我唔會放過你架~ Start to train!

8月尾, 我同個工人講比兩個月時間佢同滕滕介片, 其實之前已經耐唔耐比佢坐個屎塔架喇, 但係都好似冇咩進展, 但係比左個時間限期個工人之後, 呢兩個星期滕滕就已經有進步喇~

 

係呢兩個星期裏面, 滕滕第一次肯係個屎塔到VV, 我同老公&個工人, 都第一時間拍晒手, 仲要拍到"o拍o拍聲", 滕滕見到就當然唔執輸, 佢又拍埋一份! 跟住呢個星期, 滕滕已經接受左係個屎塔到VV喇, 一想痾屎, 佢就即係捉住個姑, 跟住我地就第一時間同佢除褲喇! 到左今日, 個工人話佢而家識自己除褲, 咁唔知幾時佢識自己除褲, 自動行埋去VV呢?! 好期待~

 

但係痾C, 佢都仲未肯, 唔知幾時先至會第一次呢~?!

 

至於食飯, 早嗰一個月, 我都已經揸住佢隻豬手, 等佢學下自己"北"飯! 起初一兩羹都肯, 但係跟住之後佢就開始縮手, 要佢去揸住, 仲要痴左線咁係到喊, 好似好慘咁! 以我咁專橫嘅性格, 我就更係唔會放過佢啦, 所以陸陸續續, 佢都開始自己"北"多左幾下, 但係之後都係唔係好想自己揸!

 

不過, 上個星期滕滕又進步左D喇, 因為熙媽post 左熙熙自己"北"飯上FB, 我比滕滕睇完之後, 滕滕又叻左, 好似知道佢應該自己去做, 跟住又有進步喇!

 

今晚, 係我第一晚開始, 要滕滕臨瞓之前執晒D玩具先好去飲奶! 最初, 佢都係唔係好願意咁啦, 不過佢都有聽我講執左小小! 所以好啦, 執左小小都算叻叻架喇, 一路一路慢慢嚟啦!