今個聖誕有人好開心

前日, 嫲嫲打電話比我, 話佢番上大陸喇, 叫我得閑打比梓祐搵下佢, 所以我地商量好就打比梓祐, 話同佢今晚去 bbq. 一問佢, 佢二話不說, 就已經話好喇, 更係啦, 佢係屋企對住佢亞 e, 咪等同比人虐待一樣, 所以佢一聽見話同佢去 bbq, 就不知幾開心!

今日11:00到就去接佢, 一見到佢, 佢就同我講佢亞e係咁係到鬧我, 話我冇禮貌, 鐘意嚟就嚟, 走就走, 話識左我廿幾年都係一樣, 一d禮物都冇; 我一聽到之後, 我就問梓祐, 乜你地班上面, 有個同學係犯眾憎, 咁你地會唔會對佢有禮貌呢? 佢平時係屋企, 唯獨係佢老公有理佢之外, 跟本冇人鐘意佢, 亦都冇人想佢係到, 如果佢唔番嚟食飯, 大家都會好開心, 因為唔使對住佢, 就算佢放工番嚟食飯, 一個二個都會快 d 食完, 唔想對住佢, 費事食唔落!  所以佢自己心知肚明啦!  我又問梓祐, 佢係唔係好唔底得我地聖誕節有街去, 而佢迫住係屋企湊仔呀, 因為之前有 ana 姐姐係到, 每憑紅色假期, 佢都由朝早出去, 唔到晚上10:00都唔番, 所以今次條氣好唔順呢?! 人生仔, 佢生仔, 我都未見過個仔出世冇幾耐, 就成日出街, 唔使理個"親生"仔架! 仲有喎, 間屋係佢奶奶(即係嫲嫲)幫佢老公係銀行"屬"番嚟架, 如果唔係嫲嫲, 佢邊到可以好似而家咁住得咁舒服, 以為自己已經係升左級嘅太太呀, 所以佢冇權唔比我上去見梓祐, 因為平時係嫲嫲叫我上去食飯嘅! 唉, 唔再講呢 d 人喇, 佢都唔係人嚟嘅, 結左婚就原形畢露, 只係識係個老公面前辦嘢對梓祐好!

我地6點幾去到大欖涌, 燒嘢食燒到成11:00pm 先走, 11:30pm先車到梓祐番屋企, 因為我想係佢老豆放工番到去先同佢番去, 費事又比佢亞 e 點佢, 話佢, 因為就連梓祐自己都唔想見到佢亞 e! 係臨走時, 梓祐同我講: 我今日玩得好開心呀!

聽到之後, 個心好酸, 因為只係 bbq 啫, 佢就已經咁滿足,咁你話佢對住佢亞e 係幾唔開心呢, 但係......佢老豆就唔知佢呢個老婆就係佢面前扮到好好咁對佢呢個同之前老婆生嘅呢個仔, 因為佢老豆已經盲左, 仲要係醫唔番嗰隻!

最後一個二人世界的平安夜

今晚係我地兩個最後一個二人世界嘅平安夜, 心情好矛盾, 因為好唔捨得, 但係又好開心!

我地今晚去左 TST 太平館食飯, 呢到係我地第一次約會食飯嘅地方, 我地成日耐唔耐就會提到呢到, 尤其經過嗰時, 亞 dee 成日問我, 又指住間餐廳, 跟住大家又互望係到笑! 回想起, 嗰時都冇諗過又或者車望過10年後嘅而家會係點, 所以直至到而家, 為左過我地最後一個二人世界, 我地決定番去太平館食飯,勾番起當時嘅回憶!

我地食完飯, 諗住行過去 ocean ctr 嗰邊影相, 但係行到去 harbour city, 竟然 block 左, 行唔到過去, 哎, 唯有行番轉頭, 不過只係小小呢段路, 我已經覺得好攰, 條腰開始頂唔順, 所以我地行番轉頭時, 食埋碗糖水, 就攞車走喇!

雖然係"浦"左短短嘅時間, 但係我地大家已經好開心, 因為我地大家都期待緊亞 b 出世, 明年可以一斉慶祝! 

今日好開心

今日去左菲律賓領事館, 好順利咁交晒所有文件, 只係等明天攞 contract 就 ok 喇, 所以個人好輕鬆, 而且亞 dee 仲同我講: 老婆, 你真係好勁, 乜嘢你都得!

所以今晚亞 dee 就買左餸, 預備打邊爐! 一開始打邊爐, 亞 dee就問我飲唔飲嘢, 我就話好, 跟住佢居然攞左兩隻紅酒杯出嚟, 我一見到就同佢講, 我而家唔飲得酒架噃, 你唔係玩嘢嘛? 跟住佢就笑笑口咁走左入廚房攞支.......忌廉出嚟! 真係頂佢唔順, 係到玩浪漫!

好攰

今日成日都好忙, 由朝早9:00就打電話去沙田威爾斯, 想去攞番個婦科檢查個 report , 但係一直打極都冇人幫到手, 所以就直接去左攞, 但係原來唔係你想攞就比你攞,原來要申請, 要5個工作天先有, 仲要成 HKD695, 簡直係搶!

