真係一個迷~

尋日同老闆傾馮小姐放產假一事! 老闆話叫我自己同馮小姐傾, 傾好之後就通知佢一聲就得, 唔使問佢!

 

我話我打算叫馮小姐放前2後8, 因為臨生之前起身番工好辛苦, 所以想打算叫佢咁放, 老闆話睇佢都唔會生第二個架啦, 如果佢想放前0後10都尤得佢喎~ 只要我想點就點! 馮小姐去睇過d乜姑物姑話佢會早產, 所以我要度一度先同佢講下!

 

另外, 我同老闆講, 馮小姐出口術, 想放產假嗰時好似我咁係屋企做嘢, 而我估計馮小姐可能想好似我咁出full paid! 老闆話佢屋企環境唔係咁好, 如果佢想出咪比佢囉, 都係幾千蚊啫, 又唔係多!

 

一聽到, 我就真係覺得一個迷! 原來我老闆係一個咁嘅人, 係人係鬼話想點佢都話好! 我放假就做到隻狗咁, 佢放假唔使做就有5/5!

 

冇錯, 我放產假老闆買左好多補品比我, 呢到已經補番數, 但係呢個馮小姐諗埋d縮數就想攞full paid, 都唔係全心諗住幫我! 呢到我條氣有小小唔順囉!

 

老闆話, 我點做佢都冇問題, 但係如果老闆講都出口話佢屋企經濟能力唔好, 咪當係我自己比馮小姐嘅人情比埋佢, 如果我都唔比, 就顯得我好小家!

 

.........不過, 如果比埋佢, 我條氣真係唔係好順囉!

 

1)由頭到尾, 馮小姐都冇講過話佢要攞嘢番屋企做, 佢只係講佢有個software, 放假時可以係屋企搖控公司個電腦!

 

2)而且馮小姐又冇同我講過出糧嘅任何嘢

 

如果人地都冇提出任何有關嘅嘢, 我就自己送上門, 會唔會好Q戇居呢!

 

So fast~!

尋日放工番屋企, 個工人同我講滕滕而家要企係到痾VV, 尋晚我亦都見到係咁!

到左今朝滕滕已身, 我同佢去痾VV, 佢都係要企係到!

點解呢兩日滕滕突然變左咁多嘅?

 

你真係變左~

由尋晚開始, 滕滕瞓覺時好似已經唔係咁想我曖佢喇!

飲完奶, 抱左上手一陣, 佢就爭扎起身爬過去我地個枕頭到要自己瞓! 起初佢爭扎我都唔比佢起身, 因為覺得佢又唔知仲咩想去玩, 但係佢再三爭扎之下, 我就放手睇下佢想點, 原來係去我地個枕頭上面瞓低!

今晚都係咁, 曖左佢幾下就突然起身, 又係要去我地個枕頭到! 原來佢想自己瞓!

可能日後我已經冇得再好似之前咁暖佢瞓喇! 原本諗住佢兩歲到先train佢自己瞓, 睇嚟好似想提前.........係佢想!

有D失望..............! 因為佢已經大個仔左!

唔通真係?!

滕滕而家都仲有小小鼻水鼻涕, 唔知使唔使再去睇醫生呢!

不過, 今次病, 滕滕真係唔同左, 唔係乖左, 而係曵左, 仲要係好多!

人地話小朋友病完好多都曵左, 滕滕而家都未病完, 呢個精神狀態就已經出左嚟!

叫左佢唔好, 都仲係咁, 打完手手都仲要嚟, 仲越玩越過份, 屎塔都攞嚟玩!

家姐問我仲要唔攞走個屎塔喎! 唔好講得咁容易, 到時你個仔戒片你就知! 

我話而家同佢戒片, 基本上半個鐘至一個鐘左右就要叫佢地去廁所, 唔通成日張個屎塔搬嚟搬去咩, 唔搬屎塔就即係搬佢啦, 有時滕滕示意佢要痾vv, 叫/抱得佢去得廁所嚟, 佢都可能已經忍唔住啦, 因為佢地都仲未係好識架嘛! 仲有喎, 佢地大就仲攞命, 有時要比佢地睇住個電視先可以集中到, 如果係我地個廁所到, 大把嘢比佢攪, 咁又點痾得出呢~

家姐又話, 都要試下要佢地係廁所去啦! 唔好咁口嚮, 你睇日試下半個鐘頭叫佢去一次廁所, 一係就一日同佢地洗底褲洗到黑, 咁你就知道有幾難!

滕滕, 唔好怪我!

係你迫我架! 你唔玩個廁所, 我係唔會罰你舉蓋架!

煩爆!!!

失眠真係好痛苦, 因為我今朝四點幾先瞓得著!

 

個腦更係唔知仲咩, 唔諗唔諗又諗, 諗下老豆, 又諗個工人, 真係好煩!

 

最怕個工人有第二次, 因為我已經講明, 再有下一次, 我唔會有情同佢講!

 

今日已經攪掂左屋企個電話, 申請左副線, 張條主線飛左去我手提, 以後無論佢d朋友定係財仔都打唔到入嚟!

 

我都唔明, 點解佢地唔可以安份守紀! 好好地做份工咪好囉, 仲咩成日都要攪下嘢啫~ 我又唔明, 佢地咁遠水路嚟做嘢, 都希望可以安安定定, 攪咁多嘢都係駁下有冇機會啫, 但係如果駁唔到, 又要搵過另外一個僱主就唔好玩啦, 就算比你搵到, 咁都唔擔保個僱主係一個好僱主嚟啦!

 

我今晚同個工人講, 明明請佢番嚟係幫我手, 而家仲要比多d嘢我煩, 都唔知為乜!

可唔可以比我抖下~

滕滕, sorry 呀~ 呢排媽me食煙食得好過份, 我唔想, 不過我好煩, 因為冇人可以幫到我, 而我又唔知咁樣做係啱唔啱, 做左唔知又唔知work 唔work!

 

我都唔想食咁多, 但係我真係好迷網, 我好想唔諗, 但係唔可以, 如果唔係因為有你, 我一早食左安眠藥, 希望可以一覺瞓天光!

 

有時係到諗好彩你唔係女仔, 因為而家做女人好辛苦, 顧住屋企之餘, 又要番工搵錢, 而且仲要諗埋你老豆會唔會變心, 所以做男人好幸福, 起碼唔使擔心咁多, 只係搵錢番屋企就夠喇!

 

你媽me我, 凡事都諗灰嘅一面, 往往就諗左唔好嗰方面去打算先, 因為諗左先就到時真係發生就唔使咁滕, 朋友話叫我諗明天會更好, 更好? 乜真係咩? 我唔係好信, 因為如果真係好, 呢個世界就唔使咁煩啦!

 

我都唔明, 人地做人我做人, 點解我個駁頭咁重嘅? 可唔可以搵人同我分擔咁d呀?

 

真係為你好懊惱, 因為如果你第日大個好似媽咪me, 你做人就會好多煩惱, 好多人搵你去做決定, 好多人搵你去解決問題, 好多嘢要去做決定, 好多嘢要去分析, 但係如果你第日大個個性格同媽me 相反, 我就鄧你擔心, 怕你比人搵苯, 怕你做人冇主意, 怕你比人利用, 怕你比人蝦!

 

滕滕, 睇見你而家曵得嚟咁開心, 開心得嚟又咁天真, 真係羨慕死媽me, 所以有得你開心你就開心, 因為人越大就越多煩惱!

 

媽me好朋友講話媽me因為我有能力去做咁多嘢, 所以先有咁多嘢要我去做, 但係又有冇人去諗下, 我都想休息下, 唔通真係要到我死嗰一日先可以比我去休息?

好驚~

呢幾日個腦真係冇停過, 一單都未煩完又整多樣嘢嚟!

