可愛小朋友~

 

自從上次同滕滕去搵佢同學仔玩, 見到人地個媽咪大住個肚之後, 番到屋企, 滕滕又開始一連串嘅問題問我喇!

因為我叫佢小心D, 因為倬僑媽咪個肚裏面有個BB, 要佢小心D, 唔好撞到EE! 咁之後滕滕番到屋企, 就問我, 我個肚裏面有冇BB喇(我都好想囉)!  跟住又問我, 佢以前係唔係都係係我個肚入面, 又問我個BB係唔係好大個!

跟住, 又成日扮自己有BB~

小朋友真係天真, 仲要真係好傻嗰吓先夠可愛!


 

失敗~

今日, 第二日番學, 一出門口, 老公就剛啱放工番到嚟, 咁就一斉同滕滕番學啦, 點不知去搭lift 之際, 滕滕就開始不停咁問我可唔可以一斉入班房, 跟住又話好驚!

以我識左滕滕咁耐, 佢咁想叫我一斉入班房, 我知道佢一定係見到有d玩具想玩, 而又唔敢走去攞, 所以就想我一斉入去, 跟住就叫我去攞喇! 所以我都問佢係唔係有d嘢想玩唔敢攞呀?! 佢二話不說就即刻點頭喇!

係途中, 滕滕都不停咁叫我一斉入班房, 而我都不停咁答佢唔可以, 以前學校都唔可以, 而家呢到都一樣唔可以啦, 但係, 越近學校, 佢就開始越驚?

其實, 驚咩呢? 尋日都唔驚, 放學仲有玩具攞番屋企, 咁驚d咩呢?! 點不知未入班房, 老師一接滕滕隻手, 就即喊喇! 

老公睇到滕滕喊, 就開始唔願走, 仲係個玻璃到望入去...........唔走, 滕滕喊得仲慘呀!

好鐘意!.........???

 

 

今日, 第一日番學, 好順我起身佢就起身喇, 又冇話唔想番學, 不過, 都仲有問我仲咩唔番之前間學校!

話咁快就到左學校喇, 因為真係只係行落樓就係! 不過, 我唔敢講, 我亦唔敢提, 更加唔敢指比滕滕睇我地屋企係邊(因為可以睇到), 我費事一陣佢係咁同老師講佢要番屋企就死喇!

一入到學校, 個個老師烚晒熟咁講早晨, 所以好順行咁, 滕滕冇喊, 問佢佢亦都話唔驚!  番左一個鐘頭, 話咁快就放學, 而且仲有禮物收! 我問滕滕開唔開心, 佢就答好開心, 老公問滕滕鐘唔鐘意新學校, 佢就答好鐘意!

我個心諗, 好鐘意?! 真係好鐘意?! 更係啦, 尋日學校攞晒D玩具出嚟比你地玩, 你估真係咁開心可以日日玩架咩, 小朋友, 真係天真! 

好好玩!

今日學校開放日, 我呢個亞媽有小小失常, 因為明明知道係1000-1200, 咁0800已經醒左, 跟住無啦啦彈起身, 因為以為番0830, 急速咁刷完牙洗完面之後, 就突然好似醒番咁, 再睇一睇, 真係1000!

滕滕見到我咁趕急個樣, 佢都當堂醒晒  !  既然係咁, 就更係最好啦, 唔使左叫右叫, 幾鬼醒佢同我講佢想瞓多陣!

我以為開放日係比佢地第一日可以同D家長一斉係課室陪下, 原來開放日就係比佢地番去玩, 自由活動咁玩, 玩咩都得! 車~ 早講啦, 等我仲以為要坐定定架潻!  攪到我都不知幾鬼緊張!

我估今日學校應該係應有盡有, 攞晒所以玩得嘅玩具出嚟囉, 因為我都覺得, 真係多嘢玩得好緊要!

其實, 原來唔使等到1200先可以走得, 咁我唔想太遲番到公司, 就1145走喇! 滕滕, 就同我講, 佢仲未玩完喎!

