尋日??? 之前??? 聽日???

滕滕一路大, 識嘅嘢就越嚟越多, 教佢嘅嘢而家都好快已經明白!

之前我就教滕滕時間, 幾時做過d咩, 之後會同佢講番出嚟, 例如"尋日"嫲嫲"嚟過, "聽日"我地會去邊, "之前"我地去過坐吊車, 之類嘅嘢!

但係我估唔到, 佢識左之後, 我問佢"你今日有冇曵呀?!" 條友仔居然答我: "尋日?"

跟住我再問多佢一次: "我係問你, 今日, 你有冇曵, 唔係尋日!" 而條友仔又答我: "之前?"

好啦, 再問多次: "唔係之前, 亦都唔係尋日, 我係問你今日, 你究竟有冇曵先?! 佢又再答我: "聽日?"

我發現, 原來我比人玩緊囉!

仲想點陪法???

星期六去旅行, 滕滕例牌好似痴左線咁不受控制, 開心到癲左咁! 班主任見到佢咁樣, 就頂佢唔順, 主動話要拖住佢, 等佢冷靜番d!

班主任已經唔係第一次同我講, 佢出街癲到咁樣, 即係好開心我地同佢去街(呢樣我更係知啦), 問我係唔係好少時間陪佢喎! 同埋, 老師話滕滕有時咁反叛, 都係因為覺得我地少時間見佢, 同埋覺得我地唔理佢啫!

就好似上個星期三咁, 試過一次去接滕滕放學, 咁星期四, 滕滕就同老師講佢又唔想搭校車, 不過老師就同佢講, 媽me今日要番工唔可以嚟接你喎, 咁你要跟校巴ee上車喇! 一聽到老師咁講, 我就知道食過番尋味啦, 講真, 我都好想日日去接佢放學, 但係我要番工呢!

其實我都差唔多日日放工都番屋企啦, 星期六&日一定係屋企嘅, 有時星期日都會同佢出去行下, 就算老公要番工, 我都會照出去行下街架! 夜晚, 成晚都比晒佢架喇, 又傾計又唱歌, 仲陪埋瞓, 咁樣陪法, 唔通都唔夠???

我都好直接咁問老師, 咁樣都唔夠, 咁我真係唔知仲可以點囉~

極品!!!

搵一個又蠢又懶又死撐嘅人真係難, 但係人群之中都比我搵到, 我真係幸運!!!

馮小姐成日同我講佢真係好比心機去做好佢份工, 其實我都信, 因為有次佢係張生產單到, 唔記得mark 抵一句嘢, 咁我就叫佢用紅色筆大大隻字寫出嚟貼係當眼處, 等佢以後自己都睇到, 唔好再唔記得喇! 呢d招數, 向來都係話d小朋友唔記得帶乜唔記得做乜嘅啫! 而佢, 要我咁樣出口去話佢, 而佢又聽&做, 貼左張紙係佢個位嗰下先抵死囉!

所以佢話佢真係有用心去做, 我真係相信, 只不過佢份人蠢, 能力真係有限!

每逢d 單, 我都要send個draft比客對, OK晒先可以出份正本BL, 截closing 兩日前就要比客對晒跟住要補料, 而馮小姐做好晒d drafts, 到時到後佢就要追我, 睇下個客覆左未!

今朝10點幾, 馮小姐通知我有份單已經做好晒d drafts, 截補料時間係今朝10:00! 原本我真係唔想出聲, 有乜理由今朝比drafts 我, 但係就今朝截補料啫!  平日佢就記得追廠比出貨料, 一到星期五就好似乜都唔記得晒! 所以我唔想再忍, 我就同佢講, 以後馮星期五一早就追廠比d出貨料, 等佢可以星期五做好晒d文件待我比客對!

馮小姐聽完我咁講, 佢過左陣就覆我, 不如叫廠以後記得早兩日比料佢仲好喎! 嗱~ 呢d佢就醒喇! 想張個波射比廠, 咁佢就可以唔使記住嘛! 不過可惜, 我答左佢: "唔好! 佢地靠唔住!"

人蠢都已經慘架啦, 仲要咁死懶, 咁你話呢d人, 唔想做死一世呢d位都唔得啦!!!

