢笑死! 亞媽再補多句, 成日都係咁攪嚟攪去, 真係激死!

兩兄弟有計傾可以玩, 先會你攪我我攪你, 如果感情唔好又點會咁呢! 所以我第一時間就安慰個媽媽: 你唔洗擔心, 佢地感情好先咁樣咋, 我以前同我d細佬都係咁(曵)!

生日飯 I

星期六已經食我第一餐嘅生日飯! 其實我都唔係好明, 點解我生日食飯, D人會要求等埋我老公先一齊食, 請問而家係邊個生日先???

第一餐嘅生日飯係同契妹食, 幸好契妹冇絕對咁要求等埋我老公, 所以我照食可也!

好開心契妹同我講佢有左, 我所有嘅BB嘢都可以比佢用, 唔洗嘥喇!

好開始!

尋日真係忙到抽筋, 成DAY都有節目, 上完英文班就約左滕滕同學個媽咪去食tea, 因為人地媽咪想比佢個女練大膽d, 係食tea 時講故事書, 等過多一兩次之後就要佢地小朋友講, train下佢地個膽!

其實都好架, 我都想train下滕滕, 我想佢係陌生人面前表現有信心d, 咁第時有需要去學校叩門, 就算冇料到都比人睇到佢有自信心吖!

兩條友仔都幾老友, K1就坐隔離, 而家縱使唔係同一班, 但係個個星期六都一齊上英文班, 所以都好FRD! 有次我仲回想番, K1嗰時滕滕老師打電話嚟, 話佢用手甲去篤坐隔離女同學塊面嗰個, 唔知係唔係就係呢個呢?! wahahahaaaaaa........我有問過滕滕架, 佢答我好似係呀! wahahahaaaa........ 不過, 好彩佢呢個女同學個媽咪係正常, 同我可以溝通得到架啫!

今次係第一次出嚟tea講故事, 比我預期中好, 因為第一次, 佢地兩個就已經爭住嚟講, 雖然爭住嚟講, 但係就講到好hea好求其!

人, 一定要係有競爭先有進步, 小朋友就更現實! 所以我已經同同學個媽媽商量好左, 下次邊個講得好d, 就會有小禮物一份, 而另外嗰個呢, 冇禮物, 但係都有糖一粒!

其實上次觀課日我都同校長反應過, 想佢地看圖書作故事, 因為圖書可以刺激思維之餘, 仲可以比佢地用腦去想像更多嘅空間, 因為講故事係表達, 同時間仲可以訓練佢地組織能力表達能力, 再者, 因為要係我地大人面前講故事, 所以亦都可以同時間去練大膽量! 意見我就表達左比學校知, 但係安唔安排就係另一回事囉, 因為學校有佢地自己嘅既定程序, 所以我唔太期待喇, 而我, 自己就嚟料先囉~

新玩具~

"導出導入"呢隻嘢已經興左成年幾兩年, 初初都想試下, 不過梗係唔捨得攞千幾蚊出嚟!

從來都唔去做facial 嘅我, 因為覺得嘥錢嘥時間, 比人按嗰個幾兩個鐘(塊面), 就要比幾嚿水! 人生只係做過一次, 而嗰一次因為係朋友個媽咪, 所以性情難卻, 但係只係嗰兩個幾鍾頭, 雖然好似好舒服咁比人按, 但係我內心其實都不知幾想佢快d攪掂可以快d走!


呢排有個朋友係咁講"導出導入"呢部機, 而且仲用過幾隻牌子去做比對, 係佢recomment 之下, 我就買左呢部!

佢話呢個牌子出嚟嘅功效係最work, 而且又唔貴!

結果, 我就狠心地買左喇, 而且今晚仲即試! 

不過, 感覺就一般, 因為話佢金屬面會震, 但係震盪得輕微到真係唔覺囉, 但係放滴水上去又真係震架喎!

唔理佢喇, 做就照做啦, 玩完仲嚟多個sleeping mask 潻 ^^ !

笑死人咩!!!

星期二老師激讚完滕滕之後, 佢今日都不知幾鬼開心, 一放學就已經即刻打比我話老師今日又讚佢! 攪到佢今日心情happy到飛起, 成day 都係到唱歌!

當然我放工番嚟都有歌助興陪我食飯啦, 但係就.........



我們一同玩耍，扭"姑姑"!  我們一同玩耍，扭"姑姑"!  我們一同玩耍，扭"姑姑"!

一路唱就拍住個姑嚟唱, 大佬, 你估個姑係樂器咩 @@!

滕滕一路唱, 我就一路啤住佢, 佢唱完我就問佢仲咩好唱唔唱要唱扭"姑姑"咁肉酸架!

原來佢話, 老師係學校同佢唱過"我們一同玩耍，眨眨眼/拍拍手/扭pat pat!", 咁佢咪番嚟改歌詞改做"扭姑姑"囉! 而且仲問我, 點解老師可以扭pat pat, 而佢就唔可以扭姑姑喎~

點解? 呢個問題真係幾難答! 咁又係喎, 姑姑or pat pat都係身體嘅一部份, 而且兩樣嘢都唔可以隨便比人睇比人摸架, 仲咩事可以唱扭pat pat 而唔可以唱扭姑姑吖!
 

嚇到鼻哥窿都冇肉~~~

我買左D玩具番嚟比滕滕練眼! 眼D嘢咁細粒, 我已經再三叮囑佢唔可以張D粒粒嘢放落個口同鼻到!

我知道呢條友仔真係充滿好奇心, 講明有電嘅嘢係唔可以放落水到, 結果唔試過唔心熄, 將屋企個無線電話放落盤水到, 結果唔洗講就更係壞左啦!

所以呢盤粒粒, 其實我都好驚架! 因為終有一日佢都會.......

就係今晚, 我同佢一齊執好收番埋時, 佢無啦啦對住我突然係到喊同我講: 媽咪! 我攞唔番出嚟呀!!!

當時聽到, 我都唔知發生咩事, 咩攞唔番出嚟呀?  滕滕當時其實已經個人好亂好驚, 講D唔講D, 咁我就問佢係唔係窒左粒嘢落個鼻到! 而滕滕就不斷咁點頭!

點算吖! 點算吖! 我唯有用手同佢"禁"住另外嗰邊鼻, 叫佢好似"生"鼻涕咁"生"佢出嚟啦!  "生"左幾下都唔出, 如果真係出唔到嚟, 就要去醫院喇!

其實我都好驚, 當時個心都跳得好快, 而滕滕開始就大喊, 就係咁, 鼻涕多左, 佢再用多兩次力, 嗰粒木就噴左出嚟喇!

唉~ 大佬呀! 唔係樣樣嘢都要試架! 有D嘢唔試得架! 衰仔!