 

亞媽同老豆今日入嚟探我地, 亞媽又同我講話老豆隻手成日係咁"被", 都唔知咩事, 而且早輪成日係咁瞓, 瞓極都好眼瞓! 呢幾排又人叫佢開工, 開完工番到嚟就攰到死晒狗, 以前都唔係咁, 都唔知佢身體係唔係有唔妥!

 

講真, 我真係好想逃避, 我唔想知我老豆咁多嘢, 因為自細我已經好唔鐘意佢仲性格, 成日放工番嚟就搵我地嚟發皮4, 張唔開心D嘢發洩晒係我地身上, 尤其係亞媽! 話側雖如此, 我表面唔多理佢, 但係個心就軟! 尤其係佢年紀越嚟越大, 知道日子都唔多, 唔通真係唔理佢咩!

 

亞媽同我講過, 佢叫老豆去check下究竟係咩事, 但係老豆冇理佢, 所以我今日就同佢講, 叫佢去明愛睇街症, 初步睇左, 可以叫我係明愛做嘅表哥幫下手跟進下, 起碼唔使等等等! 我同老豆講, 等睇左先好去旅行(亞媽第一時間就叮起雙眼望住我, 話: 又有得去旅行呀!!!)! 因為睇完都唔係第一時間有得比你睇專科, 起碼睇左有初步評估, 唔使個心驚驚, 唔知咩事! 老豆聽完我咁講, 佢就話星期三先得閑去, 所以我就叫亞媽鉗埋老豆一斉去見醫生!

 

亞媽仲同我講佢尋晚發左個不詳夢, 夢見佢自己甩左隻牙, 我唔知佢係邊到聽番嚟, 話甩左隻牙, 就代表有親人遲d會唔係到!.........我一聽到就話唔係嘛, 係唔係架, 唔係架嘛!

 

我唔知我叫佢去睇醫生咁做啱唔啱, 我一直想逃避係因為有時一係唔知有冇事, 一知道有事就已經係大件事, 我唔想知道就係呢樣嘢!  心中有數, 老豆長期飲酒食煙, 你話比我知佢冇事我就一定唔會信, 但係我真係好唔想知道佢有d咩事..............

 

我好驚, 雖然佢係衰格, 但係佢都好錫我, 自從我接受番佢之後, 佢d衰性格雖然都係衰, 但係都已經改左小小, 我出口話佢, 佢都唔出聲比我鬧, 我每次番屋企食飯, 佢每次入嚟, 都一定買蝦蟹比我食, 因為我鐘意食, 但係如果真係同我講佢有d咩事, 我怕我接受唔到..............

身痕~

我都唔明, 仲咩滕滕而家瞓覺都周身痕架!

一係就頭痕, 一係就頸痕, 一係就腰痕, 一係就眼痕, 一係就大肶痕, 一係就腳痕, 而今晚就輪到PAT PAT痕!

我一路同佢抓個PAT PAT, 我就覺得我好似係到彈緊結他, 因為我左手欖住佢, 右手就好似彈結他咁一下一下!

冇得比你選擇!

尋日情天霹靂之後, 今日我就問個工人多一次, 佢有咩方法去解決!

 

佢當然冇答我, 因為佢兩條數加埋都已經4千5百幾, 跟本一個月糧都唔夠cover, 所以我只係比左一條路佢撰, 就係要佢每個月全份糧要嚟還錢!

 

雖然我再三問佢, 究竟佢有冇同我講大話, 最大嗰條數究竟係唔係真係幫佢個fd借, 其實無論佢答我真係真係, 我都係唔會好信佢, 同埋, 就算係佢定係佢個fd, 我都已經決定左都係要佢將成份糧嚟還錢!

 

我有諗過如果請過個工人, 都唔知會唔會好似而家呢個咁, 咁有心機同我湊, 而且呢個係好有經驗, 唔使我多講, 佢好多嘢細微嘢係做得好小心, 所以去到最尾, 我都係唔想抄佢!

 

講真佢都要養家, 如果我抄左佢, 佢都唔好過, 搵過另外一個僱主, 佢都要比佣金, 又唔知可以等幾耐先搵到, 所以我今日同佢講左好耐, 我問佢想唔想同我打工, 鐘唔鐘意係我呢到做嘢, 如果係有心, 就唔可以再有下次, 而今次, 我可以比多次機會佢!

 

我唔知我今次有冇做錯, 我希望我今日同佢講左咁多嘢, 佢真係明白, 因為下次唔會再有多次機會!

乜原來你識架, 早講吖~!

第一次同滕滕啜鼻涕, 就係係上個星期日夜晚, 食左幾日藥滕滕仲有小小鼻水、鼻塞, 咁少不免都仲會再同佢啜多幾下!

原來啜鼻涕真係一個挑戰, 幫滕滕啜左第一次之後都覺得好似冇咩特別, 同老公嗌交有時都會喊到鼻涕都流晒出嚟, 跟住就自己唔多唔少都食番小小(好似好核突  ), 所以啜佢D鼻涕其實同食自己D鼻涕都係差唔多!

不過, 當第二次又再嚟嗰時, 個心又定左一定先去啜, 因為原來又要再比膽自己再嚟多次!

同追月嗰日同老公講, 滕滕仲有鼻水呀, 又有鼻塞, 想睇多次醫生但係又唔開, 第日放公番嚟就要同佢去睇多次喇! 話口未完, 滕滕D鼻水又流左出嚟喇!

我睇住老公攞張紙巾行去滕滕到, 跟住就叫滕滕"FREE"喎! 哎呀, 滕滕居然識呀!!!  雖然未可以好似我地大人咁咁大力, 但係佢原來識"FREE"鼻涕呀!!!

早講吖! 唔使下下同佢啜嘛, 有時叫佢自己"FREE"下都好吖!!!

有冇攪練錯!!!!!!!!!!!!!!!!!!!!!!!!!!

今日放工番到屋企發現個工人有三封信! 其中有兩封係private & confidential!

 

我已經知道唔對路, 所以我叫個工人係我面前拆開d信, 同我講係咩嚟! 基本上三封信都係追數, 有兩封係財仔, 有一封就係people!

 

我問個工人發生咩事, 因為我已經係佢一嚟做嗰時講得好清楚係唔可以去財仔借錢, 而家仲要有兩間!

 

個工人話其中有條數係幫朋友借, 每個月要還 $3,1xx, 而另外佢自己有條數就每個月要還 $1,4xx!

 

我再三問佢, 究竟佢有冇講大話? 究竟係唔係佢幫人借? 仲咩事佢未得我同意就用我呢個地址去借錢?

 

原來就算佢比個passport 我同佢keep, 佢都可以去借, 因為佢自己影抵左個copy!

 

我聽日就會打電話去個agent 到問下, 我下一步應該可以點做!!!

養唔熟架!!!

上個月個工人已經叫我早d出糧, 我見又唔係成就算啦, 不過佢好似食過番尋味咁, 係星期初就講左一大篇嘢又想嚟!

 

佢亞妹嚟左HK做嘢幾個月, 但係係上個月就開始病, 病到而家都未好番, 所以亞妹個老闆就叫佢亞妹番印尼休息一個月, 係10月24日先番嚟HK!  個工人同我講佢亞妹個老闆好奇怪, 問我點解喎~ 又話唔係抄魷魚, 因為張機票係來回, 寫左10月4日番HK! 跟住就同我講亞妹冇錢番印尼, 因為每個月比agent 扣左$3,000佣金, 叫佢問下佢太太(即係我) 可唔可以早d出糧喎! 去到呢樹, 我就即刻佢同佢太太講佢冇錢番去囉! 佢太太叫佢番去, 又唔關你個太太事! 如果真係冇錢, 都係同佢太太講! 我講完呢句, 我個工人已經冇再講呢d嘢!

