嘩! 滕滕堅呀! 話咁快, 第二隻牙就已經出左嚟喇, 不過只係出左小小,所以連相機 zoom都好埋都睇唔到!
但係有陣時, 我真係好想feel下佢d牙仔囉, 所以我搵條沙巾包住隻手指申入去滕滕個口到 feel下, e, 真係好得意喎 !!!
亞dee話: "睇嚟唔使問, 佢第日d牙仔你都會keep起佢架啦!"
冇錯, 我會keep起佢架, 你真聰明!
2009年9月30日 星期三
2009年9月29日 星期二
!2009年9月28日 星期一
2009年9月25日 星期五
唔通我真係可以唔使買餸?!
前日真係把鬼火, 因為亞dee成日卦住去睇車, 打比佢又唔聽, 電話又唔覆, 所以原本諗住佢放早可以去街市買d瘦肉比軒軒煲粥, 都要我放左工, 趕去街市買左先去搭車! 好啦, 知道佢都係買唔到瘦肉, 就諗住叫佢去買支藥膏比軒軒, 因為有蚊咬佢! 呀, 頂! 又唔聽電話!
好! 所以番到去食飯嗰時, 我就話: "我有嘢要宣佈! 從下個星期開始, 我唔再去買餸!" 我同個工人講, 以後有關飯餸嘅嘢, 你唔好再打比我, 冇菜--> 打比先生, 冇肉-->打比先生, 冇米-->打比比先生! 總之以後關於三餐都打比先生, 唔好再打比我!
因為我覺得:
1) 我唔可以乜嘢都做晒
2)點解我要自己做晒咁辛苦
3)點解我做晒D嘢, 亞DEE都唔覺得我對佢好好, 唔使佢做, 仲可以做晒D嘢, 冇諗過要幫手
4)點解佢覺得佢搵車已經好辛苦, 唔覺得我自己一個做晒D嘢仲辛苦
5)點解我要佢幫我嗰陣時, 佢仲覺得我煩住佢, 唔自己攪掂
以上仲仲原因, 都足夠比我自己千萬個理由, 可以叫佢: 以後買餸由佢負責, 因為佢要知道, 我都好多嘢要做架!!!!!!!!!!!!!!!
跳到痴左線!
軒軒而家成日都要企, 企企下, 仲要係到跳, 跳到痴左線咁, 個工人仲話, 而家一同佢落地行, 就仲開心!!! 唔係嘛, 咁快就落地行, 咁即係唔使好耐, 我地就好似看牛咁看喇!
前日, 亞dee帶滕滕去健康院時, d姑娘講, 而家可以食得粥仔架喇, 問我地比佢食過未!
唔係嘛, 食左喇, 仲要一日兩餐喇! 跟住個姑娘又問, 食完粥仔可以唔使補奶粉比佢喎!!
唔係嘛, 佢成完粥仔, 都仲未夠喉, 要飲埋奶喎!
個姑娘即刻就話喇: "吓, 你比咁多嘢佢食! 太多喇! 食左粥仔, 可以唔使比奶架!"
吓, 佢食左大半碗粥仔之後, 就唔想食喇, 我地都曾經以為佢飽, 但係過左一陣, 佢就係到嘈喇! 咁我地咪開左100cc比佢飲囉, 佢都照飲, 飲完就乖晒喇!
咁如果佢真係唔夠, 唔通我地唔比佢飲咩!
滕滕, 你食咁多嘢, 唔好變肥仔呀, 第日大個就唔靚仔架喇! 夠飽就算喇!
給軒軒的信!
我最愛的滕滕軒,
我早幾日又買衫仔比你喇, 因為天氣開始轉涼, 所以要預備定d比較厚嘅衫比你! 買衫嗰時, 個靚女姐姐同媽咪講: "嘩, 你好細心喎, 度埋個囝個身幾長先買!"
咁就更係啦, 我咁辛苦撰撰埋埋d衫仔咁靚比我嗰個肥滕滕著, 買左番去, 唔啱咪好side!
睇住你, 一日一日咁大, 由瞓係張high chair到, 成舊飯咁, 至到今日, 係個cam到見到工人姐姐扶住你係地下到行, 我個心就好內疚, 因為平日最長嘅時間, 我就係公司陪唔到你, 只可以係個cam 到睇住你!
