已經比左個枕頭滕滕瞓左差唔多有一個星期喇, 係呢一個星期, 打風好似少左, 每朝起身見到佢都係係個枕頭上面!
可能因為佢而家識行喇, 所以真係要有承托喇!
2010年6月30日 星期三
2010年6月29日 星期二
2010年6月28日 星期一
2010年6月27日 星期日
好開心可以見到你!!!
今日梓祐好早已經嚟左, 因為佢問我佢係自己屋企食 lunch 定係嚟我到食先, 咁我就話你鐘意啦! 好開心, 佢撰左過嚟同我食! 因為佢老豆今日放假, 佢起左身之後, 就過嚟喇, 過到嚟都係11點半, 所以我同左佢去食嘢!
我今日問佢仲有冇比佢個乞E點佢, 佢話都係咁, 成日叫佢做嘢, 而個乞E就懶過鬼咁坐係到! 我聽到, 都好無奈, 因為個乞E又唔係冇理取鬧, 所以唯一可以同佢講, 叫佢做好本份, 如果佢無理, 就可以有理由咁爻佢!
梓祐真係好叻, 因為佢今日見到我部單鏡機, 佢又好似以前咁攞嚟玩, 攞嚟研究, 而我之前教佢點樣去用相機, 點樣去攞個 focus, 佢全部都記得, 所以一教佢用個單鏡機, 首先去搵個主體, 點樣先影得靚, 講左兩次, 佢就明白, 而且我教佢去拉爆, 佢玩左兩次就拉左出嚟比我睇喇!
雖然唔算好靚, 但係都算係咁啦, 得13歲咋!
（無啦啦仲咩拉我嚟拉呀，睇下拉到我隻手幾肥！[雖然我係]）
梓祐真係好乖, 雖然佢而家唔係成日係我身邊, 但係佢真係好識性, 因為我問佢有冇D咩想買, 而覺得佢地係唔會買比佢, 就可以同我講, 如果我覺得係有用唔係浪費, 我可以買比佢! 我起初以為佢會話好, 但係佢居然答我唔使喇, 佢會自己儲起 D錢, 跟住先去買, 叫我唔使嘥錢!
當時..........都唔係當時架喇, 之前都好多時咁問自己, 點解呢個唔係我個仔嘅?! 每當我每次問佢有咩想要, 佢都答我唔使喇, 佢而家仲有, 我可以慳番D錢! 佢越係咁同我講, 我就越想買嘢比佢! 我知道有時錢係唔可以代表一切, 但係我真係想佢身邊可以的話, 每日都有一樣嘢係身, 係我買比佢, 因為我想佢卦住我、諗起我!
我同佢傾計當中, 我發現我post係fb上面, 講過嘅嘢佢都知, 佢都有睇, 所以我就問佢, 咁耐冇見, 有冇卦住我, 唔知係唔係因為面對住我定係真心, 佢二話不說咁答我更係有卦住啦! 不過, 我都知道佢份人比較冷, 所以我都冇問落去點解佢唔打電話比我, 雖然我冇開到口, 但係老公都已經問左, 而佢個答案, 我冇認真去聽, 因為就算點問佢, 佢份人係點, 唔通我會唔知咩, 但求可以見到佢, 我就已經足夠!
原來你知架!
張high chair 唔用會放番入細房, 今朝入細房攞尿片同滕滕換, 佢一見到張high chair, 佢就拉住張椅同我講 mom mom! 但係因為都係早上十點幾, 所以我就同佢講都未夠鐘食mom mom, 一陣先啦! 跟住叫佢出番嚟, 咁佢就出番嚟喇!
你條友仔, 平時食飯坐係張椅到就周身唔自在, 好似要逃出生天咁, 如果唔想你落地, 食咁餐飯就要搵九十幾樣嘢比你玩, 等你坐定定食埋碗飯! 而家未夠鐘, 你就拉張椅, 跟住同我講 mom mom!!!
咁即係本身你都係知道食飯要坐好啦, 咁你亦都知道食飯係要坐係呢張椅到啦, 咁你以後食飯可唔可以唔好咁百厭, 係到典床典稿席咁死都要走呀!!!
2010年6月26日 星期六
真正咁feel到喇~
上一篇blog只係出左冇幾耐, 我就忍唔住要打多篇, 因為啱啱同滕滕食完奶瞓左!
呢兩晚, 滕滕瞓到半夜都醒左, 要我抱起佢跟住佢先肯左瞓番! 係咁嘅情況, 我唔會因為自己好眼瞓而放佢係我地兩個中間一齊瞓, 因為滕滕而家開始識嘢, 所以我怕會 lai嘢! 所以無論佢幾唔想我放番佢落床, 我都要堅持放番佢係自己床, 然後"暗"佢瞓!
唔知今晚會唔會又係咁呢??? 因為我今晚好清楚咁feel到, 佢想同我地一齊瞓!
飲完夜奶, 我跟住會抱佢一陣"暗"佢瞓, 因為我想等佢落左小小格先放番佢落床, 唔想d奶倒流, 所以佢飲完奶我就同佢講要"外外"覺豬喇! 講完之後, 佢就坐左係到對住我4萬咁笑, 跟住就爬左係公老個枕頭上面, 伏左係到, 之後就再望一望住我笑多一嘢!