折磨!!!

好辛苦呀!!!!!!!!! 個個月嚟m, 我個頭都會好痛, 痛到起碼最少有一晚係瞓著覺都仲係痛緊, 瞓醒都繼續痛落去, 食極止痛藥都停唔到痛!

究竟想點先??? 個個月嚟m, 就個個月痛幾日, 食又食唔到, 瞓又瞓唔到, 究竟係唔係要等到收經先嚟唔咁辛苦呀?????????????

成功左???

我呢個媽me, 其實都幾鬼懶, 除左平時滕滕番學同係屋企冇著片之外, 同佢出街, 我就一定會同佢著片, 因為費事搵廁所嘛, 因為又怕佢一急起上嚟就話即刻要去, 我都唔想周街同佢痾, 唯有就係著片啦!

不過, 因為尋日學校旅行, 就迫住唔著片, 費事一陣比人見到滕滕明明唔需要著, 而家因為個亞媽懶就要同佢著嘛! 好幸運地, 成半day 都冇事發生喎, 滕滕呢就都幾合作, 問佢有冇廁所去, 有就有, 冇就冇!

今日, 我同滕滕去市中心就又試下唔著片, 係出門口前, 叮囑左佢冇著片架, 記得急就要同我講, 好成功地, 今日出左去3個鐘都冇瀨尿!

唔通, 咁樣就係成功左??? 咁下次, 就可以試下出九龍都唔著片喇!

旅行記~

印象中記得學校去旅行應該係秋天, 正所謂秋高氣爽嘛, 不過唔知係唔係呢個旅行係家長會攪, 所以唔通要就D家長??? 呢個時候好潮濕, 真係好怕滕滕又咬到一嚿二嚿咁番嚟!

舊年一家大細去旅行, 不過滕滕好似已經唔係好記得咩係去"旅行"喇, 尋晚同佢講聽日學校去旅行, 佢只係知道老師都會一斉去玩!

呢次第一次親子旅行, 係去屯門兆康附近嘅有機農場!

不過, 因為呢到好多都會有D手作仔要家長一斉做, 例如整相架, 整花盤咁, 但係滕滕好似對呢D坐係到做嘅嘢一D都冇興趣, 攪到佢&我地兩個好似癲嘅咁, 因為滕滕不停咁攪絞剪, 張D工具掉晒落個垃圾筒到, 而我地就不停咁叫住佢唔好唔好&唔好! 攪到坐對面嘅家長同我地好似好大分別咁, 因為其他小朋友, 都會好似好乖咁跟住整, 而我個滕滕就像個瘋小孩!!!

不過, 一講到體力勞動, 就真係不遺如力喇!

鋤到唔肯走呀!!! 我諗如果叫佢鋤一個鐘, 可能都可以!

呢個就係班主任喇, 佢都好nice架! 唔好睇見佢個樣好似流流地, 不過佢都有份威嚴係到, 因為滕滕見到佢就開始唔會咁放"試", 同埋, 老師話平時佢係學校冇咩痴線架, 啤一啤佢, 佢就會乖番架喇!

呢個老師, 都好細心, 平時耐唔耐同佢傾過電話之後, 佢都會張我所話比佢知滕滕乖嘅嘢, 耐唔耐就讚下佢, 等佢可以係屋企乖d, 如果曵, 就會不停咁提醒佢叫佢唔可以, 又不停咁解釋比佢知點解唔可以, 仲有過多一輪, 又問番佢仲有冇做d咩曵嘢, 跟住又再話番比我知!

所以如果滕滕今年k1轉校, 我都會好唔捨得佢囉~ 

我都想啦............

尋日因為滅蟲, 所以先請左一日假, 可以陪滕滕等van 番學, 又可以去學校接佢放學! 其實我都幾開心架, 因為以前, 我一放星期五, 我就去接梓祐放學, 因為可以睇到佢地個樣幾渴望見到我地去接佢地嘛!

但係, 我估唔到, 滕滕今朝一起身, 就叫我今日去接佢放學喇!

其實, 如果可以, 我日日嚟接你都仲得啦, 見到你咁開心咁期待! 不過, 只可惜, 我要番工呢  !