有時, 係個cam 到見到你同工人姐姐玩到"唧唧聲", 我真係好想同你玩埋一份; 有時又見到你要食奶, 係到喊到拆天, 真係好想有道叮噹嘅時光門, 即刻番嚟喂你食奶; 有時又見到你自己一個懵成成咁自己同自己玩腳, 我真係好想番嚟索下你隻腳仔d嗅味!
可惜, 你要體諒媽咪要番工! 你食粥仔嗰時, 我都有係公司吞口水, 好似係到教緊你食咁架; 你係到跳下跳下嗰時, 我都有係到講: 你個曵曵豬, 成日都係到跳!
所以, 如果有個願望比我, 我希望可以有兩個我, 一個係公司做嘢, 一個就係屋企到湊你, 因為見到你,再辛苦d, 我都唔怕!
love, love, love, love......u 嘅媽咪上!
2009年9月24日 星期四
好有成功感喎!
尋日滕滕要去健康院檢查, 亞dee就自己單拖, 揹埋個袋, 自己一個就同滕滕出左去喇!
之前, 我係叫埋佢亞媽入嚟一齊去, 因為我怕得佢自己一個人, 會手忙腳亂, 不過尋日嗰一次, 亞dee冇叫, 我亦都冇問佢得唔得, 所以就比佢試一次啦!
放工番到屋企, 亞dee話健康院d姑娘, 話滕滕係中size, 而家呢個時候, 就係要比佢自己試下坐下同企下, 咁企下就當然要我地扶佢啦, 不過, 個姑娘就話: "嘩, 佢對腳好夠力喎, 可以企得咁耐, 都唔跌!" 其實, 係呢個幾月, 呢個曵豬成日都要企, 而家瞓底就當然唔肯啦, 自從佢條頸夠力之後, 但係而家連坐都唔係好鐘意! 所以就一日企到黑, 唔夠力就奇啦, 仲要喎, 佢係我個肚嗰時, 佢對腳就一日撐直撐到黑, 又唔多踢, 就淨係撐直, 所以我諗, 佢已經係嗰時 training 緊喇 
過左一陣, 亞dee就好開心咁同我講: "今日軒軒好得意呀!" 跟住我就話喇: "車! 好得意! 佢日日都好得意架啦! 唔係今時今日先得意架! 你唔係而家先發覺嘛!"
其實, 我覺得亞dee今日好開心囉, 因為我覺得佢今日沾沾自喜呀, 因為佢都係第一次自己一個人帶軒軒出去, 而自己又攪得掂, 冇咩事, 所以佢可能因為咁就覺得自己好勁呀!
2009年9月23日 星期三
食腳!!! 好似表姐呀!
自從滕滕呢個星期嘅段練, 佢而家反身都輕而易舉啦, 不過就多左樣動作囉, 就係開始食腳喇!
喂, 滕滕, 乜你同表姐一樣, 有呢樣嗜好架, 你隻腳未食都已經有嗅汗味架啦, 而家再加埋口水味!!! 咁就真係嗅到暈啦, 手又嗅, 腳又嗅.........
成世人最痴線係今日!
連我自己都估唔到自己痴線成咁, 因為今日係有使以來, 買嘢最多嘅一日!
尋日查左 mascara, 但係發現番到屋企之後, 支 remover 唔見左!!! 去左邊? 去左邊??? 我查開嗰支 mascara, 要用佢嗰支 remover 先可以洗甩, 咁冇左, 我對眼點? 我對眼點???
我對眼隔左一晚夜, 真係好難頂, 所以今日放左工之後, 就即刻去左sasa買番之remover!
買左之remover後, 發現........嘩, 支甲油嘅顏色幾靚喎......好買左佢, 結果買左兩支粉紫色, 一支深小小嘅粉紫色, 跟住又諗起查緊嗰d粉紫色係卓越買架喎, 不如去睇下仲有冇先, 好啦, 係有嘅, 結果又買埋, 所以一共買左4支都係紫色嘅甲油!
買完之後, 心血來潮, 想去睇下d鞋, 因為知道季尾, 所以應該係減緊價, 於是又去睇鞋! 一唔睇, 一睇就比我發現左對涼鞋係紫色, 仲要係我最鐘意嘅鮮到不得了嘅姣婆紫, 係呀, 係姣婆紫呀! yeah! yeah!! yeah!!!