頭先, 老公問滕滕鐘唔鐘意今日間新學校, 佢話好好玩, 好鐘意喎! 更係啦, 唔放多D玩具出嚟, 你地班小朋友聽日仲邊會想再番嚟玩過呀!

K1開始喇, 真係真真正正咁番學喇!




 

被愛~

尋晚, 我同滕滕兩個都唔係好瞓得著, 大家都係張床到典嚟典去~

成十一點幾, 兩個都仲未入睡, 突然間滕滕同我講: 你唔好再郁喇~ 你聽日仲要番工架!

呢張說話好熟, 因為我之前成日同佢講: 你唔好再郁喇~ 你聽日要番學架!

我冇諗過, 滕滕會咁樣話我! 因為由細到大, 我都係照顧兩個細佬, 到大左, 兩個細佬就小話左, 但係亞爸同亞媽就比我話多左, 所以只有我話人, 冇人會話我! 不過, 而家, 我終於feel到自己同自己講嘢係咩感受喇! 而個感受係, 好warm, 好溫馨, 有被人照顧嘅感覺!

我份人好獨立, 就算係結左婚, 老公都唔會咁樣去關心我, 只有佢唔出聲咁, 見我唔舒服就去煲粥比我食, 知我唔捨得買六蚊一個面包, 佢如果星期六番完通宵, 星期日朝早會買兩個包番嚟放係枱面, 比我同滕滕食, 而絕對唔會講出口!

三歲定八十, 我好相信呢樣嘢! 所以好多時, 我所做嘅嘢, 對亞爸亞媽, 對姐姐, 滕滕吸收晒, 所以真係唔可以行差踏錯, 就係因為我不知不覺咁成日去照顧人, 所以滕滕都好不自覺咁去提醒我, 就係:你唔好郁喇～你聽日仲要番工架！

貼堂!

讀小學時, 成日都好希望自己d美勞可以貼堂, 不過, 等嚟等去都冇自己份!

呢個暑假, 幫滕滕去報左手工班, 話咁快, 尋日就已經上完喇!

結果有呢d作品~

第一堂之: 鴨鴨

第二堂之: 雪糕 & 西瓜 & 香焦

第三堂之: 自己

第四堂之: 屋

第五堂之: 筆筒

第六堂之: 屋屋 & 樹木

好奇怪, 唔知點解唔係次次畫畫都有畫框, 只係第一堂&第六堂, 又咁啱, 滕滕第一堂&第六堂又畫得寧捨靚, 所以我就張佢卦左上牆喇!

我見到, 就好開心喇, 唔知滕滕見到自己幅畫表左出嚟, 開唔開心呢~?!

家長會~

係屋企樓下番學, 真係方便到爆炸!  1000開始, 0950落樓都仲OK! 第時滕滕番學, 落雨都唔怕比雨淋, 太曬又唔怕曬到隻狗咁, 因為沿途都有頂遮住!

呢個家長會, 真係長的很, 兩個鐘零一五分, 大部份時間都講埋D廢話, 其實唔係幼兒班嘅嘢, 講嚟仲乜先?

起初, 我好鐘意呢間學校, 唔知佢勁唔勁or有幾勁, 我只係鐘意佢夠多元化, 因為佢有十幾個外籍老師係到, 咁我就知道間學校著重各方面發展, 但係今日聽完呢個家長會, 我就有小小唔鐘意間學校作風, 就係係到so quali!

介紹老師, 只係自我介紹k1老師咪得囉, 成校老師續個續個嚟, 本地老師, 都幾十人, 仲有, 18個外籍老師, 另外, 普通話老師, 原來都有成12個, 而且, 日文都有一個; 再者, 咩藝術團隊, 咩音樂團隊, 又咩舞蹈團隊, 就連清潔嬸嬸, 都要續個出嚟介紹!

講到教學, 咁細個小朋友就話要開始用電子教學喎! k1咋~ 上英文當就話開始用電子書喎! 仲話可以比個網址我地家長, 放工可以click入去同d仔女睇, 去玩喎! 但係, 我真係覺得咁細個, 係揸住本書好d囉!