真係睇得新聞報導多~

我習慣每朝都會上網睇新聞, 知下時事嘛, 所以星期六日都會好自然咁開嚟睇! 而滕滕就會好似驚死蝕咁一定過嚟一齊睇, 因為當佢開始明白事理時, 我就已經張一D關於小朋友跌落街呀, 火燭呀偷嘢比人拉呀呢D新聞比佢知, 久而久之佢都好似我咁好似好like睇新聞喇!

滕滕有問過我點解d壞人會"凹"住個頭唔比人睇到個樣, 我呢都盡量去答佢滿足佢好其心, 但係我估唔到嘅係, 佢今晚居然扮賊!

真係死唔死, 好扮唔扮! 佢話佢扮壞人喎! 真係比佢笑到肚都痛埋~

尋日忙到虛脫! 早晚各一場wedding, 中午滕滕去上玩手指再加英文班, 上完堂趕番屋企剪頭髮, 成day冇停過!

雖然好充實, 原本應該都好開心, 不過夜晚嗰餐飲宴, 令到我唔like嘅心情勾起番!

夜晚呢餐係舊同事結婚, 咁耐以嚟我都只係得一班舊同事, 因為我冇轉過工! 呢份工, 唔開心多過開心, 但係點解我唔走, 因為做得太耐好多嘢都熟晒, 跟本"的"唔起心肝去搵工!

我自問係一個做得嘢嘅人, 因為我呢個department 一路都冇人走, 所以一路都冇得晉升, 再加上亞姐係一個極廢嘅人, 貪生怕死, 應該有人叫佢食屎佢都會去食, 所以跟本唔會有咩大躍進! 亞姐知我做得嘢, 所以有段時間叫我上大陸幫佢睇showroom, 佢話會有allowance比我! 其實有冇allowance 比我我跟本就唔在乎, 在乎嘅係我有得做各方唔同類型嘅工作, 所以我就一口答應左!

上大陸多左, 係香港嘅工作就更係做少左, 所以成班同事就投訴我話佢地workload大左, 而呢個廢柴亞姐居然叫我檢討下! 真係想吊佢老母囉, 我幫佢上大陸做嘢, 佢居然叫我檢討下! 所以我即時同佢講我唔上大陸喇, 而嗰幾個月嘅allowance 佢就當自己冇講過!

呢d咁樣嘅主管, 究竟係乜撚嘢人嚟架, 咁撚樣都做到主管, 真係好難怪d o靚憎九佢囉!

尋晚去飲, 呢個亞姐又做埋d九屎嘢! 前晚係whatsapp到約左5:30係causeway bay飲一陣嘢先上去, 九屎亞姐一路都唔覆, 過左好耐佢先答話唔去飲嘢, 不過就約我地7點係皇室堡樓下等埋一齊上去!  明知人地約左飲嘢, 就更係唔會7點咁早上去啦, 仲乜撚嘢要我地個個7點係樓下等你一個一齊陪你上去呢! 所以我笑住咁彈佢, 你唔飲嘢就自己上去啦, 仲係樓下又等?!  哈哈, 我講完佢唔答我! 到左尋日中午, 九屎亞姐又話去喎, 咁我又笑住彈佢啦, 你話唔去, 咁冇預你喎! 哈哈, 我講完佢即刻收皮話唔嚟!

係唔係痴九線架, 你當你自己係咩呀? 吊~ 你唔係以為你仲係好高吓嘛??? 年紀你就高! 而家都唔撚係一齊做嘢, 你唔撚係仲想個個日日裝香比你嘛???


嗰時我都唔撚服你, 而家唔該你去食屎啦! 滕滕見到你都同我講唔撚想見到你呀! 未見過你都唔撚鐘意你, 麻煩你就真係要檢討下喇!

笑死又激死!

今朝滕滕一早就同我講佢喉嚨痛! 我怕佢唔知堅定流, 所以每隔個幾兩個鐘就問佢一次睇下仲有冇痛, 結果keep住都係話有架!

呢排真係好多人病, 6點鐘係公司走, 諗住7點鬆可以番到去攞籌, 點不知又塞車! 塞塞塞, 頂唔順叫個工人同滕滕7點出門口去診所先, 點不知個籌去到70号! 我落車打電話去診所問, 都只係睇到四十幾咋!

唯有同滕滕去食嘢先, 食完嘢再行V-city行到9點9 就番診所, 去到都仲要等4個!

睇個醫生都咁辛苦! 終於等到喇, 醫生話滕滕冇喉嚨發炎, 鼻莫都冇事, 其實只係原來係喉嚨嘅左手邊生左粒痱滋啫!

生痱滋!!! 等左3粒鐘原來生痱滋!!!

舒服晒~

問姑娘, 我點樣可以排隊排第一個打針, 因為我真係唔想等!

3:30開診, 我3:45到, 已經排第7個, 即係唔洗番公司喇!

滕滕上次話喉嚨仲有小小紅, 醫生睇左話可以打肺鏈針喇, 真係安落晒! 

未打時, 滕滕同我講佢唔會喊架, 結果, 佢真係冇喊, 真係叻仔! 因為冇喊, 所以又厄左我買左架車! 不過算啦, 咁又真係幾叻仔嘅!  打完針之後, 滕滕同我講, 雖然有小小痛, 但係打完就好舒服喎! 好舒服? 真係唔知有咩咁舒服囉~

今晚瞓時, 滕滕居然同我講........

滕: 媽咪, 其實我今日打針, 我有小小想喊架, 不過我忍住!

我: 係咩?! 咁你又真係冇喊好叻喎!

滕: 係呀! 我忍住唔喊, 因為我想比你讚我好勇敢嘛, 所以我咪冇喊囉! 我只係好想啫, 但係最後都係冇喊架!

我: 哦~ 我都知你叻架喇!

我不嬲都知道小朋友係需要讚美, 因為有讚美先可以比到鼓勵佢地, 但係我發現原來我地父母讚美嘅魔力, 原來係可以咁大(我覺得仲大過個天~~~), 大到係可以令到佢地去克服任何嘅困難!

打針 I

星期六一早我就打去醫生到, 問佢可唔可以留針比我星期一打! 好彩個醫生好人, 佢答應左我得!

呢個醫生, 滕滕自出世之後就係呢個醫生到打針, 而打咁多支, touch wood 都冇咩side effect! 雖然話嚟嚟去去都係嗰幾間藥廠, 但係次次打完出嚟都冇咩事, 就當左係個醫生d針靚囉~

個樣真係衰到呢~ 滕滕話佢唔會驚, 睇佢表現就真係唔多驚囉!

等等等, 由10:30坐到12:00, 12點醫生先番, 排隊排第7個, 結果1:30先見完醫生! 而醫生話佢喉嚨仲有小小紅, 所以唔好打針住喎!