不過, 睇下睇下, 又見到另外一對鞋, 又係姣婆紫喎, 係呀, 又係姣婆紫呀, 一唔試, 一試就由自可, 跟本就唔想脫!!! 死啦, 點呀, 我咁大個女, 未試過咁架, 我跟本就決定唔到買定唔買, 因為已經要左兩對喇! .............好啦, 買埋佢啦! 但係同款嘅藍色都好靚架.....哎呀, 攞我命咩!!!!!!
買左, 一次過買左4對, 好過份, 自己都覺得好過份, 但係就真係好開心, 因為我真係, 真係, 真係, 真係好鐘意d鞋!!!
我自己買嘢之餘, 都有卦住軒軒架, 因為今日冇帶餸番工, 所以下午就出左去食飯! 食完飯之後, 係個商場到見到有檔車仔賣bb衫, 於是行埋去睇下啦, 嘩, d衫仔好靚呀, d質地仲幾好潻, 所以都買左5件衫仔比軒軒, 而我個同事+朋友見到d衫仔咁靚, 佢都買左兩件比軒軒!
所以, 今日係我人生以嚟, 痴得最緊要嘅一日! 簡直係發左癲呀!!!
2009年9月22日 星期二
若要人似我, 除非兩個我!
我發覺滕滕除左個樣唔係好似我之外, 其實個性格都差唔多!
好多人之前都話有胎教, 生完之後, 我就信到十足十!
事原係由尋晚開始, 唔知係唔係我同佢玩得癲過頭, 所以佢尋晚半晚喊醒左成兩次咁多, 連埋今朝天光嗰次加埋, 就喊醒左三次, 所以佢起身食奶, 食左大半就已經瞓著!
所以, 一見到佢唔食, 要瞓, 我就同佢講食完先好瞓喇! 不過, 一講完之後, 佢就即刻醒左, 跟住就好唔耐煩咁叫: 呀~~~~
喂, 你又要同人玩, 玩得癲過頭, 又發惡夢係到喊, 朝早眼瞓又唔食晒d奶, 叫你食埋佢, 你又發皮4, 好似話人地嘈住你瞓, 喂, 你使唔使咁惡呀! 我知, 你唔鐘意人地好話你嘛, 雖然我都係, 不過, 你話唔食就唔食, 咁唔得架噃!
好學唔好, 話唔鐘意就唔鐘意! 如果係咁, 我d好嘢, 你都記住學埋, 唔好好似你老豆咁, 做嘢慢九拍呀!
2009年9月21日 星期一
好開心呀, 有冰皮月餅呀~
老闆年年都係兩三張蓮容月餅卷, 所以之前同老闆講, d月餅好甜(呢個都只係藉口), 可唔可以今年唔係蓮容, 比一張冰皮算呢! 不過, 同佢講嗰時, 佢就話今年已經買晒喇, 出年先啦!
點不知, 今日老闆娘比月餅卷我地嗰時, 我發現一張係蓮容, 一張係冰皮呀!!!
Yeah!!! 舊年因為陀住滕滕, 所以只係食過8分一件月餅! 嘩, 幾掉引呀, 平時中秋唔多唔少, 最少都自己切一盒, 舊年就半個都冇!!!
好喇! 如果滕滕豬你乖呢, 我就出年比小小你食啦! 聽話喇, 唔好成日鬧人喇, 乖豬!
2009年9月20日 星期日
都唔知咩人嚟!
個會計又係一個乞衣! 個水機樽水之前已經比佢自己一個人三日就換一樽, 一間公司, 連埋老闆+老闆娘都係得嗰5個人, 佢居然攪到3日要換一支水! 仲要下下等到我地一jump 水, 就變紅燈, 要換水!!!
唔係嘛, 你玩嘢咩! 咁大支水, 三日要換一支, 你講比人聽, 人地都以為你公司有十幾個人啦, 你點飲架! 梗係啦, 係公司, 又煲湯, 又煲藥, 又煲果皮水, 連蒸飽嘅、洗菜嘅水都係攞水機嘅, 有乜辦法唔三日換一支吖, 枉你仲話拜咩神, 去咩大嶼山靜修, 修你條命咩, 修!
好啦, 我地知你衰得咁交關, 成日陰我地一 jump 水就變紅燈, 咁就梗係局你自己換水啦! 不過, 你都算衰到冇人有, 無啦啦話手痛!
你咩人嚟架, 煲咁大煲嘢, jump 嗰時又唔見你話手痛, 換水你就話痛! 我同你講, 我朵菊花、百合、康乃馨一出力, 都好痛架, 你估淨你先識痛架!!!