聽左個幾鐘, 我就開始唔耐煩, 學生証就學生証啦, 無啦啦又整多個咩家長証出嚟, 真係多九魚!  又話家長可以去借圖書, 方便我地喎! 咁學生証都可以去借啦, 唔通家長唔係同自己個仔女一斉, 成日分開見唔到面架???

我覺得呢間學校, 好似想話比人知佢有幾勁囉~ 太浮誇喇!

收禮物~

人地去旅行, 我又有禮物收!

Jessica 次次出門, 都買手信比我, 攪到我幾鬼開心之餘又唔好意思!

佢仲要體貼到知道我未食過叻沙, 就比左個叻沙味我試! 咁我一收到, 就更係第一時間食啦!

一食, 原來叻沙味係幾好味架喎! 真係要多謝Jessica 喇  !

唔小唔得!!!

今晚7點, 係番緊屋企之際, 滕滕打電話比我話佢嘔完!  係7點半, 個工人打電話嚟滕滕唔妥唔舒服, 因為7點嘔完之後, 就不停咁肚痾, 又嘔! 聽到唔對路, 就即刻叫個工人打的去診所喇!

因為間診所收8點, 不過我知道7點9 就截攞籌, 所以同個工人講完之後, 我就即刻打去診所, 同個姑娘解釋滕滕剛剛先開始又痾又嘔, 所以如果塞車可能7點9過一兩分鐘先到, 希望佢可以接受等下!

跟住到左個滕骰同工人上左的士(7點8), 我又再打去診所, 話已經係邊到上左的士, 而家嚟緊!

點不知個仆街姑娘話, 遲一分鐘都唔可以, 再唔係第二日先去睇, 跟住仲要話: 你唔係攪到咁晏先嚟睇吓嘛!

聽到佢話唔可以都已經開始火嚟, 跟住仲話我好似專登攪到咁晏先嚟, 當堂即刻火到啦! 我第一時間問個姑娘冇嘢吓嘛, 父母最緊張自己D仔女, 唔係尤得自己D仔女辛苦左成日, 跟住等到個醫生臨關門嘅一刻先去睇吓嘛! 做人唔使咁冷血嘛, 第日係唔係唔會生小朋友架???!!!  跟住, 我再問個姑娘係唔係阻左佢收工, 如果係夠薑就同醫生講走先囉, 我段估陳醫生聽到我話個小朋友咁樣, 陳醫生都唔會唔理囉!  個姑娘比我小完一輪之後, 我就再問佢使唔使一陣我嚟到再搵佢傾下計呀!

我都唔明囉, 做得姑娘, 都知道D亞媽緊張D仔女, 叫佢等多一兩分鐘都唔得, 我就睇下呢個姑娘生唔生仔囉, 睇下佢幾時有報應!!!

攰到爆炸~

今朝10點半就出門口, 因為我要同滕滕去TST睇叮噹!

未夠12點我就到左喇, 不過真係諗唔到都多人多到爆囉~

 

 

影最尾一張, 我係叫個後生仔幫我同滕滕影架, 而係側邊, 我就聽到佢女朋友同隔離嗰個人講: 你睇下, 個小朋友件衫同你一樣架! 影張我同滕滕之後, 我一望, 以後係一個小朋友同滕滕件衫一樣, 原來, 係一個大哥哥嚟!

影左幾張之後, 我地就去左搭船喇! 因為真係晒到暈囉~

我地由TST去WC, 落左船之後, 我問滕滕想唔想行, 因為去M記(佢話要去), 要行幾遠架, 咁佢既然唔怕, 就行囉, 不過行到去華潤, 佢居然同我講佢想痾CC喎! 咁華潤間中藝又冇開, 即係要行番去舊會展啦! 好彩我呢個亞媽囉, 過左CENTRAL PLAZA就見到有酒店, 就直殺入去, 跟住抺乾淨晒, 就比大爺坐喇! 點不知, 坐左落去, 大爺就同我講佢冇喎!

運吉! 真係運吉! 搵左一大餐, 攪左一大輪就話冇得去, 好得意呀???  冇得去, 就唯有行番去碼頭, 搭船去番TST喇!