 

到左今日朝早8點滕滕起身飲奶, 個工人就好"知"油咁係到慢慢整滕滕d飯仔, 仲要唔趕住好咁走, 我就已經知道佢想整色整水, 到左個工人九點幾出門口, 我都當冇嘢咁, 叫滕滕同佢講bye bye, 不過過左半個鐘, 個工人無啦啦番番嚟話攞張報紙喎! 攞報紕? 乜中文你識睇咩??? 我冇理佢, 因為我已經知道佢想嚟料! 果然係出門口嗰一刻, 佢就同我講可唔可以早d出糧!

 

今次我冇理佢, 第一句就答"唔可以"! 而且我仲講"我老闆夠都未出糧比我囉!" 個工人就再問我: "$1,000啦, 我想買手信呀!" 不過我都唔比, 因為我唔鐘意咁樣, 可唔可以安分守紀呢? 我個個月都準時出糧, 我唔係d 黑人憎僱主, 我都唔明, 點解成日耐唔耐就係咁樣要攞錢!

 

通常個工人放完假番到嚟, 都會同我做左d簡單嘢, 但係今晚我地出左門口食飯之後番到嚟, 基本上除左地下上面會click 親人嗰d玩具之外, 一律都冇幫我做!

 

老公同我講, 呢d"工人" 真係唔好對佢咁好! 我地兩公婆平時都對佢冇乜嘢, 樣樣嘢都好客氣, 晚晚九點幾就比佢番房瞓, 只係想樣樣嘢都有規有矩啫, 唔想成日整慣話想出糧就安排比佢, 你估我地係ETC咩, 話有就有! 但係換來佢夜晚番嚟嘅反應就係咁!

補番數~追月

我咋老公型, 有乜奶油中秋節唔同滕滕過架, 人地d小朋友好開心咁係到玩燈籠, 我個滕滕就自己玩手指!

滕滕越嚟越坐得唔耐, 食餐飯都嘈住要出去!

食完飯就去左玩燈籠仔喇, 睇下滕滕幾戇居!

中秋節......我+滕滕.......+同學!

今日中秋節放早, 約左熙媽係葵芳比支甲油佢之後就去左行一陣, 行行下揰到個同學喎, 吹左一陣水就叫佢入嚟我到食飯喇, 因為今晚得我同滕滕咋, 老公又死左去開OT!

滕滕唔知仲咩好鐘意我呢個同學, 唔使warm up就已經叫人同佢玩喇!

仲乜自己無啦啦除左件衫呀~

---

無程程好唔鐘意件衫, 咁就自己除左喇! 同你著番, 跟住你又要除左佢!

扣扭嘅已經除左, 跟住就同你著仔過頭穿嘅, 你又除埋, 你想點先???

又一新挑戰~

上個星期五去完健康院做體格檢查, 姑娘話兩歲到就要同佢戒多一餐奶, 最好就係戒夜晚嗰餐, 因為方便戒片!

同埋, 佢地兩歲之後, 我地食乜, 佢就食乜, 唔使特別煮, 同埋食餐時間就同我地大人一樣, 最多朝早同tea比餅餅佢地食, 而夜晚食完飯之後就食d水果, 九點鐘就好瞓喇, 因為又再配合佢地就嚟要番學!

真係又一新挑戰! 九點就要瞓! 而家9:30要佢上床開始飲奶, 我都已經覺得好早, 因為飲完都成九點九, 唔係餐餐九點九就有倦意架嘛, 而家仲話要九點?

...........好高難度!!!

一齊打敗仗~

滕滕唔舒服, 跟住就輪到我!

食左d成藥, 好眼瞓, 開左張瑜伽蓆係枱底, 朝早瞓左成個幾鐘, 家姐就話滕滕瞓意係sofa底, 我就鐘意係枱底, 好似人地係天橋底咁瞓覺  !

老公又番夜, 我好唔開心, 因為我唔舒服佢都番工, 大佬呀, 你估我鐵人嚟架咩!!! 就算你應承嗰時未知我唔舒服, 咁你知道之後都可以推卦? 唔係應承左就唔推得架???

"你唔係唔比個仔見我亞媽吓嘛~?!"

原本尋晚去奶奶到做節, 不過滕滕唔舒服, 所以我就話滕滕唔出去, 我就放工都番屋企喇, 但係老公就即刻話: "你唔係好似邊個邊個咁嘛?! 唔比我亞媽見滕滕呀!!!"  佢一講完, 我就即刻係到大笑!!! 問佢係唔係有病, 個仔唔舒服都要出去做節? 真係冇練嘢吓嘛???

我知, 佢二家姐好難得先揪到時間番去做節, 佢想比滕滕佢二家姐見下, 但係我又唔係好明, 佢二家姐都冇搵過我地一次話想見下滕滕喎~?!  我都好耐冇見過我細佬個女, 我都成日話想去搵佢, 但係佢二家姐冇囉! 我又知, 佢二家姐要睇鋪, 自己生意更係好難行開, 但係個囝唔舒服都要出去??? 所以老公講完話我唔比個仔奶奶睇之後, 我就即刻話聽日我問下佢亞媽, 咁樣係唔係代表唔比個仔奶奶睇! 跟住再加多一句, 問完佢亞媽, 就再問下我亞媽,double confirm 係唔係我錯!

所以尋日朝同滕滕等緊睇醫生之際, 我就係老公面前打去同奶奶講滕滕唔舒服唔出嚟, 不過佢個仔就話我咁樣做係唔比個仔佢見喎! 奶奶一聽到就即刻話唔緊要, 咁滕滕唔舒服就唔好出嚟啦, 不過我又再三強調, 你個仔話我唔比你見滕滕, 所以我一定要親自打電話比你! 老公一路聽我講電話, 就一路笑, 因為佢都知佢自己講錯嘢, 但係就死都唔認巢!!!

真係天大笑話!!! 個仔唔舒服唔出街, 唔去你亞媽到, 都話唔比個仔你亞媽見呀??????

你放心啦老公, 我一定下次等埋你係到, 張呢番對話, 係我老豆老母問前問多次我咁做, 係唔係唔比你亞媽見滕滕!

 

 

 

破產雙月

九月&十月, 係我一年之中要申請破產嘅兩個月, 因為.............

 

1)亞媽生日

 

2)八月十五

 

3)我、老公 & 滕滕要到期交保險

 

4)請亞媽、老豆去旅行

 

年年都係咁喇, 亞媽生日, 只係係八月十五前幾日, 同佢慶完就要做節, 都係出去食飯啦, 跟住又要比錢舅父做節, 又要比錢舅婆做節, 又要比錢奶奶做節(好彩亞媽唔使比)...........呢d只不過係洗好少錢啫, 但係跟住就要交半年一次嘅保險先至開始大獲, 而滕滕係一年!

 

以前亞媽辛苦成日搵錢, 所以而家就算佢未完全退休, 我地3個都會比錢佢10月去旅行, 等佢出去行下都好吖! 以前我地細個就同我地講, 佢連飛機都未坐過! 聽到都心酸! 所以我就撰左每年10月份左右囉, 因為10月d團平d, 就算我地撰d貴d嘅, 佢地都可以去多幾日玩吖嘛!

 

仲有, 有個best fd係10月3結婚, 今年仲要加多份人情錢!!!

 

哎呀! 好窮呀!!!

第一次 + 360度盤旋

今次滕滕真係水皮! 尋日天氣真係好焗, 因為吽打風, 出出入入, 又熱又焗, 跟住又有冷氣, 可能就係咁就lai左嘢喇!

 

尋日送完熙媽佢地走左之後番到屋企, 我叫醒老公睇住滕滕, 因為我要整飯仔比滕滕食, 但係老公就卦住瞓覺, 滕滕就係到喊! 我起初以為滕滕喊到流晒鼻水, 但係過左一陣又再有小小, 出去食飯又再有小小, 仲要耐唔耐打乞嚏, 所以咁樣嘅情況, 我就知道應該係唔舒服喇!