呢一刻我已經feel到, 不過我要 double confirm! 所以佢見我望住佢唔郁, 佢又再擺過另外一個pose 瞓覺! 如事者我都望住佢唔郁, 佢又再擺多兩個瞓覺pose! 擺完之後佢見我冇反應, 佢就坐左係到, 而我又再講多一次, 做多一次要抱佢個手勢!
嗱! 嗱! 嗱! 我講完呢一次之後, 佢就扭下扭下個pat, 寧下個頭話比我知唔好!!! 跟住又瞓左係老公個枕頭上面!
不過, 我真係唔想以後佢死都要同我瞓佢先肯瞓, 我就好堅決咁抱起左佢, 跟住就"外"佢瞓! 佢當然第一時間都係爭扎啦, 不過我"NO"左一聲, 佢就死死地氣唔郁咁係我懷中, 迫於無奈咁開始瞓覺!
滕滕, 到你再大個小小, 媽me會比你同我&爸b一齊瞓, 但係只可以一個星期兩次, 同埋只可以係放假時先過嚟!
我諗以後嚟緊嘅日子仲會更加艱苦!
自從食飯呢個問題好煩惱之後, 而家又另外一樣, 就係瞓覺喇!
最尾餐奶, 除左去街番唔切嚟，基本上日日都係由我自己嚟。以前滕滕未完全入睡嗰時，放抵左佢係床仔，我都已經可以出房，但係而家，點解唔同左嘅？！
自從呢個星期開始，我見佢差唔多瞓著，我都係會放抵佢，但係一放抵，佢就會撐開佢對眼望實我！如果我用手拍下佢，佢都可能會合埋雙眼，但係我隻手一停低，佢又會望住我！以前都唔使咁拍住架，但係而家唔拍，一行開，或者我一上床，佢就喊，跟住就會起身行去我床嗰邊，企係我面前大叫大喊，慕求要我起身為止！
我試過唔理佢，尤得佢喊，我照瞓，但係佢就堅持係咁大叫大喊。我亦都試過出房唔理佢，但係佢都係好堅持！但係當我去抱番佢，佢就會即刻收聲，仲好乖咁合埋雙眼瞓覺！
我覺得係比佢恰我囉！點解我一想（只係想咋）行開，佢就已經喊定先？
滕滕，點解你要恰我？？？ 點解？？？！！！
2010年6月25日 星期五
算把啦~
前日馮小姐同我講話佢老公要搵人擇時辰八字開刀(我個心諗, 越攪越多嘢, 唔通擺酒"讚"左錢?!), 所以放左工就去符機, 問下邊日同咩時辰開刀!
尋日佢番嚟同我講, 符機出嚟話佢會早產, 所以比唔到日子佢, 叫佢順其自然!
所以佢打電話去DR FAN到問, 如果早產費用會係點計, 因為佢已經去左法國落訂喇!
姑娘話, 如果佢而家唔擇日子, 就唔使比多二千幾三千, 但係如果佢早產而又係非辦工時間, DR會收二千幾之外, 醫院仲會收多萬幾蚊, 因為佢選擇開刀, 就會係咁!
佢一聽到無論係咩情況, 只要係非辦工時間醫院都係會收多萬幾蚊之後, 佢就好似唔係好想! 因為可能加埋DR嗰邊要比多兩萬, 跟住再加加埋埋, total可能要比5-6萬!
佢好似想問我點咁, 佢都未問我, 我都已經答佢: "係你自己攞嚟架喎! 係你自己話要開刀架喎! 你係唔係諗住開刀唔痛呀?! 你唔好妄想喎! 個子宮都會痛架喎! 而且你仲多左個傷口痛架!"
佢聽完, 佢好無奈! 我知道佢好似想縮沙, 因為佢之前問過我係私家生要幾多錢, 以為最多係多我少少, 但係而家就計左就越計越多!
其實我真係覺得算把啦! 明知有d嘢係計唔到咁多架啦, 而且自己手頭咁緊, 就唔好死充啦!
唔係呀化, JUMP 多幾次啦!!!
前日番屋企, 我一路食飯, 個工人就係到同滕滕玩, 係咁叫滕滕 JUMP!
我見到滕滕好想 JUMP, 但係 JUMP極都 JUMP 唔起, 腳尖都仲係係地上面! 唔知係因為重過頭定係咩原因, 我教極佢 JUMP, 係佢面前 JUMP, 佢都 JUMP 唔到!
其實滕滕都唔係好重啫, 比起佢同年齡嘅BB都係差唔多! 就好似熙熙咁, 早嗰兩個月都已經係咁成日 JUMP, 但係佢就只係行, 一味行, 都冇 JUMP過!
不過, 好彩佢都未識 JUMP, 因為如果識 JUMP就仲大獲, 到時張 sofa 唔爛就真係奇喇~
我以為唔會再見到你..........
好開心呀! 好開心呀!
因為表姐想問我借部NDS 比兩個囡去旅行玩, 所以前兩日我打比梓祐, 問佢攞番部NDS嚟借比表姐!
我初初都諗, 自從梓祐生日之後, 就冇見過面喇, 唔知佢肯唔肯出嚟見我呢?! 所以當佢問我, 想佢幾時比番我嗰時, 我就即刻諗今個星期日, 因為我想見下佢, 同佢食飯!
我SENT左MSN比佢叫佢打比我, 不過我前日等足一日, 佢都冇打嚟, 所以我尋日下午就打比佢喇!
