仲嬲我咩???

今晚個forwarder 請團年食飯, 食完番到屋企九點九, 以為滕滕瞓左啦, 原來仲未瞓, 咁我就洗左雙手, 換左d衫諗住同佢瞓, 叫個工人番去自己房瞓, 點不知滕滕又話唔要我, 要姐姐!

佢以前唔會咁架, 就算我番左嚟, 佢都同姐姐bye bye架,但係佢今晚又話唔要我喇, 唔知係唔係佢自從上次佢曵, 唔帶佢去食飯, 咁佢就以為我唔番嚟食飯, 係因為佢又曵唔帶佢出去?

聽到滕滕話唔要我, 我都幾hurt架, 我氹佢又話同佢唱歌, 佢都係到大喊話要姐姐!

咁點呀? 我已經用好溫柔嘅聲線嚟氹佢話同佢瞓架喇, 佢又係話唔要我, 跟住之後我問佢學校d嘢, 佢先冇事咋! 不過差唔多講完, 佢就推我個頭叫我去沖涼喇! 我話我沖左喇, 佢就死都話我未沖, 死都推我起身去沖涼! 咁我問佢, 我沖涼咁你係到做咩呢?! 佢答我, 軒軒係到囉, 唔瞓呀! 哦, 原來係唔想瞓住!

結果, 我叫個工人入嚟睇住佢, 我就快沖, 沖完, 佢就話要幫我吹頭, 最後都冇再嘈話唔要我同佢瞓喇!

唉~ 係唔係我上次罰得佢甘得济呢???