 

9點鐘就比奶佢食瞓覺, 但係到左差唔多11點就喊醒左喇, 但係佢唔肯瞓反, 因為個鼻塞晒呀! 坐又唔係, 瞓又唔係, 一吸氣吸唔到, 就大喊大叫! 死啦, 鼻塞可以點呀, 如果發燒都話可以沖下涼吖, 今次真係乸手唔成勢! 睇見滕滕咁辛苦, 我真係無計可施, 只係諗點樣可以同佢通番個鼻啫, 無辦法就之下, 我付出我第一次, 就係同佢啜鼻涕! 預備落嗰下真係有小小驚驚地, 一來怕整親佢, 二來真係有小小核突! 不過核突都要架啦, 咁佢透唔到氣喎! 好彩啜左真係好左d, 起碼都可以透到一陣!

 

不過一陣之後, 又喊喇, 所以我搵左支白花油同佢點左個鼻一下! 可能未試過, 所以滕滕好抗拒, 仲成日喊住嚟整個鼻! 唔鐘意都要啦, 搽左真係順暢左嘛! 就係咁, 成晚就喊下醒下, 喊下醒下!

 

尋晚第一次抱埋三個人一斉瞓, 不過就真係好難頂, 因為滕滕唔舒服, 所以就就住佢嚟瞓, 而滕滕可能因為迫, 轉呢邊又冇位, 轉嗰邊又冇位, 而且滕滕成晚就係個"枕頭上面"360度咁盤旋, 所以我四點幾忍唔住抱佢番bb床, 因為我瞓到成身都好痛!

兩個傻佬傻襯襯~

今日熙媽&熙熙嚟我地屋企玩, 滕滕同熙熙今日終於有交流喇, 兩個成日都爭住個波波,

滕滕就惡到死, 必定要攞到個波先肯收手, 熙熙呢, 就唔會硬併, 最多比滕滕搶左個波之後就尖叫幾下!

 

我同熙媽講, 捉佢兩個坐係sofa 影番張相先, 但係原來做呢樣嘢係好難架!

快D食晒佢啦, 好攰呀~

連續第三日出去食飯, 好攰呀~

今晚同表叔佢地一斉做節, 張雪球介紹左我係樂富嗰間御膳到食, 不過可能地段問題, 個個都好似唔係好鐘意嗰到!

可能因為樂富而家個商場整大左好多, 仲要分左兩邊, 所以個個都唔係好識搵, 而我地由停車場行到去, 都攪左成20分鐘, 因為係停車場唔識搵路, 再加上比人老點, 所以BKG左6:00到, 都攪到成6:30先去到, 好彩, 老豆今次做到嘢, 佢去左攞位先!

表叔都係, 一嚟到就火火地, 因為我6:15打比表妹, 佢話表叔已經係3樓, 但係6:30先到, 所以我估佢又係搵唔係好到, 可能係因為佢拖住舅婆行左咁耐, 跟住食食下仲同我講之前食嗰間而家好似轉左比人, 下次可以去再食下喎!

算啦, 間嘢d嘢食都幾好, 老豆仲話食呢 d 好過成日去酒樓食, d 餸幾好食之餘, 仲上得好快, 不過 d 人就7 D, 因為我地有成14個人, D餸只係得6個人份量, 又唔出聲話可以叫多客, 下下都要我再番叫! 你知啦, 老人家又怕餓襯, 細佬仔又唔等得!

好喇, 食埋星期一, 同奶奶做埋節, 就食完喇!

起碼要抖番一輪先, 因為好攰呀!!!

咁都唔發爛渣, 好嘢!

比我攪左咁耐都仲未發皮4, 你嘅能耐原來好強下!

---

雙針~

今日同滕滕打埋兩支針, 一支係5合1, 另外一支係水痘針!

果然不出我所料, 一打完就咋晒型, 好可憐咁望住你喊話比你知佢好痛, 不過一放左粒糖落口, 就已經收晒聲喇, 你話佢幾為食呢~

打完呢次針, 我想轉DR, 因為雖然呢個DR年紀比較大D, 可能經驗多D, 但係佢好似冇咩講, 唔係我想像中咁鐘意小朋友嗰種! 佢雖然事後有嚟問下滕滕有冇發燒, 有冇咩特別, 但係唔知點解, 呢個DR 唔係我想像中咁好!

原本好想去探我接生嗰個DR FAN 架, 但係佢咁啱放假去左旅行, 所以我都好失望!

打完針, 就去同亞媽食生日飯喇~ 朋友話歲半支針好痛喎, 佢個女打完之後就乖左3日, 但係滕滕都唔係嘅, 佢簡直似叉爆電咁, 今晚簡直曵到飛起, 仲要冇乜係坐定過, 攪到我眼都暈, 起勢咁叫, 又起勢咁係抓, 又起勢咁攪!  我係到諗, 係唔係支針有興奮作用架, 如果唔係滕滕點解好似痴左線咁架!!!

體格檢查

啱啱同滕滕去完健康院做體格檢查, 大部份發展都OK, 只係講嘢就差左小小!

姑娘話, 其實我地都唔使太擔心佢講嘢, 因為有D BB都成兩歲半先開始, 滕滕只不過比起其他小朋友所識講嘅單字少左D啫!

我問姑娘有關語言障礙嘅問題, 姑娘話語言障礙冇咁早可以知道, 不過如果小朋友有呢D問題, 佢嘅理解力都會差D! 嘩~ 一聽到呢句, 都安心D, 因為滕滕而家大部份都知道&明白我地講乜, 所以佢理解力一D都冇問題!

係姑娘問我嘢其間, 滕滕掉左D積木幾次落地, 而我就第一時間叫佢唔好再掉喇, 如果唔係打打架! 係呢個時侯, 姑娘話叫我唔好成日都講打打喎, 因為我講打打多過講媽媽, 可能佢第日識講打打, 都唔會講媽媽喎   ! 姑娘話, 如果佢第日咁樣掉D玩具, 可以攞走D玩具唔比佢玩, 等佢知道掉左之後嘅後果就係冇得玩, 咁整下整下佢地就唔會掉架喇!

仲有姑娘話, 要係兩歲到, 就要同佢戒剩一餐奶, 而且最好戒夜晚嗰餐, 因為會比較容易戒夜晚條片! 同埋, 兩歲之後, 就要食我地食嘅嘢, 餐數都最好要同我地一樣, 只係朝早兩餐之間, 同埋TEA就可以食小小餅餅/包包! ..........E, 咁我地咪可以好快一斉去旅行囉  ?!

係兩歲前, 姑娘話佢要開始要學習日常生活嘅物品喇, 例如枱、椅、筆、碗、叉、匙羹之類, 而且仲問我屋企有咩玩具, 問我有冇買煮飯仔比佢喎~ 煮飯仔? 乜唔係女仔玩嘅咩? 姑娘話, 買煮飯仔比佢玩, 係等佢學下碗、叉、匙羹呢一類用品喎~ 而且可以等佢地練下力, 扮下切嘢咁!  所以又有機會比我買玩具比滕滕玩喇  !

一陣, 就要同滕滕去打半歲針&水豆針喇! 今時唔同往日, 以前打針痛都唔知咩事, 今次去唔知會點呢???

 

又進步左囉!

因為滕滕包住條尿片焗, 成日抓到一粒粒, 所以我8月尾下令要同滕滕介片, 到左今日, 個工人同我講, 滕滕一起身, 就自己要除片, 可能佢已經覺得冇左條片片係一件爽事喇!

而家滕滕已經唔止一次自己行埋去攞起個屎塔蓋話要VV喇, 但係當然佢更係仲會有時唔記得左啦~ 而且係中午瞓覺時, 已經有幾次冇痾尿係條片到喇, 所以, 可能, 佢已經開始識control已經瞓覺時唔痾VV喇!

不過唔緊要, 慢慢嚟, 媽me又唔係要你即刻得! 只要你有進步, 我就知道你係有努力喇!