嚇死人咩~

今朝滅蟲公司一早就嚟屋企滅蟲滅虱喇, 呢間嘢好似幾ok咁喎, 因為哥哥仔問我想點滅法, 滅d咩, 咁我就同佢講廚房就有曱甴, 廳同房就可能有虱! 咁哥哥仔就用兩款唔同嘅藥水嚟噴喇!

安排左滕滕番學之後, 九點多d就開始行動, 都唔使半個鐘就已經攪掂, 而我就去左流浪囉, 去左麥記到嘆早餐, 跟住就行左一陣街, 買左件衫&一條褲!

都未試過直接去接滕滕放學, 今次都係第一次, 真係估唔到要咁樣排隊!

滕滕都係第一次等我地去接佢, 所以隻傻豬真係好攪笑, 老師叫左佢幾次出嚟, 可以走喇, 佢都唔出坐左係到, 仲叫: "媽me, 好驚呀!"

驚咩先??? 真係比佢笑死囉, 仲要講左兩次好驚! 因為本身個班主任同緊另外一個家長講緊嘢, 而係另外一個老師叫滕滕出嚟話可以走, 但係滕滕就坐係到話好驚喎, 好彩老師都比我帶滕滕走, 冇以為我金魚婆咋!

我係街到見到d老人家, 我都叫滕滕小心d, 唔好撞到d公公婆婆, 唔好整跌佢地, 因為佢地好老喇! 咁去緊荃灣搵嫲嫲之際, 見到個伯伯推住個坐輪椅嘅婆婆, 我就加快腳步, 行左係佢地前面, 滕滕就同我講喇: "媽me, 行快d啦, 唔好阻住婆婆呀, 快d行快d啦, 婆婆會死架!"

一聽到, 好彩我地已經係好前面, 嗰兩個老人家應該聽唔到滕滕講呢句說話囉, 因為真係嚇死我, 無啦啦講話婆婆會死喎! 人地都唔知鬧唔鬧你好!

迷網~

自從滕滕由舊年九月番學之後, 就基本上接近不停咁睇醫生! 上個星期打去診所問, 只係2011年, 滕滕連埋配藥, 總共23次!  學之前, 幾個先一次, 番左學之後就不停咁接住睇, 咁即係呢23次, 並中有起碼18-20以上係九月打後開始!

有見及此, 我就預備幫滕滕買多份門診保險!

個保險sales, 係亞媽個朋友嚟, 佢好nice, 好好人, 做嘢好細心, 就連我地呢d新入職媽me(之前), 都比好多advice 我地, 邊d保險應該幾時快d買, 有d就應該遲d先考慮去買, 所以呢個媽me朋友, 我一路都好尊重佢!

不過, 因為佢早一兩年check到有cancer, 所以佢pass左佢d客比佢個同事! 話就係話佢pass 晒出去, 不過佢就話我有咩就可以搵番佢!

因為我想幫滕滕買門診保, 所以我都好開門見山話, 如果我搵佢買,但係d 佣金就比左佢d同事, 咁我就唔想囉, 因為單就亞媽朋友仔幫我開, 錢就比左人, 如果係咁, 咁我就寧願成份單轉比我自己個朋友個sales, 搵我朋友個sales 買喇!

亞媽個朋友仔聽到我咁講, 佢話因為佢唔想煩到佢同事, 所以而家佢d客都係佢自己跟番, 做得幾多就幾多, 最多慢慢做啫! 所以如果我幫滕滕再買保險, d佣金都係歸番佢, 唔會比人! 不過, 因為佢身體要多休息, 所以有時d嘢就做得比較慢d~

唉! 有時我都好矛盾, 我想比錢亞媽個朋友賺, 但係佢又未必可以好快咁覆到我, 因為佢身體唔舒服! 我想成份保單轉左比我朋友個sales, 但係亞媽個朋友又話佢唔想煩到人自己可以handle到!

咁唔通我好直接話你身體唔好, 跟本就跟唔切咩! 追又唔係, 唔追又唔係! 但係, 我又真係好想快d整好份單囉~

命都冇!!!!

我真係好想知, 個惡夢幾時先可以完???!!!

