講完又講! 講完又講!

滕滕越大, 我就開始覺得有壓迫感, 因為佢講嘢越嚟越似我, 仲用番我d說話嚟對付我! 

小朋友想食糖, 通常都會窮追猛打咁係咁問我, 而滕滕都唔例外, 不過佢問左幾次之後, 我會頂佢唔順去stop佢, 就同佢講: "點解你問完又問問完又問問完又問問完又問架啫! 你問咁多次我都係唔會比你架啦! 你唔好以為問多幾次就有先得架! 如果你再問, 就聽日都唔洗指意有得食呀!"  講完, 滕滕就會stop左, 唔敢再問架喇, 因為佢知道如果佢再問, 真係連第二日都會冇得食!

呢條友仔, 去完旅行番嚟都已6日, 個心情仍然都仲係處於高漲, 仲要係停唔到嗰隻, 因為今日第一日番番學, 就已經比老師投訴打嚟同我講, 佢今日out of control, 而且係學校仲向同學揮拳! 老師而且仲話滕滕佢個心情仍然係忘我, 上堂時不停咁同同學講嘢, 已經叫左佢停, 但係仍然仲係收唔到聲! 結果, 老師就拉左佢去佢身邊, 既然佢咁多嘢想同人講, 就不如同佢講下佢有幾開心!

唉~ 真係死唔死吖! 居然仲仍然係處於瘋癲嘅階段! 所以同老師通完電話之後, 我就打番去話, 未來呢幾日都唔可以睇電視, 唔可以落公園, 只可以揀一架車玩, 其實玩具全部起收埋晒, 仲有, 今個星期嫲婆公一個都唔准入嚟, 直到個人平伏番為止!

滕滕去旅行嗰幾日, 已經都係痴左線, 最尾嗰日我已經忍唔住o趙左佢一餐, 所以老師今日打嚟之後, 我唔想再o趙佢, 於是我就係咁"rum"佢, 番到屋企"rum", 瞓前又"rum", 傾完計又"rum"! 結果滕滕頂我唔順同我講: "媽咪! 點解你講完又講講完又講講完又講架啫(足足重覆左三次)!!! 究竟你悶唔悶悶唔悶架(呢次又重覆左兩次)!!!"