跟住攪左成個鐘, 11:00由沙田開始去 dr fan 到, 諗住隔離永安有酒樓, 飲茶可以有得 free 泊車, 唉, 點不知, 偷雞唔到, 仲要比成 HKD20一個鐘嘅停車場費都不突止, 要兩個鐘頭內出車, 如果超時, 就計 HKD50個鐘, 所以亞 dee 就連睇超聲波都冇睇, 就要去攞車!

係檢查期間, 我同 dr 講個 report 要成 hkd695, 跟全 dr 就同我講, 早知寫紙比我攞啦, 因為有醫生紙話攞份 COPY, 只需要 HKD30咋, 唉......嗰時真係比死更難受!!!

不過好彩, 見完 dr, 睇完亞 b都開心番, 冇咁興, 因為見到亞 b 好攪笑,好多動作, dr 又同佢影左好多相, 又話比我聽亞 b 好多頭髮, 好長! 仲有其中有張相, 仲係到食緊手指!

見完 dr, 食完 lunch, 就再去菲律賓領事館攪個實實 嗰 d 嘢, 一攪之下, 嗰到嗰個 staff 同我講, 明年1月1日起, 再唔可以咁樣攪, 一定要 through agent, 所以好仲彩趕得切! 但係明天再要去多次, 因為文件唔夠, 明天攪完之後, 後天就有得攞 contract 喇!

今日忙到痴肺, 而且攪左成日, 黃昏我地仲去買生日+聖誕禮物比筠筠簥簥呀!

又唔記得帶屋企鎖匙喇!

今日下午雲尼搵我同我食 tea, 因為我要出去買 bb 嘢! 係個見面過程中, 佢冇講番同我 sent SMS 嗰個嘢, 因為可能大家都心知肚明, 所以佢咁主動話出嚟!

我希望佢知我點諗, 因為我覺得朋友最少都應該互相關心, 唔係有事先搵人, 冇事就揇住個男朋友就飽! 所以係尋日見面嘅過程褢面, 佢都問我呢排點!

其實我從來都冇因為佢拍拖就嬲左佢, 但係學 shan shan 話, 如果你搵左佢幾次, 幾次佢都唔覆你, 又冇理你, 就算吧啦, 因為佢都冇乜 care過你！而係因為我冇諗過, 我識左佢成廿年, 係佢心目中嘅地位係咁小, 唔通我高估左我自己?

尋日食完 tea 之後就番屋企, 番到屋企樓下, 就發現原來自己又冇帶鎖匙! 已經唔係第一次喇, 之前嗰次就話去嫲嫲到求救啫,  但係今日嫲嫲番左去佢自己屋企做節, 所以迫不得意就打左比我表姐要去佢到等我老公番嚟!  唉, 死啦, 呢排成日都唔記得嘢, 好似冇晒記憶咁, 點算?!

成日郁

呢幾日, 亞 b 郁得多左, 成日係到 young 腳, 所以我個肚皮嘅右手邊成日就係到郁下郁下!

星期一又去 regular check 喇, 今次問下 dr, 點解佢成日都打橫咁瞓係到, 唔轉下第二邊先?!

生日飯

頭先啱啱同 san san 食完飯, 慶祝我生日, 但係其實一d 我都唔覺得開心, 唔知點解, 因為由上個星期開始, 我已經好冇 mood, 唔想見人!

由上個星期開始, 我已經日日同亞 dee 講, 星期三唔想出去, 但係又怕 san san 問我點解, 因乜事唔出去, 所以係今日不太願意之下, 就出左去食飯! 果然不出我所料, san san 真係問我仲咩好似好冇 mood 咁, 但係我就真係唔想講點解我好冇 mood, 係因為........

番到嚟, 雲尼打比我, 我冇聽電話, 因為佢次次打親嚟都係係我唔得閑同最唔適當嘅時候打嚟.  原本都有諗住打番比佢, 因為今日 sent 左個 message 比佢, 同佢講生日快樂, 但係佢一直都冇覆我, 所以我就以為佢已經去左台灣, 再者, 次次打比佢, 冇一次係有接電話架, 留左言都冇覆, 所以對我嚟講, 打番比佢同冇打比佢都係冇分別!!!   

其實諗深一層, d 朋友橫掂都係有異性, 冇人性, 佢地打唔打比我, 都冇咩所謂喇, 因為學亞dee 話事計, 唔好當呢個人係好重要, 用平常心去對每一個人, 唔需要特別對人好, 自己就會開心d , 因為我真係想自己開心 d, 唔好睇呢 d 嘢咁重!

我諗我而家個心情, 只係有我老公最清楚, 因為佢明白我點解會咁唔開心!

今日終於開左估喇!

今日去 dr 到 regular checking, 原本都冇乜嘢, 但係星期五同星期日發現又有輕微出血, 個子宮又抽住抽住, 所以今朝四點幾醒左, 要成五點幾六點先瞓得番, 因為好鬼驚亞 b 有事!

見到 dr 之後, 佢第一時間同我睇下亞 b.....唉, 好彩冇咩事, 好正常, 不過 dr 就要我係屋企休幾日息, 唔好番工!  有好有唔好啦, 唔使番工, 又可以瞓晏 d, 但係下午嗰餐 lunch 又頭痕喇, 唔知食咩好!