已經係今年內第三個暖風機, 呢個都係買左兩個幾三個月咋!

我都已經無話可說, 因為已經冇命講~

拆屋~

唔知滕滕係唔係知道屋企有d嘢太舊, 所以想叫我地一樣一樣咁換左佢, 定係佢係屋企實在太無聊, 要搵d嘢攪下呢???

老爺奶奶自從入伙之後到而家, 呢間屋都已經住左已經有廿年! 當年因為結婚, 老爺奶幻搬走, 我地嚟左個小裝修, 跟住滕滕出世, 換晒所有傢俬, 到而家, 差唔多換晒所有電器, 除左d門窗未換之外, 都8899!

不過, 我估滕滕想我換埋d門窗囉, 如果唔係點會..........

自從滕滕識開大門之後, 我估佢一日開九十幾次囉, 如果唔係, 點會咁鬆法啫~! 老公叫我唔好乜到瀨落滕滕到, 不過除左佢, 我覺得唔會再有其他人"寧"到個鎖咁! 講完呢句話之後先好笑, 因為滕滕就即刻話: "係呀! 寧寧寧呀!" 嗱! 即係唔係我屈佢啦!!!

個鎖要換之餘, 尋日番到嚟, 唔止個鎖, 張地墊都變成咁............

睇嚟, 學個frd話齋, 頭十年都唔好裝修住喇! 

親近~

而家晚晚瞓覺, 滕滕都會要我攬住佢之餘, 仲要要求多多, 例如又要我個身打側嚟對住佢, 只係個身打側又唔得, 又要個頭同佢面對面, 鼻尖對鼻尖, 咀掂住咀, 跟住又再話R背脊之餘, 仲要我隻手係佢件衫裏面轉埋彎幫佢R埋手臂, R完手臂, 又要申番隻手出嚟同R手臂個接位, R到又要到R小腿!

完晒事, 仲要數多10下, 佢滕滕一個心理準備先可以停手唔R!

其實滕滕好大部份時間都係咁上下, 只要滿足晒佢要求, 大部份時間都係15-20分鐘就已經瞓著!

望住瞓著左嘅豬仔, 真係覺得佢好可愛, 又好得意, 雖然而家諸多要求之餘, 但係每晚瞓時都要咀掂住咀瞓! 但係, 呢D咁親近嘅行為, 真係唔知可以去到幾時會停, 冇得再親..........

嚇襯~

而家晚晚同滕滕瞓覺, 例牌菜更係要R背脊, 不過佢今晚R完背脊, 無啦啦叫我申隻手落條片到, 咁我就好順理成章同佢R下兩邊pat 嗰兩塊肉!

因為佢而家都仲著片瞓, 臨瞓前都仲玩到出晒汗, 所以要我R pat唔出奇! 但係佢今晚就同我講: "唔係呢到呀(當時已經係R緊pat pat 兩邊d肥豬肉)! 係"屎忽窿"呀!"

"屎忽窿"??? 我一聽到佢講呢三個字真係打左個突, 因為我地教佢, 都係講"痾屎屎嗰到", 冇人講過呢三隻字! 所以當時我真係好想笑出嚟囉, 但係又唔可以, 因為佢呢排講開邊個詞語, 就不停咁講! 正如佢呢排講開"好嗅", 佢就乜嘢都會話嗅, 無論係街係屋企, 不停咁話我地呢樣好嗅, 嗰樣又好嗅! 咁如果因為佢講左"屎忽窿"之後我笑的話, 我真係唔敢想像, 佢又開始新一輪係咁講"屎忽窿"我就真係死比你睇喇!

幾鬼靚!!!

白燈下~



黃燈下~

真開心!

老公唔會因為情人節而送嘢比我, 最多都係生日先有!  冇收到老公禮物, 反而收到個好朋友嘅禮物!

好朋冇講到有咩係份件到, 只係講係一d好小嘅禮物仔嚟! 不過一打開, 睇到係呢d嘢, 真係想喊!

唔好講盒朱古力餅, 只係支lotion, 就已經足夠我感動到喊出嚟, 因為好朋友要叫佢爸爸係澳洲有時間就專登買比我, 呢d唔止係要有心, 重要係專登!!!

