星期六突然醒起, 原來已經9月尾, 係時候幫屋企兩老去睇旅行團喇!
亞媽幾勁, 一聽到我話同佢去睇旅行團, 就話嗰晚可以唔去佛堂都得喎!
上次同佢地去完泰國番嚟都未夠一個星期, 我老豆就已經plan 定下次去台灣喎! 見老豆咁串, 話下次去旅行去台灣, 咁我當然唔輸蝕問佢: 一定請你架?! 老馮請你架?!
把口雖然係咁講, 但係我都會請佢地嘅, 因為老左嘅退休生活都係咁上下啦, 舒舒服服, 鐘意去下呢到, 鐘意去下嗰到, 如果仔女有能力可能請佢地去, 咪盡下力囉, 雖然老豆後生時有幾衰都好!
老豆好快就決定左選咩團喇, 仲即刻confirm ! 當老豆簽文件時, 我發現老豆簽個名, 完全唔同晒, 成個名冇晒力水, 一d勁都冇! 睇到老豆個名簽到咁, 個心就即刻沈一沈, 跟住就問佢: 嘩~ 你個名, 點解簽到咁嘅樣? 完全唔同晒嘅?!
個心有d酸, 因為發現老豆原來已經好老..............
對於呢 d 位, 我都好難受, 成日都覺得對兩老唔夠好。
回覆刪除[版主回覆09/28/2011 11:05:00]我都有咁諗, 不過我亞媽煩到呢, 你唔出聲佢就唔收口, 成日攪埋我身邊d人, 有時真係唔想話佢都唔得! 但係好無奈又時又見到佢真係老左好多!
唉~ 好矛盾! 如果佢地可以乖d就仲好啦!
唉! 乜得你咁touching呀? 攪到人家呢..... 唔經唔覺自己都過3張. 珍惜眼前人啦! 雖然D亞媽勁"文塞" 又煩, 但對得幾耐吖?! 見佢地可能仲少時間過見客啦, 就下佢地, 忍一忍你的皮氣 o(∩_∩)o 不過我都未做到, 唉 ~
回覆刪除[版主回覆10/06/2011 10:40:00]我不嬲個人都係咁感性架啦, 你第一日識我咩!
忍.......我都已經盡力去忍下, 不過佢地有時唔鬧唔收聲嗰下先死吖嘛, 所以我都唔想架!!!
其實, 我都係咁! 呢D咪有口話人, 冇口話自己囉 ! 唉~我同你直頭係天生一對, 一擔擔
回覆刪除[版主回覆10/09/2011 23:48:40]我地都係差5多咁衰先同聲同氣嘛!
你真係好孝順呀,你年年都請父母去旅行,做你嘅父母都真係好呀!講到旅行,前幾日打電話比我父母話請佢哋去旅行,但係我媽咪唔坐得飛機同車,次次話請佢哋都唔去,你父母有心有力都真係好事呀!我父母直情係未去過遠路呀!
回覆刪除[版主回覆10/11/2011 12:36:35]我記得, 係我十幾歲嗰時, 亞婆都仲未過身, 亞媽講: 佢好想坐飛機, 咁大個女都未坐過飛機, 都未去過旅行!
佢呢句說話, 我今時今日都仲記得!