同 dr 講, 今次可以開估喇, 因為上次番到去比亞 dee 睇隻 dvd, 發現好似類似"何 b 仔"嘅嘢之後, 亞 dee 就成日問係唔係下次開估, 問完又問, 好啦, 就今次開估啦!

係, 真係我想嗰個呀!!!!  So happy!!!! 亞 dee 知道左之後, 都第一時間打比佢亞媽, 打完比奶奶就打比佢家姐, 睇見佢, 好似好開心咁!

其實我都好開心呀!

冇 mood!

呢幾日都冇乜心情, 仲要因為 d 好小事發皮氣, 唔知係唔係因為陀住 bb, 個人會係咁呢?

每馮朝早上左車, 都會瞓覺, 瞓到總站先起身, 但係今朝瞓瞓下, 亞媽就打電話嚟, 話佢想做多份 part-time, 佢講講下, 我都冇心情聽佢講, 叫佢今晚先講, 因為呢 d 嘢, 佢可以尋晚打比我, 但係點解要一早呢, 一係就可以今晚架嘛, 因為好日朝早都冇電話, 一有電話嚟, 就好鬼驚唔知有 d 咩事.  好啦, 收左線之後, 就繼續瞓, 但係就冇之前咁入睡喇......"@"!!!

番到公司, 亞媽第一時間就走埋嚟同我講佢想做 part-time d 嘢, 哎呀, 講左九百幾次, 唔好係公司講埋 d 私人嘢囉, 點解講極佢都係咁架, 好煩好煩呀!  成日都係咁, 解釋過又解釋過, 鬧又鬧過, 點解! 點解! 點解! 點解個天要咁對我, 我真係比我亞媽激列反眼!!!

心情低落

亞 dee 今日番中班, 我襯佢要番工想出去睇下 d bb 嘢, 但係打開個電話簿, 發覺冇一個朋友想搵, 因為結左婚, 有 bb 嘅, 就多數唔得閑, 未結婚嘅, 就揇住個男朋友飽晒!

今日係到諗, 有自己小朋友嘅, 就好明白佢地會好忙, 但係未結婚嘅, 就係唔係有個男朋友就夠呢?  唔通連朋友都可以拋低?  某程度上, 我幾睇唔起呢 d 人, 因為呢 d 人真係有異性, 冇人性!  熱戀期, 就話可以原諒, 咁熱戀過後, 唔通真係對住個男朋友就飽?

唉, 學亞 dee 話齋, 對朋友可能真係唔需要太好, 用個平凡心就得, 因為對佢地咁好, 可能到頭來, 佢地未必會用同一個心去對你!

今日心情不佳

原本尋晚去飲, 好地地諗住咁夜番, 一定好攰, 唔會瞓唔著架啦, 誰不知, 嗰個咁嘅死佬 d 鼻鼾嘈到我瞓極都瞓唔著! 飲緊時, 叫佢唔好食 d 生菜, 佢又死都要食, 又話好好味, 好啦, 食左喇, 就咳左成晚, 叫佢去飲杯熱水, 又唔死去飲!  咁嘈, 你話點瞓呀!!!!!

今日去廣華例檢, 原本冇諗住叫個死佬同我去, 因為想比佢瞓多 d , 但係諗諗下我尋晚比佢嘈到咁, 冇乜點瞓, 真係條氣好唔順.......叫佢食少 d 煙, d 鼻鼾就唔會咁嘈啦, 叫佢唔好食生菜, 一陣佢瞓瞓下又咳, 呀! 講咩都唔理我喎, 攪到我不知幾眼瞓, 所以一於一定要攪到佢醒為止, 唔可以唔去!!!

去到廣華, 就驗左小便就去狙油麻地攞嘢, 45分鐘唔夠, 個姑娘就打電話嚟, 話: "xxx, 叫左你幾次喇噃, 你幾時番嚟, 醫生走架喇, 唔等咁耐!" 我上次 10:45am 到,等到 1:15pm, 行都冇行開過, 而家我行開45分鐘, 就同我講醫生走, 你冇嘢嘛! 好啦, 我之後10分鐘就番到去, 咪又要等幾個先到我睇, 咁個姑娘就唔好講個醫生走啦!  跟住入到去仲攪笑, 個醫生係咁問我有冇睇私家醫生, 如果有, 就比個 report 佢, (因為有 report 佢就唔使做咁多嘢), 跟住又同我講, 如果諗住係私家生, 唔緊要, 同佢地講聲, 就可以取消, 唔使再番嚟廣華!  入左去10分鐘都冇, check 左就 3分鐘都冇, 跟住就同你講, 如果你冇嘢問, 就可以走得!  ...........咩, 服務態度呀, 我有交稅架, 講得串 d , 你地 d 人工我都有份比架!

好啦, 番到嚟公司, 發現個同事今朝一 d 嘢都冇做到比我, 成朝唔知仲乜, 咁唔係我放假佢又放假嘛, 我唔番都要做嘢比我架, 咁我遲 d 放產假, 佢又放喇噃, 好心, 做人唔該醒小小啦, 人地明知你唔係多嘢做, 都唔好比人知你真係咁得閑架, 如果係咁, 公司即係唔使請佢都得喇(雖然係), 同埋雖然我講過, 一日有我係到, 我都會保住佢分工, 但係佢.....咁唔醒, 未免有一日我都頂佢唔順!

