一連串嘅生日party!

今日, 係我個肥滕滕新曆生日, 我叫晒三寶入嚟, 去pizza hut 食dinner!  舊年公公一聽到話去食pizza就有嘢不滿意, 但係我冇理佢, 因為係我個仔生日, 佢唔鐘意可以唔食, 照坐係到係唔會有問題架, 不過比我話佢, 有咩咪試下食囉(我呢個做女, 都幾鬼惡 ), 都未食就話唔好食, 咁點不知佢食完之後, 就話得閑食下都幾好! 所以今年我地又去食pizza喇, 因為滕滕鐘意就得!

今朝一起身, 我就同滕滕講 HAPPY BIRTHDAY~!!! 點不知個傻豬問我, 係唔係係屋企生日? 我答佢你係屋企生日, 番到學校都係生日, 今日太陽伯伯未落山你都係生日, 直到你今晚瞓覺前你都係生日! 但係講完, 滕滕都仲有問我, 佢係學校係唔係都生日?

今晚食飯行程都幾趕, 因為食完飯要係九點前去攞cake, 呢個cake係比滕滕聽日番學校開birthday party嘅(撞啱聽日就有生日會開喇~)! 所以食完就即刻去攞, 仲要同爸b分頭行事, 我埋單佢去攞cake 跟住要即刻番屋企, 因為條友仔食食下pizza 就話急C喎, 佢話不過唔會係街去, 一定要番屋企先! 所以真係趕到呢~

滕滕, 媽咪同爸B祝你身體健康, 開開心心, 聰明伶俐~ 我地永永遠遠都錫晒你!!!