哎呀.....呢個滕滕吖!
我發覺呢個滕滕真係好鬼死曵! 今日係星期日, 之前嗰個星期, 佢反身都仲未係好叻, 但係過左一個星期嘅段練之後, 我就發覺佢呢!!!!!好鬼死曵, 用呢招嚟整我!
之前個個星期日朝通常食完 7 點嗰餐奶, 我都會放番佢落床仔到瞓番, 咁當然我就更係都一斉瞓啦, 星期日喎! 不過, 就係因為佢反身反得叻左, 但係又未識反番轉頭, 所以扒左係到之後一陣, 就好攰, 個頭就跌左係張床褥到, 係到叫救命! 一聽到佢d叫聲好似比嘢"局"住左, 我就知佢反左但係個頭又冇力喇, 所以我就起身同佢反番轉!
不過, 幫佢反番轉個身之後-> 佢又反身 -> 又叫救命, 我又幫佢反番轉個身-> 佢又反身-> 又叫救命, 如事者成三四次......喂, 大佬, 你係唔係玩嘢先, 咁你即係叫我唔好瞓啦!!!
滕滕呢個行徑, 跟本就係玩嘢, 佢知我聽到佢叫救命就一定會去救佢, 所以.........你好嘢!!!
你個曵曵豬, 我而家記底晒你嘅曵嘢, 等你大個就同你算帳!!!
2009年9月19日 星期六
嘩, 仲咩呀你, 你想開呀???!!!
自從滕滕可以自己反身之後, 佢坐係張high chair 到就好似好想自己開左個lock!
梗係啦, 開左個lock就知道可以走得, 唔使比佢困住係張椅到嘛!!!
2009年9月18日 星期五
好卦住滕滕波呀!
而家都就嚟凌晨兩點, 但係都未瞓得著, 唔知點解!
今朝番工出門口之前, 滕滕唔知仲咩唔肯食奶, 仲要鬼打咁精神企左係到玩! 平時, 呢個時候, 時間都未夠7點鐘, 佢就係已經食完支奶都不特只, 仲要係已經瞓番, 係到睡夢中! 所以見佢咁精神, 就真係唔係好想出門口! 同佢玩左兩三分鐘, 我就比埋支奶佢, 等佢飲完先走, 咁佢亦都好乖, 好快就飲晒喇......不過, 點解你咁快咁晒呢, 我想喂埋你先走, 都係因為唔捨得你咋!
因為今晚放左工要去買嘢, 所以成11點幾先番到嚟, 但係番到嚟, 滕滕已經瞓左覺, 不過唔知點解個心不由自主地抱起左佢, 揇左佢一陣先捨得放番底佢, 因為我真係好卦住佢, 卦到連亞 dee 都呷醋!
唔知呢兩日點解, 望住滕滕嗰一刻, 我真係發覺我真係好鐘意, 好鐘意, 好鐘意佢, 好開心個天送左佢嚟比我!
軒軒, 你成日都冇見過媽咪喇, 咁你又有冇卦住我呢? 你呢, 就真係卦死我喇!!!
2009年9月17日 星期四
好想休息.....
星期二嗰日, 唔知老闆係唔係知道我將會唔舒服, 所以佢話落左波, 但係都好大雨, 所以就叫我地早d走, 就係咁, 我就早左走, 不過唔係番屋企, 而係去睇醫生!
一落車, 已經心知不妙, 因為個胃好似抽筋, 仲要肚痾, 所以我已經知道, 腸胃炎就一定走唔甩! 真係冇諗過, 原本只係喉嚨發炎嘅我, 坐完一程車之後, 感冒菌仲要入埋腸, 變埋腸胃炎! 所以醫生睇完我之後, 就同我講: "嗱, 你就比較多唔舒服, 咁不如打支針啦~"
天呀! 我呢一生人, 最怕就係打針, 點解我次次見親你, 你都叫我打針架!!! 好啦, 都冇得選擇, 打就打啦!
睇完醫生, 就應該要好好咁瞓番一餐大覺, 不過可惜我個可愛嘅"滕滕波"每逢夜晚佢就最扭計, 成日要我地同佢玩, 但係亞dee又冇咁好耐性同佢玩個幾鐘、 玩到佢食奶, 所以雖然我係張床到, 但係滕滕波嘅"依依呀呀" 跟本就另到你瞓唔得落!