突然改變

上個星期, 真係終於都頂唔順同我嘅朋友+同事講, 問佢呢排叫親佢做乜, 一係就做錯, 一係就唔記得!  因為佢成日心不在焉, 好似冇帶個心番工咁! 同佢講, 佢話佢好多嘢煩, 好唔開心, 如果有嘢叫佢做, 就唔好同佢講, send e-mail 比佢(真吹脹)!  咁我就話佢, 唔可以因為私人事, 就攪到做嘢做到亂晒, 任何老闆都唔可能理你或接受你有私人事而影響工作, 更何況係客! 所以我叫佢要學習下"公私分明", 因為你第日係另外一間公司做嘢, 唔通你同你上司講, 話你心情唔好, 叫佢唔好口頭分付你做嘢, 有嘢要做就 send e-mail 呀!

好啦, 同佢傾左一陣, 原來佢係煩佢男朋友之前個死鬼老婆嗰邊 d 親戚 d 嘢, 成日係到攪攪震.  唔知係唔係同佢傾完之後, 佢個人冇咁唔開心, 冇咁煩, 咁居然佢今個星期煮飯, d 餸居然冇晒 d 肥豬肉喎, 仲要係有小小肥佢都切埋出嚟, 你話係唔係好出奇呢!  其實原來佢之前跟本就知道我唔食肥肉架, 但係點解佢而家先就我, 就真係一個迷喇!

真係唔係好明

啱啱去完我姨甥到番嚟, 就有 d 真係諗唔通同心情唔係好好!

係唔係做後母一定要做到咁黑人憎呢, 雖然我姨甥唔係佢親生, 但係都唔使對個小朋友咁衰!

我已經幫個女人諗盡解釋, 點解佢要咁對個小朋友, 可能係對佢好呢; 但係就算想個小朋友好, 都唔使咁鬧佢, 係又係鬧, 唔係又鬧, 都唔會耐心咁教佢, 係個老公面前就做到係一個好好嘅後母, 但係個老公唔係到, 就變左另外一個人!

我一真好想同個男人講, 你而家個老婆點對你同你前妻個仔, 對住你係一個人, 背住你又係另外一個人, 不過諗深一層, 如果個男人真係有理智, 就唔會只係話自己個亞媽唔啱, 幫住個老婆, 話個老婆啱晒啦, 對亞媽都可以咁, 咁何況係同之前個老婆生嗰個? 我知, 佢之前個老婆負左佢, 掉底佢地兩父子, 佢好憎佢前妻, 但係佢曾經話過, 會比最好佢個仔, 唔會再有人蝦佢, 但係如今佢而家個老婆咁, 佢都可以話佢係對個小朋友好, 咁我真係好想問, 乜你知個小朋友開心咩? 咁同對佢唔好有乜分別!

我睇見個小朋友咁, 佢唔開心, 我都好唔開心, 好心痛, 因為我好錫佢!

懶惰的亞 b

眨下眼已經差唔多22個星期喇, 自從上次 feel 到亞 b 勁郁之後, 就係呢幾日先開始 feel 到佢郁, 不過就懶 d , 因為佢通常會係夜晚, 我坐係到睇電視嗰時先郁, 好似平日咁, 就真係好少! 可能就係因為夜晚我唔想郁, 佢先至係到郁!

又係肥豬肉!

今日個 lunch 又係肥豬肉喇!  所以我又挾晒 d 瘦嘅, 留番 d 肥嘅比我嘅朋友+同事!

一年前, 同佢去參加必瘦站減肥, 之後 lunch 大家一直都係食菜多(因為佢好想好想減肥)直至我有左同埋一人煮一個星期飯之後, 佢就成日整肥豬肉!  暗示明示之間都講過好多次比佢聽, 我唔食肥, 但係次次佢整 d 餸都係肥都不得了, 仲要話肥先好食! 咁好啦, 既然係咁, 我都唔再講喇, d 肥嘅就由佢食晒啦!

放假後嘅第一日番工

今日係我放左三日假後嘅第一日番工, 正常嘅人都會問候一下我點, 但係嗰個朋友+同事, 就一句都冇問, 好似當冇事發生過咁!

有時我真係好想問下佢, 乜朋友係唔會互相關心嘅咩, 定係你一直冇當過我係朋友呀? 佢之前話佢亞媽病左, 佢都冇問一句, 因為佢話咁樣問, 做人好似好假咁, 咁我又好想問下佢, 如果你病左, 咁你想唔想人關心下你先?! 如果人地問候你, 咁你又覺得人好假?

有時我係到諗, 如果我地真係咁好朋友, 係唔係直接 d 講佢咁想係唔啱? 因為人與人之間, 應該互相關懷同了解!  但係明知佢個人樣樣嘢都死撐,包頂頸, 同佢講都晒氣, 咁講嚟又有咩用先!

所以既然佢係咁對我, 我亦都係咁對佢, 因此我地而家就越嚟越小嘢講, 甚至乎除左工事外, 一句閑計都冇嘢講!

 

唔通係.......