星期日, 真係好大獲, 仲要預嗰美食節, 去親到到都想攞命囉, 結果M記食唔到, 因為有幾十人係到排隊, 結果就去左OCEAN CENTRE 個BASEMENT 到食KFC! 等都等左半個鐘呀, 不過算啦, 好彩有位比滕滕坐住等我囉!

食完嘢, 就去左TOYS R US到行, 又買車, 因為今期滕滕鐘意跑車!



行完玩老公啱啱放工, 真係好彩佢嚟接我地, 因為我已經有小小虛脫!

樹不知, 番到屋企, 都未坐夠, 老公就話想出荃灣整車喎, 仲要等成兩個鐘咁多! 咁即係要係荃灣廣場食行街嘢等啦!

見到又有公仔, 又影相囉~



由朝早十點半去到夜晚九點, 真係唔散就出期喇! 而滕滕, 仍然都係鬼打咁精神囉~

攞命~

同滕滕影學生相, 真係攞命, 真係唔知鬧左幾多次見得最尾一張係好嘅!

好彩唔係係街影, 如果唔係就真係唔知要嘥幾多錢!

大個仔~

星期六同梓祐&嫲嫲飲茶, 真係先好難約囉, 因為梓祐越大個, 就有佢自己嘅節目, 一時又話約左同學去邊, 一時就話要番學校做咩!

係同嫲嫲飲茶吹水中, 聽到件驚人事真係要分享下! 

因為嫲嫲佢地剛換左個新工人, 而個新工人就嚟成三個月喇, 煮D餸出嚟, 仍然都係食唔落口, 而嫲嫲日日都活係反爆眼嘅日子中!  而有一次, 叫個工人睇住梓祐個細佬沖涼, 點不知過左一陣, 個工人又死左入房又煲粥! 因為冇聲, 所以嫲嫲覺得唔對路就入去浴室睇下, 點不知原來個細嘅張所以沐浴露, 洗頭水, 護髮素, 洗衣液, 洗手液倒晒落浴缸到, 攪到成個浴缸都係泡, 而個細嘅見到咁多泡泡就好開心咁不停咁抓到去個浴缸底, 仲抓到10隻手指都反晒甲, 流晒血!

嫲嫲見到, 個細嘅仲由浴缸爬上去個屎塔頂, 再由屎塔頂爬上去個雲石枱上面!  成個身滑嘟嘟, 真係唔跌到都執番身彩, 所以嫲嫲就一手夾住佢, 怕sin到跌到個頭仔就大獲喇!

到左夜晚, 梓祐個乞E番左嚟, 就同佢講番當日咁咁咁, 等佢去話個工人唔好再卦住講電話喇! 點不知個乞E見到個仔D手指咁, 聽到10隻手指仔流晒血, 居然一D 反應都冇, 完全冇心痛個仔, 亦都冇即時去鬧個工人!

我真係唔明囉???  係自己個仔嚟, 點解D手指流晒血都可以冇反應囉???!!! 所以我成日都同梓祐講, 你唔仗因為個乞E咁對你而唔開心, 因為佢見到自己個仔咁樣都唔會有反應!!!

因為亞爸亞媽今晚入嚟食飯, 所以我都問一問梓祐, 我話公公婆婆好卦住佢, 好想見下佢, 睇下佢想唔想過嚟食飯! 而為左梓祐嚟食飯食得開心, 我就專登去買左好大盤松葉蟹, 幾盤魚生番嚟!

而滕滕, 知道表哥過嚟食飯, 都不知幾開心, 成日仲纏住個表哥玩!

係食飯途中, 滕滕少不免都會比我鬧下啦, 而我就問梓祐覺唔覺得似曾相識, 因為佢以前細個食飯都係咁樣比我鬧架  !

 

重感情~

係呢個暑假, 我幫佢參加左D course, 同佢講就話去一間新學校到玩!  成個暑假, 佢耐唔耐就問我, 點解唔番去之前間學校嘅?!

佢同我講, 佢好想番去之前間學校, 因為佢好卦住學校喎!