 

 

做節~

好耐未試過食餐飯咁開心喇, 因為同舊同事做節! 成餐飯, 大家都起勢咁傻笑, 因為間放提D嘢食一路係咁出, 仲要出得好快, 出到我地跟本食唔晒, 因為我地不停咁起勢咁點點點!

 

九唔搭八咁吹水, 仲要講下人事非, 好開心咁就過左一晚~ 就係呢餐飯, 另我諗起以前一斉做嘢嗰時, 大家一路做嘢, 會一路一斉話人, 一斉小個客, 一斉你話我我又話下你, 比起而家番工真係開心好多!

 

呢班同事, 識左都有成18年, 大家都知道大家皮性, 講嘢就可以放盡嚟講, 串你就串你, 唔使下下都就住就住, 兩三個月我地就會出嚟食一次飯, 生日又食下, 唔係生日又食下! 食到半路, 大家又一斉落樓打下邊爐, 幾爽呀~

 

 

 

你唔好同我講你好辛苦!

今日馮小姐同我講, 尋日個女同佢講, 因為比老師點名叫左去嗰d咩運動比賽, 攪到成6點幾7點先番屋企, 好鬼攰, 所以個女想叫daddy 今朝車佢番學!

 

不過馮小姐就同個女講, 佢好攰, daddy 都好攰, 唔好咁自私因為自己攰就要daddy一早起身車佢番學! 如果佢要叫daddy車, 咁佢就自己問!  唔使講我都估到, 個女一問daddy, 佢daddy 就答應左, 因為馮小姐個老公某程度上係好縱佢個女! 馮小姐見個老公一口答應個女, 咁佢就順理成章咁話不如車埋佢, 因為個女係黃大仙, 咁就可以跟住去油塘! 不過馮小姐個老公一聽到, 就唔係好想, 因為男人個解釋係車完個女, 就即刻買埋餸番屋企, 跟住可以再瞓多一陣先番工!

 

所以馮小姐同我講佢好嬲!

 

其實當我聽到馮小姐叫個女"唔好咁自私, 你攰daddy都攰", 講完呢句之後, 我就即係都係諗: 唔係親生, 就真係唔同d!  而今次, 我就好直接咁講, 我今次唔buy你, 因為幾攰嘅父母, 都會錫自己個仔女, 就算自己有幾攰, 仔女叫到都會去做, 所以我跟住就同佢講, 因為個女唔係你生, 所以你唔明白你老公點解咁攰都答應車佢番學! 

 

今次對答, 我好強硬咁話我唔認同佢, 而且仲同佢講番佢上一次答我, 佢冇諗過去睇個女d功課, 所以我同馮小姐再一次強調, 因為你真係唔係佢親生亞媽, 所以真係有分別!

 

馮小姐好堅持佢自己做事好公平, 而且佢第日嗰個都會係咁, 仲講講下係到喊, 佢話佢而家好辛苦, 自從個女番左去住之後, 由放工番到屋企一路做, 做到成12點先有得瞓, 未停過(我個心諗, 個個家庭都係咁架啦! 只不過係因為你而家大住個肚先覺得特別辛苦啫, 你以前咪都係自己一個做!)! 我都唔係冇同佢講過啦, 一生左, 仲多交嘈啦, 因為多左一個bb, 就好多嘢要做, 好多嘢要商量, 好多嘢要決定, 而且因為大家有時思想唔同而多左磨擦, 更何況而家個女番埋嚟住, 兩個唔同生活環境下嘅人一斉生活, 一定再多磨擦啦!

 

馮小姐好口嚮咁話, 佢生左, 都冇諗住要佢老公理, 因為都預左佢老公唔會理喎, 佢話佢自己攪掂喎~! 

 

可悲!

今晚同老公一班好耐冇見嘅豬朋狗友食飯, 呢個吹水飯局係一個我都好憎佢嘅人攪出嚟, 因為佢就我老公, 佢話唔會搵我老公唔鐘意嗰D人嚟, 所以佢就到咁, 我地就出嚟喇!

 

呢條友點解我唔鐘意佢, 原因係因為我地結婚嗰時, 佢係攪屎棍之一, 我唔鐘意佢, 我老公都唔鐘意! 但係呢條友夠死狗, 係咁同我老公講對唔住, 叫佢唔好嬲佢, 佢認係衰仔, 所以我老公就算數!

 

第二樣我唔鐘意佢, 係因為佢生左個仔出嚟年幾兩年之後, 就一走了之, 而家佢個仔8/9歲都冇番過去睇個仔, 所以我鄙視佢!

 

今晚一路食飯, 佢就係到同我講仔經! 同我講仔經? 仲好有經驗咁話要點點點, 又唔好點點點,  所以我就問佢今次(係關島)番嚟: "你有冇見過個仔呀?"  呀生, 你明唔明我係到串緊你架? 你自己對個家庭一D責任都冇, 嗰時仲要唱你老婆什麼什麼不是! 又話自己有幾錫個仔, 又話點對佢好! 算把啦你!!!

 

我都唔明, 生左個仔出嚟, 點解可以唔使理, 仲要同人講佢張個仔個名紋左係個背脊到, 好巴閉咩? 定係個意思係冇眼睇定係唔想睇呀?!  就算同個老婆有咩意見不合, 都冇藉口可以唔理個仔啦, 呢D人跟本就係不負責任! 我係個小朋友, 我大個真係唔想認佢做老豆!!!

無可擋的豬腳~

真係唔知幾時先可以一樣一樣咁整完!

滕滕出世係醫院影嘅相, 而家先攞出去過膠! 成年幾, 終於都過左喇!

醫院比左本書仔, 其中有一頁係印左滕滕出世對腳架!

而家一對起, 嘩~ 幾豬呀! 個身又唔係好肥, 手肶又唔係好肥, 唯獨係雙腳肥到呢~

而家叫佢聞下雙隻腳嗅唔嗅, 佢就走去嗅下, 有時自己聞完仲比我地聞下~ 哎! 真係冇之前細個咁嗅呀!!!

上個星期, 我已經發現左! 原來滕滕套睡衣好好索架!!! 尋晚臨瞓前, 老公見我聞完滕滕d衫就問我咩味, 跟住就佢又走去聞!  仲有之前, 叫滕滕執好d玩具先好瞓, 佢就續個公仔又走去聞幾下先放番佢落柜  !

原來成家人都傻架!!!

嗱~ 唔係我教, 唔好賴我呀~

呢條滕滕, 而家一跌襯、撞襯、整襯, 就第一時間咋嬌喊住嚟話比你知佢邊到痛痛!

好啦, 痛咪痛囉, 最多都係同你呵番啫~ 但係當你同話同佢呵番嗰時, 條友仔就順便話埋比你知, 邊到整到佢, 仲行埋去打嗰個位喎~

喂~ 你自己唔小心整到啫, 關嗰到咩事先? 我都冇教過你去打打整襯你嗰到, 邊個教你要打打佢架???

 

下次唔好再攪我喇!!!!!!!!!!!!!!!!!!!!!!!!!

表叔已經問左我幾次, 幾時出嚟食下飯, 佢話好耐冇見過我老豆! 你好耐冇見我老豆啫, 咁你咪搵佢囉, 仲咩要扯埋我落水啫~

 

表叔, 唯一我係肯同佢fd, 所以佢咁講, 我唔會串佢, 因為我尊重佢, 所以今個八月十五, 我就話不如一斉做節喇! 之前已經比亞媽"鵝"我, 原因係因為大鵬人都話今個星期六ok, 但係今個星期六係亞媽舊曆生日, 所以我第一時間就諗住順理成章就同亞媽慶埋! 不過, 就係咁樣先麻Q煩!!! 因為 1.亞媽食齋, 2. 亞媽只係想我地一家人食飯, 因為唔想搵埋其他人要人地破費! 而且, 我同表叔講過下(亞媽生日), 但係表叔就話, 冇奶油做節去食齋! 所以, 明啦! 明晒喇! 你話係唔係自己law lai chin 吖~!!!