好喇, 到滕滕食奶, 諗住亞dee喂佢, 咁真係可以瞓啦, 但係滕滕居然唔肯飲喎!!!! 唔係嘛!!! 唉, 二話不說我就抱番佢, 等我喂囉! 哈哈, 亞dee睇住我一抱佢就即刻收聲跟住就食奶喇, 跟住就問我究竟點解喎! 嘩! 點解, 我點知呀, 唔憤氣咩, 你檢討下啦, 哈哈! 呢句嘢我都未講完, 亞dee又搶番滕滕嚟喂!
真係好喇, 諗住真係可以有得瞓喇, 但係滕滕食到三份二, 居然唔肯食呀!!!! 唉, 咁即係又要我嚟囉........原本諗住我去休息, 等亞dee照顧滕滕嘅, 換嚟嘅結果就係都係我睇番, 等於佢番左工一樣, 我自己攪掂!!!
嘩, 唔好咁啦, 比下嚟瞓下都好喎老闆, 媽咪食左藥真係好眼瞓呀!!!
2009年9月16日 星期三
2009年9月15日 星期二
2009年9月14日 星期一
Dr Fan, 又見你喇!!!
今日約左個兒科醫生同滕滕打針, 原本玩得好開心嘅滕滕, 都唔識死咁仲係個診所到叫囂, 所以我就同佢講: 叫啦, 叫啦, 玩得開心d喇, 一陣你就知喇!
上次dr打完左邊肶之後, 佢就好似知道要到另一邊, 但係今次就冇, 只係不停咁係到鬧: 好痛呀, 好痛呀! 不過, 今次就真係喊得耐左.......唔係, 正確係咋型咋得耐左!
打完針, 我地就落左去低幾層嘅 Dr Fan 到, 一去到已經冇晒人, 因為就嚟卦八号波, 所以姑娘就同d client cancel 左d bookings! 就係因為咁, Dr Fan 睇完最後一個証, 就出左嚟同滕滕玩! 就係因為 dr fan 接滕滕出呢個世界嚟, 就唔同d??? 可能真係呀, Dr Fan 抱咁耐, 滕滕都冇喊過呀!
所以呢, 滕滕呀, 你見到DR FAN就摸多兩下佢, 索多兩下DR FAN個味道, 等日好似DR FAN咁做個好醫生好唔好?!
2009年9月12日 星期六
滕滕的第一次!
今日係滕滕一生之中嘅第一次比人剃頭, 不過呢次之後, 要等多12年或再耐d, 先會再比人"攪"喇, 因為........以後, 就係我幫佢喇.......哈哈哈哈!
因為想做個紀念, 所以搵左間胎毛筆公司嚟幫滕滕剪頭髮, 順便用佢d頭髮嚟做對毛筆!
剪頭髮嘅過程都算ok啦, 滕滕係喺最後坐得耐, 唔耐煩先開始嘈!
開始喇! 開始喇! 睇下滕滕個樣幾懵!
仲係懵醒醒!
嘩! 爽晒!
睇下幾涼快! 不過...........真係有大陸軒feel 囉!
估下呢套筆, 如果做晒要幾錢???
第一, 首先要睇下個亞b有冇咁多頭髮先!
第二, 仲要睇下你d錢係唔係有錢冇地方洗!
因為............如果做晒, 真係要差唔多兩皮嘢呀!!! 當然, 我唔會做一隻大大大水魚啦!
我地只係撰左其中一對筆(佢地叫-文武筆), 筆材係酸枝嚟, 筆上會有滕滕個名"靖軒", 而且仲會有對對聯, 係由"靖軒"起出嚟!
但係對筆, 冇咁快有, 要成個半月呀~
2009年9月11日 星期五
2009年9月9日 星期三
真係叻仔, 食左成半碗粥仔!
尋日工人姐姐話滕滕已經可以食成半碗粥仔喇, 但係之後飲奶就只有飲左140cc, 唔怪得夜晚十點就係到嘈啦!
既然已左都食到成半碗粥, 咁應該都係時候加d肉、魚比佢試下, 可能加左d味道, 佢食得仲多!
其實講真, 滕滕真係算係咁喇, 係個幾月嗰時, 食完夜晚嗰餐奶, 跟住就瞓覺, 第二朝我起身番工佢就起身! 聽個朋友講, 佢個囝而家9個幾月, 半夜都仲要飲夜奶, 所以.....
軒軒, 你好叻, 又好乖, 媽咪先至可以一覺瞓都大天光咋!