因為就嚟開學, 我想比定個心理準備滕滕, 所以呢個星期我都同滕滕講, 佢就嚟番新學校喇, 嗰到有新老師, 有新同學, 學校又有個公園可以比佢地玩! 去到呢個位, 滕滕次次都問我, 點解唔番之前間學校!

乜小朋友唔係善忙架咩??? 點解次次都問同一個問題架??? 都已經成兩個月冇番學啦, 佢都仲好記得舊學校! 我估, 佢番之前間學校, 真係好開心囉!

人地話, 咀唇厚就重感情, 而我, 重感情就唔使講啦, 而滕滕, 應該都同我差唔多囉~

好大滿足感!

就嚟放完暑假喇, 呢個長假期就快結束, 滕滕開心嘅暑假生活就嚟玩完喇!

今日老師打電話嚟話我仲未交滕滕D相番學校到, 又話我未交滕滕個英文名比佢! 收左線, 我都有D頂自己唔順, 明明自己成日都有記住呢兩樣嘢未做, 但係點解到今時今日都未攪掂, 仲要比老師打電話嚟追, 真係囉爆!

其實係因為我想問朋友借個閃光燈&引發器, 而朋友發現個引發器有問題, 所以想攞左去整先借比我, 但係因為要成星期尾先可以攞得番, 所以到而家我都仲未同滕滕影相囉!

唔等啦, 老師打嚟追喇, 所以今晚就粗粗地影左佢, 聽日就攞去晒喇!

真係影到反晒眼先影到呢張咋, 一路影就一路鬧隻豬仔, 唔好郁, 個頭直D, 個身唔好寒背, 雙眼唔好咁衰, 笑得好D~! 足足影左成廿幾三十張先得一張好!

舊年都一樣係我幫滕滕影學生相! 影完出嚟, 張8張GROUP埋一張去晒4R, 晒完出嚟, 真係好有滿足感, 因為個仔每樣嘢, 我可以做到, 嘅我都一定去做! 例如好似剪髮咁, 我相信係滕滕10歲前, 都應該係我全權包辦! 

身體大解構

上個星期, 見到個同學, 佢係教書老師, 所以係我心中嘅問題, 真係好想佢可以幫到我!

同學同我有小小唔同, 佢個小朋友係女, 唔係仔, 不過, 我都照問, 如果佢個女問佢, 男仔同女仔去toilet有咩唔同, 身體有咩唔同, 佢會點樣形容比佢個小朋友聽, 女仔去toilet個部位係叫咩!

同學教我, 首先個小朋友同爸爸媽媽各沖涼一次, 而我嗰個係男仔, 所以佢應該對佢自己身體各部位應該唔陌生, 所以同爸爸一斉沖涼去講解唔係問題! 而媽媽呢~ 同學就話, 我地可以叫佢地睇下我地個"妹妹", 而"妹妹"可以稱為陰部, 比佢睇左個"妹妹"一次之後, 所有係佢地心中嘅問題, 即係女仔用咩痾vv, 呢d問題, 就唔會再問喇!

我聽到同學話直接比個"妹妹"佢睇之後, 就O左咀, 因為.....真係點比佢睇呀, 好核突下啫, 自己都唔會無啦啦去睇啦, 更何況專登比個仔睇???

我諗, 可能真係要去搵個公仔嚟同滕滕講解下會好D囉, 因為我真係不能夠放出嚟比滕滕睇真人版呀!!!

其實真係好鐘意!

上兩個星期, 同d同學見面打下麻雀, 係閑談之間, 我話如果平時放工之後, 如果我出街食飯, 我就會好有罪惡感, 因為覺得自己就走左去街, 剩抵滕滕一個同個工人一斉係屋企!  可能, 因為老公 on-shift唔會成日係屋企到, 所以就係因為咁, 就覺得好似對唔住個仔, 自己就出左去開心! 

同學聽到我咁講就好似好surprise(雖然佢有個女都係咁話), 因為第一睇我個樣唔似啦, 第二, 佢話其實我使唔使咁樣喎!