電話一接, 梓祐把聲已經變左, 因為係青春期, 但係佢講嘢D語氣就一D都冇變, 都係咁小朋友. 我問佢不如星期日過嚟我到, 但係我又怕佢老豆唔知比唔比佢嚟, 所以我問佢怕唔怕先, 佢居然答我唔怕, 怕咩啫!
跟住我就話, 咁好啦, 係唔係唔變架喇?! 佢即時答我話, 好難講喎, 你知佢兩個幾麻煩架喇, 一陣嗰個亞E明知佢過嚟我到又叫佢做呢樣做嗰樣, 咁就好難講架! 所以我就同佢講, 叫佢問左佢老豆先! 如果佢老豆話得, 咁就唔使理嗰個人喇!
到左夜晚, 梓祐SENT MSM比我話: 已經通過!
好喇! 希望無風無險啦, 因為我好卦住佢呀!!! 我已經諗定晒星期日同佢去食咩架喇, 我仲諗埋下個月中同佢去沙灘玩!
希望唔好甩底呀!!!!
2010年6月24日 星期四
2010年6月23日 星期三
唔段尾.........
生左滕滕無幾耐之後就有風難, 到而家好似好番, 但係一熱D, 個人滾D, 就又起喇!
我諗可能真係生左之後D生理改變左, 攪到D風難郁D就起!
我諗應該唔段尾架喇, 成世都應該跟住我!
可唔可以搵人幫下我呀~
未到端午節之前嗰個星期, 我已經開始食糭, 日日食, 每日lunch都 2-3 隻, 放假又係屋企食, 食到尋日都仲有十隻八隻係個雪柜到!
不過尋日食完就 lai嘢啦, 個胃乸住乸住痛~ 可能真係頂唔順............食左咁多日!
可唔可以出年唔好再比咁多糭我呀~ 年年都係我一個人自己食晒!!! D糭又冇肥豬肉, 邊到好食架!!! 奶奶比嗰D又冇, 亞媽比嗰日又冇!!! 難為要我自己一個人食晒!!!
2010年6月21日 星期一
奇景!
尋日係MTR見到件事, 好想分享下!
係北角轉車, 見到一個女人打扮得好成熟, 著住一條超貼身嘅超迷你背心短裙! 因為我係佢後面, 前面低唔低就一陣先再睇啦, 而後面就露背! 露背奇實都唔係好緊要, 因為而家時下d人都唔係好介意啦, 但係佢就露左個bra 扣, 再加埋bra上面個 label係咩size 都show 埋出嚟! 呢樣都不特止, 而且佢個bra 好似梅梅殘殘咁!
因為都係行過去對面月台啫, 所以我都好好奇睇下佢係咩樣, 一睇, 原來係一個廿歲到嘅女仔嚟! 而家D女仔打扮得咁熟就唔出奇, 個 trend 都係咁架啦, 不過可唔可以執好少少先出街呀! 個 bra 個 label, 至少唔好show左出嚟吖! 仲要係一個梅bra!!!
唔使咁啫!
今日出左去同奶奶&姑奶s食飯, 兩個姑奶 & family就到先, 滕滕同老公就第二, 我就最遲!
食完飯, 二姑奶同我講話佢地一去到就叫佢地唔好坐係佢隔離, 坐對面, 因為要留番個位比滕滕坐! 所以姑奶一聽到奶奶咁講就話喇: "亞媽, 你想軒軒坐你隔離咋!"
你話呢個嫲嫲幾渴見到滕滕呢!
食完飯, 我地就去左青衣我佰娘到, 因為家姐幫我訂左奶粉係平d, 所以就襯住出開去就上埋去攞囉!
一去到, 豆豉表弟啱啱瞓醒起身, 坐左係到仲懵下懵下! 起初就冇乜嘢啦, 不過望下滕滕表哥一陣就喊起上嚟喇, 你話佢幾鬼冇用呢!
滕滕只係輕輕摸左豆豉隻腳仔一下就開始喊喇!
仲越喊越淒涼潻!
豆豉表弟, 第日點出嚟玩呀!!!
2010年6月20日 星期日
我已經控制唔到佢喇!
唔好以為佢呢個笑容好得意, 因為有冇發覺佢企左係個柜上面!
。。。。。。。
。。。。
。。。。。。。
。。。。。
。。
。
。。。
。。
。。
我第一次見到我睇到眼都突埋，但係個工人話佢而家都係日日嘅指定動作喎！
淨係半個鐘，佢已經跳左幾次，仲要係同你笑完先嚟跳！
2010年6月19日 星期六
兩個百厭表姐+1個百厭表弟!
今晚表姐過左嚟食飯, 呢兩個筠筠蕎蕎點解好似冇見左一個星期左右, 就好似曵左咁多嘅?! 叫佢唔好成日開門關門, 一陣會夾親表弟隻手, 佢地居然話叫表弟唔好過嚟喎! 叫佢唔好入房玩, 佢又話佢地要預備畢業典禮排舞喎! 叫佢唔好開左道閘, 佢地就成日出出入入!
真係比佢兩個吹脹~
自從滕滕識得kiss之後, 叫佢kiss邊個佢都肯, kiss完仲鬼死咁high潻~
仲攪到very good姨丈比滕滕騎駁馬潻呀!