真係好開心而家身邊咁多咁有心嘅好朋友, 真係覺得自己好幸福可以有咁多有心好朋友!!!

情人節晚餐~

今晚情人節, 原本老公話去鴻星食飯, 結果都冇去, 因為連加一成五嚿水一個人, 我真係唔捨得, 因為食完又點呢, 痾番出嚟咪又係咩嘢! 所以結果老公諗左另一個地方, 係我更加鐘意嘅!

就係去元朗食炒蟹喇!

情人節真係情人節, d人多到呢~!

我地已經好耐冇嚟過喇, 自從預備想有bb嗰時開始, 到而家都有5-6年! 係到食嘢, 感覺上好似好有親切感!

呢間嘢冇咩點變, 嘢食都ok, 只不過係貴左好多啫! 一碟炒蟹就只得一隻蟹, 以前好似唔知$88定$108, 但係而家就要$178!  我地叫左一碟炒蟹, 一碟黃金蝦, 同埋一個芋頭油鴨煲, 再加兩個白粥, 埋單都要差唔多四百蚊!

其實而家樣樣嘢都好貴, 全部都加晒價, 只係人工冇加!  所以平時真係要慳d洗錢!

洗禮!

自從過左年之後, 我好似好多嘢要幫滕滕做!

呢兩日, 就預備去攪滕滕領洗d嘢!

我呢個咁樣嘅教徙, 真係有d唔怕醜! 成日都講星期日想帶滕滕番教堂, 講左成年都冇行動過!

上個星期六同亞sir食飯, 講開3歲以下嘅小朋友, 係可以唔需要上左主日學先可以去領洗, 而我都打過電番教堂,佢話今個復活節有得領洗! 所以今朝download左份form, 我出去攞番之前唔見左嗰張領洗紙, 等埋個frd比個代父資料, 咁聽日就可以遞form 喇!

不過, 今朝臨出去攞番我自己張領洗紙時, 家姐聽到我話要趕住出去, 因為我同滕滕整緊預備洗禮d嘢時, 佢就係到恥笑我囉! 佢恥笑完我, 我有d唔開心, 因為我覺得佢好唔尊重我呢個決定!

無錯, 我係好少番教堂, 但係我想滕滕成為教從, 係希望佢可以學道理, 思想上要正途, 因為要做個好人, 係要由細開! 由頭到尾, 我都係咁諗, 並唔係因為想佢有分!

我知家姐笑我, 係因為覺得我都唔係一個虔誠教徙, 不過although 我唔係一個虔誠教徙, 咁我就唔可以比個仔洗禮嘅咩????????????????????????????????????

蒲爆!

尋日老公番16個鐘, 今日又番16個鐘, 啱啱過左呢個星期四同老公d frd 去食dinner, 佢地話隔成年先見, 叫我地出嚟多d喎! 成年先見, 差唔多啦, 因為我都已經起碼足左48小時冇見我老公, 我係老婆, 都咁上下時間先可以見到佢, 咁朋友都係咁上下啦!

所以呢兩日唔使番工, 可以係朝早老公番嚟見過下佢, 等佢瞓醒去食lunch再見多幾面, 如果唔係, 又再又一個唔知48定係52小時喇!

老公番工, 我就真係不甘寂寞! 今日, 我又同滕滕去街喇!

約左個best frd去飲茶, 原本諗住只係佢一家三口, 不過今朝佢就話佢外母都係到, 問我介唔介意! 其實都唔係好介意, 因為有d老人家都幾nice, 就算唔nice嗰d, 出到嚟見到d後生有朋友係到都會扮好nice, 不過, 一去到地鐵等我個frd嚟接我嗰時, 佢就同我講佢有其他朋友係到! 其他朋友.......都ok嘅, 因為我都知我個frd不嬲都係咁, 約襯都一大班人! BUT, 去到, 原來係佢老婆D亞哥細佬&亞媽! OMG, 即係佢老婆D屋企人! 早知係咁, 我就真係唔會去喇! 好彩就係, 成餐茶滕滕就一路係咁攪住我, 如果唔係, 真係戇交交囉, 仲要係好戇交嗰隻!