真係想爆粗囉! 等左咁耐, 結果打唔到! 個醫生連關個柜門都slow motion, 真係好想問佢可唔可以快撚d!!!

係到等緊途中, 當時有3個香港小朋友一齊玩緊, 仲要大家好開心好禮讓咁玩緊, 但係當醫生番左嚟, 其中一個入左去見醫生時, 有4個強國人入左嚟, 而其中一個小強就埋位, 埋位搶玩具!

佢亞媽見佢搶人地d lego 冇出聲, 而小強再而搶車! 去到呢個moment我就出聲, 用國語同佢講架車係我地自己帶嚟, 而另外嗰兩架車就係另外呢個小朋友帶嚟! 跟手, 我就即刻叫個(香港)小朋友即刻收番埋袋好自己d玩具, 如果唔係就會冇左!

強媽當然唔老嚟啦, 不過我唔會理佢囉, 你個仔搶我滕滕手上架車, 我就唔可以唔出聲囉! 而我叫另外嗰個小朋友好快d收番埋自己d車之後, 佢婆婆都醒水知道強人搶車, 即刻叫個孫比佢袋好!

呢d人真係冇家教! 老豆老母唔教佢, 攪到自己個仔都係冇家教!

開心死時又嚇餐死嘅長隆之旅~

真係好難先叫老公比兩日假我唔好OT, 終於等到啦, 但係亞奶奶就唔得喎, 佢話應承左去步行籌款, 仲有人贊助佢, 所以唔推得喇!

我份人就好賤格, 聽到奶奶唔去得就有小小開心, 但係又覺得有D周身唔自在, 真係好想打爆自己!

好辛苦咁坐左成4個鐘shuttle bus, 終於都到酒店喇! D人一落車就急步咁入去酒店, 我知, 佢地想快D去攞房, 等check-in時唔洗排隊等咁耐嘛! 我, 唔介意等, 因為如果一陣冇晒房時, 佢up-grade比我咁就好喇!

哈哈~ 果然不出我所料, 我要求嘅一張大床同埋鄰房相連就真係冇晒喎, 所以好自然就up-grade左比我地喇! 有好有唔好啦, 因為佢話升級房係比較遠小小, 要行幾分鐘喎!

因為真係唔識路, 所以行左兩步就見到有個staff 揸住架電平車就載住佢嚟問, 點不知個哥哥仔好好人話車我地去喇!

一問之下, 原來呢d電平車係專係接載我地呢d升級貴賓架喎!

長隆酒店雖然係貴小小, 但係去到就覺得真係好靚囉, 貴小小都值!

我買左飛夜晚睇大馬戲, 所以check-in攞左房卡之後就去食嘢, 食完嘢係房抖一陣沖番個涼就出發喇!

我地叫左電平車嚟接我地出去酒店大堂, 點不知落車行左幾步之後, 我發現我漏左個手袋係架電平車到!!! 我跑! 跑! 跑! 跑去大堂門口同d staff講, 叫佢地call番架電平車搵番我個手袋! 我所有証件同錢都係晒個手袋到, 唔見左, 我同滕滕14日要留係大陸!!!

大酒店可能各方面配套都真係好d, 大堂門口d staff即刻同我call上去我住嗰到嘅9号樓, 而9号樓嘅receiption 即刻call番個司機! 好彩~ 個袋仲係架車到! 不過睇大馬戲嗰兩個半鐘, 我個胃因為剛剛嘅刺激, 足足痛足咁耐!

今次大馬戲, 老豆話少左動物表演, 反而多左真人高難度表演! 因為多左真人show 睇, 滕滕就問我, 點解D女人個個都唔著褲喎! wahahahahaaaa...........

第二朝食完早餐, 就去動物園喇!  呢個動物園就真係大到冇朋友, 因為分開兩PART, 一PART係D好似我地以前荔園咁, D動物係一個固定嘅area 到, 而呢一PART, 就係d動物可以四圍走, 而我地只可以坐係架車到唔準郁! 即刻分分鐘比人圍係我地, 唔係d動物!

因為我地係南門落車, 所以又每人比$10就又叫架電平車由南門車去北門! 而司機哥哥又好好人喎, 佢揸慢d話比我地遊覽下喎! 淨係呢邊, 我估計都可以行足一日都未行晒呀, 真係大到呢~


到左北門, d人多到不得了, 都等左幾架車先上到!

 

 

除左d有攻擊性嘅動物係有條渠隔開之外, 其他嗰d都算係唔太遠! 沿途唔准落車, 感覺就係我地入去比d動物睇咁!

雖然唔多洗行, 但係遊完動物園其實都攰攰地, 所以食完個lunch之後就番酒店"灘"番一陣沖多個涼就走lu~

滕滕好唔捨得走, 佢話好鐘意間酒店喎! 唔止係你, 我都唔想走, 不過唔得呢, 遲d再玩過啦!

駁咀~

曾幾何時我好擔心滕滕覺得個工人同我都係一樣係媽咪, 因為佢同我講個工人係"姐姐媽咪"!

但係大大下就真係越大越懂性囉! 好多時係學校, 老師都會灌輸好多唔同類型嘅智識比佢, 而佢開始知道、明白工人嘅"地位"!

今日滕滕放左學食飯前打電話比我, 佢投訴姐姐駁咀, 咁我咪叫佢同姐姐講, 等佢講完先叫姐姐講, 一個一個咁輪住講啦, 但係滕滕話姐姐唔理佢, 要我放工番嚟話下姐姐!

今晚番嚟, 飯都未食完滕滕就又叫我一陣一定要話姐姐駁咀喎! 咁我就等個工人沖完涼出嚟問佢咩事囉, 原來, 事原係滕滕放學番嚟沖涼, 姐姐叫極佢唔好再玩水, 因為怕佢冷襯所以姐姐話佢, 點不知滕滕就同個工人講佢都未講完嘢, 姐姐跟本就唔應該插咀, 繼而仲話: 工人駁咀! 大膽! 工人駁咀!

Wahahahaaaa.......姐姐講時都忍唔住笑!

眼科覆診

距離上次見專科醫生, 應該大約兩個月到, 初初唔係好明, 點解覆診時間好似咁快, 因為政府嘢不嬲都唔方快得去邊, 今日見完醫生, 我開始明白點解要咁快就去覆診喇~

其實我一路都有問滕滕佢隻左眼情況係點, 有冇清楚到定係差唔多, 而滕滕比我嘅開心答覆就係清楚左小小, 清楚過以前好多! 所以今日去覆診我都心中有數, 應該係有進步架!

未見醫生, 我叫滕滕問下醫生佢好番左幾多, 有冇一半啦, 點不知佢今次唔知仲咩事怕醜喎, 死都唔肯問~ 而係醫生房, 佢聽到我同滕滕嘅對話, 佢就問滕滕係唔係有嘢問佢喎, 滕滕亦都鼓起左勇氣去問: 我想問下我隻左眼睛有冇好番一半呀?