 

原本一心諗一次過, 因為我唔想分九十幾次出去食飯, 但係而家唔得都要得, 唔通唔同亞媽慶咩, 雖然佢把口話唔使...........

 

煩完第一樣, 攪掂好喇, 就第二樣, 就係搵地方食飯!!! 首先, 係要方便舅婆, 佢係南昌村住, 要搵d地方係可以方便的士上落車, 就算落左車, 都唔好行得太遠, 雖然係打的去, 但係又要唔好咁貴的士錢, 要同表叔慳住個荷包! 跟住就要就到係方便泊車, 咁就更係最好有得"給"飛啦! 而最重要就係食飯唔好去d貴地方食, 如果唔係, 比d表姐表妹小到我暈都有知!!!

 

搵、搵、搵, 基本上我心目中嘅稻香, 都已經full 晒, d九唔搭八唔識嘅, 我又唔想, 因為怕太難食, 好啦, 再搵下明星、迎喜啦, 方便我地嘅, 都又係已經full晒, 連d 咩富臨都搵埋, 有位嘅就要上一層, 不過冇lift到, 去到油麻地、佐敦嗰邊d酒樓, 表叔又好似覺得遠!

 

天啊! 你可唔可以幫下我呀! 我已經知道自己lai左嘢喇!!!

完全迷上了~

雖然尋日開始有小小感冒~

雖然尋日食左藥好眼瞓~

雖然今日已經晏左起身番工~

雖然而家好眼瞓~

但係由上個星期開始, 我已經迷上左"陳莉敏 QUEENIE"~ 

煩到嘔~

個電話已經唔識嚮左成兩個星期, 有冇跌過, 都唔知想點, 只係識震, 唔知係唔係佢知道我成日較左震機, 唔想嘈醒滕滕呢, 不過星期六, 我終於打左電話去HTC問, 佢話可能係個software撞左, 並唔係d hardware有事, 叫我 back up左d嘢, 重新 reset 過部機, 咁個嚮聲就可能會冇事喎!

 

唉~ 都要攪架啦, 唔通下下真係震咩! 咁咪要佢比d軟件我  back up d data囉! 但係, 淨下叫佢比d 軟件我, 都整左成兩個鐘!  第一次比d軟件我, 唔知點解拉整都拉唔到去張 SD card 到, 比第二個軟件我, 去到最尾 load load下就停左係到, 試過幾次都係咁, 咁所以再比第3個軟件我, 不過呢個軟件係要有hotmail a/c先可以做到!

 

CS嗰個男仔講嘢就講到一舊舊, 講D就唔講D, 又唔係 pro, 叫佢搵個 pro d 嘢人嚟同我講, 佢又唔肯, 前言就不對後語, 就好似佢比我第3個 back up方案嗰時, 入左條 link到之後, 又無啦啦叫我入去 hotmail個a/c到, 咁入完去佢話嗰條 link到, 又無啦啦叫我入 hotmail到仲乜啫, 真係火到嚟!

 

淨係攪 back up都攪左兩個鐘 @_@ !!! 滕滕又係到攪攪震喎, 唔攪就係到嘈! 天啊~ HTC可唔可以請d咁嘅人好唔好呀! 醒小小, 話頭醒尾啦!!!

 

經過一輪抗戰, 好彩個手機而家嚮番喇!!!

有骨氣!!!

滕滕, 我陀住你嗰時我都冇去過"有骨氣"打邊爐, 仲咩你會識呢幾個字嘅???

 

話說我攞左盒冰皮番屋企, 食第一個, 滕滕都已經知道係好嘢, 叫佢sit down 就已經好乖咁坐左係到, 所以第二次一攞出嚟, 佢D "her her her" 嘅聲音都已經等緊!

 

好~ 第一/二啖我就比佢食, 不過到左第三啖, 我就有要求, 就係要佢叫我"媽"先! 都係一樣啦, 佢一聽到我有咁嘅要求, 就即刻已經"奏"眉頭喇, 跟住我又再同佢講多一次, 佢就已經開始唔 like, 我再講第三次, 呢條友仔, 居然啤住我, 跟住行左去喎!!! 行左去之後, 我又再大聲同佢講多一次叫我"媽"先我就比佢食喇, 但係佢仍然都係老遠咁又啤多我一次, 都係唔肯叫, 因為佢寧願唔食!

 

好! 我鐘意你受到威脅都唔肯就範, 因為你有骨氣, 似我!!! 

又要比個叻你喇~

我唔係只係成日鬧人咁惡嘅, 如果做啱左, 我都會比個good 你嘅!!!

今日滕滕值得一讚, 就係佢無啦啦自己行埋去個屎塔到, 攞起個蓋, 話比我知佢想VV!

如果, 以後你都係咁就真係very 乖乖喇~

 

原來只剩..........4..........

尋日攞滕滕本健康記錄簿出嚟, 睇番幾時要去健康院到做體格檢查, 睇睇下, 搵到一頁係寫左臼齒同恆齒係幾時幾時出, 原來滕滕已經係指定時間出晒佢要出嘅牙仔喇, 只係仲有4隻"第二臼齒"未出!

嘩~ 唔怪得呢個豬仔呢輪又不停咁咬張膠墊啦!

P.S. 我睇睇下, 點解呢頁最頂個heading 寫住: "男孩出牙記錄", 咁係唔係女仔唔同d架??? 

唔係親生就真係唔同d!

馮小姐"個女"已經係八月廿幾号搬番番去同佢地住, 經過呢兩個幾三個星期嘅相處, 我都冇聽過佢地暫時有d咩大問題!

 

佢個女今年啱啱千中一, 所以我問馮小姐佢個女有冇唔肯比d工課佢檢查/睇! 馮小姐聽到我咁講就有小小愕然, 佢答我佢冇喎, 而且都冇諗過!

 

我當時第一時間嘅感覺就係: 唔係親生, 就真係唔同d! 冇媽媽嘅小朋友真係賤d!

 

我同馮小姐講, 佢地今年升中一, 應該多d關心佢地, 因為咁大嘅轉變, 唔知佢地識唔識去handle, 無論心靈上同功課上, 我地做大人都應該要去了解同關心...........

 

不過, 馮小姐好似冇乜反應, 只係話佢都唔識, 教唔到d咩, 可能都會比佢去補習喎!

 

去到呢一刻, 我諗起梓祐, 因為佢都係一樣啦, 同樣兩個老豆以為呢個女人好錫自己個仔/女, 但係佢地跟本都唔知呢d女人, 只係做緊一d好表面、好皮毛嘅嘢, 如果真係真心對個小朋友好, 跟本就唔會咁..........

我唔會放過你架~ Start to train!

8月尾, 我同個工人講比兩個月時間佢同滕滕介片, 其實之前已經耐唔耐比佢坐個屎塔架喇, 但係都好似冇咩進展, 但係比左個時間限期個工人之後, 呢兩個星期滕滕就已經有進步喇~

 

係呢兩個星期裏面, 滕滕第一次肯係個屎塔到VV, 我同老公&個工人, 都第一時間拍晒手, 仲要拍到"o拍o拍聲", 滕滕見到就當然唔執輸, 佢又拍埋一份! 跟住呢個星期, 滕滕已經接受左係個屎塔到VV喇, 一想痾屎, 佢就即係捉住個姑, 跟住我地就第一時間同佢除褲喇! 到左今日, 個工人話佢而家識自己除褲, 咁唔知幾時佢識自己除褲, 自動行埋去VV呢?! 好期待~

 

但係痾C, 佢都仲未肯, 唔知幾時先至會第一次呢~?!