飲完茶, 就去左搵契妹喇, 去到契妹屋企, 我就好似散晒咁, 一步都唔想再行, 因為真係攰到爆囉, 好彩食dinner問過邊d唔係情人節餐先去咋, 如果唔係去到又再搵, 就真係命都冇!

連續出左去兩日, 滕滕就開心囉, 我就真係攰爆, 今晚對腳仲發軟蹄潻!

忙碌的一天!

老公番工, 就係我同滕滕去街嘅好時候!

今日去左個小學同學到食薑醋, 因為佢啱啱生左第三個! 係第三個喇, 而家呢個年代, 真係搵人生三個都幾難, 因為生活壓力真係幾大! 所以真係好配服我同學咁有衝勁!

見到佢生左三個, 個心又開始羨慕起嚟! 我唔係想有三個, 因為兩個都夠! 唔知點解成日都對小朋友充滿愛心, 好想日日番到屋企, 都有自己D仔女圍住自己嚟煩, 仲有係不停咁叫住媽me媽me, 咁我就好滿足, 不過, 而家老公唔想生, 所以我估我呢個願望都幾難實現!

唉~ 算啦, 有時有d嘢整定! 唔想生住嗰時就唔緊, 而家緊喇又唔會再有! 好難自己可以控制到!

你攪掂佢喇!

自從上次同亞妹&個frd食完飯之後, 佢地都發現老公個人好燥, 未到第三句就已經火嚟! 之後, 我同老公講番, 唔知係唔係因為佢長時間唔夠瞓, 所以d火嚟得比以前快, 仲要係即嚟即有火, 仲要係即刻鬧我!

所以早排真係覺得自己好委屈, 因為做襯乜都比老公小, 三句唔埋兩句佢就已經嚟料, 感覺上我生存係呢個世界上就係好似要比佢鬧咁! 人地唔多熟老公, 跟本就唔相信成日比人鬧嗰個係我, 因為鬼叫我個樣生得衰咩, 一副精靈惡人相, 同人講我成日比人小, 真係講都冇人信囉!

所以之前同老公講, 亞妹同個frd都覺得佢變左鬧人精之後, 老公就好似變左, 變番以前嘅佢! d 火好似收晒咁, 講嘢唔會再一開口就鬧我喇! 我感覺上, 好似唔係好實在咁囉, 點解老公好突然之間似正常番咁嘅?! 我當然唔係想或者已經習慣左比佢小, 唔小唔安落啦, 但係, 我唔敢開心得太快, 因為我好怕佢又會係不久嘅將來又會變番做鬧人精...........

早前, 因為有時夜晚搵唔到老公, 我就懷疑佢出去玩, 不過觀察左一輪, 佢又唔似出去滾, 所以我估佢只係同d同事上左大陸飲酒, 而因為我本身極度表明左唔鐘意佢上大陸, 怕有危險, 所以我覺得佢先至死都唔肯講佢去左邊!  不過, 算啦, 佢唔似去滾, 咁佢去飲酒我都唔會阻止佢, 因為由識佢開始, 我都已經知道佢會出去飲酒架啦, 唔通而家先唔比咩!

早兩日, 我又搵唔到佢喇, 不過今次我冇咁興喇, 因為佢呢排好少出去, 而今次又失踪, 直覺上佢又同左d同事去大陸飲酒, 但係唔like都總會有, 所以佢第二晚放工番嚟, 我就同佢講, 14号食飯, 我唔會再去搵食咩, 要搵就佢去搵, 因為我唔多alike!

今晚, 老公臨番工之後問我, 下個星期二去鴻星食好唔好, 因為佢地都有情人節晚餐, 而且仲有鮑魚食潻!

所以, 有時都算啦, 老公唔再好似之前咁成日鬧我, 我就已經冇咩要求啦~

歲月不饒人

上個星期五同班舊同事食飯, 亦都係我唯一嘅一班舊同事, 因為我一出嚟做嘢, 就已經係呢間公司到, 一做就做到29歲, 跟本就係成個青春比晒呢間公司!

Post左d相上FB, 亞Chirs 睇到, 佢就話我班舊同事, d男人好老!

唉~ 好老咩? 真係好老咩?! 咁即係睇我個樣都唔方後生啦!

