2012年6月15日 星期五
刻薄雞~
小學就有小學雞, 咁呢馮小姐就應該叫佢做刻薄雞喇!
馮小姐呢排, 都唔知揪起條咩筋, 係咁同我講佢工人D嘢, 下下講完都比我話佢! 尋日, 佢又嚟喇!
馮小姐問我下個星期六係五月初五, 個工人係唔係連續放兩日假, 因為端午節係勞工假嚟, 所以我答佢係! 馮小姐聽到我話係, 佢就即刻話: 又放兩日! 佢地又放假! 我都唔知佢地仲咩要放假! 端午節都唔關佢地事, 仲咩佢又有份放架!
一聽完, 我就二話不說咁答佢: 嘩! 你都好刻薄下喎! 你係唔係想用到佢盡, 用到佢謝, 用到佢梅你先安落呀??? 咁人地嚟hk打工, 咁就更係跟hk勞工法例放假架啦! 咁如果你去美國做嘢, 人地話你都唔係美國人, 又問你你跟美國假期嚟放假仲乜叉嘢先?! 咁你會點呀???
比我話完就收口喇! 不過, 又再講第二樣, 又話個工人有晚已經上左床瞓喇, 不過佢個仔無啦啦就係咁係到喊, 但係個工人就出都冇出嚟問過咩事, 又唔問下佢使唔使幫手,因為佢覺得個工人應該係要主動問佢太太有冇嘢可以幫手喎! 我問佢仲咩要個工人幫手都唔叫佢? 仲咩要諗住人地應該要主動問你啫? 如果你覺得個工人應該當你地係一家人咁, 咁你有冇當個工人係一家人先? 個工人又唔係你屋企人, 佢只不過係一個工人, 咁你有嘢叫佢做, 可以直接叫佢架, 咁請問你平時係唔係對佢好好先, 覺得你有事就第一時間飛奔過嚟問你太太有冇嘢要幫忙先?
我問完馮小姐呢大輪問題之後, 佢更係又唔出聲! 因為佢點對個工人, 佢心知肚明, 不過, 我最唔明就係, 佢點對個工人, 個工人就比番D咩佢, 點解佢都仲要去苛求一D冇可能嘅嘢呢?
訂閱：
張貼留言 (Atom)
都係果句。對個工人唔好 => 搵自己 d 仔女教飛。抵能。
回覆刪除仲有如果 d 工人真係咁醒, 話頭醒尾, 樣樣自動自覺, 事事100 分, 佢唔使周你打工喇。
[版主回覆06/19/2012 14:32:59]佢如果識得諗, 就唔會話"好彩個仔唔跟個工人"啦!
同埋, 馮小姐本身個人都唔係話頭醒尾, 所以佢更係唔會諗到咁多嘢! 因為佢d水平只係高過d工人小小小小咋!
你直接答佢． 因為個工人憎你． 咪明知你個仔喊都唔出黎幫手囉． 好簡單啫． 咁都唔明？！！ [/img]
回覆刪除btw, 刻薄雞哩個名, 改得好到不得了[img](rolling on the floor)
[版主回覆06/19/2012 14:34:36]"因為個工人憎你． 咪明知你個仔喊都唔出黎幫手囉． 好簡單啫． 咁都唔明？！！" <---- 呢個太直接喇, 最好比番d空間佢自己諗諗, 佢邊方面係對過個工人係好小小(只係好小小)!
佢呢啲極品，真係無說話好講!
回覆刪除[版主回覆06/22/2012 09:42:32]佢地呢d蠢雞, 叫佢做嘢就豬咁蠢又懶, 但係搵人著數佢又諗到囉~
一睇個標題就知又係佢喇....你下次問埋呢隻雞, 人地新年佢又放唔放俾人呀?佢嗰個係印定賓呀?
回覆刪除[版主回覆06/22/2012 09:43:33]我今次都已經串爆佢喇, 下次佢再講, 我先再問佢係唔係比人地放工人嘅新年年假! 睇佢死未!