唔知係唔係滕滕覺得今年會潮爆呢類型衫, 定係佢知道表姨媽&very good 姨丈會嚟, 所以尋日著完今日又要著多次, 我地話要攞去洗佢就喊, 死都要著!
2010年6月18日 星期五
第一吻!!!!!!!!!!!!!!!!!!!!!
今晚番嚟, 個工人叫滕滕kiss, 佢真係kiss左係佢塊面到! 咁當然我又一定要要啦, 所以我叫佢kiss 媽me, 佢就用佢個"O型"咀 kiss左係我塊面到喇!
唔知點解, 滕滕一kiss, 佢就出動佢個"O型"咀! kiss咁多次都係, 個咀都冇合埋過!
2010年6月17日 星期四
2010年6月16日 星期三
雙重認証!
今日一早就出左去太子飲茶! 因為表姐尋晚又冇覆今朝幾多點, 所以今朝就等等等等, 不過佢今朝一打嚟, 就話佢已經出緊去! 所以攪到我趕到亞媽都唔認得, 滕滕嘅水杯又唔記得攞, spoon 又唔記得帶! 半個鐘就屎淋尿瀨就出左去喇!
筠筠條裙仔都好靚吖, 不過臨出門口之前就喊晒囉, 因為佢話家姐條裙點解"洒"過佢喎!
表叔公一見到滕滕就話要抱, 但係奈何滕滕一嚟到唔show佢, 要過一陣先比佢抱!
飲完茶去左表叔公屋企坐, 玩左一陣滕滕就好眼瞓, 但係又唔肯瞓, 不過我就入左房迫佢瞓左一陣, 瞓醒左我地就出發番屋企!
尋日同佢著左對涼鞋成日甩出嚟, 唔係因為隻鞋鬆先甩, 而係因為佢隻腳掌太厚, 跟本對鞋中間嗰個位太迫, 著極都著唔得入去, 所以行兩行就甩左出嚟喇!
所以番到入屯門, 我地就去左shopping 喇! 首先, 我地去左買波鞋, 一除左對襪, 個sales就話: "嘩! 隻腳仔好肥喎, 不如要大一個sales 啦, 如果唔係中間位就好緊架喇!" .........所以就係呢個原因, 我先去買鞋!
買完波鞋, 我地就去買涼鞋, 一去到見到有兩個款, 一個係nike, 一個係addias, nike個款我覺得好似會舒服d, 但係個sales 就話得番display 嗰對, 所以就試addias 喇! 一除襪, 個女仔又話: "乜原來係豬腳仔嚟架! 咁addias 個對會好d喇, 因為addias 嗰對成對都可以較, 中間位都可以攪闊d喇!"
其實屋企d鞋個長度對對都夠長, 但係就穿入去就好難先穿到, 而嚴格嚟講, 每次最少都要成10分鐘先同佢著到鞋!
買完雙對鞋, 都已經成5點, 我就散晒, 因為佢而家好重, 揹佢一陣都幾係嘢, 所以番到去沖完涼食埋嘢, 我就瞓左係張床到, 整整下我都瞓著左, 而滕滕玩玩下都瞓埋!
因為兩個都散晒!
2010年6月15日 星期二
我隻豬腳呀~~~~~
唔知仲咩滕滕隻豬腳都比嘢咬喇! 最邪就係, 又係右腳, 又係同一個地方呀!!!
今朝番工前, 個工人同我講滕滕隻腳又比嘢咬到! 唔怪得佢一起身, 就同我講隻腳痕, 最初我以為佢咋嬌, 點不知原來係真係!!!
下午已經又有水泡喇, 但係好彩就係今次只係一個, 其他地方有咬但係就冇起到!
我嘅可憐豬仔, 仲咩成日比d 死人嘢咬到架, 仲要係同一個位! 兩個月前嗰一次, 豬仔已經有創傷後遺症架喇, 成日同我地講佢隻腳比嘢咬好痕, 而家又整多次, 咁個陰影呢一世都唔會磨滅啦!
2010年6月14日 星期一
可能我真係諗多左..........!
今日馮小姐番工, 同佢講番班姊妹, 原來佢都反晒眼, 因為其中三個本身係識, 但係佢冇諗過佢地一d都唔醒目, 唔係踢一踢, 郁一郁, 而係踢都唔郁, 都唔知佢地攪咩!
尤其係當去到酒樓嗰時, 佢嗰4個姊妹+伴娘冇一個4點半去到酒樓幫手, 遲到不突止, 去到就只卦住自己化妝, 門口又冇人理, jump茶又冇人幫手! 好彩, 我一早已經同左馮小姐講我番屋企接個仔出嚟, 如果唔係, 我見到佢地咁, 我都可能反左眼!
同佢傾之際, 我真係忍唔住問佢, 係個video 裏面, 有兩張相係我同我老公都有份, 究竟係佢定係佢老公撰, 佢一答, 就好快咁答左我, 係佢撰架!
聽到佢咁答我, 都開心! 因為佢同我講, 佢想比個驚喜我地!
以我自己嚟講, 係個video 出現得, 就係好朋友先放上去, 所以我覺得一路以嚟, 我比佢激到我反眼, 都係因為佢唔識做, 並唔係佢扮嘢!
所以我而家覺得自己好似好衰, 之前咁樣諗佢!
