呢個係充氣嘉年華, 所有都係充氣出嚟比小朋友去跳跳跳, 點不知玩第二個遊戲時, 滕滕就比個小朋友衝埋嚟撞甩左隻門牙! 當時我正係龍尾再排多次隊, 諗住比佢地可以玩完再玩, 但點不知堂家姐打電話比我, 叫我即刻去前面, 因為個仔撞到!
一見到滕滕, 佢當然係到大喊啦, 而且仲成口血! 當時D工作人員已經開始一個一個咁埋嚟, 救護員都行埋嚟同滕滕檢查, 睇完之後就問我需唔需要CALL 白車喎! 滕滕一聽到話call 白車入醫院, 佢就仲更大聲d喊話: 我唔入醫院呀~!!! 當時我第一時間安慰佢, "入醫院都係比醫生檢查下你d牙, 我而家打電話比牙醫叔叔, 如果牙醫叔叔有開門, 我地就即刻搭的士去比佢睇, 咁我地就唔洗入醫院架喇!" 好彩, 我個frd 今日有開門, 跟手我就叫嗰到d人即刻同我call 部的士番入屯門睇牙!
呢個遊戲, 家長係唔准入去, 而且亦都係封住左我地睇唔到, 所以當時一見到滕滕咁, 我就問嗰到d工作人員, 裏面嘅位置你地冇人睇住架咩??? 當時某位工作人員即時答我有, 而且仲有幾個係唔同嘅位置! 既然有幾個, 我好想知道你地d同事係唔係係到發緊夢, 點解冇一個睇到件事嘅發生, 亦都冇人睇到有小朋友係裏面衝埋去我個仔到??? 當然, 佢地答唔到我我問呢個問題!
上左的士之後, 滕滕都開始冷靜落嚟, 只係佢唔肯吞口水, 怕仲有血! 今次呢個的士司機, 真係我遇過最最最好人嘅一個, 佢聽到我係咁安慰滕滕, 佢就堅持去油站買左兩條雪條比我地, 但可惜滕滕一樣嘢都唔肯食! 滕滕冷靜左之後就開始攰瞓左, 我見到個仔咁, d眼淚不由自主咁流出嚟, 因為我真係好肉痛, 無啦啦比人撞到甩左牙隻, 另外一隻就鬆晒, 真係好赤呀我! 司機見到我係到喊, 佢都好好咁不停安慰我!
其實我唔太擔心撞甩牙會對d牙有咩問題, 因為我有隻門牙都係比細佬用麻雀掟甩, 我唔開心, 就真係只係肉赤, 而如我所料, 我frd 檢查完之後, 甩左嗰隻仲有牙碎係裏面, 撞刑鬆晒嗰隻就都段左所以都要剝埋! 而因為係比人撞甩, 咁有1/3機會長出嚟隻恆齒會歪!
自滕滕上左的士之後, 佢都冇再喊, 我覺得佢真係幾勇敢, 我諗比著有d小朋友, 應該都仲不段咁喊緊! 跟住比我frd 剝牙打針時, 佢都冇驚到喊, 因為我途中不斷咁同佢講嘢, 問佢一陣想買架咩類型嘅車! 所以睇完牙之後就去左買左兩架車, 買完仲去食嘢潻!
我個仔, 我真係覺得佢好勇敢!
真係肉痛爆!!! 上面張相仲見到NIGEL D 眼淚浪浪下~
回覆刪除我地無去玩, 因為上年我要求去玩時, 比我老公話好危險, D 小朋友係咁撞唔野小。所以我今年都費時出聲問去唔去。加上我嫌遠~
你都唔知我聽到個口不擇言嘅女人講(佢聽到滕滕咁樣就send whatsapp嚟問候), 佢話年中聽唔少小朋友玩到撞甩牙, 其實都唔洗太擔心啦!(跟手仲整個不太擔心嘅得戚公仔出嚟)
刪除講真我當時即時好撚嬲架! 佢自己都有個女, 換轉佢個女咁樣, 我唔相佢唔肉痛囉, 咩年中聽唔少有小朋友撞甩牙喎, 講到我好似大驚小怪咁樣!
依家好多人諗野都好古怪。一d同情心都無!!! 咁都好, 知道佢係d咁pk 既人。見到面都行遠d!
回覆刪除我而家直頭唔想同佢講嘢呀，成個人都冇腦！
刪除