尋日有一新發現, 我比亞 dee 睇番去 dr 到檢查嗰隻 disc, 睇睇下, 個畫面轉左做 4D...... 發現bb 雙腿之間好似見到有何 b 仔呀~~~~~~~

其實一直以嚟, 我都冇諗住要知道係仔定女, 仲要叫 dr 唔好同我講, 因為我唔係好想知, 只要亞 b 係健康就得啦! 但係前日去檢查時, dr 就同我講佢已經 100% 肯定係仔定女, 不過如果我仍然唔想知, 佢都會繼續保守秘密!  不過 dr 就加多左一句: 不過你老公好似好想知喎!

係呀,我都覺得佢好想知呀, 因為佢成日問住我, 下次去例檢, 開唔開估, 成日就問我, 我答左佢唔想佢又再問, 問完又問, 所以諗諗下我諗下次真係要開估喇, 如果唔係比亞 dee 煩死!

懶惰的休息

尋日番到公司, 發現有小小出血, 於是打比 dr 問下情況, dr 就叫我即刻去比佢 check 下, 好彩 check 左都咩事, 唔關個 bb 事, 但係都嚇死我!

Dr 見我咁緊張, 於是開左張醫生紙比我, 有三日! 起初我都冇諗過放晒三日, 但係公司又唔多嘢做, 番到去, 都係係到等運到, 所以就比自己懶下, 放埋明天才番工!

唉, 如果老闆識做嘅話, 不如連星期六 on shift 都唔使我番就好喇, 不過我諗都好難, 佢跟本日日都想見到我, 我冇嘢搵佢, 佢都走過嚟講埋 d 廢話, 所以我諗放星期六都好難! 

我應該好番晒喇!

我今日真係好勁,一個咳都冇呀......我諗我應該都好番晒喇!

咳左成兩個月, 而家先致好番, 真係好慘, 睇左三次西醫都清唔晒 d 感冒, 之後頂唔順走左去睇中醫, 不過頂唔順中醫 d 藥都要頂, d 苦茶咁難飲, 都要飲, 因為蔡醫師真係好勁, 連我 d 頭痛勁左, 都把到出嚟, 唔想睇佢, 都唔得!

 

比個識左廿幾年嘅同學吹脹

唉, 識左廿幾年嘅同學, 真係估唔到佢咁鬼死懶!  同佢去睇神婆, 個神婆叫佢去和合二仙拜神, 佢就諗住叫我倍佢去, 但係因為我嗰時啱啱有左, 其他同學都叫佢唔好搵我去, 因為啱啱有左, 個胎未定..........好啦, 佢拜完之後, 就同我講, 因為佢唔識拜, 所以佢 d 頭髮差 d 燒著!  

係人都係咁拜神架啦, 人又拜, 你又拜, 又話 d 頭髮燒著, 咁同我講埋 d 咁嘅嘢, 即係係唔係係到寃我先! 就算我唔同你去, 咁你可以搵其他朋友架!

到第二次, 神婆又叫佢去十字路口到燒衣紙, 我幫佢買晒嘢(成百幾蚊衣紙, 仲要好鬼重), 我約左佢兩次都放我飛機, 咁唔係我個問題啦, 好喇, 算, 約埋佢第三次, 叫佢入嚟屯門燒, 因為如果佢要我幫佢, 就要入嚟, 我唔想係 d 市區到撞到 d fd, 所以就教埋佢係灣仔邊個地鐵出口出, 到左屯門第幾個站落, 點不知佢諗都唔使諗就答我佢未入過去屯門, 唔識!  我知道佢唔識, 所以咪教佢點入囉, 係 fb 講左比佢聽, 佢又唔抄底, 仲要怪我 off 左 line!!!

我想問下, 乜唔可以 off-line 架???  問心, 如果你個朋友幫左你咁多, 預備好所有嘅嘢, 只係叫你入去佢屋企附近, 係佢屋附近幫佢自己燒衣(要記住, 幫嗰個人, 係義務, 仲要係大緊肚), 使唔使講句唔該先???!!!  講真, 我冇乜必要要幫, 只係佢上次佢講到 d 頭髮都燒著埋, 我先幫佢, 咁仲想我點!  我發火, 都好正常啫, 我幫佢買晒嘢, 教埋佢點搭車, 佢諗都唔諗就答我唔識, 佢唔知點入!  當時我真係好火滾, 唔通要我出去銅鑼灣接佢???  如果佢真係聽個神婆講, 燒完嘢就可以快 d 搵個男朋友, 咁佢就一早去燒啦, 佢唔得閑, 就問我究竟幾時得閑同佢去, 佢下半生就係我手上, 好似怪我好唔幫佢, 同佢去燒.......咁我真係想問下, 而家邊個想搵男朋友呀!

我做咁多嘢, 都係因為佢係我朋友, 但係我冇諗過, 原來佢覺得我咁做係應份架囉, 唔該都冇講句, 仲怪我好惡佢!  屋企人都唔可以咁依賴, 男朋友都唔可以, 更何況係一個朋友?  我自問已經做到好多好多, 冇叫我都幫佢做埋, 咁唔通要我去幫佢燒埋佢 d 衣紙???  咁就真係再問多句, 而家邊個想搵男朋友呀?????????????????? 