果然不出我所料!
今日番到屋企, 埋位食飯嗰時, 我決定挑戰個工人:
我: 你老公點呀, 冇咩嘛, 不如比幾日假你, 你番去睇下佢啦!
工人: 冇咩嘢, 唔使喇!
我: 唔係喎, 你話佢又撞車, 地震又跌親, 可大可小架喎, 你番去睇下佢啦! 費事你成日心卦卦嘛, 又唔知佢點, 番去啦!
工人: 唔使喇!
我: 真係架喎, 番去睇下啦, 我唔想你卦住你老公就冇心機做嘢呀!
工人: 唔使喇!
我; 真係番去喎, 嗱, 我錢就冇得借比你喇, 橫掂你儲埋嗰d 錢, 話要番去印尼先有得攞, 咁咪啱囉, 你番去可以睇下你老公之餘, 又可以攞到錢, 幾好吖!
工人: .........
我: 仲有呀, 由下個月開始, 你出左糧之後呢, 就比錢我, 等我幫你儲錢, 你知你架啦, 個個月你屋企都話有事嘅, 唔係你亞媽, 就你亞爸, 唔係你亞爸就你公老, 個個月你屋企都有嘢, 我冇咁多錢個個月借比你架! 嗱, 所以呢, 我幫你儲, 咁你要用錢嗰時, 咪就有囉, 你個個月係咁借, 好鬼煩架!
工人: 唔使啦!
我: 唔好, 一於係咁話啦, 我幫你儲錢, 一要用, 我就比你, 咁就唔使借, 你知你屋企架啦, 個個月都話有嘢!
工人: 唔使啦, 我自己儲就得啦!
我: 唔好, 你自己儲儲埋埋係嗰個印尼戶口, 可以入就唔可以出, 你話係hk攞唔到架嘛, 咁我幫你儲咪好囉, 有用時就可以用喇!
工人: 唔使喇, 我可以儲係 HSBC嗰個戶口到就得架喇!(HSBC嗰個戶口, 係我同佢去開, 因為方便我on-line出糧比佢!)
我: 真係? 你真係儲到? 唔好個個月都問我借喇, 我同你一樣都要做嘢、 要搵食架, 你唔好以為我大把錢借比你先得架, 如果我大把錢, 我就唔使做, 係屋企嘆世界啦! 嗱, 真你自己儲到?!
工人: 係呀, 得架喇!
你話! 你話! d 人跟本就係係到講大話, 如果個老公真係咁緊要, 我比你番去, 你開心都嚟唔切啦! 同我講撞車! 要借多3000蚊先夠喎, 嘩, 你老公嗰架咩車呀, 咁緊要, 要整咁多錢呀, 好貴架, 如果架車好貴, 就唔使出嚟做啦! 又話地震跌親, 仲咩, 要住私家醫院架, 冇錢就住政府啦! 又話你老公打政府工月入有成千蚊, 其他唔係政府工就只係得幾百, 唔係嘛, 出左糧嗰三千幾都仲話唔夠!
你估我個額頭真係鈼住"76'呢兩個字咩!
2009年9月8日 星期二
又借錢!!!
個工人都未夠3個月, 尋晚又講佢又想借錢, 真係痴線!!!!!!!!!!!!!
佢話佢老公係印尼撞左車, 地震又跌親, 所以要借3000蚊喎! 跟住我就同佢講, 你自己d錢就儲儲埋埋又唔用, 要用錢嗰時就冇, 咁不如由下個月開始, 我同你儲起佢啦, 等你有用嗰時, 就有得用啦! 跟住, 佢就話唔使喇! 我同佢講, 我d錢都係好辛苦咁儲, 唔係話有就有架, 香港地, 搵食艱難,d錢唔係好容易搵番嚟架! 跟住, 佢又話啱啱出左嗰d糧佢都未汇過去, 咁就我就話, 係囉, 3千幾夠晒啦, 之後佢就即刻話得嗰3千幾唔夠喎! 嘩, 乜印尼消費唔係好低嘅咩, 佢話佢老公打政府工, 一個月都有一千, 咁3千幾都仲唔夠, 你話!
有冇咁煩呀!!!! 我請你番嚟係同我照顧個屋企, 唔係增添我煩惱架!!! 我今晚就會同佢講, 既然你屋企個個月都有事, 唔係你亞媽, 就你公老, 咁不如你放4日假番去睇睇, 橫掂番到去先可以攞到錢嘛, 咁番去咪順便攞埋囉!