點不知醫生比嘅答覆係: 有呀! 你好叻喎! 左眼睛好左好多, 你要繼續努力呀! 一路繼續遮眼, 直到好番都仲要遮多幾個月先可以叫做完成!  呢個moment, 我都忍唔住問醫生滕滕嘅進度啦, 而醫生都答我, 佢好番左有50% 以上, 如果遠視好左, 咁個弱視都會好番架!

吓~ 我一路以嚟都以為弱視好左先會改善遠視, 乜原來唔係架! 但係我又唔明, 既然醫生話滕滕好左50%以上, 咁點解副眼片嘅度數又唔洗換嘅?

一聽到醫生話改善左, 滕滕真係好識搵機會囉, 因為我話佢繼續努力去遮眼做練習, 好番晒我一定會送架車比佢, 而佢, 都唔執輸, 想我送架細車比佢先囉! 好~ 好~ 好~! 既然醫生都話進步左好多, 既然咁開心, 咁就送啦!

豬仔~ 你要繼續努力呀!

若 要 人 似 我 ， 除 非 兩 個 我~

睇最佳女主角, 最尾訪問嘅係劉嘉玲, 睇晒4集, 我發現原來我同劉嘉玲嘅性格居然有99.999999999相似~ 而唯一唔同, 就係好比較難同人做朋友!

我揀朋友, 有選擇性, 只係幾句嘅對話, 我就知道同嗰個人傾唔傾得埋, 而我尤其係謝絕D吹水唔抺咀嗰D!

我細細個都已經好鐘意攞老豆D拔蘭地嚟索, 屋企雖然細, 但係就隨手都可以攞到幾支, 所以當我一路執屋時, 基本上某D位就會放左支拔蘭地係到, 我可以攞嚟聞! 好香~ 好香~ 真係好香架, 所以未生時, 每當我番屋企食飯, Brandy code 係我嘅至愛!

我都真係好怕d人好婆媽, 就好似我奶奶咁, 問佢乜叉佢都冇主意嘅, 有時直頭講到明係就佢, 佢想點就點, 但係佢就成日都係怕d後生唔like, 所以問極都話唔知! 你成日都話你就嚟80歲啦, 唔通下下都就晒我地自己咩, 有時講到明話就你, 咁可唔可以快D咁比個答案嚟! 一就一, 二就二, 下下唔理你, 一陣你唔like我又唔想啦!

當劉嘉玲話梁朝偉叫佢換燈旦時, 我第一件事就諗起老公, 因為佢都係講同一番類似嘅說話: 媽咪~ 呢到濕左呀! 而我都係有同一嘅想法, 就係點解你唔去抺左佢呢?!  ........其實, 係唔係當每個勤力嘅女人, 佢嘅另一半就係咁嘅呢???  而我, 又未到去咁高嘅階段, 知道佢唯一就係信任我先叫我做囉, 因為我仲未化嘛! 哈哈~

睇完訪問, 我自己會諗, 如果有一日我碰到一個人佢D性格同我咁似的話, 唔知兩個會唔會大打出手or FRD 過打brand 呢???

Order~

唔知幾時開始, 我係自己屋企所講嘅嘢, 就好似人人都會聽我講! 例如亞爸亞媽生日食飯、做節, 去邊到食or 幾時食, 佢地都會比我去話事!  冇人會反對, 係我有時問下佢地鐘意食咩時比下意見我~ 慢慢咁樣, 好自然咁我以後都好似做晒主導!

可能就係因為冇人會reject 我, 所以我講嘢會冇大冇細, 會好直接講我老豆同亞媽嘅不事! 如果要講到"尊重"呢個位, 就一定冇囉!

我嘅行為, 好多時都直接影響到滕滕, 滕滕而家d語氣好多時其實同我一樣, 好直接咁去- order 你!

星期日番屋企食飯, 老豆買左3斤蟹, d蟹殼太硬, 就連鉗我都唔夠力鉗爆, 於是乎我遞左比細佬叫佢幫我! 食完第一隻蟹鉗, 第二隻蟹鉗d殼又係咁硬喎, 我常試左自己去鉗爆之際, 我整到食手, 而且仲流血潻! 係呢個moment, 我個大佬滕滕出手喇, 佢一手搶左我隻蟹鉗, 仲同我講: 你唔夠力就比舅父幫你啦! 而家仲整到流血潻!

滕滕已經唔係第一次order 我架喇! 上次星期日佢老豆番完通宵番嚟, 我同佢去只買一盒飯食, 已經話我仲乜唔買埋比爸b, 要我以後一定要記住買埋佢嗰份, 如果唔係佢起身就冇得食喇!

其實比人order 仲感覺原來好幸福架(如果我係願意的話)~

我！幾時變左隻豬仔，我都唔知道。。。。。

滕: 哈哈~ 今日XXX同學喊! YYY同學又喊! ZZZ同學又喊! 我都有喊呀!

我: 仲咩事你又喊? 咁多同學又喊呀?

滕: 因為我地曵囉!~ 哈哈~

我: 咁跟住呢?

滕: 我地曵, 所以比老師罰企囉! 嘻~

我: 咁點解你比人罰, 而家都仲笑得出嘅?!

滕: 吓! 唔通喊到今晚咩! 豬仔!

滕滕講完呢句之後, 我真係無言囉, 因為如果我係佢, 我會唔出聲唔答, 因為話晒都比亞媽笑我咁都唔知醜嘛, 而我估唔到嘅係佢思想好直接地答我喊都喊唔到咁耐啦~  而家呢個年代, 真係又唔同左喇.......

殘忍~

而家讀書真係好慘, 我從來冇諗過滕滕K2就要同佢溫書, 因為K2只係認單字嘅開始, 但係估唔到, 老師講得出一句"家長都要合作下嘅!" 咁我&滕滕艱苦嘅生活就已經開始.......

今晚滕滕嘅功課, 係講有關英文嘅四季"SPRING/SUMMER/AUTUMN/WINTER"! 一睇到, 我其實當堂個心實左, 因為我覺得而家只係K2啫, 洗唔洗學四季呀!!!

真係好唔開心而家嘅學習制度, 點解要咁深呢??? 而家只係得嗰4歲幾就要學埋呢D咁嘅嘢, 我真係覺得滕滕好可憐囉~

我唔想太迫個仔去死記, 所以我諗我開始係間屋到貼D字+圖畫, 比佢望多兩眼喇..........

你都痴撚線架, 當我傻仔!

不嬲我對D強國人都冇咩好感, 滿腦子都成撚日諗住點樣去厄錢!

兩個星期前, 有個客想我地同另外兩間廠夾柜, 有一間廠就已經好快咁舉手咁話要係佢嗰邊裝貨, 因為佢要KEEP提單! 而當其時我有提過叫佢運輸過一過嚟我廠裝完貨先再去佢嗰邊, 呢個extra charge 大約多RMB200!