聽到話"好老"呢兩個字都幾感嘆! 因為我17歲入呢間公司, 佢地個個都係廿零歲咋, 而家呢, 佢地四十都有啦! 不過, 可能識左咁耐, 見左咁耐, 我真係唔多覺佢地"好"老! 既然如果佢好睇起嚟咁老, 即係睇落我到, 都唔會後生得去邊!

因為早幾日去買香水, 個男sales(都幾young) 用成熟呢個字嚟形容我! "成熟"呢兩個字, 以前對我嚟講, 只係形容d三十幾四十嘅女人, 而家個男sales 就用成熟嚟形容我, 咁我即係唔想接受現實都唔得啦!

ABSOLUTLY RIDICULOUS!!!!!!!!!!!!!!!!!!!!!!!!!!!!!!!

今日追番尋晚同前晚套缺宅, 真係越睇越覺得荒謬! 都唔知邊個做篇劇架, 有乜理由, 謝天華做人地個老公,居然可以理直氣壯咁同個老婆講, 佢好愛個情婦, 而同一時間亦都唔會放棄個老婆!

做老婆既然真係咁愛個老公, 又唔會放棄, 咁係唔係唯一辦法就係要接受個第三者???  使唔使咁可悲先???

最過份, 就係個老公好直接咁同個老婆講, 叫個老婆接受佢係出面有個女人囉!

呢套嘢比d男人睇, 真係教壞晒! 倫理都完全唔正常!!!

男人!

請問, 如果你係一個男人, 結左婚生埋仔之後, 先真正發現自己個老婆原來係一個極度冇愛心嘅女人, 之前"她"表現得幾鐘意小朋友, "她"表現得對老人家係幾咁照顧, 原來結果所有一切, 都係假嘅, 所有嘅都係做出嚟, 目的, 就只係想同你結婚, 只係想有男人要佢!!! 

請問, 你會唔會問下自己, 當初點解自己雙眼係唔係盲左?? 雙耳係唔係聾左???

完了一半!

咁又過左半個學期喇! 老師派左滕滕係學校做嘅畫簿比我地睇, 覺得好得意囉~

平時番學, 就係做埋呢D嘢, 都幾充實啊~!

好危險~

今晚同班舊同事食開年飯, HOT POT係我建議, 不過打完, 我有小小覺得lai嘢~





因為班友仔, 不停咁落生嘢, 落左嗰d未熟, 就又落生嘢, 坐我隔離嗰個, 耐唔耐就"不"d嘢嚟比我食!

不過, 食食下, 大家都發現第一轉嘅order紙, 原來嚟左兩轉咁多, 攪到total 成四十幾碟嘢!

死喇! 下次再食飯, 我都唔敢去hot pot 喇! 因為有預感, 應該會腸胃炎..........

思媽~

由開始放年假, 到初八我開工, 滕滕開學計, 足足都放左成10日假期! 係呢10日假期, 滕滕除左我沖涼&去toilet 嗰時唔係我身邊之外, 其他時間都好理所當然係同我一斉!

初八直到尋日計, 滕滕已經番左4日學喇, 不過, 頭三日我番工出左門口之後, 佢同我kiss goodbye之後, 就行左去窗邊, 喊住咁話要我, 叫我唔好番工, 又話望到我係巴士站喎! 我番工行嗰條路, 跟本係望唔到, 見到有人就喊住話係我嚟! 而尋日滕滕係樓下等緊校巴之際, 老公咁啱放工番嚟見到佢, 就同佢等埋校巴先上樓, 係呢個moment, 滕滕又同老公講, 媽me番緊嚟, 唔番工呀!

放假對足咁多日, 雖然對住我係曵左, 但係番左工之後佢就嗲左囉~  d工人嚟hk打工就思鄉, 我番左工佢就思媽囉~ 正一傻豬仔嚟!

又一個惡夢............

今日一開房個電視, 就已經變左咁~

無啦啦個畫面多左條線...........

我見到, 冇問滕滕關唔關佢事, 因為我自己都唔想知..........

我估, 應該唔會係佢啦, 因為佢已經日日比我問佢記唔記得邊6大規條架喇, 日日都問住, 唔通都仲去挑戰我???