真係驚到瀨尿!!!

我從來都冇諗過係滕滕4歲就已經遇到呢D咁嘅問題, 究竟係而家D小朋友心智發展得咁快, 定係我個仔早熟呢???

尋晚差唔多十點, 姐姐係放麵包嘅背心膠袋到搵到盒糖!

姐姐問我係咩嚟, 我就問番姐姐點解會有! 姐姐一嚿雲咁, 咁我就問你地係唔係今日去過超市呀, 姐姐就開始知道發生d咩事咁就同我講: "因為怕軒軒攪嘢, 所以我叫佢幫我攞住袋麵包囉!"

姐姐講完, 我地就開始轉移視線, 兩個都望住滕滕, 而我就問滕滕盒糖係唔係係超級市場到攞架?! 滕滕當時就開始驚咁係到點頭!

死啦! 攞左盒糖又冇比錢, 咁即係偷嘢啦! 真係死唔死吖, 我從來都冇諗過咁快就會遇到呢d事, 真係冇諗過滕滕4歲就出現呢個行為囉!

我: 你知唔知每一樣嘢, 都要比錢架!

滕: 我知!

我: 咁點解你唔出聲就咁就放左落個袋到吖?! 你點解要咁做???

滕: 我想比姐姐糖食!

我: 你知唔知你唔出聲就咁就袋左落袋唔比錢, 如果比人捉到你, 人地係可以call 差人叔拉你, 咁你就唔可以番屋企架喇! 你知唔知supermarket 裏面好多視視眼睛, 人地睇番就會睇到係你偷左盒糖冇比錢就走! 你係唔係想一落街經過supermarket比人一認就認到你, 然後捉住你再call 差人叔拉你呀!  咁你想比糖姐姐食! 你都要比錢架!......我想問你, 當時你冇比錢就走, 你驚唔驚架?

滕: (點頭話驚)

我: 驚! 咁點解你當時驚都要做吖! 媽咪咁大個女都唔敢唔比錢就攞嘢走, 因為我知道咁做唔啱而且仲會比差人叔拉架!

"鵝"完佢一輪之後, 尋晚佢就瀨左兩次尿! 佢真係名副其實嘅驚到瀨尿呀!

原本我同滕滕講今朝落左去超市, 同左個叔叔講對唔住, 仲比番錢佢, 不過同堂家姐商量完之後, 我就決定今晚放工番去直頭帶滕滕落去!

滕滕聽到我話"超市個叔叔話要你自己去講對唔住先原諒你", 佢都冇話say no, 都即刻同我一齊落去, 係差唔到就到時, 滕滕同我講"媽咪我好驚!", 真係傻豬囉, 我同得佢落去唔通走左去咩, 所以我都安慰滕滕話我一定會陪住佢, 只要佢承認錯, 以後唔再做, 咁個叔叔就會原諒你架喇!

好彩當時超市唔多人囉, 我拖住滕滕去左office到, 當時只係有兩個人係入面, 咁我就解釋比佢地知尋日咁咁咁, 而家想嚟比番錢, 然之後跟住就叫滕滕say sorry, 我以後唔會, 請你原諒我唔好叫差人叔拉我啦!  其中一個年紀大小小嘅女人當時都好溫柔咁同滕滕解釋咁樣做係唔啱, 以後真係唔可以, 因為咁樣做會前途盡毀! "前途盡毀"呢個term我話佢未識, 佢只係知會比差人拉左唔可以番屋企咋, 而個女人亦都再一次好溫柔咁同滕滕講下次真係唔可以架喇, 因為下次唔會原諒架! 而我, 亦都叫滕滕再一次講: "我下次真係唔會, 我會記得, 以後唔會再做架!"

話說完個女人幫我嘟番盒糖, 咁我比左錢唔該佢就走喇! 走左之後, 我問滕滕係唔係放心晒同安落晒呢~! 同埋, 我好亦都再一次好認真咁同滕滕講真係以後唔可以, 因為下次人地真係唔會原諒佢架喇!

滕滕本身好奇心大我都知, 但係我估唔到佢咁大膽! 諗得到出嚟, 都仲要有膽量先會去做, 呢樣嘢真係我unexpected 囉!

我希望今次帶左佢落去等佢面對自己嘅錯事之後, 真係唔希望佢下次會再係咁..........