乖仔~

自從我同滕滕都知道佢左隻有問題之後, 佢都知道自己要戴眼鏡, 而且一定要長期戴住眼鏡, 隻左眼先可以用番, 所以佢冇咩點抗拒!

不過有時做父母就真係好擔心同唔開心知道自己仔女有事囉! 有一晚我問滕滕, 其實佢係唔係知道自己一隻眼睇嘢清楚, 而一隻眼睇嘢係蒙查查架?! 滕滕點頭! 仲要係好用力去點!

點解? 點解自己個仔隻眼有事, 我一D都察覺唔到架??? 醫生話因為佢右眼係冇事,所以我係好難去知道原來佢睇嘢係唔清楚! 但係, 我覺得唔係藉口囉, 點解我咁大意一D都留意唔到!!!

尋日下午, 有電話打嚟話可以提早今日去攞眼鏡喇! 同滕滕出去時, 佢都好似平時咁一樣痴左線咁開心!

我成日都仍住佢有小小唔開心囉, 因為上次係醫生到驗眼, 明明都冇尿痾佢都話急, 咁我就知佢心情有變化! 小朋友唔識表達, 我明白, 所以我而家就算知佢左眼差, 我都盡量去講多D嘢去鼓勵佢要記得戴眼鏡, 叫佢記得成日戴住就會快D好番冇事!

副眼鏡, 我點都要搵副綠色嘅比佢, 因為滕滕好鐘意綠色, 所以就算戴左眼鏡變左四眼豬仔都好, 副眼鏡都係佢最鐘意嘅顏色嚟!

左邊塊鏡片真係幾厚囉~  今日亞婆生日, 見到咁晒公婆舅父, 個個一睇就睇到佢隻左眼好深!

聽日我唔會要佢貼眼貼住, 等佢戴一日去適應下先, 星期二我先同佢貼, 貼左先入學校! 我已經同左老師講喇, 如果見到佢貼左眼貼番嚟, 就幫我去同小朋友解釋下滕滕隻左眼要練習, 所以先貼住膠布一段時間!

雖然老師話會幫我同D同學講, 盡量都唔好比滕滕有hard feeling, 但係呢樣嘢我都真係最擔心囉.........