 

至於食飯, 早嗰一個月, 我都已經揸住佢隻豬手, 等佢學下自己"北"飯! 起初一兩羹都肯, 但係跟住之後佢就開始縮手, 要佢去揸住, 仲要痴左線咁係到喊, 好似好慘咁! 以我咁專橫嘅性格, 我就更係唔會放過佢啦, 所以陸陸續續, 佢都開始自己"北"多左幾下, 但係之後都係唔係好想自己揸!

 

不過, 上個星期滕滕又進步左D喇, 因為熙媽post 左熙熙自己"北"飯上FB, 我比滕滕睇完之後, 滕滕又叻左, 好似知道佢應該自己去做, 跟住又有進步喇!

 

今晚, 係我第一晚開始, 要滕滕臨瞓之前執晒D玩具先好去飲奶! 最初, 佢都係唔係好願意咁啦, 不過佢都有聽我講執左小小! 所以好啦, 執左小小都算叻叻架喇, 一路一路慢慢嚟啦!

 

 

親子~

尋晚唔知係唔係滕滕玩得crazy過頭, 佢居然係兩點幾同四點幾都醒左, 仲要一見到我起身就要抱!

 

佢第一次醒, 我一抱佢上手, 其實佢都即刻合埋眼想去瞓番, 而第二次都係咁, 不過我尋晚實在太眼瞓, 而且仲想去廁所, 所以佢未瞓著我就已經放抵佢! 不過, 今次唔知仲咩事, 滕滕唔肯比我走, 所以我唯有抱住佢去廁所!

 

番到房, 唔知點解我真係好唔想抱住滕滕, 因為我真係好眼瞓又好攰, 所以我將佢放左係我隔離!

 

呢個曵豬, 就算佢幾曵扭唔肯瞓, 但係一放係我床, 佢就會即刻收聲, 而且仲會自己瞓, 所以就比佢一次咁多啦~

 

今日同朋友講起尋晚嘅情況, 佢話其實如果我老公番通宵, 比個囝同我瞓都冇咩問題, 因為可以親子!  如果唔係, 點解佢地嗰代對亞媽咁好, 反而而家d什麼80/90後大部份都唔識唔知道咩係孝順喎!

 

我諗下諗下, 好似老公咁, 佢都好錫佢亞媽, 而且佢有時都仲同我講以前同亞媽瞓, 一路瞓佢亞媽就一路同佢抓背脊! 就係呢d回憶, 直到今時今日老公都仲有記憶!

 

所以我諗諗下, 係唔係可以有時比滕滕同我一斉瞓呢?! 因為我都好想佢有呢d咁嘅回憶!

叻仔! 終於都識玩!

終於都識點樣玩喇~

---

唔讚都唔得  

應該係我講多謝先啱~

而家打blog好似打到上左引咁, 真係九唔搭八都想記抵佢, 可能真係怕自己年紀大d就唔記得晒d小事喇!

 

因為上次個同學係加拿大番嚟, 講開佢再對上嗰次番嚟做過d咩, 同我地去過邊到, 我都真係好似冇晒記憶咁, 所以死啦, 個腦d ram 越嚟越少喇~

 

前日個同學msn我, 同我講佢呢排燥底, 唔知仲咩事成日都handle唔到自己d情緒, 見到個女曵就好興, 咁做朋友就更係當然開解下佢啦, 更何況我地唔係朋友咁簡單!

 

開解左佢, 佢話呢兩日都ok, d EQ好左, 冇再好似之前咁成日都火嚟, 同埋佢話佢有反覆咁睇番我比佢嘅意見去思考, 所以佢今日又MSN我, 同我講多謝!

 

回想起以前讀書嗰時, 我成日發佢皮4, 佢唔知咩事都可以走嚟氹我, 又接受我無緣無固嘅不瞅不睬, 幾頂唔順都照頂我! 你估我唔知自己唔啱咩, 不過我嗰時都好似佢而家咁, EQ低囉!

 

其實真係唔使多謝架, 因為你當我係朋友先搵我同我傾, 而且仲好接受我嘅意見, 講真其實應該係我多謝你先啱, 因為我嘅意見得到認同, 同埋可以幫到你! 所以應該係我開心先啱~

嫲嫲錫晒你~

我而家好少去梓祐到喇, 因為唔想見到d 乞E! 最多有時約下佢地出嚟見面!

 

不過嫲嫲真係好錫我同滕滕, 耐唔耐就過嚟睇滕滕, 好似就嚟中秋咁, 嫲嫲就過嚟比利是滕滕買燈籠! 其實我都話唔使喇, 不過嫲嫲話佢年年都有比利是佢地(佢D孫)買燈籠, 所以冇奶油滕滕冇喎! 嘩~ 聽到幾warm呀, 因為嫲嫲都當滕滕係佢個孫咁呀!

 

 

 

其實嫲嫲咁好, 我都唔明點解個乞E成日都頂喉頂肺頂住嫲嫲! 佢係唔係唔會老架, 定係佢唔介意佢第日老左冇人理佢呀!

 

嫲嫲要求都唔係好過份啫, 佢唔介意個乞E點對佢, 只係想佢對梓祐唔好咁衰啫~ 梓祐以前細個, 當然唔知亦都唔覺得個乞E有咩問題啦, 但係早嗰兩三年, 梓祐都已經有佢自己思想, 知道發生咩事, 都明白唔係嫲嫲過份偏激喇! 不過算啦, 只要梓祐而家讀好D書, 第日大個, 就可以有佢自己嘅自由喇! 因為佢都易明白&知道係要接受現實係一個咁嘅家庭裏面長大, 而家唔到佢撰!

 

嫲嫲! 你記得活得要健健康康, 我仲有排搵你去飲茶架!!!

咩事呀??????!!!!!!!!!!

仲咩事呢排咁多垃圾人send d 垃圾嘢去個blog到呀!!!!!!!

多謝張雪球!!!

以前覺得上網識朋友好危險, 原來其實都唔係, 因為起碼我都識到d好嘅朋友!

 

朋友唔使成日搵, 最緊要都係有心!

 

幫張雪球買左D甲油, 佢就又送左3盒 Trim-EC比我! 佢真係有心!!!

 

 

比起識左十幾年嘅人都不如! 因為識左十幾年都唔代表有心! 甚至乎係唔係朋友嘅關係都未可以肯定到.............

NO.7, 非你莫屬!!!

我都唔明, 人蠢冇藥醫就更架啦, 但係叫你去問都唔醒目, 我唔想話你唔係7-11個老闆都唔得!

 

因為星期一交左份單去集友, 所以集友尋日就回覆個AWB NO.! 因為要通知個客, 所以馮小姐就通知我個NO.係: AWB12345678!

 

因為我地公司通常用UPS, 唔係用開DHL, 所以我要馮小姐 check 下 DHL, 個no. 前面"AWB"係個 awb no. 都包埋, 定係係stand for "air way bill"! 馮小姐check都冇check就答我, 個no. 係集友嗰條友比佢架喎, 佢抄晒! 同一時間, 我上網都已經check到"AWB"呢個字個no. 係唔包, 真係stand for "air way bill"咁解, 不過我冇出聲, 因為我要馮小姐去check!

 

佢check 完就答我, 如果上網check, 就唔使入"AWB", 但係打電話去check, 就可以講埋! 白痴!!! 更係可以拉, 人地更係知道"AWB"係stand for 乜啦!!!

 

跟住我就再講, 咁如果個客上網check, 人地唔知頭唔知路入埋"AWB", 咁check唔到, 係唔係叫個客直接搵集友嗰條友呀(其實我係想講, 係唔係叫個客直接搵你!)! 跟住馮小姐就再話, 如果上網, 係唔使入"AWB"呢三個字!  之後, 我又再講, 咁即係唔包啦!

 

馮小姐答我"係"之後, 我又再忍唔住再講"所以咪叫你問清楚囉"!

 

馮小姐問都未問就答我, 佢跟足佢嚟抄! 跟本問都唔想問!