2010年6月13日 星期日
老公反眼 @_@'
自從佢可以自己爬上張sofa到之後嘅嗰一日下午, 我地夜晚番到去, 就見到佢不停咁自己係到練習, 係咁上落上落&上落, 重複咁做呢兩個動作! 所以過左冇幾耐, 佢已經可以上落自如, 仲要越嚟越快, 越嚟越快!
就係係呢個moment開始, 呢隻嘢就越嚟越曵! 可能因為之前做唔到嘅, 佢就由佢可以自己做到嗰一刻開始, 不停去攪, 不停去做! 擒左上張sofa 到之後, 就擒上去個電話柜上面, 坐左係到! 一嚟可以望下風景, 二嚟又可以張柜上面嘅嘢掉晒落地!
所以我相信惡夢經已開始....................!!!
因為馮小姐結婚我做姊妹, 所以當晚老公就大部份時間都係單拖湊住隻曵豬! 自從我地中午番左屋企攤抖, 而呢條友仔聽到我地入門口, 佢就唔瞓覺即係彈起身, 由嗰一刻佢就好似叉爆左電咁, 一路都冇瞓過, 又唔眼瞓, 不停係咁攪, 玩到差唔多一點, 架車到左屯門佢先瞓覺! 所以老公湊左佢成晚, 就同我講, 如果要佢湊一日, 佢會想死!!!
哈哈, 我好開心佢終於都知道湊一個小朋友係一件唔容易嘅事嚟喇! 但係我另一方面又好擔心, 因為佢開始驚住生多個, 而嗰個又係男仔, 咁就真係嘔白泡都唔掂喇!
2010年6月12日 星期六
唔係呀化!
星期五係馮小姐嘅大日子, 計埋我連伴娘一共有6個人, 但係幫手做嘢就唔知有幾多個, 因為有D好似仲係到發緊夢咁! 點解發緊夢? 因為個伴娘係馮小姐個姪女嚟, 之前試伴娘裙已經攪到佢同佢男朋友........唔係而家係老公先啱, 攪到嘈大交, 原因係因為條伴裙係deep v! 所以一jump茶嗰時, 伴娘一彎身, 一對波波就彈左出嚟, 再加上個伴娘已經push左條隙出嚟, 所以當個攝影師係到拍緊video 嗰時, 就好似拍緊AV!
因為姊妹當中, 有一個係我熟D, 所以我就同佢講, 不如你男家jump茶嗰時換人! 同老公走先去攞隻乳豬去男家嗰到, 一入男家門口, 我又見到對波彈左出嚟, 又係拍緊AV! 真係唔知係唔係我份真犯賤, 因為我真係睇唔過眼, 係男家差唔多走嗰時, 我忍唔住拉馮小姐一邊同佢講, 叫佢一陣係酒樓開口, 同佢D姊妹講, 點講, 我都已經教埋佢!!!
係男家走去飲茶, 路程都唔超過5分鐘, 同我熟D嗰個姊妹就話行過去酒樓好晒喎! 我當時就反左一眼, 個心就諗有幾遠呀, 行過去都唔使唔分鐘, 使唔使搵架火箭飛過去呀?! 定係你想我老公車你過去呀?! 再過一陣, 有個姊妹就問條姊妹裙幾錢, 夾埋比同我熟D嗰個! 果然不出我所料啦, 真係有人主動出聲話比番錢! 馮小姐真係覺得, 係你地自己話要著伴娘裙, 所以佢就真係唔負責呢PART! 我真係覺得有冇攪錯! 冇錯, 當初係因為佢有個同學唔想諗著咩衫, 所以先話不如整條伴娘裙, 而我當時亦覺得OK, 因為馮小姐嗰時都仲未有左! 但係當佢有左嗰時, 話會係私家生, 咁我就覺得有點兒那個, 因為我係做伴娘係幫佢, 有乜理由我地幫佢做伴娘都唔出埋條裙, 反而留番D錢自己去私家生!!!
唉! 不過我份人真係.........我都唔知自己想點! 因為馮小姐個人好似真係好唔識做咁! 人人都話佢醒, 但係我真係覺得佢唔醒囉, 因為好多嘢佢都唔識做, 就好似伴娘裙咁, 佢以為係我地諗住唔想諗著咩, 所以先至去買, 但係佢又唔諗下我地係因為幫佢做伴娘喎, 其實佢咁做真係好老土! 不過, 當開席前播個MV, 係由佢地細個到相識跟住而家結婚, 裏面其中有兩張相都有我同我老公份! 因為我知道&覺得, 如果係呢個moment d 相係有邊個份, 佢地一定會係撰好朋友先至會係呢到出現! 所以係嗰個moment, 我又覺得, 會唔會係我自己之前諗多左, 係唔係因為佢份人跟本唔識做, 所以我要接受佢呢個缺點呢? 但係, 有時對住佢真係好反眼囉~!
因為馮小姐個老公(佢都係我地個fd)之前嗰日講, 因為我係佢地個媒人, 另到佢地兩可以重遇番, 所以一定要叫個化妝師化到我個妝要堅靚, 所以係酒樓嗰時, 我就問佢地我封媒人利是呢?! 就係呢封媒人利是, 攪到我咁鬼攰都瞓唔到, 因為我番到屋企拆開, 裏面係10蚊!!! 唔係呀化??????????? 我都冇車望過要係好多錢, 但係估唔到連過年一封20蚊嘅利是都不如!
