今日馮小姐同我講, 尋日個女同佢講, 因為比老師點名叫左去嗰d咩運動比賽, 攪到成6點幾7點先番屋企, 好鬼攰, 所以個女想叫daddy 今朝車佢番學!
不過馮小姐就同個女講, 佢好攰, daddy 都好攰, 唔好咁自私因為自己攰就要daddy一早起身車佢番學! 如果佢要叫daddy車, 咁佢就自己問! 唔使講我都估到, 個女一問daddy, 佢daddy 就答應左, 因為馮小姐個老公某程度上係好縱佢個女! 馮小姐見個老公一口答應個女, 咁佢就順理成章咁話不如車埋佢, 因為個女係黃大仙, 咁就可以跟住去油塘! 不過馮小姐個老公一聽到, 就唔係好想, 因為男人個解釋係車完個女, 就即刻買埋餸番屋企, 跟住可以再瞓多一陣先番工!
所以馮小姐同我講佢好嬲!
其實當我聽到馮小姐叫個女"唔好咁自私, 你攰daddy都攰", 講完呢句之後, 我就即係都係諗: 唔係親生, 就真係唔同d! 而今次, 我就好直接咁講, 我今次唔buy你, 因為幾攰嘅父母, 都會錫自己個仔女, 就算自己有幾攰, 仔女叫到都會去做, 所以我跟住就同佢講, 因為個女唔係你生, 所以你唔明白你老公點解咁攰都答應車佢番學!
今次對答, 我好強硬咁話我唔認同佢, 而且仲同佢講番佢上一次答我, 佢冇諗過去睇個女d功課, 所以我同馮小姐再一次強調, 因為你真係唔係佢親生亞媽, 所以真係有分別!
馮小姐好堅持佢自己做事好公平, 而且佢第日嗰個都會係咁, 仲講講下係到喊, 佢話佢而家好辛苦, 自從個女番左去住之後, 由放工番到屋企一路做, 做到成12點先有得瞓, 未停過(我個心諗, 個個家庭都係咁架啦! 只不過係因為你而家大住個肚先覺得特別辛苦啫, 你以前咪都係自己一個做!)! 我都唔係冇同佢講過啦, 一生左, 仲多交嘈啦, 因為多左一個bb, 就好多嘢要做, 好多嘢要商量, 好多嘢要決定, 而且因為大家有時思想唔同而多左磨擦, 更何況而家個女番埋嚟住, 兩個唔同生活環境下嘅人一斉生活, 一定再多磨擦啦!
馮小姐好口嚮咁話, 佢生左, 都冇諗住要佢老公理, 因為都預左佢老公唔會理喎, 佢話佢自己攪掂喎~!
叫佢收皮啦，咁口響，而家走囉，洗咩係到委屈自己啫，呢啲人正一死雞撐飯蓋
回覆刪除[版主回覆09/17/2010 14:05:00]而家更局啦, 佢可以走去邊吖!
不過佢仲死口唔認, 仲話自己對個女好好囉~ 如果真係當係自己女, 咁點會有得撰"想佢言行性格好", 而冇諗過都想佢讀書好吖! 個個父母, 都想自己仔女想想嘢都好, 唔會只係選擇佢其中一樣嘢好囉!
含X啦，睇佢第時會唔會咁對自己嗰個，我真係"鄧"呢個女慘
回覆刪除[版主回覆09/17/2010 22:14:00]所以真係架, 冇亞媽D小朋友真係賤D..........
點解要接佢返嚟又要咁對佢呀, 第時佢個B出世, 呢個女嘅生活仲難過呀~
回覆刪除[版主回覆09/20/2010 21:53:00]因為佢地結左婚之後, 個女個姨媽成日都話唔得閑睇, 呢到又要佢地自己去接, 嗰到又叫佢地自己去接, 咁佢地比左生活費姨媽, 就等同白比囉! 姨媽跟本就唔同佢地照顧, 可能因為覺得佢地已經有家庭, 有咩就唔好叫佢幫手!
所以佢地個心諗, 比左錢又唔同佢照顧, 咁不如唔好比自己睇番冇咁嬲囉!
呢個女仔第時條路會好難行...係d咁嘅家庭成長~
回覆刪除[版主回覆09/21/2010 12:56:00]應該都唔會好難行, 因為佢都唔係好理馮小姐 !
冇咗阿媽照顧已經夠慘, 仲有個咁嘅後母...條路又點會唔難行呀, 唔係下下都可以問老豆架嗎!!
回覆刪除[版主回覆09/21/2010 15:28:00]如果個後母衰, 比我都唔會問嗰個女人!