好火滾呀!!!!!!!!!!!!!!!!!!!!!!

其實我奶奶對滕滕嘅方式, 一路以嚟我都唔認同, 因為佢對小朋友嘅方法係乜7嘢都佢鐘意, 尤得佢, 直接D, 就即係縱!

滕滕係兩歲幾嘅時候, 擒上個電視柜到, 跟住跳過去張SOFA到, 呢個行為動作, 奶奶叫"奀皮", 並唔係叫曳!

聽到嘅第一時間, 我都豪不避諱咁即話"吓! 咁都唔係叫曳??? 睇嚟你嘅觀感角度都好闊下喎!" 於是乎我又接住問奶奶, 如果佢個仔係細時, 呢樣又話唔食嗰樣又話唔食(因為老公而家就係咁), 請問佢又會點做呢?! 奶奶答我: 尤得佢囉~ 佢唔鐘意食咪比D佢鐘意食嘅比佢食囉! 我當堂即時好想拍手掌  , 我又再話: 唔怪得而家係個仔咁叉煩, 煮呢樣又咁, 煮嗰樣又咁啦!

奶奶擺明係一個慈母嚟! 如果唔係佢個仔點解會咁任性!

今日放工嗰時, 我又見到滕滕係個地下到玩玩具, 而奶奶就揸住個碗係到餵佢! 當堂真係, 所以我第一時間打電話番去, 問滕滕隻手係唔係有事, 點解會要人餵佢食飯!!!

真係無名火起三尺高, 所以我番去即時係我奶奶面前打手板!!! 我心知可能唔係滕滕要求要奶奶餵, 而應該係奶奶見佢食飯時又想玩, 所以就主動攞起個碗去餵佢! 做小朋友有邊個唔想有人餵佢食飯吖, 既然亞嫲咁錫佢, 滕滕當然好受落! 不過, 係我屋企唔可以有呢樣嘢發生囉!!! 自從滕滕自己識食飯以嚟, 我都要求佢要自己食, 除非去到尾聲知佢飽飽地, 仲剩抵一兩啖, 我先會去餵佢食埋!

我已經唔係第一次同奶奶講, 而滕滕亦都知道我要求佢係枱上面坐定定食飯, 絕對唔可以一路玩一路食飯! 既然奶奶咁鐘意去服侍個孫, 咁我唯有再比奶奶知, 佢越係縱佢, 我就會去罰佢! 因為滕滕而家並唔係BB, 我絕對冇過份要求, 因為我要求佢做嘅嘢佢係識, 而且佢係明白!

因為滕滕呢排唔知仲咩事成日蝦小朋友, 所以打手板就唔只係因為食飯問題, 仲包括埋蝦小朋友! 我問滕滕係唔係覺得蝦小朋友時好威好勁吖, 點解成日要咁樣去對D小朋友??? 唔係篤人隻眼就篤人個鼻, 再唔係就好high咁去堆人地! 每一日上完堂之後, 姐姐就會即刻打比我話滕滕又蝦小朋友! 天啊~ 究竟發生過d咩事??? 點解你日日都要咁做呀???

我氹過, 勸過, "鵝"過, 解釋過, 鬧過, 再唔可以蝦小朋友, 但係呢條友仔真係講極都係咁, 既然係咁,我就堅教訓你一次!

奶奶份人真係好天氣, 佢從來都冇懷疑過我有d嘢係做比佢睇, 佢只係個心諗係自己連累到個孫比亞媽打手板! 當我教訓完滕滕之後佢先開始出聲, 叫滕滕記住以後唔可以蝦小朋友, 傷害左人地就會冇小朋友同佢做朋友!