我諗左好多, 究竟問唔問佢, 因為如果唔問, 我諗我呢一世都會屈住, 而且仲會屈死, 所以第二日下午, 我決定打電話去問馮小姐個老公! 我問佢有冇封錯利是比我, 因為封利是係10蚊嚟, 馮小姐個老公一聽到, 就即刻話"唔係架! 唔係架! 嗰封唔係架!!! 唔好意思! 嗰封唔當係, 因為真係太混亂喇, 比錯左你, 唔好意思! 唔好意思!" 收左線, 條氣都順番, 因為聽到佢咁答我, 我諗應該都唔係扮嘢, 都應該似掉亂左啫!
老公&老闆成日都同我講, 馮小姐真係一個好蠢& 好唔識做嘅人, 所以叫我唔好嬲佢, 因為佢真係一個好蠢好蠢嘅人, 同埋人蠢真係無藥醫, 所以唔好放係心! ................因為我有時都諗, 佢好似真係當我係佢朋友, 但係無奈佢又成日都唔醒目, 不過佢有時又真係好攞命喎.....................唉! 我都唔知點!!!
2010年6月10日 星期四
生仔! 生仔! 生仔真係冇鬼用架!!!
過年前食團年飯單嘢我已經好興架喇! 因為我覺細佬個老婆想專登8點半先上到去亞媽屋企, 諗住等我地食晒飯, 咁佢就可以同個囡上嚟坐一坐就可以走!
因為老豆食煙, 佢老婆就成日話屋企有煙味, 所以我覺得佢成日都唔想上去! 不過, 我得佢老婆真係好過份囉, 因為老豆知我地上去, 已經一早冇係屋企食架喇, 咁而且一個月都冇一次係番去食飯, 咁番去都係坐兩三個鐘, 食完飯就走喇, 乜咁樣都好辛苦佢咩???!!! 自問我老豆同亞媽都係好陃隨便嘅, 又冇架子, 又唔係d好難相處嘅人, 咁仲咩要咁喎!!!
一年都係食一次團年飯, 都係一年一次, 唔使拖到8點半先上去吓嘛!!! 又話個囡6點先起身! 我個滕滕都係6點係屋企食完飯先出嚟架! 我地係屯門出去唔遠過佢咩! 佢去我老豆到, 都係15分鐘, 你唔好同我講個囡曵呀!
因為呢件事, 我兩個月前同我細佬講, 以後佢老婆如果唔想番去, 咁就叫佢唔使番, 因為我地想見係佢, 唔係佢老婆, 咁當然佢帶埋個囡番去我地就仲開心啦, 但係只係佢一個我地都唔介意! 因為細佬係我地屋企人! 佢老婆唔當我地係, 我地都唔會當佢係!
細佬去完世博做嘢, 星期一番左嚟hk, 我就sent 左sms比佢話今個星期日番屋企做節! 細佬冇覆我, 我都預左, 因為平時大家都係一兩日之前先再電聯; 不過第二日, 係fb到收到個mail 係細佬個名sent 嚟, 裏面有兩條link, 一條係: 二手煙的害處, 另外一條係: 三手煙的害處!
我都冇click入條link, 已經唔想睇, 就走番出去, 因為我當時個反應係到諗, 究竟係我細佬send 定係佢老婆send嚟挑戰, 因為佢老婆會開佢個fb, 所以有可能當時我地chat 嘅所以內容, 佢老婆都睇到晒! 我同專登同我細佬係fb chat, 係因為我都想比佢老婆知, 如果佢唔想去我屋企, 佢可以唔去, 但係就唔好唔比我細佬去囉!
直到今日, 我打比細佬同佢講多次話星期日食飯, 跟手就問佢個mail係佢send 定係佢老婆, 細佬一聽到就話係佢sent架, 而且叫我冷靜d喎! 跟住我就話我睇到你條link之後就已經好冷靜架喇, 同埋我想知佢sent條link過嚟, 係唔係即刻support 佢老婆! 當其時細佬就係到笑, 而且佢仲話佢自己係企係個中間立場, 並冇偏幫邊個喎!
細佬一去到呢個位就懶皮, 因為佢唔想我動火之餘, 又唔想我對佢老婆有不滿! 不過, 佢老婆做d咩小動作我都知, 不如就叫佢唔好出現, 大家都冇咁嬲!
2010年6月9日 星期三
我可以點做呢~!
滕滕原本最初食粥仔嗰時, 都係只唔鐘意帶口水牌, 要扯出嚟, 所以冇比佢帶之後, 都冇乜特別, 基本上5-10分鐘就可以食晒碗粥仔!
但係自從開始食飯仔冇耐, 佢就開始坐唔定! 因為我唔想好似有d人咁, 追住嚟餵食飯仔, 所以我都幾堅持一定要佢坐係張high chair 到食! 由原本只係可以比一樣玩具佢食住嚟玩, 整下整就加比左兩樣.......三樣.........!