睇下佢點答我!
張high chair 瞓唔到喇!
今個星期日就係滕滕半歲喇, 話咁快竟已經6個月; 我成日係到諗, 滕滕, 你可唔可以入番我個肚入面, 我再生過你出嚟呀, 你做"牙牙仔" 嘅時間太短喇, 可唔可以變番一出世嗰時, 再湊多你一次呢?!
今日係個cam 到望到, 滕滕個頭頂同雙腳係張high chair到已經係頂底都掂到喇, 咁即係佢就嚟就好番唔可以係張high chair到小睡, 要番自己床仔瞓喇!
軒軒, 雖然你唔鐘意係張床仔到瞓, 乜嘢都望唔到, 不過, 你越嚟越大個仔, 張high chair 就只可以變做真係一張椅比你要嚟坐, 所以唔好話唔好啦, 因為你就嚟可以好快同我地一齊同枱食飯喇!
倒數......第四日
滕滕, 仲有四日, 你就要剪左你把長長嘅頭髮喇, 等你仲成日係到扯自己d頭髮, 剪左, 仲睇你扯咩!
不過, 剪左之後, 會唔會變左做大陸軒呢..........哇哈哈哈哈.......
2009年9月7日 星期一
仲咩咁多人問我借錢架!
今日下午, 收到個朋友個sms問我借萬伍蚊, 嘩, 咁多錢, 點借呀, 你估我d錢真係多到冇地方用咩, 而家有左個囝, d錢就更加唔可以亂用啦, 何況借!
好啦, 係食晚飯之際同亞dee講緊呢樣嘢嗰時, 我就轉個頭問個工人, 仲咩咁多人問我借錢架, 你睇我個樣, 乜好似十萬九千7未開頭, 有錢冇地方使咩! 其實我咁問個工人, 係想比知, 我唔想借錢比人, 同埋我亦都冇咁多錢借比人!
不過, 當我問完個工人之後, 佢就即刻同我講: 我都想問你借錢呀!
唔係嘛, 又借, 仲咩事呀??? 佢話佢老公撞車喎!!! 撞車, 仲咩撞車呀??? 跟住亞 dee已經即刻轉左個頭, 當聽唔到, 唔理。跟住, 我就扮嘢, 望一望我老公, 再望一望個工人, 暗示話先生唔鐘意!
嘩, d 印尼工人係唔係成日都係咁架, 一時又話亞媽有事, 一時又話老公有事, 咁如果佢有7/8個兄弟姊妹, 兩個月就講一個有事, 咁咪講足兩年, 問借錢問足兩年!!!
痴線嘅咩, 你估我平時咁慳, 係慳埋嚟借比人架, 我自己都唔捨得用啦!
個個都問我借錢, 邊有咁多借呀!!!! 痴線..............
反眼!!!
今個星期又係, 上個星期又係!
每逢星期一, 我同我嗰個朋友+同事都會去街市食lunch, 因為食完就會去買菜, 買星期二至四嘅菜係公司lunch嘅時候煮嚟食!
因為通常我呢個朋友+同事, 做乜都慢過人, 咁當然我就更係好快食完, 係到等佢, 所以我就同佢講, 我去肉檔買左我屋企要買嗰d 先, 叫佢食完就去菜檔買住等!
但係, 肉檔嗰個亞姐切緊比我之際, 我嗰個朋友+同事, 就唔出聲, 企左係我後面, 跟住我就話:
我: 都話係菜檔等架啦, 你行過嚟仲乜喎, 就係同你講, 叫你買住菜等我過嚟嘛, 爭取時間嘛:
朋友+同事: 哎呀, 我都唔知買咩菜好, 你都知我架啦, 我都冇主見!
我: 唔係嘛, 買菜咋, 嚟嚟去去, 都係買嗰d 菜架啦, 我地又唔會係公司抄, 只係煮之嘛, d 寒涼嘅菜你又唔食得, 咁食嚟食去都係嗰幾樣架啦!
朋友+同事: a, 所以咪等埋你囉!
我: 叫你去先, 買住等, 又話唔知買乜, 買嚟買去都係嗰幾樣架啦!
對話當中, 我呢個朋友+同事, 就一路笑住嚟答我!