正路如果RMB200唔可以, 理應即刻出聲, 而對方冇任何objection, 咁即係代表ok啦! 到左而家就嚟安排時, 佢地嗰邊覆我過一過嚟我廠要收RMB900 extra!

嘩! 搶呀!!! 你冇撚嘢吓化, 收我RMB900 extra 再加多standard 嘅1/3運費!!! 我地自己拖隻柜都唔過RMB1000, 請問你係唔係當九我傻仔呀!

所有mail我都cc埋比個客, 個客睇到居然覆我"This lady is young " ! young你老母啦! young就唔厄錢架喇! 你幾十歲人, 唔好咁撚天真啦! 我把火當堂fung fung 聲咁嚟, 而且仲即刻覆個客, 厄錢嘅係無份老嫩架吓化, 我諗你唔係好熟d強國人囉!

2日1夜

7月去完越南旅行, 但係好似過左好耐咁, 都唔覺去完幾個月, 所以想襯住未係太凍, 我就想去長隆2日1夜~

我亞媽一聽到, 就已經睇月曆, 而我老豆就好似不在乎咁! 亞媽即時睇月曆, 但係把口就講話唔去都得, 唔想我地洗咁多錢, 但係我話老公想奶奶一齊去呢, 亞媽就即刻講, 佢帶埋亞媽去, 你覺得我地唔去好似蝕左咩! 哈哈~ 亞媽, 你又真係幾了解我喎! 因為如果你地唔去, 邊有人可以幫我平衡番個心理呀! 如果要我對住奶奶2日, 我相信我會爆血管囉!

老豆聽到我咁講, 佢就即時話叫我唔好咁衰喎! 不過, 佢又講佢其實都唔係好想見到我奶奶, 佢話, 因為佢太縱滕滕, 佢怕佢抵唔住頸會o趙滕滕時, 得罪我奶奶啦~

哦~ 我而家知道, 原來唔止我一個對住我奶奶反眼, 原來我老豆都係架! 即係唔係我問題啦~ 呵呵!

石硤尾~

襯住老公要番工, 我就今日番亞媽到食飯, 約左亞媽三點幾係石硤尾等, 去已經翻新重建左嘅美荷樓到懷免下惜日嘅石硤尾!

 

 

係石硤尾大嘅我, 居然今時今日先知道呢橦叫美荷樓喎! 我地細時, 只會認位置, 呢個位我地稱之為山邊嗰橦!

帶滕滕去, 係要比佢知道, 以前d人有幾窮, 間屋有幾細! 等佢感受下以前人嘅生活有幾簡單, 而佢而家嘅生活有幾多采多姿!

極度反眼~~~

尋日學校旅行, 今日就放假! 尋日因為太攰, 所以學畫畫改左做下日下午!  畫完畫番嚟理應會瞓一陣, 但係奶奶會入嚟, 所以唔洗講都知瞓著冇耐滕滕就已經起身啦!

今朝冇番學所以冇遮眼做練習, 見滕滕冇瞓覺起左身, 所以我就打電話番去要佢遮眼貼貼紙!

我都唔明, 點解亞嫲嚟親, 滕滕都一定會咁撚曵, 差唔多次次我都想吊起佢嚟打囉~ 叫佢遮眼貼貼紙, 佢就話要嫲嫲陪!

頭先奶奶走左, 我叫滕滕攞本貼紙簿出嚟比我睇, 點不知滕滕原來冇乜點貼過! 而且有個位佢仲同我講係嫲嫲貼, 並唔係佢貼架!

嫲嫲貼??? 我個心已經問, 仲乜撚嘢嫲嫲貼呀??? 仲乜撚嘢無九端端嫲嫲走去貼呀??? 嫲嫲乜覺得好撚得意, 佢又想貼撚埋一份呀??? 佢聽住我打番去要個仔遮眼做練習, 仲乜春嘢佢又走去貼埋一份吖???

其實, 我係唔係都需要買多本比奶奶又做下練習呢????????

我! 犯賤!

其實我知道自己有時都幾犯賤! 有好嘢我會益人, 但係最緊要唔好煩到我囉!

上次幫左個媽媽整左條頸鏈, 佢話好靚想再整, 咁Stan 又話想整多條, 咁當然唔緊要, 只要話比我聽要咩款咩色, 咁我只係通知個賣家幫我整係唔會有問題架!

但係, 嗰個媽之後再整嗰3條, 條條都走嚟問我意見, 呢個字型好唔好, 加皇冠好唔好, 加心心好唔好, 整左會唔會好怪, 問我有3個小朋友年齡都唔同, 每條長度應該係幾長好! 講真, 熟就真係唔係太熟, 只不過個個星期見到面都會吹兩句水, 但係呢3條鏈, 我知佢係幫朋友整, 咁靚唔靚好唔好怪唔怪要幾長, 問我仲乜撚嘢先??? 你朋友買就更係問你朋友啦, 你話如果係你自己戴我就答你啫! 如果我答撚完你, 你又再問你朋友, 跟住你朋友話唔好, 再跟住你又問我意見, 我咪好撚唔得閑???

其實我本身好開心可以同朋友分享, 亦都唔介意幫一大班人訂貨, 但係唔該唔好老實得咁唔客氣乜撚都走嚟問我問得一餐得唔得?!  朋友問冇問題, 但係朋友嘅朋友我唔撚識, 我真係唔會答你囉!

係我地! 攰到散~~~

今日學校秋季親子旅行, 地點係大埔海賓郊野公園!

滕滕前日先發燒, 其實我都擔心佢今日都唔知去唔去得, 點不知尋日瞓到午餐時間12點之後, 佢好似已經冇晒事咁, 而且仲精神百倍!

8:45分係學校集合, 9:15上車, 大半個鐘到就到公園喇, 其實咁大個公園冇咩玩, 都係好似舊年咁學校自制d遊戲, 唱下歌跳下舞咁!

因為嗰到有風箏賣, 所以我地都買左隻嚟放, 不過因為d風一陣陣, 繼老公放左大半個鐘都放唔到, 跟手我又再放下都放唔到之後, 大家都決定放棄喇! 雖然係好冇引, 但冇計!

出門口時我怕公園大風, 仲怕去到凍都唔知點算, 但係點不知熱到扒左係到, 個個小朋友都除剩件底衫!

鬼咩, 真係一滴風都冇!!! 今日仲要同一日有3間學校去, 明明可能因為冇咁多人唔會咁熱, 但係3間學校嘅小朋友係同一個地方, 多人到真係有d好似過年咁, 唔熱就有鬼!