再者, 原意本身都唔係好想比玩具佢架, 因為想佢專心食嘢, 不過唔比, 佢就唔肯食, 鬧佢都唔理! 後來, 再過多一段時間, 比佢d玩具佢, 已經再冇興趣, 咁就唯有比水樽, 比保嬰單個盒佢(因為有保嬰單係入面, 搖下搖下就有聲喇), 比一d唔係玩具嘅嘢佢, 但係都係只不過維持左一段時間係可以坐定囉! 而家, 食左半碗, 佢就企左係張high chair 到, 唔肯坐, 唔肯食, 又發皮4~
我本身一路都好堅持要佢坐係張high chair 到食飯, 因為我想食飯要定時, 食飯就坐好, 唔好食食下就走去玩, 要佢養成一個好習慣, 但係而家, 就越嚟越難攪! 佢而家係懂小小又唔係好懂之間, 佢有佢嘅皮4, 佢唔鐘意就唔理, 但係當我地鬧佢嗰時, 佢又知道我地鬧, 而且仲會扁咀! 雖然佢知道比人鬧就會停, 但係都只係一陣, 因為過一陣佢會唔記得, 又再嚟過!
我個 limit 已經越set越低.........一路以嚟都係堅持要有固定嘅規律, 但係佢又唔係下下都配合, 因為佢越嚟越大, 再唔係一舊飯咁比我去舞喇, 但係我唔想尤得佢鐘意點就點, 所以真係好懊惱囉~
2010年6月8日 星期二
2010年6月7日 星期一
2010年6月6日 星期日
你係唔係未死過呀~
今日去左六福, 改番大隻結婚介子, 唔知係唔係因為改介子唔使比錢, 所以條女同我講要10日先可以比番我! 佢未講 10日, 我就已經同佢講我星期五要用! 所以 10日先比番我, 一定唔得! 係我咋型之下, 佢都話最少要 7日! 有師傅都話要 7日喎!!!
我個同學註係旺角鋪, 所以改介子, 我本身都唔想煩到佢, 但係佢而家話要 7日, 咁唔搵唔得! 所以我同我同學講完, 就比左個電話個女條聽, 聽完, 條女就話會將隻介子send出去比我同學嗰邊, 係嗰邊一日就得, 跟住第日send番嚟, 咁我星期四就可以攞喇!
係等緊條女之際, 我叫佢比d吊咀我睇下, 因為條女開緊單, 所以叫左佢男同事幫我(死肥佬一名), 不過呢個死肥佬一臉不滿咁叫我等等! 過左一陣, 佢攞左搬咀過嚟, 我見到兩個十字架吊咀差唔多一樣大, 但係一個就 $7,xxx & 一個就 $13,xxx, 我問佢有咩分別, 佢答我d石大d同埋係方石! 頂你咩, 我知d石一定係大d啦, 廢話! 跟住我問佢有冇d係7千幾左右, 不過就大睇d, 跟住條粉皮攞左個兩萬幾比我!!!........喂, 咩料呀, 玩嘢咩!!!!!!
跟住, 我又問條粉皮佢地係唔係有一個介子盒係可以放好多隻介子, 因為我想要, 條粉皮答左我係之後, 佢反我眼去攞比我! 我真係頂佢!!! 佢仲要攞番滕滕手上個計數機, 話唔好玩喎!
真係唔使講咁多嘢, 佢一講完, 我就啤實佢個名牌! 佢望到我望住佢個名牌, 跟住佢就開始假喇!
粉皮: 你個仔仔好得意呀! 佢成日咬嘢, 你要比奶咀佢食架!
我: (白痴, 唔識唔好講啦, 佢成日咬嘢就食奶咀嘅咩!!!) 佢唔肯食奶咀! 佢牙痕啫!
粉皮: 咁唔得架喎! 你買牙膠比佢咬架!
我: 佢唔肯食牙膠!
粉皮: 係呢! 你識"亞倒"架?
我: 我唔知邊個叫"亞倒"喎!
粉皮: 佢係出面旺角嘅經理嚟, 我地叫佢做"亞倒"!
我: 我只係知我識嗰個係姓文, 佢都係經理嚟! 我唔知佢有冇其他稱呼!
粉皮: 你搵開佢架?
我: 係!
粉皮: 搵左佢好耐架?
我: 我識左佢好耐!
(我答佢嘢, 已經全部係冇尾音, 佢應該知我唔順超佢)
粉皮: 哦! 我以為你識亞倒潻! 佢係出面旺角個經理嚟!
我跟住都已經冇應佢, 因為我覺得佢串左我兩次, 因為佢以為我識得邊個邊個!
就算我唔係識我同學, 你咁嘅態度, 足夠我去port死你!
過左一陣, 幫我改介子條女攞張單比我, 仲同我講, 而家唔使攞隻介子出去喇, 因為師傅而家拍爛擋幫你攪掂佢喎!
等星期四去攞番介子之後, 我先泡制你兩個!
2010年6月5日 星期六
2010年6月4日 星期五
使唔使咁巴閉呀~
唔知係唔係馮小姐見我開始同佢講番嘢, 所以佢呢幾排成日都捉住我, 同我講佢結婚嗰d嘢, 一係就生bb嗰d嘢!
不過佢尋日一番嚟, 就第一時間同我講佢啱啱搭地鐵遇到件事好好笑架喎!
事原係佢坐左係到, 到左某個站有個男人拐下拐下咁行入嚟, 咁有個女人(個女人係唔識嗰個男人架)行去佢前面同佢講: "可唔可以讓個位比嗰個人坐呀?" 跟住馮小姐就答: "嘩! 我大住個肚架! 你叫我讓位呀?!"