第一次 feel 到亞 b係到勁郁!

今日同表姐去 jusco 睇 bb嘢, 行到腳都段埋, 因為折完再折, 只係個"坐"奶器由 hkd 228減到成 hkd 194, 仲要買滿 hkd180仲減 hkd20, 幾正!

買完嘢, 我地就行去排隊等食飯啦, 點不知要等成幾十個, 咁咪再行多一陣囉, 嘩, 突然間個肚=個 b, 係咁係到郁, 仲要係勁郁, 連亞 dee 都 feel 到呀, 幾勁呀!

估唔到第一次就係咁發生左, 係咁嘅環境之下就出現左, 其實我諗都係差唔多時候 feel 到喇, 但係係當時 moment, 我真係冇心理準備, 因為我諗住如果係屋企發生, 我可以靜靜地同耐心地去感受下, 同埋專心咁記實佢, 因為我成日都覺得都仲唔知會唔會再有下一次, 所以襯住呢次幾會, 將所有嘢記住佢, 留番嚟回憶!

 

 

自己捉蟲!

自從我建議每人煮一個星期飯之後, 唔知係唔係真係自己捉蟲, 我已經好多次講左我唔食肥豬肉, 佢都係照煮!

其實學亞 dee 話事計, 我係唔係要煮 d 佢唔食嘅嘢去玩佢呢? 我真係唔明, 佢次次 d 餸都係咁肥, 我次次都唔多食, 佢應該知, 咁點解佢仲要咁呢? 唔通佢想我頂唔順, 唔使佢煮? 冇可能啦, 一人一個星期, 好 fair 啦, 佢唔想都要架啦, 出去食, 佢又話貴, 叫外買都係咁上下, 唔通佢諗住我頂佢唔順, 整埋佢嗰份?

做同事或者做朋友, 有時 d 嘢, 唔使講到咁出面卦, 好多嘢, feel 到就知啦, 唔係蠢到要人下下直接講嘢, 咁大家都好冇引啫!

但係有時諗諗下,佢又係我朋友+同事, 係唔係唔好同佢計咁多呢, 但係佢下下都要等人諗埋佢嗰份, 我就好唔得閑啦, 做朋友都要識做嘛, 有時我做先, 有時你做先, 如果次次都好似老憑咁, 就真係 sorry 喇!

好似之前佢啱啱番工嗰時, 我係 ok 等埋佢, 同佢一斉行, 咁都唔好日日好似老憑咁等啦, 明知我搭巴士, 一定會預早小小, 咁搵一兩日早 d 得唔得? 我唔係你男友, 唔係下下都要等你架! 好啦, 直接我頂唔順, 話唔等你, 咁嗰時, 大家都冇引!

做朋友, 做到咁, 真係好冇引, 如果我叫老闆抄左佢, 我又唔忍心, 因為我知仍冇乜學識, 出去搵工都好難搵, 但係做到好似佢咁咁唔識趣, 就真係好反眼......唉, 頂係反眼!

第一次去廣華檢查

今日第一次去廣華做檢查, 足足等左成兩個幾鐘, 嘩,諗住等左咁耐,入去做番我係私家醫生嗰 d 檢查都底番啦, 點不知只係用個儀器, 聽下個心跳, 問幾條問題, 咁就完成!!!!

唔怪得私家醫生收$, 又見到 bb, 又有相比, 就真係值回票價啦!  

我的大頭 bb

今日去做例檢, 嘩, bb 大左好多呀, 已經唔係之前咁, 可以係個畫面到睇到成個 bb喇, dr 話而家只係可以度個身幾長, 手腳幾長加埋去估計亞 b 幾長, 因為佢身體會轉嚟轉去, 好難度!

當亞 dee 見到bb 個頭時, 就話: 個頭好大呀, 之後我就話可能呢個階段係個頭大 d 呢, 之後我就再問 dr, 個 b 算唔算巨型呀, 因為個個朋友見到我個肚都話我個肚大, dr 就話喇, 唔算, 所有嘢都 ok呀, 幾好呀, 合乎標準呀, 不過個頭就係大左 d , 個頭就17週幾, 個身就16週幾......跟住 dr 就係到笑喇! 

嘩, 個頭大咪好難生囉, 跟住 dr 就話, 咁又唔係, 唔可以話個頭大就難生嘅!

我想順產呀, 唔想開刀呀, bb 記得幫下媽咪乖乖地喇!

睇到bb, 真係覺得好微妙, 因為渴望左咁耐, 終於比我地得賞所願喇!

好無奈, 對住個朋友+同事

我尋日問亞 dee, 問佢覺唔覺得我有左之後, 個人火爆左, 佢話係, 因為我呢排成日講 kleenex  d 嘢, 唔比我講又唔得, 於是就比我發洩下!

唉, 你估我好想講嘅咩, 我都唔想日日都咁"糟", 因為我都怕個 bb 會係咁, 但係成日對住佢, 唔興就有鬼啦!  我問亞 dee, 其實佢知唔知我反佢眼架, 亞 dee 就話更係知啦, 點會唔知呀.  咁又係, 因為我覺得我地越嚟越冇嘢講, 連想搵嘅話題都冇, 甚至乎一 d 等閉事都好似唔想講, 同埋佢成日唔出聲, 咁我都會唔出聲!  但係我又唔係好明, 點解明知人地反佢眼, 佢都係咁嘅呢? 唔通佢唔怕黑人地憎? 跟住亞 dee 就話喇, 所以點解佢以前個老闆唔鐘意佢呀, d 豬頭骨比晒佢做, 都唔叫其他人做, 就係咁原因喇!