好攪笑地我朋友叫左pizza可以送到去公園門口, 咁食完lunch之後就去睇昆蟲館喇! 睇完再等多陣兩點夠鐘集合上車番學校喇!

原來滕滕好多人都識佢, 因為係公園周不時有小朋友叫佢個名, 而我好相信佢係班到個知名道係幾高, 應該係因為佢夠曵, 又多口又多手!  今年升K2之後, 滕滕就同我講佢有兩個best frd 日日係學校點點點, 而今日我大開眼界啦, 因為呢兩個best frd 分別坐係滕滕左右手邊, 佢地三個一見面就嚟料, 煩到呢, 我估個班主任會反晒眼, 遲早都掉佢地位囉~

我同老公都攰到反眼, 老公一上車就即刻已經瞓著左喇, 但係滕滕仲係係到同坐後面個同學玩緊! 其實個同學仔都好攰架, 但係滕滕係咁仲撩人地玩, 人地唔話佢真係已經偷笑囉, 但係更好笑嘅係, 佢嗰個同學縱使都好攰, 靜左兩三分鐘之後, 又再開番個turbo 喇!

我同佢老豆都攰到想一番屋企即瞓, 但係滕滕呢, 死都唔瞓, 仲要十點幾都仲想玩! 請問究竟你係唔係剛病完架???

字卡~

上星期五老師終於打電話嚟, 老師同我講滕滕認中文字唔係好得, 要我同佢溫書!

其實每一日同滕滕對功課, 我都會問佢今日寫呢個字點讀, 次次問佢, 10個有9個都唔記得! 我一向都冇同滕滕溫書, 因為我覺得一星期老師教幾個字, 而呢幾個字成個星期裏面咁不停repeat, 所以我覺得遲早都識, 但係, 老師打得電話嚟比我, 即係代表頂佢唔順啦, 所以即係要開始同佢讀多d中文字囉~

中文字咁多筆畫咁深, 我覺得真係又幾難囉, 我諗嚟諗去都冇頭緒去點幫滕滕加深記憶, 唯有同滕滕講叫佢努力d啦, 如果星期六&日都記得, 咁我就送一架反斗車比佢啦!

原來, 車-呢樣嘢真係好得架, 講完話送車, 當堂10個字就已經記得7個喇! 我一記得就問一次滕滕, 星期六問完到夜晚, 就只有個"早"字要諗好耐! 到左星期日就連個"早"字都ok埋!

為左加強訓練, 老師派嘅字卡, 我就全部帶晒番公司scan 晒落去電腦到跟手過埋到手機到, 可以方便係街時比佢睇下!

話處女座要求高, 其實人馬座嘅我都唔差得去邊, 樣樣嘢我都要求希望可以盡善盡美, 盡量KEEP到就KEEP, 做到就做, 所以有時我真係好無謂嘅嘢我都會去做, 為求就係可以最靚! 我, 因為唔想d字卡咁快殘, 我就無聊到搵膠紙幫d紙卡過埋膠!

我希望可以一日同佢睇一次, 唔需要刻意去記, 希望比佢睇多兩眼去加強記憶啦~

都算你幾醒目~

上星期四/五, 滕滕已經同我講佢有咳, 不過我番到屋企又唔覺, 所以就只係觀察佢, 到左星期六我唔洗番工係屋企, 佢當真果然冇吹水! 雖然咳得唔密, 不過一咳就好幾聲咁續住嚟咳!

食左3次藥水, D咳都仲好似係咁, 咁係食完飯嗰餐之後, 我就轉左醫生另外一隻咳藥水比滕滕食! 過左一個鐘左右, 滕滕無啦啦同我講: 媽咪! 今次呢隻藥水得呀! 食完個人舒服左呀!

聽到滕滕突如其來嘅意見, 我當堂好開心咁問佢點解咁叻, 轉左藥水食完覺得好左就即刻話比我知! 而個傻豬仔仲好傻咁問我點解咁樣都讚佢喎! 更係啦, 因為有D小朋友係唔識同媽咪講"呢隻藥水得呀!" 所以你識得咁快去表達比媽咪知, 我更係第一時間讚你叻啦!!!

食左兩日藥水, 諗住食多日就停, 點不知滕滕今日三點幾打比我同佢講佢個肚好痛喎! 我問佢係唔係想痾屎呀, 我解釋比佢知D屎屎係個肚仔到想出嚟之前, 有機會會肚痛喎! 點不知, 我係比串架! 佢同我講, 佢只係講"痛"一個字, 並唔係講"痾屎"兩個字, 所以佢只係痛啫!

隔左大半個鐘滕滕又再打嚟比我, 佢話佢真係唔得喇, 佢真係好肚痛, 叫我早D番嚟同佢去睇醫生!

今日有一半時間, 我係個CAM到都係見到佢瞓係張sofa到, 所以有預感覺得佢係唔舒服, 所以我已經開始叫姐姐留意下佢有冇發燒!  見今日公司唔多嘢做, 所以我五點幾就早走, 上車無幾耐, 工人打電話嚟話滕滕99.7度!

見滕滕唔多郁, 我都知佢唔妥, 諗住佢唔舒服會嗲下我啦, 係診所叫佢"捱"落嚟我到, 點不佢答我唔洗喇, 媽咪!

病你都唔嗲下, 請問幾時先嗲下呢~?!

睇完醫生食左藥一個鐘之後, 我知道隻豬仔開始冇咩事喇, 因為佢個身開始出汗, 我仲話同佢踢一陣波, 等佢出多一身汗咁就可以快d好番啦! 點不知, 踢左45分鐘我都已經攰, 但係佢都仲話再踢多陣喎!

耕田~

我好相信因果, 亦都覺得滕滕前世應該係農夫嚟!

 

 

 點解一架鐵嘅車可以成個頂壓平左? 我覺得如果我刻意去壓扁的話都係唔容易, 更何況係一個小朋友!

呢架就仲過份! 點解爛到可以咁離譜嘅! 呢架車好大架好重, 如果唔係搵鎚仔DUP佢, 應該都唔會爛成咁囉!

我陀住滕滕時冇食過D咩特別喎, 我又冇比大力丸佢食, 點解力量可以咁驚人架!!! 

 

裙腳仔~

上星期五同舊同事食飯, 其中一個個女已經14歲, 而個問題係由佢發問嘅!  當知道左滕滕晚晚同我一齊瞓之後, 佢就問我點解唔要個仔自己獨立, 怕唔怕佢大個做裙腳仔喎!

聽到佢問呢個問題, 我反問番佢做D咩行為先稱之為裙腳仔先?! 佢答我, 乜都問亞媽, 又冇主見, 樣樣嘢都唔識要亞媽做, 呢樣又唔LIKE嗰樣又唔得, 樣樣都要就晒佢等佢開心喇, 咁樣嘅行為就為之裙腳仔喎!

