毛管動~~~

尋日約左個朋友lunch, 佢個仔大滕滕半歲!  因為佢落堂係12點鐘, 而滕滕落堂就係1點, 所以佢地放左學就過嚟搵我地喇!

差不多1點, 朋友打嚟比我, 佢話係附近, 叫我出門口搵佢! 我一行出去, 望望望, 見到嚟遠(唔算係好遠)我朋友企左係到, 而佢個仔, 係佢腳下, 係係佢腳下發緊癲!

我行到埋去, 佢個仔係到大叫大喊, 又出"權"頭用力咁打向佢隻腳到, 叫極都唔聽!

我朋友同我講, 佢個仔呢兩個月忽然變左咁! 係變左另外一個人, 突然有嘢想要而唔得, 就會係街到大吵大鬧, 瞓地dum地, 成個人瘋癲咁, 而且眼神兇惡!

當朋友強梗咁抱起佢個仔之後, 佢個仔突然一個兇惡眼神望左我一下! 只係一下! 

朋友話, 佢老爺臨過身之前同佢講, 叫佢唔好打呢個孫, 因為佢奶奶(都已經過左身)好錫呢個孫, 叫佢一定唔好打佢!

因為朋友老爺係年頭or年中咁上下唔係到, 但係佢個仔無啦啦之前有一日同朋友講: 爺爺嚟接我!

聽到朋友仔咁講, 真係當堂毛管都動埋, 而我, 又再一次叫佢去快d燒嘢!

食完lunch冇咩好做, 就上左嚟我屋企坐! 朋友個仔, 又因為一d嘢唔比佢玩, 佢又突然間咁即刻變左另外一個人, 又係到大喊又叫, 又瞓地又dum地! 原本起初我都抱實佢個仔唔比佢發癲, 但係過左5分鐘, 佢個仔都仲係癲左咁, 朋友就抱起佢放左佢個仔係門口, 尤得佢係地下發癲!

戰鬥力好強, 成15分鐘先開始減退(但係都仲大叫大喊)! 朋友同我講, 佢個仔話要去痀vivi,叫我幫佢去同個仔去痀(因為佢唔想以為個仔覺得佢屈服)! 去toilet時, 佢個仔已經開始冷靜落嚟, 去完toilet之後, 成個人又唔同晒, 好似變左第二個仔, 變左正常番........

滕滕見到個小朋友咁, 我知道佢都有小小驚, 因為唔好講滕滕, 我都係第一次見到有小朋友咁! 可能仍住有唔妥, 所以感覺上唔係個小朋友曵咁簡單! 所以我又再一次同朋友講, 真係好快d去問下紙扎鋪, 快d去燒嘢!

尋晚, 我成晚都瞓得唔好! 瞓下醒下! 而滕滕成晚耐唔耐又叫一聲, 耐唔耐就嘈下!

唔係迷信, 但係仲感覺好唔舒服, 因為小朋友曵, 唔會咁突如其來, 亦都唔會突然間變番冇事, 同埋, 佢個仔喊時, 全程係望都唔望人, 而係啤住某個位, 眼神, 跟本就唔同其他小朋友咁! 因為小朋友扭計, 一定會望住亞媽, 因為點都想睇下亞媽點! 所以真係勁唔對路!