真多餘?

話說早輪撞到滕滕同學&媽咪, 傾左兩句, 就發現時下D家長唔多鼓勵自己個小朋友去克服困難, 見辛苦小小就尤得佢地唔好做, 攪到我好似一個唔多正常嘅媽咪咁, 下下都要滕滕做左佢應該要做嘅嘢我先肯放過佢!

今朝番工搭車, 我又遇到兩母子, 又再一次令到我深深感受到"怪獸家長"!

呢對母子係藍田上車, 而家應該已經唔洗番學, 所以應該係去上堂, 言語間個媽媽不斷咁"鵝"個小朋友叫極都唔早D起身, 而家已經有小小遲到, 雖然媽媽係"鵝"緊, 但仍然都仲問緊佢個仔想食面包定食餅(比佢選擇), 而小朋友呢就係兩樣都唔想, 仍然係未瞓醒發緊"猛爭"嘅階段!

見到呢一幕, 我就諗起之前約左我堂家姐(&表弟)去九展睇BARNEY! 佢地又係遲到, 表弟叫極都唔起身, 起左身又唔郁唔去刷牙! 到我地已經去到九龍灣時, 佢地先係天水圍出門口! 當時因為時間緊迫正正差唔多就嚟12點, 所以我就搵左間拉麵館邊等位就邊等佢地!

我影左張相比堂家姐話我地係間拉麵館到等緊位, 點不知最細嗰個-表弟, 佢話佢唔想食拉麵, 要食SPAGHETTI! 我即時反應就係: 我而家排緊隊攞位, 唔會又去第二到再排過架喇, 如果想食SPAGHETTI的話, 下次就唔好遲到, 早D嚟就可以揀自己鐘意食嘅嘢!

當堂家姐到左時, 我都再一次同細嗰個講多一次我剛才番話, 係我字典裏面, 唔係你想我就要就你, 你乖就可以聽下你想點, 但曵就會乜都冇, 就連發言都冇權!

我唔明, 小朋友就想要人就佢啫, 就連個亞媽點解都唔去話比個仔知咩叫對與錯! 因為你唔起身, 而家遲到要人地等, 已經係唔啱, 仲想要有要求???  如果我係今朝係巴士嗰個亞媽, 我晨咁早就已經唔會再比選擇個仔食乜喇! 食就食, 唔食就吧!