尋日朝去買飛睇戲就撞到滕滕個同學, 呢個同學個媽媽都算健談, 佢見我之前問佢有冇識人係一個私人屋苑住, 佢就問番我報唔報到嗰到嘅泳班, 咁我又見佢咁問, 所以我就循例咁問下佢個仔一唔一齊學!
點不知佢答我, 佢個仔覺得稍為覺得辛苦小小嗰D就唔學架喇, 最好比佢唔好點郁嘅就可以囉!
吹完兩句水之後就走, 當其時我滿腦子真係10萬個為什麼, 點解而家D家長, 可以尤得佢地嘅小朋友想點就點嘅! 小朋友始終都係小朋友, 佢地咁細個跟本就唔識去分辨事物, 我地作為父母乜唔係鼓勵佢地去比心機努力向上, 遇到困難就要去克服架咩???
就好似另外有個媽媽咁, 佢個仔怕水, 但媽媽就想佢去學游水, 希望身體可以強壯D唔好成日病, 個爸爸聽到個老婆話今個暑假又想去幫個仔報泳班時, 就不停咁問會唔會有危險架, 個泳池D水會唔會太深架, 係暖水池定凍水池嚟架, 會唔會太凍架, 最攪笑就係亞媽又和應喎, 呢D所有嘅對話都比個小朋友聽到晒, 咁明明個仔只係小小驚都變左多多驚啦! 個媽媽同我講番佢兩公婆嘅對話時, 我即時就講, 你冇嘢吓嘛, 你其實係想嚇佢唔好去上泳班囉!你老公有冇腦架, 講明係for 3-5歲嘅小朋友, 你覺得人地會唔會比個大人池你去上堂呀!
真係覺得而家世界變左, 所以先咁多公子&公主出嚟. D家長寧願去比錢小朋友上堂去學習自立, 咁不如比錢自己上堂先囉~
都係呀, 有時問d 朋友去唔去邊度玩, 參唔參加d 活動, 佢地會答問下個仔先。唔知係想洒我或真係會問。我幫阿仔參加d 乜班乜班, 從來唔會問佢。係我同我老公決定的。例如初初上台拳, 佢都唔 like, 我同我老公就一定要佢上, 等佢比人鬧下, 學服從, 做運動。至於 swimming, 佢都唔係咁想, 我同佢講, 媽咪唔識swimming, 佢要學識來保護我。(不過,佢叫我跟埋佢去學, 咁我都識~)
回覆刪除你講嗰D人, 我堂家姐就係其中一個, 佢就係下下都走去問個仔去唔去玩唔玩, 所以答你嗰D人應該唔係洒你, 因為真有其人!
刪除