今日同姨甥仔&佢嫲嫲去飲茶, 好彩今次呢條友仔冇唔應約, 因為老公個外甥大一年, 而家老公個外甥已經唔出現屋企食飯喇, 所以我而家覺得, 我姨甥仔就嚟可能會步入呢個階段.........
希望唔好有啦~
嫲嫲逢係節日假期, 佢都會番東莞住個幾星期, 而家先嚟同嫲嫲飲茶, 都正正係因為佢剛剛先番嚟HK! 嫲嫲好得意, 次次上大陸之前, 佢都會打比我話聲比我知佢番東莞, 因為佢知我耐唔耐會搵佢, 但係今次, 嫲嫲冇打比我, 而我又抽起左條筋想搵佢飲茶, 所以就打左長途比嫲嫲喇~
因為呢排D禽流感好勁, 而嫲嫲之前次次都買雞落嚟, 所以我打比嫲嫲叮囑佢唔好買雞, 就連雞檔都唔好行過, 因為嫲嫲本身個肺唔好, 提醒佢真係行都唔好行過去! 打電話比嫲嫲提醒佢, 係我不由自主地, 因為就算亞媽OR 奶奶番大陸, 我都會耐唔耐打比佢地, 所以其實對我嚟講打個電話並唔算係乜嘢, 但係就係呢一個電話, 就令到嫲嫲喊~
嫲嫲每一次見到我佢都好開心, 我同嫲嫲好好傾, 乜都傾得一餐, 因為我同嫲嫲性格好似, 一樣都係咁爽, 就連粗口我地都唔避忌, 所以一吹水起上嚟, 兩個都係暢所欲言, 就係因為暢所欲言, 所以嫲嫲一見到我好開心之後, 就同我講佢番左大陸成10日, 冇一個人打電話比佢, 除左我之外~ 講到呢句, 嫲嫲就喊左出嚟, 佢話佢生咁多個仔女, 為仔女做左咁多嘢, 佢真係唔明, 佢番左大陸成10日, 居然冇一個人搵佢!!!
係呢個moment, "打電話比嫲嫲"呢個行為, 令我覺得我做左呢樣嘢, 好似簡接hurt左佢咁.........
沒有留言:
張貼留言