尋日, 同滕滕同學去游水, 咁同同學媽咪閑談之間就問我: 滕滕黐唔黐我?! 佢咁問, 我有小小R頭, 因為佢話好多時有工人就會黐個工人!

其實我唔係好明, 乜小朋友唔係一定會黐媽咪架咩??? 就算係工人, 都只係工人啫, 咁媽咪只係得一個, 點解會唔黐架, 同埋, 我更加唔明, 點解亞媽鐘意自己D仔女, 乜好誇張咩?! 我知道, 我鐘意滕滕嘅程度係200%, 因為我真係無時無刻都好想攬住佢, 又好想成日同佢一斉, 但係, 我好唔捨得佢, 乜唔係個個亞媽都係咁嘅咩???

講真, 佢而家細個咁黐我, 我想都想係咁啦, 到佢開始大個, 越嚟越獨立時, 到時我唔想有後悔嘅時候囉!  因為而家每一刻, 都係我同個仔所有珍貴嘅時刻嚟, 每一分每一秘, 我都希望第日可以要嚟懷念架! 所以而家唔嚟錫佢, 請問等幾時先???

十分十分開心的一天!

期待已久嘅今日, 終於都嚟喇! 其實上個星期已經約過一次, 但係因為兩個小朋友都唔係好舒服,所以就delay到呢個星期日!

我都唔敢太早同滕滕講我約左佢同學仔今日去玩, 只係今日臨出門口執嘢時先話比佢知, 費事一場歡喜一場空啦!

呢兩條友仔好攪笑, 一叫佢地影番張相先, 佢地就埋位咁樣黐埋一斉喇! (睇番呢張相, 我發現原來佢地兩個影相個上唇都係咁, 唔怪得條友仔咁樣影相啦!)

去左公園玩左一陣, 就已經成身濕晒! 好彩太陽唔係好勁咋!

游水應該我估最少游左兩個鐘! 因為上水時, 我d皮都摷晒喇! 而佢地, 如果唔係因為開始凍, 一定要佢地上水去食嘢, 就真係打死都唔肯喇!

游完水, 好開心咁去食嘢, 係車到, 我就叫佢地一斉唱下歌仔喇! 不過同學仔倬僑話, 因為而家唔使番學, 所以唔知記唔記得點唱喎!

倬僑好好笑架, 講嘢好認真, 無論開心, 好開心, 唔開心, 佢媽咪話佢個tone都係一樣, 因為佢行行下, 無啦啦用個flat tone同滕滕講: 其實我都好卦住你架! 聽到真係笑死我!

今日, 滕滕真係好開心, 真係開心都不得了, 番到屋企, 係地下上面卷來卷去, 佢話佢自己仲係到游緊水喎!

帶滕滕去同佢個好朋友玩, 睇見滕滕開心得咁緊要, 我個心, 都真係好開心!

7仔的魔力~

自從我買左隻長江7号比滕滕睇之後, 我就覺得佢老豆SO晒囉!

長江7号, 講周星馳係一個窮爸爸, 因為生活養家成日都要去地盤工作! 又因為冇錢, 所以係垃圾堆到執左7仔番去比佢個仔小狄玩!  因為一次工作意外, 窮爸爸跌左落街, 而小狄知道爸爸死左, 就喊到不得了~

滕滕次次睇到呢到, 都問我點解小狄喊得咁慘, 點解佢話佢爸爸唔再番嚟, 點解之後, 小狄爸爸又會冇事係屋企到!  我解釋比佢聽, 因為小狄爸爸工作唔小心跌左落街, 小狄知道爸爸以後唔再起身, 醒唔番, 以後會冇左爸爸! 而因為7仔發功, 幫助小狄爸爸, 咁佢爸爸先會冇事!  係呢PART嘅故事, 滕滕就好似成日都擔心佢老豆番工, 成日都問住佢幾時番嚟, 番唔番嚟, 叫住老公快D番嚟! 而且, 仲幾左我幾次要買7仔比佢!

我同老公講, 佢真係好SO囉, 唔使對個仔做D咩, 就得個仔咁緊張佢! 而且自從睇左7仔之後, 仲成日攬住佢, 點解呢個世界咁唔公平架???!!!

