今日同個同學講湊b經, 講開夜晚瞓覺仲使唔使"曖", 究竟曖定唔曖~
過埋聽日, 滕滕已經17個月喇, d時間話咁快就過! 直到而家, 夜晚飲完夜奶, 我都仲有同佢掃風, 跟住就抱一陣等佢瞓左我先放佢落床, 原因係因為如果我曖佢, 佢就快d入睡! 想佢快d入睡, 等佢可以養成早睡早起習慣!
唔知係唔係男仔比較心野, 如果佢未瞓著, 而我就直接放佢落床, 佢就成日都坐番起身, 得閑就望下你, 又望下個冷氣機, 擔天望地! 其實佢咁樣我係可以唔使理佢, 因為佢又冇嘈, 遲早都會瞓著, 不過, 就唔知要等到幾時! 最重要就係我要扮瞓嘛, 又唔可以比佢知道我冇瞓, 又唔出得房!
同同學傾開, 佢話佢兩個囡都冇咁, 尤得佢自己瞓, 因為佢睇過一篇research話, 如果長時間"曖"瞓, 到左佢大個, 入睡時間係會比冇"曖"過嘅耐, 比較難入睡! 其實有冇research 都好, 我都覺得如果要"曖"先可以瞓就真係唔係咁好! 不過, 因為我覺得滕滕而家呢個時候識d唔識d, 知d唔知d, 要同佢講要佢自己一個瞓, 佢可能都唔知你地做乜, 又唔知點解! 所以係我心目中, 都係等佢兩歲左右先話比佢知要佢自己瞓, 可能會好d!
雖然, 話雖如此, 我今晚就真係直接放左滕滕落床想佢自己瞓, 不過佢又係如我所講, 得閑就坐係到, 得閑又望下你, 得閑又抓下張蓆! 我望住佢, 佢就用好cute 嘅眼神&笑容企左係到望住我! 去到呢一刻, 睇見自己個囝咁得意咁望住自己, 真係成個人、成個心都冧晒、暈晒啦~ 想唔抱佢錫佢一啖都唔得喇!
學熙媽話齋, 而家唔抱, 第日遲d大左, 佢唔需要我地嗰時, 就冇得番轉頭架喇! 更何況滕滕而家唔抗拒, 好enjoy吖, 咁我何嘗唔係喎! 有d老人家話, 唔縱得, 要等佢地自己瞓咁先叻, 咁先為之我地湊得好! 咁我就真係想問, 不如叫佢地由一出世開始就自己學攪掂自己啦, 使乜要亞爸亞媽啫! 父母少不免就更係有溺愛架啦!
做人父母就係好艱難, 咁又唔係, 咁又唔係, 又想自己個囝囡獨立, 但係又想佢地成日都係我地懷抱中! 我想問, 點解要咁矛盾呀???!!!
做呀媽真係一D都唔易,
回覆刪除你都好呀, 曖吓滕滕, 佢就肯瞓.
我就算不斷去曖ANSON, 佢唔瞓就唔瞓未仲慘.
我講我慘呀!
我都覺得可以令佢地早D瞓, 就算曖都冇錯呀!
佢地咁細, 邊識自己話定時定候瞓喎!
佢地要去到自己覺得倦先會瞓, 幾時先等得到佢自己倦喎!
我呀B時時都鬼打咁精神.
[版主回覆08/13/2010 23:21:00]我係一個好專橫嘅人(堂家姐係咁話我), 我排最大, 由細到大, 我好都獨立, 亞爸亞媽都比我話晒事, 攪到自己已經係咁嘅模式! 所以我而家一喝滕滕, 佢就知道我唔會有chance比佢! 不過, 暫時都可以震壓得佢住, 但係遲d就好難講喇!
同埋, 我成日都記住有個長輩嗰句說話: "如果佢係唔啱, 就唔可以縱!" 所以我對滕滕樣樣嘢都好堅持, 我話左咁, 佢就唔可以!
不過, 如果你想ANSON 攪番好D瞓覺時間, 你就要犧牲下喇! 因為就算我放假, 都要就佢早起身架!
你就好喇, 滕滕仲肯俾你曖, 我而家想抱住熙熙餵餐奶都唔得呀, 莫講話抱住佢瞓, 佢會推開我架
回覆刪除有好多書/報告都話, 每日要同你嘅小朋友擁抱3次, 對佢身心發展先好架, 就算熙熙點樣推開我, 我都堅持要攬到佢實架
[版主回覆08/14/2010 13:47:00]可能D仔都係咁, 要亞媽時就叫亞媽, 唔要嗰時就推開亞媽要老婆!