馮小姐當時同我講嗰種語氣係好誇張同好大聲, 仲要做埋個手勢, 整個肚比我睇! 跟住我就話佢坐左係到可能人地睇唔到呢, 所以嗰個人先叫你讓位比人地啫! 跟住馮小姐就仲激動咁講: "咩睇唔到呀!!! 我坐左係到, 成個肚都凸晒出嚟啦(又做埋動作)!!!" (凸晒出嚟??????? 請問你有幾凸呀??????????)
去到呢個moment, 我都唔知仲點應佢! 佢而家3個月, 個肚有幾大呀, 企左係到, 都要望到好真先睇到佢有小小肚凸左出嚟, 咁你坐左係到, 雙腳上面仲有個手袋, 人地仲點會見到你個肚呀, 唔好玩啦, 你唔好同我講, 你下下都整個肚出嚟比人睇呀?!
而且, 使唔使咁巴練閉呀, 同人講: "嘩! 我大住個肚架! 你叫我讓位呀?!" 你估真係大住個肚就大練晒咩!!! 你而家3個月, 有d人鑼咁大個肚都冇好似你咁啦!!!
乜原來我咁勁架!
尋日馮小姐已經好勞氣, 因為原本佢男朋友個姪女答應左佢地, 可以係佢下個星期五結婚嗰日幫手同d姊妹化妝, 但係姪女而家發現可能冇錢收(因為馮小姐話佢包埋我地化妝), 所以就想縮沙, 搵左佢亞媽打比馮小姐個男朋友, 話嗰日要同咁多個姊妹化妝唔知夠唔夠時間, 又咋型要咁早起身! 前晚姪女就搵亞媽打, 尋晚又搵亞爸打! 所以馮小姐一早番嚟就鬼殺咁嘈咁同我講好興, 如果唔想化就一早唔好自動請纓自話要幫佢手喎!
因為馮小姐條氣唔順, 所以今日番到公司就打比d姊妹, 講話嗰日唔好叫佢男朋友個姪化妝, 連開門利是都唔使預佢男朋友個姪女喇! 唔知係唔係因為馮小姐之前坐定粒六, 姪女會同佢係中場轉頭, 但係而家就冇行啦, 因為佢有骨氣嘛, 不過, 原來有骨氣, 都係一面嘅啫, 因為...........
馮: 你估你地識唔識同我放番d頭髮落嚟, 整番鬈吖嗱!
我: 咩呀, 你個化妝師傅會去到酒樓同你轉妝轉頭架嘛!
馮: 係呀, 不過我想中場放番d頭髮落嚟呀, 我見幫我set 頭嗰個女仔好似好易咁, 橋下橋下之嘛!
我: 人地有技巧架, 你估真係橋下橋下咁易架! 我地雖然係幫你手, 不過你知道我地唔係萬能架!
馮: 哈哈哈哈..........我見到真係好易架喎!
我: 咁講真, 我就真係唔識喇, 不如你問下Helen佢地識唔識喇!
馮: 唉.....! 佢地更加唔識啦!
嘩! 嘩! 嘩! "你估你地識唔識", 原來"你地"係指我呀~~~
我而家先知道, 原來我咁勁架, 我都唔知原來比人地感覺係乜都得架!!! 仲咩冇人同我講, 原來我咁勁架!!!
2010年6月3日 星期四
你估真係話咁易咩!
今日我影左張BB要幾時要打針, 打咩針比馮小姐睇,因為等佢有定心理準備要用好多錢!
影左比佢, 佢問我咩嚟, 我就同佢講, 左手邊就係政府一定要打嘅針, 係唔使錢, 而右手邊就係唔一定要打嘅, 如果要打就要係私家比錢打架!
佢一聽到, 第一時間答我: "唔得! 梗係一定要打啦!" 我跟住就話, 因為政府包左你嗰d, 就一定係好緊要架喇, 所以先一定要打, 如果唔係, 就係係右手邊嗰d, 你自己可以選擇打定唔打!
同埋, 因為有咩4合1, 5合1 & 6合1嗰d針, 我就解釋晒比佢聽, 佢聽完就問我幾多錢! 我一同佢講, 初初幾個月, 如果全部係私家打, 預番2000蚊樓下一次啦!
佢一聽完個銀碼, 對眼當堂跌左出嚟, 跟住就"嘩"左一聲! 我跟住就同佢講: "所以咪睇餸食飯囉!"
講完打針, 我又同佢講, 叫佢睇下需唔需要買保險! 哈哈, 佢又問我買咩保險喇, 買嚟仲咩喎! 跟住, 我又講點解要買, 其實係可以唔需要買, 都係睇下你點睇啫!
佢聽完, 就話: "嘩, 好頭暈, 又好頭痕, 唔知點, 又唔識可以點!"
馮小姐, 你估你以為生個bb真係咁易架, 為左比個死對頭睇到你而家好幸福就攪咁多嘢, 擺酒都係而家啱啱先儲夠錢, 你轉頭又話要係私家生, 好怕痛, 遲d男朋友個女又番嚟同你地一斉住, 大把錢要用, 叫你諗清楚你就懶醒話係呀, 決定左喇! 好啦, 我真係睇下你到時有幾大獲, 睇下你連3蚊一個蘋果你都唔捨得食呀!!!
訂閱：
文章 (Atom)