不過, 沿途番緊公司嗰時, 我就忍唔住同佢講, 我下星期一唔番, 唔該你下個星期一用下個腦, 去諗下買咩菜, 唔好同我講唔知買咩, 因為你只係唔想諗, 唔係冇主見!!!!
我陀住滕滕嗰時, 以為大住個肚, 所以先咁火爆, 但係而家都冇bb我對住佢都係反眼, 所以跟本就唔係我個問題!!!
做朋友, 我都唔想去計較, 但係唔可以一句話冇主見就乜都等人幫你做! 我已經日日帶埋餸番嚟, 唔係叫你去買菜你都話諗唔到買咩菜嘛, 做cake 你就識, 做情人你又識, 做朋友, 唔好同我講你唔識啦, 係唔係你淨係對住我先唔識呀! 我唔係你男朋友, 我冇必要樣樣嘢同你做晒佢架!!!
仲咩執完報紙就執鐵罐呀~~~~
尋日細佬打比我, d 語氣帶點(都唔係一點, 而係幾多)憤怒, 因為佢話佢係屋企搵嘢, 但係發現成間屋都係嘢, 跟本想搵都難, 因為亞媽之前比我地話佢好去執報紙去買, 跟住已經停左一陣, 而家又嚟!
係執鐵罐!!!! 我真係好想問, 乜我地比家用你, 唔夠用咩, 乜你而家好窮咩, 執完報紙就執鐵罐, 乜而家三餐都要等你開飯咩, 要去做 part-time!!!
之前, 因為亞媽去執報紙, 細佬就加左佢家用, 諗住佢唔會再執啦, 唉, 點知原來加家用係無效嘅, 所以我今日就同左佢講, 如果你再執d 多餘嘢番嚟屋企, 我同細佬已經有個共識, 就係會同一時間扣你家用, 佢扣你, 我都會扣你! 間屋已經四圍都係佢d彿書, 而且有又藥材, d 藥材買完又買, 買完又買, 未食完又買......究竟想點呀?!
2009年9月6日 星期日
哼, 我比人利用左!
因為之前有個朋友借左套 bb碟 比我燒, 所以我燒左一套之後就幫埋我其他朋友燒, 一共都燒左成6/7套, 就係因為咁, 我嗰個朋友+同事, 佢就問都冇問過我, 答應左佢個fd幫佢燒一套! 佢答應當然就係冇問題啦, 如果佢幫佢個fd燒, 但係, 佢答應佢, 係居然叫我燒比佢個fd!!!!!
人情就佢做, 但係做就我做! 問都冇問過我肯唔肯幫佢個fd就一口代我答應左, 有冇攪錯呀!!!! 雖然呢個人我都識, 因為都係大家嘅舊同事, 但係唔好借我過橋去做人情囉, 仲要今日比我發現, 原來我都識嘅呢個人, 佢燒套碟嚟比佢個囝, 唔係佢所講嘅親戚, 而且我呢個朋友+同事係知!!!! 咁我即刻我比佢兩個夾埋厄我!!!!!!!!
火滾......... 真係好火滾.......我居然比人利用左我鐘意幫人呢個優點, 問都冇問過我, 就當我一定會幫佢個fd, 仲要夾埋人地嚟厄我 !!!!
2009年9月2日 星期三
真係好好味.....?!
今個星期開始, 叫姐姐整蘋果蓉比滕滕食, 初初佢都有D唔習慣, 但係亞DEE話佢食下食下好似好好味咁, 我係隻眼到, 睇見佢都食得幾開心, 更係啦, 佢出世以嚟, 第一次食D咁好味嘅嘢, 更係越食越鐘意啦!
呢幾排, 陀住軒軒仲感覺又番嚟喇, 佢食完奶之後"POK"左係我到成30分鐘, 過左呢30分鐘之後, 個pat pat有d痺, 腰骨有d攰, 好似就嚟生嗰時陀住佢咁比佢壓住! 雖然只係短短30分鐘, 但係乜嘢都現形, 所以我都唔係好明, 點解嗰時咁重都忍到, 而且而家仲好回味嗰仲辛苦法, 你話幾變態呢!
今日, 仲係到諗緊買唔買條"揹帶", 好似唔係好需要用, 但係到有需要嗰時, 又真係好需要, 究竟點呢, 條"揹帶"要成五舊幾六舊水.............買唔買好呢?!
軒軒, 不如你話啦, 買定唔買呢, 不如係你d利是錢到攞吖.......哈哈哈..........
訂閱：
文章 (Atom)