痾屎唔出!

今晚收到個媽咪嘅Whatsapp, 內容如下:

Hi , 你好，
今天放學下午回家後，我個仔話在放學時，靖軒在校外圓圈公園的位置推跌了我個仔，佢撞倒那舊石牆边，擦損了少許。

其實我唔係想追究責任，因為小朋友玩耍時實有推撞，我只是想証實一下，我個仔所講的是否真實。

因為我個仔講的，與工人講的有出入，我只想教好我仔和工人。謝！

一睇完, 我即刻火嚟, 因為直接覺得佢話係因為滕滕推佢個仔, 所以另到佢仔隻手擦損! 叫我要教好我個仔!

睇完我即刻問個工人同滕滕, 我問完滕滕, 就問個工人係唔係咁, 再叫個工人做埋動作去演繹一次比我睇滕滕個同學係點樣擦損嘅! 我再三問滕滕有冇講大話, 如果冇我會信佢, 如果有我就會吊起佢嚟打! 我了解滕滕, 當事態咁嚴重時, 佢應該唔會講大話, 再者我話錯左講真話可以原諒, 但講大話就一定唔會原諒喇!

了解完之後, 其實只係兩個小朋友出左學校之後就癲左咁跑跑跑, 學校後面有幾條矮矮嘅小石柱, 就係因為兩個小朋友太貼近石柱咁跑, 而滕滕係出面, 嗰個同學就係係滕滕同石柱中間, 所以嗰個小朋友就係咁擦到條石柱, 手皮有小小擦損左!

小朋友玩得癲左就更有, 尤其係男仔, 擦傷小小我覺得唔係d咩大件事, 只要唔好整親面or頭就可以, 何需要咁樣將小事化大呢???

我唔知亦都唔想知嗰個媽咪究竟咩用意, 一開口就咁掘去話人地個仔推佢個仔, 但係我就好想問九佢, 佢個仔係唔係唔郁嘅先???  如果咁怕小朋友互相玩耍而有任何損傷, 咁不如考慮下個仔一放學就即刻入箱同佢番屋企啦, 但仍然都要考慮路途都有危險架喎???