我同呢班同事識左19年, 係呢一刻我先發覺有D人嘅觀察力原來可以差得咁緊要! 居然識左我19年都唔知我係一個咩人!

同事都係關心我怕個仔第日大個做裙腳仔啫, 咁我就唯有續一解答佢囉! 第一, 我最憎人識做都唔去做! 第二, 冇主人嘅人其實都幾煩, 乜叉都問, 我老公就係呢D人, 所以我都唔希望個仔似佢老豆乜叉都走嚟問我囉! 第三, 如果呢樣唔鐘意嗰樣又唔鐘意, 咁就SORRY 喇, 你唔鐘意可以行開, 我絕對唔會為左討好你而所有嘢都遷就你囉!

諗深一層, 我呢個同事個女而家唔係裙腳女, 真係好好彩囉, 因為呢個同事係乜撚都話唔知, 過海係九龍尖沙咀食飯唔識路都話好驚, 所以應該係我擔心佢多D囉~

失敗!

我買左呢對鞋, 好失敗!

買嗰時覺得幾靚, 點不知配嚟配去, 原來係好難襯衫架!

可能因為白多黑少, 所以縱使我著左條黑白間條褸, 感覺上都好似唔好睇!

點解我今次買對咁嘅鞋咁失敗!!!

好難想像~

今晚差唔多要預備刷牙時, 滕滕成身玩到出晒汗痴笠笠, 我就打算同佢快速咁沖身等瞓覺都舒服D吖, 點不知隻豬仔同我講: 沖身之嘛, 我自己都得啦!

"我自己都得啦!" - 我知, 我知你而家可以! 但係, 可唔可以留番小小嘢係比我去幫你嘅呢?

滕滕而家4歲半, 當佢10歲時就應該已經唔需要我去照顧佢的話, 即係我仲有5年半可以去痴住佢OR 佢去痴住我!

我有時諗, 如果滕滕開始大唔太需要我時, 我到時就會學嘢, 學呢樣學嗰樣, 聽落好似好開心咁~ BUT, 其實我係覺得, 你唔多需要我啦, 咁我咪自己去搵嘢攪下囉, 唔通成日去煩住你咩, 煩得你多, 一陣你嚴我煩我就大獲喇!

之前滕滕都會唔想我約朋友食飯, 但係我同佢解釋, 因為有朋友生日所以出去同佢慶祝, 如果比著係你生日, 你想唔想你朋友過左好耐先同你慶祝先! 呢番話說完, 以後滕滕再冇叫我唔好去街喇! 佢只係問我, 你係唔係係我瞓著左先番嚟呀? 會唔會唔番嚟呀?

傻豬仔~ 我恨不得帶埋你出去啦! 但係因為我次次出去都係星期五嚟, 所以先唔帶你出去啫! 既然我希望咁想同你一齊出去, 我又點會捨得夜晚唔番嚟見你喎!

自食其果!

我呢, 有時真係幾鬼堅, 不過如果唔係咁堅, 真係對付唔到呢條友仔!  我成日都以自己嘅一套去教仔, 堂家姐唔認同, 佢覺得我對個仔嚴厲同惡死, 成日仲覺得佢教仔嗰一套冇問題, 但係冇問題個仔又點解一d都唔怕佢, 仲要成日玩嘢呢?

今晚番到屋企, 飯都未食個工人就同我講滕滕張D糖紙, 餅乾掉左入浴缸下面個窿到!

呢D嘢就更係刻不容緩, 即刻叫姐姐攞個吸塵機出嚟, 更係比滕滕同我吸番乾淨晒佢先可以步出廁所啦!

 

 

我而家, 已經可以做到不需要大喝大駡, 我只係同工人講一句: 攞個吸塵機出嚟比佢要佢吸番乾淨晒d垃圾出嚟! 滕滕就已經開始驚到流馬尿喇!

滕滕喊住咁叫我原諒佢佢下次唔敢! 好~ 我原諒你都可以, 不過係你吸番晒所有垃圾出嚟之後, 並唔係而家!

可能個窿又黑又睇唔到, 每吸到大樣嘢都好大聲"馮"一聲, 我知道滕滕聽到d"馮馮"聲好驚, 所以我比個favour佢, 就係可以姐姐係廁所陪佢!

結果~

唔怪得屋企咁多曱甴仔啦! 原來滕滕收埋咁多嘢比佢地食!

我相信呢次之後, 滕滕唔會再覺得好好玩, 收埋d垃圾係個浴缸底囉!

好靚吖~

呢排買左好多嘢, 買到收唔到手, 今個月到今日為止, 總共淘左HKD4200! 有1/3唔係我嘅, 而其餘大部份就係滕滕D冬天衫褲&小部份係我嘅冷衫! 我覺得自己好似痴左線咁囉~ 我係唔係已經有購物狂呢個病呢???

今個月最開心就係淘左條鏈番嚟!

可能有上次嘅經驗, 所以今次訂做嘅size 細過上一次, 而且整左玫瑰金色~

我都好like~!

新偉論~

星期四放工番嚟, 滕滕無啦啦同我講: 媽咪, 你以後唔好買車比我喇, 我唔想嘥晒你d錢呀!

咁益我, 當真唔當真呀??? 滕滕無啦啦有日咁突然同我講, 我就知道嗰日係學校老師應該咁樣教過佢!

其實我都好縱滕滕, 成日不停咁買嘢比佢, 攪到佢有時我一入屋, 佢見到無啦啦我帶多左個袋番嚟時, 佢好似知道一定有禮物係佢嘅咁!

我聽到滕滕話唔要車, 我就即刻同佢講: 咁我啱啱又買左車比你喎, 不過未到公司, 咁即係如果到左可以唔洗送比你啦!

嘩~ 當堂叮左一聲咁, 雙眼已經放光喇! 跟住滕滕就問我係唔係真係買左車比佢喎! 我話買左就邊有假嘅呢, 不過, 條件就係要佢唔再搣到d手指皮爛晒, 咁先可以有禮物囉!

聽到有車嗰, 滕滕番偉論就好似已經唔記得左咁lu~

終於完結!

有一晚我同滕滕夜晚臨瞓前同滕滕傾計, 我feel 到佢老豆好好好投入咁去搭訕, 係呢個moment, 我啖氣突然間下左喇!

諗番起, 其實我都係想佢成日都可以好溫柔咁對個仔好d, 我就心滿意足, 當然, 佢唔鬧個仔唔鬧我, 就更係最好啦!

足足過左兩個星期, 老公好似轉左性咁冇乜鬧人, 其實我個心好歡喜時又唔敢表露, 因為有時d嘢好邪, 一講左出嚟就即刻唔係嗰回事, 所以我只係心藏歡喜!

