FUNNY~

小朋友剛學識講嘢都唔算好笑, 我覺得而家好識講嘢嘅滕滕講嘢仲好笑!

話說滕滕發仔寒成日叫個老豆生個BB比佢之後, 佢就不斷咁張佢潛意識呢個思想轉化去佢D畫上面, 雀仔有左BB, 青蛙又係有左BB, 仲要同我講第日會生好多BB比我, 唔會好似佢老豆咁唔肯生比佢!

生左仔咁耐, 我老公D耐性一D都冇改變過, 仍然都係好衝動咁鬧左滕滕先!

有一日滕滕幫我夾餸落我個飯盒到, 點不知我一坐抵佢就望住我喊! 當時嘅我嚇左一跳, 仲咩事無啦啦咁慘係到喊, 我一問之下, 滕滕話幫我夾餸, 但係就比佢老豆鬧, 因為佢老豆以為佢係到攪攪震!  為左安慰個仔, 又唔想即時鬧佢老豆嘅不是, 我就同滕滕講, 佢唔知你原來咁乖幫媽咪夾餸呀, 因為你都知你平時成日攪攪震架啦, 所以爸B唔想你整到一枱都係啫! 過左一陣, 老公食完行開左, 滕滕就話: 我唔想要呢個爸B, 我可唔可以換過第二個呀? 而我就答滕滕, 佢咁衰成日鬧人, 一陣D湯我地兩個飲唔好比佢飲! 點不知滕滕好應同我咁話: 好呀! 我都唔想佢身體健康呀!

今晚, 又一爆笑嘅說話!  今日老公話等佢放工四點幾就去買餸打邊爐, 我等等等, 結果等到七點幾佢先打電話番嚟話趕唔切番嚟, 叫我地出去食! 我當然有話佢幾句啦, 等左成日乜嘢都standby 你, 居然七點幾先話番唔到嚟, 玩嘢咩! 收左線就唯有叫姐姐煮雲吞食! 一路食, 滕滕就同我講: 我未出世係你個肚嗰時, 你就唔好要呢個爸b啦! 你仲同佢結婚! 佢講過d嘢唔算數厄人, 真係衰到不得了! 早知嗰時你就唔好要佢啦!

我, 冇係滕滕面前抺黑過佢老豆, 只係佢老豆自己破壞佢自己嘅形象, 千祈真係唔好賴我囉!!!