真係可以安心???

條友仔前日放左粒珠入鼻哥窿之後, 嗰晚臨瞓前同佢講左一大輪道理叫佢唔好再放, 因為會點點點危險! 尋晚臨瞓前, 我又再講一大輪!

點不知條友仔好認真咁同我講: "得架喇! 我真係知架喇! 我真係唔會再放入去個鼻鼻到架喇! 我真係知架喇! 你放心啦! 我以後真係唔會架!"

佢講緊時, 個老豆冇望佢, 只係聽, 就已經係到陰陰咀咁笑, 我估應該係笑佢講嘢可以老積成咁! 其實, 佢咁講, 我都有頂佢唔順, 點解講到成個大人咁嘅! 不過我忍住, 等佢講完, 就再補多句: 你真係要記住呀! 因為真係好危險架! 真係會瞓左覺永遠都唔起身架!

佢再答我: "我知喇!"

你真係知??? 如果真係知我就可以安落小小喇! 不過, 只係安落小小, 唔係安落多多囉~