因為老公轉左新公司, 所以呢個月都冇乜開OT, 唔知係唔係個人夠瞓左所以冇發皮4, 而我係呢個moment就會搵機會入佢, 係平常語氣而又唔串嘅聲線去搵拉入佢, 究竟係個人可唔可以EQ高D, 唔好郁D又鬧人, 一郁手就打個仔呢?!  我, 希望佢真係可以control下自己, 因為我段估佢都會好似佢老豆咁, 越佬越麻撚煩, 越老越黑人憎~ BECAUSE 我真係信有遺傳!

見心情好番d, 又係星期六, 所以就親手整左兩味餸!

 

 

 

好耐冇落廚喇, 姐姐煮左兩個餸, 我就煮多兩個, 3個人食4個餸, 所以已經好豐富喇! 不過, 可惜, 手掌咁大隻嘅花甲居然兩個季生都唔識欣賞喎! 問題唔係係味道到, 而係太大隻喎~ ......真係幾一個迷, 太大隻唔好食!

核突到呢~

我都唔知道滕滕幾時開始識玩鼻屎嘅, 成日見到佢係咁撩! 撩! 撩! 撩! 咩都撩清啦係嘛, 仲有咁多嘢撩咩???

係張sofa到又撩! 係張床到又撩! 攪到張床成日有一粒一粒乾左嘅鼻屎係到! 好彩姐姐幾日就同我換一次床單咋! 呢~ 呢樣應該係遺傳嚟架囉, 因為佢老豆又係好鐘意瞓著左時撩鼻架! 都唔知咩人嚟架!

今晚姐姐同我講, 滕滕無啦啦塞粒嘢係佢個咀到, 姐姐問滕滕係咩嚟, 點解咸咸地嘅, 跟住滕滕居然答佢係鼻屎囉~! 真係唔想鬧佢死仔都唔得呀, 衰得咁交關比鼻屎人地食!

成日已經鬧佢唔玩鼻屎架喇, 究竟幾時先唔玩架???

我好相信亦都感覺到小朋友4-6歲係發展潛能嘅階段, 所以我成日都同滕滕長篇大論咁去解釋每一樣事, 而滕滕亦都好不厭其煩咁不斷延續我地嘅話題! 幸好, 滕滕好有耐性咁去聽晒我嘅解釋, 因為堂家姐個仔都未聽到一半就已經走左去lu~

我冇學過點樣去引導佢地嘅潛能, 所以平時我都係盡我所能去引導滕滕思考, 而我其中一個目標就係佢可以講故事書比我聽!

之前買左一d故事書番嚟只係得圖畫, 而呢d故事書正正係想小朋友看圖表達! 我見到d圖畫一心就諗, 咁簡單應該係好容易啫, 但係事實並唔一樣囉, 我叫滕滕嘗試下去講, 佢一口就答我佢唔識!(唔知係唔係滕滕蠢呢? 可能係都唔定..........定係佢未到嗰個年齡所以佢先唔識呢..........)

如果佢係蠢, 唔緊要! 等我慢慢引導你囉, 所以而家每晚講故事書, 我講完一次, 第二晚我都要滕滕講番一次比我知! 起初滕滕都唔肯架, 一叫佢佢就話唔識, 但係我話囉, 次次都係我講比你聽, 你都要講下比我聽先得架! 唔識唔緊要, 睇住d圖畫見到乜就講乜, 因為媽me唔會話你又唔會笑你架!

所以, 我而家好期待, 唔知滕滕幾時先可以唔需要我先講一次就可以就咁講故事比我聽呢~?!

差唔多到10月, 學校先派興趣班d資料嚟, 其實如果家長係想比自己仔女去學嘢, 跟本一早已經學緊, 唔需要等到開左學之後嘅個半月先嚟報!

滕滕而家星期一/三/五/六都去上英文班, 星期三去學畫畫, 星期六下午去學手指手算!

 雖然好似好多咁, 其實4日嘅英文班, 我從來都唔理佢學咩, 個心只係諗學到嘢固之然係好, 但係學唔到都唔緊要, 當係同d西人(老師)吹下水去玩下咁! 而畫畫, 就係佢like, like嘅就真係唔同, 佢好開心, 好想學, 每次去學完畫畫番嚟都比我睇佢嗰日嘅傑作! 我唔望佢畫畫有咩成就, 只係希望佢畫得開心! 手指心算佢又係like, 可能玩下手指仔幾得意卦, 暑假學完, 開學再開班佢都話去玩, 所以比佢玩埋囉!

滕滕而家只有二四係得閑, 收到老師興趣班通告, 有跆拳同普通話係fit for 而家嘅空間, 而呢兩樣我都有興趣, 因為滕滕閑時會自己講d唔咸唔淡嘅火星普通話, 所以我知佢都like! 二選其一真係好難, 結果, 我揀左跆拳班!

今日係第二堂, 收到套衫, 滕滕著左上身唔肯除, 咁我就知佢like玩喇! 其實我都怕佢理解錯, 學功夫係要嚟強身健體同保護自己並唔係要嚟打人, 所以我而家開始又要洗佢腦同佢講, 如果遇到壞人時, 可以用功夫嚟對付壞人, 所以學左番嚟一定要教我架!

真霸道~

唔知滕滕幾時學識咁惡!今晚姐姐同我講佢係街行緊時, 一路行就唔避開人, 無論迎面而嚟 or 係佢前面, 佢都直行直過就撞埋去人地到!

我當然問左滕滕點解要咁做先開佢波啦, 佢居然答我: 因為佢地阻住我囉!

一聽到真係火都嚟囉, 我即刻問滕滕, 條路係唔係你架??? 屋企d車d玩具就係你嘅, 請問條街係唔係你嘅先??? 人人都係街到行, 點解你要話你地阻住你??? 你可以行, 人地都可以行, 點解人地行緊要就你先??? 如果條街係你, 你就可以話佢阻住你, 但係而家條路係公眾地方, 人人都可以係到行, 點解你要話人地阻住你而撞開人地吖???

滕滕畫冊

滕滕畫畫畫得越嚟越好, 睇到佢幅畫D details 就知道佢開始有細緻嘅位置, 而且越嚟越有神髓!

比佢學畫畫原意, 係希望佢可以train佢耐性可以坐得比較耐d, 而且畫畫可以train佢小肌肉, 都唔係想佢有咩一技之長, 但係真係冇諗到佢咁有心機去學囉~

呢幅係我覺得近期最靚嘅作品! 一睇真係嘆為觀止! 我冇諗過自己個仔4歲幾就可以畫到幅咁嘅畫! 當然, 佢有心機去學係main point嚟, 但係我更加估唔到個老師係咁勁, 可以一次過教5-7個小朋友去畫一幅咁嘅畫, 而最勁嘅就係個老師只係廿幾歲咋!!!

 

如果冇一個好老師, 跟本就唔可以畫到d咁樣嘅畫, 所以呢間畫室穴係冇得彈!