小姐! 唔係你想唔想, 係你一定要! 你咁7所以先叫你問清楚!

 

其實我應該唔好叫佢問清楚, 等佢呢一世都 7 下 7 下! 

我的震撼力~

尋日放工番到屋企, 見到滕滕眼濕濕, 應該係喊完咁嘅款, 所以我就問老公咩事!

 

原來呢個滕滕又咬張膠墊呀! 老公話, 罰佢企佢都冇嘢架, 跟住就鬧佢, 話再曵就打打, 跟住滕滕都仲係冇乜嘢咁! 不過跟住老公又再講, 如果媽me一陣番嚟我話比佢知, 等佢打打你!  一講完, 佢就放聲大喊喇!

 

嘩~ 乜原來我咁有威嚇力架?! 唔怪得我番到去見到滕滕成個樣好似死晒狗咁啦!

 

都唔知咩設計嚟!

買左4号學習杯個蓋換比滕滕用~

都唔知咩人諗出嚟, 兩個洞位冇嘢"給"住!

就算"給"埋左個杯蓋, 都漏水出嚟, 攪到滕滕成日fing 隻杯, 好似不知幾好玩咁!

都未見過有人7得咁交關~

上個星期五, 份單已經交左去集友押匯部到交, 不過, 今朝一早收到集友個電話, 話我地填嗰份collection form係舊format, 唔接受喎, 而且銀行話由7月開始打電話比老闆娘, 通知佢如果係分行嘅話, 可以帶d form 番嚟公司喎, 不過打到今時今日都打唔到!

 

真攪笑 1 : 有乜奶油, 7月打電話打到而家, 都唔check下電腦個record, 睇下個no.有冇錯, 冇可能打兩個月到搵唔到佢啦, 生意人喎, 有咩生意人係會唔聽電話架?????

 

真攪笑 2 : 有冇一間銀行, 明知個客係老闆嚟, 都叫佢帶d form 番公司呀??????

 

真攪笑 3 : 上次已經打去嘈過話有L/C到, 就直接通知L/C裏面嗰個電話, 而且又再同佢講多一次, 嗰個電話係直接搵到我, 咁又有乜奶油, 打老闆娘個電話打唔到, 就唔打比我呀!

 

真攪笑 4 : 老闆娘一個星期到去分行兩三日, 又有乜奶油, 押匯部叫分行通知老闆娘又會通知唔到? 即係自己分行有事, 就可以搵到? 另外部門叫幫幫手, 就打錯電話呀???????

 

所以今朝馮小姐一早接左個電話, 話要我地download張新form出嚟, 填過再submit比佢地, 等老闆番嚟簽左名, 食完飯, 就出去直接上集友押匯部交單喇!

 

不過, 3點鐘左右, 馮小姐打比我, 講左一個仲好笑嘅笑話比我知! 就係..........佢download左份form, 係BOC, 唔係集友!!! 一聽到, 我就已經抓頭, 仲咩去集友交單, 同我講左BOC d嘢! 原來今朝集友條友打嚟同佢講, 話叫佢自己上網download 份新form 嗰時, 唔知仲咩條友叫佢入BOC到download, 所以佢就聽人講, download左 BOC份form喇!

 

我一聽到馮小姐咁講, 我就已經問佢, 仲咩佢唔問集友嗰條友, BOC同集友d form 係唔係共用架, 雖然都係中支集團, 乜form 都可以咩?! 跟住馮小姐答我, 佢唔知喎, 條友叫佢download 咁佢咪download囉, 佢冇諗起喎!..............哦! 我明喇, 原來係一個"7"字!!!

 

有乜理由唔問清楚架, 明明交單去集友, 仲乜叉叉又關BOC事呀, 條友咁講, 你都問下吖! 個腦都唔知生係邊到架!!!

 

結果, 要我填過張form, 即刻出去奧海城交!!! 頂佢個肺吖!!!

唔好學我地喎, o靚仔!

呢個滕滕豬而家就成日學我地, 學我地咳, 學我地打乞痴, 同埋學我地打喊露!

打乞痴仲要好似我地咁彎起條腰同手遮住個口先打喎, 真係頂佢唔順~

咁都比你發現到?!

已經兩個星期冇開過喇, 所以今日又開左水池比滕滕玩!

朝早10點半就已經開始動工, 因為滕滕8點半已經醒左喇, 咁所以唯有早玩早收啦!

一如以往, 我一路bom, 滕滕就要行嚟幫手, 加緊水嗰時, 佢就係咁her住要快d, 等一陣啦, 得我一個做, 就更係咁架喇!

玩左半個鐘到, d 水都開始凍, 咁我就靜靜雞一個一個玩具咁攞上嚟, 然後抺乾放左係枱面! 不過抺到第二個, 就已經比滕滕發現左喇, 仲her住咁要攞番, 掉番落水到呀!

次次都係啦, 到時到候話要上水喇, 都扭下扭下個pat pat 話唔好!

唔好唔上啦~ d 水凍喇, 豬仔!

一次過喇~

今日亞妹入嚟探我地, 可能成個幾月冇見, 滕滕初初都有小小驚驚地~ 不過, 玩左一陣就更係冇嘢, 而且癲左啦!

夜晚我地去左元朗有個舊同事開嘅日本餐廳食飯!

因為順便一次過慶祝生日呀! 老公就8月生日, 亞妹就9月, 搵個中間位慶一慶佢, 唔使又再要搵時間再食多次, 因為而家有左滕滕, 就係唔係成日有時間出嚟!

以前滕滕唔係太重, 我都會單拖帶埋滕滕去街, 但係而家就真係油麻地喇, 因為滕滕真係太重喇! 唔攞車仔跟本就唔知點出, 因為只係滕滕D"架餐"就已經十斤八斤重, 再灰加埋滕滕就一定"NIC"死我! 但係帶埋車仔就上唔到巴士, 咁你話教我點吖!

再等~

自從人質事件之後, 我領悟同明白到, 點解有d亞媽寧願欖住d仔女一斉死, 都唔想自己死左留番d仔女係人世!

 

d亞媽自殺, 我諗真係唔係去到最後一刻, 佢地都唔會有咁樣嘅決定, 因為自殺係雖要好大勇氣, 何況要殺埋自己d仔女!

 

一方面我唔係好讚成, 因為仔女都有佢生存嘅權利, 但係另一方面諗, 如果冇左亞媽嘅照顧, d仔女有可能變左做地底泥!

 

所以去泰國, 我諗我地唔會去住, 等嗰邊政局穩定d先, 因為我真係唔想我有d咩三長兩短, 咁滕滕就唔知點算! 

我怕你嘔呀~

呢個滕滕, 我都唔知佢仲咩為食成咁樣!

你係我個肚到, 我已經都唔係就住食嘢架啦, 又冇不停咁食, 只不過係比平時份量多小小, 食多一兩餐小食啫~

我都唔明, 仲咩你一見到我地食嘢, 就即刻要食埋一份呀?! 就算啱啱食完飯冇幾耐, 你都可以照食可也, 成個叉燒包食晒, 仲要食埋腸粉! 你真係冇咩係唔啱食囉!

你食完晚番, 到我放工番嚟食飯, 你又要行埋嚟! 我放工買包包, 買蛋糕番嚟比你第日下午食, 你一見到就又要食!

你把口已經冇停過架啦, 下午已經有tea time食粉粉, 跟住就又有水果, 都冇停過, 夜晚又要食埋我地食嗰d餸, 跟住比你見到包/蛋糕又要食埋, 仲要下下"her"住要食, 好似好餓咁!

究竟你係為食定係唔知飽呀??? 冇奶油你唔知飽囉, 因為食飯你都係食晒一碗之後你就洒手寧頭,  咁即係飽啦, 但係食完飯你又可以食其他嘢喎~?!

嘩~ 你食咁多, 我真係怕你飽到嘔呀~!!!