我份人就係咁, 如果你冇理我感受, 我係唔會理你.........你唔好諗住樣樣嘢都係我先, 因為我唔係你嘅另一半!!!!!! 

 

 

點解你死日係到死撐???

唔知係因為有左 bb 個人變得火爆左, 定係佢真係另到你咁反眼呢?  我成日宦係到講, 唔識唔緊要, 只要努力 d , 唔識去學去查字典, 咁好多嘢都可以自己去解決, 咁淺嘅嘢, 連 anson 都知, 咁點解你仲可以係咁, 唔識仲去"大"番人, 仲去爻咀?  我同你講, 有時係想話比你知, 你可以點樣進一步去做, 但係一同你講, 你就爻咀, 話比你知你好似好叻, 已經係咁......喂, 如果你真係咁醒, 我就唔使同你講啦!!!!!!!!!!!!!!!!!!

有時你 d 嘢做錯左, 叫你去改, 咁你就認真 d去改, 唔係求其去改比我, 你求其改比我, 冇用架, 我唔會比個客架, 因為人地已經發現左有問題, 係你改完比我睇嗰份, 我就唔會咁輕易去放過你, 因為我唔會比個客知, 我個 assistance 好唔小心, 而且我身為上司, 都發覺唔到!

我真係唔知點同你講, 好似上次話你做嘢慢, 你就一句話, 只係我覺得, 你唔覺得自己慢, 咁當然, 有精神病嗰 d 人都唔知自己痴左線啦, 咁如果你唔鐘意接受人地批評, 我就唔會再講多一句!

但係再係咁落去, 我怕我有一日真係頂唔到你幾耐, 因為我唔想日日反眼同埋對住一個, 錯而不改嘅人!  

人蠢係唔係真係冇藥醫呢?

有時真係好唔明佢點解咁做, 我地日日煮 1  3/4米, 多都食唔晒, 咁點解見到個米袋有淨都仲要煮埋佢呢? 

佢寧願食唔晒, 煮左佢, 然後就倒左佢, 咁為乜呢?  咁佢知道自己跟本就唔會食埋多左嗰 d , 呁煮嚟就真係好浪費, 倒 $ 落垃圾桶冇分別!

公平 d 去做啦!

今日我同 kleenex 講, 由下星期開始, 一人煮一個星期飯, 下個星期就我煮先, 跟住佢就好大反應咁答我: 唔係嘛, 我唔知煮乜喎!

咁唔知咪就係要諗下囉, 你唔可以下下要我去幫你, 我唔係你另一半, 唔好成日以為人地應份去幫你先得架, 我真係好唔鐘意佢咁.......如果唔知煮乜, 你就番去商量下, 或者上網睇下, 咁你睇 cake 都係咁睇啦, 咁點解整 cake 就知整乜, 煮飯你就唔知呢???!!!

我諗大家咁熟, 你應該知我份人最憎比人煩住, 我唔鐘意身邊 d 人太依賴, 唔好樣樣嘢都諗住我, 我成家人已經係咁, 如果我識嘅人都係咁, 我就真係好唔得閑!!!

開心嘅嘔!

呢幾排, 真係嘔到扒係到, 唔知想點, 一時就幾好, 一時就好辛苦, 我同 tina 講, 冇諗過係辛苦得咁緊要, 因為我見好多人都冇講過好似我嘔到扒係到!

.....................

尋日我終於忍唔住, 同左 kleenex講, 因為我見到 d 菜就反胃, 好唔想食, 如果下個星期又去買菜, 咁點算呢, 所以就講左!

我今日一番嚟, 就見到有包話梅糖係枱面, 我一睇, 就知係 kleenex 買, 因為佢可能諗番起之前係街市, 我買過話梅糖! 佢同我講, 唔知我想食乜, 所以就買左話梅糖, 佢原來想買 d 酸嘢比我食, 但係又唔知我想食乜, 所以就冇買到!

有時真係唔知佢諗乜, 人地病, 佢又不理不睬, 而家又咁.........同佢做朋友, 唔通真係要接受佢呢個缺點?!

 

 

你唔係呀嘛.................

我今日冇番工, 因為 dr. fan 叫我休息下, 咁李生就叫我唔使番, 佢番!

我都諗住佢冇咁早番到, 所以我打去 UPS cancel 個 order, 叫佢地星期一早上先至取件, 但係 11點幾 kleenex 打比我, 話亞姐去到冇人, 跟住我話李生話佢番工架噃, 跟住佢話集都未開, 咁我就叫佢叫亞姐走, 唔使收!

我真係覺得好奇, 如果係朋友, 都會問下我仲咩唔番, 係咪有事, 但係佢真係冇, 我覺得可能佢已經覺得唔係, 因為佢只係識得關心佢自己身邊嗰個, 因為佢身邊嗰個唔舒服, 就唔煲湯, 我唔舒服, 就冇問過我一句, 亦都冇問過我煲唔煲湯!

