邊個小家?

其實究竟係唔係我個問題呢? 我諗左一輪, 唔通問題真係我? 因為我朋友笑住話係我嘅問題!

其實我已經好容忍架, 當滕滕出牙時不停咁咬嘢, 咬爛晒張sofa d 皮, 我堂家姐就話我個仔有病! 當滕滕兩歲幾講嘢都仲未係好叻時, 我堂家姐又話我個仔有問題! 當滕滕剛5歲冇幾耐就已經甩左一隻牙, 我堂家姐又話我個仔係唔係有問題!

點解佢個仔早小小做嘅嘢, 而我個仔未做, 就係我個仔有問題! 佢個仔未做, 而我個滕滕就做左先, 亦都係我個仔有問題! 點解乜撚都要攞佢個仔嚟做比較???!!!

佢個仔又古惑又唔聽話, 講道理唔聽唔做, 做功課幾乎晚晚都小吵, 一個月總有兩三次大吵, 永遠有個仔講點都要人服從佢, 咁佢個仔冇問題咩?

其實我都唔想數佢! 但點解永遠成日都要話我個仔有問題!

我個仔除左力大無窮成日都整爛嘢, 耐唔耐百厭叫整都係瘋癲狀態之外, 我唔見得我個仔唔乖喎, 起碼我從來都冇因為佢D功課而勞氣過, 滕滕亦都唔會因為唔服氣而鬥氣, 因為佢從來都唔會唔服氣, 亦都極少發皮四, 再者滕滕唔會唔聽我講道理囉!

再講, 我舊工人姐姐到而家仲whatsapp滕滕d相比我, 又whatsapp我送比佢嗰d禮物嚟say thank you to me, 我話個舊工人如果番嚟香港做, 真係可能想番嚟同我做! 只係講左兩句啫, 就好唔抵得咁話到時發生d咩事都冇人知!

今個暑假, 係我堂家姐主動話要同滕滕一齊嚟我屋企附近學游水, 因為開班嗰個私人屋苑係我堂家姐個朋友嘅屋苑嚟, 舊年我地上過一季環境10分之唔錯而且又乾淨! 但係我話星期六咁早要起身搭成個鐘車過嚟會唔會辛苦左d呀! 以我堂家姐嘅懶勁嘅性格, 佢答我, 絕對一d都唔係問題喎!

我一早已經睇死佢唔會過嚟, 因為連埋要早起身嗰個幾鐘, total 要早兩個幾鐘起身, 跟本就冇可能! 所以當我堂家姐話最尾兩堂可能要改平日上, 一陣又話錢唔係問題, 一陣又話要睇住個仔上(堂), 一陣又乜乜七七之後, 問左兩個星期佢都冇再同我講過上唔上喇!

我之前已經講明, 佢上唔上我都會照上, 所以佢問咁多嘢之後, 唔上堂我已經預左佢, 所以我send whatsapp 問佢係唔係已經幫我報左名啦, 點不知過左一陣佢覆番我問我, 乜我唔係自己報名咩?!

吊那星~ 玩嘢咩!!! 我唔係係嗰到住點報呀??? 而家我個仔唔怕學游水, 又係我個仔有問題呀???  拖左我咁耐, 問左我咁多條游水嘅問題, 又話同其他興趣班撞時間上少一兩堂就錢唔係問題, 咁final 唔上又唔出聲, 而家仲問我乜唔係我自己報!  乜你會覺得拖左我咁耐我就會頂你唔順自己去報咩?

我真係唔想咁諗佢係妒忌我, 但我真係覺得係囉, 如果唔係, 仲咩事要玩九我先???