生仔冇鬼用架!

尋晚無啦啦滕滕自己係到講: 其實, 我真係好鐘意爸B架!

係無啦啦嘅環境下, 點解無啦啦會其實嘅???

我問佢, 咁你鐘意爸B 多D定媽me多d呀?(好似遲早都會問一次呢個問題咁)

條友仔答我: 我而家就鐘意爸B多D, 唔鐘意你多D囉!

你話吖, 生仔真係冇鬼用囉! 你亞媽我, 辛苦又辛苦過你老豆, 我陪你又多過你老豆陪你! 去睇DR, 20次都唔知有冇1次係你老豆同你去! 夜晚瞓覺, 都係我得閑就摸下你, 睇下你有冇熱過頭! 就連去街, 我都係個個星期同你盡興架!

你老豆, 請問做過D咩大件事先??? 而家, 只係你老豆呢排錫你多D, 你就話鐘意佢多D! 你曵比老豆鬧左兩句, 就走埋嚟同我講都係鐘意我多D喎! 我真係比你激死囉!

HAPPY DINNER WITH TWO 舅舅!

因為之前D股票派息, 所以我就好豪咁一家人去食BUFFET喇!  其實等等等, 都等左好鬼耐先約到今日, 因為要就老公之餘, 仲要就埋我個好鬼忙嘅大細佬! 因為自年頭見過下, 今次都只係今年嘅第二次見佢, 好彩佢冇咩變囉, 如果唔係, 我怕我唔認得佢喇!

其實都好擔心亞媽食齋冇咩啱佢食, 不過佢就話佢都好飽, 因為有沙律, 有包, 又有冷麵都好夠喎!  而老豆, 本身就話食BUFFET佢肯定好蝕, 點不知佢去到, 就只係食魚生!

而滕滕, 今晚除左凍嘢同冷盤係唔可以食之外, 其餘好多都尤得佢食啦!

可能屋企放左張全家幅係到, 所以就算滕滕見到大細佬都唔會覺得好陌生喎!

唉~ 食完呢餐飯, 唔知要等到幾時先可以見到大細佬喇.........!

痊癒中~

我上個星期三開始唔舒服, 星期四晚去藥房執藥, 食左一日星期六朝早去睇DR, 睇左兩次DR, 食藥食到今日, 星期一二三, 個人成個懵晒, 而家今時今日, 真係先醒番D!

無孤嘅我, 係比滕滕傳染, 而無孤嘅滕滕, 係去上興趣班比個小朋友野到嘅, 我地兩個真係幾咁無孤呢! 

好彩今日開始好左小小, 個人冇咁懵, 因為book左成半個月嘅buffet會今晚一家人去食! 真係期待中, 因為好耐冇見大細佬喇!

可愛的小朋友!

到今時今日, 已經放左一個月暑假, 我先得閑開老師比我隻cd! 原來裏面有滕滕係學校嘅相, 同埋一個做運動嘅video!

開比滕滕睇, 滕滕猛咁話要番學, 可想而知, 佢番呢間學校, d老師係唔錯架!  見到坐佢隔離嘅同學倬僑, 又再講佢好卦住倬僑, 佢要番學同佢玩!  有乜辦法會唔記得吖, 日日番學都對住, 放學坐校車又一斉坐, 玩又一斉玩!

因為個video我post左上fb, 從而另到同學仔個媽咪就問我有關個video, 再者佢就同我講, 佢個仔倬僑話好卦住滕滕, 問可唔可以face time喎! 而我係用samsung, 冇face time, 所以就係msn到視像對話喇! 星期一晚佢地係msn見完面, 尋日同學仔個媽咪就同我講, 佢個仔之前嗰晚又話想再見滕滕喎! 我個滕滕, 都一樣啦, 見左一次之後, 第二晚又同我講佢想見倬僑喎!

小朋友真係好可愛, 因為唔只係大人, 小朋友都有感情, 有思想, 都會卦住, 佢地咁痴纏, 真係好純真囉~!