我越嚟越覺得佢係一個怪人, 因為佢問 san san 想唔想去佢個 wedding party, 叫人地直接講, 因為大家咁熟, 當時我真係好迷, 第一, 乜你同人好熟咩, 咁你有冇人地電話先?  第二, 你地平時有見過面咩?  第三, san san 係我個妹+好朋友, 你唔係諗住連我 d friend 你都請埋呀???  你叫人地直接 d , 咁你自己都唔係一個直接嘅人, 咁你居然叫人直接同你講???

簡直係一個迷!

 

 

Dr Fan, 係你喇!!!

今日四點幾, 去廁所發現有小小血, 死啦, 當時真係好驚, 於是即刻打比老公, 叫佢同我去睇醫生.

打去亞盧個醫生到,  d 姑娘話醫生唔係到, 去左接生, 於是就搵亞官, 亞官幫我約左佢個醫生6:00.  未夠6:00就到, 但係成7:30先睇到我, 唉, 冇計, 鬼叫你冇 bkg 咩!

睇完醫生, 嘩, 個醫生好好人, 好溫柔, 又好詳細, 可以同董醫生有得 fright, 同亞盧嗰個真係差天同地, 亞盧嗰個可能對 d 大陸女人多, 個人又冇乜禮貌, 又粗魯, 問佢嘢, 又唔答人, 只係話睇而家, 妖,講真, 我搵你, 有問題, 梗係想知道自己之前係咪有嘢做錯啦, 淨係一咪話睇而家, 睇而家,  所以....... 我決定亞官嗰個范醫生同我接生.  雖然佢係男醫生, 但係好難會搵多個醫生好似佢咁溫柔, 因為 i like it!

 

 

朋友重要d, 定係男朋友重要d???

我諗左好耐, 究竟講唔講好呢, 其實我都想同佢講, 但係諗深一層, 同佢講又點, 佢又唔會問下我, 因為就算我病,佢都唔會問一句,因為佢只係會關心佢自己嘅另一半, 唔會關心人地, 所以最終, 我都冇講到!

其實如果作為一個朋友, 無論對方有任何事, 作為朋友都要適量去關心, 因為朋友係互相幫助, 互相關懷, 並唔係好似佢咁, 不聞不問.  所以我明白點解佢之前會........

5-5.5個星期

今日去左亞盧個醫生到 check, 醫生話應該5-5.5個星期到, 佢仲比埋 bb d 心跳聲, 當期時, 我真係相信呢個係事實, 因為我地兩個親眼見到!

不過, 呢個dr真係唔係好好, 因為放左支嘢係照超聲波嘅, 但係d手勢就好粗暴囉, 好似攪蛋糕咁, d語氣都唔係好nice, 唔知係唔係佢對得d大陸人多, 所以冇乜禮貌!

講左...........你做人daddy喇!

尋晚點幾鐘, 個頭真係痛到爆, 我又唔敢食藥, 因為我怕影響到,於是, 我迫於無耐叫左亞 dee 同我按頭, 係佢同我按之際, 真係好想同佢講我 check 左有, 但係, 我最終都係冇講!

我今日冇番工, 因為今朝起身好辛苦, 尋晚一直都冇乜點真正瞓過, 同埋起身嗰時, 個胃好似抽筋, 個人又時冷時熱, 所以我之後就打比李生請假唔番!

兩三點到, 我打比亞 dee 同佢講, 我冇番工, 叫佢買嘢番嚟煲粥比我食, 因為我應該感冒菌入腸!

亞 dee 番到嚟, 佢已經冇乜嘢, 可能佢見我唔舒服, 所以都關心我, 咁我見佢咁, 我就問佢聽唔聽話, 如果聽話, 就同佢講個秘密, 終於, 我同佢講左.

當時佢聽到之後, 問我點解, 因為佢都好 surprise!

 

 

Surprise

今日終於鼓起勇氣去買嘢 check, 因為我問 katherin, 其實遲左幾多日先去 check, 因為我唔想浪費左 d $!  但係 katherine 話, 好過你而家15/16, 所以 check 下, 得個安心同答案!

我諗左好耐, 點同李生講,我上去萬寧買嘢呢, 我唔想直接同佢講, 因為我怕唔係, 於是, 我諗左好耐, 終於只係同佢講我想上去買嘢!  買左之後, 我第一時間去 toilet, 之後就即刻番公司睇, 一睇, 係 positive!!!!  睇到之後, 我真係唔敢相信, 因為我冇諗過係咁, 真係好想第一時間, 搵個人同我驗證(呢個人一定唔會係 seven囉), 因為我真係唔相信!  諗左好耐, 我終於同李生講: "好似係", 跟住李生叫我去買多支, check 多次, 於是, 我放工就上左去萬寧買多一支另外一個牌子!

番到屋企, check 完之後, 個答案一樣!  但係個心都仲係唔係好信, 因為如果係, 就真係一個奇蹟, 因為我今個月都冇做 iui, 咁點會呢???

我真係好想第一時間同老公講, 但係我地之前嘈交, 我唔想先同佢講嘢, 費事佢一陣以為我想氹番佢, 因為今次我真係好嬲!