學我~???!!!

因為係手冊寫左D嘢問老師, 所以今日下午老師打比我覆番我滕滕呢排學校情況!

回覆情況OK, 冇早兩個星期咁, 真係比老師投訴佢超級曵! 老師話佢, 滕滕日日都要比佢先安落!

更係啦, 我而家日日都叫佢乖, 要聽老師話, 要聽姐姐話, 要做個乖寶寶! 講到自己都覺得個口嗅嗅地都仲要同佢講, 講, 講..........

老師仲話佢呢排講嘢好老積, 係學校, 佢成日都張個頭"HOME"埋去個同學到問 "XXX...., 好唔好呀?" 老師話聽到佢咁講嘢好想笑, 一方面係到諗滕滕係唔係學左佢講嘢, 定係學我講嘢!

其實唔使咁頭痕, 因為我番到屋企, 有時都仲係到做緊嘢/打上去廠, 而條友仔就會耐唔耐過嚟攪我, 咁我就會同佢講 "媽me而家做緊嘢, 一陣先同你玩, 好唔好呀?" 又或者我食緊飯佢又會過嚟攪我, 咁我又會同佢講 "媽me食緊飯, 一陣先同你玩, 好唔好呀?"

所以好明顯係-學我!

同老師講開, 有一樣嘢仲好笑, 就係星期日係屋企執衫換季, 我同滕滕講執完d衫先同佢去食tea, 過左陣, 滕滕入嚟見到好大堆衫係張床到就講: "咁多衫?! 唔係呀嘛!"

因為係臨瞓前, 我都會問下滕滕今日係學校食左d乜, 佢就會答我佢食左兩個/三個包包, 咁我聽到就會話: "咁多?! 唔係呀嘛!"

所以好明顯係-學我!